ប្រទេសជប៉ុន ៖ កាលពីថ្ងៃទី២ ខែវិច្ឆិកា ឆ្នាំ២០២៣ នាយករដ្ឋមន្ត្រីប្រទេសជប៉ុន លោក Fumio Kishida បានប្រកាសអំពីវិធានការជំរុញសេដ្ឋកិច្ចជាតិ និងការឧបត្ថម្ភថវិកាដល់ពលរដ្ឋជប៉ុន ។ ថវិកានេះនឹងគ្របដណ្តប់រហូតដល់ការកាត់បន្ថយពន្ធ និងការចំណាយផ្សេងៗផងដែរ ដោយរដ្ឋាភិបាលនឹងស្វែងរកថវិកាមួយចំនួន តាមរយៈការរៀបចំថវិកាពិសេស ។

សារសំខាន់នៃវិធានការជំរុញសេដ្ឋកិច្ចជាតិលើកនេះ គឺការកាត់បន្ថយពន្ធលើប្រាក់ចំណូល និងពន្ធដីធ្លីសម្រាប់ពលរដ្ឋជប៉ុន ក្នុងម្នាក់ចំនួន៤ម៉ឺនយ៉េន ។ លើសពីនេះ រដ្ឋាភិបាលជប៉ុននឹងចែកប្រាក់ទៅឱ្យពលរដ្ឋមានចំណូលតិចផងដែរ គឺក្នុង១គ្រួសារនឹងទទួលបានប្រាក់ចំនួន៧ម៉ឺនយ៉េន ។

រដ្ឋាភិបាលមានគោលដៅជំរុញការលូតលាស់ផ្នែកសេដ្ឋកិច្ច និងជួយសង្គ្រោះពលរដ្ឋដែលរងផលប៉ះពាល់ដោយសារបញ្ហាអតិផរណា ។ រដ្ឋាភិបាលបានប្រកាសវិធានការនេះ ស្របពេលគណៈកម្មការគ្រប់គ្រងរបស់លោក Fumio Kishida នាយករដ្ឋមន្ត្រីជប៉ុន បានព្យាយាមស្តារនូវទំនុកចិត្តក្នុងចំណោមពលរដ្ឋ បន្ទាប់ពីប្រជាប្រិយភាពរបស់រដ្ឋាភិបាលធ្លាក់ចុះ ។

លោកនាយករដ្ឋមន្ត្រីជប៉ុនថ្លែងថា ៖ «យើងមើលឃើញថា ប្រទេសជប៉ុនមានឱកាសផ្លាស់ប្តូរទៅរកការបោះជំហានទៅមុខផ្នែកសេដ្ឋកិច្ចជាលើកដំបូង ក្នុងរយៈពេល៣០ឆ្នាំ ។ ហេតុនេះ កត្តាសំខាន់ដែលធ្វើឱ្យយើងអាចឈានជើងទៅរកចំណុចនោះបាន គឺការបង្កើនសមត្ថភាពដល់ក្រុមហ៊ុនឯកជនឱ្យមានប្រាក់ចំណូលកើនឡើង ។ ដូច្នេះ ប្រាក់ចំណូលកើនឡើងអាចធ្វើឱ្យក្រុមហ៊ុនទាំងឡាយដំឡើងប្រាក់ខែឱ្យបុគ្គលិកនាពេលអនាគត» ។

វិធានការនេះ គឺជាការព្យាយាមលើកចុងក្រោយរបស់នាយករដ្ឋមន្ត្រីជប៉ុន លោក Fumio Kishida ដើម្បីធ្វើឱ្យពលរដ្ឋមានសិទ្ធិបោះឆ្នោតពេញចិត្តលើរូបលោក ខណៈបច្ចុប្បន្ន ប្រទេសជប៉ុនជួបនឹងបញ្ហាអតិផរណា ។ ទោះយ៉ាងណា គេរំពឹងថា វិធានការជំរុញសេដ្ឋកិច្ចលើកនេះ នឹងធ្វើឱ្យប្រទេសជប៉ុនប្រឈមជាមួយបំណុលកាន់តែខ្ពស់ ៕ ប្រភព ៖ 3Plus NEWS

បរទេស៖ កូរ៉េខាងជើងបាននាំចេញគ្រាប់កាំភ្លើងជាង ១ លានគ្រាប់ទៅកាន់ប្រទេសរុស្ស៊ីកាលពីដើមខែសីហាកន្លងទៅ នេះបើយោងតាមគេហទំព័រ CNN ដែលបានរាយការណ៍នៅថ្ងៃទី១ ខែវិច្ឆិកា។

លោក Yoo Sang-bum ដែលជាសមាជិកសភា និងជាអ្នកស៊ើបការណ៍សម្ងាត់របស់កូរ៉េខាងត្បូង (NIS) បានប្រាប់សារព័ត៌មាននេះថា “គ្រាប់កាំភ្លើងជាង ១ លានរបស់កូរ៉េខាងជើងត្រូវបាននាំចេញទៅកាន់ប្រទេសរុស្ស៊ី ដែលគ្រាប់កាំភ្លើងទាំងនោះអាចប្រើប្រាស់បានជាងពីរខែនៅក្នុងសង្គ្រាមរវាងរុស្ស៊ីនិងអ៊ុយក្រែន”។ លោក Yoo ក៏បានបន្តទៀតថា រោងចក្រផលិតសព្វាវុធរបស់កូរ៉េខាងជើងកំពុងដំណើរការយ៉ាងពេញទំហឹង ដើម្បីបំពេញតម្រូវការរបស់រុស្ស៊ីសម្រាប់ការផ្គត់ផ្គង់យោធា។ ដូច្នេះ NIS ជឿជាក់ថា កូរ៉េខាងជើងបានបញ្ជូនអ្នកជំនាញអាវុធទៅរុស្ស៊ីកាលពីខែតុលា ដើម្បីណែនាំពីរបៀបប្រើប្រាស់អាវុធដែលពួកគេបានផលិត។

NIS ក៏បានព្យាករណ៍ដែរថា រុស្ស៊ីអាចនឹងឆ្លើយតបដោយការផ្ទេរបច្ចេកវិទ្យាមួយចំនួនដើម្បីជួយកូរ៉េខាងជើងបង្កើនសមត្ថភាពយោធារបស់ខ្លួន រួមទាំងកិច្ចខិតខំប្រឹងប្រែងដើម្បីធ្វើឱ្យប្រសើរឡើងនូវកងយន្តហោះចម្បាំងដែលហួសសម័យរបស់ខ្លួន។បច្ចុប្បន្ន កូរ៉េខាងជើង និងរុស្ស៊ីកំពុងពង្រឹងភាពជាដៃគូរបស់ពួកគេ ខណៈដែលជម្លោះរបស់ពួកគេជាមួយសហរដ្ឋអាមេរិកកាន់តែកើនឡើង។ កូរ៉េខាងត្បូង និងអាមេរិកជឿជាក់ថា កូរ៉េខាងជើងអាចផ្តល់គ្រាប់រំសេវដល់រុស្ស៊ី ជាថ្នូរនឹងបច្ចេកវិទ្យាទំនើប ដើម្បីពង្រឹងសមត្ថភាពនុយក្លេអ៊ែរ និងមីស៊ីលរបស់ខ្លួន។

យោងតាម NIS ក៏បានព្យាករណ៍ទៀតថា កូរ៉េខាងជើងទំនងជាទទួលបានការគាំទ្រផ្នែកបច្ចេកវិទ្យាពីរុស្ស៊ី ខណៈដែលខ្លួនកំពុងជំរុញផែនការបាញ់បង្ហោះផ្កាយរណបយោធាដំបូងរបស់ខ្លួន។ បន្ទាប់ពីការបាញ់បង្ហោះផ្កាយរណបបរាជ័យ កូរ៉េខាងជើងមិនអាចដាក់ផ្កាយរណបទៅក្នុងគន្លងតារាវិថីក្នុងខែតុលា ដូចដែលបានប្រកាសពីមុននោះទេ។ ដូច្នេះ NIS ជឿជាក់ថា កូរ៉េខាងជើងកំពុងស្ថិតក្នុងដំណាក់កាលចុងក្រោយនៃការរៀបចំសម្រាប់ការបាញ់បង្ហោះលើកទីបីរបស់ខ្លួន ជាមួយនឹងលទ្ធភាពជោគជ័យខ្ពស់ជាងនេះ។

គួរបញ្ជាក់ដែរថា មេដឹកនាំកូរ៉េខាងជើង លោក គីម ជុងអ៊ុន បានពណ៌នាម្តងហើយម្តងទៀតនូវសមត្ថភាពឈ្លបយកការណ៍តាមលំហអាកាសថាបានដើរតួនាទីយ៉ាងសំខាន់ក្នុងការត្រួតពិនិត្យសកម្មភាពយោធារបស់សហរដ្ឋអាមេរិក និងកូរ៉េខាងត្បូង ក៏ដូចជាការពង្រឹងនុយក្លេអ៊ែររបស់កូរ៉េខាងជើងផងដែរ៕

បរទេស៖ សារមន្ទីរបុរាណវិទ្យានៃ Catalonia ទីក្រុង Barcelona ប្រទេសអេស្ប៉ាញ បានរៀបចំដំណើរទេសចរណ៍រយៈពេល ៩០ នាទីដែលក្នុងនោះអ្នកទស្សនាការតាំងពិពណ៌ត្រូវបានអនុញ្ញាតឱ្យដោះសំលៀកបំពាក់របស់ពួកគេចេញ។
យោងតាមគេហទំព័រ CNN ដែលបានចុះផ្សាយនៅថ្ងៃទី៣០ ខែតុលាថា ការតាំងពិព័រណ៍នេះមានចំណងជើងថា Bronzes of Riace ដែលពណ៌នាអំពីរូបសំណាកសំរឹទ្ធក្រិកដ៏ធំពីរនៃអ្នកចម្បាំងអាក្រាតកាយពីសតវត្សទី ៥ មុនគ.ស នឹងត្រូវបានរកឃើញនៅឆ្នាំ ១៩៧២ ហើយអ្នកចម្បាំងនោះត្រូវបានគេស្គាល់ជាទូទៅថា Riace Warriors ដោយព្រឹត្តិការណ៍នេះមានការគាំទ្រពីក្លឹប Catalan Naturists ។

ដូច្នេះភ្ញៀវទេសចរដែលមកទស្សនាការតាំងពិព័រណ៍នេះគឺតម្រូវឱ្យដោះសំលៀកបំពាក់របស់ពួកគេចេញ ចំណែកឯជាមគ្គុទ្ទេសក៍ទេសចរណ៍នៃការតាំងពិពណ៌នោះគឺលោក Edgard Mestre ក៏ត្រូវដោះសំលៀកបំពាក់ចេញផងដែរ។ លោក Edgard Mestre បាននិយាយថា «យើងចង់ឱ្យវាជាដំណើរកម្សាន្តចម្រុះពណ៌ និងមិនមែនជាដំណើរទេសចរណ៍ដែលមានមគ្គុទ្ទេសក៍ធម្មតានោះទេ។ លោកក៏បានបន្តទៀតថា «យើងចង់ឱ្យអ្នកដែលមកមើលការតាំងពិព័រណ៍នេះមានអារម្មណ៍ថាខ្លួនកំពុងស្ថិតក្នុងហេតុការណ៍ពិតៗ នៃរូបភាពដែលពួកគេកំពុងមើល»។

យោងតាមភ្ញៀវទេសចរម្នាក់ឈ្មោះ Marta វ័យ ៥៩ ឆ្នាំបាននិយាយថា រវាងការស្លៀកពាក់និងមិនស្លៀកសំលៀកបំពាក់នៅពេលមើលការតាំងពិពណ៌គឺពិតជាមានភាពខុសប្លែកគ្នាខ្លាំងណាស់។ ប៉ុន្តែតាមរយៈការតាំងពិពណ៌នេះ Marta យល់កាន់តែច្បាស់ថា គ្មាននរណាម្នាក់ត្រូវខ្មាស់អៀនចំពោះរូបរាងកាយរបស់ពួកគេឡើយ ហើយការអាក្រាតកាយគឺជារឿងដែលជៀសមិនរួចនោះទេ។

គួរបញ្ជាក់ដែរថា សារមន្ទីរបុរាណវិទ្យានៃ Catalonia មានទីតាំងស្ថិតនៅក្នុងឧទ្យាន Montjuïc ដែលជាសួនពណ៌បៃតងរបស់ទីក្រុង Barcelona ប្រទេសអេស្ប៉ាញ។ សារមន្ទីរនេះត្រូវបានបង្កើតឡើងក្នុងឆ្នាំ ១៩៣២ ដោយរដ្ឋាភិបាលក្នុងតំបន់ បានបង្ហាញស្នាដៃពីសម័យបុរេប្រវត្តិរហូតដល់មជ្ឈិមសម័យស្តីពីប្រវត្តិសាស្ត្រនៃតំបន់កាតាឡាន។

ចំពោះថ្លៃចូលទស្សនាវិញគឺ ៦ ដុល្លារអាមេរិកសម្រាប់មនុស្សពេញវ័យ រីឯមនុស្សចាស់ដែលមានអាយុលើសពី ៦៥ ឆ្នាំឡើង ឬមនុស្សចូលនិវត្តន៍ និងនិស្សិតត្រូវបានផ្តល់តម្លៃពិសេស ៤ ដុល្លារអាមេរិក និងឥតគិតថ្លៃសម្រាប់អ្នកអត់ការងារធ្វើ ឬអាយុក្រោម ១៦ ឆ្នាំ។ សម្រាប់ម៉ោងបើកទទួលភ្ញៀវវិញគឺបើកចាប់ពីថ្ងៃអង្គារដល់ថ្ងៃសៅរ៍រៀងរាល់សប្តាហ៍ វេលាម៉ោង ៩:៣០ ព្រឹក ដល់ ៧:០០ យប់៕

នៅក្នុងអំឡុងពេលនៃការរាតត្បាតនៃជំងឺកូវីត១៩ គឺកំពុងតែមានភាពតានតឹងផ្នែកពាណិជ្ជកម្មរវាងសហរដ្ឋអាមេរិកនិងចិន ហើយខណៈពេលនោះផងដែរ វៀតណាមបានវ៉ាដាច់កូរ៉េខាងត្បូងនិងបានក្លាយខ្លួនទៅជាដៃគូពាណិជ្ជកម្មដ៏ធំបំផុតទី៦របស់សហរដ្ឋអាមេរិកនៅឆ្នាំ២០២២។

ការកើនឡើងរបស់វៀតណាមនាពេលនោះគឺបានបង្ហាញឲ្យឃើញពីសារៈសំខាន់មួយនៃសេដ្ឋកិច្ចវៀតណាម ព្រោះវៀតណាមគឺជាអ្នកផ្គង់ផ្គង់ការនាំចូលដ៏ធំបំផុតទៅកាន់ទីផ្សាររបស់សហរដ្ឋអាមេរិក វាមិនមែនជាវាយណភ័ណ្ឌ និងសម្លៀកបំពាក់នោះទេ ប៉ុន្តែគឺការនាំចេញនូវផលិតផលបច្ចេកទេសកម្រិតខ្ពស់។

ចំណែកឯនៅចុងឆ្នាំ២០២៣ ម៉ាកផលិតផលរបស់ Apple ជាច្រើនមុខត្រូវបានប្រមូលផ្តុំនៅក្នុងប្រទេសវៀតណាម។ បន្ថែមពីលើការប្រកួតប្រជែងជាមួយ«រោងចក្រពិភពលោក» របស់ចិន ប្រទេសវៀតណាមក៏មានម៉ាក់យីហោរបស់ខ្លួនឯងផ្ទាល់ដែរក្នុងគោលបំណងជាទិសដៅផលិតកម្មបន្ថែម សម្រាប់ប្រកួតប្រជែងជាមួយចិននៅក្នុងប្រព័ន្ធអេកូសង្វាក់ផ្គត់ផ្គង់ពិភពលោកផងដែរ។ ជាមួយគ្នានោះ វៀតណាមក៏បានដណ្តើមយកទីផ្សារនាំចេញផលិតផលបច្ចេកវិទ្យាមួយចំនួនរបស់ចិន និងបានប្រកាសថាខ្លួនបានទទួលនូវអត្ថប្រយោជន៍ច្រើនបំផុតក្នុងការកាន់កាប់ទីផ្សារផ្តាច់មុខរបស់ចិននិងសហរដ្ឋអាមេរិក។

ម្យ៉ាងវិញទៀត វៀតណាមមានសក្តានុពលខ្លាំងបំផុតដែលបានក្លាយទៅជាប្រទេសនាំចេញនូវទំនិញបច្ចេកវិទ្យាខ្ពស់ដ៏ធំលំដាប់ទី៤លើពិភពលោកបន្ទាប់ពី ចិន តៃវ៉ាន់ និងអាល្លឺម៉ង់។ បើទោះបីជាបច្ចុប្បន្ន វៀតណាមកំពុងកាន់នូវលំដាប់រងទី៧ក៏ដោយក៏ការរីកចម្រើនរបស់ប្រទេសនេះក៏នៅគ្មានគូរប្រជែងដែរ ព្រោះតែទីផ្សារនាំចេញផលិតផលបច្ចេកវិទ្យារបស់វៀតណាមបានវាយលលុករហូតដល់៤២% កើនឡើង១៣%ក្នុងឆ្នាំ២០១៣។

ប៉ុន្តែបើទោះបីជាមានការកើនឡើងនៃការនាំចេញនូវផលិតផលបច្ចេកទេសរបស់វៀតណាមទៅកាន់ពីផ្សារអាមេរិកក៏ដោយ ក៏វៀតណាមមិនទាន់បានបង្កើននូវការកាប់កាប់ទីផ្សារផ្តាច់មុខនៃសេដ្ឋកិច្ច ដែលគេហៅថាខ្លាអាស៊ីនៅឡើយទេ។ ព្រោះការនាំចេញនូវផលិតផលបច្ចេកវិទ្យាទំនើបរបស់វៀតណាមដែលជាកត្តាដែលជម្រុញឲ្យប្រទេសមានការរីកចម្រើនគឺត្រូវពឹងផ្អែកទៅលើរូបធាតុពីបរទេស ដែល៧០%នៃតម្លៃសរុបការនាំចេញទាំងអស់គឺត្រូវចំណាយទៅឲ្យក្រុមហ៊ុនបរទេស។ ម៉្យាងវិញទៀត ចំនួនផលិតផលក្នុងស្រុកសរុបក្នុងម្នាក់ GDP per capita របស់វៀតណាមគឺមានតម្លៃទាបជាងយ៉ាងច្រើនបើប្រៀបធៀបទៅខ្លានៃអាស៊ីដទៃទៀត ព្រោះវៀតណាមជាប្រទេសមានចំណូលមធ្យមកម្រិតទាបនៅឡើយ ក៏អាចដោយសារតែផលិតផលក្នុងស្រុកសរុប និងធនធានមនុស្សដែលមានលទ្ធភាពផលិតនូវផលិតផលទាំងនោះនូវមានកម្រិត ទើបធ្វើឲ្យមានកង្វះខាតកំណើនបច្ចេកវិទ្យា៕

ស្ថាបនិក Miss Grand International លោក Nawat បានហៅ Miss Grand Philippines 2023 កញ្ញា Nikki de Moura ថា “គ្មានវិជ្ជាជីវៈ” ដោយសារតែបេក្ខភាពរូបនេះមិនបានឡើងលើឆាកវិញក្រោយមិនបានចូលTop 20 របស់កម្មវិធីប្រកួត។ មិនត្រឹមតែប៉ុណ្ណោះលោកបាននិយាយថា ហ្វីលីពីន ជ្រើសរើសម្ចាស់មកុដខុស។

បន្ទាប់ពីបវរកញ្ញាតំណាងប្រទេសហ្វីលីពីន មិនបានចូល TOP នៅក្នុងកម្មវិធី MGI 2023
លោក ណាវ៉ាត់ បានទទួលការរិះគន់ពីអ្នកគាំទ្រហ្វីលីពីនយ៉ាងខ្លាំង បន្ទាប់ពី Nikki de Moura បវរកញ្ញាតំណាងប្រទេសមិនបានចូល TOP ក្នុងកម្មវិធីប្រកួតអន្តរជាតិ។ ជាពិសេសចាប់តាំងពីកម្មវិធីបង្កើតឡើងក្នុងឆ្នាំ ២០១៣ គ្មានបេក្ខភាពហ្វីលីពីនណាបានឈ្នះមកុដ Miss Grand International ឡើយ។ ប្រការនេះបានធ្វើឱ្យអ្នកគាំទ្រមួយចំនួនចោទប្រកាន់ថា ការប្រកួតដែលបង្កើតឡើងដោយមហាសេដ្ឋីថៃរូបនេះ ហាក់បីដូចជា “កម្មវិធីធ្វើម្ហូប”។

ការរិះគន់យ៉ាងខ្លាំងពីសំណាក់អ្នកគាំទ្រវិស័យបវរកញ្ញាហ្វីលីពីនជាមួយនឹងការខកចិត្ត បានធ្វើឱ្យលោក ណាវ៉ាត់ Live លើបណ្តាញសង្គមនាពេលថ្មីៗនេះថា Nikki de Moura បានដើរទៅក្រោយឆាកភ្លាមៗ បន្ទាប់ពី Top 20 ត្រូវបានប្រកាសហើយមិនមានឈ្មោះប្រទេសហ្វីលីពីន ហើយបានចាកចេញពីកន្លែងប្រកួត។ នៅក្នុងការ Live នោះលោក ណាវ៉ាត់ បាននិយាយទៀតថា លោកនឹងឱ្យ១លានដុល្លារបើអ្នកបានឃើញនាង វាពិបាកណាស់ដែលធ្វើការជាមួយនាង។

ស្ថាបនិក Miss Grand International រូបនេះបាននិយាយទៀតថា មានមនុស្សច្រើនណាស់ សូម្បីតែសន្តិសុខក៏បានសួរនាំនាងដូចគ្នា ព្រោះយើងបោះទុនច្រើនណាស់ ជិតមួយខែធ្វើរឿងបានល្អ ហាត់ច្រើន យើងចំណាយច្រើន ប៉ុន្តែ Nikki de Moura មិនខ្វល់ពីអ្នកណាទេ នាងចង់ចាកចេញ និងមិនគួរសមចំពោះអ្នករាល់គ្នាដែលនៅជុំវិញនាងដោយរត់ចេញពីកម្មវិធីមិនឡើងលើឆាកបន្ត ខណៈនាយក Miss Grand ហ្វីលីពីន ក៏យល់ស្របឱ្យ Nikki ចាកចេញដូចគ្នា។

«វាពិបាកក្នុងការធ្វើការជាមួយនាង ពិបាកសហការណាស់ រាល់ថ្ងៃរហូតដល់ចប់។ នាងបានធ្វើអ្វីដែលនាងចង់បាន។ នាងមិនយកចិត្តទុកដាក់ចំពោះអ្នកដទៃទេ។ នាងមិនគោរពទេ។ នាងមិនមានការទទួលខុសត្រូវទេ»។ នេះគឺជាសម្តីរបស់លោក ណាវ៉ាត់ និយាយទៅកាន់កញ្ញា Nikki de Moura Miss Grand Philippines 2023។ លើសពីនេះលោកក៏បានលើកឡើងទៀតថាហ្វីលីពីនជ្រើសរើស បវរកញ្ញាខុសដើម្បីយកមកប្រកួតប្រជែងលើឆាកអន្តរជាតិហើយចាប់ពីថ្ងៃដំបូងបវរកញ្ញារូបនេះមានបញ្ហានិងសាងកំហុសច្រើន។

លោក ណាវ៉ាត់ ថា “វាមិនមែនជាកំហុសរបស់ខ្ញុំទេ ហើយបេក្ខភាពរបស់អ្នក(ហ្វីលីពីន) មិនបានជាប់ Top 20 ទេ។ បន្ទាប់ពីប្រកាស Top 20 នាងបានសម្រេចចិត្តដើរចេញ សូម្បីតែនាយករបស់នាងក៏មិនបានបញ្ឈប់នាងដែរ។ ការបង្ហាញខ្លួនបែបនេះធ្វើឱ្យនាងគ្មានវិជ្ជាជីវៈខ្លាំងណាស់»។

គួរបញ្ជាក់ថា មុនលោក ណាវ៉ាត់ Live និយាយពីបេក្ខភាពប្រកួតហ្វីលីពីនគ្មានវិជ្ជាជីវៈនេះកញ្ញា Nikki de Moura ក៏បានបង្ហាញការខកចិត្តនិងឈឺចាប់ពេញបេះដូងដូចគ្នាដែលមិនអាចចូលTOP20 នៅក្នុងកម្មវិធីប្រកួត Miss Grand International 2023 ដែលវៀតណាមធ្វើជាម្ចាស់ផ្ទះកាលពីថ្ងៃទី២៥ តុលា កន្លងទៅនេះ៕