ប្រទេស Jamaica ៖ សារព័ត៌មាន BBC របស់ប្រទេសអង់គ្លេសរាយការណ៍ថា រដ្ឋមន្ត្រីក្រសួងអប់រំនៃប្រទេស Jamaica បានសរសេរនៅក្នុងបណ្តាញសង្គមឈ្មោះ X (ឬ Twitter) កាលពីថ្ងៃទី៣ ខែតុលា ឆ្នាំ២០២៣ ថា កូនសិស្សថ្នាក់បឋមសិក្សាជាង៦០នាក់ក្នុងសាលារៀនមួយកន្លែងនៅតំបន់ St Anne’s Bay ទីក្រុង Kingston ប្រទេស Jamaica បានធ្លាក់ខ្លួនឈឺភ្លាមៗ និងត្រូវបញ្ជូនទៅកាន់មន្ទីរពេទ្យ ដោយសារពួកគេមានអាការៈក្អួតចង្អោរ និងឃើញរូបភាពគួរឱ្យភ័.យខ្លា.ច ។ កូនសិស្សទាំងនេះបានធ្លាក់ខ្លួនឈឺក្រោយពីនាំគ្នាហូបនំផ្សំពីកញ្ឆា ហើយកូនសិស្សខ្លះមានអាការៈជំងឺធ្ងន់ធ្ងរ ។

នាយកសាលារៀននេះលើកឡើងថា មានអ្នកលក់នំតែម្នាក់ប៉ុណ្ណោះដែលបានយកនំផ្សំកញ្ឆាមកលក់ឱ្យក្មេងៗក្នុងសាលា ។ បើតាមការត្រួតពិនិត្យឃើញថា ស្លាកសញ្ញាដែលបិតនៅលើនំបានសរសេរបញ្ជាក់យ៉ាងច្បាស់ថា «ហាមលក់នំនេះឱ្យក្មេងៗជាដាច់ខាត» ។

ការបរិភោគនំផ្សំពីកញ្ឆានេះនឹងប៉ះពាល់ដល់ប្រព័ន្ធប្រសាទ ពីព្រោះវាមានសារធាតុ Cannabinoids ក្នុងបរិមាណ១០០មីល្លីក្រាម ហើយជាញឹកញាប់ គេបានរកឃើញសារធាតុនេះក្នុងកញ្ឆាដែលមានបរិមាណច្រើនសម្រាប់មនុស្សពេញវ័យ ។ ចំណែករដ្ឋបាលចំណីអាហារ និងឱសថអាមេរិកបញ្ជាក់ថា សារធាតុ Cannabinoids អាចធ្វើឱ្យអ្នកបរិភោគកើតអាការៈស្រវឹងបាន ។

ចំណែកក្រុមគ្រូពេទ្យបញ្ជាក់ថា ពួកគេនឹងព្យាយាមជួយសង្គ្រោះកូនសិស្សដែលធ្លាក់ខ្លួនឈឺទាំងនេះឱ្យអស់ពីសមត្ថភាព ដើម្បីឱ្យកូនសិស្សឆាប់បានជាសះស្បើយ ។ កូនសិស្សដែលធ្លាក់ខ្លួនឈឺទាំងនេះ ភាគច្រើនមានអាយុចាប់ពី៧ឆ្នាំ ដល់១២ឆ្នាំ ៕ ប្រភព ៖ Mono News

ប្រទេសឥណ្ឌា៖ យោងតាមរដ្ឋាភិបាលឥណ្ឌា បានឱ្យដឹងថា ប្រតិបត្តិការស្វែងរក និងជួយសង្គ្រោះត្រូវបានចាប់ផ្តើមសម្រាប់អ្នកបាត់ខ្លួនជាង ១០០ នាក់នៅភាគឦសាននៃប្រទេសឥណ្ឌា បន្ទាប់ពីទឹកជំនន់ភ្លាមៗបានហូរកាត់រដ្ឋ Himalayan នៃ Sikkim កាលពីថ្ងៃទី៤ ខែតុលា ដោយបានសម្លាប់មនុស្សយ៉ាងហោចណាស់ ១៤ នាក់ និងបំផ្លាញផ្លូវថ្នល់ រួមទាំងស្ពានធំៗជាច្រើន។

មូលហេតុដែលប្រទេសឥណ្ឌាជួបប្រទះទឹកជំនន់ធ្ងន់ធ្ងរបែបនេះ គឺដោយសារព្យុះភ្លៀងខ្លាំង បង្កឱ្យបឹងទឹកកក Lhonak ដ៏ធំបំផុតរបស់ប្រទេសនេះ បានផ្ទុះដោយបញ្ជូនទឹកយ៉ាងច្រើន និងកំទេចកំទីចុះពីលើភ្នំ នេះបើយោងតាមអង្គការស្រាវជ្រាវអវកាសឥណ្ឌា (ISRO)។ បឹងទឹកកក Lhonak មានផ្ទៃទឹកប្រហែល ១៦៧.៤ ហិកតានៅថ្ងៃទី ២៨ ខែកញ្ញាខណៈដែលថ្ងៃទី ៤ ខែតុលាថ្មីៗនេះបង្ហាញថាបឹងបានកាត់បន្ថយទឹកជាងពាក់កណ្តាល ដែលបច្ចុប្បន្នបឹងនេះមានចំនួនទឹកប្រហែល ៦០.៣ ហិកតា។

រដ្ឋមន្ត្រីឥណ្ឌាបាននិយាយថា ឥទ្ធិពលនៃព្យុះបានធ្វើឱ្យលំហូរទឹកនៃបឹង Lhonak ហូរយ៉ាងលឿនចុះតាមដងទន្លេ Teesta ក្នុងជ្រលងភ្នំ Lachen របស់ Sikkim ដោយបង្កើនកម្រិតទឹកខ្ពស់ជាងធម្មតា ១៥-២០ ហ្វីត។ ដូច្នេះ យោងតាមវីដេអូបានបង្ហាញពីទឹកជំនន់ភក់ហូរហៀរយ៉ាងលឿនតាមដងទន្លេ និងផ្ទះជន់លិចដែលពោរពេញដោយភាពកខ្វក់ និងកំទេចកំទី ខណៈដែលរូបភាពជាច្រើនក៏បានបង្ហាញពីក្រុមស្វែងរកដោយប្រើម៉ាស៊ីនជីក និងរុករកមនុស្សដែលបានបាត់ខ្លួនផងដែរ៕

នៅថ្ងៃទី៥ ខែតុលា ឆ្នាំ២០២៣ អ្នកប្រើប្រាស់ TikTok ម្នាក់ឈ្មោះ yuijung03 បានបង្ហោះវីដេអូហេតុការណ៍ចលាចលនៅលើយន្តហោះរបស់ក្រុមហ៊ុនអាកាសចរណ៍មួយ ខណៈត្រៀមធ្វើដំណើរចេញពីអាកាសយានដ្ឋានសុវណ្ណភូមិ ប្រទេសថៃ ទៅកាន់តៃវ៉ាន់ ។ ក្នុងវីដេអូនេះបានបង្ហាញពីអ្នកដំណើរនាំគ្នាក្រោកឈរមើលអ្វីម្យ៉ាងនៅបរិវេណកៅអីអង្គុយមួយកន្លែង ក្រោយមក ទើបគេដឹងថា វាជាប្រភេទសត្វ Otters ដែលមានលក្ខណៈស្រដៀងគ្នានឹងសត្វកណ្តុរ ។

ម្ចាស់វីដេអូបានសរសេរថា ៖ «ហេតុការណ៍នេះកើតឡើងដោយសារអ្នកដំណើរបានលួចយកសត្វចិញ្ចឹមរបស់ខ្លួនឡើងលើយន្តហោះ ។ បុគ្គលិកបម្រើការលើយន្តហោះអាចចាប់បានសត្វនេះចំនួន៣ក្បាលពីកន្លែងអង្គុយរបស់អ្នកដំណើរ ហើយគ្មានអ្នកណាម្នាក់ទទួលថា ជាម្ចាស់សត្វនេះទេ ព្រោះខុសច្បាប់» ។ បន្ទាប់ពីវីដេអូខាងលើបានបង្ហោះក្នុងបណ្តាញសង្គម មានមនុស្សជាច្រើននាក់ចូលមកបញ្ចេញមតិអំពីហេតុការណ៍នេះ ។

ម្ចាស់វីដេអូបាននិយាយប្រាប់សារព័ត៌មានថា ខ្លួនរៀបនឹងធ្វើដំណើរចាកចេញពីអាកាសយានដ្ឋានសុវណ្ណភូមិទៅកាន់តៃវ៉ាន់ ប៉ុន្តែស្រាប់តែប្រទះឃើញសត្វនៅលើយន្តហោះ ហើយបុគ្គលិកបម្រើការលើយន្តហោះនាំគ្នាដេញចាប់ ប៉ុន្តែគ្មានអ្នកណាម្នាក់ទទួលថា ខ្លួនជាម្ចាស់ទេ ។ នៅពេលធ្វើដំណើរដល់តៃវ៉ាន់ ខាងយន្តហោះក៏ត្រួតពិនិត្យកាបូបអ្នកដំណើរម្នាក់ៗ ហើយអ្នកដំណើរទាំងអស់ត្រូវរង់ចាំរយៈពេល១ម៉ោង និងមិនអាចចុះពីយន្តហោះបានទេ ។

ម្ចាស់វីដេអូបន្តថា ខាងយន្តហោះនៅតែមិនអាចរកម្ចាស់សត្វឃើញទៀត ហើយក្រោយពីខាងយន្តហោះបានត្រួតពិនិត្យកាបូបខ្លួនរួច ខ្លួនក៏បានចុះពីលើយន្តហោះ ដោយសារស្រេកទឹក និងឃ្លានបាយខ្លាំងពេក ។ ដូច្នេះ មិនដឹងថា ក្រោយពេលខ្លួនចុះមក តើខាងយន្តហោះអាចរកឃើញម្ចាស់សត្វឃើញដែរឬទេ ៕ ប្រភព ៖ 3plus News

ប្រទេសវៀតណាម ៖ កាលពីខែកញ្ញា ឆ្នាំ២០២៣ លោក Pham Minh Trinh នាយករដ្ឋមន្ត្រីវៀតណាមបានធ្វើដំណើរទៅទស្សនាការិយាល័យធំរបស់ក្រុមហ៊ុន Nvidia និងក្រុមហ៊ុន Synopsys ព្រមទាំងគាំទ្រឱ្យក្រុមហ៊ុនទាំងពីរនេះ ក៏ដូចជាក្រុមហ៊ុនបច្ចេកវិទ្យាផ្សេងទៀតនៅសហរដ្ឋអាមេរិកចូលមកវិនិយោគក្នុងឧស្សាហកម្មបន្ទះឈីបនៅប្រទេសវៀតណាម ។

យោងតាមសេចក្តីថ្លែងការណ៍របស់រដ្ឋាភិបាលវៀតណាមបញ្ជាក់ថា ក្នុងកិច្ចប្រជុំអំពីអាជីវកម្មបច្ចេកវិទ្យានៅទីក្រុងសាន់ហ្វ្រាន់ស៊ីស្កូ លោក Pham Minh Trinh នាយករដ្ឋមន្ត្រីវៀតណាមបានថ្លែងថា វៀតណាមទទួលស្វាគមន៍ជានិច្ចចំពោះវិនិយោគិនគ្រប់រូបដែលចូលមកវិនិយោគនៅវៀតណាម ។ ការធ្វើដំណើរទៅកាន់ទឹកដីអាមេរិករបស់លោកនាយករដ្ឋមន្ត្រីវៀតណាមលើកនេះ កើតឡើងក្រោយពីប្រធានាធិបតីអាមេរិក លោក ចូ បៃដិន បានធ្វើដំណើរទៅក្រុងហាណូយ កាលពីខែកញ្ញា ឆ្នាំ២០២៣ ។ មេដឹកនាំប្រទេសទាំងពីរបានប្រកាសពង្រឹងទំនាក់ទំនងទ្វេភាគី និងសហការគ្នាបន្ថែមទៀតលើផ្នែកជាច្រើនដូចជា ឧស្សាហកម្មបន្ទះឈីប AI និងសារធាតុរ៉ែសំខាន់ៗ ។

ក្រៅពីនេះ លោកនាយករដ្ឋមន្ត្រីវៀតណាមបានសន្យាថា នឹងផ្តល់ភាពងាយស្រួលចំពោះក្រុមហ៊ុន Nvidia និងក្រុមហ៊ុន Synopsys សម្រាប់ការវិនិយោគនៅវៀតណាម នាថ្ងៃអនាគត ។ លោកនាយករដ្ឋមន្ត្រីវៀតណាមបញ្ជាក់ថា ក្រុមហ៊ុន Nvidia ត្រូវការសហការជាមួយវៀតណាមក្នុងឧស្សាហកម្មបន្ទះឈីប IT និង AI ខណៈក្រុមហ៊ុន Synopsys មានគម្រោងសាងសង់មជ្ឈមណ្ឌលរចនាបន្ទះឈីបនៅវៀតណាម និងបានចុះហត្ថលេខាលើ MOU ជាមួយក្រសួងព័ត៌មាន និងក្រសួងវិនិយោគរបស់វៀតណាមរួចរាល់ហើយ ។ ទោះយ៉ាងណា ក្រុមហ៊ុនទាំងពីរនេះពុំទាន់បានបញ្ចេញយោបល់អ្វីពាក់ព័ន្ធនឹងការលើកឡើងខាងលើទេ ។

ចំណែក Intel គឺជាក្រុមហ៊ុនផលិតបន្ទះឈីបរបស់អាមេរិកបានសាងសង់រោងចក្រទំហំធំបំផុតសម្រាប់ការដំឡើង, ការវេចខ្ចប់ និងការធ្វើតេស្តបន្ទះឈីបនៅប្រទេសវៀតណាមរួចហើយ ។ ដូចគ្នានេះ ក្រុមហ៊ុនគូប្រជែងដូចជា Amkor ក៏កំពុងសាងសង់រោងចក្រទំហំធំផងដែរសម្រាប់ការដំឡើង និងការធ្វើតេស្តបន្ទះឈីបនៅជិតទីក្រុងហាណូយ ៕ ប្រភព ៖ AEC connect