រាជធានីបាងកក៖ ក្រោយពេលវិលត្រឡប់ មកដល់ប្រទេសកំណើតវិញ បន្ទាប់ពីបានរស់នៅនិរទេសខ្លួន ដោយខ្លួនឯង អស់រយៈពេល១៥ឆ្នាំ ចាប់តាំងពីពួកយោធា បានធ្វើរដ្ឋប្រហារបណ្ដេញចេញពីអំណាច កាលពីអំឡុងឆ្នាំ២០០៦ រហូតមក ឥឡូវនេះ លោក ថាក់ស៊ីន ស៊ីណាវ៉ាត្រា (Thaksin Shinawatra) អតីតនាយករដ្ឋមន្រ្ដីថៃ បានស្នើសុំព្រះរាជទាន លើកលែងទោស ពីព្រះមហាក្សត្រ ខណៈគាត់កំពុងតែស្ថិតក្នុងពន្ធនាគារ។

សារព័ត៌មាន Channel News Asia បានចេញផ្សាយ កាលពីព្រឹក ថ្ងៃសុក្រ ទី១ ខែកញ្ញា ថា រដ្ឋមន្រ្ដីថៃមួយរូប បានបញ្ជាក់ កាលពីថ្ងៃព្រហស្បតិ៍ (ទី៣១ ខែសីហា) ថា អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត្រា ដែលកំពុងតែជាប់ពន្ធនាគារ បានស្នើសុំព្រះរាជទាន លើកលែងទោស ពីព្រះមហាក្សត្រ ដោយសារតែមានពាក្យចចាមអារ៉ាម ជុំវិញកិច្ចព្រមព្រៀង នៅពីក្រោយបញ្ហានេះ។

លោកមហាសេដ្ឋី វ័យ៧៤ឆ្នាំ ធ្លាប់ជាប់ឆ្នោត ជានាយករដ្ឋមន្ត្រីថៃ ចំនួន២លើក ហើយត្រូវបានបណ្តេញចេញពីអំណាច ដោយអំពើរដ្ឋប្រហារយោធា នាអំឡុងឆ្នាំ២០០៦។ ប៉ុន្ដែកាលពីសប្ដាហ៍មុន គាត់ត្រូវបានបញ្ជូនទៅពន្ធនាគារ បន្ទាប់ពីគាត់បានវិលត្រឡប់ មកកាន់ប្រទេសកំណើតវិញ ក្រោយការនិរទេសខ្លួន ដោយខ្លួនឯង អស់រយៈពេល១៥ឆ្នាំមក។

ការវិលត្រឡប់មកកាន់ប្រទេសកំណើតរបស់លោក ថាក់ស៊ីន បានកើតឡើង ស្របពេលគណបក្សភឿថៃរបស់គាត់ បានវិលត្រឡប់មកដឹកនាំរដ្ឋាភិបាលឡើងវិញ នៅក្នុងសម្ពន្ធភាពគណបក្សចម្រុះ ភាគច្រើន គាំទ្រដោយពួកយោធា។ សកម្មភាពបែបនេះ បាននាំឱ្យមានការរំពឹងទុកយ៉ាងទូលំទូលាយ ថា ពិតជាមានកិច្ចព្រមព្រៀងណាមួយមួយ សម្រាប់កាត់បន្ថយពេលវេលាជាប់ពន្ធនាគាររបស់លោក ថាក់ស៊ីន។

លោក វីសសានូ ក្រាង៉ាម (Wissanu Krea-ngam) រដ្ឋមន្រ្ដីក្រសួងយុត្ដិធម៌ចាំផ្ទះ បានបញ្ជាក់ ថា «លោក ថាក់ស៊ីន បានដាក់ពាក្យស្នើសុំព្រះរាជទានលើកលែងទោស ពីការជាប់ពន្ធនាគារ រយៈពេល៨ឆ្នាំ ស្របពេលគាត់កំពុងតែជាប់ទោស ពីបទពុករលួយ និង ការរំលោភបំពានអំណាច។ យើងក៏បានទទួលសំណើសុំការលើកលែងទោសនេះរួចមកហើយដែរ ប៉ុន្ដែទោសទណ្ឌដែលនៅសេសសល់ នឹងចាត់ការបន្ដតាមនីតិវិធី»។

លោករដ្ឋមន្រ្ដីក្រសួងយុត្ដិធម៌ បានឆ្លើយតប ជុំវិញនឹងសំណួរ អំពីពេលវេលា ត្រូវចំណាយលើការលើកលែងទោសនោះ ថា «ករណីនេះ អាស្រ័យទៅលើព្រះមហាក្សត្រសុទ្ធសាធ ហើយនីតិវិធីពីរដ្ឋាភិបាល នឹងមិនយូរប៉ុន្មាននោះឡើយ។ ប៉ុន្តែការលើកលែងទោសនេះ នឹងអាស្រ័យទៅលើរយៈពេល សម្រាប់ព្រះរាជតម្រឹះរបស់ព្រះមហាក្សត្រ»។

បើតាមច្បាប់ថៃ អ្នកទោសអាចដាក់ពាក្យសុំនូវការលើកលែងទោស ហើយត្រូវបានយល់ព្រមពីរដ្ឋមន្ត្រីក្រសួងយុត្តិធម៌ តាមរយៈនាយករដ្ឋមន្ត្រី បញ្ជូនទៅកាន់ក្រុមប្រឹក្សាព្រះមហាក្សត្រ នៅមុនពេលថ្វាយដល់ព្រះមហាក្សត្រថៃ ម៉ាហា វីជីរ៉ាឡុងកន (Maha Vajiralongkorn) សម្រេចព្រះទ័យ ព្រះរាជទាន លើកលែងទោស៕

កាហ្វេ គឺជាភេសជ្ជៈដ៏ពេញនិយមបំផុតនៅក្នុងពិភពលោក។ មនុស្សជាច្រើនតែងតែផឹកកាហ្វេជាប្រចាំដើម្បីបង្កើនការប្រុងប្រយ័ត្ន និងបង្កើនផលិតភាព។ ទោះជាយ៉ាងណាក៏ដោយ តើអ្នកដឹងទេថាពេលណាជាពេលល្អបំផុតដើម្បីផឹកកាហ្វេ? ដូច្នេះហើយខាងក្រោមនេះគឺជាពេលវេលាដ៏ល្អបំផុតដើម្បីទទួលបានអត្ថប្រយោជន៍ជាច្រើនពីកាហ្វេ៖

ជាទូទៅ ពេលវេលាដ៏ល្អបំផុតដើម្បីផឹកកាហ្វេគឺ ចន្លោះម៉ោង ៩:៣០ ដល់ ១១:៣០ ព្រឹក ព្រោះក្នុងអំឡុងពេលនេះរាងកាយបញ្ចេញអរម៉ូន cortisol ដើម្បីរៀបចំសម្រាប់ការងារឬសកម្មភាព ក្នុងជីវិតប្រចាំថ្ងៃ ជាតិកាហ្វេអ៊ីនក្នុងកាហ្វេប្រឆាំងនឹងឥទ្ធិពលរបស់អ័រម៉ូន cortisol ធ្វើឱ្យរាងកាយមានអារម្មណ៍ស្វាហាប់ និងស្រស់ស្រាយជាងមុន។ ប្រសិនបើអ្នកផឹកកាហ្វេមុនម៉ោង ៩:៣០ ព្រឹក ជាតិកាហ្វេអ៊ីននឹងចូលទៅក្នុងខួរក្បាលរបស់អ្នកច្រើនពេករហូតដល់ធ្វើឱ្យអ្នកមានអារម្មណ៍ថប់បារម្ភ ឬគេងមិនលក់។

ទោះជាយ៉ាងណាក៏ដោយ ពេលវេលាត្រឹមត្រូវក្នុងការផឹកកាហ្វេអាចប្រែប្រួលពីមនុស្សម្នាក់ទៅមនុស្សម្នាក់ វាអាស្រ័យលើកត្តាដូចជាចង្វាក់នៃការគេងរបស់អ្នក កម្រិតស្ត្រេស និងសកម្មភាពប្រចាំថ្ងៃ។ បើរកឃើញថាផឹកកាហ្វេគ្រប់ពេលហើយមានអារម្មណ៍មិនស្រួល អ្នកគួរព្យាយាមកែតម្រូវម៉ោងកាហ្វេឱ្យសមនឹងខ្លួនឯង។
ក្រៅពីម៉ោងផឹកកាហ្វេ បរិមាណកាហ្វេដែលអ្នកផឹកក៏សំខាន់ផងដែរ។ អង្គការសុខភាពពិភពលោកបានណែនាំថាអ្នកមិនគួរផឹកកាហ្វេលើសពី ៤០០ មីលីក្រាមក្នុងមួយថ្ងៃ ដែលស្មើនឹងកាហ្វេប្រហែល ៤-៥ ពែង។ កាលដែលអ្នកផឹកកាហ្វេច្រើនពេក អាចធ្វើឱ្យចង្វាក់បេះដូងលោតញាប់ គេងមិនលក់ ឬមានជំងឺពីកំណើតដូចជា ជំងឺបេះដូង ជំងឺលើសឈាម ឬជំងឺរលាកក្រពះ ជាដើម៕
ប្រភព៖sanook

សត្វប្រកួយសមុទ្រហ្វីលីពីន (The Philippine sailfin lizard) ត្រូវបានគេទទួលស្គាល់ថា វាមានរូបរាងដូចទៅនឹងសត្វនាគ ហើយបច្ចុប្បន្នវាបានលេចវត្តមាននៅបណ្តាកោះមួយចំនួននៅប្រទេសហ្វីលីពីន។

សត្វនេះ ជា​ប្រភេទ​សត្វ​ត្រូវបានគេអភិរក្សនៅ​ក្នុង​ប្រទេស​ប្រទេស​ហ្វីលីពីន ហើយ​វាក៏​ជា​គោលដៅ​សម្រាប់​ទាក់ទាញភ្ញៀវទេសចរណ៍មកទស្សនាសត្វដ៏កម្រនៅលើលោកមួយនេះផងដែរ។

អ្វីដែលគួរឱ្យចាប់អារម្មណ៍នោះ សត្វនេះអាចរត់លើផ្ទៃទឹក ដោយប្រើជើងទាំងពីរបានថែមទៀតផង។ ដោយសារតែរូបរាង និងសម្រស់ប្រៀបបានទៅនឹងសត្វនាគ បានធ្វើឱ្យសត្វប្រកួយសមុទ្រហ្វីលីពីន រងការគំរាមកំហែងពីសំណាកការបរបាញ់ ដោយភាគច្រើនគេចាប់វាយកទៅធ្វើជាសត្វចិញ្ចឹម។

ដោយឡែកចំពោះការបន្តពូជវិញ សត្វនេះអាចបង្កកំណើតបានមួយឆ្នាំម្តងតែប៉ុណ្ណោះ ដោយជាធម្មតាចន្លោះពី២កូន ទៅ៨កូន។ ស៊ុតទាំងនេះត្រូវបានកប់ទៅក្នុងដីរយៈពេលពីរខែមុនពេលញាស់

ជាទូទៅសត្វនេះ មានតែ៥អម្បូរប៉ុណ្ណោះ ក្នុងនោះ៤អម្បូរ រកឃើញក្នុងប្រទសឥណ្ឌូនេសុី និង១ទៀតនៅក្នុងប្រទេសហ្វីលីពីន៕

រាជធានីតូក្យូ៖ ក្រោយពេលរដ្ឋាភិបាលក្រុងតូក្យូ បានសម្រេចបង្ហូរទឹក ចេញពីរោងចក្រថាមពលនុយក្លេអ៊ែរហ៊្វូគូស៊ីម៉ា ដែលបានបន្សាបជាតិវិទ្យុសកម្ម បញ្ចូលទៅក្នុងមហាសមុទ្រប៉ាស៊ីហ្វិកនោះភ្លាម ក៏មានប្រតិកម្មយ៉ាងខ្លាំង មកពីក្រុងប៉េកាំង ហើយបានហាមឃាត់នូវការនាំចូលម្ហូបអាហារសមុទ្រ មកពីខេត្តចំនួន១០របស់ជប៉ុន ប៉ុន្ដែឥឡូវនេះ ប្រេសិតរបស់សហរដ្ឋអាមេរិក បែរយកត្រីនៅក្នុងតំបន់នោះ មករៀបចំពិធីជប់លៀង ហើយថែមទាំងបានស្ដីបន្ទោសដល់ចិន ជុំវិញបញ្ហានេះ។

សារព័ត៌មាន Channel News Asia បានចេញផ្សាយ កាលពីព្រឹក ថ្ងៃសុក្រ ទី១ ខែកញ្ញា ថា បេសកជនរបស់សហរដ្ឋអាមេរិក ប្រចាំនៅប្រទេសជប៉ុន កាលពីថ្ងៃព្រហស្បតិ៍ (ទី៣១ ខែសីហា) បានរៀបចំពិធីជប់លៀងមួយ ដោយយកត្រីចេញពីតំបន់ហ៊្វូគូស៊ីម៉ា (Fukushima) ហើយគាត់ថែមទាំងបានអះអាង ថា ទឹកបង្ហូរចេញពីរោងចក្រថាមពលនុយក្លេអែរ ដែលរងគ្រោះមហន្ដរាយ ពីមហារលកយក្សស៊ូណាមិ ដែលត្រូវបានបន្សាបជាតិវិទ្យុសកម្ម មានសុវត្ថិភាពល្អជាងទឹកបង្ហូរចេញពីរោងចក្រ នៅក្នុងប្រទេសចិន។

រដ្ឋាភិបាលក្រុងប៉េកាំង កាលពីសប្តាហ៍មុន បានហាមឃាត់នូវការនាំចូលម្ហូបអាហារសមុទ្រទាំងអស់ មកពីប្រទេសជិតខាងរបស់ចិន ក្រោយពេលជប៉ុន បានចាប់ផ្តើមបញ្ចេញទឹកសំណល់ ចេញពីរោងចក្រថាមពលនុយក្លេអ៊ែរហ៊្វគូស៊ីម៉ា ចូលទៅក្នុងមហាសមុទ្រប៉ាស៊ីហ្វិក។ ចិន បានចោទប្រកាន់ក្រុងតូក្យូ ថា ជប៉ុន ចាត់ទុកមហាសមុទ្រ ដូចជា«លូបង្ហូរទឹកសំណល់»។

លោក រ៉ាម អេម៉ាញូល (Rahm Emanuel) ឯកអគ្គរដ្ឋទូតសហរដ្ឋអាមេរិក បានថ្លែង នៅក្នុងអំឡុងទៅពិនិត្យមើលតំបន់រោងចក្រនុយក្លេអ៊ែរ ដែលត្រូវបានបំផ្លិចបំផ្លាញ នៅក្នុងអំឡុងឆ្នាំ២០១១ ថា «អស់រយៈពេលមួយទសវត្សរ៍កន្លងមកនេះ ជប៉ុនបានធ្វើរឿងត្រឹមត្រូវ តាមវិធីសាស្រ្ដដ៏ល្អ។ ភាពហ្មត់ចត់ខាងវិទ្យាសាស្រ្ដអន្ដរជាតិ តម្លាភាព និង ការអញ្ជើញសហគមន៍អន្ដរជាតិ មកតាមដានមើលដំណើរការរបស់ខ្លួន បន្សាបទឹកនៅក្នុងរោងចក្រនោះ។ ទឹកបង្ហូរចេញពីរោងចក្រថាមពលនុយក្លេអ៊ែរហ៊្វូគូស៊ីម៉ា មានសុវត្ថិភាពល្អប្រសើរជាងទឹកដែលបញ្ចេញពីរោងចក្រចំនួន៤ នៅប្រទេសចិន បង្ហូរចូលទៅក្នុងមហាសមុទ្រ ដោយមិនបានចម្រោះឲ្យល្អ។

ក្រុមហ៊ុនប្រតិបត្ដិការរោងចក្រថាមពល TEPCO បានឲ្យដឹង ថា ទឹកដែលត្រូវបានបង្ហូរ ចេញពីរោងចក្រនុយថាមពលនុយក្លេអ៊ែរហ៊្វូគូស៊ីម៉ា ត្រូវបានបន្សាប ឬ ចម្រោះជាតិវិទ្យុសកម្មទាំងអស់ លើកលែងតែសារធាតុទ្រីធៀម (Tritium)។ រីឯកម្រិត Tritium ក៏ស្ថិតនៅក្នុងដែនកំណត់សុវត្ថិភាព និង ទាបជាងការបញ្ចេញពីស្ថានីយថាមពលនុយក្លេអ៊ែរ នៅក្នុងប្រតិបត្តិការធម្មតារបស់រោងចក្រនេះ រួមទាំង រោងចក្រនៅក្នុងប្រទេសចិន ផងដែរ។

ដោយឡែក ការប្រឆាំងជាសាធារណៈ នៅក្នុងប្រទេសចិន បានកើនឡើង ចាប់តាំងពីពេលនោះមក ជាមួយនឹងការគប់ដុំឥដ្ឋ និង ស៊ុតចូលនៅក្នុងសាលារៀន និង ស្ថានកុងស៊ុលរបស់ជប៉ុន ប្រចាំនៅប្រទេសចិន។ រីឯអាជីវកម្មនៅក្នុងប្រទេសជប៉ុន ក៏បានរងនូវការហៅតាមទូរស័ព្ទរំខាន មកពីប្រេសចិន ថែមទៀតផង។

អាជ្ញាធរក្រុងតូក្យូ បានបញ្ជាក់ កាលពីថ្ងៃទី២៧ ខែសីហា ថា ម្ហូបអាហារសមុទ្រ នាំចេញពីខេត្តនានារបស់ជប៉ុន រកមិនឃើញមានជាតិវិទ្យុសកម្មនោះឡើយ។ ផលិតផលអាហារសមុទ្រទាំងអស់ សុទ្ធតែមានសុវត្ថិភាព។

លោក ចន លី (John Lee) មេដឹកនាំកោះហុងកុង បានបញ្ជាក់ កាលពីថ្ងៃទី២២ ខែសីហា ថា គាត់បានណែនាំដល់រដ្ឋាភិបាលរបស់គាត់ ឱ្យធ្វើសកម្មភាពភ្លាមៗ ដើម្បីការទប់ស្កាត់នូវការនាំចូលម្ហូមអាហារសមុទ្រមួយចំនួន មកពីប្រទេសជប៉ុន។

ការប្រកាសរបស់អាជ្ញាធរហុងកុង បានធ្វើឡើង ក្រោយពេលរដ្ឋបាលគយទូទៅ នៅក្នុងប្រទេសចិន បានគំរាម អំពីការហាមប្រាមដល់អាហារទាំងអស់ពីរាជធានី-ខេត្ត ចំនួន១០របស់ជប៉ុន រួមមាន រាជធានីតូក្យូ (Tokyo), ខេត្តហ៊្វូគូស៊ីម៉ា (Fukushima), ឆីបា (Chiba), តូឈីហ្គិ (Tochigi), អ៊ីប្រារ៉ាគិ (Ibaraki), ហ្គុនម៉ា (Gunma), មីយ៉ាហ្គិ (Miyagi), នីអ៊ិហ្កាតា (Niigata), ណាហ្កាណូ (Nagano) និង ខេត្ដសៃតាម៉ា (Saitama)។

ប្រទេសជប៉ុន បានប្រកាស ថា ការបញ្ចេញទឹកចេញពីរោងចក្រថាមពលនុយក្លេអ៊ែរ ដែលបានរងគ្រោះមហន្ដរាយ ដោយមហារលកយក្សស៊ូណាមិ គឺមានសុវត្ថិភាព។ ស្របគ្នានេះដែរ ទីភ្នាក់ងារថាមពលអាតូមិកអន្តរជាតិ (IAEA) ដែលជាអ្នកឃ្លាំមើលនុយក្លេអ៊ែររបស់អង្គការសហប្រជាជាតិ បានបំភ្លឺ អំពីផែនការនេះ កាលពីខែមុន ដោយបានបញ្ជាក់ ថា ទឹកចម្រោះនោះ បានបំពេញតាមស្តង់ដារអន្តរជាតិ ហើយថា ផលប៉ះពាល់របស់វា នឹងមកលើមនុស្ស និង បរិស្ថាន មានកម្រិតតិចតួចប៉ុណ្ណោះ៕