តារាម៉ូដែល Li Yutong ត្រូវឃុំខ្លួន១0ថ្ងៃក្រោយបង្ហាញព័ត៌មានផ្ទាល់ខ្លួនរបស់តារាចម្រៀង Xue Zhiqian

ការចាប់ខ្លួននិងឃុំខ្លួនតារាម៉ូដែល Li Yutong កំពុងទាក់ទាញចំណាប់អារម្មណ៍ពីសាធារណជនយ៉ាងច្រើន។ យោងតាមអាជ្ញាធរនាងត្រូវបានឃុំខ្លួនរយៈពេល១០ ថ្ងៃពីបទបង្ហាញព័ត៌មានផ្ទាល់ខ្លួនរបស់តារាចម្រៀង Xue Zhiqian ដោយខុសច្បាប់ក្នុងអំឡុងពេលផ្សាយផ្ទាល់។ នេះបើតាមរបាយការណ៍នៅថ្ងៃទី១៩ ខែមេសា តាមរយៈកម្មវិធីមួយដែលចាក់ផ្សាយដោយស្ថានីយ៍វិទ្យុ និងទូរទស្សន៍ប៉េកាំង។

ហេតុការណ៍នេះមិនត្រឹមតែប៉ះពាល់ដល់ជីវិតឯកជន និងក្រុមគ្រួសាររបស់តារាចម្រៀងរូបនេះប៉ុណ្ណោះទេ ថែមទាំងបានបង្កឱ្យមានការជជែកវែកញែកជាច្រើនអំពីខ្សែបន្ទាត់រវាងការបង្ហាញអំពើខុសឆ្គងរបស់នរណាម្នាក់ និងការបំពានច្បាប់នៅលើប្រព័ន្ធផ្សព្វផ្សាយសង្គម។
នៅថ្ងៃទី ២ ខែមីនា Li Yutong អតីតមិត្តស្រីរបស់ Xue Zhiqian បានបង្ហោះសារជាង ២០ សារនៅលើ Weibo ដោយចោទប្រកាន់តារាចម្រៀងរូបនេះពីបទបោកប្រាស់ ជំរិតទារប្រាក់ និងទាមទារឱ្យប្រគល់ទ្រព្យសម្បត្តិរបស់នាងមកវិញ។ ក្រុមហ៊ុនគ្រប់គ្រងរបស់លោក Xue Zhiqian បានបដិសេធភ្លាមៗចំពោះការអះអាងនេះ ដោយអះអាងថាព័ត៌មាននេះត្រូវបានប្រឌិតឡើង ដែលធ្វើឱ្យខូចកេរ្តិ៍ឈ្មោះរបស់លោក និងញុះញង់មតិសាធារណៈ។

Li Yutong កើតនៅឆ្នាំ១៩៨៨ គឺជាតារាម៉ូដែលម្នាក់ដែលធ្លាប់បានចូលរួមក្នុងកម្មវិធីកម្សាន្ត របស់ទូរទស្សន៍ Hunan។ ទន្ទឹមនឹងនេះលោក Xue Zhiqian កើតនៅឆ្នាំ១៩៨៣ គឺជាតារាចម្រៀងប្រុសដ៏ល្បីល្បាញម្នាក់ដែលមានបទចម្រៀងល្បីៗជាច្រើន។ ទោះបីជាធ្វើការនៅក្នុងឧស្សាហកម្មកម្សាន្តក៏ដោយ Li Yutong មិនមានអាជីពលេចធ្លោជាពិសេសនោះទេ ហើយជារឿយៗត្រូវបានចាត់ថ្នាក់ជាតារាម៉ូដែលដែលមិនសូវស្គាល់។

ទោះជាយ៉ាងណាក៏ដោយ នាងតែងតែទទួលបានការចាប់អារម្មណ៍ម្តងហើយម្តងទៀតដោយសារតែភាពចម្រូងចម្រាសក្នុងជីវិតផ្ទាល់ខ្លួនរបស់នាង។ បន្ទាប់ពីបែកបាក់ជាមួយ Xue Zhiqian នាងបានចោទប្រកាន់អតីតមិត្តប្រុសរបស់នាងជាសាធារណៈចំពោះអាកប្បកិរិយាមិនសមរម្យជាច្រើន ហើយថែមទាំងហៅលោកថាជា មនុស្សលាក់ពុត ទៀតផង។
ក្រោយមកនៅពេលដែល Xue Zhiqian បានជួបជុំគ្នា និងមានកូនជាមួយអតីតភរិយារបស់លោក Li Yutong បានបន្តចែករំលែកព័ត៌មានមួយចំនួនទាក់ទងនឹងជីវិតឯកជនរបស់តារាចម្រៀងរូបនេះ ដែលទាក់ទាញចំណាប់អារម្មណ៍ពីសាធារណជន។

រួមជាមួយនឹងភាពចម្រូងចម្រាសផ្នែកស្នេហារបស់នាង អាជីពរបស់ Li Yutong គឺមិនសូវមានភាពទាក់ទាញទេ ដោយភាគច្រើននាងបានបង្ហាញខ្លួននៅក្នុងរូបថតពិធីជប់លៀងរបស់នាង ការទៅបារ និងក្លឹប ជាជាងការចូលរួមក្នុងសកម្មភាពបង្ហាញម៉ូដអាជីព។
Li Yu Tong ធ្លាប់ត្រូវបានគេរិះគន់ចំពោះការចូលរួមពិធីជប់លៀងរបស់ Seungri អតីតសមាជិកក្រុម Big Bang៕