សហរដ្ឋអាមេរិក៖ យោងតាមប្រភពព័ត៌មាន The Guardian ដែលបានរាយការណ៍កាលពីថ្ងៃទី ១៨ ខែតុលាថា ការបង្កាត់ពូជរបស់ម្រេចជាមួយម្ទេសបានបំបែកកំណត់ត្រាជាស្តេចម្ទេសដែលហឹរបំផុតលើពិភពលោក ជាមួយនឹងកម្រិតហឹរ ២.៦៩ លានស្កូវីលក្នុងមួយគ្រាប់ ខណៈដែលម្ទេសទូទៅមានកម្រិតហឹរនិងក្តៅត្រឹមតែ ៥ ម៉ឺនស្កូវីលក្នុងមួយគ្រាប់ប៉ុណ្ណោះ។
ពូជម្ទេសដែលហឹរបំផុតលើពិភពលោកនេះ មានឈ្មោះថា Pepper X ដោយបានបំបែកឯតទគ្គកម្មចាស់របស់ម្ទេសពូជ Carolina Reaper ក្នុងកម្រិតហឹរត្រឹមតែ ១.៦៤ លានស្កូវីល។ ដូច្នេះពានរង្វាន់ Guinness World Records បានទៅលើលោក Ed Currie ដែលគាត់គឺជាស្ថាបនិកក្រុមហ៊ុនម្ទេស Puckerbutt និងជាអ្នកបង្កាត់ពូជរបស់ស្តេចម្ទេស Pepper X។

លោក Ed Currie បាននិយាយថា គាត់ពិតជារំភើបខ្លាំងណាស់ ហើយគាត់បានដាំម្ទេសពូជ Pepper X នៅក្នុងកសិដ្ឋានរបស់គាត់អស់រយៈពេលជាង ១០ ឆ្នាំមកហើយ ដោយឆ្លងកាត់ការបង្កាត់ពូជជាមួយនឹងម្ទេសហឹរខ្លាំងផ្សេងៗទៀត រួមជាមួយម្រេច។ លោក Ed Currie ក៏បានបន្តទៀតថា ការបង្កាត់ពូជម្ទេសថ្មីនេះបានចំណាយពេលយ៉ាងយូរ និងទាមទារការអត់ធ្មត់ច្រើន ទម្រាំចេញជាពូជថ្មីដែលគេចង់បាន។ ដូច្នេះជារៀងរាល់ឆ្នាំ គាត់តែងតែព្យាយាមបង្កាត់ពូជម្ទេសជាង ១០០ ដង ដោយសង្ឃឹមថាមានពូជចំនួន ១ ឬ ២ អាចជាប់កំណត់ត្រាក្នុងរយៈពេល ១០ ឆ្នាំកន្លងមក។

គួរបញ្ជាក់ដែរថា កំណត់ត្រាម្ទេសដែលហឹរបំផុតលើពិភពលោកនេះ ផ្អែកលើពិន្ទុស្កូវីលរបស់ Pepper X ត្រូវបានគណនាដោយសាកលវិទ្យាល័យ Winthrop ក្នុងរដ្ឋ South Carolina សហរដ្ឋអាមេរិក។ ទោះជាយ៉ាងណាក៏ដោយ ម្ទេសដែលមានកម្រិតហឹរខ្លាំងបែបនេះអាចធ្វើឱ្យមនុស្សមានអារម្មណ៍ថាក្តៅក្នុងខ្លួនខ្លាំងរហូតដល់មានក្លិនមិនល្អនៅលើបបូរមាត់ អណ្តាត ក៏ដូចជារលាកមាត់ផងដែរ។ អាហារហឹរក៏បង្កឱ្យមានភាពមិនស្រួលក្នុងក្រពះពោះវៀន ឈឺក្បាល និងក្អួត ដូច្នេះអ្នកដែលធ្លាប់ជួបប្រទះនឹងផលប៉ះពាល់បែបនេះ គួរចៀសវាងការទទួលទានវា ព្រោះអាចនឹងមិនល្អចំពោះសុខភាព៕

ប្រទេសថៃ ៖ ឯកអគ្គរដ្ឋទូតអ៊ីរ៉ង់ប្រចាំប្រទេសថៃលើកឡើងថា ក្រុមហាម៉ាស់នឹងដោះលែងចំណាប់ខ្មាំង ប្រសិនបើប្រទេសអ៊ីស្រាអែលបញ្ឈប់ការវា.យប្រហា.រ និងយល់ព្រមចរចាគ្នា ។ នាពេលថ្មីៗនេះ ពួកគេបានវា.យប្រហា.រមកលើតំបន់ Gaza និងបណ្តាលឱ្យចំណាប់ខ្មាំងស្លា.ប់ចំនួន៩នាក់ ហើយមិនដឹងថា ជាជនជាតិអ្វីទេ ។

លោក Sayyid Reza Nobadti ឯកអគ្គរដ្ឋទូតអ៊ីរ៉ង់ប្រចាំប្រទេសថៃ និងលោក Somchai Wirunhaphon ប្រធានទីប្រឹក្សា Palestine Solidarity Campaign (PSC) Thailand បានថ្លែងពីការជួយសង្គ្រោះចំណាប់ខ្មាំងជនជាតិថៃថា ប្រធានាធិបតីប្រទេសអ៊ីរ៉ង់បានជជែកពិភាក្សាជាមួយមេដឹកនាំក្រុមហាម៉ាស់នៅប្រទេស Qatar ដើម្បីឱ្យក្រុមហាម៉ាស់ដោះលែងចំណាប់ខ្មាំងជនជាតិថៃ និងជនជាតិហ្វីលីពីន ។

ក្នុងការជជែកគ្នានេះ មេដឹកនាំក្រុមហាម៉ាស់បញ្ជាក់ថា នឹងដោះលែងចំណាប់ខ្មាំងជនបរទេស ប៉ុន្តែបច្ចុប្បន្ន ពួកគេមិនទាន់អាចដោះលែងបានភ្លាមៗទេ ព្រោះអ៊ីស្រាអែលនៅតែវា.យប្រហា.រមកលើតំបន់ Gaza ឥតឈប់ឈរ ។ ការវា.យប្រហា.រនេះបណ្តាលឱ្យចំណាប់ខ្មាំងស្លា.ប់ចំនួន៩នាក់ ហើយក្នុងចំនួននេះ គេមិនដឹងថា តើមានជនជាតិថៃដែរឬទេ ។ ដូច្នេះ មេដឹកនាំក្រុមហាម៉ាស់ជឿថា ចំណាប់ខ្មាំងនឹងគ្មានសុវត្ថិភាពទេ ប្រសិនបើធ្វើការផ្លាស់ទីក្នុងអំឡុងពេលនេះ ។

ចំណែកលោក Somchai Wirunhaphon ប្រធានទីប្រឹក្សា Palestine Solidarity Campaign (PSC) Thailand បានថ្លែងថា ក្រុមហាម៉ាស់បានថែទាំសុវត្ថិភាពចំណាប់ខ្មាំងបានយ៉ាងល្អ ប៉ុន្តែការវា.យប្រហា.ររបស់អ៊ីស្រាអែលធ្វើឱ្យតំបន់ Gaza រងការខូចខាត ។ ហេតុនេះ ក្រុមហាម៉ាស់ចង់អំពាវនាវឱ្យមានការចរចាគ្នាដើម្បីបញ្ឈប់អំពើហិ.ង្សា ។ បើភាគីទាំងពីរមិនព្រមចរចាគ្នាទេ វាអាចបណ្តាលឱ្យបញ្ហាជម្លោះលើកនេះរាលដាលកាន់តែខ្លាំងឡើង ៕ ប្រភព ៖ The Better New

ក្រសួងវប្បធម៌និងវិចិត្រ នាយប់ថ្ងៃទី២០ តុលា បានឱ្យដឹងថាក្រុមការងារជួសជុលព្រះវិហារវត្តល្អក់របស់អាជ្ញាធរជាតិអប្សរា បានប្រទះឃើញប្រាក់កាស(ស្លឹង)បុរាណសរុបទាំងអស់ប្រមាណ១១៦កាស ដែលគេបញ្ចុះនៅតាមជើងសសររបស់ព្រះវិហារវត្តល្អក់ ឬហៅវត្តអរញ្ញរង្សី ដែលស្ថិតនៅឃុំកណ្តែក ស្រុកប្រាសាទបាគង ខេត្តសៀមរាប កាលពីពេលថ្មីៗ។

កាសបុរាណ ដែលគេប្រទះឃើញទាំងនោះ មានបីប្រភេទ ដោយកាសនីមួយៗមានទំហំពី១៣-១៥មីលីម៉ែត្រ មានរូបសត្វ«ហង្ស» មួយបែបទៀតក៏មានរូប«ហង្ស»ដែរ តែលាយដោយអក្សរចិនអានថា«ជី»មានន័យថា«សំណាងល្អ»និងកាសម្យ៉ាងទៀតមានអក្សរថា«ព្រះតំបង» ឯផ្ទៃម្ខាងទៀតមានរូបគ្រុឌ។

បើតាមសហប្រធានសារមន្ទីរសេដ្ឋកិច្ច និងរូបិយវត្ថុ ព្រះស្រីឦសានវរ្ម័ន លោក ប្លែស គីលីយ៉ង់ បានពន្យល់ថា កាសដែលមានរូប«ហង្ស»គឺបានបោះពុម្ព ឱ្យប្រើប្រាស់នៅស្រុកខ្មែរចាប់ពីអំឡុងសតវត្សរ៍ទី១៦-១៩នៃគ្រិស្ដសករាជ ឯកាសមួយបែបទៀត មានរូប«ហង្ស»ដែរនិងមានអក្សរចិនអានថា«ជី»នោះ ភាគច្រើនបានបោះពុម្ព និងដាក់ឱ្យចរាចរនៅខេត្តបាត់ដំបងក្នុងអំឡុងសតវត្សរ៍ទី១៩។ ចំណែកកាសមួយប្រភេទទៀត មានអក្សរថា«ព្រះតំបង» ហើយផ្ទៃម្ខាងទៀតមានរូបគ្រុឌ គឺបោះពុម្ពនិងចរាចរនៅខេត្តបាត់ដំបង អំឡុងនាសតវត្សរ៍ទី១៩។

ក្រសួងបានបញ្ជាក់ទៀតថា ព្រះវិហារវត្តល្អក់ មានតម្លៃប្រវត្តិសាស្ត្រ ទាំងវិស័យសាសនា និងសិល្បៈដោយសារតែវត្តនេះមានអាយុកាលយូរលង់មកហើយ។ វត្តល្អក់ បានសាងសង់ឡើងដោយគ្រឿងបង្គុំធ្វើអំពីឈើ ដំបូលប្រក់ក្បឿង ជញ្ជាំងជុំវិញធ្វើពីឥដ្ឋបូកកំបោរបាយអរ។ សំណង់នេះ មានសសរ៤ជួរ ដោយមាន២ជួរនៅកណ្តាលជាសសរកន្លោងនិង២ជួរទៀតជាសសរជើងរាង។ បច្ចុប្បន្ន សសរឈើរបស់ព្រះវិហារ ដែលកប់ក្នុងដីជាច្រើនឆ្នាំមកហើយ កំពុងមានភាពពុកផុយខូចខាតខ្លាំង ដែលអាចបង្កគ្រោះថ្នាក់ដល់ការស្នាក់នៅរបស់ព្រះសង្ឃ ហើយវាទាមទារឱ្យក្រុមអ្នកជំនាញធ្វើការជួសជុលជាចាំបាច់៕

បរទេស៖ ក្រុមហ៊ុន Suzuki របស់ជប៉ុនគ្រោងនឹងបង្ហាញម៉ូតូស៊េរីថ្មីសម្រាប់ការចល័តទីក្រុងដ៏ងាយស្រួលនៅឯពិព័រណ៍ Japan Mobile ដែលត្រូវបានធ្វើឡើងនៅទីក្រុងតូក្យូចាប់ពីថ្ងៃទី ២៨ ខែតុលាដល់ថ្ងៃទី ៥ ខែវិច្ឆិកា។
យោងតាមគេហទំព័រ Yahoo ដែលបានរាយការណ៍កាលពីថ្ងៃទី ១៩ ខែតុលាថា ម៉ូតូស៊េរីថ្មីរបស់ក្រុមហ៊ុន Suzuki មានឈ្មោះថា MOQBA ដែលវាត្រូវបានបំពាក់ទាំងជើង និងកង់ ក៏ដូចជាផ្តល់នូវការចល័តមិនធម្មតា រីឯតួរថយន្តវិញមានកង់អគ្គិសនីតូចៗចំនួន ៤ ដែលកង់នីមួយៗភ្ជាប់ទៅនឹងជើងមនុស្សយន្ត។ ចំណែកឯស៊ុម ត្រូវបានភ្ជាប់ទៅនឹងរចនាសម្ព័ន្ធដែលមានរាងដូច boomerang ពីរដែលបង្កើតជាគ្រឹះរបស់ម៉ូតូ។

លក្ខណៈពិសេសគួរឱ្យកត់សម្គាល់របស់ MOQBA គឺវាមានសមត្ថភាពក្នុងការយកឈ្នះលើឧបសគ្គ រួមទាំងជណ្តើរ។ ទោះបីជាមិនដូចម៉ូតូបុរាណក៏ដោយ ម៉ូតូថ្មីនេះផ្តល់នូវស្ថេរភាពកាន់តែខ្លាំងនៅពេលធ្វើដំណើរលើដីមិនស្មើគ្នា។ ការរចនារបស់វាមានតម្លៃជាពិសេសនៅក្នុងបរិស្ថានទីក្រុងដែលមានឧបសគ្គជាច្រើនដូចជាគែមខ្ពស់ រន្ធ និងជណ្តើរ។ ដូច្នេះ ម៉ូតូថ្មីនេះអាចមានប្រយោជន៍សម្រាប់មនុស្សចាស់ និងអ្នកដែលពិបាកធ្វើដំណើរ។
ចំពោះការរចនាម៉ូឌុលវិញនឹងអនុញ្ញាតឱ្យមានការផ្លាស់ប្តូរផ្នែកដែលបានដំឡើងនៅលើតួ ដោយបំប្លែងពីកៅអីម៉ូតូទៅជាកៅអីរុញ រទេះរុញ ដៃមនុស្សយន្ត ឬរទេះទិញទំនិញ។ សមត្ថភាពបំប្លែងនេះ ក៏អាចប្រែក្លាយម៉ូតូទៅជាយានជំនិះចម្រុះសម្រាប់ស្ថានភាពផ្សេងៗ ចាប់ពីការដឹកជញ្ជូនផ្ទាល់ខ្លួន រហូតដល់ជួយក្រុមសង្គ្រោះក្នុងពេលមានគ្រោះមហន្តរាយនៅកន្លែងដែលមានដីស្មុគស្មាញ។

គួរបញ្ជាក់ដែរថា MOQBA ផ្តល់ជូននូវរបៀប ៣ ដើម្បីបំពេញតាមតម្រូវការផ្សេងៗគ្នា រួមទាំងកៅអី ឈរ និង stretcher ។ Seat Mode ផ្តល់នូវកន្លែងអង្គុយបែបប្រពៃណីសម្រាប់អ្នកបើកបរ ចំពោះរបៀបឈរវិញគឺសមរម្យសម្រាប់អ្នកដែលចូលចិត្តឈរនៅពេលផ្លាស់ទី ជាចុងក្រោយរបៀប Stretcher ត្រូវបានរចនាឡើងដើម្បីដឹកអ្នករបួស។ទោះជាយ៉ាងណាក៏ដោយ ខណៈពេលដែលស្ថិតក្នុងដំណាក់កាលដំបូងនៃការអភិវឌ្ឍន៍ MOQBA នឹងផ្តល់នូវទស្សនវិស័យតែមួយគត់លើការចល័តទីក្រុង ដោយវាមិនច្បាស់ទេថាតើរម៉ូតូនេះអាចដំណើរការពីគំនិតទៅការផលិតជាក់ស្តែងឬអត់ ប៉ុន្តែគំនិតនេះបើកលទ្ធភាពដ៏គួរឱ្យរំភើបសម្រាប់ដំណោះស្រាយដឹកជញ្ជូនដែលផ្តល់អាទិភាពដល់ការរួមបញ្ចូល និងភាពងាយស្រួល៕

ជាមួយនឹងកំណើនភ្ញៀវទេសចរបានចូលមកកម្សាន្តនៅប្រទេសថៃច្រើនលើសពីការរំពឹងទុក បណ្តាញសង្គមថៃបានលើកឡើងពីមូលហេតុចម្បងៗ ដែលប្រទេសថៃបានទាក់ទាញភ្ញៀវបរទេសជាច្រើនមកកម្សាន្ត និងស្នាក់នៅ ក្នុងនោះមានភ្ញៀវទេសចរបរទេសជាច្រើននាក់ចូលចិត្តមកកម្សាន្តនៅប្រទេសថៃ ដូចជា ភ្ញៀវទេសចរមកពីតំបន់អឺរ៉ុប ឬសូម្បីតែភ្ញៀវទេសចរអាស៊ី ក៏នាំគ្នាមកកម្សាន្តនៅប្រទេសថៃដែរ ។ តើប្រទេសថៃមានចំណុចទាក់ទាញអ្វីខ្លះ ទើបភ្ញៀវទេសចរបរទេសចង់មកទីនេះម្តងហើយម្តងទៀត ?

ខាងក្រោមនេះ គឺជាចំណុចដែលបានទាក់ទាញ ៖
១-ធម្មជាតិ ៖
ធម្មជាតិស្រស់ស្អាត គឺជារឿងដំបូងដែលភ្ញៀវទេសចរមកពីអឺរ៉ុបនឹកឃើញមុនគេ ដូចជា សមុទ្រ, ព្រៃភ្នំ, ទឹកជ្រោះ, កោះ ឬតំបន់ទេសចរណ៍ធម្មជាតិផ្សេងៗ ដែលប្រទេសថៃបានព្យាយាមកែលម្អ និងមានការទុកដាក់សំរាមត្រឹមត្រូវ ដើម្បីទាក់ទាញភ្ញៀវទេសចរបរទេស និងប្រមូលប្រាក់ចំណូលចូលប្រទេសផងដែរ ។

២-ម្ហូបអាហារ ៖
ប្រទេសថៃមានម្ហូបអាហារជាច្រើនមុខដែលត្រូវមាត់ភ្ញៀវទេសចរបរទេស ហើយបើទោះជាអាហារទាំងនោះដាក់លក់នៅតាមផ្លូវក្តី ប៉ុន្តែមានអនាម័យខ្ពស់ និងមានការវេចខ្ចប់ត្រឹមត្រូវ ។ លើសពីនេះ ប្រទេសថៃមានផ្លែឈើជាច្រើនប្រភេទ ដែលប្រទេសមួយចំនួនពិបាករកទិញ ។ ភ្ញៀវទេសចរនិយាយថា ម្ហូបអាហារ និងផ្លែឈើនៅថៃមានតម្លៃសមរម្យ ហើយសំខាន់បំផុត អ្នកលក់បានសរសេរស្លាកប្រាប់តម្លៃច្បាស់លាស់នៅលើទំនិញនីមួយៗទៀតផង ។

៣-សេវាកម្ម ៖
នៅតាមតំបន់ទេសចរណ៍នីមួយៗក្នុងប្រទេសថៃ គឺជនជាតិថៃនិយមយកចិត្តភ្ញៀវទេសចរបរទេសយ៉ាងល្អ ដោយសារពួកគេបានទទួលការអប់រំតាំងពីតូចឱ្យយកចិត្តទុកដាក់ជាមួយភ្ញៀវ ។ ហេតុនេះ វាមិនចម្លែកចិត្តទេ ដែលភ្ញៀវទេសចរបរទេសចង់ត្រឡប់មករកសេវាកម្មនេះម្តងទៀត ដោយសារការផ្តល់ស្នាមញញឹម និងសេវាកម្មដោយការពេញចិត្ត ។

៤-ពន្លឺ ពណ៌ និងសំឡេង ៖
អ្នកប្រកបអាជីវកម្មនៅប្រទេសថៃបានផ្តោតសំខាន់លើរឿងនេះយ៉ាងខ្លាំង ជាពិសេស នៅក្នុងការសម្តែងកម្មវិធីផ្សេងៗ ដែលមានការរៀបចំឆាកប្រកបដោយភាពចម្រុះពណ៌ ដើម្បីទាក់ទាញជនបរទេស ។ ចំណុចនេះហើយដែលធ្វើឱ្យជនបរទេសចូលចិត្តមកកម្សាន្តនៅប្រទេសថៃ ដោយសារពួកគេចង់ទទួលយកបទពិសោធន៍ថ្មីៗ ៕

នៅថ្ងៃទី ២០ ខែតុលា ក្រុមហ៊ុន HODU&U Entertainment បានចេញសេចក្តីថ្លែងការបន្ទាប់ពីធ្លាយដំណឹងរឿងតារាសម្តែងល្បីម្នាក់ដែលគេដាក់នាមឱ្យថា Mr. L ជាប់ពាក់ព័ន្ធនឹងគ្រឿងញៀនដោយទីភ្នាក់ងារបញ្ជាក់ថាបច្ចុប្បន្ន Lee Sun Gyun កំពុងជាប់ពាក់ព័ន្ធក្នុងការស៊ើបអង្កេតគ្រឿងញៀន ប៉ុន្តែក្រុមហ៊ុននេះមិនបានបញ្ជាក់ថា ការចោទប្រកាន់ពីបទប្រើប្រាស់គ្រឿងញៀននេះជាការពិតឬយ៉ាងណានោះទេ។

ភ្នាក់ងាររបស់តារាសម្តែងវ័យ៤៨ឆ្នាំរូបនេះបាននិយាយថា “ជាដំបូង យើងសូមអភ័យទោសចំពោះការព្រួយបារម្ភដែលបង្កឡើងដោយរបាយការណ៍អំពីតារាសម្តែង Lee Sun Kyun ដែលតារាក្នុងក្រុមហ៊ុនរបស់យើង។ យើងកំពុងបញ្ជាក់ពីភាពពិតប្រាកដនៃការចោទប្រកាន់នាពេលបច្ចុប្បន្ននេះលើកឡើងប្រនឹងតារាសម្ដែង Lee Sun Kyun ហើយយើងនឹងចូលរួមដោយស្មោះត្រង់ក្នុងការស៊ើបអង្កេតដោយភ្នាក់ងារស៊ើបអង្កេត ដែលអាចនឹងបន្តទៅថ្ងៃអនាគត»។

HODU&U Entertainment បានបញ្ជាក់បន្ថែមទៀតថា Lee Sun Gyun បានទទួលការគំរាមកំហែងដោយ blackmail ទាក់ទងនឹងករណីនេះ ដោយនិយាយថា “តារាសម្តែង Lee Sun Gyun បានទទួលការចោទប្រកាន់ និងការគំរាមកំហែងឥតឈប់ឈរពីជនអនាមិកដែលជាមនុស្សម្នាក់ដែលទាក់ទងនឹងករណីនេះ ហើយក្រុមហ៊ុនបានដាក់ពាក្យបណ្តឹងទៅកាន់អ្នកស៊ើបអង្កេត។ .. យើងនឹងឆ្លើយតបភ្លាមៗប្រសិនបើព័ត៌មានមិនពិតត្រូវបានផ្សព្វផ្សាយដោយសារតែការបង្ហោះព្យាបាទ ឬករណីមិនពិត”។

គួរបញ្ជាក់ផងដែរថា Lee Sun Gyun ត្រូវបានគេស្គាល់តាមរយៈការសម្តែងនៅក្នុងរឿង “Parasite” ‘A Hard Day’, ‘All About My Wife’ និងរឿង ‘Helpless’ ៕

តាមគម្រោងដែលបានប្រកាសកាលពីជាងពីរសប្តាហ៍មុន កម្មវិធីប្រគល់ពានរង្វាន់ធំ MTV EMAs ត្រូវបានកំណត់នៅថ្ងៃទី៥ ខែវិច្ឆិកា នៅទីក្រុងប៉ារីស។ ទោះជាយ៉ាងណាកម្មវិធីនេះត្រូវបានប្រកាសរំសាយវិញដោយសារតែការប្រែប្រួលនៃព្រឹត្តិការណ៍ពិភពលោកពោលគឺដោយសារសង្គ្រាមរបស់ប្រទេសអ៊ីស្រាអែលនិងហាម៉ាស។ នេះជាលើកទីមួយហើយដែលកម្មវិធីនេះត្រូវបានរំសាយចាប់តាំងពីបង្កើតឡើងក្នុងឆ្នាំ១៩៩៤ សូម្បីតែក្នុងអំឡុងពេលនៃជំងឺរាតត្បាតក៏ដោយកម្មវិធីនេះបានបន្តទៅតាមការគ្រោងទុក។

អ្នកនាំពាក្យក្រុមហ៊ុនបាននិយាយនៅក្នុងសេចក្តីថ្លែងការណ៍មួយថា ដោយសារភាពប្រែប្រួលនៃព្រឹត្តិការណ៍ពិភពលោក យើងបានសម្រេចចិត្តមិនឆ្ពោះទៅមុខជាមួយ MTV EMAs ឆ្នាំ២០២៣ដើម្បីសុវត្ថិភាព បុគ្គលិក សមាជិកនាវិក សិល្បករ អ្នកគាំទ្រ និងដៃគូរាប់ពាន់នាក់ដែលធ្វើដំណើរ។ ប្រភពដដែលបានបញ្ជាក់ទៀតថា MTV EMAs គឺជាការប្រារព្ធពិធីប្រចាំឆ្នាំនៃតន្ត្រីសកលនៅពេលដែលឃើញព្រឹត្តិការណ៍បំផ្លិចបំផ្លាញនៅក្នុងប្រទេសអ៊ីស្រាអែល និងតំបន់ហ្គាហ្សានៅតែបន្តកើតមាន នេះមិនមែនជាពេលសម្រាប់ការប្រារព្ធពិធីសកលនោះទេស្របពេលជាមួយនឹងការបាត់បង់ជីវិតរាប់ពាន់នាក់ វាជាពេលវេលានៃការកាន់ទុក្ខ។ យើងទន្ទឹងរង់ចាំរៀបចំកម្មវិធី MTV EMAs ម្តងទៀតក្នុងខែវិច្ឆិកា ឆ្នាំ២០២៤។

គួរបញ្ជាក់ថា តាមគម្រោង មានតារាល្បីៗជាច្រើនរូបក្នុងនោះក៏មានJung Kook ស្ថិតក្នុងចំណោមសិល្បករដែលគ្រោងនឹងសម្តែងផ្ទាល់ក្នុងកម្មវិធីនេះ ដែលនឹងត្រូវផ្សាយផ្ទាល់តាមទូរទស្សន៍ MTV ទៅជាង ១៥០ប្រទេស៕

សហរដ្ឋអាមេរិក ៖ ប្រធានាធិបតីអាមេរិក លោក ចូ បៃឌិន បានថ្លែងថា ភាពជោគជ័យក្នុងសង្គ្រាមរបស់ប្រទេសអ៊ីស្រាអែល និងអ៊ុយក្រែន គឺមានសារសំខាន់ចំពោះសន្តិសុខរបស់សហរដ្ឋអាមេរិក ។ ប្រសិនបើបណ្តោយឱ្យការឈ្លា.នពា.ននៅតែបន្តនោះ បញ្ហាជម្លោះ និងភាពវឹកវរ នឹងរាលដាលទៅកាន់ប្រទេសផ្សេងៗនៅលើពិភពលោក ។

លោក ចូ បៃឌិន បានថ្លែងសុន្ទរកថាពីការិយាល័យរបស់លោក តាមរយៈស្ថានីយទូរទស្សន៍ពាក់ព័ន្ធនឹងសង្គ្រាមដែលកំពុងកើតឡើងនៅប្រទេសអ៊ុយក្រែន និងតំបន់ Gaza ហើយលោកប្រៀបធៀបថា ប្រធានាធិបតីរុស្ស៊ី លោក វ្ល៉ាឌីមៀ ពូទីន និងក្រុមហាម៉ាស់ដែលកាន់កាប់តំបន់ Gaza បើទោះជាស្ថិតនៅឆ្ងាយពីគ្នាក្តី ប៉ុន្តែពួកគេមានគោលដៅដូចគ្នា ។ ក្រុមទាំងពីរនេះត្រូវការបំផ្លាញប្រជាធិបតេយ្យរបស់ប្រទេសអ៊ុយក្រែន និងអ៊ីស្រាអែល ហើយជ័យជម្នះរបស់អ៊ុយក្រែន និងអ៊ីស្រាអែល មានសារសំខាន់ចំពោះសន្តិសុខអាមេរិក ។

លោក ចូ បៃឌិន បញ្ជាក់ថា ប្រទេសអ៊ីស្រាអែល និងប៉ាឡេស្ទីន គួរតែរស់នៅដោយភាពស្ងប់សុខ ហើយលោកក៏បានអំពាវនាវឱ្យភាគីទាំងអស់បង្កើនកិច្ចសហការដើម្បីទប់ស្កាត់អំពើឃោឃៅរបស់ក្រុមហាម៉ាស់ រួមទាំងហាមឃាត់មេដឹកនាំរុស្ស៊ី លោក ពូទីន ផងដែរ ។ លោកបន្តថា លោកកំពុងត្រៀមដាក់សំណើទៅសភាអាមេរិក ដើម្បីស្នើសុំថវិកាបន្ទាន់ប្រមាណ១សែនលានដុល្លារអាមេរិកនៅឆ្នាំ២០២៤ ដើម្បីគាំទ្រផ្នែកមនុស្សធម៌ និងការគ្រប់គ្រងព្រំដែនប្រទេសអ៊ុយក្រែន និងអ៊ីស្រាអែល ។

លោកប្រធានាធិបតីអាមេរិកបានលើកឡើងបែបនេះ ក្រោយពីលោកធ្វើដំណើរទៅកាន់ប្រទេសអ៊ីស្រាអែលរយៈពេលខ្លី ដើម្បីបង្ហាញពីការគាំទ្រ និងសាមគ្គីជាមួយអ៊ីស្រាអែលក្នុងការតស៊ូជាមួយក្រុមហាម៉ាស់ ក៏ដូចជាចង់ជំរុញជំនួយមនុស្សធម៌ដល់ពលរដ្ឋប៉ាឡេស្ទីននៅតំបន់ Gaza ៕ ប្រភព ៖ Thairath