ពេជ្រ វត្តីសារ៉ាវឌ្ឍី ពិតជាធ្វើឱ្យហ្វេនៗភ្ញាក់ផ្អើលមិនតិចនោះទេ បន្ទាប់ពីនាងបានប្រកាសជាសាធារណៈនៅក្នុងកម្មវិធីមួយដោយបានបើកចំហចំណងស្នេហ៍មិនប្រកាន់ភេទឡើយមិនថាជាមនុស្សស្រីឬជាមនុស្សប្រុសសំខាន់ឱ្យតែរស់នៅជាមួយគ្នាមានក្តីសុខ។

បន្ទាប់ពីក្លាយជា MGC 2022 និងមានឈ្មោះបោះសំឡេងនៅលើឆាកអន្តរជាតិជាលំដាប់រងទី៥ MGI 2022 ឃើញថាការងារសិល្បៈរបស់បវរកញ្ញារូបនេះមានជាហូរហែមិនថាចូលរួមកម្មវិធីនានា ជាទូតសុឆន្ទៈ សម្តែងរឿងភាគ សម្តែងកុន វត្តី ក្តោបការងារបានយ៉ាងច្រើន។
ទន្ទឹមនឹងភាពស្រស់ស្អាត និងការងាររបស់ វត្តី សាធារណជនក៏ចង់ដឹងដូចគ្នាពីជីវិតឯកជនរបស់នាងដូចគ្នាថាតើពេលនេះ ពេជ្រ វត្តីសារ៉ាវឌ្ឍី មានម្ចាស់បេះដូងហើយឬនៅ ហើយបុរសប្រភេទណាដែលនាងចង់បានជាគូអនាគត។

មិនលាក់បាំងពីមហាជន តាមរយៈវីដេអូខ្លីនៅក្នុងកម្មវិធី «អ្នកជិតខាង» របស់ស្ថានីយទូរទស្សន៍ភីអិនអិន ពេជ្រ វត្តី បាននិយាយថាពេលនេះនាងមិនទាន់មានគូគាប់នៅឡើយទេគឺបេះដូងនាងទំនេរ ហើយនាងក៏បើកចំហចំណងស្នេហ៍ដូចគ្នាមិនថាមនុស្សស្រីឬមនុស្សប្រុសឡើយព្រោះសម័យនេះគេលែងប្រកាន់លើភេទហើយសំខាន់យើងរស់នៅជាមួយអ្នកណាមានក្តីសុខយើងរស់នៅជាមួយអ្នកហ្នឹង។

បន្ទាប់ពី វត្តី បញ្ជាក់យ៉ាងច្បាស់ៗដូចនេះហើយធ្វើឱ្យមហាជនមានការភ្ញាក់ផ្អើលយ៉ាងខ្លាំង ខណៈហ្វេនៗរបស់នាងហាក់មិនប្រឆាំងឬរិះគន់ទៅលើការសម្រេចចិត្តរបស់នាងឡើយ។ ទោះជាយ៉ាងណានេះគ្រាន់តែគោលគំនិតរបស់នាងតែប៉ុណ្ណោះព្រោះពេលនេះនាងមិនទាន់មានម្ចាស់បេះដូងនៅឡើយទេ ដូច្នេះបុរសៗដែលមានចិត្តលបលួចស្រលាញ់ វត្តី កុំអាលអស់សង្ឃឹមអាចនៅចែចង់នាងបាន៕

សាច់រឿងបណ្តក់គ្នាដូចខ្យងជាបន្តបន្ទាប់ជុំវិញបញ្ហា ភិទិ ម៉ានីន និងអ៊ីងអ៊ីង ដែលនាំឱ្យមានមតិវែកញែកយ៉ាងច្រើនខណៈសាមីខ្លួនខាងស្រីសុទ្ធតែបានLiveនៅលើហ្វេកប៊ុកដូចគ្នា។ ក្នុងនោះក៏មានអ្នកជំនួយអនឡាញបានចេញមក Live និយាយពីតួស្រី អ៊ីងអ៊ីង រហូតប្រធានសមាគមសិល្បករខ្មែរជំទាវ ចន ចន្ទលក្ខិណា មិនអាចនៅស្ងៀមចំពោះពាក្យសម្តីអ្នកលក់អនឡាញរូបនោះបានដោយថាការនិយាយនោះជាការមើលងាយ រើសអើងយកការងាររបស់តារាសម្តែងស្រីដែលធ្វើការតាមតួនាទីមកជាន់ឈ្លី។

ជំទាវ ចន ចន្ទ បានសរសេរនៅលើបណ្តាញសង្គមនៅថ្ងៃទី១ កញ្ញា ថា«ខ្ញុំសុំនិយាយថា ពួកប្អូនធ្វើលើសហើយ ហេតុអ្វីបានជាប្អូនយកការងារអ្នកដទៃមកនិយាយក្នុងលក្ខណៈមើលងាយគេ ? ប្អូនជាអ្នកដឹកនាំរឿងផ្ទាល់ ឬ ប្អូនជាភិទិផ្ទាល់ទើបប្អូនហ៊ាននិយាយបែបនេះ ? ប្អូននៅក្នុងអារម្មណ៌តួស្រីឬទើបប្អូនហ៊ាននិយាយអញ្ចឹង ? ប្អូនដឹងខ្លួនឬអត់ថាប្អូនកំពុងយកការងាររបស់តារាសម្តែងស្រីដែលគ្នាធ្វើការតាមតួនាទីមកជាន់ឈ្លីហើយបង្កឱ្យមានការមើលងាយនិងរើសអើង ហើយប្អូនក៏កំពុងតែបំផ្លាញកិត្តិយសនិងបង្កបញ្ហាឱ្យក្រុមហ៊ុនផលិតកម្មរបស់គេ។ ខ្ញុំនាមខ្ញុំជាអ្នកសិល្បៈចាស់វស្សាមួយរូបខ្ញុំសូមសំណូមពរសុំឱ្យគ្រួសារប្អូនបញ្ឈប់ការ Live យកប្រធានបទមើលងាយអ្នកសិល្បៈហើយលក់ផលិតផល កុំអាងល្បី កុំអាងមានលុយចង់និយាយដៀលអ្នកណាស្រេចតែចិត្ត»។

ប្រធានសមាគមសិល្បករខ្មែរ រូបនេះក៏បង្ហោះសារផ្សេងមួយទៀតថា «
ហេតុអ្វីបានជាយូរៗទៅនាំគ្នាព្រួត Live ដៀលតួសម្តែងស្រី ? តារាសម្តែងពិតគឺគេសម្តែងតាមអ្នកដឹកនាំរឿងប្រាប់ ហើយគេសម្តែងតាមសាច់រឿងដែលមានសេណារីយូច្បាស់លាស់ដែលសរសេរសាច់រឿងដោយអ្នកនិពន្ធពិតប្រាកដ និង មានក្រុមហ៊ុនផលិតកម្មត្រឹមត្រូវតាមស្តង់ដា មិនមែនដូចតារាសម្តែងតាមOnline បញ្ជារឱ្យអ្នកដឹកនាំរឿងធ្វើតាមចិត្តខ្លួនចង់បាននោះទេ។ បើខឹងនិងសង្សារគឺត្រូវជជែកគ្នានៅផ្ទះស្ងាត់ៗ ព្រោះជារឿងគ្រួសារឯង តែបើយើងផុសមានរូបអ្នកដទៃ គឺ វាប៉ះពាល់ភាគីម្ខាងទៀតដែលគ្នាមិនដឹងអី»៕

តារាចម្រៀង ទេព បូព្រឹក្ស បានប្រកាសវិលត្រលប់មកវិញលើវិថីសិល្បៈបន្ទាប់ពីផ្អាកខ្លួនមួយរយៈពេលដោយសារបំពេញតួនាទីជាម្តាយ។ ការប្រកាសវិលត្រលប់មកវិញនេះនាងបានបញ្ជាក់ថាវិលត្រលប់មកវិញជាមួយសមិទ្ធផលបីផ្ទួនៗគ្នាដ៏អស្ចារ្យ និងឱ្យហ្វេនៗត្រៀមខ្លួនជាមួយព្យុះទឹកកកដែលជាស្ទាយ៍ថ្មីរបស់នាង។

នាល្ងាចថ្ងៃទី៣១ ខែសីហា ទេព បូព្រឹក្ស បានសរសេរនៅលើបណ្តាញសង្គមថា «
ថ្ងៃនេះសូមប្រកាសការវិលត្រលប់មកវិញជាមួយសមិទ្ធផលបី ផ្ទួនៗ គឺ New ALBUM, CONCERT និង Special Announcement។ អាចថានេះគឺជាដំណឹងពិសេសសម្រាប់អ្នកគាំទ្រដ៏ស្មោះស្ម័គ្ររបស់នាងខ្ញុំ ពិតណាស់មួយរយៈកន្លងមកនេះមិនសូវបានជួបមិនសូវបានបំពេញតម្រូវការ តែក៏ធ្លាប់បានសន្យានឹងអ្នកគាំទ្រថា នឹងមកវិញជាមួយសមិទ្ធផល ទស្សនីយភាព Fashion , Stylists ក៏ដូចជាបទពិសោធន៍នៃការប្រគំតន្រ្តីបែបទំនើប និងសហសម័យ »។

ម្ចាស់បទ «ទេវរាជ» បានបញ្ជាក់ទៀតថា «ពេលនេះ ពេលវេលាក៏បានមកដល់ ហើយខ្ញុំក៏បានត្រៀមរួចរាល់សម្រាប់អ្នកគាំទ្រ នាងខ្ញុំ ទេព បូព្រឹក្ស នៅតែរក្សាជំហរជាមួយនឹងភាពរឹងមាំបោះជំហានទៅមុខដោយភាពអង់អាច ពួកយើងឆ្លងកាត់ជាមួយគ្នាជាច្រើនរដូវកាល ជាច្រើនសម័យកាល ពេលនេះក៏សមល្មមដល់ពេលបើកគេហទំព័រថ្មីនៃ [ THE NEW ERA OF TBP ] ថ្ងៃនេះនាងខ្ញុំប្រកាសដោយកិត្តិយស ជួបគ្នានៅថ្ងៃទី ១៦ ខែ កញ្ញា ខាងមុខនេះ ត្រៀមខ្លួនឱ្យល្អណា ព្យុះទឹកកក ទេព បូព្រឹក្ស មកមែនទែនហើយ»។

បន្ទាប់ពី ទេព បូព្រឹក្ស ប្រកាសបែបនេះហើយ ធ្វើឱ្យហ្វេនៗរបស់នាងអន្ទះសារយ៉ាងខ្លាំងរង់ចាំរសជាតិថ្មីរបស់តារាចម្រៀងរូបនេះវិលមកកាន់វិស័យតន្ត្រីវិញ។ ទេព បូព្រឹក្ស ត្រូវបានគេកត់សម្គាល់ថានាងជាតារាចម្រៀងម្នាក់ដែលមានរសនិយមចូលចិត្តធ្វើអ្វីដែលថ្មីៗជូនអ្នកគាំទ្រទាំងការតុបតែងខ្លួន ចង្វាក់រាំ ជាពិសេសសម័យមិនភ្លេចបុរាណដោយមានការកែច្នៃយ៉ាងទាក់ទាញ៕

ថ្មីៗនេះតារាចម្រៀង នីគីនីគី បានប្រកាសបច្ចុប្បន្នភាពសមាជិករបស់ក្រុមនាងដែលមកទល់ពេលនេះទាំងសមាជិកថ្មីទាំងសមាជិកចាស់មានចំនួន១២នាក់នៃក្រុម Worksolid ដោយសុំមិនរាប់ឆ្កែចូល។ ហើយការសរសេរពាក្យនេះបណ្តាលឱ្យមានអ្នកគិតវែងឆ្ងាយថាជាការបង្កប់ន័យស៊ីជម្រៅណាមួយ រហូត នីគីនីគី ថាពាក្យនេះមិនបានបង្កប់ន័យអ្វីនោះទេ ម្តេចក៏គិតវែងឆ្ងាយម្ល៉េះ ខណៈការប្រកាសសមាជិកនេះគេសង្កេតឃើញថាមិនមានវត្តមាន មិន ចេនី និងប្អូនស្រីឡើយ។

នៅថ្ងៃទី៣១ ខែសីហា តារាចម្រៀង នីគីនីគី បានបង្ហោះថា «បុគ្គលម្នាក់ៗនៅក្នុងក្រុម Worksolid សុទ្ធតែមានប្រវត្តិជូរចត់ លំបាកដូចគ្នា ខុសតែសាច់រឿងតែប៉ុណ្ណោះ (សុំមិនរាប់ឆ្កែក្នុងផុសនេះ)! មានអ្នកដើរដល់ផ្លូវទាល់ បាក់ទឹកចិត្ត តែលតោល អស់មធ្យោបាយ សឹងតែបាត់បង់ខ្លួនឯង និងខ្លះទៀតហាក់ដូចជា invisible គេមើលមិនឃើញសក្ដានុពល។ ខ្ញុំមិនយល់សោះថាហេតុអ្វីចក្រវាលនាំយកបុគ្គលជាច្រើនបែបនេះមកក្បែរខ្ញុំរហូត ប៉ុន្តែប្រហែលជាដោយសារខ្ញុំធ្លាប់លំបាកហ្នឹងឯង ទើបពេលឃើញ ស្គាល់ភ្លាមថាដូចខ្លួនឯង ហើយអាចស្ដាប់ និងយល់ពីពួកគាត់។ It’s the law of attraction! មនុស្សអាត្មានិយម ឬមិនដែលលំបាកនឹងស្ដាប់មិនចូល ពិបាក relate ឬសុខចិត្តបែរខ្នងដាក់។ តែខ្ញុំពិបាកសម្ដែងធ្វើមិនយល់ណាស់! អ្នកខ្លះពេលរឹងប៉ឹងហើយក៏ចាកចេញ (ពេលខ្លះចាកចេញបែបល្អដោយសារត្រូវបន្តដំណើរជីវិតផ្លូវផ្សេង ខ្លះបែបរមើលគុណ)»។
ប្រធានក្រុមរូបនេះបន្តទៀតថា «សម្រាប់សមាជិកចាស់ៗ គឺជាបុគ្គលដែកថែប មិនងាយចុះចាញ់! រីឯបុគ្គលថ្មីៗ ឬនៅចន្លោះថ្មី និងចាស់ ខ្ញុំទុកឲ្យពេលវេលាបង្ហាញភាពខ្លាំងរបស់គាត់បន្តទៀត។ អ្វីដែលខ្ញុំដឹងឥឡូវនេះ គឺពួកគាត់យល់សុខទុក្ខក្រុម និងមិនអាត្មានិយម។ ថ្ងៃមុខយើងមើលមិនឃើញទេ តែថ្ងៃនេះ ខ្ញុំសប្បាយចិត្តពេលដែលឃើញអ្នកធ្លាប់ពិបាកដូចគ្នាដើរជល់គ្នា ជួយលើកគ្នាឡើង ហើយជះឥទ្ធិពលល្អដាក់គ្នារហូតក្លាយជាបុគ្គលដែលអាចផ្ដល់ផលប្រយោជន៍ ភាពកក់ក្ដៅ និងលទ្ធផលល្អៗជាច្រើនដល់សង្គម គ្រួសារ និងមនុស្សជុំវិញ។ ចាប់ពីពេលនេះតទៅ ប្ដេជ្ញាចិត្តជាមួយខ្ញុំ បន្តស្រឡាញ់គ្នាដោយមិនសម្ដែង បន្តដុសខាត់គ្នា ដាក់ខ្លួន ហើយកុំភ្លេចប្រភពដើមរបស់យើងឲ្យសោះ»។

តាមការរៀបរាប់ខាងលើនេះរបស់តារាចម្រៀង នីគីនីគី ត្រង់ឃ្លា (សុំមិនរាប់ឆ្កែក្នុងផុសនេះ) បានធ្វើឱ្យមានការបញ្ចេញមតិថាជាការបង្កប់ន័យស៊ីជម្រៅណាមួយ រហូតដល់ តារាចម្រៀងរូបនេះបានឆ្លើយថា ក្នុងរូបមានឆ្កែពិតមែនគ្មានបង្កប់ន័យអីទេរឿងឆ្កែហ្នឹង សូមកុំគិតខុសឆ្ងាយពេក។ នីគី ក៏បន្ថែមដោយមិនអស់ចិត្តថា ហើយគិតដល់ណាឆ្ងាយម្ល៉េះ? ហួសហើយ ហួសហើយ។

ស្របពេលដែលមានការលើកឡើងខាងលើនេះស្របពេលដែលការប្រកាសសមាជិករបស់ នីគីនីគី គ្មានវត្តមាន មិន ចេនី និងប្អូនស្រី ទើបធ្វើឱ្យមានការគិតវែងឆ្ងាយរបស់ពួកគេ ខណៈក៏មានមតិសង្ស័យថាទំនាក់ទំនងរបស់ពួកគេក្នុងក្រុមដែលតែងតែមានភាពជិតស្និទ្ធសាងភាពល្បីល្បាញជាមួយគ្នាទំនងជាប្រេះឆាហើយទើបបណ្តាលឱ្យអ្នកមួយចំនួនលើកឡើងពីបញ្ហាផ្សេងៗ៕