រដ្ឋធានីហ្សាការតា៖ ក្រុមជនឆបោក ជាជនជាតិចិន បានប្រើប្រាស់ល្បិចដ៏ស្មោគគ្រោក បោកបញ្ឆោតជនជាតិចិនដូចគ្នា ដែលភាគច្រើន ជាមន្រ្ដីរដ្ឋការសាធារណៈ នៅក្នុងប្រទេសចិន តាមរយៈស្រីស្អាត រហូតធ្វើឲ្យជនរងគ្រោះលង់ខ្លួន ចាញ់នូវកលល្បិចដ៏អាក្រក់ ហើយព្រមថតរូបរួមភេទ តាមការហៅវីដេអូ រួចគំរាមយកលុយ ក៏ត្រូវអស់លក្ខណ៍ជាមួយនឹងប៉ូលិសឥណ្ឌូណេ ក្របួចកជាប់ជិត១០០នាក់។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃពុធ ទី៣០ ខែសីហា ថា ប៉ូលិសឥណ្ឌូណេស៊ី បានបញ្ជាក់ នៅថ្ងៃពុធ (ទី៣០ ខែសីហា) ថា ប៉ូលិស បានចាប់ខ្លួនជនជាតិចិន រាប់សិបនាក់ នៅក្នុងប្រទេសឥណ្ឌូណេស៊ី ដោយសារតែពួកគេជាប់ពាក់ព័ន្ធនឹងការសង័្សយ អំពីការរៀបចំក្រុមបោកប្រាស់លួងលោមស្នេហា តាមបណ្ដាញអ៊ិនធើរណេត ដោយបានអន្ទងល្បួងជនរងគ្រោះ រាប់រយនាក់ នៅក្នុងប្រទេសចិន។ ដោយផ្អែកលើសេចក្ដីរាយការណ៍របស់សមត្ថកិច្ចចិន ទើបប៉ូលិសឥណ្ឌូណេស៊ី បានឈានដល់ការចាប់ខ្លួនក្រុមជនឆបោកជាជនជាតិចិន សរុប ៨៨នាក់ ហើយក្នុងនោះមានបុរសចំនួន៨៣នាក់ និង ស្ដ្រីចំនួន៥នាក់។

ការចាប់ខ្លួនជនខិលខូចទាំងនេះ បានធ្វើឡើង នៅឯសួនឧស្សាហកម្មមួយកន្លែង ស្ថិតក្នុងទីក្រុងបាតាម (Batam) ខេត្តកោះរីយ៉ាវ (Riau) ប្រទេសឥណ្ឌូណេស៊ី កាលពីថ្ងៃអង្គារ (ទី២៩ ខែសីហា)។

ប៉ូលិសឥណ្ឌូណេស៊ី បានបន្ដ ថា ក្រុមជនសង័្សយ បានបោកបញ្ឆោតលុយពីជនរងគ្រោះ រាប់រយនាក់ នៅក្នុងប្រទេសចិន ដែលពួកគេ ភាគច្រើន ជាមន្រ្ដីរដ្ឋការសាធារណៈ។

លោក ហ្សាសវ៉ានី ប៉ាន់ដ្រា អាស្សាដ (Zahwani Pandra Arsyad) អ្នកនាំពាក្យ ស្នងការប៉ូលិសខេត្ដកោះរីយ៉ាវ បានប្រាប់ដល់ទីភ្នាក់ងារសារព័ត៌មានរបស់បារាំង AFP កាលពីព្រឹក ថ្ងៃពុធ (ទី៣០ ខែសីហា) ថា «ឥឡូវនេះ យើងកំពុងតែស៊ើបអង្កេត ថាតើមានជនជាតិឥណ្ឌូណេស៊ី ណាម្នាក់ដែរឬទេ ស្ថិតក្នុងចំណោមជនរងគ្រោះទាំងនោះ។ ប៉ុន្ដែប្រសិនបើមិនមានការជាប់ពាក់ព័ន្ធនឹងជនរងគ្រោះ ជាជនជាតិឥណ្ឌូណេស៊ី ទេនោះ ជនឆបោកទាំងអស់នោះ នឹងត្រូវនិរទេស ចេញពីប្រទេសអាស៊ានមួយនេះ បញ្ជូនទៅកាន់ប្រទេសចិន វិញភ្លាមៗ»។

ប៉ូលិសឥណ្ឌាណេស៊ី បានបន្ថែម ថា ក្រុមជនសង័្សយ ជាជនជាតិចិនទាំងអស់ ដែលបានរងការចោទប្រកាន់ ជាជនឆបោក បានប្រើប្រាស់ល្បិច បោកបញ្ឆោត ប្រកបដោយអារម្មណ៍រោលរាលដល់ជនរងគ្រោះ នៅក្នុងអំឡុងការហៅជាវីដេអូនោះ។ រីឯស្រ្ដីឆបោក ជាជនជាតិចិនទាំង៥នាក់នោះ ក៏បានរងនូវការចោទប្រកាន់ អំពីការល្បួងជនរងគ្រោះ ដោយធ្វើសកម្មភាពរួមភេទ នៅក្នុងអំឡុងការហៅទូរស័ព្ទ ដោយមានជនសង័្សយផ្សេងៗទៀត ដែលជាក្រុមរបស់ខ្លួន រង់ចាំថតវីដេអូ អំពីសកម្មភាពរបស់ជនរងគ្រោះទាំងនោះ។

ក្រោយមក ក្រុមជនសង័្សយ ជាជនជាតិចិនទាំងនោះ បានរងការចោទប្រកាន់ អំពីការទារលុយពីជនរងគ្រោះ តាមរយៈការគំរាមកំហែង អំពីការបញ្ចេញវីដេអូ នៃសកម្មភាពរួមភេទរបស់ជនរងគ្រោះ នៅលើបណ្ដាញសង្គម ប្រសិនបើមិនព្រមបញ្ជូនលុយ មកឲ្យពួកគេ។ បើទោះជាយ៉ាងណា អាជ្ញាធរឥណ្ឌូណេស៊ី នៅមិនទាន់ដឹងច្បាស់ ថាតើក្រុមឆបោកទាំងនេះ បានប្រតិបត្តិការ អស់រយៈពេលប៉ុន្មានថ្ងៃ ខែ ឬឆ្នាំមកហើយនោះដែរ ហើយក៏មិនបានដឹង ថា តើក្រុមជនខិលខូចទាំងនោះ ប្រមូលលុយបានចំនួនប៉ុន្មាននោះដែរ។

ប៉ូលិសឥណ្ឌូណេស៊ី ធ្លាប់អះអាង ថា ក្រុមជនបោកប្រាស់ជាច្រើន តែងតែផ្លាស់ប្ដូកន្លែងស្នាក់នៅ មកកាន់ប្រទេសឥណ្ឌូនេស៊ី និង បណ្តាប្រទេសអាស៊ីអាគ្នេយ៍ផ្សេងៗទៀត ក្រោយពេលអាជ្ញាធរចិន បានបង្ក្រាបបណ្តាញរបស់ពួកគេ នៅក្នុងប្រទេស។

ប៉ូលិសឥណ្ឌូណេស៊ី ធ្លាប់ចាប់ខ្លួនជនជាតិចិន ចំនួន៨៥នាក់ និង ជនជាតិឥណ្ឌូនេស៊ី ចំនួន៦នាក់ កាលពីអំឡុងឆ្នាំ២០១៩ ពាក់ព័ន្ធនឹងការការឆបោក តាមបណ្ដាញអ៊ិនធើរណេត ដោយបានបោកបញ្ឆោតជនរងគ្រោះ អស់លុយរាប់លានដុល្លារអាមេរិក៕

នាយកក្រុមហ៊ុន Microsoft លោក Brad Smith បានផ្តល់បទសម្ភាសន៍ជាមួយសារព័ត៌មាន CNBC ថា គេអាចប្រើប្រាស់បច្ចេកវិទ្យា AI ធ្វើជាអាវុធបាន ហើយមនុស្សត្រូវគ្រប់គ្រងលើបច្ចេកវិទ្យាដ៏ឆ្លាតនេះ ដោយការចេញច្បាប់ និងបទបញ្ជាថ្មីៗសម្រាប់ធានាសុវត្ថិភាពពិភពលោក ។

កាលពីថ្ងៃទី២៨ ខែសីហា ឆ្នាំ២០២៣ លោក Brad Smith លើកឡើងថា ៖ «ខ្ញុំគិតថា បច្ចេកវិទ្យាទាំងអស់ដែលគេបានបង្កើតឡើងមក បើទោះជាវាជួយបង្កលក្ខណៈងាយស្រួលដល់ពួកយើងរាល់គ្នាក្តី ប៉ុន្តែគេក៏អាចប្រើប្រាស់វាធ្វើជាអាវុធបានដូចគ្នា ។ ដូច្នេះ យើងត្រូវប្រាកដចិត្តថា AI ត្រូវតែស្ថិតក្រោមការគ្រប់គ្រងរបស់មនុស្ស មិនថាស្ថាប័នរដ្ឋាភិបាល កងទ័ព ឬស្ថាប័នណាមួយទេ ដែលចង់ប្រើប្រាស់បច្ចេកវិទ្យា AI ឱ្យដំណើរការដោយស្វ័យប្រវត្តិ ដូចជា ផ្នែកហេដ្ឋារចនាសម្ព័ន្ធសំខាន់ៗ ។ យើងចាំបាច់ត្រូវធានាថា ត្រូវឱ្យមនុស្សជាអ្នកគ្រប់គ្រងលើបច្ចេកវិទ្យានេះ ព្រោះយើងនឹងអាចបន្ថយល្បឿន ឬបិទប្រព័ន្ធដំណើរការដោយស្វ័យប្រវត្តិរបស់វា» ។

បណ្តាក្រុមហ៊ុនបច្ចេកវិទ្យានាំមុខគេលើពិភពលោក បានដាស់តឿនពីការគំរាមកំហែងរបស់បច្ចេកវិទ្យា AI ក្រោយពីកម្មវិធី ChatGPT ដែលជា Chatbot មានប្រព័ន្ធដំណើរការបញ្ញាសិប្បនិម្មិត (Generative AI) ក្លាយជាការពេញនិយមនៅទូទាំងពិភពលោក ដោយសារវាអាចឆ្លើយតបដូចមនុស្សបេះបិទ ។ Generative AI គឺជាបច្ចេកវិទ្យា AI មានសមត្ថភាពអាចបង្កើតខ្លឹមសារផ្សេងៗដូចជា អត្ថបទ រូបភាព កូដ និងកម្មវិធីជាច្រើនទៀត ។

កាលពីខែឧសភា ឆ្នាំ២០២៣ លោក Sam Altman ជា CEO របស់ក្រុមហ៊ុន Open AI ដែលបានបង្កើតកម្មវិធី ChatGPT រួមទាំងនាយកគ្រប់គ្រងរបស់ DeepMind ដែលជាក្រុមហ៊ុន AI របស់ Google ព្រមទាំងក្រុមហ៊ុន Microsoft បានដាស់តឿនថា បច្ចេកវិទ្យា AI មានគ្រោះថ្នាក់អាចធ្វើឱ្យមនុស្សផុតពូជបាន ។ វាគ្រោះថ្នាក់ខ្លាំងស្មើនឹងការធ្វើសង្គ្រាមនុយក្លេអ៊ែរ ហើយមនុស្សបាច់ត្រូវកាត់បន្ថយគ្រោះថ្នាក់ទាំងនេះ ។

នាយកក្រុមហ៊ុន Microsoft លោក Brad Smith បានថ្លែងទៅកាន់សារព័ត៌មាន CNBC នៅខាងក្រៅកិច្ចប្រជុំកំពូលអាជីវកម្ម Business 20 Summit ថា មូលហេតុទាំងនេះហើយ ទើបពួកយើងគាំទ្រឱ្យក្រុមហ៊ុនទាំងអស់ធ្វើរឿងត្រឹមត្រូវ ហើយគួរចេញច្បាប់ និងបទបញ្ជាថ្មីៗសម្រាប់ធានាសុវត្ថិភាពពិភពលោកផងដែរ ៕ ប្រភព ៖ Bangkok biznews

ប្រទេសថៃ ៖ នៅថ្ងៃទី៣០ ខែសីហា ឆ្នាំ២០២៣ នៅទីស្នាក់ការគណបក្សភឿថៃ លោក Srettha Thavisin និងលោក Supattanapong Punmeechaow ឧបនាយករដ្ឋមន្ត្រីស្តីទី និងរដ្ឋមន្ត្រីក្រសួងថាមពល ក្នុងឋានៈជាសមាជិកសភាតំណាងរាស្ត្ររបស់គណបក្សថៃសាងឆាត ព្រមទាំងក្រុមអ្នកសេដ្ឋកិច្ចមកពីគណបក្សថៃសាងឆាត បានប្រជុំពិភាក្សាអំពីការប្រគល់ការងារពីរដ្ឋាភិបាលចាស់ ។

នាយករដ្ឋមន្ត្រីថ្មីប្រទេសថៃ លោក Srettha Thavisin លើកឡើងថា នេះជាការផ្ទេរការងារពីរដ្ឋាភិបាលចាស់ទៅរដ្ឋាភិបាលថ្មី ប៉ុន្តែនៅមិនទាន់បានពិភាក្សាពីកិច្ចការនយោបាយនៅឡើយទេ ហើយបច្ចុប្បន្ន លោកបានបំពេញការងារជាបន្តបន្ទាប់ ។ ចំណែកសំណួរសួរថា តើប្រទេសថៃនឹងអាចបញ្ចុះតម្លៃថាមពល ចាប់ពីកិច្ចប្រជុំគណៈរដ្ឋមន្ត្រីលើកដំបូងបានដែរឬទេ ? លោក Srettha Thavisin ឆ្លើយថា លោកនឹងប្រកាសភ្លាមៗ ហើយសូមរង់ចាំបន្តិច ពីព្រោះលោកត្រូវតាមដានគោលនយោបាយផ្សេងទៀតផងដែរ ។

ចំណែកលោក Supattanapong Punmeechaow ឧបនាយករដ្ឋមន្ត្រីស្តីទី និងរដ្ឋមន្ត្រីក្រសួងថាមពល រីករាយនឹងប្រគល់ភារកិច្ចនេះដោយរលូន ។ លោកលើកឡើងថា ៖ «ពួកយើងបានជជែកគ្នាអំពីការងារមួយចំនួន ហើយនេះចាត់ទុកថា គឺជាផលប្រយោជន៍ក្នុងការជជែករឿងនយោបាយ» ។

នៅពេលសួរថា តើលោកបានជជែកគ្នាអំពីរឿងថាមពលដែរឬទេ ? លោក Supattanapong Punmeechaow ឆ្លើយថា យើងបានជជែកគ្នាអំពីក្រសួងថាមពល ក្រោយការបង្កើតរដ្ឋាភិបាលថ្មី ។ ចំណែកការបញ្ចុះតម្លៃថាមពលក្រោយពីមានរដ្ឋាភិបាលថ្មីទទួលខុសត្រូវ នឹងអាចធ្វើបានឬយ៉ាងណានោះ គឺត្រូវជជែកជាមួយរដ្ឋមន្ត្រីក្រសួងថាមពលថ្មី ៕ ប្រភព ៖ Mono News

ការថែទាំបុគ្គលិកលក្ខណៈរបស់បុរស ជារឿងសំខាន់មួយដែលយុវជនមិនគួរមើលរំលង ព្រោះថាការបន្ថែមភាពទាក់ទាញនឹងក្លាយជាជំនួយការមួយទៀតដែលធ្វើឱ្យអ្នកមានភាពជឿជាក់លើខ្លួនឯង និងយកឈ្នះចិត្តអតិថិជន រួមទាំងសាធារណជនទូទៅផងដែរ។ ដូច្នេះខាងក្រោមនេះគឺជាវិធី ៥ យ៉ាងដើម្បីគ្រប់គ្រងភាពសង្ហាឱ្យទទួលបានលទ្ធផលល្អ៖

១.ការរៀបចំខ្លួន និងតុបតែងសក់៖ ពិតណាស់ ការរៀបចំខ្លួនឱ្យបានស្អាតបាត និងរើសម៉ូដសក់ឱ្យសមនឹងមុខរបស់អ្នក អាចធ្វើឱ្យអ្នកមានភាពទាក់ទាញថ្លៃថ្នូរ ដោយអ្នកគ្រាន់តែកំណត់ម៉ូដសក់ឱ្យបានត្រឹមត្រូវ និងស្លៀកពាក់ឱ្យស្អាតបាតជារៀងរាល់ថ្ងៃ នោះអ្នកនឹងទទួលបានការចាប់អារម្មណ៍ពីមនុស្សគ្រប់គ្នា។

២.ថែរក្សាស្បែករបស់អ្នកឱ្យរលោង៖ បញ្ហានៃការថែរក្សាស្បែក មិនមែនសម្រាប់តែស្រ្តីនោះទេ បុរសក៏គួរតែថែរក្សាស្បែករបស់ពួកគេឱ្យរលោង និងទន់ ដើម្បីជួយលើកកម្ពស់បុគ្គលិកលក្ខណៈបន្ថែមទៀត។ ដូច្នេះ អ្នកគួរតែមានការថែរក្សាស្បែកឱ្យបានសមរម្យទាំងផ្ទៃមុខ និងដងខ្លួន ដើម្បីធ្វើឱ្យស្បែកភ្លឺ និងស្រស់សង្ហាមានភាពទាក់ទាញគ្រប់ពេលវេលា។

៣.កាត់ក្រចកដៃ និងក្រចកជើង៖ បញ្ហាធំមួយដែលបុរសតែងតែធ្វេសប្រហែសគឺការថែទាំក្រចកដៃ និងក្រចកជើង។ អ្នកគួរតែកាត់ក្រចករបស់អ្នកឱ្យបានស្អាត ដើម្បីមើលទៅមានអនាម័យ។

៤.ថែរក្សាពុកមាត់ ឬពុកចង្ការឱ្យបានត្រឹមត្រូវ៖ ប្រសិនបើអ្នកជាបុរសដែលចូលចិត្តទុកពុកមាត់ ឬពុកចង្ការ អ្នកគប្បីថែរក្សាវាឱ្យបានត្រឹមត្រូវ កុំទុកវាឱ្យក្រាក់ពេកព្រោះអាចបាត់បង់មន្តស្នេហ៍។

៥.លេងកីឡា៖ ការលេងកីឡា បានបង្ហាញពីភាពរឹងមាំ និងភាពជាបុរសពេញលក្ខណៈ របស់មនុស្សប្រុស។ ការជិះកង់ ហែលទឹក វាយកូនបាល់ កីឡាបាល់ទាត់និងកីឡាផ្សេងៗទៀត សុទ្ធសឹងតែជាកីឡាដែលឆ្លុះបញ្ចាំងពី ភាពព្យាយាម អត់ធ្មត់ និងការស្រឡាញ់សុខភាព និងរាងកាយរបស់ពួកគេ៕
ប្រភព៖sanook

រដ្ឋធានីមូស្គូ៖ ក្រោយពេលរដ្ឋាភិបាលក្រុងកៀវ បានព្រមាន អំពីសង្រ្គាមរបស់មេដឹកនាំវិមានក្រឹមឡាំង នៅលើទឹកដីរបស់ខ្លួន នឹងវិលត្រឡប់ទៅរកប្រទេសរុស្ស៊ី វិញនោះមក ឥឡូវនេះ កងទ័ពការពារទឹកដីរបស់អ៊ុយក្រែន បានបញ្ចេញហ្វូងដ្រូន ហោះចូលជ្រៅទៅលើទឹកដីរបស់មហាអំណាចកំពូលនុយក្លេអ៊ែររបស់ពិភពលោក ហើយបានវាយប្រហារទៅលើតំបន់សំខាន់ៗចំនួន៦ ដោយរាប់ទាំងរដ្ឋធានីមូស្គូ ជាបេះដូងរបស់រុស្ស៊ី ហើយបានបំផ្លិចបំផ្លាញយន្ដហោះ នៅក្នុងមូលដ្ឋានកងទ័ពអាកាស ផងដែរ។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃពុធ ទី៣០ ខែសីហា ថា អ៊ុយក្រែន បានបើកប្រតិបត្ដិការ ជាមួយនឹងហ្វូងដ្រូនរបស់ខ្លួន ប្រឆាំងនឹងគោលដៅសំខាន់ៗជាច្រើន នៅក្នុងតំបន់ចំនួន៦ ចូលជ្រៅទៅលើទឹកដីរបស់រុស្ស៊ី រួមទាំង ការវាយប្រហារទៅលើអាកាសយានដ្ឋាន នៅភាគខាងលិចទីក្រុងស្កូវ (Pskov) នៅជិតព្រំដែន ជាប់ជាមួយនឹងប្រទេសឡាតវី (Latvia) និង អេស្ដូនី ដែលជាមូលដ្ឋានរបស់កងយន្ដហោះដឹកជញ្ជូនយោធា ផងដែរ។ ការវាយប្រហារនេះ បានបំផ្ទុះ និង បង្កឲ្យមានអណ្ដាតភ្លើងឆាបឆេះឡើងយ៉ាងសន្ធោសន្ធៅ ហើយបានធ្វើឲ្យខូចខាតដល់យន្ដហោះដឹកជញ្ជូនធុនធំ ប្រភេទ Ilyushin Il-76 (អ៊ីលយូស៊ីន ២-៧៦) ចំនួន៤គ្រឿង។

ក្រសួងការពារជាតិរុស្ស៊ី បានបញ្ជាក់ កាលពីព្រឹក ថ្ងៃពុធ (ទី៣០ ខែសីហា) ថា ដ្រូនជាច្រើនគ្រឿង ត្រូវបានបាញ់ទម្លាក់ នៅក្នុងតំបន់ជាច្រើនរបស់រុស្ស៊ី រួមមាន តំបន់អ័រឡូវ (Orlov), ប៊្រីយ៉ាន់ស្ក៍(Bryansk) រីយ៉ាហ្សាន (Ryazan) កាលូហ្កា (Kaluga) និង តំបន់ជុំវិញរដ្ឋធានីមូស្គូ។

លោក វីតាលី គ្លីស្កូ (Vitali Klitschko) អតីតអ្នកប្រដាល់អាជីពរបស់អ៊ុយក្រែន ហើយបច្ចុប្បន្ន ក្លាយជាចៅហ្វាយក្រុងកៀវ បានសរសេរ នៅលើបណ្ដាញសង្គមតេឡេក្រាម ថា រុស្ស៊ី បានបាញ់មីស៊ីល និង ដ្រូន វាយប្រហារមកលើរដ្ឋធានីកៀវ កាលពីព្រឹក ថ្ងៃពុធ (ទី៣០ ខែសីហា)។ នេះជាការវាយប្រហារដ៏ខ្លាំងក្លា មកលើរដ្ឋធានីរបស់អ៊ុយក្រែន នៅក្នុងសង្គ្រាម អស់រយៈពេលជាច្រើនខែកន្លងមកនេះ។

បើតាមអាជ្ញាធរក្រុងកៀវ បានឲ្យដឹង ថា ប្រព័ន្ធការពារដែនអាកាសរបស់អ៊ុយក្រែន បានបាញ់កម្ទេចមីស៊ីល និង ដ្រូនរបស់រុស្ស៊ី ជាង២០គ្រឿង ដែលវាយប្រហារ មកលើរដ្ឋធានីកៀវ។ ប៉ុន្ដែជាអកុសលនោះ ក៏មានឆ្មាំសន្ដិសុខ ចំនួន២នាក់ បានស្លាប់ ដោយសារតែការធ្លាក់កម្ទេចកម្ទីដ្រូនទាំងនោះ។

ទីភ្នាក់ងារសារព័ត៌មាន គ្របគ្រងដោយរដ្ឋរុស្ស៊ី Tass បានដកស្រង់ប្រភពពីទីភ្នាក់ងារសង្គ្រោះបន្ទាន់ អះអាង កាលពីព្រឹក ថ្ងៃពុធ (ទី៣០ ខែសីហា) ថា យន្ដហោះដឹកជញ្ជូនធុនធ្ងន់របស់យោធារុស្ស៊ី ប្រភេទ Ilyushin Il-76 (អ៊ីលយូស៊ីន ២-៧៦) ចំនួន៤គ្រឿង ស្ថិតក្នុងអាកាសយានដ្ឋាន នាភាគខាងលិចតំបន់ស្កូវ (Pskov) ដែលមានចម្ងាយប្រហែល៦៦០គីឡូម៉ែត្រ ពីភាគខាងជើងព្រំដែនរបស់អ៊ុយក្រែន បានរងនូវការខូចខាត៕

បរទេស៖ យោងតាមអង្គការស្រាវជ្រាវអវកាសឥណ្ឌា (ISRO) ) ដែលបានរាយការណ៍កាលពីថ្ងៃទី ២៩ ខែសីហាថា យានអវកាស Chandrayan-៣ បានរកឃើញសារធាតុស្ពាន់ធ័រ អាលុយមីញ៉ូម ដែក កាល់ស្យូម ក្រូមីញ៉ូម ទីតាញ៉ូម ម៉ង់ហ្គាណែស អុកស៊ីហ្សែន និងស៊ីលីកុន នៅលើផ្ទៃព្រះច័ន្ទដូចដែលបានរំពឹងទុក។ ដូច្នេះមនុស្សយន្តនឹងធ្វើការពិសោធន៍រយៈពេល ១៤ ថ្ងៃបន្តទៀតនៃរបកគំហើញថ្មីនេះ ដែលជាការសង្កេតតាមបែបវិទ្យាសាស្ត្រលើកដំបូងរបស់ខ្លួនក្នុងដំណើរស្វែងរកប៉ូលទឹកកកខាងត្បូង។

នៅថ្ងៃទី ២៨ ខែសីហាកន្លងទៅ ផ្លូវរបស់មនុស្សយន្តស្វយ័តត្រូវបានរៀបចំឡើងវិញនៅពេលដែលវាចូលទៅជិតរណ្ដៅដែលមានទទឹង ៤ ម៉ែត្រ នឹងអាចផ្លាស់ទីដោយសុវត្ថិភាព។ យាននេះវិលក្នុងល្បឿនប្រហែល ១០ សង់ទីម៉ែត្រ/វិនាទី ដើម្បីកាត់បន្ថយការឆក់ និងការខូចខាតពីផ្ទៃរដុបរបស់ព្រះច័ន្ទ។

យានរុករកក៏បានប្រើប្រាស់ឧបករណ៍ RAMBHA និង ILSA ដើម្បីសិក្សាបរិយាកាសរបស់ព្រះច័ន្ទ និងជីកសំណាកដើម្បីវិភាគបន្ថែមលើវាយនភាពផ្ទៃខាងលើ នេះបើយោងតាមកាសែត Times of India ។ ទោះយ៉ាងណាក៏ដោយ ឧបករណ៍ឡាស៊ែរបំបែក Spectroscopy (LIBS) របស់វាបានធ្វើការវាស់វែងដំបូងនៃសមាសភាពដីនៅប៉ូលខាងត្បូង។ ដូចនេះ អ្នកវិទ្យាសាស្ត្រនឹងអាចសិក្សាពីពន្លឺប្លាស្មាដើម្បីកំណត់ពីបណ្តុំនៃប្រវែងរលក និងកំណត់សមាសធាតុគីមីនៃដី៕
ប្រភព៖vnexpress