ប្រទេសជប៉ុន ៖ ប្រទេសជប៉ុនបានចេញគោលនយោបាយមួយដើម្បីជំរុញសេដ្ឋកិច្ចគ្រួសារពលរដ្ឋជប៉ុន ដោយរដ្ឋាភិបាលនឹងផ្តល់ប្រាក់ឧបត្ថម្ភដល់កុមារតាំងពីចាប់កំណើត រហូតដល់អាយុ១៨ឆ្នាំ ។ កុមារមានអាយុតាមការកំណត់របស់គោលនយោបាយនេះ ពួកគេនឹងទទួលបានប្រាក់ពីរដ្ឋាភិបាលចំនួន៥.០០០យេនក្នុង១ខែសម្រាប់រយៈពេល១ឆ្នាំ ។

កុមារមានសិទ្ធិទទួលបានប្រាក់ឧបត្ថម្ភចំនួន៥.០០០យេនក្នុង១ខែសម្រាប់រយៈពេល១ឆ្នាំ ឬស្មើនឹងទឹកប្រាក់ខ្ពស់បំផុតចំនួន៦ម៉ឺនយេន ។ គោលនយោបាយនេះនឹងផ្តល់ប្រាក់ឱ្យពួកគេតាំងពីចាប់កំណើត រហូតដល់អាយុ១៨ឆ្នាំ ដោយត្រួតពិនិត្យតាមរយៈប័ណ្ណ «My Number» ។ គោលនយោបាយថ្មីនេះ តម្រូវឱ្យកុមារចុះឈ្មោះក្នុងគេហទំព័រ ចាប់ពីថ្ងៃទី១ ខែកញ្ញា រហូតដល់ថ្ងៃទី១៥ ខែធ្នូ ឆ្នាំ២០២៣ ។ អ្នកបានចុះឈ្មោះសុំប្រាក់ឧបត្ថម្ភពីរដ្ឋាភិបាលតាមពេលវេលាកំណត់ ពួកគេនឹងទទួលបានប្រាក់នៅខែមករា ឆ្នាំ២០២៤ រីឯអ្នកចុះឈ្មោះក្រោយថ្ងៃទី១៥ ខែធ្នូ ឆ្នាំ២០២៣ ពួកគេនឹងទទួលបានប្រាក់នៅពេលបន្ទាប់ ។

ក្រៅពីនេះ រដ្ឋាភិបាលជប៉ុននឹងផ្តល់ប្រាក់ឧបត្ថម្ភការរៀនសូត្រដល់កុមារដែលរៀនកម្រិតមធ្យមសិក្សានៅសាលាឯកជនផងដែរ គឺសម្រាប់ក្រុមគ្រួសារណាដែលមានប្រាក់ចំណូលមិនដល់៩,១លានយេន ។ រដ្ឋាភិបាលនឹងផ្តល់ប្រាក់ឧបត្ថម្ភខ្ពស់បំផុតចំនួន១សែនយេនក្នុង១ឆ្នាំ ហើយបានចាប់ផ្តើមចុះឈ្មោះចាប់ពីថ្ងៃទី១ ដល់ថ្ងៃទី៣០ ខែកញ្ញា ឆ្នាំ២០២៣ ។

ក្រៅពីការផ្តល់ប្រាក់ឧបត្ថម្ភសម្រាប់កុមារតាំងពីចាប់កំណើត រហូតដល់អាយុ១៨ឆ្នាំ រដ្ឋាភិបាលនឹងផ្តល់ប្រាក់ឧបត្ថម្ភដល់កូនសិស្សជិតបញ្ចប់វិទ្យាល័យផងដែរ ព្រមទាំងផ្តល់ប្រាក់ទៅឱ្យក្រុមយុវជនមិនបានចូលសាលារៀន ដើម្បីឱ្យពួកគេមានលទ្ធភាពរៀនសូត្របន្តទៀត ។ គេរំពឹងថា រដ្ឋាភិបាលនឹងចំណាយថវិកាសម្រាប់គម្រោងនេះរាប់លានយេន ហើយមានកុមារទទួលបានប្រាក់ឧបត្ថម្ភពីរដ្ឋាភិបាល ប្រមាណ២០លាននាក់ ៕ ប្រភព ៖ Nation World News

សហរដ្ឋអាមេរិក ៖ កាលពីដើមខែកញ្ញា ឆ្នាំ២០២៣ នេះ ខ្យល់ព្យុះលាយឡំជាមួយទឹកភ្លៀងជាច្រើនមេបានបោកបក់មកលើរដ្ឋ Nevada របស់សហរដ្ឋអាមេរិក ហើយវាបានប្រែក្លាយវាលខ្សាច់ឈ្មោះ Black Rock ដែលជាទីកន្លែងរៀបចំពិធីបុណ្យ Burning Man ឱ្យក្លាយទៅជាវាលភក់ ។ លើសពីនេះ ឥទ្ធិពលខ្យល់ព្យុះបានធ្វើឱ្យប៉ះពាល់ដល់មនុស្សម្នារាប់ម៉ឺននាក់ដែលធ្វើដំណើរមកចូលរួមក្នុងពិធីបុណ្យផងដែរ ។

អាជ្ញាធរប្រចាំតំបន់បានរាយការណ៍ថា មានមនុស្សម្នាក់បានស្លា.ប់ ហើយធ្វើឱ្យអ្នកគ្រប់គ្រងកម្មវិធីបុណ្យ Burning Man ត្រូវប្រកាសបញ្ឈប់ពិធីបុណ្យដែលនៅសេសសល់ទាំងអស់ ដើម្បីឱ្យអាជ្ញាធរធ្វើការត្រួតពិនិត្យអំពីមូលហេតុដែលបណ្តាលឱ្យមនុស្សស្លា.ប់ ។

ពិធីបុណ្យ Burning Man គឺជាពិធីបុណ្យមួយក្នុងចំណោមពិធីបុណ្យបង្ហាញពីសិល្បៈនៅសហរដ្ឋអាមេរិក ដែលមានមនុស្សម្នាជាច្រើននាក់ធ្វើដំណើរមកចូលរួមជារៀងរាល់ឆ្នាំ ហើយអ្នកមកចូលរួមម្នាក់ៗនឹងប្រើប្រាស់ឱកាសនេះដើម្បីស្នាក់នៅបរិវេណសមុទ្រខ្សាច់ Black Rock ដើម្បីផ្លាស់ប្តូរមតិយោបល់ និងប្រគល់រង្វាន់ឱ្យគ្នាទៅវិញទៅមក ។ លើសពីនេះ អ្នកចូលរួមពិធីបុណ្យអាចបង្ហាញពីខ្លួនឯងចេញមកក្រៅផងដែរ ។ នៅចុងបញ្ចប់នៃពិធីបុណ្យ គេនឹងធ្វើរូបតំណាងឈើដ៏ធំមួយ បន្ទាប់មក គេដុតវាចោល ហើយនេះគឺជាប្រភពដើមនៃឈ្មោះពិធីបុណ្យ Burning Man ៕ ប្រភព ៖ TNN World

ប្រទេសថៃ ៖ ប៉ូលិសប្រឆាំងបទល្មើសបច្ចេកវិទ្យាព័ត៌មានបានប្រមូលកម្លាំងមកត្រួតពិនិត្យនៅគេហដ្ឋានយ៉ាងស្អាតមួយកន្លែងនៅស្រុកបាងឡាម៉ុង ខេត្តឈុនបុរី ប្រទេសថៃ ក្រោយពីស៊ើបអង្កេតឃើញថា មានជនជាតិចិនមួយក្រុមបានមកជួលគេហដ្ឋាននេះដើម្បីធ្វើជាកន្លែង Call Center ខុសច្បាប់ ។ បន្ទាប់ពីត្រួតពិនិត្យរួច ប៉ូលិសបានរឹបអូសយកវត្ថុតាង ព្រមទាំងចាប់ខ្លួនជនជាតិចិនទាំងអស់ទៅសាកសួរបន្ថែម និងចាត់ការតាមផ្លូវច្បាប់ប្រទេសថៃ ។

តាមការឆែកឆេរគេហដ្ឋានចំនួន១៣ខ្នងនៅលើផ្ទៃដីប្រមាណ៦រ៉ៃ ប៉ូលិសរកឃើញថា មានជនជាតិចិនចំនួន១៦នាក់បានមកជួលគេហដ្ឋានចំនួន៤ខ្នងនៅផ្នែកខាងក្នុងដើម្បីរស់នៅ។ ប៉ូលិសបានរកឃើញកុំព្យូទ័រ Notebook ចំនួន១៤គ្រឿង, ទូរស័ព្ទដៃជាច្រើនគ្រឿង, ប្រាក់ប្រមាណ៣លានបាត និងរថយន្តតូយ៉ូតា ពណ៌ក្រហម១គ្រឿង ។

តាមការស៊ើបអង្កេតរបស់ប៉ូលិសបង្ហាញថា ជនជាតិចិនមួយក្រុមនេះនាំគ្នាមកជួលគេហដ្ឋានបានប្រមាណ៣ខែហើយ និងបែងចែកគ្នាធ្វើការជាក្រុម គឺក្រុមពេលថ្ងៃ និងពេលយប់ ហើយពួកគេបានទទួលប្រាក់ខែប្រមាណ១ម៉ឺនយាន់ក្នុងម្នាក់ ។ ជនជាតិចិនទាំងនេះបានជួលនារីថៃម្នាក់មកបោសសម្អាតផ្ទះ និងទិញម្ហូបអាហារឱ្យពួកគេ ដោយនារីថៃទទួលបានប្រាក់ខែចំនួន៧ពាន់បាតក្នុង១ខែ ។

ចំណែកភ្នាក់ងារសន្តិសុខរៀបរាប់ថា ខ្លួនមិនដឹងថា ជនជាតិចិនទាំងនេះមកធ្វើអ្វីទេ ពីព្រោះខ្លួនគ្រាន់តែមើលការខុសត្រូវផ្នែកខាងក្រៅប៉ុណ្ណោះ ។ ភាគច្រើន ជនជាតិចិនទាំងអស់កម្រចេញមកខាងក្រៅណាស់ ហើយពួកគេសម្ងំនៅតែក្នុងផ្ទះ យូរៗម្តង ទើបឃើញមានរថយន្តប្រណីតបើកចេញ-ចូល ៕ ប្រភព ៖ Mono News

កាមេរ៉ានៅក្នុងទូរស័ព្ទដែលយើងកំពុងប្រើប្រាស់ នាពេលបច្ចុប្បន្ននេះ ត្រូវបានអភិវឌ្ឍសមត្ថភាពយ៉ាងសម្បូរបែបពីមួយជំនាន់ទៅមួយជំនាន់ ដើម្បីបំពេញតម្រូវការជូនអ្នកប្រើប្រាស់។ ទន្ទឹមនឹងនោះ ក៏មានចម្ងល់មួយបានលើកឡើងថា តើកាមេរ៉ាដំបូងដែលបានបំពាក់នៅលើទូរស័ព្ទនោះ ត្រូវបានបង្កើតឡើងដោយអ្នកណា?

ដូច្នេះហើយអ្នកដែលបានបង្កើតកាមេរ៉ាទូរស័ព្ទដៃដំបូងគេបង្អស់នោះគឺ លោក ហ្វីលីប កាន់ (Philippe Kanh)។ លោក ហ្វីលីប កាន់ បានចាប់ផ្តើមបង្កើតកាមេរ៉ាទូរស័ព្ទដំបូងនៅថ្ងៃទី ១១ ខែមិថុនា ឆ្នាំ ១៩៩៧ ហើយក៏បានចែករំលែករូបភាពភ្លាមៗនៅលើបណ្តាញសាធារណៈ។

រូបភាពដំបូងដែលលោកបានថតនោះ គឺកូនស្រីរបស់លោកដែលទើបនឹងកើត ទារិកានេះមានឈ្មោះថា សុហ្វី (Sopie)។ លោកបានតភ្ជាប់ខ្សែទូរស័ព្ទដៃទៅកាន់កាមេរ៉ា និងកុំព្យូទ័រយួរដៃមួយរបស់លោក រួចបានបញ្ជូនរូបភាពដំបូងរបស់លោកភ្លាមទៅមិត្តភក្តិ និងក្រុមគ្រួសារនៅជុំវិញពិភពលោក ហើយរូបថតដែលបានចែកចាយនេះ គឺជាជំហាននៃការបើកចំហ «សករាជចែករំលែកប្រព័ន្ធផ្សព្វផ្សាយសង្គមសម័យទំនើប»។
បន្ទាប់មក ក្នុងឆ្នាំ ២០១៦ ទស្សនាវដ្តី Time បានរួមបញ្ចូលរូបថតទូរស័ព្ទកាមេរ៉ាដំបូងរបស់លោក ហ្វីលីប កាន់ នៅក្នុងបញ្ជីរូបថតដ៏មានឥទ្ធិពលបំផុតទាំង ១០០ របស់ពួកគេ៕

ប្រទេសចិន ៖ ការព្យាយាមស្តារសេដ្ឋកិច្ចឡើងវិញក្នុងឆមាសទី១ ឆ្នាំ២០២៣ ក្រោយពីផ្ទុះជំងឺកូវីដ-១៩ នៅប្រទេសចិន នឹងជួយជំរុញឱ្យពលរដ្ឋចិនប្រើប្រាស់អ៊ីនធើរណេត និងធ្វើឱ្យទីផ្សារអ៊ីនធើរណេតរីកចម្រើនឈានដល់គោលដៅ «Digital China» ក្នុងរយៈពេល២ឆ្នាំខាងមុខ ។

តាមលទ្ធផលស្ទង់មតិចុងក្រោយរបស់មជ្ឈមណ្ឌលព័ត៌មានបណ្តាញអ៊ីនធើរណេតចិន ដែលជាភ្នាក់ងារស្ថិតក្រោមការិយាល័យគ្រប់គ្រងអ៊ីនធើរណេតប្រទេសចិនបញ្ជាក់ថា នៅខែមិថុនា ឆ្នាំ២០២៣ មានអ្នកប្រើប្រាស់អ៊ីនធើរណេតនៅទូទាំងប្រទេសចិន សរុបចំនួន១.០៨០លាននាក់ កើនឡើង១១លាន៩ម៉ឺននាក់ បើធៀបនឹងខែធ្នូ ឆ្នាំ២០២២ ។ វាធ្វើឱ្យអត្រាការប្រើប្រាស់អ៊ីនធើរណេតនៅចិនស្មើនឹង៧៦,៤% ហើយការលក់រាយតាមអនឡាញកើនឡើង១៣,១% ខណៈចំនួនអតិថិជនទិញផលិតផលអនឡាញនៅទូទាំងប្រទេស កើនឡើងដល់៨៨៤លាននាក់ ក្នុងនោះអតិថិជនថ្មីស្មើចំនួន៣៨លាន៨សែននាក់ ។

តាមរបាយការណ៍របស់មជ្ឈមណ្ឌលព័ត៌មានបណ្តាញអ៊ីនធើរណេតចិនបានបង្ហាញពីតម្រូវការប្រើប្រាស់សេវាកម្មរបស់ពលរដ្ឋ ដែលត្រូវរដ្ឋាភិបាលដាក់កំណត់ការប្រើប្រាស់អស់រយៈពេលយូរក្នុងអំឡុងពេលជំងឺកូវីដឆ្លងរាតត្បាត និងបង្ហាញពីការអភិវឌ្ឍហេដ្ឋារចនាសម្ព័ន្ធឌីជីថលរបស់ចិន ដែលមានតួនាទីធ្វើឱ្យអ៊ីនធើរណេតរីកចម្រើន ។ របាយការណ៍នេះបានសរសើរការដាក់ឱ្យដំណើរការស្ថានីយទូរស័ព្ទចល័តជាហូរហែ ដើម្បីជួយជំរុញបណ្តាញទំនាក់ទំនងគ្មានខ្សែនៅទូទាំងប្រទេសចិន ។ ដូច្នេះ វាជាទីផ្សារស្មាតហ្វូនដ៏ធំរបស់ពិភពលោក ហើយនៅខែមិថុនា ឆ្នាំ២០២៣ ប្រទេសចិនមានស្ថានីយទូរស័ព្ទចល័តសរុបចំនួន១១លាន២សែន៩ម៉ឺនកន្លែង ។

កាលពីខែមីនា ឆ្នាំ២០២៣ រដ្ឋាភិបាលចិនបានប្រកាសពីគម្រោងការប្រើប្រាស់បច្ចេកវិទ្យាឌីជីថលសម្រាប់ជាប្រយោជន៍ដ៏សំខាន់ ដើម្បីលើកកម្ពស់ការប្រើប្រាស់អ៊ីនធើរណេតនៅប្រទេសចិន និងជាចំណែកមួយនៃគំនិតផ្តួចផ្តើមដើម្បីបង្កើត «Digital China» នៅឆ្នាំ២០២៥ ។ មជ្ឈមណ្ឌលព័ត៌មានបណ្តាញអ៊ីនធើរណេតចិនបានស្ទង់មតិអំពីអ៊ីនធើរណេតនៅប្រទេសចិន ចំនួន២ដងក្នុង១ឆ្នាំ ហើយបានចាប់ផ្តើមស្ទង់មតិតាំងពីឆ្នាំ១៩៩៧ ៕ ប្រភព ៖ mgronline

បរទេស៖ Elon Musk បានចូលរួមក្នុងការបង្កើត ឬប្រតិបត្តិការក្រុមហ៊ុនសរុបចំនួន ១០ ដែលភាគច្រើននៅក្នុងវិស័យបច្ចេកវិទ្យាជាមួយនឹងគំនិតអាជីវកម្មផ្សេងៗគ្នា។
មហាសេដ្ឋីពិភពលោករូបនេះបានចាប់ផ្តើមអាជីវកម្មដំបូងរបស់គាត់នៅអាយុ ២៤ ឆ្នាំ រហូតមកដល់បច្ចុប្បន្នគាត់មានទ្រព្យសម្បត្តិប្រហែល ២៤៣ ពាន់លានដុល្លារ នេះបើយោងតាម ស្ថិតិ Forbes ។ ដូច្នេះហើយខាងក្រោមនេះគឺជាក្រុមហ៊ុនធំៗទាំង ១០ ដែល Elon Musk បានបង្កើត៖

១.Zip2៖ នៅឆ្នាំ១៩៩៥ Elon Musk បានបង្កើតក្រុមហ៊ុនមួយដែលជាគម្រោងផ្តល់សេវាផែនទី និងថតទូរស័ព្ទសម្រាប់កាសែតអនឡាញដោយចំណាយអស់ ២៨ ម៉ឺនដុល្លា។ បន្ទាប់មកនៅឆ្នាំ ១៩៩៩ ពួកគេបានលក់ Zip2 ទៅឱ្យក្រុមហ៊ុន Compaq ក្នុងតម្លៃ ៣០៧ លានដុល្លារ។

២.PayPal៖ នៅឆ្នាំ ១៩៩៩ Elon Musk ក៏បានបន្តវិនិយោគទុននេះក្នុងគម្រោងបន្ទាប់ទៀតដោយប្រើប្រាស់ទឹកប្រាក់ចំនួន ១២ លានដុល្លារដើម្បីស្វែងរកក្រុមហ៊ុនសេវាកម្មហិរញ្ញវត្ថុអនឡាញ X.com ។ នៅឆ្នាំ ២០០០ គាត់បានទទួលយកការរួមបញ្ចូលគ្នាជាមួយគូប្រជែង Confinity ហើយបានប្តូរឈ្មោះក្រុមហ៊ុនទៅជា PayPal ។ បន្ទាប់មក PayPal ត្រូវបានទិញដោយ eBay ក្នុងតម្លៃ ១.៥ ពាន់លានដុល្លារក្នុងខែតុលា ឆ្នាំ ២០០២ ។

៣. SpaceX៖ SpaceX គឺជាក្រុមហ៊ុនអវកាសដែលបង្កើតឡើងដោយ Musk និង Tom Mueller ក្នុងឆ្នាំ ២០០២។ ក្រុមហ៊ុននេះមានគោលបំណងកាត់បន្ថយការចំណាយលើការដឹកជញ្ជូនមនុស្ស និងទំនិញទៅកាន់ទីអវកាស និងត្រួសត្រាយផ្លូវសម្រាប់ការរុករកភពអង្គារនាពេលអនាគត។ បច្ចុប្បន្ន SpaceX ទទួលបានប្រាក់ចំណូលចំនួន ១.៥ ពាន់លានដុល្លារអាមេរិក នេះបើយោងតាម WSJ នៅត្រីមាសទីមួយនៃឆ្នាំ ២០២៣។

៤.Tesla៖ ក្រុមហ៊ុនរថយន្តអគ្គិសនីធំជាងគេរបស់ពិភពលោកត្រូវបានបង្កើតឡើងក្នុងឆ្នាំ ២០០៣ ដែលដាក់ឈ្មោះតាមអ្នករូបវិទ្យាជនជាតិអាមេរិក Nikola Tesla។ បច្ចុប្បន្នក្រុមហ៊ុននេះ សម្រេចបានការលក់រថយន្តចំនួន ៤៦៦,១១០ គ្រឿងក្នុងត្រីមាសទីពីរនៃឆ្នាំ ២០២៣ កើនឡើង ៨៣% ធៀបនឹងរយៈពេលដូចគ្នាកាលពីឆ្នាំមុន។

៥. Solar City៖ គឺជាក្រុមហ៊ុនផ្តល់ដំណោះស្រាយថាមពលពន្លឺព្រះអាទិត្យដែលបង្កើតឡើងនៅឆ្នាំ ២០០៦។ បន្ទាប់មកនៅឆ្នាំ ២០១៦ Tesla បានទិញយក SolarCity ក្នុងតម្លៃ ២.៦ ពាន់លានដុល្លារ ដើម្បីបំពេញបន្ថែមប្រតិបត្តិការរបស់ក្រុមហ៊ុន Tesla Energy ក្នុងវិស័យផ្ទុកថាមពលពន្លឺព្រះអាទិត្យ ដើម្បីបម្រើស្ថានីយ៍សាកថ្មដោយឥតគិតថ្លៃសម្រាប់រថយន្តអគ្គិសនី។

៦.OpenAI៖ ក្នុងឆ្នាំ ២០១៥ Musk បានបង្កើត OpenAI ដែលជាក្រុមហ៊ុនចាប់ផ្តើមមិនរកប្រាក់ចំណេញដែលមានឯកទេសក្នុងការស្រាវជ្រាវបញ្ញាសិប្បនិម្មិត។ ក្នុងឆ្នាំ ២០១៩ OpenAI បានទទួលដើមទុនមួយពាន់លានដុល្លារពីក្រុមហ៊ុន Microsoft ។ បច្ចុប្បន្នក្រុមហ៊ុននេះបានឈានទៅដល់គោលដៅអាជីវកម្មដែលរកប្រាក់ចំណេញជាមួយនឹងផលិតផលសំខាន់របស់ខ្លួនគឺ ChatGPT ។

៧. Neuralink៖ គឺជាក្រុមហ៊ុនបច្ចេកវិទ្យា neurotechnology ដែលបង្កើតឡើងដោយ Musk ក្នុងឆ្នាំ ២០១៦។ គោលបំណងរបស់ក្រុមហ៊ុនគឺដើម្បីស្រាវជ្រាវវិធីសាស្រ្តក្នុងការព្យាបាលជំងឺខួរក្បាល ហើយក្នុងពេលតែមួយជួយភ្ជាប់ខួរក្បាលរបស់មនុស្សទៅនឹងកុំព្យូទ័រតាមរយៈឧបករណ៍ដែលអាចផ្សាំបាន។ បច្ចុប្បន្នក្រុមហ៊ុននេះបានរៃអង្គាសប្រាក់អប្បបរមាចំនួន ៣៦៣ លានដុល្លារ រួមទាំង ១០០ លានដុល្លារពី Musk និងចំនួនដែលមិនបានបង្ហាញពីអ្នកបណ្តាក់ទុនបណ្តាក់ទុនមួយចំនួនទៀត។

៨. The Boring Company៖ នៅខែមករាឆ្នាំ ២០១៧ Musk បានបង្កើតក្រុមហ៊ុន The Boring Company ដោយសន្យាថានឹងជួយផ្លាស់ប្តូរមុខមាត់នៃការដឹកជញ្ជូននៅសហរដ្ឋអាមេរិក។ ក្រុមហ៊ុនគ្រោងនឹងសាងសង់បណ្តាញផ្លូវរូងក្រោមដីសម្រាប់រថយន្តបើកបរដោយខ្លួនឯងល្បឿនលឿន ដែលវាអាចដឹកជញ្ជូនអ្នកដំណើរ និងទំនិញដោយមិនបារម្ភពីការកកស្ទះចរាចរណ៍។

៩.X (អតីត Twitter)៖ ដើមឡើយ X គឺជាវេទិកា Twitter ដែលត្រូវបានទិញដោយ Musk ក្នុងខែតុលា ឆ្នាំ ២០២២ ក្នុងតម្លៃ ៤៤ ពាន់លានដុល្លារ។ ទោះជាយ៉ាងណាក៏ដោយស្ថិតិបង្ហាញថាស្ថានភាពហិរញ្ញវត្ថុរបស់ X មិនមានភាពប្រសើរឡើងនោះទេ។ នៅថ្ងៃទី ២១ ខែសីហា ឆ្នាំ២០២៣ លោក Musk បានសារភាពថា X អាចនឹងបរាជ័យ ប៉ុន្តែគាត់នឹងព្យាយាមបង្កើតបណ្តាញសង្គមដ៏ល្អបំផុតសម្រាប់អ្នកប្រើប្រាស់។

១០.xAI៖ ថ្មីៗនេះកាលពីថ្ងៃទី ១២ ខែកក្កដា ឆ្នាំ២០២៣ លោក Elon Musk បានបង្កើត xAI ជាមួយនឹងគោលដៅនៃការយល់ដឹងអំពី “ធម្មជាតិនៃសកលលោក” និងបង្កើតជម្រើសជំនួស ChatGPT ។ xAI មានការចូលរួមពីអ្នកជំនាញឈានមុខគេជាច្រើនក្នុងផ្នែកបញ្ញាសិប្បនិម្មិត ដែលបានធ្វើការឱ្យ Google ឬ Microsoft៕
ប្រភព៖vnexpress

ប្រទេសកូរ៉េខាងត្បូង ៖ កសិដ្ឋានចិញ្ចឹមត្រី និងអាហារសមុទ្របានទទួលរងផលប៉ះពាល់យ៉ាងខ្លាំងដោយសារទឹកសមុទ្រក្តៅ ។ ជាក់ស្តែង នៅឆ្នាំ២០២៣ ត្រីរាប់លានក្បាលបានងា.ប់ជាបន្តបន្ទាប់ក្នុងកសិដ្ឋានចិញ្ចឹមត្រីនៅប្រទេសកូរ៉េខាងត្បូង ដោយសារសីតុណ្ហភាពទឹកសមុទ្រកើនឡើងលើសមុន៥អង្សារសេ ។

ស្ថានការណ៍បម្រែបម្រួលអាកាសធាតុ កំពុងតែខ្លាំងក្លា និងគួរឱ្យខ្លាចជារៀងរាល់ថ្ងៃ ។ អង្គការសហប្រជាជាតិ (UN) ប្រកាសថា នៅពេលសីតុណ្ហភាពកើនឡើងបានធ្វើឱ្យមហាសមុទ្រស្រូបយកកំដៅរហូតដល់៩០% ហើយវាធ្វើឱ្យទឹកសមុទ្រកាន់តែក្តៅ ។ ដូច្នេះ ទឹកសមុទ្រក្តៅ គឺជាសញ្ញាមិនល្អសម្រាប់ពិភពលោក និងសត្វមានជីវិត ។

ម្ចាស់កសិដ្ឋានចិញ្ចឹមត្រីនិយាយថា តាំងពីធ្វើកសិដ្ឋានចិញ្ចឹមត្រីរយៈពេល២០ឆ្នាំមកឃើញថា វាជាលើកដំបូងហើយដែលទឹកសមុទ្រក្តៅបែបនេះ គឺសីតុណ្ហភាពទឹកសមុទ្រកើនឡើងដល់២៨,២អង្សារសេ ខណៈរយៈពេលដូចគ្នានៅឆ្នាំ២០២២ សីតុណ្ហភាពទឹកសមុទ្រស្មើត្រឹមតែ២៣,១អង្សារសេប៉ុណ្ណោះ ។ ដូច្នេះ សីតុណ្ហភាពទឹកសមុទ្រកើនឡើងជាប់ៗគ្នាជាច្រើនថ្ងៃបណ្តាលឱ្យត្រីងា.ប់រាប់លានក្បាល ។

អ្នកជំនាញផ្នែកនេសាទលើកឡើងថា នៅពេលសីតុណ្ហភាពទឹកកើនឡើងធ្វើឱ្យអុកស៊ីសែននៅក្នុងទឹកធ្លាក់ចុះ ហើយវាប៉ះពាល់ដល់ការរស់នៅរបស់សត្វក្នុងទឹកផងដែរ ។ តាមទិន្នន័យរបស់ Baylor Fox Kemper ជាសាស្ត្រាចារ្យផ្នែកវិទ្យាសាស្ត្រពិភពលោក និងបរិស្ថាន មកពីសាកលវិទ្យាល័យ Brown លើកឡើងថា ៖ «៩០% របស់កម្តៅនៅលើផែនដីដែលបណ្តាលមកពីបម្រែបម្រួលអាកាសធាតុ គេអាចរកឃើញក្នុងមហាសមុទ្រក្តៅ ហើយតាមការស្ទង់មតិបង្ហាញថា ទឹកក្នុងមហាសមុទ្រមានសីតុណ្ហភាពខ្ពស់បំផុត» ៕ ប្រភព ៖ Nation