ប្រទេសជប៉ុន ៖ នៅឆ្នាំ២០២៣ សារព័ត៌មានរបស់ប្រទេសជប៉ុនឈ្មោះ Kyodo News បានធ្វើការស្ទង់មតិជាមួយអភិបាលខេត្ត និងអាជ្ញាធរមូលដ្ឋានក្នុងខេត្តចំនួន៤៧ នៅទូទាំងប្រទេសជប៉ុនបង្ហាញថា អ្នកឆ្លើយតបការស្ទង់មតិជាង៨៤% ប្រាប់ថា ពួកគេបារម្ភយ៉ាងខ្លាំងចំពោះអនាគតប្រទេសជប៉ុន ដោយសារគ្មានជនជាតិជប៉ុនចូលមកធ្វើការក្នុងឧស្សាហកម្មមួយចំនួន ។

ចំណែកអ្នកឆ្លើយតបការស្ទង់មតិ៣០% ឆ្លើយថា រដ្ឋាភិបាលជប៉ុនគួរតែមានគោលនយោបាយ ឬផ្តល់ដំណឹងអំពីការទទួលយកជនបរទេសមកធ្វើការនៅប្រទេសជប៉ុនកាន់តែច្រើន ។ ដូចគ្នានេះ អ្នកឆ្លើយតបការស្ទង់មតិ៥៦% ទៀតយល់ឃើញថា ការអនុញ្ញាតឱ្យជនបរទេសមកធ្វើការនៅជប៉ុនមានភាពចាំបាច់ ។ ចំណែកអ្នកឆ្លើយតប៨% ទៀតនិយាយថា នៅពុំទាន់ចាំបាច់យកជនបរទេសមកធ្វើការនៅជប៉ុនទេ ។

ការស្ទង់មតិនេះបង្ហាញឱ្យឃើញថា ប្រទេសជប៉ុនកំពុងតែខ្វះខាតអ្នកធ្វើការក្នុងផ្នែកកសិកម្ម និងផ្នែកសំខាន់ៗជាច្រើនទៀតយ៉ាងខ្លាំង ដោយសារបច្ចុប្បន្ន អត្រាកំណើតនៅជប៉ុនធ្លាក់ចុះជាបន្តបន្ទាប់ ។ ផ្ទុយទៅវិញ ជប៉ុនត្រូវប្រឈមមុខនឹងបញ្ហាកំណើនពលរដ្ឋអាយុច្រើន ។

ទន្ទឹមនឹងនេះ គេរំពឹងថា ចំនួនពលរដ្ឋជប៉ុននឹងធ្លាក់ចុះរហូតដល់៣០% ហើយប្រទេសជប៉ុននឹងនៅសល់ពលរដ្ឋត្រឹមតែ៨៧លាននាក់ប៉ុណ្ណោះនៅឆ្នាំ២១០០ ។ លើសពីនេះ ជប៉ុននឹងមានពលរដ្ឋអាយុច្រើនចាប់ពី៦៥ឆ្នាំឡើងទៅរហូតដល់៤០% ៕ ប្រភព ៖ Mono News

ប្រទេសថៃ ៖ នៅថ្ងៃទី១៨ ខែកញ្ញា ឆ្នាំ២០២៣ លោក Peeraphan Saleerathaviphak ឧបនាយករដ្ឋមន្ត្រី និងរដ្ឋមន្ត្រីក្រសួងថាមពលប្រទេសថៃ បានលើកឡើងថា ប្រទេសថៃនឹងធ្វើការពិភាក្សាអំពីការបញ្ចុះតម្លៃប្រេងសាំង ដើម្បីជួយសម្រាលបន្ទុកការចំណាយក្នុងជីវភាពរស់នៅប្រចាំថ្ងៃរបស់ពលរដ្ឋ ។ ដូច្នេះ ក្រសួងថាមពលនឹងព្យាយាមបញ្ចុះតម្លៃប្រេងសាំងសម្រាប់ជាកាដូឆ្នាំថ្មីដល់ពលរដ្ឋថៃគ្រប់រូប ។

លោក Peeraphan Saleerathaviphak រដ្ឋមន្ត្រីក្រសួងថាមពលបន្តថា ជំហានដំបូង យើងនឹងផ្តោតលើក្រុមពលរដ្ឋដែលងាយផលប៉ះពាល់ជាមុនសិន ។ បន្ទាប់មក យើងនឹងជំរុញការពិភាក្សាបន្ទាន់ជាមួយខាងនាយកដ្ឋានអាជីវកម្មថាមពល ។ ដូច្នេះ នៅថ្ងៃទី១៩ ខែកញ្ញា នឹងមានការពិភាក្សាជាមួយនាយកដ្ឋានគយ ។

លោករដ្ឋមន្ត្រីក្រសួងថាមពលថ្លែងថា ៖ «តាមរយៈការជជែកជាមួយស្ថាប័នពាក់ព័ន្ធឃើញថា មានបញ្ហាផ្សេងគ្នារវាងប្រេងឥន្ធនៈ និងអគ្គិសនី ។ ហេតុនេះ ផ្នែកអគ្គិសនីមានគណៈកម្មការផ្សេងៗគ្រប់គ្រង ប៉ុន្តែប្រេងឥន្ធនៈគ្មានការគ្រប់គ្រងទេ ហើយភ្នាក់ងាររដ្ឋ ក៏គ្មានអំណាចត្រួតពិនិត្យរឿងការចំណាយដែរ ។ បើទោះជាការចំណាយដើមទុនបានកើនឡើងក្តី ប៉ុន្តែនៅមិនទាន់ដឹងទេថា ការចំណាយដើមទុនកើនឡើងលើផ្នែកអ្វីខ្លះ ហើយវាកើនឡើងពិតប្រាកដដែរឬទេ ។ ចំណុចនេះ នឹងត្រូវរកដំណោះស្រាយតាមអំណាចភ្នាក់ងាររដ្ឋក្នុងការគ្រប់គ្រងបន្តទៀត» ។

លោកបន្តថា ៖ «ប្រេងឥន្ធនៈ គឺជាទំនិញពិសេសពាក់ព័ន្ធនឹងជីវភាពរស់នៅប្រចាំថ្ងៃរបស់ពលរដ្ឋ ហើយវាពាក់ព័ន្ធនឹងការចំណាយដើមទុនទំនិញផ្សេងៗ ។ លើសពីនេះ វាជារឿងស្ថេរភាពផងដែរ ព្រោះប្រេងឥន្ធនៈជាទំនិញពិសេស និងត្រូវត្រួតពិនិត្យយ៉ាងយកចិត្តទុកដាក់ ព្រមទាំងទទួលបានទិន្នន័យត្រឹមត្រូវជាងនេះ» ។

ចុងក្រោយ លោករដ្ឋមន្ត្រីក្រសួងថាមពលបញ្ជាក់ថា ប្រទេសថៃនឹងបញ្ចុះតម្លៃប្រេងសាំងនៅឆ្នាំ២០២៣ នេះ សម្រាប់ធ្វើជាកាដូឆ្នាំថ្មីដល់ពលរដ្ឋទាំងអស់ ហើយលោកនឹងព្យាយាមធ្វើឱ្យគម្រោងនេះកាន់តែត្រឹមត្រូវ ៕ ប្រភព ៖ khaosod

ប្រទេសជប៉ុន ៖ សារព័ត៌មាន Xinhua បានរាយការណ៍ដោយយោងតាមក្រសួងសុខាភិបាល ការងារ និងសុខុមាលភាពប្រទេសជប៉ុនបញ្ជាក់ថា ចំនួនពលរដ្ឋមានអាយុលើសពី១០០ឆ្នាំ នៅប្រទេសជប៉ុន គឺស្មើរហូតដល់៩២.១៣៩នាក់ ។ វាជាតួលេខមួយខ្ពស់បំផុតនៅក្នុងប្រវតិ្តសាស្ត្រប្រទេសជប៉ុន និងជាកំណត់ត្រាពលរដ្ឋអាយុច្រើនសម្រាប់ឆ្នាំទី៥៣ ជាប់ៗគ្នាផងដែរ ។

តាមរបាយការណ៍បញ្ជាក់ថា ទិន្នន័យនេះបានគិតរហូតដល់ថ្ងៃទី១៥ ខែកញ្ញា ឆ្នាំ២០២៣ និងកើនឡើងលើសឆ្នាំ២០២២ ចំនួន១.៦១៣នាក់ ។ ក្នុងចំណោមពលរដ្ឋជប៉ុនមានអាយុលើសពី១០០ឆ្នាំ ក្នុងនោះមានស្ត្រីចំនួន៨១.៥៨៩នាក់ ស្មើនឹង៨៨,៥% និងបុរសចំនួន១០.៥៥០នាក់ ។

ប្រទេសជប៉ុនចំនួនមានពលរដ្ឋអាយុលើសពី១០០ឆ្នាំ ជាមធ្យមស្មើ៧៤នាក់សម្រាប់ពលរដ្ឋចំនួន១សែននាក់ ហើយស្ត្រីមានអាយុច្រើនជាងគេបំផុតនៅប្រទេសជប៉ុន គឺអ្នកស្រី Fusa Tatsumi មានអាយុ១១៦ឆ្នាំ រស់នៅខេត្ត Osaka ។ ចំណែកបុរសមានអាយុច្រើនជាងគេនៅប្រទេសជប៉ុន គឺលោក Chisaburo Sonobe មានអាយុ១១១ឆ្នាំ រស់នៅខេត្ត Chiba ។

ខាងក្រោមនេះ គឺជាចំនួនពលរដ្ឋជប៉ុនមានអាយុលើសពី១០០ឆ្នាំ នៅក្នុងឆ្នាំមួយចំនួន ៖
-នៅឆ្នាំ១៩៦៣ ពលរដ្ឋជប៉ុនអាយុលើសពី១០០ឆ្នាំ ស្មើនឹង១៥៣នាក់
-នៅឆ្នាំ១៩៨១ ពលរដ្ឋជប៉ុនអាយុលើសពី១០០ឆ្នាំ ស្មើជាង១.០០០នាក់
-នៅឆ្នាំ១៩៩៨ ពលរដ្ឋជប៉ុនអាយុលើសពី១០០ឆ្នាំ ស្មើជាង១ម៉ឺននាក់
-នៅឆ្នាំ២០១២ ពលរដ្ឋជប៉ុនអាយុលើសពី១០០ឆ្នាំ ស្មើជាង៥ម៉ឺននាក់ ៕

ប្រភព ៖ TNN World

កាំភ្លើងត្រូវបានរចនាឡើងសម្រាប់ប្រើប្រាស់នៅចម្ងាយឆ្ងាយ។ គ្រាប់កាំភ្លើងដែលបាញ់ចេញពីកាំភ្លើងអាចហោះបានចម្ងាយជាង ៣ គីឡូម៉ែត្រ រីឯល្បឿននៃគ្រាប់កាំភ្លើងវិញគឺលើសពី ៤,៣០០ គីឡូម៉ែត្រក្នុងមួយម៉ោង។ ដើម្បីផលិតការបាញ់បែបនេះ គ្រាប់កាំភ្លើងត្រូវបានរចនាឱ្យមានលក្ខណៈជាលំហអាកាស កាន់តែវែង ស្តើង និងធ្ងន់។ ដូច្នេះ រវាងកាំភ្លើងវែង និងកាំភ្លើងខ្លីមួយណាបាញ់លឿនជាង?

យោងតាមអ្នកវិទ្យាសាស្ត្រផ្នែកកោសល្យវិច្ច័យលោក Michael Haag បាននិយាយថា គ្រាប់កាំភ្លើងដែលត្រូវបានបញ្ឆេះក្នុងម៉ាស៊ីន ម្សៅកាំភ្លើងនឹងឆេះយ៉ាងលឿន បង្កើតជាឧស្ម័នដែលរុញគ្រាប់កាំភ្លើងចុះក្រោម។ គ្រាប់កាំភ្លើងភាគច្រើនត្រូវបានផលិតចេញពីលោហធាតុធ្ងន់ដូចជាសំណ ស្រោបដោយទង់ដែង ពីព្រោះម៉ាស់របស់វាជួយឱ្យពួកគេរក្សាសន្ទុះ។ លោក Michael បានបន្តទៀតថា ធុងកាំភ្លើងពិតជាកត្តាកំណត់ដ៏ធំបំផុតជាមួយនឹងល្បឿន ធុងកាន់តែវែង បន្ទប់ឧស្ម័នកាន់តែមានល្បឿនកើនឡើង ហើយគ្រាប់កាំភ្លើងកាន់តែលឿនជាងមុន។ ដូច្នេះ កាំភ្លើងដែលមានធុងវែង ផ្តល់នូវការបាញ់ប្រហារយ៉ាងរហ័សជាងកាំភ្លើងធុងខ្លី។

លក្ខណៈទាំងនេះអនុញ្ញាតឱ្យគ្រាប់កាំភ្លើងពីកាំភ្លើងវែងដូចជា Remington ២២៣ ចាកចេញពី muzzle ក្នុងល្បឿនរហូតដល់ ៤,៣៩០ គីឡូម៉ែត្រក្នុងមួយម៉ោង លឿននេះគ្រប់គ្រាន់ដើម្បីហោះហើរឆ្លងកាត់ចម្ងាយស្មើនឹងទីលានបាល់ទាត់ចំនួន ១១ ក្នុងមួយវិនាទី។ ទន្ទឹមនឹងនេះ គ្រាប់កាំភ្លើងពីកាំភ្លើងខ្លី Luger ៩ នឹងធ្វើដំណើរបានត្រឹមតែពាក់កណ្តាលនៃចម្ងាយនោះក្នុងល្បឿន ២,២០០ គីឡូម៉ែត្រក្នុងមួយម៉ោងប៉ុណ្ណោះ៕
ប្រភព៖vnexpress

រដ្ឋធានីកៀវ៖ ថ្វីបើយុទ្ធនាការវាយបករបស់រដ្ឋាភិបាលក្រុងកៀវ ដើម្បីរំដោះទឹកដីពីកម្លាំងទាហានរបស់ក្រុងមូស្គូ មានសកម្មភាពយឺតជាការគ្រោងទុកក៏ពិតមែន ប៉ុន្ដែឥឡូវនេះ កងទ័ពការពារទឹកដីរបស់អ៊ុយក្រែន បានបន្ដវាយបំបាក់រុស្ស៊ី ឲ្យរត់បាក់ទ័ព នៅលើសមរភូមិ នាភាគខាងកើតប្រទេសរបស់ពួកគេ

សារព័ត៌មានរបស់សិង្ហបុរី Channel News Asia បានចេញផ្សាយ កាលពីព្រឹក ថ្ងៃចន្ទ ទី១៨ ខែកញ្ញា ថា អ៊ុយក្រែន បានអះអាង កាលពីថ្ងៃអាទិត្យ (ថ្ងៃទី១៧ ខែកញ្ញា) អំពីកងកម្លាំងរបស់ខ្លួន បានវាយរំដោះទីក្រុងគ្លីសឈីវកា (Klishchiivka) ជាទីប្រជុំជនដ៏សំខាន់មួយ នៅភាគខាងត្បូងនៃទីក្រុងសមរភូមិក្ដៅបាកមូត (Bakhmut) ខណៈកងទ័ពក្រុងកៀវ បន្តវាយលុក ប្រឆាំងនឹងទាហានរុស្ស៊ី។

ជ័យជម្នះនៅលើសមរភូមិនេះ មានសារៈសំខាន់យ៉ាងខ្លាំង សម្រាប់កងទ័ពអ៊ុយក្រែន ស្របពេលលោកប្រធានាធិបតី វ៉ូឡូឌីមៀរ ហ្សេឡែនស្គី (Volodymyr Zelenskyy) កំពុងតែរៀបចំចេញដំណើរទៅបំពេញទស្សនកិច្ចរបស់គាត់ ទៅកាន់រដ្ឋធានីក្រុងវ៉ាស៊ីនតោន នាសប្តាហ៍ក្រោយ ដើម្បីប្រមូលផ្តុំនូវការគាំទ្រ មកពីលោកខាងលិច។

លោក អូឡែកសាន ស៊ីស្គី (Oleksandr Syrsky) មេបញ្ជាការកងទ័ពជើងគោក បានបង្ហោះសារ នៅលើបណ្ដាញសង្គម ថា «ជ័យជម្នះរបស់កងទ័ពអ៊ុយក្រែន នៅក្នុងទីក្រុងគ្លីសឈីវកា បង្ហាញយ៉ាងច្បាស់ អំពីបរាជ័យរបស់រុស្ស៊ី»។

ជាមួយគ្នានេះដែរ លោកប្រធានាធិបតី ហ្សេឡែនស្គី បានកោតសរសើរដល់កងទ័ពរបស់អ៊ុយក្រែន ដែលកំពុងតែប្រយុទ្ធ នៅជិតទីក្រុងបាកមូត ហើយរំដោះបានទីក្រុងគ្លីសឈីវកា ត្រឡប់យកមកគ្រប់គ្រងវិញ។ លោកប្រធានាធិបតី បានបញ្ជាក់ ថា «កងទ័ពរបស់យើងធ្វើការបានល្អណាស់»។

លោកប្រធានាធិបតី បានសង្កត់ធ្ងន់ ថា រដ្ឋាភិបាលក្រុងកៀវ កំពុងតែរៀបចំដំណោះស្រាយប្រព័ន្ធការពារជាតិថ្មី សម្រាប់អ៊ុយក្រែន។ ការការពារដែនអាកាស និង កាំភ្លើងធំ ជាអាទិភាពបំផុត ប៉ុន្ដែលោកប្រធានាធិបតី មិបានមិនផ្តល់ព័ត៌មានលម្អិតនោះឡើយ៕

ភ្នាក់ងារការពារទិន្នន័យប្រទេសអៀរឡង់បានពិន័យប្រាក់ក្រុមហ៊ុន TikTok ចំនួន៣៤៥លានអឺរ៉ូ ហើយវាគឺជាការពិន័យដ៏ធ្ងន់បំផុតចាប់តាំងពី TikTok ធ្លាប់ត្រូវបានគេពិន័យនាពេលកន្លងមក ។ ការពិន័យលើកនេះ ដោយសារ TikTok មិនអាចអនុវត្តតាមច្បាប់ការពារទិន្នន័យអ្នកប្រើប្រាស់ទូទៅរបស់សហភាពអឺរ៉ុប (EU) ក្នុងការគ្រប់គ្រងទិន្នន័យអ្នកប្រើប្រាស់ជាកុមារ ។

ពាក្យបណ្តឹងខាងលើពាក់ព័ន្ធនឹងប្រព័ន្ធផ្សព្វផ្សាយសង្គមមួយនេះគ្រប់គ្រងទិន្នន័យរបស់កុមារនៅឆ្នាំ២០២០ ជាពិសេស ពាក់ព័ន្ធនឹងការបញ្ជាក់ពីអាយុ និងការកំណត់អត្តសញ្ញាណផ្ទាល់ខ្លួន ។ ភ្នាក់ងារការពារទិន្នន័យប្រទេសអៀរឡង់ប្រទះឃើញថា TikTok មិនបានការពារទិន្នន័យអ្នកប្រើប្រាស់ជាកុមារទេ ជាពិសេស ពាក់ព័ន្ធនឹងការកំណត់អត្តសញ្ញាណផ្ទាល់ខ្លួន ។

Helen Dixon ជាគណៈកម្មការគ្រប់គ្រងទិន្នន័យបានផ្តល់បទសម្ភាសន៍ជាមួយសារព័ត៌មាន BBC ថា តាមការស៊ើបអង្កេតឃើញថា បញ្ជីអ្នកប្រើប្រាស់ដែលមានអាយុចាប់ពី១៣ឆ្នាំ ទៅ១៧ឆ្នាំ ត្រូវបានបង្ហាញជាសាធារណៈនៅពេលពួកគេចុះឈ្មោះ មានន័យថា គ្រប់គ្នានឹងអាចមើលឃើញខ្លឹមសារដែលពួកគេបង្ហោះ ។ ដូច្នេះ ភ្នាក់ងារការពារទិន្នន័យប្រទេសអៀរឡង់នឹងទុកពេលវេលាឱ្យ TikTok រយៈពេល៣ខែសម្រាប់ដោះស្រាយបញ្ហានេះ ។

ចំណែកអ្នកនាំពាក្យក្រុមហ៊ុន TikTok បញ្ជាក់ថា TikTok មិនយល់ស្របចំពោះការចោទប្រកាន់ខាងលើនេះទេ ជាពិសេស ចំនួនទឹកប្រាក់ពិន័យដែលក្រុមហ៊ុន TikTok ត្រូវបង់ ។ ការចោទប្រកាន់នេះផ្តោតទៅលើការកំណត់ដែលបានកើតឡើងតាំងពី៣ឆ្នាំមុន ហើយក្រុមហ៊ុនបានដោះស្រាយបញ្ហាមុនការស៊ើបអង្កេតទៅទៀត ដូចជា ការកំណត់គណនីអ្នកប្រើប្រាស់ទាំងអស់ឱ្យមានលក្ខណៈផ្ទាល់ខ្លួន ៕ ប្រភព ៖ Thai PBS