ប្រទេសឥណ្ឌូណេស៊ី ៖ អនុប្រធានាធិបតីអាមេរិកបានបញ្ជាក់នៅក្នុងកិច្ចប្រជុំកំពូលនៃសមាគមប្រជាជាតិអាស៊ីអាគ្នេយ៍ ឬអាស៊ាន នៅទីក្រុងហ្សាកាតា ប្រទេសឥណ្ឌូណេស៊ីថា អាមេរិកនៅតែគាំទ្រអាស៊ានបន្តទៀត ហើយអាមេរិកនឹងដាក់សម្ពាធលើរដ្ឋាភិបាលយោធាមីយ៉ាន់ម៉ាផងដែរ ។

អនុប្រធានាធិបតីអាមេរិក លោកស្រី Kamala Harris បានលើកឡើងក្នុងកិច្ចប្រជុំអាស៊ាន-អាមេរិក លើកទី១១ ដែលជាផ្នែកមួយនៃកិច្ចប្រជុំកំពូលរបស់សមាគមប្រជាជាតិអាស៊ីអាគ្នេយ៍ ឬអាស៊ាន នៅទីក្រុងហ្សាកាតាថា រដ្ឋាភិបាលអាមេរិកនឹងបន្តដាក់សម្ពាធលើរដ្ឋាភិបាលយោធាមីយ៉ាន់ម៉ា ដើម្បីឱ្យពួកគេបញ្ឈប់ការប្រើអំពើហិង្សាមកលើពលរដ្ឋ, ដោះលែងអ្នកទោសនយោបាយ និងការនាំប្រទេសមីយ៉ាន់ម៉ាឱ្យវិលមករកលទ្ធិប្រជាធិបតេយ្យ ។

ក្រៅពីនេះ លោកស្រី Kamala Harris បានបញ្ជាក់ពីការគាំទ្ររបស់រដ្ឋាភិបាលក្រុងវ៉ាស៊ីនតោនចំពោះគោលការណ៍ណែនាំរួមចំនួន៥ ដែលបណ្តាប្រទេសអាស៊ាន រួមទាំងរដ្ឋាភិបាលយោធាមីយ៉ាន់ម៉ាបានឯកភាពគ្នាកាលពីខែមេសា ឆ្នាំ២០២១ ឬប្រមាណ២ខែ ក្រោយពីកើតរដ្ឋប្រហារនៅថ្ងៃទី១ ខែកុម្ភៈ ឆ្នាំ២០២១ ។

លោកស្រី Kamala Harris បន្តថា អាមេរិកបានប្តេជ្ញាចិត្តប្រកបដោយនិរន្តរភាពចំពោះតំបន់អាស៊ីអាគ្នេយ៍ និងតំបន់ឥណ្ឌូប៉ាស៊ីហ្វិកលើផ្នែកសន្តិសុខ, ការវិនិយោគទុន និងសេដ្ឋកិច្ច ដើម្បីលើកកម្ពស់ និងសហការផ្តោតលើភាពរុងរឿង, ភាពបត់បែន និងសុវត្ថិភាពរួមគ្នា ។ កន្លងមក គេសង្កេតឃើញថា ទំនាក់ទំនង និងកិច្ចសហការរវាងអាមេរិកជាមួយអាស៊ានបានធ្លាក់ចុះយ៉ាងខ្លាំង ចាប់តាំងពីសម័យរដ្ឋាភិបាលសាធារណរដ្ឋរបស់អតីតប្រធានាធិបតី លោក ដូណាល់ ត្រាំ ។

លោកស្រី Kamala Harris ក៏បានចូលរួមក្នុងកិច្ចប្រជុំកំពូលអាស៊ីបូព៌ាជាមួយប្រទេសចំនួន៨ រួមទាំងប្រទេសមហាអំណាចដូចជា អាមេរិក, ចិន និងរុស្ស៊ី ផងដែរ ។ គេរំពឹងថា នឹងមានការពិភាក្សាលើប្រធានបទដូចជា ជម្លោះរវាងប្រទេសមហាអំណាច, សង្គ្រាមនៅអ៊ុយក្រែន, ជម្លោះនៅសមុទ្រចិនខាងត្បូង និងផ្នែកពាណិជ្ជកម្ម ។ បើទោះជាកិច្ចប្រជុំនេះមានភាពតានតឹង ប៉ុន្តែអាស៊ានសង្ឃឹមថា នឹងប្រើប្រាស់កិច្ចប្រជុំនេះលើកកម្ពស់តួនាទីអាស៊ាន ដោយការបើកឱកាសឱ្យប្រទេសមហាអំណាចបានពិភាក្សាគ្នា ដើម្បីកាត់បន្ថយការប្រឈមមុខដាក់គ្នា ៕ ប្រភព ៖ TNN World

រដ្ឋធានីញូវដេលី៖ រហូតមកដល់ពេលនេះ ទំនាក់ទំនងការទូត រវាងរដ្ឋាភិបាលក្រុងវ៉ាស៊ីនតោន និង ក្រុងប៉េកាំង នៅមិនទាន់បានធូរស្រាលនៅឡើយ ហើយបច្ចុប្បន្ន ប្រធានាធិបតីសហរដ្ឋអាមេរិក ចាប់ផ្ដើមងាកទៅចាប់ដៃជាមួយនឹងឥណ្ឌា និង បណ្ដាប្រទេសផ្សេងៗទៀត នៅតំបន់ឈូងសមុទ្រ ដើម្បីបង្កើតហេដ្ឋារចនាសម្ព័ន្ធពាណិជ្ជកម្ម តភ្ជាប់ពីឈូងសមុទ្រ ឆ្ពោះមកកាន់តំបន់អាស៊ីខាងត្បូង នៅក្នុងគោលបំណងទប់ទល់នឹងគោលនយោបាយរបស់ចិន «ផ្លូវនិងខ្សែក្រវាត់»។

សារព័ត៌មានអារ៉ាប់អន្ដរជាតិ បានចេញផ្សាយ កាលពីព្រឹក ថ្ងៃសុក្រ ទី៨ ខែកញ្ញា ថា បើតាមរបាយការណ៍របស់បណ្ដាញផ្សព្វផ្សាយ Axios (អាក់ស្យូស) បានអះអាង ថា សហរដ្ឋអាមេរិក អារ៉ាប៊ីសាអូឌីត ឥណ្ឌា និង បណ្ដាប្រទេសផ្សេងៗទៀតនៅក្នុងតំបន់ កំពុងតែពិភាក្សាគ្នា អំពីកិច្ចព្រមព្រៀង លើការកសាងហេដ្ឋារចនាសម្ព័ន្ធ ដែលអាចមាន ឬ អាចកំណត់លើហេដ្ឋារចនាសម្ព័ន្ធពាណិជ្ជកម្មឡើងវិញ រវាងតំបន់ឈូងសមុទ្រ និង តំបន់អាស៊ីខាងត្បូង។ បើតាមផែនការនេះ នឹងតភ្ជាប់ពីបណ្តាប្រទេស នៅតំបន់មជ្ឈិមបូព៌ា តាមផ្លូវដែក និង តភ្ជាប់មកកាន់ប្រទេសឥណ្ឌា តាមរយៈកំពង់ផែ។

សេចក្ដីរាយការណ៍នោះ បានអះអាងទៀត ថា កិច្ចពិភាក្សាថ្មី ក្រោមការដឹកនាំរបស់សហរដ្ឋអាមេរិក ក៏រួមបញ្ចូល ទាំងប្រទេសអារ៉ាប់រួម (United Arab Emirates) និង តំបន់អឺរ៉ុប។ ប៉ុន្ដែលទ្ធផលជាក់ស្តែង អាចនឹងត្រូវប្រកាស នៅក្នុងពេលវេលាដ៏សំខាន់ណាមួយ នៅខាងក្រៅកិច្ចប្រជុំរបស់បណ្ដាមេដឹកនាំកំពូល នៃក្រុម G20 នាសប្តាហ៍នេះ។

លោក ចូ បៃដិន (Joe Biden) ប្រធានាធិបតីសហរដ្ឋអាមេរិក ត្រូវធ្វើដំណើរមកកាន់កិច្ចប្រជុំកំពូល G20 នៅក្នុងរដ្ឋធានីញូវដេលី (New Delhi) ប្រទេសឥណ្ឌា ជាកន្លែងដែលលោកប្រធានាធិបតី គ្រោងនឹងជួបពិភាក្សាគ្នា ជាមួយនឹងនាយករដ្ឋមន្ត្រីឥណ្ឌា លោក ណារ៉ែនដ្រា មូឌី (Narendra Modi) ហើយប្រហែលនឹងជាមានការពិភាក្សាដ៏សំខាន់ ជាមួយរាជទាយាទអារ៉ាប៊ីសាអូឌីត ព្រះអង្គម្ចាស់ ម៉ូហាមមេដ ប៊ីន សាលម៉ាន់ (Mohammed Bin Salman ) ផងដែរ។

ផែនការកំពង់ផែចម្រុះជាតិសាសន៍ និង កិច្ចព្រមព្រៀងផ្លូវដែក នឹងឈានមកដល់ នៅក្នុងពេលវេលាដ៏សំខាន់ណាមួយ នាពេលខាងមុខ។ គម្រោងនេះ ក៏ដើម្បីទប់ទល់នឹងការជំរុញហេដ្ឋារចនាសម្ព័ន្ធរបស់ពិភពលោក ក្រោមគោលនយោបាយខ្សែក្រវាត់ និង ផ្លូវរបស់ចិន ព្រោះលោកប្រធានាធិបតី បៃដិន កំពុងតែដាក់ចេញផែនការ ជំរុញឱ្យរដ្ឋាភិបាលក្រុងវ៉ាស៊ីនតោន ក្លាយជាដៃគូជំនួស សម្រាប់ផែនការរបស់ចិន និង ការវិនិយោគ នៅក្នុងប្រទេសងអភិវឌ្ឍ នៅកិច្ចប្រជុំ G20 ជាពិសេស នៅក្នុងតំបន់ឥណ្ឌូ-ប៉ាស៊ីហ្វិក។

ក្រៅពីជម្លោះការទូតនោះ ក្រុមមន្ត្រីជាច្រើន បានថ្លែង ថា ពួកគេសង្ឃឹម ថា កិច្ចព្រមព្រៀងលើហេដ្ឋារចនាសម្ព័ន្ធបែបនេះ អាចនឹងកាត់បន្ថយពេលវេលាដល់ដឹកជញ្ជូន ការចំណាយលើថ្លៃដើម ការប្រើប្រាស់ប្រេងឥន្ធនៈ និង ធ្វើឱ្យពាណិជ្ជកម្ម កាន់តែលឿន ហើយមានតម្លៃថោក៕

បរទេស៖ កាលពីចុងខែសីហា ក្រុមហ៊ុន Toyota ត្រូវបិទខ្សែដំឡើងចំនួន ២៨ នៅរោងចក្រផលិតរថយន្តចំនួន ១៤ ក្នុងប្រទេសជប៉ុន ដោយសារបញ្ហាកុំព្យូទ័រ។ បច្ចុប្បន្ន Toyota បានផ្តល់ព័ត៌មានលម្អិតបន្ថែមអំពីឧបទ្ទវហេតុនេះ រួមទាំងព័ត៌មានអំពី កំហុសបានកើតឡើងដោយសារតែសមត្ថភាពបើកបរមិនគ្រប់គ្រាន់។

យោងតាមសេចក្តីថ្លែងការណ៍មួយដែលបានបង្ហោះនៅលើគេហទំព័ររបស់ក្រុមហ៊ុនផលិតរថយន្តឈានមុខគេក្នុងប្រទេសជប៉ុន បានឱ្យដឹងថា ការសម្រេចចិត្តបិទរោងចក្រទាំងនេះជាបណ្តោះអាសន្នគឺជាផលវិបាកនៃការថែទាំប្រព័ន្ធដែលបានកើតឡើងប៉ុន្មានថ្ងៃមុន។ ដូច្នោះហើយ ក្នុងអំឡុងពេលថែទាំជាប្រចាំនៅថ្ងៃទី ២៧ ខែសីហា ទិន្នន័យបង្គរជាបន្តបន្ទាប់នៅក្នុងមូលដ្ឋានទិន្នន័យរបស់ក្រុមហ៊ុន Toyota ត្រូវបានលុប និងច្របូកច្របល់។ ក្នុងពេលជាមួយគ្នានោះ ប្រព័ន្ធឈប់ដំណើរការ ដោយសារដ្រាយវ៍ផ្ទុកទិន្នន័យមិនមានទំហំទំនេរគ្រប់គ្រាន់ដើម្បីរក្សាទុកទិន្នន័យ។

ដោយសារតែម៉ាស៊ីនមេដំណើរការលើប្រព័ន្ធតែមួយ បញ្ហានេះក៏បានប៉ះពាល់ដល់មុខងារបម្រុងទុកទិន្នន័យ ដែលនាំឱ្យក្រុមហ៊ុនមិនអាចធ្វើការបម្លែងបាន។ ជាលទ្ធផល ម៉ាស៊ីនមេមួយចំនួនដែលទទួលខុសត្រូវលើការបញ្ជាទិញគ្រឿងបន្លាស់បានឈប់ដំណើរការ ដែលប៉ះពាល់យ៉ាងខ្លាំងដល់ខ្សែសង្វាក់ផលិតកម្ម Toyota ទាំងមូល។ ក្រោយកើតហេតុ ក្រុមហ៊ុន Toyota បានបញ្ជាក់ថា “វិធានការប្រឆាំងក៏ត្រូវបានដាក់ចេញដែរ ដោយការធ្វើមាត្រដ្ឋាន និងផ្ទៀងផ្ទាត់ស្ថានភាព”។

នៅពេលនោះ មានការរំពឹងទុកថា Toyota បានធ្លាក់ខ្លួនរងគ្រោះដោយសារការវាយប្រហារតាមអ៊ីនធឺណែត ទោះជាយ៉ាងណាក៏ដោយ ក្រុមហ៊ុនផលិតរថយន្ត បញ្ជាក់ឡើងវិញ ថាបញ្ហាសន្តិសុខមិនមែនជាមូលហេតុនៃឧប្បត្តិហេតុនោះទេ។ សេចក្តីថ្លែងការណ៍របស់ក្រុមហ៊ុន Toyota ក៏បានរួមបញ្ចូលការសុំទោសដល់ “អតិថិជន អ្នកផ្គត់ផ្គង់ និងអ្នកពាក់ព័ន្ធ” សម្រាប់ការរអាក់រអួលណាមួយដែលបណ្តាលមកពីការផ្អាករោងចក្រក្នុងស្រុកដោយសារប្រព័ន្ធបញ្ជាទិញផលិតផល។

បច្ចុប្បន្ន រោងចក្រដែលមានមូលដ្ឋាននៅក្នុងប្រទេសជប៉ុនរបស់ Toyota មានចំនួនប្រហែលមួយភាគបីនៃផលិតកម្មរថយន្តទូទាំងពិភពលោក។ ដូច្នេះ ការនាំចេញរថយន្តរបស់ Toyota គឺមានការយឺតយាវយ៉ាងខ្លាំង ដោយសារមានបញ្ហានៅចុងខែមុន៕
ប្រភព៖cafef.com

រាជធានីបាងកក៖ ក្រោយពេលព្រះមហាក្សត្រ បានសម្រេចព្រះរាជទានបន្ធូរបន្ថយទោសដល់អតីតនាយករដ្ឋមន្រ្ដីដ៏មានឥទ្ធិពលរបស់ប្រទេសថៃ បន្ទាប់ពីការវិលត្រឡប់ មកដល់ប្រទេសកំណើតរបស់គាត់វិញ ក្រោយការនិរទេសខ្លួន ដោយខ្លួនឯង អស់រយៈពេល១៥ឆ្នាំកន្លងមក ធ្វើឲ្យក្រុមអ្នកវិភាគ បានយល់ឃើញ ថា លោក ថាក់ស៊ីន ស៊ីណាវ៉ាត្រា នឹងមានសេរីភាពឡើងវិញ នៅក្នុងពេលដ៏ឆាប់ខាងមុខនេះ។

សារព័ត៌មានរបស់សិង្ហបុរី CNA បានចេញផ្សាយ នៅថ្ងៃព្រហស្បតិ៍ ទី៧ ខែកញ្ញា ថា ក្រុមអ្នកវិភាគ បានអះអាង ថា ប្រជាប្រិយភាពរបស់លោក ថាក់ស៊ីន ស៊ីណាវ៉ាត្រា (Thaksin Shinawatra) ទំនងជាមិនអាចជួយដល់គណបក្សភឿថៃ ឲ្យឈ្នះការបោះឆ្នោតលើកក្រោយបាននោះទេ ព្រោះបច្ចុប្បន្ន ប្រជាពលរដ្ឋថៃ លែងដូចមុន ខណៈគាត់ បានរត់ភៀសខ្លួន ចេញពីប្រទេស កាលពី១៥ឆ្នាំមុន។

ក្រុមអ្នកវិភាគ បានបន្ដ ថា ករណីនេះ ទំនងជាមិនយូរប៉ុន្មាននោះឡើយ ហើយទណ្ឌិតជាអតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា អាចនឹងត្រឡប់ មកកាន់អំណាចរបស់គាត់ នៅក្នុងនយោបាយរបស់ប្រទេសថៃ វិញ បន្ទាប់ពីការជាប់ពន្ធនាគាររបស់គាត់ ត្រូវបានបន្ធូរបន្ថយយ៉ាងរហ័ស។ អ្វីដែលជាការគួរឱ្យកត់សម្គាល់នោះ ត្រង់ថា ព្រះមហាក្សត្រ បានសម្រេចព្រះរាជទានបន្ធូរបន្ថយទោសដល់គាត់។

ក្រុមអ្នកសង្កេតការណ៍ខ្លះទៀត បានយល់ឃើញ ថា នេះមានន័យ ថា លោក ថាក់ស៊ីន អាចនឹងត្រូវបានគេដោះលែង នៅក្នុងពេលដ៏ឆាប់ៗនេះ តាមរយៈការពិចារណា លើអាយុកម្រិតខ្ពស់របស់គាត់ ការជាប់ពន្ធនាគារ រយៈពេលខ្លី និង ល្បឿននៃការកាត់ទោសដំបូងរបស់គាត់ ពី៨ឆ្នាំ មកត្រឹមរយៈពេល១ឆ្នាំ។

លោក ថាក់ស៊ីន ស៊ីណាវ៉ាត្រា នាយករដ្ឋមន្រ្ដីថៃ ត្រូវបានពួកយោធា ធ្វើរដ្ឋប្រហារ បណ្ដេញចេញពីអំណាច នៅក្នុងអំឡុងឆ្នាំ២០០៦។ ចាប់តាំងពីពេលនោះមក អតីតនាយករដ្ឋមន្រ្ដីថៃ រូបនេះ បានរស់នៅនិរទេសខ្លួន ដោយខ្លួនឯង រហូតដល់ថ្ងៃ ដែលគាត់បានវិលត្រឡប់ មកកាន់ប្រទេសកំណើតវិញ កាលពីចុងខែមុន ហើយត្រូវបានតុលាការកាត់ទោសភ្លាមៗ ដោយសម្រេចផ្ដន្ទាទោស ដាក់គុករយៈពេល៨ឆ្នាំ។ បន្ទាប់មក ព្រះមហាក្សត្រៃ ក៏បានព្រះរាជទានបន្ធូរបន្ថយទោស៕

ព្រះអាទិត្យមានសមត្ថភាពពិសេសដែលអាចបំផ្លាញផែនដីក្នុងរយៈពេលប៉ុន្មានពាន់លានឆ្នាំខាងមុខនេះ ប៉ុន្តែមិនមែនដោយការប្រែក្លាយទៅជាប្រហោងខ្មៅនោះទេ។

យោងតាមលោក Xavier Calmet អ្នកជំនាញរូបវិទ្យានៅសាកលវិទ្យាល័យ Sussex ចក្រភពអង់គ្លេស បាននិយាយថា ប្រហែល ៥ ពាន់លានឆ្នាំចាប់ពីពេលនេះតទៅ ព្រះអាទិត្យនឹងឈានទៅដល់ទីបញ្ចប់នៃដំណាក់កាលដុតឥន្ធនៈនុយក្លេអ៊ែរ ហើយផែនដីមិនអាចទប់ទល់នឹងទំនាញរបស់វាបានទេ។ នៅពេលនោះស្រទាប់ខាងក្រៅរបស់ផ្កាយនឹងហើម ដែលជាដំណើរការអាចបំផ្លាញផែនដី ខណៈដែលស្នូលដួលរលំទៅជាសភាពក្រាស់បំផុត ដោយបន្សល់ទុកនូវសំណល់នៃផ្កាយ។

ប្រសិនបើការដួលរលំទំនាញនៃស្នូលរបស់ផ្កាយត្រូវបានបញ្ចប់ នោះសំណល់របស់ផ្កាយនឹងក្លាយជាប្រហោងខ្មៅ ដែលជាតំបន់នៃពេលវេលាក្នុងលំហជាមួយនឹងឥទ្ធិពលទំនាញផែនដី ទោះយ៉ាងណាក៏ដោយ ព្រះអាទិត្យនឹងមិនអាចក្លាយទៅជាប្រហោងខ្មៅនោះទេ។

ផ្កាយដ៏ធំដែលបង្កើតជាប្រហោងខ្មៅ ឆ្លងកាត់ដំណាក់កាលជាច្រើននៃការដួលរលំ រាល់ពេលដែលបាត់បង់ម៉ាស់កាន់តែច្រើន។ មូលហេតុគឺដោយសារសម្ពាធ និងសីតុណ្ហភាពខ្ពស់ ផ្កាយអាចសំយោគធាតុធ្ងន់ជាង ដំណើរការនោះបន្តរហូតដល់ស្នូលផ្កាយធ្វើពីដែក ដែលជាធាតុធ្ងន់បំផុត ហើយផ្កាយបានផ្ទុះទៅជា supernova នឹងបាត់បង់ម៉ាស់បន្ថែមទៀត។

យោងតាមអង្គការណាសា ប្រហោងខ្មៅប្រភេទតូចបំផុតដែលត្រូវបានសង្កេតដោយតារាវិទូមានទំហំធំជាងព្រះអាទិត្យពី ៣ ទៅ ១០ ដង ហើយចំនួននេះអាចឡើងដល់ ១០០ ដង។ ប្រហោងខ្មៅនឹងកាន់តែធំទៅៗ នៅពេលដែលវាលេបយកឧស្ម័ន និងធូលីជុំវិញ រួមជាមួយផ្កាយ ប្រសិនបើវាស្ថិតនៅក្នុងប្រព័ន្ធផ្កាយគោលពីរ។
ព្រះអាទិត្យនឹងមិនឈានដល់ដំណាក់កាលនៃការសំយោគជាតិដែកទេ ផ្ទុយទៅវិញ វានឹងក្លាយទៅជាមនុស្សតឿពណ៌ស ដែលជាផ្កាយដ៏រឹងមាំទំហំប៉ុនផែនដី នេះបើតាមលោក Calmet។ ដូច្នេះ ផែនដីនឹងមិនជួបប្រទះនឹងភាពភ័យរន្ធត់នៃការលេបចូលដោយប្រហោងខ្មៅឡើយ៕
ប្រភព៖vnexpress

ប្រទេសឥណ្ឌូណេស៊ី ៖ នាយករដ្ឋមន្ត្រីប្រទេសជប៉ុន និងចិន បានបង្ហាញគំនិតផ្ទុយគ្នាពាក់ព័ន្ធនឹងប្រទេសចិនហាមនាំចូលអាហារសមុទ្រគ្រប់ប្រភេទពីជប៉ុន ក្នុងអំឡុងពេលមេដឹកនាំទាំងពីររូបជួបគ្នាលើកដំបូងមុនកិច្ចប្រជុំអាស៊ានបូក៣ ក្រោយពីជប៉ុនបានបង្ហូរទឹកលាយសារធាតុវិទ្យុសកម្មចូលក្នុងមហាសមុទ្រប៉ាស៊ីហ្វិក ។

នាយករដ្ឋមន្ត្រីជប៉ុន លោក Fumio Kishida និងនាយករដ្ឋមន្ត្រីចិន លោក Li Qiang បានជជែកគ្នារយៈពេលខ្លី មុនពេលចូលរួមកិច្ចប្រជុំអាស៊ានបូក៣ រួមមាន បណ្តាប្រទេសសមាជិកអាស៊ាន រួមទាំងប្រទេសជប៉ុន ចិន និងកូរ៉េខាងត្បូង នៅទីក្រុងហ្សាការតា ប្រទេសឥណ្ឌូណេស៊ី កាលពីថ្ងៃទី៦ ខែកញ្ញា ឆ្នាំ២០២៣ ។ មេដឹកនាំជប៉ុនបានស្នើឱ្យចិនលុបចោលវិធានការហាមនាំចូលអាហារសមុទ្រគ្រប់ប្រភេទពីជប៉ុន និងសុំឱ្យចិនធ្វើអ្វីមួយផ្អែកតាមវិទ្យាសាស្ត្រ ។ មេដឹកនាំជប៉ុនបញ្ជាក់ថា នឹងផ្តល់ទិន្នន័យជាបន្តបន្ទាប់ពាក់ព័ន្ធនឹងការបង្ហូរទឹកលាយសារធាតុវិទ្យុសកម្មចេញពីរោងចក្រថាមពលនុយក្លេអ៊ែរ Fukushima ចូលក្នុងមហាសមុទ្រប៉ាស៊ីហ្វិក ដែលចាប់ផ្តើមតាំងពីថ្ងៃទី២៧ ខែសីហា ឆ្នាំ ២០២៣ ។

សារព័ត៌មានចិនស៊ីនហួរចុះផ្សាយថា នាយករដ្ឋមន្ត្រីចិន លោក Li Qiang បានប្រាប់មេដឹកនាំជប៉ុនឱ្យទទួលខុសត្រូវលើការបង្ហូរទឹកកខ្វក់ និងសូមឱ្យជប៉ុនអនុវត្តតាមការប្តេជ្ញាចិត្តជាអន្តរជាតិ ។ លើសពីនេះ ជប៉ុនត្រូវពិភាក្សាជាមួយប្រទេសជិតខាង និងប្រទេសពាក់ព័ន្ធផងដែរ ហើយចិនសង្កត់ធ្ងន់ថា ការបង្ហូរទឹកចូលក្នុងមហាសមុទ្រអាចប៉ះពាល់ដល់ប្រព័ន្ធអេកូឡូស៊ីសមុទ្ររបស់ពិភពលោក និងសុខភាពមនុស្ស ។

ចំណែករដ្ឋាភិបាលជប៉ុនលើកឡើងថា នាយករដ្ឋមន្ត្រីជប៉ុន លោក Fumio Kishida បានថ្លែងក្នុងអំឡុងពេលលោកជួបជាមួយមេដឹកនាំចិនថា ប្រទេសជប៉ុនមានការយល់ស្របពីសហគមន៍អន្តរជាតិពាក់ព័ន្ធនឹងសុវត្ថិភាពនៃការបង្ហូរទឹកចេញពីរោងចក្រថាមពលនុយក្លេអ៊ែរ ហើយជប៉ុនសន្យាថា នឹងអធិប្បាយអំពីរឿងនេះដោយបើកចំហ ។

គួរបញ្ជាក់ថា នាយករដ្ឋមន្ត្រីជប៉ុន លោក Fumio Kishida និងនាយករដ្ឋមន្ត្រីចិន លោក Li Qiang បានជួបគ្នាក្នុងឋានៈជានាយករដ្ឋមន្ត្រីលើកដំបូង ក្រោយពីលោក Li Qiang ទទួលបានតំណែងកាលពីខែមីនា ឆ្នាំ២០២៣ ។ លោក Fumio Kishida លើកឡើងថា ប្រទេសទាំងពីរចាំបាច់ត្រូវរក្សាទំនាក់ទំនងជាមួយគ្នាប្រកបដោយការស្ថាបនា និងស្ថិរភាព ៕ ប្រភព ៖ Nation World News