ប្រទេសថៃ ៖ កាលពីថ្ងៃទី១៩ ខែកញ្ញា ឆ្នាំ២០២៣ ស្ថានីយប្រេងឥន្ធនៈ PTT នៅប្រទេសថៃ បានប្រកាសកែសម្រួលតម្លៃប្រេងឥន្ធនៈលក់រាយ ក្នុងនោះតម្លៃប្រេងម៉ាស៊ូតគ្រប់ប្រភេទនឹងធ្លាក់ចុះចំនួន២បាតក្នុង១លីត្រ ។ ហេតុនេះ ធ្វើឱ្យប្រេងម៉ាស៊ូត B7, ប្រេងម៉ាស៊ូត B10 និងប្រេងម៉ាស៊ូត B20 មានតម្លៃត្រឹមតែ២៩.៩៤បាតក្នុង១លីត្រ ចំណែកប្រេងម៉ាស៊ូត Premium B7 មានតម្លៃ៤០.២៤បាតក្នុង១លីត្រ ។ ការបញ្ចុះតម្លៃប្រេងនេះ នឹងអនុវត្តចាប់ពីថ្ងៃទី២០ ខែកញ្ញា ឆ្នាំ២០២៣ តទៅ ហើយប្រេងម៉ាស៊ូតភាគច្រើនមានតម្លៃមិនលើសពី៣០បាតក្នុង១លីត្រ ។

យោងតាមសេចក្តីសម្រេចរបស់គណៈរដ្ឋមន្ត្រីថៃ ចុះថ្ងៃទី១៣ ខែកញ្ញា ឆ្នាំ២០២៣ បង្ហាញថា ដើម្បីសម្រាលបន្ទុកការចាយវាយក្នុងជីវភាពប្រចាំថ្ងៃរបស់ពលរដ្ឋថៃ និងផ្អែកតាមក្រសួងថាមពលស្នើឱ្យប្រើប្រាស់យន្តការពន្ធអាករ និងគ្រប់គ្រងតម្លៃប្រេងឥន្ធនៈ ក្នុងគោលបំណងរក្សាតម្លៃប្រេងម៉ាស៊ូតមិនឱ្យលើសពី៣០បាតក្នុង១លីត្រ ។ ដូច្នេះ តម្លៃលក់រាយប្រេងម៉ាស៊ូតនៅតាមស្ថានីយប្រេងឥន្ធនៈនីមួយៗ គឺស្មើនឹង២៩.៩៤បាតក្នុង១លីត្រ គិតចាប់ពីថ្ងៃទី២០ ខែកញ្ញា រហូតដល់ថ្ងៃទី៣១ ខែធ្នូ ឆ្នាំ២០២៣ ។

ការបញ្ចុះតម្លៃប្រេងម៉ាស៊ូតនេះ គឺលើកលែងប្រេងសាំង និងហ្គាសគ្រប់ប្រភេទ ព្រមទាំងប្រេងឥន្ធនៈ Premium ប្រភេទ GSH95 នៅរក្សាតម្លៃដើម រួមមាន ៖
-ប្រេងសាំងធម្មតា ស្មើនឹង ៤៨.២៤បាតក្នុង១លីត្រ
-Gasohol 95 ស្មើនឹង ៤០.៤៥បាតក្នុង១លីត្រ
-Gasohol 91 ស្មើនឹង ៤០.១៨បាតក្នុង១លីត្រ
-E20 ស្មើនឹង ៣៨.១៤បាតក្នុង១លីត្រ
-Premium Gasohol 95 ស្មើនឹង ៤៥.៤៤បាតក្នុង១លីត្រ
-E85 ស្មើនឹង ៣៧.៧៩បាតក្នុង១លីត្រ ៕

ប្រភព ៖ khaosod

ប្រទេសចិន៖ មន្ត្រីចិនបានប្រកាសពីការចាប់ក្រពើជាង ៧០ ក្បាល ដែលបានរត់ចេញពីកសិដ្ឋានក្នុងទីក្រុង Maoming អំឡុងពេលទឹកជំនន់កាលពីសប្តាហ៍មុន។

យោងតាមសារព័ត៌មាន Beijing News ដែលបានរាយការណ៍នៅថ្ងៃទី ១៩ ខែកញ្ញាថា “ក្រពើដែលរត់គេចខ្លួនត្រូវបានចាប់មកវិញទាំងអស់ហើយ” ។ សារព័ត៌មាន Beijing News ក៏បានបង្ហោះវីដេអូមួយដែលបង្ហាញពីសត្វក្រពើរាប់សិបក្បាលត្រូវបានចងដោយក្រណាត់ និងខ្សែពួរ។ ក្នុងចំណោមក្រពើជាង ៧០ ក្បាលដែលបានរត់ចេញពីកសិដ្ឋានក្នុងទីក្រុង Maoming ខេត្ត Guangdong មានក្រពើពេញវ័យចំនួន ៦៩ ក្បាល និងកូនក្រពើចំនួន ២ ក្បាល។

សត្វក្រពើបានរត់គេចខ្លួនមួយសប្តាហ៍មុននេះ ក្នុងអំឡុងពេលមានព្យុះ និងទឹកជំនន់ដែលបានបោកបក់ពេញតំបន់នោះ។ បន្ទាប់មកមន្ត្រីខេត្តក្វាងទុងបានបើកយុទ្ធនាការស្វែងរកសត្វក្រពើទ្រង់ទ្រាយធំយ៉ាងឆាប់រហ័ស។ កម្លាំងចាប់ក្រពើត្រូវប្រើឧបករណ៍សូណាដើម្បីស្វែងរកសត្វ ប៉ុន្តែជួបការលំបាកដោយសារទឹកឡើងខ្លាំងពេក។ អាជ្ញាធរមូលដ្ឋានក៏បានដាស់តឿនប្រជាពលរដ្ឋកុំឱ្យចាកចេញពីផ្ទះដើម្បីធានាសុវត្ថិភាព។

ក្រពើត្រូវបានចិញ្ចឹមនៅក្នុងប្រទេសចិន សម្រាប់ស្បែក និងសាច់ ហើយជួនកាលត្រូវបានគេប្រើក្នុងឱសថបុរាណ។ យោងតាមវិទ្យុជាតិចិន តំបន់ដែលរងផលប៉ះពាល់ដោយទឹកជំនន់កាលពីដើមខែនេះក៏ជាជម្រករបស់ “សួនសត្វក្រពើ” និង “កសិដ្ឋានចិញ្ចឹមក្រពើដ៏ធំបំផុតរបស់ប្រទេស”ផងដែរ៕
ប្រភព៖vnexpress

ប្រទេសថៃ ៖ លោក Settha Thaweesin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុបានផ្តល់សម្ភាសន៍ទៅកាន់ក្រុមសារព័ត៌មាន ក្នុងអំឡុងពេលលោកធ្វើដំណើរទៅចូលរួមកិច្ចប្រជុំមហាសន្និបាតអង្គការសហប្រជាជាតិ លើកទី៧៨ នៅទីក្រុងញូវយ៉ក សហរដ្ឋអាមេរិក ពាក់ព័ន្ធនឹងការទាក់ទាញវិនិយោគិនបរទេសឱ្យមកវិនិយោគទុននៅប្រទេសថៃ ។

លោក Settha Thaweesin នាយករដ្ឋមន្ត្រីលើកឡើងថា រដ្ឋាភិបាលថៃនឹងត្រៀមទាក់ទាញវិនិយោគិនបរទេសឱ្យចូលមកវិនិយោគនៅប្រទេសថៃ តាមរយៈការជួបជាមួយនាយកគ្រប់គ្រងជាន់ខ្ពស់របស់ក្រុមហ៊ុននាំមុខនៅក្រៅប្រទេស រួមមាន Microsoft, Google, Estee Lauder និង Tesla ។ ចុងក្រោយ លោក Elon Musk ជា CEO របស់ក្រុមហ៊ុន Tesla បានយល់ព្រមជជែកពិភាក្សាជាមួយមន្ត្រីរដ្ឋាភិបាលថៃរួចហើយ ។ ដូច្នេះ ភាគីទាំងពីរនឹងធ្វើការជជែកគ្នាតាមរយៈ Video Conference ។

ក្រៅពីនេះ នៅមាននាយកគ្រប់គ្រងក្រុមហ៊ុនឯកជនធំៗផ្សេងទៀត ក៏បានយល់ព្រមជជែកពិភាក្សាជាមួយមន្ត្រីរដ្ឋាភិបាលថៃផងដែរ ដូចជា ក្រុមហ៊ុន Microsoft, Citibank, Global ZAC, BlackRock, J.P. Morgan និង Estee Lauder ។ ការជជែកពិភាក្សាគ្នាលើកនេះ គឺជាការបង្ហាញថា ថៃជាប្រទេសមួយដែលវិនិយោគិនបរទេសចាប់អារម្មណ៍វិនិយោគ ហើយនាយករដ្ឋមន្ត្រីថៃតាំងចិត្តថា នឹងបង្ហាញពីចំណុចទាក់ទាញដ៏ខ្លាំងរបស់ប្រទេសថៃ គឺវិស័យសុខាភិបាលមានគុណភាព ។

ចំពោះកិច្ចប្រជុំមហាសន្និបាតអង្គការសហប្រជាជាតិ លើកទី៧៨ លោក Settha Thaweesin នាយករដ្ឋមន្ត្រីលើកឡើងថា លោកនឹងលើកឡើងពីគោលនយោបាយអភិវឌ្ឍន៍ប្រកបដោយចីរភាព (Sustainability) និងបម្រែបម្រួលអាកាសធាតុ (Climate Change) រួមទាំងការចេញមូលបត្របំណុលផងដែរ ជាពិសេស ទាក់ទងនឹងបរិស្ថាន ។ ហេតុនេះ ប្រទេសថៃបានដាក់គោលដៅការវិនិយោគទុនស្មើនឹងទឹកប្រាក់៧ម៉ឺនលានបាត ៕ ប្រភព ៖ beartaiBRIEF

ប្រទេសប៉ូឡូញ ៖ ក្រុមហ៊ុនផលិតភេសជ្ជៈនៅប្រទេសប៉ូឡូញបានប្រើប្រាស់មនុស្សយន្ត ដែលដំណើរការដោយបញ្ញាសិប្បនិម្មិត និងគំរូភាសាស្រដៀងគ្នានឹងកម្មវិធី ChatGPT មកបំពេញតួនាទីជានាយកប្រតិបត្តិសាកល្បង ។ មនុស្សយន្តនេះនឹងជួយគ្រប់គ្រងការងារដូចនាយកគ្រប់គ្រងជាមនុស្សដែរ រួមទាំងជួយកំណត់ទិសដៅការងារដល់បុគ្គលិកជាមនុស្សទៀតផង ។

ក្រុមហ៊ុនរបស់ហុងកុងបានផលិតមនុស្សយន្តនេះជាប្រភេទ Humanoid និងបានដាក់ឈ្មោះថា នាង Mika ។ ពួកគេបានបំពាក់នូវគំរូភាសាដ៏ធំមួយឈ្មោះថា Large Language Model (LLM) ដោយនាង Mika អាចសន្ទនាគ្នាស្រដៀងនឹងភាសារបស់មនុស្សដែរ ។ ប៉ុន្តែនាង Mika គ្រាន់តែជាអ្នកកាន់តំណែងជាន់ខ្ពស់ម្នាក់ ដែលបំពេញតួនាទីមួយចំនួនរបស់ CEO ពិតប្រាកដប៉ុណ្ណោះ ។ នាងបានបំពេញតួនាទីដូចជា ការវិភាគទិន្នន័យទីផ្សារ, ជ្រើសរើសអ្នកតំណាងជួយរចនាផលិតផល និងដាក់ផែនការយុទ្ធសាស្ត្រផ្នែកលក់ ។

ទោះយ៉ាងណា នាង Mika គ្មានតួនាទី ឬអំណាចទទួលយកបុគ្គលិកមកធ្វើការ ឬបណ្តេញបុគ្គលិកចេញពីក្រុមហ៊ុនទេ ព្រោះក្នុងផ្នែកនេះ វាជាអំណាចនៃការសម្រេចចិត្តរបស់មនុស្ស ។ ក្នុងឋានៈនាងជាមនុស្សយន្តឆ្លាតវៃ នាងនិយាយថា នាងមានគុណសម្បត្តិច្រើនជាងមនុស្ស ដូចជា នាងអាចសម្រេចចិត្តដោយមិនលម្អៀងលើការវិភាគទិន្នន័យ ហើយនាងអាចធ្វើការបាន២៤ម៉ោងទៀតផង ។

ចំណែកលោក Marek Szoldrowski ជានាយកប្រតិបត្តិពិតប្រាកដរបស់ក្រុមហ៊ុនលើកឡើងថា លោកចង់បង្ហាញថា នៅថ្ងៃអនាគត AI នឹងមានតួនាទីក្នុងក្រុមហ៊ុនអាជីវកម្មបែបណាខ្លះ ។ នៅពេលគេបានឃើញមនុស្សយន្តនាង Mika អាចធ្វើការជានាយកប្រតិបត្តិក្រុមហ៊ុន គឺគេមិនអាចបដិសេធអំពីបច្ចេកវិទ្យារីកចម្រើនបានទេ ។ ប៉ុន្តែយើងអាចសម្របខ្លួន និងរស់នៅជាមួយវាឱ្យបាន ព្រមទាំងប្រើប្រាស់វាឱ្យមានតម្លៃបំផុត ។ ដូច្នេះ វានឹងផ្តល់ផលប្រយោជន៍យ៉ាងច្រើនសម្រាប់គ្រប់វិស័យទាំងអស់ ៕ ប្រភព ៖ chiangmai news

ពិតណាស់ នៅក្នុងសង្គមបច្ចុប្បន្ននេះមនុស្សប្រុសវ័យក្មេងជាច្រើន គឺតែងតែចូលចិត្ត មានទំនាក់ទំនងស្នេហា ជាមួយនឹងមនុស្សស្រី ដែលមានវ័យចំណាស់ជាងខ្លួន ហើយវាក៏ជាចម្ងល់មួយ ដែលមនុស្សមួយចំនួន តែងតែឆ្ងល់ថា ហេតុអ្វីបានជាមនុស្សប្រុសតែងតែស្រលាញ់មនុស្សស្រីចាស់ជាងខ្លួន? ដូច្នេះហើយ ខាងក្រោមនេះគឺជាមូលហេតុ ៤ យ៉ាងដែលធ្វើឱ្យមនុស្សប្រុសវ័យក្មេង ចូលចិត្តមានទំនាក់ទំនងស្នេហាជាមួយនឹងមនុស្សស្រីវ័យចំណាស់៖

១.មានគំនិតចាស់ទុំ៖ មនុស្សស្រីកាន់តែចាស់ កាន់តែខ្លាំង និងមិនចេះតែធ្វើអ្វីតាមអារម្មណ៍ដូចមនុស្សស្រីវ័យក្មេងនោះទេ ហេតុនេះហើយ ទើបធ្វើឱ្យមនុស្សប្រុសវ័យក្មេង ភាគច្រើនតែងតែចូលចិត្តមានទំនាក់ទំនងស្នេហាជាមួយនឹងមនុស្សស្រីដែលមានវ័យចំណាស់ជាងខ្លួន ព្រោះពួកគេគិតថា មនុស្សស្រីដែលមាន គំនិតចាស់ទុំ គឺនឹងមិនបន្ថែមសម្ពាធ និងរករឿងគេច្រើនដូចមនុស្សស្រីដែលមានគំនិតក្មេងខ្ចីនោះទេ។

២.មានភាពជឿជាក់៖ មនុស្សស្រីដែលមានវ័យចំណាស់ភាគច្រើនតែងតែជាមនុស្សស្រី ដែលមានទំនុកចិត្ត និងភាពជឿជាក់លើខ្លួនឯងជានិច្ច ដែលវាគឺជាភាពទាក់ទាញមួយដល់មនុស្សប្រុសគ្រប់វ័យ ជាពិសេសគឺមនុស្សប្រុសវ័យក្មេង លង់ចិត្តស្រលាញ់ដោយមិនគិតពីវ័យ និងថែមទាំងចង់បានយកមកធ្វើជាគូជីវិតទៀតផង។

៣.មានបទពិសោធន៍ជីវិតច្រើន៖ មនុស្សស្រីដែលមានវ័យកាន់ច្រើនប្រាកដជាបានឆ្លងកាត់នូវរឿងរ៉ាវជាច្រើននៅក្នុងជីវិត ជាងមនុស្សប្រុសដែលមានវ័យក្មេងហេតុនេះហើយ បានជាមនុស្សប្រុស ចូលចិត្តចង់មានទំនាក់ទំនងជាមួយនឹងមនុស្សស្រីដែលមានវ័យចំណាស់ព្រោះមនុស្សស្រីវ័យចំណាស់ អាចក្លាយទៅជាទីប្រឹក្សាដល់ល្អម្នាក់សម្រាប់ពួកគេនាពេលអនាគត។

៤.មានភាពឯករាជ្យនៅក្នុងខ្លួន៖ មនុស្សស្រីវ័យចំណាស់តែងតែជាមនុស្សស្រី ដែលមានភាពឯករាជ្យនៅក្នុងខ្លួន និងចេះធ្វើអ្វីៗដោយខ្លួនឯង ដោយមិនចាំបាច់ពឹងពាក់អ្នកដទៃឡើយ។ ជាងនេះទៅទៀត មនុស្សស្រីវ័យចំណាស់ ក៏អាចមានសមត្ថភាពរកលុយចិញ្ចឹមជីវិតខ្លួនឯងបានយ៉ាងងាយស្រួលដោយមិនចាំបាច់ត្រូវការលុយពីមនុស្សប្រុសឡើយ។ ហេតុនេះហើយ បានជាភាពឯករាជ្យ របស់មនុស្សស្រីវ័យចំណាស់ អាចធ្វើឱ្យមនុស្សប្រុសវ័យក្មេង ចង់បានយកមកធ្វើជាគូអនាគតរបស់ពួកគេ បើទោះបីជាមានវ័យខុសគ្នាច្រើនក៏ដោយ៕
ប្រភព៖sanook

Icon Of The Seas គឺជាកប៉ាល់ដ៏ធំបំផុតរបស់ពិភពលោក ដែលគ្រោងនឹងដាក់ឱ្យដំណើរការនៅ ខែមករា ឆ្នាំ២០២៤ ខាងមុខនេះ។

កប៉ាល់នេះ នឹងក្លាយជាកប៉ាល់ទេសចរណ៍ដ៏ធំបំផុតរបស់ពិភពលោក ដែលត្រូវបានទទួលសិទ្ធផលិតដោយក្រុមហ៊ុន Royal Caribbean International។ Icon Of The Seas មានប្រវែង៣៦៥ ម៉ែត្រ ហើយមានទម្ងន់ប្រហែល ២៥០ ៨០០ តោន ធ្ងន់ជាងទីតានិច ៥ដង ខណៈដែលកប៉ាល់ទីតានិចមានទម្ងន់ត្រឹមតែ ៥០ ២១០ តោនប៉ុណ្ណោះ។កប៉ាល់នេះ មានសមត្ថភាពផ្ទុកអ្នកដំណើរបាន ៥៦១០ នាក់ សមាជិកនាវិក ២៣៥០ នាក់ និងមានកម្ពស់ដល់ទៅ២០ជាន់។

សូមបញ្ជាក់ផងដែរថា ការជិះកប៉ាល់ Icon Of The Seas នឹងចេញដំណើរលើកដំបូងរបស់ខ្លួនជាផ្លូវការនៅថ្ងៃទី២៧ ខែមករា ឆ្នាំ២០២៤ នៅMiami រដ្ឋFlorida ដោយចំណាយពេល ៨ ថ្ងៃ ៧ យប់ និងតម្លៃ២១៥៣ក្នុងម្នាក់៕

ប្រភព៖ Royal Caribbean