លោកនាយករដ្ឋមន្ត្រីប្រទេសថៃប្រកាសមិនទទួលយកប្រាក់ខែ

ប្រទេសថៃ ៖ លោក ឆ័យ វ៉ាត់ឆារុង (Chai Watcharong) អ្នកនាំពាក្យទីស្តីការនាយករដ្ឋមន្ត្រីប្រទេសថៃ លើកឡើងថា លោក សេដ្ឋា ថាវីស៊ិន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុ សូមឱ្យបញ្ជូនប្រាក់ខែរបស់លោក ព្រមទាំងប្រាក់ឧបត្ថម្ភការប្រជុំជារៀងរាល់ខែ ដែលលោកបានទទួលពីការកាន់តំណែងជានាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុ សម្រាប់ពេញមួយអាណត្តិរបស់លោក ស្មើទឹកប្រាក់ចំនួន១២៥.៥៩០បាតក្នុង១ខែ (១២ម៉ឺន៥ពាន់៥រយ៩០បាតក្នុង១ខែ) ប្រគល់ទៅឱ្យមូលនិធិផ្សេងៗ ។

ការប្រកាសប្រគល់ប្រាក់ខែទាំងអស់ទៅឱ្យមូលនិធិផ្សេងៗ ដើម្បីយកប្រាក់ទាំងនេះទៅជួយសង្គ្រោះក្រុមពលរដ្ឋងាយរងគ្រោះ ។ ដូច្នេះ ការជ្រើសរើសផ្នែកផ្សេងៗដែលនឹងទទួលបានជំនួយ នឹងមានក្រុមការងារចាត់ការរឿងនេះ ។

នៅដំណាក់កាលដំបូង គេនឹងបរិច្ចាគប្រាក់ខែរបស់លោក សេដ្ឋា ថាវីស៊ិន ទៅឱ្យមូលនិធិកុមារ (FOUNDATION FOR CHILDREN) ដើម្បីជួយសង្គ្រោះកុមារដែលមានតម្រូវការមូលដ្ឋានចាំបាច់, របៀបរស់នៅ និងសុខុមាលភាពផ្សេងៗ ក្នុងគោលបំណងឱ្យកុមារអាចអភិវឌ្ឍន៍ផ្នែករាងកាយ, ប្រាជ្ញាស្មារតី និងចិត្តគំនិត រួមទាំងការសិក្សាផងដែរ ។ ដូច្នេះ កុមារអាចចូលរៀននៅតាមសាលានានាបន្តទៀត ។

ការផ្តល់ប្រាក់ខែទៅឱ្យមូលនិធិនេះ គឺគ្រាន់តែជាជំហានដំបូងប៉ុណ្ណោះ ដែលលោក សេដ្ឋា ថាវីស៊ិន នាយករដ្ឋមន្ត្រីថ្មីប្រទេសថៃព្យាយាមស្វែងរកឱកាសជួប និងពិភាក្សាជាមួយផ្នែកផ្សេងៗ ដើម្បីលោកអាចជ្រាបពីបញ្ហាដែលពួកគេកំពុងជួបប្រទះ និងទុក្ខលំបាករបស់មូលនិធិ ហើយស្វែងរកដំណោះស្រាយបន្តទៀត ៕ ប្រភព ៖ chiangmai news