បរទេស៖ យោងតាមមន្ត្រីនៅភាគខាងកើតប្រទេសលីប៊ី បាននិយាយថា មនុស្សយ៉ាងហោចណាស់ ២,០០០ នាក់ត្រូវបានបាត់បង់ជីវិត និងរាប់ពាន់នាក់ទៀតកំពុងបាត់ខ្លួននៅក្នុងទីក្រុង Derna បន្ទាប់ពីរងការវាយប្រហារភ្លាមៗដោយទឹកជំនន់ ដែលបណ្តាលមកពីព្យុះ និងភ្លៀងធ្លាក់ខ្លាំង។ព្យុះ Daniel កាលពីសប្តាហ៍មុន បានបំផ្លិចបំផ្លាញ ប្រទេសក្រិច បោកបក់ឆ្លងកាត់សមុទ្រមេឌីទែរ៉ាណេ និងវាយប្រហារប្រទេសលីប៊ី នៅថ្ងៃទី ១០ ខែកញ្ញា។ ទឹកជំនន់ដ៏ធំបានជន់លិច និងបំផ្លាញផ្ទះនៅក្នុងទីក្រុង Derna ហើយក៏បានវាយប្រហារការតាំងទីលំនៅតាមឆ្នេរសមុទ្រជិតខាង រួមទាំងទីក្រុង Benghazi ធំទីពីររបស់ប្រទេសផងដែរ។

លោក Ahmed Mismari អ្នកនាំពាក្យកងទ័ពជាតិលីប៊ី (LNA) ដែលគ្រប់គ្រងភាគខាងកើតប្រទេសលីប៊ី បានប្រកាសតាមទូរទស្សន៍កាលពីថ្ងៃទី ១១ ខែកញ្ញាថា ទឹកជំនន់ភ្លាមៗដែលបណ្តាលមកពីព្យុះ និងភ្លៀងធ្លាក់ខ្លាំងបានធ្វើឱ្យទំនប់ទឹកចំនួនពីរនៅផ្នែកខាងលើនៃទីក្រុង Derna ដួលរលំ ជាមួយនឹងអ្នកស្រុករបស់ពួកគេទៅក្នុងសមុទ្រ។អាជ្ញាធរភាគខាងកើតប៉ាន់ប្រមាណថាមនុស្សយ៉ាងហោចណាស់ ២,០០០ នាក់បានស្លាប់ ហើយមនុស្ស ៥,០០០ ឬ ៦,០០០ នាក់ទៀតកំពុងបាត់ខ្លួននៅក្នុងទីក្រុង Derma ដែលមានប្រជាជនសរុបចំនួន ១០០,០០០ នាក់។

ក្រុមប្រឹក្សាក្រុង Derna បាននិយាយថា “ស្ថានភាពនេះគឺធ្ងន់ធ្ងរណាស់ហើយមិនអាចគ្រប់គ្រងបានឡើយ” ផ្លូវភាគច្រើននៃទីក្រុងសុទ្ធតែបានដួលរលំទាំងអស់។ រដ្ឋាភិបាលភាគខាងកើតបានប្រកាសកាន់ទុក្ខរយៈបីថ្ងៃ ដោយអាជ្ញាធរក៏បានប្រកាសពីស្ថានភាពអាសន្នខ្លាំងបំផុតបិទសាលារៀន និងហាងនានា និងដាក់បម្រាមគោចរ។ ដូច្នេះហើយបច្ចុប្បន្ននេះ ប្រតិបត្តិការស្វែងរក និងជួយសង្គ្រោះកំពុងដំណើរការ ដោយប្រទេសកាតា និងអេមីរ៉ាតអារ៉ាប់រួមក៏បានបញ្ជូនជំនួយទៅកាន់តំបន់រងផលប៉ះពាល់នៅភាគខាងកើតផងដែរ៕
ប្រភព៖vnexpress

ប្រទេសចិន៖ ប្រទេសចិនបានសាងសង់ស្ពានថ្មីមួយដែលមានប្រវែងប្រហែល ៥ គីឡូម៉ែត្រក្នុងរយៈពេលត្រឹមតែ ៤៣ ម៉ោងប៉ុណ្ណោះ ដែលធ្វើឱ្យសាស្រ្តាចារ្យនៅសាកលវិទ្យាល័យ Harvard និយាយថា “គួរឱ្យភ្ញាក់ផ្អើល” នេះបើយោងតាមប្រភពព័ត៌មាន CNN កាលពីថ្ងៃទី៨ ខែកញ្ញា។

ស្ពាននេះគឺជាផ្លូវឆ្លងកាត់ Sanyuan ដ៏ល្បីល្បាញនៅលើផ្លូវក្រវ៉ាត់ទី ៣ ក្នុងទីក្រុងប៉េកាំង។ ការសាងសង់ស្ពាននេះមិនមែនជាការផ្លាស់ប្តូរសាមញ្ញនោះទេ ប្រទេសចិនបានប្រើប្រាស់កម្មកររាប់ពាន់នាក់ និងវិស្វករផ្លូវ និងស្ពានចំនួន ២៤ ដើម្បីចូលរួមក្នុងដំណើរការសាងសង់ក្នុងរយៈពេល ៤៣ ម៉ោង។ ជាពិសេស ប្រទេសចិនបានរួមបញ្ចូលគ្នានូវម៉ាស៊ីនសាងសង់ស្ពានឆ្លាតវៃ បច្ចេកវិទ្យាផ្កាយរណប និងបច្ចេកវិទ្យាបន្ទះឈីបនៅក្នុងដំណើរនៃការសាងសង់។

លើសពីនេះទៅទៀត ដើម្បីធានាបាននូវភាពត្រឹមត្រូវខ្ពស់បំផុត ប្រទេសចិនបានប្រើប្រាស់ប្រព័ន្ធបើកបរគំនរដោយស្វ័យប្រវត្តិ Beidou នោះប្រព័ន្ធនឹងកំណត់ទីតាំងណាមួយយ៉ាងជាក់លាក់ ហើយឧបករណ៍បន្ទះឈីបនឹងរួមបញ្ចូលគ្នាជាមួយម៉ាស៊ីនសាងសង់ស្ពានដ៏ឆ្លាតវៃដើម្បីបញ្ចប់ដំណើរការគំនរ។

ជាមួយការរួមបញ្ចូលគ្នាដ៏មានឥទ្ធិពលនៃម៉ាស៊ីនសាងសង់ស្ពានឆ្លាតវៃ បច្ចេកវិទ្យាផ្កាយរណប និងបច្ចេកវិទ្យាបន្ទះឈីបបានពន្លឿនការអភិវឌ្ឍន៍បច្ចេកវិទ្យានៅក្នុងវិស័យសំណង់ហេដ្ឋារចនាសម្ព័ន្ធរបស់ប្រទេសចិន។

ភាពរឹងមាំរបស់ប្រទេសចិនក្នុងការសាងសង់ហេដ្ឋារចនាសម្ព័ន្ធតែងតែត្រូវបានទទួលស្គាល់ដោយពិភពលោក។ ជាច្រើនឆ្នាំមកនេះ ប្រទេសចិនបានចាក់គ្រឹះសម្រាប់ការសាងសង់គម្រោងផ្លូវទំនើបៗដោយចំណាយប្រាក់យ៉ាងច្រើនជាមួយនឹងការប្តេជ្ញាចិត្តយ៉ាងមុតមាំរបស់ខ្លួន។ ជាមួយនឹងថាមពលនៃបច្ចេកវិទ្យាដែលកំពុងរីកចម្រើនឥតឈប់ឈរនាពេលបច្ចុប្បន្ននេះ គម្រោងដែលធ្វើឡើងដោយប្រទេសចិនតែងតែល្បីល្បាញដោយសារប្រសិទ្ធភាព ល្បឿន និងគុណភាពល្អគួរឱ្យភ្ញាក់ផ្អើល៕
ប្រភព៖cafef.com

ប្រទេសថៃ ៖ ប្រទេសថៃបានជាប់ចំណាត់ថ្នាក់ទី២ លើពិភពលោក ក្នុងចំណោមបញ្ជីឈ្មោះប្រទេសចំនួន៨៥ ដែលល្អបំផុតសម្រាប់ចាប់ផ្តើមប្រកបអាជីវកម្មប្រចាំឆ្នាំ២០២៣ ។ គេហទំព័រ U.S. News and World Report បានបង្ហាញលទ្ធផលចាត់ចំណាត់ថ្នាក់ប្រទេសល្អបំផុត ដើម្បីចាប់ផ្តើមអាជីវកម្មប្រចាំឆ្នាំ២០២៣ (2023 Best Countries for Starting a Business) ក្នុងនោះប្រទេសឥណ្ឌាជាប់ចំណាត់ថ្នាក់ទី១, ថៃជាប់ចំណាត់ថ្នាក់ទី២ និងចិនជាប់ចំណាត់ថ្នាក់ទី៣ ។

ចំណែកប្រទេសផ្សេងទៀតដែលបានជាប់ចំណាត់ថ្នាក់ជាប្រទេសល្អបំផុត សម្រាប់ចាប់ផ្តើមអាជីវកម្មប្រចាំឆ្នាំ២០២៣ រួមមាន ៖
-ម៉ិកស៊ិក ជាប់ចំណាត់ថ្នាក់ទី៤
-សហរដ្ឋអាមេរិក ជាប់ចំណាត់ថ្នាក់ទី៥
-ហ្វីលីពីន ជាប់ចំណាត់ថ្នាក់ទី៦
-វៀតណាម ជាប់ចំណាត់ថ្នាក់ទី៧
-ប្រេស៊ីល ជាប់ចំណាត់ថ្នាក់ទី៨
-ម៉ាឡេស៊ី ជាប់ចំណាត់ថ្នាក់ទី៩
-អេស្ប៉ាញ ជាប់ចំណាត់ថ្នាក់ទី១០

លទ្ធផលការចាត់ចំណាត់ថ្នាក់ប្រទេសនានារបស់គេហទំព័រ U.S. News and World Report បញ្ជាក់ថា ក្រុមហ៊ុនមួយអាចទទួលបានជោគជ័យបានឬអត់នោះ ត្រូវពិចារណាអំពីទីតាំងនៃការចាប់ផ្តើមអាជីវកម្មផងដែរ ដូចជា ការបង់ពន្ធ, សក្តានុពលការងារ និងកត្តាផ្សេងៗ គឺសុទ្ធតែមានឥទ្ធិពលដល់លទ្ធផលអនុវត្តការងារ ។

គេហទំព័រនេះបង្ហាញថា ការចាត់ចំណាត់ថ្នាក់ប្រទេសល្អបំផុតសម្រាប់ចាប់ផ្តើមអាជីវកម្មប្រចាំឆ្នាំ២០២៣ គឺជាការប្រមូលផ្តុំលទ្ធផលស្ទង់មតិពលរដ្ឋនៅទូទាំងពិភពលោក ស្មើជាង១៧.០០០នាក់ និងការវាយតម្លៃលើប្រទេសផ្សេងៗ ។ អ្នកឆ្លើយតបសំណួរប្រមាណ៤.៦០០នាក់ គឺជាក្រុមអ្នកសម្រេចចិត្តប្រកបអាជីវកម្ម ដូចជា នាយកគ្រប់គ្រងជាន់ខ្ពស់ក្នុងស្ថាប័ន ឬម្ចាស់ក្រុមហ៊ុនអាជីវកម្មទំហំតូច ។

ការចាត់ចំណាត់ថ្នាក់ប្រទេសល្អបំផុតសម្រាប់ប្រកបអាជីវកម្ម គឺផ្អែកលើគុណសម្បត្តិចំនួន៥ រួមមាន ៖
-តម្លៃសមរម្យ
-ប្រព័ន្ធការងាររបស់រដ្ឋាភិបាល
-ដើមទុនផ្នែកផលិតកម្មទាប
-អាចតភ្ជាប់ទៅកាន់តំបន់ផ្សេងៗនៅលើពិភពលោក
-គាំទ្រ និងផ្តល់ភាពងាយស្រួលដើម្បីទទួលបានមូលនិធិ ៕

ប្រភព ៖ Bangkok biznews