ប្រទេសឡាវ ៖ សារព័ត៌មានប្រទេសចិន China Daily បានចុះផ្សាយថា ផ្លូវរថភ្លើងតភ្ជាប់ប្រទេសឡាវ និងចិន ដែលបានដំណើរការតាំងពីចុងឆ្នាំ២០២១ បានក្លាយជាគំរូដ៏ល្អមួយនៃភាពជោគជ័យផ្នែកសេដ្ឋកិច្ច និងការពង្រឹងកិច្ចសហប្រតិបត្តិការរវាងតំបន់អាស៊ាន និងចិន ។

ផ្លូវរថភ្លើងមានប្រវែង១.០៣៥គីឡូម៉ែត្រ ដែលតភ្ជាប់ពីទីក្រុងវៀងចន្ទន៍ រហូតដល់ទីក្រុងគុនមីង ខេត្តយូណាន ប្រទេសចិន បានជំរុញការធ្វើពាណិជ្ជកម្មក្នុងតំបន់ និងផ្តល់ផលប្រយោជន៍ឱ្យពលរដ្ឋឡាវ និងចិនជាច្រើននាក់ ។ ក្រៅពីនេះ ប្រទេសឡាវអាចក្លាយជាមជ្ឈមណ្ឌលដឹកជញ្ជូនទំនិញប្រចាំតំបន់អាងទន្លេមេគង្គ និងជាកំពង់ផែដីគោករបស់ប្រទេសចិន និងប្រទេសផ្សេងៗក្នុងតំបន់អាស៊ីអាគ្នេយ៍ ។

លើសពីនេះ ផ្លូវរថភ្លើងតភ្ជាប់ប្រទេសឡាវ និងចិន ក៏បានតភ្ជាប់មកដល់ប្រទេសថៃផងដែរ ហើយបានជួយកាត់បន្ថយពេលវេលាដឹកជញ្ជូនទំនិញទៀតផង ។ ប្រទេសថៃបានដឹកជញ្ជូនទំនិញទៅចិនតាមរយៈផ្លូវរថភ្លើងឡាវ-ចិន ដែលមានតម្លៃរាប់លានបាតក្នុងរយៈពេល៥ខែដំបូងនៃឆ្នាំ២០២៣ ។ ចំណែកការនាំចេញទុរេនស្រស់របស់ថៃទៅប្រទេសចិន ស្មើនឹង៧២% ។

ផ្លូវរថភ្លើងតភ្ជាប់ប្រទេសឡាវ និងចិន បានជួយពង្រឹងការធ្វើពាណិជ្ជកម្មក្នុងតំបន់ ហើយកិច្ចសហការផ្នែកសេដ្ឋកិច្ចរវាងតំបន់អាស៊ាន និងចិន នឹងជួយលើកកម្ពស់ការងើបឡើងវិញនៃសេដ្ឋកិច្ចក្នុងតំបន់ ។ កាលពីឆ្នាំ២០២២ ការធ្វើពាណិជ្ជកម្មរវាងតំបន់អាស៊ាន និងចិន បានកើនឡើង១១,២% បើធៀបពីមួយឆ្នាំទៅមួយឆ្នាំ ៕ ប្រភព ៖ AEC connect

រដ្ហធានីហាណូយ៖ វៀតណាម កំពុងតែបង្កើនការវិនិយោគយ៉ាងខ្លាំង ទៅលើវិស័យគមនាគមន៍ ហើយឥឡូវនេះ រដ្ឋាភិបាលក្រុងហាណូយ បានដាក់ចេញនូវផែនការវិនិយោគផ្លូវរថភ្លើងក្រោមដី មានតម្លៃ រាប់ពាន់លានដុល្លារអាមេរិក។

សារព័ត៌មានរបស់វៀតណាម Vietnamnet បានចេញផ្សាយ កាលពីថ្ងៃអង្គារ ទី២០ ខែកញ្ញា ថាក្រុមប្រឹក្សាវាយតម្លៃផែនការមេថ្នាក់ជាតិ សម្រាប់ឆ្នាំ២០២១-២០៣០ ជាមួយនឹងចក្ខុវិស័យដល់ឆ្នាំ២០៥០ បានចាប់ផ្តើមដំណើរការវាយតម្លៃ សម្រាប់របាយការណ៍សិក្សា នៅមុនលទ្ធភាព សម្រាប់ខ្សែរថភ្លើងក្រោមដី ដែលតភ្ជាប់ រវាងផ្លូវវ៉ាន់កាវ (Van Cao) និង តំបន់ទីក្រុង ហ័រឡាក់ (Hoa Lac) នៅរដ្ឋធានីហាណូយ។

គម្រោងនេះ មានទំហំទឹកប្រាក់ ៦៥,៤០ពាន់ពាន់លានដុង (លុយវៀតណាម) ឬស្មើនឹង២,៧០ពាន់លានដុល្លារអាមរិក។ នេះជាគម្រោងទី៥របស់វៀតណាម នៅក្នុងរដ្ឋធានី ដោយមានចម្ងាយប្រវែង៣៨,៤៣គីឡូម៉ែត្រ ជាមួយនឹងផ្លូវដែកក្រោមដី ប្រវែង ៦,៥គីឡូម៉ែត្រ ។ គម្រោងផ្លូវដែកនេះ មានស្ថានីយចំនួន២១ ហើយក្នុងនោះមានស្ថានីយក្រោមដី ចំនួន៦។

បើតាមគម្រោង ផ្លូវដែកក្រោមដីនេះ នឹងដាក់ឱ្យដំណើរការ នៅឆ្នាំ២០២៦ ហើយនឹងតភ្ជាប់អ្នកដំណើរ ពីស្រុកថាច់ថាត (Thach That) ទៅកណ្តាលទីក្រុង។ ផ្លូវនេះ នឹងជួយកាត់បន្ថយនូវការកកស្ទះចរាចរណ៍ នៅក្នុងទីក្រុង ផងដែរ៕

ប្រទេសថៃ ៖ កាលពីថ្ងៃទី២០ ខែកញ្ញា ឆ្នាំ២០២៣ លោកវេជ្ជបណ្ឌិត អាខុម ឆ័យវីរៈវឌ្ឍនៈ ប្រធានមន្ទីរពេទ្យមេត្តាប្រាឆារ៉ាក់ ប្រទេសថៃ លើកឡើងថា បច្ចុប្បន្ន ពលរដ្ឋមួយចំនួនចាប់អារម្មណ៍បរិភោគអាហារប្លែកៗនៅតាមបណ្តាញសង្គម ។ ការបរិភោគសត្វទឹកសាបឆៅៗ ដូចជា បង្គា, ខ្យង, ក្តាម និងត្រី ជាដើម គឺពួកគេប្រឈមនឹងការកើតមេរោគនៅពេលក្រោយ ជាពិសេស ដង្កូវក្នុងភ្នែក ហើយមានរោគសញ្ញាដូចជា ហើមត្របកភ្នែក, ហើមកែវភ្នែក, សម្ពាធភ្នែកខ្ពស់, ឈឺភ្នែក, ស្រវាំងភ្នែក រហូតដល់ខ្វាក់ភ្នែក ។

លោកវេជ្ជបណ្ឌិត អាខុម ឆ័យវីរៈវឌ្ឍនៈ បន្តថា វាអាស្រ័យលើដង្កូវទាំងនេះរស់នៅត្រង់ចំណុចណារបស់ភ្នែក ហើយការការពារជំងឺល្អបំផុត និងអាចការពារយ៉ាងងាយស្រួលផងដែរ គឺមិនត្រូវបរិភោគប្រភេទអាហារសាច់សត្វឆៅៗ ដូចជា ញំកំពឺស ញំបង្គា ឬបង្គាឆៅជាមួយទឹកត្រី ។

ចំណែកអ្នកនាង អូរ៉ាវីណាត់ នីមីតវង្សសាគុន ជាវេជ្ជបណ្ឌិតជំនាញប្រចាំមន្ទីរពេទ្យមេត្តាប្រាឆារ៉ាក់ លើកឡើងដែរថា ដង្កូវស៊ីភ្នែកធ្វើឱ្យអ្នកជំងឺកើតអាការៈស្រវាំងភ្នែក, មើលឃើញពុំច្បាស់ ហើយអាចរលាកនៅបរិវេណខាងមុខភ្នែក ។ វិធីព្យាបាល គឺត្រូវបាញ់ឡាស៊ែរទៅលើដង្កូវមិនឱ្យវាផ្លាស់ទីបាន មុននឹងវះកាត់យកដង្កូវចេញ ។ តាមធម្មតា ដង្កូវទាំងនេះបានរស់នៅក្នុងសរសៃឈាមសួតរបស់សត្វកណ្តុរ ហើយវាចេញមកជាមួយអាចម៍កណ្តុរ បន្ទាប់មក ក៏ជ្រៀតចូលទៅក្នុងសត្វខ្យងមួយចំនួន, បង្គា និងក្តាមទឹកសាប ។

ក្រៅពីនេះ វាអាចនៅលាយឡំគ្នាជាមួយទឹកផឹក ឬបន្លែ និងផ្លែឈើផងដែរ ។ ដង្កូវអាចចូលមកតាមរយៈសរសៃប្រសាទភ្នែក និងជ្រាបចូលក្នុងភ្នែក ហើយក៏ឡើងមកបរិវេណខាងមុខភ្នែក ។ អ្នកជំងឺអាចប្រឈមនឹងការសម្លឹងមើលពុំច្បាស់ ហើយវាអាស្រ័យលើផ្លូវដើររបស់ដង្កូវ ដែលបណ្តាលឱ្យមានគ្រោះថ្នាក់ត្រង់បរិវេណណាខ្លះរបស់ភ្នែក ។

វេជ្ជបណ្ឌិតថៃ អ្នកនាង អូរ៉ាវីណាត់ នីមីតវង្សសាគុន និយាយថា ៖ «អ្នកជំងឺគួរតែព្យាបាលជំងឺនេះជាបន្តបន្ទាប់ ដើម្បីត្រួតពិនិត្យរាងកាយឱ្យបានលម្អិតថា តើដង្កូវនឹងទៅ រស់នៅផ្នែកផ្សេងក្នុងរាងកាយដែរឬទេ ? ដូច្នេះ ខ្ញុំសូមដាស់តឿនពាក់ព័ន្ធនឹងការបរិភោគអាហារ គួរតែលាងសម្អាតដៃឱ្យស្អាត មុនពេលបរិភោគអាហារ» ។

អ្នកនាង អូរ៉ាវីណាត់ នីមីតវង្សសាគុន បន្តថា ៖ «ខ្ញុំមិនណែនាំឱ្យបរិភោគអាហារឆ្អិនផង ឆៅផង លាយឡំគ្នាទេ     គឺត្រូវតែបរិភោគអាហារឆ្អិន និងមានអនាម័យប៉ុណ្ណោះ ព្រោះដង្កូវដែលរស់នៅជាមួយសត្វទឹកសាប នៅពេលវាចូលក្នុងរាងកាយមនុស្ស វានឹងបង្កគ្រោះថ្នាក់ ។ លើសពីនេះ បើមេរោគចូលទៅរស់នៅតាមចំណុចសំខាន់ៗក្នុងរាងកាយ ដូចជា ប្រព័ន្ធប្រសាទ, ខួរក្បាល និងឆ្អឹងខ្នង វានឹងបណ្តាលឱ្យយើងស្លា.ប់បាន» ៕ ប្រភព ៖ khaosod

រឿងរាវខ្មោចលងមានអ្នកខ្លះជឿនិងអ្នកខ្លះទៀតមិនជឿ រីឯមនុស្សមួយចំនួនទៀតក៏លើកឡើងថាមិនមែនភ្នែកមនុស្សទាំងអស់សុទ្ធតែអាចមើលឃើញគ្រប់សភាវៈនោះទេ។ ដូច្នេះហើយខាងក្រោមនេះគឺជាកន្លែងទាំង ៨ ដែលល្បីថាមានខ្មោចលងសាហាវជាងគេនៅលើពិភពលោក៖

១.វិមាន Bhangarh Fort៖ វិមាន Bhangarh Fort ស្ថិតនៅក្នុងប្រទេសឥណ្ឌា បច្ចុប្បន្នវិមាននេះត្រូវបានហាមឃាត់មិនឱ្យនរណាម្នាក់ចូលទៅទស្សនាបានទេ ដោយមានគេនិយាយថា វិមាន Bhangarh Fort ជាប់បណ្តាសា ហើយបើអ្នកណាចូលក្នុងវិមាននេះនឹងត្រូវបាត់បង់ជីវិតជាក់ជាមិនខាន។

២.សកលវិទ្យាល័យ Ohio៖ Ohio គឺជាសកលវិទ្យាល័យស្ថិតក្នុងប្រទេសសហរដ្ឋអាមេរិក ដែលមានគេនិយាយតៗគ្នាថា សកលវិទ្យាល័យនេះត្រូវបណ្តាសា ហើយសិស្សដែលរៀននៅទីនោះតែងតែមានអ្នកស្លាប់ជារៀងរាល់ឆ្នាំ។

៣.ផ្លូវរូង Niagara Falls៖ Niagara Falls គឺជាផ្លូវរូងដ៏អាថ៌កំបាំង ស្ថិតក្នុងប្រទេសសហរដ្ឋអាមេរិក ផ្លូវរូងនេះត្រូវបានគេនិយាយតគ្នាថា មានការលងបន្លាចយ៉ាងសាហាវ ដែលនៅពេលគេតែងតែឃើញក្មេងស្រីម្នាក់អង្គុយយំ ហើយបើអ្នកណាទៅជិតខ្មោចក្មេងស្រីនោះ នាងនឹងកាច់កនាក់នោះចោលយ៉ាងព្រៃផ្សៃទៀតផង។

៤.ឆ្នេរខ្សាច់ Changi៖ ឆ្នេរខ្សាច់នេះ ស្ថិតនៅក្នុងប្រទេសចិនដែលនៅពេលយប់គេតែងតែឮសំឡេងមនុស្សស្រែកយំខ្លាំងៗ និងមានអ្នកខ្លះទៀតបានឃើញ ខ្មោចអត់ក្បាល ឬ ខ្មោចហោះពេញលើមេឃជាដើម។

៥.ផ្ទះសំណាក់ Ancient Ram៖ Ancient Ram គឺផ្ទះសំណាក់ដែលមាននៅក្នុងប្រទេសអង់គ្លេស មនុស្សគ្រប់គ្នាជឿថាផ្ទះសំណាក់នេះគឺមានខ្មោចលងយ៉ាងសាហាវ ព្រោះដោយសារផ្ទះសំណាក់ Ancient Ram បានសាងសង់នៅលើកន្លែងដែលគេកប់ខ្មោច។

៦.វិមាន Monte Cristo៖ វិមាន Monte Cristo ស្ថិតក្នុងប្រទេសអូស្រ្តាលី ដែលវិមាននេះគេល្បីថាមានខ្មោចលងសាហាវណាស់ វាតែងតែលងបន្លាចមនុស្សគ្រប់គ្នាដូចជាឈរលើដំបូលផ្ទះ ឈរសម្លក់នៅក្បែរបង្អួចជាដើម។

៧.អាគារនៅលើកូនភ្នំ Dominican៖ អាគារ Dominican ស្ថិតក្នុងប្រទេសភីលីពីន។ អាគារ Dominican ត្រូវបានគេជឿថាមានព្រលឹងខ្មោចដែលស្លាប់យ៉ាងសាហាវកាលពីសម័យសង្រាមលោកលើកទី២ ជារៀងរាល់យប់គេតែងតែឮសំឡេងគោះទ្វារនិងបិទទ្វារ ហើយពេលខ្លះទៀតគេក៏ឮសំឡេងមនុស្សនិយាយគ្នាសើចខ្លាំងៗផងដែរ។

៨.ប្រាសាទ Berry Pomeroy៖ ប្រាសាទ Berry Pomeroy ស្ថិតនៅក្នុងប្រទេសអង់គ្លេស ហើយប្រាសាទនេះមានរឿងជាច្រើនដែលទាក់ទងនឹងខ្មោចព្រាយ យោងតាមការនិយាយតៗគ្នាបានឱ្យដឹងថា ប្រាសាទ Berry Pomeroy មានខ្មោចស្រីតៃហោង២នាក់ ម្នាក់ពាក់ឈុតសនិងម្នាក់ទៀតពាក់ឈុតខៀវ ដែលវាតែងតែលងបន្លាចមនុស្សដែលដើរកាត់ប្រាសាទនោះ៕

ម៉ុងតេណេហ្គ្រោ គឺជាប្រទេសនៅអឺរ៉ុបប៉ែកអាគ្នេយ៍បានរៀបចំកម្មវិធីប្រកួតមួយឈ្មោះថា «Laziest Citizen» ឬការស្វែងរកមនុស្សខ្ជិលបំផុត ដើម្បីទទួលបានប្រាក់រង្វាន់ប្រមាណជាង១.០០០ដុល្លារអាមេរិក ។ គេបានបង្កើតកម្មវិធីប្រកួតស្វែងរកមនុស្សខ្ជិលតាំងពីឆ្នាំ២០០១ មកម៉្លេះ ដើម្បីបង្ហាញថា ពលរដ្ឋម៉ុងតេណេហ្គ្រោមួយចំនួនជាមនុស្សខ្ជិល ហើយមួយថ្ងៃៗ គិតតែពីដេក ។

ការប្រកួតប្រចាំឆ្នាំត្រូវបានរៀបចំឡើងនៅថ្ងៃទី១៩ ខែសីហា ឆ្នាំ២០២៣ ហើយមានបេក្ខជនចូលរួមប្រកួតសរុបចំនួន២១នាក់ ។ បើតាមច្បាប់ប្រកួត គឺបេក្ខជនចូលរួមប្រកួតនឹងចូលសម្រាកនៅតាមរមណីយដ្ឋាន ហើយពួកគេនឹងទទួលបានម្ហូបអាហារចំនួន៣ពេលក្នុង១ថ្ងៃ ។ ពួកគេមានសិទ្ធិចូលបន្ទប់ទឹកនៅរៀងរាល់៨ម៉ោងម្តង ហើយក្នុងអំឡុងពេលនេះ បើពួកគេអង្គុយ ឬក្រោកឈរ នឹងត្រូវបាត់បង់សិទ្ធិប្រកួតភ្លាមៗ ។ ចំណែកបញ្ហាសុខភាពវិញ នឹងមានគ្រូពេទ្យនៅប្រចាំការជួយថែទាំ ។

គេសង្កេតឃើញថា តាំងពីថ្ងៃចាប់ផ្តើមប្រកួត (គឺនៅថ្ងៃទី១៩ ខែសីហា) រហូតមកដល់ខែកញ្ញានេះ គេពុំអាចស្វែងរកអ្នកទទួលបានជ័យជម្នះនៅឡើយទេ ។ បេក្ខជនចូលរួមប្រកួតចំនួន២១នាក់ គឺនៅសល់ត្រឹមតែ៥នាក់ប៉ុណ្ណោះ ហើយអ្នកនៅសល់ចុងក្រោយនេះ ក៏មិនព្រមចុះចាញ់គ្នាងាយៗដែរ ។ នេះចាត់ទុកថា វាជាការបំបែកកំណត់ត្រាការប្រកួតរយៈពេលយូរបំផុត ៕ ប្រភព ៖ chiangmai news

ប្រទេសថៃ ៖ ក្រសួងពាណិជ្ជកម្មថៃបានបញ្ជាឱ្យបញ្ចុះតម្លៃទំនិញផ្សេងៗដូចជា អង្ករ, សាច់មាន់, ស៊ុត និងសាច់ជ្រូក ក្នុងរយៈពេល១៥ថ្ងៃ ដើម្បីជួយសម្រាលបន្ទុកការចំណាយក្នុងជីវភាពប្រចាំថ្ងៃរបស់ពលរដ្ឋ ក្រោយពីប្រទេសថៃបានបញ្ចុះតម្លៃប្រេងម៉ាស៊ូតចំនួន២បាតក្នុង១លីត្រ ។ ហេតុនេះ ក្រុមហ៊ុនអាជីវកម្ម និងអាជីវករទាំងអស់ត្រូវតែបញ្ចុះតម្លៃទំនិញតាមដែរ ។

លោក ភូមិថាំ វេជឆាយ៉ាឆ័យ ឧបនាយករដ្ឋមន្ត្រី និងរដ្ឋមន្ត្រីក្រសួងពាណិជ្ជកម្ម បានលើកឡើងអំពីវិធានការបញ្ចុះតម្លៃទំនិញ ក្រោយពីរដ្ឋាភិបាលប្រកាសបញ្ចុះតម្លៃប្រេងម៉ាស៊ូតនាពេលកន្លងមក ។ លោកបានប្រគល់ការងារនេះទៅខាងនាយកដ្ឋានពាណិជ្ជកម្មផ្ទៃក្នុង ដើម្បីត្រួតពិនិត្យរឿងការបញ្ចុះតម្លៃទំនិញក្នុងរយៈពេល១៥ថ្ងៃ ។

លោក ភូមិថាំ វេជឆាយ៉ាឆ័យ បានស្នើឱ្យពិចារណាពីតម្លៃទំនិញទាំងអស់ដែលធ្វើឱ្យប៉ះពាល់ដល់ជីវភាពពលរដ្ឋ ក្នុងនោះត្រូវពិនិត្យមើលថា តើទំនិញនីមួយៗមានតម្លៃប៉ុន្មាន ហើយតើអាចបញ្ចុះតម្លៃបានកម្រិតណា ។ គេរំពឹងថា នៅដើមខែតុលា ឆ្នាំ២០២៣ នឹងមានភាពច្បាស់លាស់ជាងនេះ ។

លើសពីនេះ លោកនឹងពិភាក្សាជាមួយក្រុមហ៊ុនអាជីវកម្មធំៗអំពីបញ្ហានេះ ព្រោះអ្នកធំត្រូវតែជួយអ្នកតូចឱ្យរស់នៅបានទាំងអស់គ្នា, ជួយដោះស្រាយបញ្ហា, ព្រមទាំងបង្កើតចំណុចតុល្យភាពរវាងក្រុមហ៊ុនផលិត និងអតិថិជន ដើម្បីកុំឱ្យប៉ះពាល់ដល់គ្រប់ផ្នែក ។

គេរំពឹងថា ទំនិញដែលទទួលបានការពិចារណាបញ្ចុះតម្លៃ គឺជាទំនិញដែលពលរដ្ឋទិញជាប្រចាំក្នុងជីវភាពប្រចាំថ្ងៃ មានប្រមាណជា២០មុខ ដូចជា អង្ករ, សាច់មាន់, សាច់ជ្រូក និងស៊ុតជាដើម ។ ហេតុនេះ ការបញ្ចុះតម្លៃទំនិញគ្រប់មុខនឹងធ្វើតាមគោលការណ៍ស្វែងរកចំណុចតុល្យភាព និងមានការយល់ស្របពីគ្រប់ភាគី ហើយវាគឺជាដំណោះស្រាយសម្រាប់បញ្ហាទំនិញឡើងថ្លៃ ៕ ប្រភព ៖ chiangmai news

សហរដ្ឋអាមេរិក ៖ ក្រសួងការបរទេសអាមេរិកបានបង្ហាញឈ្មោះប្រទេសចំនួន១៩ ដែលអាមេរិកហាមពលរដ្ឋធ្វើដំណើរទៅកាន់ប្រទេសទាំងនេះ ដោយសារអាចគ្មានសុវត្ថិភាព ។ ក្រសួងការបរទេសអាមេរិកបានបែងចែកគ្រោះថ្នាក់របស់ប្រទេសទាំងអស់ជា៤កម្រិត ដោយពិចារណាលើគ្រោះថ្នាក់បណ្តាលមកពីឧក្រិ.ដ្ឋ.កម្ម, ការព្រមានពីសុខភាពសាធារណៈ និងបញ្ហាអសន្តិសុខនៅក្នុងប្រទេស ដែលអាចធ្វើឱ្យកម្រិតគ្រោះថ្នាក់ក្នុងប្រទេសនោះផ្លាស់ប្តូរបាន ។

ការបែងចែកគ្រោះថ្នាក់ផ្សេងៗមាន៤កម្រិត រួមមាន ៖
១-ប្រទេសត្រូវការប្រុងប្រយ័ត្នជាធម្មតា
២-ប្រទេសត្រូវបង្កើនការប្រុងប្រយ័ត្ន
៣-ប្រទេសគួរពិចារណាការធ្វើដំណើរជាថ្មី
៤-ប្រទេសដែលអាមេរិកហាមពលរដ្ឋធ្វើដំណើរដាច់ខាត

គេសង្កេតឃើញថា នៅក្នុងកម្រិតទី៤ ប្រទេសដែលអាមេរិកហាមពលរដ្ឋធ្វើដំណើរដាច់ខាត គឺមានចំនួន១៩ប្រទេស រួមមាន ៖ រុស្ស៊ី, នីហ្សេរីយ៉ា, ស៊ូដង់ខាងត្បូង, សូម៉ាលី, ម៉ាលី, សាធារណរដ្ឋអាហ្វ្រិកកណ្តាល, បួគីណាហ្វាសូ, ហៃទី, បេឡារុស, កូរ៉េខាងជើង, មីយ៉ាន់ម៉ា, វ៉េណេស៊ុយអេឡា, ស៊ីរី, លីប៊ី, អ៊ីរ៉ាក់, អាហ្វហ្គានីស្ថាន, អ៊ុយក្រែន, ស៊ូដង់ និងយេម៉ែន ។

ការប្រកាសឈ្មោះប្រទេស និងហាមពលរដ្ឋអាមេរិកធ្វើដំណើរទៅកាន់ប្រទេសទាំងនេះ ក្រោយពីអាមេរិក និងអ៊ីរ៉ង់បានចុះកិច្ចព្រមព្រៀងធ្វើការផ្លាស់ប្តូរអ្នកទោសរវាងប្រទេសទាំងពីរ ។ កិច្ចព្រមព្រៀងនេះបានសម្រេចបន្ទាប់ពីអាមេរិកលុបចោលការបង្កកមូលនិធិចំនួន៦.០០០លានដុល្លារអាមេរិក ៕ ប្រភព ៖ Mono News