យោងតាមប្រភពព័ត៌មាន Worldometer បានឱ្យដឹងថា ក្នុងចំណោមប្រទេសចំនួន ២០០ មានតែ ១០ ប្រទេសប៉ុណ្ណោះដែលមានប្រជាជនអាយុវែងជាងគេបំផុតនៅលើពិភពលោក។ ក្នុងនោះប្រទេសកម្ពុជាឈរនៅលេខ ១២៨ ដោយអាយុប្រជាជនគិតជាមធ្យមត្រឹមតែ ៧១ ឆ្នាំប៉ុណ្ណោះ។ ដូច្នេះហើយខាងក្រោមនេះគឺជាប្រទេសចំនួន ១០ ដែលត្រូវបានគេចាត់ទុកថាមានប្រជាជនអាយុវែងជាងគេបំផុតលើលោក៖

១.ទីក្រុងហុងកុង៖ ជាទីក្រុងសេដ្ឋកិច្ចរបស់ចិន ស្ថិតនៅឆ្នេរសមុទ្រភាគខាងត្បូងនៃសាធារណៈរដ្ឋប្រជាមានិតចិន ដែលមានប្រជាជនអាយុជាមធ្យម ៨៥ឆ្នាំ។

២.ទីក្រុងម៉ាកាវ៖ ត្រូវបានគេចាត់ទុកថា ជាទីក្រុងមួយរបស់ប្រទេសចិន ដែលពោរពេញដោយសេដ្ឋកិច្ចខ្ពស់ និងមានការរស់នៅប្រកបដោយភាពស៊ីវិល័យ ដូចនេះទីក្រុងម៉ាកាវមានប្រជាជនអាយុជាមធ្យម ៨៥ឆ្នាំ។

៣.ប្រទេសជប៉ុន៖ ជាប្រទេសដីកោះមួយ នៅតំបន់អាស៊ីបូព៌ា ស្ថិតក្នុងមហាសមុទ្រប៉ាស៊ីហ្វិក សម្បូរទៅដោយមនុស្សមានអាយុវែងជាងគេ ប៉ុន្តែបើគិតជាមធ្យម ប្រជាជនជប៉ុនមានអាយុត្រឹមតែ ៨៤ឆ្នាំប៉ុណ្ណោះ។

៤.ប្រទេសស្វីស៖ ត្រូវបានគេចាត់ទុកថា ជាប្រទេសទីបួន ដែលមានប្រជាជនអាយុវែងជាងគេបំផុតក្នុងពិភពលោក ជាមួយនឹងអាយុជាមធ្យម ៨៤ឆ្នាំ។

៥.ប្រទេសសិង្ហបុរី៖ ជាទីក្រុង និងរដ្ឋដ៏ទំនើប ព្រមទាំងជាប្រទេសដីកោះមួយ ដែលមានទីតាំងស្ថិតនៅតំបន់អាស៊ីអាគ្នេយ៍ ដោយប្រជាជនរស់នៅទីនោះមានអាយុជាមធ្យម ៨៤ ឆ្នាំ។

៦.ប្រទេសអ៊ីតាលី៖ អ៊ីតាលីជាប្រទេសដែលមានប្រជាជនអាយុវែងបំផុតទីប្រាំមួយក្នុងពិភពលោក គិតជាមធ្យម ៨៤ ឆ្នាំ។

៧.កូរ៉េខាងត្បូង៖ សាធារណរដ្ឋកូរ៉េ ជាប្រទេសមួយដែលមានវិស័យឧស្សាហកម្ម K-pop យ៉ាងទំលំទូលាយ ប្រទេសនេះមានប្រជាជនអាយុជាមធ្យម ៨៤ឆ្នាំ។

៨.ប្រទេសអេស្ប៉ាញ៖ ព្រះរាជាណាចក្រអេស្ប៉ាញមានប្រជាជនអាយុជាមធ្យម ៨៣ឆ្នាំ។

៩.ប្រទេសម៉ាល់តា៖ សាធារណរដ្ឋម៉ាល់តា ស្ថិតក្នុងទ្វីបអឺរ៉ុប ប្រទេសនេះមានប្រជាជនអាយុជាមធ្យម ៨៣ឆ្នាំ។

១០.ប្រទេសអូស្ត្រាលី៖ ជាប្រសទេសមួយស្ថិតនៅតំបន់ទ្វីបអូសេអានី ដែលមានប្រជាជនអាយុជាមធ្យម ៨៣ឆ្នាំ៕

រដ្ឋធានីវ៉ាស៊ីនតោន៖ ជាមួយនឹងស្ថានការណ៍ នៅក្នុងតំបន់ឥណ្ឌូ-ប៉ាស៊ីហ្វិក កំពុងតែកើនកម្ដៅ កាន់តែខ្លាំងឡើងនោះ សហរដ្ឋអាមេរិក ជប៉ុន អូស្រ្ដាលី និង ហ្វីលីពីន កំពុងតែចាប់ផ្ដើមធ្វើសមយុទ្ធរួមគ្នា នៅក្នុងតំបន់នេះ ហើយមេបញ្ជាការកងទ័ពជើងទឹករបស់ក្រុងវ៉ាស៊ីនតោន ក៏បានព្រមានធ្ងន់ៗ ទៅដល់រដ្ឋាភិបាលក្រុងប៉េកាំង ត្រូវតែផ្លាស់ប្ដូរឥរិយាបថដ៏គឃ្លើនរបស់ខ្លួន នៅក្នុងសមុទ្រចិនខាងត្បូង។

សារព័ត៌មានអារ៉ាប់អន្ដរជាតិ Alarabiya News បានចេញផ្សាយ កាលពីព្រឹក ថ្ងៃចន្ទ ទី២៨ ខែសីហា ថា លោកមេបញ្ជាការកងនាវាទី៧របស់សហរដ្ឋអាមេរិក បានបញ្ជាក់ កាលពីថ្ងៃអាទិត្យ (ទី២៧ ខែសីហា) ថា «អាកប្បកិរិយាដ៏គឃ្លើនរបស់ប្រទេសចិន នៅក្នុងសមុទ្រចិនខាងត្បូង រួមទាំងការប្រើប្រាស់កាណុងទឹក បង្កឡើងដោយកងឆ្មាំសមុទ្ររបស់ចិន បាញ់ទឹកទៅលើនាវាហ្វីលីពីន ត្រូវតែប្រឆាំង និង ត្រួតពិនិត្យឡើងវិញ»។

លោកឧត្ដមនាវីរង ខាល ថូម៉ាស (Karl Thomas) មេបញ្ជាការកងនាវាទី៧របស់សហរដ្ឋអាមេរិក បានធានាដល់ប្រទេសហ្វីលីពីន ចំពោះកិច្ចគាំទ្ររបស់សហរដ្ឋអាមេរិក នៅក្នុងការប្រឈមមុខជាមួយនឹង«បញ្ហាប្រឈមមុខរួមគ្នា» នៅក្នុងតំបន់។ រីឯកងកម្លាំងរបស់ខ្ញុំ បានចេញមកទីនេះ ដោយមានហេតុផលមួយសមស្រប។

កងនាវាទី៧ ក្លាយជាកងនាវាដ៏ធំបំផុតរបស់សហរដ្ឋអាមេរិក មានមូលដ្ឋានយោធា នៅក្នុងប្រទេសជប៉ុន។ កងនាវាទី៧នេះ តែងតែប្រតិបត្ដិការ ដោយនាវាចម្បាំង ចំនួន៧០គ្រឿង ហើយមានយន្ដហោះចំនួន១៥០គ្រឿង និង កងទ័ពជើងទឹក ជាង២៧ ០០០នាក់ និង ធ្វើប្រតិបត្ដិការ នៅក្នុងតំបន់ទំហំ១២៤លានគីឡូម៉ែត្រការ៉េ ចាប់តាំងពីមូលដ្ឋានយោធានានា នៅក្នុងប្រទេសជប៉ុន កូរ៉េខាងត្បូង និង សិង្ហបុរី។

លោកឧត្ដមនាវីរង ខាល ថូម៉ាស បានប្រាប់ដល់ទីភ្នាក់ងារសារព័ត៌មាន Reuters ថា «អ្នកត្រូវតែប្រកួតប្រជែងជាមួយនឹងមនុស្ស ដែលខ្ញុំនឹងនិយាយ ថា ប្រតិបត្តិការ នៅក្នុងតំបន់ពណ៌ប្រផេះ។ នៅពេលពួកគេ ធ្វើសកម្មភាព កាន់តែច្រើនឡើង ហើយរុញអ្នក អ្នកត្រូវតែរុញគេឲ្យថយវិញ ហើយអ្នកត្រូវតែបើកនាវា និង ធ្វើប្រតិបត្ដិការ។ វាពិតជាមិនមែនជាគំរូល្អប្រសើរ ចំពោះអាកប្បកិរិយាយ៉ាងគឃ្លើន ច្រើនជាងសកម្មភាព កាលពីថ្ងៃទី៥ ខែសីហា ដោយបានបាញ់ទឹកដាក់នាវាច្បាំងរបស់ហ្វីលីពីន»។

កងនាវាឆ្មាំសមុទ្ររបស់ចិន កាលពីថ្ងៃទី៥ ខែសីហា បានប្រើប្រាស់កាណុងបាញ់ទឹក បាញ់ដាល់លើនាវារបស់កងទ័ពហ្វីលីពីន ដែលកំពុងតែដឹកគ្រឿងផ្គត់ផ្គង់ ទៅដល់កម្លាំងយោធារបស់ខ្លួន ឈរជើងនៅលើនាវាចម្បាំងរបស់ក្រុងម៉ានីល នៅក្នុងសមុទ្រចិនខាងត្បូង។ សកម្មភាពបែបនេះ អាចនឹងនាំឲ្យមាននូវការបង្កើតកំហុស នៅក្នុងការប្រជែងគ្នា រវាងសហរដ្ឋអាមេរិក និង ចិន នៅក្នុងតំបន់។

លោកឧត្ដមនាវីរង ខាល ថូម៉ាស មេបញ្ជាការកងនាវាទី៧របស់សហរដ្ឋអាមេរិក បានបញ្ជាក់ ថា គាត់បានពិភាក្សាគ្នាជាមួយនឹងលោកឧត្តមនាវីរង អាល់ប៊ែរតូ កាឡូស (Alberto Carlos) មេបញ្ជាការយោធភូមិភាគបស្ចិមរបស់ហ្វីលីពីន ដែលមើលការខុសត្រូវ នៅក្នុងសមុទ្រចិនខាងត្បូង ដើម្បីឈ្វេងយល់ អំពីបញ្ហាប្រឈមរបស់ហ្វីលីពីន និង ស្វែងរកឱកាសជួយហ្វីលីពីន»។

លោកឧត្ដមនាវីរង ខាល ថូម៉ាស កាលពីថ្ងៃសៅរ៍ បានអះអាង ថា គាត់បានចូលរួមហោះហើរ ចេញពីរដ្ឋធានីម៉ានីល (Manila) ប្រទេសហ្វីលីពីន ដើម្បីត្រួតពិនិត្យមើល នៅសមុទ្រចិនខាងត្បូង។

ប្រទេសហ្វីលីពីន បានឈ្នះលើការកាត់ក្ដីរបស់អាជ្ញាកណ្តាលអន្តរជាតិ ប្រឆាំងនឹងប្រទេសចិននៅក្នុងឆ្នាំ២០១៦ ក្រោយពេលសាលាក្តីអន្ដរជាតិមួយនេះ បានអះអាង ថា ការទាមទារដ៏ទូលំទូលាយរបស់រដ្ឋាភិបាលក្រុងប៉េកាំង នៅសមុទ្រចិនខាងត្បូង មានទំហំផ្ទៃក្រឡា ៣,៥លានគីឡូម៉ែត្រការ៉េ ដែលភាគច្រើនបំផុត ជាដែនអធិបតេយ្យភាពរបស់ចិន មិនមានមូលដ្ឋាន ស្របតាមផ្លូវច្បាប់នោះឡើយ។

រដ្ឋាភិបាលក្រុងប៉េកាំង បានសាងសង់កោះសិប្បនិមិត្ត សម្រាប់ជាមូលដ្ឋានយោធា នៅសមុទ្រចិនខាងត្បូង ហើយការទាមទារអធិបតេយ្យភាព ជាប្រវត្តិសាស្ត្រ ត្រួតលើតំបន់សេដ្ឋកិច្ចផ្តាច់មុខរបស់ហ្វីលីពីន វៀតណាម ម៉ាឡេស៊ី ប្រ៊ុយណេ និងឥណ្ឌូនេស៊ី ទើបនាំឲ្យមានជម្លោះជាមួយនឹងប្រទេសទាំងនេះ នៅក្នុងតំបន់។

បើទោះជាយ៉ាងណា ស្ថានទូតចិន ប្រចាំនៅរដ្ឋធានីម៉ានីល មិនទាន់បានឆ្លើយតបភ្លាមៗ ជុំវិញការអត្ថាធិប្បាយរបស់មេបញ្ជាការកងទ័ពជើងទឹកសហរដ្ឋអាមេរិក នោះឡើយ៕

ប្រទេសថៃ ៖ នៅរដូវវស្សាតែងមានភ្លៀងធ្លាក់ និងដក់ទឹកនៅតាមដងផ្លូវនានា ហើយធ្វើឱ្យអ្នកប្រើប្រាស់យានជំនិះផ្សេងៗ និងអ្នកថ្មើរជើងនៅតាមដងផ្លូវពិបាកធ្វើដំណើរ ។ លើសពីនេះ អ្នកបើកបរភាគច្រើនពុំសូវបានចាប់អារម្មណ៍ជាមួយអ្នករួមដំណើរតាមផ្លូវដូចគ្នាទេ ហើយពួកគេបើកបរទាំងគ្មានការក្រែងចិត្តអ្វីបន្តិច ។

ជាធម្មតា នៅពេលបើកបរនៅលើផ្លូវមានទឹកដក់ អ្នកបើកបរទាំងអស់ត្រូវតែប្រុងប្រយ័ត្ន និងបើកយានជំនិះក្នុងល្បឿនយឺតៗ ដើម្បីកុំឱ្យទឹកនោះសាចមកលើអ្នកធ្វើដំណើរតាមផ្លូវដូចគ្នា ។ គេសង្កេតឃើញថា អ្នកជិះម៉ូតូភាគច្រើនតែងរងគ្រោះដោយសារត្រូវទឹកសាចលើរាងកាយ និងសម្លៀកបំពាក់ ។ ចំណែកអ្នកបើកបរលឿន ហើយធ្វើឱ្យទឹកសាចលើអ្នកផ្សេងនោះ ពួកគេពុំបានខ្វាយខ្វល់ ឬសូមទោសទេ ។

ចំណែកនៅប្រទេសថៃបានគិតគូរដល់ចំណុចនេះ គឺការបើកបរធ្វើឱ្យសាចទឹកលើអ្នកដទៃ នឹងចាត់ទុកថា ជាការបំពានច្បាប់ចរាចរណ៍ឆ្នាំ១៩៧៩ មាត្រា៤៣ ។ ច្បាប់នេះចែងថា ការបើកបរទាំងឡាយណាដែលមិនបានគិតដល់សុវត្ថិភាព ឬបង្កការក្តៅក្រហាយដល់អ្នកដទៃ ជននោះនឹងជាប់ពន្ធនាគារមិនលើសពី៣ខែ ឬពិន័យជាប្រាក់ចាប់ពី២.០០០បាត ដល់១ម៉ឺនបាត ឬទាំងជាប់ពន្ធនាគារ និងពិន័យជាប្រាក់ ។

លើសពីនេះ ប្រសិនបើមានខូចខាតទ្រព្យសម្បត្តិដោយសារការបើកបរសាចទឹកលើអ្នកដទៃ ជនប្រព្រឹត្តនឹងត្រូវទទួលការចោទប្រកាន់ពីបទល្មើសតាមច្បាប់ព្រហ្មទណ្ឌ ដោយសារធ្វើឱ្យខូចខាតទ្រព្យសម្បត្តិ តាមមាត្រា៣៥៨ ហើយនឹងត្រូវជាប់ពន្ធនាគារមិនលើស៣ឆ្នាំ ឬពិន័យជាប្រាក់មិនលើសពី៦ពាន់បាត ឬទាំងជាប់ពន្ធនាគារ និងពិន័យជាប្រាក់ ៕ ប្រភព ៖ Chiang Mai News

ប្រទេសចិន ៖ កិច្ចប្រជុំ BRICS រួមមាន ប្រទេសប្រេស៊ីល, រុស្ស៊ី, ឥណ្ឌា, ចិន និងអាហ្វ្រិកខាងត្បូងទើបតែបានបញ្ចប់ ហើយអាកប្បកិរិយារបស់ចិនត្រូវបានគេឃ្លាំមើលយ៉ាងខ្លាំង ដោយសារចិនជាប្រទេសវិនិយោគដ៏ធំមួយនៅអាហ្វ្រិកខាងត្បូង ។ ប្រទេសអាហ្វ្រិកខាងត្បូងបានធ្វើជាម្ចាស់ផ្ទះរៀបចំកិច្ចប្រជុំនៅឆ្នាំ២០២៣ ហើយបានសហការផ្នែកកសិកម្មជាមួយចិនផងដែរ ។

COFCO គឺជាក្រុមហ៊ុនកសិកម្មដ៏ធំមួយរបស់ប្រទេសចិន ដែលបានសហការជាមួយកសិករនៅអាហ្វ្រិកខាងត្បូងតាំងពីឆ្នាំ២០០៩ ហើយការសហការនេះបានផ្តោតលើផ្នែកកសិកម្មចម្រុះប្រកបដោយនិរន្តរភាពនៅអាហ្វ្រិកខាងត្បូង ខណៈផ្នែកកសិកម្មមានសារសំខាន់យ៉ាងខ្លាំងសម្រាប់សេដ្ឋកិច្ចអាហ្រ្វិកខាងត្បូង គឺស្មើនឹង២,៥% របស់ផលិតផលក្នុងស្រុកសរុប (GDP) ។

ក្នុងរយៈពេល១៤ឆ្នាំកន្លងមក ក្រុមហ៊ុន COFCO បានសហការយ៉ាងជិតស្និទ្ធជាមួយកសិករក្នុងតំបន់ដើម្បីបង្កើតភាពច្នៃប្រឌិត និងការធ្វើកសិកម្មបែបថ្មីទាំងផ្នែកផលិត និងទីផ្សារ, ជំរុញការផលិតគ្រាប់ពូជនៅអាហ្វ្រិកខាងត្បូង ហើយកិច្ចសហការនេះធ្វើឱ្យកសិករក្នុងតំបន់ទទួលបានផលប្រយោជន៍យ៉ាងខ្លាំង ។

នាយកក្រុមហ៊ុន COFCO លើកឡើងថា បច្ចុប្បន្ន ក្រុមហ៊ុនបានសហការជាមួយកសិករចំនួន៦២នាក់ និងទទួលបានទិន្នផលផលិតជាង៣៩ម៉ឺនតោនទាំងរដូវក្តៅ និងរដូវត្រជាក់ ជាពិសេស នៅតំបន់ Western Cape ហើយក្រុមហ៊ុនមានគោលដៅចម្បង គឺធ្វើឱ្យភាគីទាំងអស់ទទួលបានផលប្រយោជន៍យ៉ាងពេញចិត្ត ។ ក្រុមហ៊ុនបានផ្តល់ព័ត៌មានផ្នែកទីផ្សារ និងជូនដំណឹងពីអាកាសធាតុផងដែរ ហើយក្រុមហ៊ុនបានជួយកសិករក្នុងការជ្រើសរើសពេលវេលាល្អបំផុតសម្រាប់លក់ទិន្នផល ។ កិច្ចសហការគ្នានេះបានជួយបង្កើតការងារផ្នែកកសិកម្មជាច្រើន ព្រោះមានផ្ទៃដីធ្វើកសិកម្មជាងជាង១៤ម៉ឺនរ៉ៃ ។

នាយកក្រុមហ៊ុនបន្តថា ក្រុមហ៊ុនមានផែនការពង្រីកគម្រោងនេះទៅក្រៅប្រទេសអាហ្វ្រិកខាងត្បូងផងដែរ ។ ជាមួយគ្នានេះ ប្រទេសចិនក៏អាចរៀនសូត្រពីវិធីធ្វើការជាមួយកសិករអាហ្វ្រិកខាងត្បូង ដោយរួមគ្នាបង្កើតគំនិត និងបច្ចេកវិទ្យាថ្មីៗ ៕ ប្រភព ៖ Nation World

យុវវ័យភាគច្រើនរស់នៅតំបន់អាស៊ីអាគ្នេយ៍ចាប់អារម្មណ៍ទិញទូរស័ព្ទដៃមានតម្លៃថោក ជំនួសការប្រើប្រាស់ទូរស័ព្ទមានតម្លៃថ្លៃៗ ដូចជា Samsung ឬ Apple ។ ក្រុមហ៊ុនស្រាវជ្រាវផ្នែកទីផ្សាររបស់អង់គ្លេសឈ្មោះ YouGov ដែលទទួលការឧបត្ថម្ភដោយ Poco របស់ Xiaomi បានស្ទង់មតិអ្នកប្រើប្រាស់ទូរស័ព្ទដៃ ដែលមានអាយុចាប់ពី១៨ឆ្នាំ ទៅ៤០ឆ្នាំ នៅប្រទេសឥណ្ឌូណេស៊ី, ម៉ាឡេស៊ី, ហ្វីលីពីន, ថៃ និងវៀតណាម ចំនួន២.៥០០នាក់ ។ លទ្ធផលការស្ទង់មតិបង្ហាញថា អ្នកឆ្លើយតប៣នាក់ក្នុងចំណោម៤នាក់ប្រាប់ថា ពួកគេចូលចិត្តទូរស័ព្ទមានតម្លៃសមរម្យ ហើយ៣៧% ទៀតប្រាប់ថា យល់ស្របនឹងមតិនេះ ។

អ្នកឆ្លើយតបការស្ទង់មតិ៨នាក់ក្នុងចំណោម១០នាក់មានទំនុកចិត្តលើទូរស័ព្ទដៃតម្លៃមធ្យម ពីព្រោះពួកគេអាចចំណាយប្រាក់ទិញទូរស័ព្ទបានត្រឹមកម្រិតនេះ ។ ចំណែករឿងតម្លៃ និងប្រសិទ្ធភាពទូរស័ព្ទ គឺអាចបំពេញតម្រូវការរបស់អតិថិជនបាន និងពុំចាំបាច់មានលក្ខណៈពិសេសច្រើនពេកទេ ។ លទ្ធផលការស្ទង់មតិបង្ហាញទៀតថា យុវវ័យភាគច្រើនរស់នៅតំបន់អាស៊ីអាគ្នេយ៍ប្រើប្រាស់ទូរស័ព្ទដៃសម្រាប់ការកម្សាន្ត ក្នុងនោះ៨០% មើលវីដេអូ និង៦០% លេងហ្គេម ។

បច្ចុប្បន្ន ក្រុមហ៊ុនផលិតទូរស័ព្ទដៃស្មាតហ្វូននាំមុខគេក្នុងទីផ្សារតំបន់អាស៊ីអាគ្នេយ៍ គឺក្រុមហ៊ុន Samsung ដែលបានរួមចំណែកក្នុងទីផ្សារប្រមាណ២៧% នៅត្រីមាសទី១ ឆ្នាំ២០២៣ ។ បន្ទាប់មក គឺក្រុមហ៊ុនរបស់ចិន រួមមាន Oppo, Xiaomi, Vivo និង Realme ។ នេះបើតាមរបាយការណ៍របស់ក្រុមហ៊ុនស្រាវជ្រាវ Canalys ។ អ្នកវិភាគមកពី Canalys ឱ្យដឹងថា តំបន់អាស៊ីអាគ្នេយ៍នៅតែជាទីផ្សាររីកចម្រើនសម្រាប់ក្រុមហ៊ុនផលិតទូរស័ព្ទស្មាតហ្វូន ដោយសារកំណើនពលរដ្ឋមានជីវភាពកណ្តាល និងយុវវ័យសម័យថ្មី ដែលគេចាត់ទុកថា គឺជាក្រុមអតិថិជនចម្បងរបស់ក្រុមហ៊ុនផលិតស្មាតហ្វូន ។

ទោះយ៉ាងណា ទូរស័ព្ទតម្លៃមធ្យមបានប្រឈមនឹងការប្រកួតប្រជែងកាន់តែខ្លាំងជាមួយក្រុមហ៊ុនលក់ទូរស័ព្ទដៃថ្លៃៗ ។ តាមរបាយការណ៍របស់ក្រុមហ៊ុនស្រាវជ្រាវ Counterpoint បង្ហាញថា ចំនួនការលក់ទូរស័ព្ទ iPhone របស់ក្រុមហ៊ុន Apple បានកើនឡើងរហូតដល់១៨% នៅត្រីមាសទី១ ឆ្នាំ២០២៣ ខណៈការលក់ទូរស័ព្ទដៃរបស់ក្រុមហ៊ុន Samsung, Xiaomi, Vivo និង Oppo ធ្លាក់ចុះ ៕ ប្រភព ៖ AEC Connect