ប្រទេសឥណ្ឌា៖ យោងតាមសេចក្តីថ្លែងការណ៍ថ្មីៗនេះដោយអគ្គនាយកក្រុមប្រឹក្សាស្រាវជ្រាវវេជ្ជសាស្ត្រឥណ្ឌា (ICMR) Rajeev Bahl បានឱ្យដឹងថា ខណៈពេលដែលអត្រាមរណភាពដោយសារ COVID-១៩ គឺមានត្រឹមតែ ២ ទៅ ៣% ប៉ុណ្ណោះ ប៉ុន្តែចំពោះមេរោគ Nipah វិញមានអត្រាស្លាប់ពី ៤០ ទៅ ៧០% ដូច្នេះ អត្រាមរណភាពរបស់អ្នកឆ្លងមេរោគ Nipah គឺខ្ពស់ជាង COVID-១៩ ច្រើន។

តាមសេចក្តីថ្លែងការណ៍របស់ប្រធាន ICMR ត្រូវបានធ្វើឡើងបន្ទាប់ពីប្រទេសឥណ្ឌាបានរកឃើញការកើនឡើងចំនួននៃការឆ្លងមេរោគ Nipah នៅក្នុងរដ្ឋ Kerala ដោយបង្ខំឱ្យរដ្ឋាភិបាលដាក់វិធានការរឹតត្បិត រួមទាំងបិទសាលារៀន និងការិយាល័យមួយចំនួនក្នុងសប្តាហ៍នេះផងដែរ។ ICMR បានបញ្ជាក់ថា ទីភ្នាក់ងារកំពុងខិតខំប្រឹងប្រែង ដើម្បីការពារការរីករាលដាលនៃមេរោគដ៏សាហាវនេះ ដែលស្ថិតនៅក្នុងរដ្ឋ Kerala ភាគខាងត្បូងនៃប្រទេសឥណ្ឌា។

ដើម្បីទប់ស្កាត់ការរីករាលដាលនៃមេរោគនេះ ICMR បានសម្រេចចិត្តទិញអង់ទីករចំនួន ២០ បន្ថែមទៀតពីប្រទេសអូស្ត្រាលី បើទោះបីជានៅទូទាំងពិភពលោក អង់ទីករនេះត្រូវបានចាក់ដោយជោគជ័យទៅក្នុងអ្នកជំងឺ ១៤ នាក់ក៏ដោយ រហូតមកដល់ពេលនេះ មិនទាន់មានករណីណាមួយនៅក្នុងប្រទេសឥណ្ឌា ដែលថ្នាំនេះត្រូវបានប្រើប្រាស់នោះទេ។

យោងតាមអង្គការសុខភាពពិភពលោក (WHO) មេរោគ Nipah គឺជាជំងឺដែលចម្លងពីសត្វប្រចៀវដែលទុំលើផ្លែឈើមកមនុស្ស។ ជំងឺនេះក៏អាចឆ្លងតាមរយៈអាហារដែលមានមេរោគផងដែរ។ រោគសញ្ញានៃមេរោគ Nipah គឺស្រដៀងទៅនឹង COVID-១៩ រួមមាន ក្អក ឈឺសាច់ដុំ ឈឺក្បាល វិលមុខ អស់កម្លាំង ឬច្របូកច្របល់ផ្លូវចិត្ត និងប្រកាច់ជាដើម។

គួរបញ្ជាក់ដែរថាមេរោគ Nipah បានរីករាលដាលក្នុងប្រទេសឥណ្ឌាតាំងពីថ្ងៃទី១៣ ខែកញ្ញា កន្លងទៅ ដែលបណ្តាលឱ្យមនុស្សពីរនាក់ស្លាប់ និង ៧០០ នាក់ទៀតឆ្លងមេរោគនេះ៕
ប្រភព៖cafef.com

ប្រទេសចិន ៖ អវកាសយានិកនៅលើយានអវកាស Shenzhou-16 របស់ប្រទេសចិនបានទទួលជោគជ័យក្នុងការដាំបន្លែ និងអាចបេះបន្លែនៅស្ថានីយអវកាស Tiangong ទៀតផង ។ សួនបន្លែអវកាស ឬឧបករណ៍ដាំបន្លែ ដែលពួកគេប្រើប្រាស់ធ្វើជាគំរូសាមញ្ញ និងបើកចំហនេះ គឺបង្កើតឡើងដោយអ្នកស្រាវជ្រាវនៃមជ្ឈមណ្ឌលស្រាវជ្រាវ និងបណ្តុះបណ្តាលអវកាសយានិកចិន ។

សួនបន្លែអវកាស ឬឧបករណ៍ដាំបន្លែងាយស្រួលប្រើប្រាស់ ដោយគេអាចផ្លាស់ប្តូរកម្រិតសីតុណ្ហភាព, សំណើម, អុកស៊ីសែន និងកាបូនឌីអុកស៊ីតបានតាមតម្រូវការ ដើម្បីបង្កើតបរិយាកាសអំណោយផលសម្រាប់ការលូតលាស់របស់រុក្ខជាតិ ។ ក្រៅពីនេះ វាបានជួយឱ្យអវកាសយានិកអាចថែទាំដំណាំបានគ្រប់ពេលវេលាផងដែរ ។

អវកាសយានិកនៅលើយានអវកាស Shenzhou-16 បានចាប់ផ្តើមបង្កើតសួនបន្លែ និងដាក់បញ្ច្រាសនៅក្នុងស្ថានីយអវកាស ហើយដំណាំដែលដុះលូតលាស់នៅក្នុងសួនបន្លែនេះ ត្រូវបានគេស្រោចទឹកក្នុងទិសដៅផ្ទុយគ្នាពីផែនដី ។ ដូច្នេះ វាមានលក្ខណៈពិសេសខ្លាំងណាស់ ។

នៅថ្ងៃអនាគត សួនបន្លែអវកាសមិនត្រឹមតែផ្តល់អាហារ, អុកស៊ីសែន និងទឹកសម្រាប់អវកាសយានិកប៉ុណ្ណោះទេ ប៉ុន្តែវានឹងបំពេញតួនាទីជាកន្លែងសាកល្បងដើម្បីស្រាវជ្រាវពីផលប៉ះពាល់របស់បរិស្ថានពិសេស ដូចជា ភាពគ្មានទម្ងន់នៅក្នុងលំហ ដែលប៉ះពាល់ដល់ការលូតលាស់របស់រុក្ខជាតិ ។

ប្រទេសចិនបានបង្ហោះយានអវកាស Shenzhou-16 កាលពីថ្ងៃទី៣០ ខែឧសភា ឆ្នាំ២០២៣ និងបានបញ្ជូនអវកាសយានិកចំនួន៣នាក់ទៅកាន់ស្ថានីយអវកាស Tiangong ដើម្បីបំពេញភារកិច្ចរយៈពេល៥ខែ ។ វាជាបេសកកម្មដំបូងរបស់ក្រុមអវកាសយានិក ចាប់តាំងពីស្ថានីយអវកាសចូលដល់ដំណាក់កាលប្រើប្រាស់ និងអភិវឌ្ឍន៍ ៕ ប្រភព ៖ TNN World

រដ្ឋធានីកៀវ៖ អ៊ុយក្រែន កំពុងតែបោសសម្អាត អំពើពុករលួយ នៅក្នុងជួរមន្រ្ដីជាន់ខ្ពស់របស់រដ្ឋាភិបាលក្រុងកៀវ ខណៈប្រទេសអឺរ៉ុបខាងកើតមួយនេះ កំំពុងតែធ្វើសង្គ្រាម ទប់ទល់នឹងការឈ្លានពានរបស់រុស្ស៊ី។

សារព័ត៌មាន The Japan Times បានចេញផ្សាយ កាលពីព្រឹក ថ្ងៃចន្ទ ទី១៨ ខែកញ្ញា ថា បច្ចុប្បន្ន លោក វ៉ូឡូឌីមៀ ហ្សេឡែនស្គី (Volodymyr Zelenskyy) ប្រធានាធិបតីអ៊ុយក្រែន កំពុងតែស្ថិតក្រោមសម្ពាធ នៃការប្រយុទ្ធប្រឆាំងនឹងអំពើពុករលួយ។ ជាមួយគ្នានេះ លោកប្រធានាធិបតី បានឆ្លើយតបជាមួយនឹងសំណើដ៏ធ្ងន់មួយ ដោយចាត់ទុកអំពើពុករលួយ នៅក្នុងអំឡុងពេលមានសង្រ្គាម ជាអំពើក្បត់ជាតិ។

លោកប្រធានាធិបតី ហ្សេឡែនស្គី បានបង្កើនសកម្មភាពប្រឆាំងនឹងអំពើពុករលួយ ដោយសារតែមានការព្រួយបារម្ភ អំពីការបាត់បង់ការគាំទ្រពីសម្ពន្ធមិត្តលោកខាងលិច។ ជាមួយគ្នានេះ លោកប្រធានាធិបតី បានបណ្ដេញរដ្ឋមន្ត្រីក្រសួងការពារជាតិរបស់គាត់ ចេញពីតំណែង កាលពីពេលថ្មីៗនេះ បន្ទាប់ពីបានដកមន្ត្រីកំពូលៗជាច្រើនរូប ពាក់ព័ន្ធនឹងការលួចលុយ ឬទទួលសំណូក។

ការអនុវត្តយោធារបស់រុស្ស៊ី បានចោទជាសំណួរកាន់តែខ្លាំងឡើង អំពីអ្វីដែលបានកើតឡើង ចំពោះមនុស្សរាប់សិបលាននាក់ ដែលបានចំណាយលុយ សម្រាប់ទំនើបកម្មវិស័យការពារជាតិ នៅងរយៈពេលជាងមួយទសវត្សរ៍កន្លងមកនេះ។ តើរថក្រោះ Armata មិនអាចចាញ់បានទាំងអស់ ដែលវិមានក្រឹមឡាំង បាននិយាយ អស់រយៈពេលជាច្រើនឆ្នាំ នៅឯណា?

ការស៊ីសំណូក នៅក្នុងការធ្វើពាណិជ្ជកម្មគ្រឿងសព្វាវុធ ជាសាកល ក្លាយជាជំងឺឆ្លង។ បើទោះជាអ៊ុយក្រែន ពិតជាខុសប្លែកពីរុស្ស៊ី លើបញ្ហានេះ។ អ៊ុយក្រែន ពឹងផ្អែកលើសម្ពន្ធមិត្តបរទេស ក៏ដូចជា ការប្រមូលថវិកាពីប្រជាជនក្រីក្របំផុតរបស់អឺរ៉ុប ដើម្បីដាក់ប្រាក់ សម្រាប់ប្រយុទ្ធ ដើម្បីរស់រានមានជីវិត។ នៅក្នុងកាលៈទេសៈបែបនេះ គឺប្រាក់ដែលបាត់បង់ នឹងនាំឱ្យបាត់បង់ជំនឿ និង បាត់បង់ជីវិត ដោយផ្ទាល់។

លោក វ៉ូឡូឌីមៀ ហ្សេឡែនស្គី ប្រធានាធិបតីអ៊ុយក្រែន បានបញ្ជាក់ ថា រដ្ឋាភិបាលក្រុងកៀវ មានកាតព្វកិច្ចចាំបាច់ ត្រូវប្រយុទ្ធប្រឆាំងនឹងអំពើពុករលួយ ដូចជា ប្រទេសអ៊ុយក្រែន ប្រយុទ្ធប្រឆាំងនឹងសង្គ្រាមឈ្លានពានរបស់លោក វ៉្លាឌីមៀ ពូទីន ប្រធានាធិបតីរុស្សី អ៊ីចឹងដែរ៕

ប្រទេសជប៉ុន ៖ នៅឆ្នាំ២០២៣ សារព័ត៌មានរបស់ប្រទេសជប៉ុនឈ្មោះ Kyodo News បានធ្វើការស្ទង់មតិជាមួយអភិបាលខេត្ត និងអាជ្ញាធរមូលដ្ឋានក្នុងខេត្តចំនួន៤៧ នៅទូទាំងប្រទេសជប៉ុនបង្ហាញថា អ្នកឆ្លើយតបការស្ទង់មតិជាង៨៤% ប្រាប់ថា ពួកគេបារម្ភយ៉ាងខ្លាំងចំពោះអនាគតប្រទេសជប៉ុន ដោយសារគ្មានជនជាតិជប៉ុនចូលមកធ្វើការក្នុងឧស្សាហកម្មមួយចំនួន ។

ចំណែកអ្នកឆ្លើយតបការស្ទង់មតិ៣០% ឆ្លើយថា រដ្ឋាភិបាលជប៉ុនគួរតែមានគោលនយោបាយ ឬផ្តល់ដំណឹងអំពីការទទួលយកជនបរទេសមកធ្វើការនៅប្រទេសជប៉ុនកាន់តែច្រើន ។ ដូចគ្នានេះ អ្នកឆ្លើយតបការស្ទង់មតិ៥៦% ទៀតយល់ឃើញថា ការអនុញ្ញាតឱ្យជនបរទេសមកធ្វើការនៅជប៉ុនមានភាពចាំបាច់ ។ ចំណែកអ្នកឆ្លើយតប៨% ទៀតនិយាយថា នៅពុំទាន់ចាំបាច់យកជនបរទេសមកធ្វើការនៅជប៉ុនទេ ។

ការស្ទង់មតិនេះបង្ហាញឱ្យឃើញថា ប្រទេសជប៉ុនកំពុងតែខ្វះខាតអ្នកធ្វើការក្នុងផ្នែកកសិកម្ម និងផ្នែកសំខាន់ៗជាច្រើនទៀតយ៉ាងខ្លាំង ដោយសារបច្ចុប្បន្ន អត្រាកំណើតនៅជប៉ុនធ្លាក់ចុះជាបន្តបន្ទាប់ ។ ផ្ទុយទៅវិញ ជប៉ុនត្រូវប្រឈមមុខនឹងបញ្ហាកំណើនពលរដ្ឋអាយុច្រើន ។

ទន្ទឹមនឹងនេះ គេរំពឹងថា ចំនួនពលរដ្ឋជប៉ុននឹងធ្លាក់ចុះរហូតដល់៣០% ហើយប្រទេសជប៉ុននឹងនៅសល់ពលរដ្ឋត្រឹមតែ៨៧លាននាក់ប៉ុណ្ណោះនៅឆ្នាំ២១០០ ។ លើសពីនេះ ជប៉ុននឹងមានពលរដ្ឋអាយុច្រើនចាប់ពី៦៥ឆ្នាំឡើងទៅរហូតដល់៤០% ៕ ប្រភព ៖ Mono News

ប្រទេសថៃ ៖ នៅថ្ងៃទី១៨ ខែកញ្ញា ឆ្នាំ២០២៣ លោក Peeraphan Saleerathaviphak ឧបនាយករដ្ឋមន្ត្រី និងរដ្ឋមន្ត្រីក្រសួងថាមពលប្រទេសថៃ បានលើកឡើងថា ប្រទេសថៃនឹងធ្វើការពិភាក្សាអំពីការបញ្ចុះតម្លៃប្រេងសាំង ដើម្បីជួយសម្រាលបន្ទុកការចំណាយក្នុងជីវភាពរស់នៅប្រចាំថ្ងៃរបស់ពលរដ្ឋ ។ ដូច្នេះ ក្រសួងថាមពលនឹងព្យាយាមបញ្ចុះតម្លៃប្រេងសាំងសម្រាប់ជាកាដូឆ្នាំថ្មីដល់ពលរដ្ឋថៃគ្រប់រូប ។

លោក Peeraphan Saleerathaviphak រដ្ឋមន្ត្រីក្រសួងថាមពលបន្តថា ជំហានដំបូង យើងនឹងផ្តោតលើក្រុមពលរដ្ឋដែលងាយផលប៉ះពាល់ជាមុនសិន ។ បន្ទាប់មក យើងនឹងជំរុញការពិភាក្សាបន្ទាន់ជាមួយខាងនាយកដ្ឋានអាជីវកម្មថាមពល ។ ដូច្នេះ នៅថ្ងៃទី១៩ ខែកញ្ញា នឹងមានការពិភាក្សាជាមួយនាយកដ្ឋានគយ ។

លោករដ្ឋមន្ត្រីក្រសួងថាមពលថ្លែងថា ៖ «តាមរយៈការជជែកជាមួយស្ថាប័នពាក់ព័ន្ធឃើញថា មានបញ្ហាផ្សេងគ្នារវាងប្រេងឥន្ធនៈ និងអគ្គិសនី ។ ហេតុនេះ ផ្នែកអគ្គិសនីមានគណៈកម្មការផ្សេងៗគ្រប់គ្រង ប៉ុន្តែប្រេងឥន្ធនៈគ្មានការគ្រប់គ្រងទេ ហើយភ្នាក់ងាររដ្ឋ ក៏គ្មានអំណាចត្រួតពិនិត្យរឿងការចំណាយដែរ ។ បើទោះជាការចំណាយដើមទុនបានកើនឡើងក្តី ប៉ុន្តែនៅមិនទាន់ដឹងទេថា ការចំណាយដើមទុនកើនឡើងលើផ្នែកអ្វីខ្លះ ហើយវាកើនឡើងពិតប្រាកដដែរឬទេ ។ ចំណុចនេះ នឹងត្រូវរកដំណោះស្រាយតាមអំណាចភ្នាក់ងាររដ្ឋក្នុងការគ្រប់គ្រងបន្តទៀត» ។

លោកបន្តថា ៖ «ប្រេងឥន្ធនៈ គឺជាទំនិញពិសេសពាក់ព័ន្ធនឹងជីវភាពរស់នៅប្រចាំថ្ងៃរបស់ពលរដ្ឋ ហើយវាពាក់ព័ន្ធនឹងការចំណាយដើមទុនទំនិញផ្សេងៗ ។ លើសពីនេះ វាជារឿងស្ថេរភាពផងដែរ ព្រោះប្រេងឥន្ធនៈជាទំនិញពិសេស និងត្រូវត្រួតពិនិត្យយ៉ាងយកចិត្តទុកដាក់ ព្រមទាំងទទួលបានទិន្នន័យត្រឹមត្រូវជាងនេះ» ។

ចុងក្រោយ លោករដ្ឋមន្ត្រីក្រសួងថាមពលបញ្ជាក់ថា ប្រទេសថៃនឹងបញ្ចុះតម្លៃប្រេងសាំងនៅឆ្នាំ២០២៣ នេះ សម្រាប់ធ្វើជាកាដូឆ្នាំថ្មីដល់ពលរដ្ឋទាំងអស់ ហើយលោកនឹងព្យាយាមធ្វើឱ្យគម្រោងនេះកាន់តែត្រឹមត្រូវ ៕ ប្រភព ៖ khaosod