បន្ទាប់ពីបង្ហោះនៅលើហ្វេសប៊ុកបង្ហាញពីលទ្ធផលដែលបេក្ខនារី លឹម សេរីហាន់នីកា មិនអាចឈ្នះ Vote ទាំងដែលនៅក្នុងក្រុមរបស់ Coach សោភា នីកាមានសំឡេងល្អជាង ធ្វើបានល្អជាងទទួលបានសរសើរពីមហាជន និងគ្រូបង្វឹកទាំង៤ តារាសម្តែង ឆឹម សក្កដា ត្រូវអ្នកលេងបណ្តាញសង្គមបញ្ចេញមតិវែកញែកយ៉ាងចាស់ដៃថាមានភាពលំអៀងទៅលើបេក្ខជន ស៊ុន វេហា និងមានអ្នកលើកឡើងប្រយ័ត្នបែកធ្លាយរូបភាពលើ Twitter រហូតតារាសម្តែងរូបនេះតបទៅវិញមិនសំចៃ។

នៅលើផេករបស់លោក ឆឹម សក្កដា នាយប់ថ្ងៃទី១៩ កញ្ញា លោកបានបង្ហោះរូបភាពបេក្ខនារី The Voice លឹម សេរីហាន់នីកា ដោយភ្ជាប់ជាមួយខ្លឹមសារថា«មហាជនជាច្រើនកំពុងតែឆ្ងល់ និងកំពុងតែវែកញែកថាហេតុអ្វីនីកាមិនអាចឈ្នះ Vote ទាំងដែលនៅក្នុងក្រុម របស់ Coach សោភា គឺនីកាមានសំឡេងល្អជាង ធ្វើបានល្អជាង ទទួលបានសរសើរពីមហាជន និងគ្រូបង្វឹកទាំង៤ខ្លាំងជាងហើយបើនិយាយពីប្រជាប្រិយភាពតាមហ្វេសប៊ុក យូធូប និងទិកតុកក៏មានអ្នកគាំទ្រច្រើនជាង ជាពិសេសត្រូវបាន ជាប់Best of the voice ២សប្ដាហ៍ផ្ទួនគ្នា។ តើមានអ្វីទេបានជាបែបនេះ? ខ្ញុំក៏មិនដឹងដែរ! តែបើសិនជាអ្នកទាំងអស់គ្នាគាំទ្រក្មេងស្រីម្នាក់នេះ ជួយបោះឆ្នោតគាំទ្រនាងផង កុំឱ្យដល់ពេលនាងចាកចេញទើបផ្ទុះការវែកញែក បែបនេះបែបនោះ គ្រប់យ៉ាងគឺវ៉ូត បើចង់ឱ្យនីកាទៅវគ្គផ្ដាច់ព្រ័ត្រជួយ Vote ឱ្យនាងផង»។

ការបង្ហោះរបស់លោក សក្កដា ខាងលើនេះអ្នកលេងបណ្តាញសង្គមបានបង្ហាញការមិនពេញចិត្តច្រើនព្រមទាំងបញ្ចេញមតិថា«វាជាចិត្តរបស់គេ គេស្រលាញ់គាំទ្រអ្នកណានោះប្រាកដជា Vote ឱ្យអ្នកនោះហើយ ពុំអាចបង្ខំបានទេ។,តាមការជាក់ស្តែង នីកា ត្រូវឆ្លងផុតវគ្គ Semi Final ដល់វគ្គ Final បើនីកា ធ្លាក់វគ្គ Semi Final ចាត់ទុកថាកម្មវិធី នេះប្រលងរើសប្រជាប្រិយ», មនុស្សយើងចិត្តមិនដូចគ្នាទេបើគេស្រលាញ់អ្នកណាគេបោះឱ្យអ្នកនឹងហើយយ។ ឃ្លានេះដែរលោក សក្កដា បានតបវិញថា «ត្រូវហើយគ្រាន់តែប្រាប់អ្នកស្រលាញ់នីកា ឱ្យជួយវ៉ូតអោយគាត់តែប៉ុណ្ណោះ មិនបានបង្ខំអ្នកមិនស្រលាញ់វ៉ូតឱ្យទេគាំទ្រនរណា វ៉ូតឱ្យអ្នកនោះចុះ»។

អ្នកផ្សេងទៀតបានលើកឡើងទៀតថា«នៅសល់តែពីរនាក់ហើយបងផុសចឹងដូចលំអៀងពេកហើយ, អយុត្តិធម៌ចំពោះវេហាពេកហើយពូដាអើយកូនក្រុមចែភាដូចគ្នាតើ ម្នាក់ណាដល់វគ្គផ្ដាច់ព័្រត្រក៏បានដែរម៉េចលើកតែនីកាមកផុសរហូតចឹងពូអត់ដែលឃើញពូផុសវេហាសោះ» ពាក្យសម្តីនេះ តារាសម្តែង ឆឹម សក្កដា តបវិញថា «មើលគ្រប់ផុសនៅ?»ហើយម្ចាស់គណនីនោះបានតបវិញថា «ពូគួរផុសតំណាលគ្នាមិនមែនដល់គេcmtគ្រប់គ្នាពីវេហា ទើបពូផុសតាមក្រោយទេ នីកា វេហា ខ្ញុំគាំទ្រដូចគ្នាទេ ហើយរិតតែគាំទ្រចែភាទៀតផង
(ខ្ញុំមិនមែនហ្វេនគាត់ទាំងពីរទេ)តែពូដាជាគូស្នេហ៍បងភាហើយមកផុសចឹងៗអីមិនសមសោះ»។

មានគណនីមួយទៀតបានដាក់ចំទៅលោក ឆឹម សក្កដា ថា «សម្តែងដឹងសម្តែង ប្រយ័ត្នបែកធ្លាយរូបលើ Twitter ណាវែកញែកនឹងស្មានតែ១ប្រទេសស្រុកខ្មែរគេហ្វេននីកាទាំងអស់មែន» ។ ឃ្លានេះដែរធ្វើឱ្យតារាសម្តែងរូបនេះក្តៅស្លឹកត្រចៀកបានតបវិញដែរថា «លោកឯងហ្វេនអ្នកណាជាសិទ្ធលោក ខ្ញុំហ្វេនអ្នកណាជាសិទ្ធរបស់ខ្ញុំតើ ហើយខ្ញុំគ្រាន់តែប្រាប់ដល់អ្នកគាំទ្រនរណាវ៉ូតឱ្យអ្នកនោះចុះ ម៉េចលោកឯងនិយាយភាសារបែបនេះ មានសិទ្ធតែពួកលោកឯងមែន?,រកស៊ីឱ្យដឹងរកស៊ី កុំមាត់ បៀមប្រហុកប្រយ័ត្នដេកគុកខានរកស៊ី»៕

យោងតាមការចេញផ្សាយរបស់ក្រសួងរ៉ែ និងថាមពល បានឱ្យដឹងថា ក្រសួងនឹងធ្វើការបញ្ចុះថ្លៃអគ្គីសនីចំពោះអ្នកប្រើប្រាស់ប្រភេទឧស្សាហកម្ម និងកសិកម្ម ក្នុងគោលដៅជំរុញការពង្រីកផលិតកម្មនាងចក្រ និងសហគ្រាស ផ្នែកឧស្សាហកម្ម និងផ្នែកកសិកម្ម ដើម្បីបង្កើតការងារ និងប្រាក់ចំណូលជូនប្រជាពលរដ្ឋ រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ សម្ដបមហាបតធិបតី ហ៊ុន មាណែត នាយករដ្ឋមន្ត្រី នៃព្រះរាជាណាចក្រកម្ពុជា។ក្រសួងរ៉ែ និងថាមពល អគ្គីសនីកម្ពុជា និងអាជ្ញាធរអគ្គិសនីកម្ពុជា នឹងធ្វើការបញ្ចុះថ្លៃអគ្គិសនីចំពោះបរិមាណអគ្គិសនី ដែលអ្នកប្រើប្រាស់ប្រភេទឧស្សាហកម្ម និងកសិកម្ម ដែលភ្ជាប់ពីបណ្តាញតង់ស្យុងមធ្យម និងតង់ស្យុងខ្ពស់ ក្នុងក្របខណ្ឌទូទាំងប្រទេស ដែលមមានអ្នកប្រើប្រាស់អគ្គិសនីតាមអត្រាថ្លៃមធ្យម អ្នកប្រើប្រាស់អគ្គិសនីតាម ពេលវេលានិងអានុភាព និងអ្នកប្រើប្រាស់អគ្គិសនីដែលមានដំឡើងប្រព័ន្ធពន្លឺព្រះអាទិត្យដែលភ្ជាប់ជាមួយបណ្តាញជាតិ បានប្រើប្រាស់លើសពីមធ្យមភាគប្រចាំខែនៃការប្រើប្រាស់ ៦ខែចុងក្រោយ ទៅតាមលក្ខខណ្ឌដូចខាងក្រោម៖

• បញ្ចុះអត្រាថ្លៃចំនួន ១០% សម្រាប់បរិមាណថាមពលដែលប្រើប្រាស់លើសមធ្យមភាគប្រចាំខែ ពីថ្ងៃចន្ទ ដល់ថ្ងៃសៅរ៍ ចន្លោះម៉ោងពី ៧ ព្រឹក ដល់ម៉ោង ៩ យប់
• បញ្ចុះអត្រាថ្លៃចំនួន ២០% សម្រាប់បរិមាណថាមពលដែលប្រើប្រាស់លើសមធ្យមភាគប្រចាំខែ ពីថ្ងៃចន្ទ ដល់ថៃ្ងសៅរ៍ ចន្លោះម៉ោងពី ៩ យប់ ដល់ម៉ោង ៧ ព្រឹក និង ២៤ ម៉ោង សម្រាប់ថ្ងៃអាទិត្យ និងថ្ងៃបុណ្យជាតិ
• រយៈពេលអនុគ្រោះផ្លែដើម្បីលើកទឹកចិត្តឱ្យបង្កើនការប្រើប្រាស់ខាងលើ មានរយៈពេល ៣ខែ ចាប់ពី ខែតុលា ដល់ខែធ្នូ ឆ្នាំ២០២៣ និងអាចពិនិត្យបន្តតាមរយៈការជូនដំណឹងមុន ៣០ ថ្ងៃ តាមលទ្ធភាព ជាក់ស្តែងរបស់អគ្គិសនីកម្ពុជា
• អតិថិជនអ្នកប្រើប្រាស់អគ្គិសនីប្រភេទឧស្សាហកម្ម និងកសិកម្ម ភ្ជាប់ពីបណ្តាញតង់ស្យុងមធ្យម និង តង់ស្យុងខ្ពស់ ដែលយល់ថាខ្លួនមានលទ្ធភាពបង្កើនការប្រើប្រាស់ និងមានបំណងទទួលបានការអនុគ្រោះ ថ្លៃនេះ ត្រូវធ្វើការដាក់ពាក្យស្នើសុំទៅអ្នកផ្គត់ផ្គង់អគ្គិសនីក្នុងតំបន់របស់ខ្លួន។
• ការផ្តល់ថ្លៃអនុគ្រោះនេះ មិនសំដៅទៅលើស្ថាប័នរដ្ឋ ផ្នែកពាណិជ្ជកម្ម និងលំនៅឋាននោះទេ ដោយអ្នក ប្រើប្រាស់ក្នុងជំពូកនេះ កំពុងត្រូវបានអគ្គិសនីកម្ពុជា និងរាជរដ្ឋាភិបាលកម្ពុជា ជួយឧបត្ថម្ភធនរួចហើយ៕

ក្រសួងវប្បធម៌ និងវិចិត្រសិល្បៈនាថ្ងៃទី២០ ខែកញ្ញា បានបង្ហាញជាសាធារណៈលក្ខណៈវិនិច្ឆ័យនៃតម្លៃលេចធ្លោជាសកលរបស់ «រមណីយដ្ឋានប្រាសាទកោះកេរ» ដែលត្រូវបានចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូ។
នៅក្នុងកិច្ចប្រជុំលើកទី៤៥ នាថ្ងៃទី១៧ ខែកញ្ញា ឆ្នាំ២០២៣ នៅទីក្រុងរីយ៉ាដ ប្រទេសអារ៉ាប៊ីសាអូឌីត (Saudia Arabia) គណៈកម្មាធិការបេតិកភណ្ឌពិភពលោកបានសម្រេចជាឯកច្ឆន្ទចុះ “រមណីយដ្ឋាន- ប្រាសាទកោះកេរ ក្នុងបញ្ជីបេតិកភណ្ឌពិភពលោកនៃអង្គការយូណេស្កូ ដោយផ្អែកលើលក្ខណៈវិនិច្ឆ័យចំនួនពីរ ដែលមានចែងក្នុងគោលការណ៍ណែនាំប្រតិបត្តិនៃ អនុសញ្ញាឆ្នាំ១៩៧២ រួមមាន៖

– លក្ខណៈវិនិច្ឆ័យទី ២ (Criteria ii) ៖ រមណីយដ្ឋានបុរាណវិទ្យាកោះកេរ បង្ហាញក្នុងលក្ខណៈ ដ៏វិសេសវិសាលមួយនូវចំណុចគួបប្រសព្វរវាងតម្លៃមនុស្សដែលបង្កើតបានជារចនាបថកោះកេរ ដែលក្នុងនោះក្បាច់ចម្លាក់បដិមាបង្ហាញពីភាពក្លាហាន រូបភាពបង្កប់នូវការស្រមៃ និងវិញ្ញាណរស់រវើកអំពីចលនារបស់ក្បាច់ចម្លាក់ដែលកើតចេញពីការបញ្ចូលគ្នានៃនិមិត្ដរូបសាសនា និងសិល្បៈ របស់ឥណ្ឌា ជាមួយគោលគំនិតរចនាក្នុងស្រុក និងសិល្បៈហត្ថកម្ម។ ទោះបីត្រូវបានបង្កើតឡើងក្នុងរយៈពេលដ៏ខ្លីត្រឹមតែ២៣ឆ្នាំក្នុងសតវត្សទី១០ក៏ដោយក៏រចនាបថកោះកេរបានជះឥទ្ធិពល យូរអង្វែងទៅលើការបញ្ចេញទឹកដៃសិល្បៈ នៅក្នុងសម័យកាលក្រោយៗមកទៀតនៃអាណាចក្រខ្មែរ និងនៅតាមបណ្តាប្រទេសអាស៊ីអាគ្នេយ៍ផ្សេងទៀត។– លក្ខណៈវិនិច្ឆ័យទី ៤ (Criteria iv) រមណីយដ្ឋានបុរាណវិទ្យាកោះកេរ គឺជាគំរូដើមស្ដីពីដែនទេសភាពទីក្រុងថ្មីដែលមានសំណង់អគារធំៗ ដោយសារការប្រើប្រាស់ផ្ទាំងថ្មដុំធំៗដ៏ច្រើន សន្ធឹកសន្ធាប់នៅក្នុងការសាងសង់ និងការឆ្លាក់ក្បាច់និងបដិមា។ គំរូដើមនេះបានសម្ភោធឡើង នូវសម័យកាលនៃការសាងសង់ប្រាសាទថ្មអស់ជាច្រើនសតវត្សនៅទូទាំងអាណាចក្រខ្មែរ ហើយបានក្លាយជាប្រភពនៃការបំផុសគំនិតសម្រាប់ការសាងសង់ប្រាសាទដ៏អស្ចារ្យនានានៅអង្គរ និងនៅក្នុងអាស៊ីអាគ្នេយ៍ ក្នុងសតវត្សក្រោយៗមកទៀត។

ក្រសួងបានបញ្ជាក់ទៀតថា ការទទួលស្គាល់ជាផ្លូវការ “រមណីយដ្ឋានប្រាសាទកោះកេរ” ជាបេតិកភណ្ឌពិភពលោកនា ពេលនេះគឺជាមោទនភាពជាតិដ៏ធំធេងថ្មីមួយទៀតបន្ទាប់ពី តំបន់រមណីយដ្ឋានអង្គរ ប្រាសាទព្រះវិហារ និងតំបន់ប្រាសាទសំបូរព្រៃគុក ត្រូវបានចុះក្នុងបញ្ជីបេតិកភណ្ឌពិភពលោកជាបន្តបន្ទាប់នៅឆ្នាំ១៩៩២ ឆ្នាំ២០០៨ និង ឆ្នាំ២០១៧។ សមិទ្ធផលទាំងនេះ គឺពិតជាកើតចេញពីការចូលរួម និងទឹកចិត្តស្រឡាញ់មោះមុតរបស់ប្រជាជនកម្ពុជាគ្រប់ៗរូប ជាពិសេសកិច្ចខិតខំប្រឹងប្រែងជាប់មិនដាច់របស់រដ្ឋាភិបាលដែលជានិច្ច ជាកាលតែងតែផ្ដល់អាទិភាពខ្ពស់ដល់កិច្ចការអភិរក្សនិងអភិវឌ្ឍបេតិកភណ្ឌដែលជាដួងព្រលឹងនិងអត្តសញ្ញាណជាតិ៕