ប្រទេសថៃ ៖ សារព័ត៌មានថៃឈ្មោះ PPTV HD 36 បានចុះផ្សាយថា វាបានក្លាយជាព័ត៌មានល្បីមួយនៅក្នុងបណ្តាញសង្គម និងមានការចែកចាយបន្តគ្នាជាច្រើនអំពីរឿងរ៉ាវក្រុមអ្នកបើករថយន្តដឹកភ្ញៀវទេសចរនៅខេត្តភូកេត ប្រទេសថៃ នាំគ្នាវា.យត.ប់ភ្ញៀវទេសចរបរទេស ដោយសារភ្ញៀវទេសចរឱ្យថ្លៃធ្វើដំណើរមិនគ្រប់ចំនួន ។

តាមរយៈការត្រួតពិនិត្យក្នុងវីដេអូបង្ហាញថា ហេតុការណ៍នេះបានកើតឡើងកាលពីថ្ងៃទី៨ ខែតុលា ឆ្នាំ២០២៣ នៅមុខសណ្ឋាគារមួយកន្លែងក្នុងឃុំប៉ាតង ស្រុកក្រាធូ ។ នៅពេលព័ត៌មាននេះត្រូវបានចែកចាយក្នុងបណ្តាញសង្គមបណ្តាលឱ្យប៉ះពាល់ដល់មុខមាត់ និងវិស័យទេសចរណ៍ប្រទេសថៃ ហើយពលរដ្ឋថៃក៏បានរិះគន់អំពីការប្រព្រឹត្តមិនគប្បីរបស់មនុស្សមួយក្រុមនេះផងដែរ ។

ក្រោយពីសមត្ថកិច្ចប្រចាំឃុំប៉ាតងបានឃើញវីដេអូវាយភ្ញៀវទេសចរបរទេស ក៏បានចាត់ឱ្យកម្លាំងសមត្ថកិច្ចចុះទៅត្រួតពិនិត្យនៅតំបន់នេះភ្លាមៗ ។ សមត្ថកិច្ចឱ្យដឹងថា ជនបង្កហេតុ គឺជាអ្នកបើករថយន្តដឹកភ្ញៀវទេសចរក្នុងតំបន់នេះ រីឯភ្ញៀវទេសចរដែលត្រូវបានគេវាយនោះមកពីប្រទេសអារ៉ាប៊ី សាអូឌីត ។ ប៉ុន្តែក្រោយពីត្រូវគេវាយរួច ភ្ញៀវទេសចររូបនេះមិនបានទៅប្តឹងសមត្ថកិច្ចទេ ។

តាមរយៈការត្រួតពិនិត្យដំបូងបង្ហាញថា អ្នកបើករថយន្តដឹកភ្ញៀវទេសចរ គឺឈ្មោះ លោក អនុសន អាយុ២៩ឆ្នាំ និងមានបក្ខពួកចំនួន២នាក់ទៀតបានរួមគ្នាវាយត.ប់ភ្ញៀវទេសចរបរទេស ក្នុងនោះម្នាក់ឈ្មោះ លោក អភិស៊ីត អាយុ២៦ឆ្នាំ និងលោក ណាស់ប៊ូឡ អាយុ២៨ឆ្នាំ ។ ជនបង្កហេតុទាំង៣នាក់ប្រកបមុខរបរជាអ្នកបើករថយន្តដឹកភ្ញៀវទេសចរ និងត្រូវបានសមត្ថកិច្ចចាប់ខ្លួនរួចរាល់ហើយ ។

ជនបង្កហេតុឈ្មោះ អនុសន ប្រាប់ថា មុនដំបូង ខ្លួនបានបើករថយន្តទៅទទួលភ្ញៀវទេសចរខាងលើមកពីផ្លូវរ៉ាជអុទិស ហើយភ្ញៀវទេសចររូបនេះប្រាប់ថា ឱ្យខ្លួនដឹកទៅកាន់សណ្ឋាគារនៅម្តុំវៀនកាលីន និងយល់ព្រមថា នឹងឱ្យថ្លៃដឹកចំនួន២០០បាត ។ ប៉ុន្តែនៅពេលខ្លួនដឹកភ្ញៀវទេសចរទៅដល់សណ្ឋាគារដែលបានប្រាប់នោះ ស្រាប់តែភ្ញៀវទេសចរនិយាយថា មិនមែនជាកន្លែងស្នាក់នៅទេ ហើយក៏ឱ្យខ្លួនដឹកទៅសណ្ឋាគារមួយទៀតឈ្មោះ អមតៈ ។ ដូច្នេះ ខ្លួនក៏បានគិតប្រាក់បន្ថែមទៀត សរុបស្មើនឹង៤០០បាត ប៉ុន្តែភ្ញៀវទេសចរឱ្យប្រាក់តែ៣០០បាតប៉ុណ្ណោះ ទើបមានការឈ្លោះប្រកែកគ្នាឡើង ។

ក្រោយមក ជនបង្កហេតុឈ្មោះ អនុសន ក៏បានទូរស័ព្ទហៅបក្ខពួកមកជួយ ដោយសារភ្ញៀវទេសចរបានយកកូនសោររថយន្តរបស់ខ្លួន ។ ហេតុនេះ ខ្លួន និងបក្ខពួក២នាក់ទៀតអត់ធ្មត់លែងបាន ក៏នាំគ្នាវាយភ្ញៀវទេសចររូបនេះតែម្តងទៅ ។ សមត្ថកិច្ចចោទប្រកាន់ថា ជនទាំង៣នាក់នេះបានរួមគ្នាវា.យដំរាងកាយភ្ញៀវទេសចរ ហើយសមត្ថកិច្ចនឹងចាត់ការពួកគេតាមផ្លូវច្បាប់ ។ លើសពីនេះ សមត្ថកិច្ចបានទំនាក់ទំនងទៅកាន់ការិយាល័យដឹកជញ្ជូនប្រចាំខេត្តភូកេត ដើម្បីដកប័ណ្ណបើកបរពួកគេផងដែរ ៕ ប្រភព ៖ PPTV HD 36

រដ្ឋបាលខេត្តក្រចេះបានជូនដំណឹងនៅថ្ងៃទី១៨ តុលា ថា ដើម្បីអបអរសាទរពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ឆ្នាំ២០២៣ រដ្ឋបាលខេត្តនឹងរៀបចំការប្រឡងប្រណាំងទូក ង នឹងប្រព្រឹត្តទៅនៅថ្ងៃអាទិត្យ ទី២៩ ខែតុលា ឆ្នាំ២០២៣ ចាប់ពីវេលាម៉ោង ៧: ៣០នាទីព្រឹក នៅក្នុងទីរួមខេត្តក្រចេះ។

សេចក្តីជូនដំណឹងដដែលបានបន្ថែមថា ដើម្បីឱ្យពិធីខាងលើប្រព្រឹត្តទៅមហោឡារឹក អធិកអធម ស្របទៅតាមប្រពៃណីជាតិ និងធានាបាន សុវត្ថិភាព រដ្ឋបាលខេត្តក្រចេះ បានស្នើដល់អភិបាលក្រុង ស្រុក ដូចខាងក្រោម៖

១-រៀបចំទូកខ្នាតអន្តរជាតិចូលរួមប្រកួត ដោយធ្វើការកែលម្អជួសជុលទូកឱ្យបានសមរម្យ។ ទូកនីមួយៗ ត្រូវតុបតែងលម្អក្បាច់រចនាឱ្យបានប្រកួត តាមរចនាបទខ្មែរពិតប្រាកដ។ ចំណុះទូកត្រៀមរៀបចំឱ្យមានសម្លៀកបំពាក់សមរម្យ ជាឯកសណ្ឋានតាមលក្ខណៈទំនៀមទម្លាប់ប្រពៃណីខ្មែរ។២-ទូកដែលចូលរួមប្រកួត ត្រូវធ្វើការហ្វឹកហាត់សាកល្បង និងមានលក្ខណៈសមស្រប ដោយត្រូវជ្រើសរើស អ្នកដែលមានកាយសម្បទាគ្រប់គ្រាន់ និងចេះហែលទឹកស្ទាត់ជំនាញ។ ទូកដែលអាចចាត់តាំងចូលរួមប្រកួតបាន លុះត្រាតែបានទទួលការឯកភាពពីអាជ្ញាធរមូលដ្ឋានសាមី តាមរយៈរដ្ឋបាលឃុំ សង្កាត់ ក្រុង ស្រុក។ ការដាក់ពាក្យចូលរួមប្រកួត ចាប់ទទួលពីថ្ងៃជូនដំណឹងនេះតទៅ រហូតដល់ថ្ងៃទី២៧ ខែតុលា ឆ្នាំ២០២៣ ដោយភ្ជាប់មកជាមួយនូវ៖-ពាក្យសុំចូលរួមប្រកួត -បញ្ជីរាយនាមក្រុមកីឡាករ និង-ប្រវត្តិសង្ខេបទូកនីមួយៗ។

ជាមួយគ្នានេះ រដ្ឋបាលខេត្តក្រចេះ អំពាវនាវដល់សាធារណជនទាំងអស់អាចចូលរួម ឧបត្ថម្ភគាំទ្រជាថវិកា សម្ភារ តាមលទ្ធភាព និងសូមប្រគល់ជូនមករដ្ឋបាលខេត្ត ដើម្បីរៀបចំឧបត្ថម្ភដល់ទូក ង ដែលចូលរួមប្រកួតផងដែរ៕

បរទេស៖ Stella Terra គឺជារថយន្តដែលដំណើរការដោយថាមពលពន្លឺព្រះអាទិត្យដំបូងគេរបស់ពិភពលោក ជាមួយនឹងល្បឿនអតិបរមា ១៤៥ គីឡូម៉ែត្រក្នុងមួយម៉ោង នឹងរត់បានចម្ងាយជាង ៧១០ គីឡូម៉ែត្រដោយមិនចាំបាច់បញ្ចូលថ្ម នេះបើយោងតាមសារព័ត៌មាន CNN ដែលបានរាយការណ៍កាលពីថ្ងៃទី ១៧ ខែតុលា។

លោក Wisse Bos អ្នកគ្រប់គ្រងក្រុម Solar Team Eindhoven បាននិយាយថា រថយន្ត Stella Terra ដំបូងនេះគឺត្រូវបានផលិតឡើងដោយបច្ចេកវិទ្យាដ៏ទំនើប ជាមួយនឹងកោសិកាពន្លឺព្រះអាទិត្យដែលមានប្រសិទ្ធភាពខ្ពស់ រួមទាំងកៅអីពីរ និងតួទម្ងន់ស្រាល ក៏ដូចជាមានភាពជឿនលឿនជាងរថយន្តផ្សេងទៀតនៅលើទីផ្សារ។

រថយន្តប្រភេទ SUV នេះត្រូវបានបំពាក់ដោយថ្ម lithium-ion ដែលអនុញ្ញាតឱ្យវាដំណើរការនៅកន្លែងដែលមានពន្លឺថ្ងៃតិចសម្រាប់ចម្ងាយខ្លី និងពន្លឺថ្ងៃខ្លាំងសម្រាប់ចម្ងាយវែង ដោយមិនចាំបាច់បញ្ចូលថ្មឡើយ។ ដូច្នេះថាមពលពន្លឺព្រះអាទិត្យរបស់រថយន្តអាចផ្តល់ថាមពលអគ្គិសនីគ្រប់គ្រាន់សម្រាប់ចម្អិនអាហារ និងឧបករណ៍សាកថ្មដូចជាទូរស័ព្ទ ឬកាមេរ៉ាជាដើម។ Inverter របស់រថយន្តមានប្រសិទ្ធភាព ៩៧% ក្នុងការបំប្លែងពន្លឺព្រះអាទិត្យដែលស្រូបដោយកោសិកាពន្លឺព្រះអាទិត្យទៅជាបន្ទុកអគ្គិសនី។

លោក Bob van Ginkel អ្នកគ្រប់គ្រងបច្ចេកទេសនៃគម្រោងនេះបាននិយាយថា យើងសង្ឃឹមថាឧស្សាហកម្មរថយន្តថ្មីនេះនឹងកាន់តែមាននិរន្តរភាពដូចជា Land Rover និង BMW។ ទោះជាយ៉ាងណាក៏ដោយ លោក Bob van Ginkel ក៏បានបន្តទៀតថា គម្រោងនេះនៅតែមានការងារជាច្រើនដែលត្រូវធ្វើមុនពេលចាប់ផ្តើមលក់ Stella Terra ជាផ្លូវការទៅកាន់ទីផ្សារពិភពលោក៕

យោងតាមគេហទំព័រ careeraddict.com ដែលជាអ្នកផ្តល់សេវាព័ត៌មានអាជីពតាមអ៊ីនធឺណែត បានបង្ហាញព័ត៌មានដ៏គួរឱ្យចាប់អារម្មណ៍មួយទាក់ទងទៅនឹងប្រាក់ឈ្នួលរបស់ប្រជាជនម្នាក់ៗនៅលើពិភពលោក ដោយក្នុងនោះគេរកឃើញមានតែប្រទេសចំនួន ១៣ ប៉ុណ្ណោះដែលមានប្រាក់ឈ្នួលជាមធ្យមខ្ពស់បំផុតក្នុងឆ្នាំ ២០២៣ នេះបើយោងតាមទិន្នន័យចុងក្រោយដែលចងក្រងដោយធនាគារពិភពលោក (World Bank)។ ដូច្នេះ ខាងក្រោមនេះគឺជាប្រទេសទាំង ១៣ ដែលមានប្រាក់ឈ្នួលខ្ពស់បំផុតនៅលើពិភពលោក៖

១.ប្រទេសលុចសំបួ (Luxembourg)៖ លុចសំបួរ គឺជាប្រទេសដែលមានប្រាក់ខែជាមធ្យមប្រមាណជាង ៥,២០០ ដុល្លារអាមេរិកក្នុងម្នាក់។

២.ប្រទេសស្វីស (Switzerland)៖ ស្វីស មានប្រាក់ខែជាមធ្យមប្រមាណជាង ៤,៩០០ ដុល្លារអាមេរិកក្នុងម្នាក់។

៣.ប្រទេសន័រវេស (Norway)៖ ន័រវេស មានប្រាក់ខែជាមធ្យមប្រមាណជាង ៤,១០០ ដុល្លារអាមេរិកក្នុងម្នាក់។

៤.សហរដ្ឋអាមេរិក (USA)៖ សហរដ្ឋអាមេរិក មានប្រាក់ខែជាមធ្យមប្រមាណជាង ៤,១០០ ដុល្លារអាមេរិកក្នុងម្នាក់។

៥.ប្រទេសដាណឺម៉ាក (Denmark)៖ ដាណឺម៉ាក មានប្រាក់ខែជាមធ្យមប្រមាណជាង ៤,០០០ ដុល្លារអាមេរិកក្នុងម្នាក់។

៦.ប្រទេសអ៊ីស្លង់ (Iceland)៖ អ៊ីស្លង់ មានប្រាក់ខែជាមធ្យមប្រមាណជាង ៣,៤០០ ដុល្លារអាមេរិកក្នុងម្នាក់។

៧.ប្រទេសស៊ុយអែត (Sweden)៖ ស៊ុយអែត មានប្រាក់ខែជាមធ្យមប្រមាណជាង ៣,៤០០ ដុល្លារអាមេរិកក្នុងម្នាក់។

៨.ប្រទេសហូឡង់ (Netherlands)៖ ហូឡង់ មានប្រាក់ខែជាមធ្យមប្រមាណជាង ៣,២០០ ដុល្លារអាមេរិកក្នុងម្នាក់។

៩.ប្រទេសសិង្ហបុរី (Singapore)៖ សិង្ហបុរី មានប្រាក់ខែជាមធ្យមប្រមាណជាង ៣,២០០ ដុល្លារអាមេរិកក្នុងម្នាក់។

១០.ប្រទេសអៀរឡង់ (Ireland)៖ អៀរឡង់ មានប្រាក់ខែជាមធ្យមប្រមាណជាង ៣,២០០ ដុល្លារអាមេរិកក្នុងម្នាក់។

១១.ប្រទេសអូស្ត្រាលី (Australia)៖ អូស្ត្រាលី មានប្រាក់ខែជាមធ្យមប្រមាណជាង ៣,០០០ ដុល្លារអាមេរិកក្នុងម្នាក់។

១២.ប្រទេសហ្វាំងឡង់ (Finland)៖ ហ្វាំងឡង់ មានប្រាក់ខែជាមធ្យមប្រមាណជាង ៣,០០០ ដុល្លារអាមេរិកក្នុងម្នាក់។

១៣.ប្រទេសកាតា (Qatar)៖ កាតា គឺជាប្រទេសដែលមានប្រាក់ខែជាមធ្យមប្រមាណជាង ៣,០០០ ដុល្លារអាមេរិកក្នុងម្នាក់៕

ប្រទេសថៃ ៖ ក្រោយកើតហេតុការណ៍បា.ញ់ប្រហា.រនៅ Siam Paragon ស្ថិតក្នុងទីក្រុងបាងកក ប្រទេសថៃ កាលពីថ្ងៃទី៣ ខែតុលា ឆ្នាំ២០២៣ ដែលបង្កឡើងដោយក្មេងប្រុសម្នាក់អាយុ១៤ឆ្នាំ បានធ្វើឱ្យប៉ះពាល់ដល់វិស័យទេសចរណ៍នៅប្រទេសថៃ ជាពិសេស ភ្ញៀវទេសចរចិន ។ ចំណែកបណ្តាក្រុមហ៊ុន និងអ្នកប្រកបអាជីវកម្មពាក់ព័ន្ធនឹងវិស័យទេសចរណ៍នៅខេត្តភាគខាងត្បូងប្រទេសថៃ បានលើកឡើងពីចំនួនភ្ញៀវទេសចរចិនធ្លាក់ចុះ ។

គេសង្កេតឃើញថា នៅរដូវកាលទេសចរណ៍នេះ ក្រុមភ្ញៀវទេសចរបរទេសបានធ្វើដំណើរមកកាន់ខេត្តត្រាងចាប់ផ្តើមអ៊ូអរ ប៉ុន្តែបើពិនិត្យមើលឱ្យស៊ីជម្រៅឃើញថា ចំនួនភ្ញៀវទេសចរចិនបានធ្លាក់ចុះជាបន្តបន្ទាប់ ។ បុគ្គលិកក្រុមហ៊ុនទេសចរណ៍នៅខេត្តត្រាងឱ្យដឹងថា មុននេះ មានអតិថិជនចិនជាច្រើននាក់បានកក់បន្ទប់ស្នាក់នៅ និងកក់ការធ្វើដំណើរមកប្រទេសថៃ តាមរយៈក្រុមហ៊ុនរបស់ខ្លួនដើម្បីមកលេងនៅខេត្តត្រាង ។

បុគ្គលិកក្រុមហ៊ុនទេសចរណ៍នៅខេត្តត្រាងបន្តថា ប៉ុន្តែតាំងពីកើតហេតុការណ៍បា.ញ់ប្រហា.រនៅ Siam Paragon ដែលបានបណ្តាលឱ្យជនជាតិចិនស្លា.ប់បា.ត់ប.ង់ជីវិ.ត បានធ្វើឱ្យភ្ញៀវទេសចរចិនជាច្រើននាក់លុបចោលការធ្វើដំណើររបស់ពួកគេ ។ ជំហានដំបូង ខេត្តត្រាង បានបាត់បង់ភ្ញៀវទេសចរចិនប្រមាណ៤០% ហើយធ្វើឱ្យក្រុមហ៊ុនទេសចរណ៍ត្រូវលុបចោលការកក់ទូកដឹកភ្ញៀវទេសចរ ក៏ដូចជាលុបចោលការកក់រថយន្ត និងសណ្ឋាគារផ្សេងៗក្នុងរដូវកាលទេសចរណ៍ ឆ្នាំ២០២៣នេះ ។

ចុងក្រោយ បុគ្គលិកក្រុមហ៊ុនទេសចរណ៍រូបនេះបានស្នើឱ្យរដ្ឋាភិបាលថៃត្រូវឈ្វេងយល់ពីទំនុកចិត្តរបស់ភ្ញៀវទេសចរបរទេស ជាពិសេស ទំនុកចិត្តភ្ញៀវទេសចរចិន និងប្រទេសចិនឱ្យបានឆាប់រហ័សបំផុត ពីព្រោះបារម្ភថា វាអាចនឹងប៉ះពាល់ដល់វិស័យទេសចរណ៍ប្រទេសថៃក្នុងរយៈពេលយូរ ។

កាលពីដើមខែតុលា ឆ្នាំ២០២៣ សារព័ត៌មានថៃឈ្មោះ Thai PBS បានចុះផ្សាយថា ភ្ញៀវទេសចរចិនបានលុបចោលការធ្វើដំណើរមកកាន់ប្រទេសថៃ ហើយពួកគេប្តូរទៅប្រទេសផ្សេងវិញ ។ អ្នកនាង ម៉ានីណាត អនផាណា អ្នករាយការណ៍ពិសេសនៅប្រទេសចិន និយាយថា ៖ «សារព័ត៌មានអនឡាញនានានៅប្រទេសចិនបានបង្ហោះវីដេអូហេតុការណ៍បា.ញ់ប្រហា.រនៅ Siam Paragon ហើយធ្វើឱ្យអ្នកលេងបណ្តាញសង្គមចិនភ្ញាក់ផ្អើលយ៉ាងខ្លាំង និងគ្មានទំនុកចិត្តមកលេងប្រទេសថៃទៀតទេ ដោយពួកគេប្តូរទៅកម្សាន្តនៅប្រទេសផ្សេងវិញ» ៕ ប្រភព ៖ Thai PBS