កាលពីថ្ងៃទី២៣ ខែតុលា ឆ្នាំ២០២៣ ក្រុមប្រដាប់អាវុធហាម៉ាស់ប៉ាឡេស្ទីនប្រកាសថា ពួកគេបានដោះលែងចំណាប់ខ្មាំងចំនួន២នាក់ថែមទៀត ដោយសារតែមានបញ្ហាសុខភាព ។ ការដោះលែងចំណាប់ខ្មាំងនេះ គឺជាការឆ្លើយតបនឹងការព្យាយាមជួយអន្តរាគមន៍ពីរដ្ឋាភិបាលអេហ្ស៊ីប និងកាតាផងដែរ ខណៈសារព័ត៌មាន Reuters ចុះផ្សាយថា ចំណាប់ខ្មាំងទាំង២រូបនេះ គឺជាស្ត្រីចំណាស់ជនជាតិអ៊ីស្រាអែល ។

Abu Ubaida ជាអ្នកនាំពាក្យរបស់ក្រុមប្រដាប់អាវុធហាម៉ាស់បានបញ្ជាក់ក្នុងសេចក្តីថ្លែងការណ៍មួយតាម Telegram ថា ក្រុមហាម៉ាស់បានសម្រេចចិត្តដោះលែងចំណាប់ខ្មាំងទាំង២រូប ដោយសារហេតុផលមនុស្សធម៌ និងសុខភាពមិនល្អ ។ អ្នកនាំពាក្យរូបនេះថែមទាំងបានប្រាប់ឈ្មោះស្ត្រីទាំង២រូបទៀតផង គឺម្នាក់ឈ្មោះ Nurit Yitzhak និងម្នាក់ទៀតឈ្មោះ Yocheved Lifschitz ។

មុននេះ ក្រុមហាម៉ាស់បានដោះលែងចំណាប់ខ្មាំង២នាក់ម្តាយកូនជាជនជាតិអាមេរិក គឺក្នុងរយៈពេលជិត២សប្តាហ៍ក្រោយពីក្រុមហាម៉ាស់វាយឆ្ម.ក់ចូលព្រំដែនប្រទេសអ៊ីស្រាអែល និងសម្លា.ប់មនុស្សចំនួន១.៤០០នាក់ ព្រមទាំងចាប់មនុស្សធ្វើចំណាប់ខ្មាំងជាង២០០នាក់ កាលពីថ្ងៃទី៧ ខែតុលា ឆ្នាំ២០២៣ ។

ស្ថានីយទូរទស្សន៍ប្រទេសអ៊ីស្រាអែលផ្សាយថា ចំណាប់ខ្មាំងទី៣ និងទី៤ បានទទួលការដោះលែងឱ្យមានសេរីភាព ហើយគេបានជូនដំណឹងទៅកាន់គ្រួសាររបស់អ្នកទាំងពីររួចហើយ ។ ចំណែកសារព័ត៌មានអេហ្ស៊ីបរាយការណ៍ថា ចំណាប់ខ្មាំងទាំង២រូបបានធ្វើដំណើរចាកចេញពីតំបន់ Gaza មកដល់ព្រំដែន Rafah របស់អេហ្ស៊ីបហើយ ។ ទោះយ៉ាងណា ពុំទាន់មានសេចក្តីថ្លែងការណ៍ណាមួយពីរដ្ឋាភិបាលអ៊ីស្រាអែលទេ ៕ ប្រភព ៖ TNN World

Starbucks គឺជាហាងកាហ្វេដ៏ពេញនិយមបំផុតមួយរបស់ពិភពលោក នឹងជាទីពេញចិត្តរបស់មនុស្សជាច្រើននាក់ផងដែរ។ បច្ចុប្បន្នហាងកាហ្វេ Starbucks មានសាខាសរុបចំនួន ២១,៥០០ កន្លែងក្នុងប្រទេសចំនួន ៦៤ ជុំវិញពិភពលោក។ ដូច្នេះហើយ តើ Starbucks Coffee មានប្រវត្តិយ៉ាងដូចម្តេច ហើយបើកដំណើរការដំបូងនៅពេលណា?

Starbucks ត្រូវបានបង្កើតឡើងដំបូងនៅថ្ងៃទី៣០ ខែមីនា ឆ្នាំ១៩៧១ ដោយមានម្ចាស់ភាគហ៊ុន ៣ នាក់គឺលោក Jerry Baldwin ជាគ្រូបង្រៀនភាសាអង់គ្លេស, លោក Zev Siegl ជាគ្រូបង្រៀនប្រវត្តិសាស្ត្រ និងលោក Gordon Bowker គឺជាអ្នកនិពន្ធ។ កន្លងមក មុនពេលប្រើឈ្មោះថា “Starbucks” ពួកគេទាំង ៣នាក់បានជ្រើសរើសឈ្មោះជាច្រើន ប៉ុន្តែត្រូវបានច្រានចោលទាំងអស់ រហូតដល់ចុងក្រោយលោក Bowker ក៏សម្រេចចិត្តជ្រើសរើសយកឈ្មោះថា «Starbucks» តែម្ដង។

Starbucks មានន័យថា “ប្រពៃណីនៃការដើរលេងសមុទ្ររបស់ពាណិជ្ជករកាហ្វេសម័យដើម” ដែលមាន Logo ជានារីមច្ឆាកន្ទុយពីរ។ នៅឆ្នាំ ១៩៨០ ហាងកាហ្វេនេះមិនទាន់មានឈ្មោះល្បីល្បាញនោះទេ រហូតដល់ឆ្នាំ ១៩៩២ ទើប Starbucks បានចាប់ផ្ដើមលក់ភាគហ៊ុន IPO រហូតពង្រីកបាន ១៤០កន្លែង និងរកប្រាក់ចំណូលបាន ៧៣,៥លានដុល្លារអាមេរិក។ ខណៈពេលនោះផងដែរ ស្លាកសញ្ញា Starbucks ក៏ចាប់ផ្ដើមមានតម្លៃរហូតដល់គណៈកម្មាការវាយតម្លៃថាជាស្លាកសញ្ញាពិភពលោក បានឱ្យតម្លៃកាហ្វេ Starbucks រហូតដល់ ២៧១ លានដុល្លារអាមេរិក។

នៅឆ្នាំ ២០១៣ ហាងកាហ្វេ Starbucks ក៏បានវាយលុកទីផ្សារពិភពលោកយ៉ាងខ្លាំង ដោយបានបន្ថែមសេវាកម្មថ្មី គឺឱ្យអតិថិជនរបស់ខ្លួនធ្វើការបញ្ជាទិញកាហ្វេតាមរយៈទូរស័ព្ទដៃជាមួយនឹងកម្មវិធី Starbucks app ហើយក៏ចាប់ផ្ដើមផ្សព្វផ្សាយនៅលើបណ្ដាញសង្គមនានាផងដែរ។
គួរបញ្ជាក់ដែរថា បច្ចុប្បន្ន Starbucks មានលោក Howard Schultz គឺជាអ្នកគ្រប់គ្រងនិងជានាយកប្រតិបត្តិ ដោយកាលពីឆ្នាំ ២០១៣ ទទួលបានប្រាក់ចំណូល ១៤,៨៩ ពាន់លានដុល្លារអាមេរិក និងចំណេញសុទ្ធចំនួន ៩ លានដុល្លារអាមេរិក៕

មានពាក្យស្លោកផ្ទាល់ខ្លួននៅក្នុងវិស័យទេសចរណ៍នៅក្នុងប្រទេសនីមួយៗ តើពាក្យដែលប្រទេសនីមួយៗប្រើ និងមានន័យដូចម្តេច?
១.ប្រ៊ុយណេ ប្រើពាក្យ «លំនៅឋានសន្តិភាព» មានន័យថា កន្លែងសន្តិភាព 2.ឥណ្ឌូនេសុីប្រើពាក្យ “Wonderful Indonesia” មានន័យថា Wonderful Indonesia៣.ម៉ាឡេសុីប្រើពាក្យ “Malaysia Truely Asia” មានន័យថា ម៉ាឡេស៊ី ដែលជាអាស៊ីពិត៤.មីយ៉ាន់ម៉ា ប្រើពាក្យ “Let the Journey Begin” មានន័យថា ដំណើរចាប់ផ្តើមនៅទីនេះ5. ទីម័រ ខាងកើត ប្រើពាក្យ “Explore the Undiscovered” ដើម្បីមានន័យថាការរុករកតំបន់ដែលមិនធ្លាប់ត្រូវបានបង្ហាញ6. ហ្វីលីពីនប្រើឃ្លា “It’s More Fun in The Philippines” មានន័យថា ហ្វីលីពីនមានភាពសប្បាយរីករាយជាង៧.កម្ពុជា ប្រើពាក្យ នគរអច្ឆរិយៈ មានន័យថា នគរអច្ឆរិយៈ៨.ឡាវ ប្រើពាក្យ “Simply Beautiful” មានន័យថា ភាពសាមញ្ញដ៏ស្រស់ស្អាត9.សិង្ហបុរី ប្រើពាក្យ “Passion Made Possible” មានន័យថា ចំណង់ចំណូលចិត្តបង្កើតនូវអ្វីដែលមិនអាចទៅរួច10. វៀតណាមប្រើពាក្យថា មន្តស្នេហ៍មិនចេះចប់11.ថៃប្រើពាក្យ “Amazing Thailand” មានន័យថា Amazing Thailand៕

ប្រទេសថៃ ៖ វាបានក្លាយជារឿងមួយរងការរិះគន់យ៉ាងខ្លាំងក្លាក្នុងបណ្តាញសង្គមប្រទេសថៃ ក្រោយពីស្ត្រីម្នាក់បានបង្ហោះរូបភាពរបស់នាងតែងខ្លួនតាមព្រះពុទ្ធ ព្រមទាំងសរសេរថា «យូរៗបានជួបមិត្តភក្តិម្តង ត្រូវតែងខ្លួនឱ្យគេគោរពបន្តិច» ។ អ្នកលេងបណ្តាញសង្គមថៃជាច្រើននាក់បានចូលមកបញ្ចេញមតិថា វាមិនសមរម្យទេ ដែលនាងស្លៀកពាក់តាមព្រះពុទ្ធបែបនេះ ហើយវាជាការជាន់ឈ្លីព្រះពុទ្ធសាសនាយ៉ាងធ្ងន់ធ្ងរ ។

រឿងរ៉ាវនេះបានលេចឮដល់ព្រះសង្ឃព្រះនាម Phayom Kanlayano ជាព្រះចៅអធិការវត្តសួនកែវ ក្នុងខេត្តណុនថាបុរី ប្រទេសថៃ ហើយព្រះអង្គបានមានសង្ឃដីកាដាស់តឿនសតិចំពោះទង្វើនេះថា នាងមិនស្គាល់ទីខ្ពស់ទាប ហើយនាងមិនបានគោរពដល់ព្រះពុទ្ធសាសនា និងមិនខ្លាចបាបកម្ម ។ ដូច្នេះ អ្នករស់នៅក្នុងភូមិ និងមេភូមិគួរតែហាមឃាត់នាងផងថា គួរគោរពនូវអ្វីដែលគួរគោរព ។

ព្រះសង្ឃព្រះនាម Phayom Kanlayano មានសង្ឃដីកាថា ៖ «អាត្មាសុំបិណ្ឌបាតណាញ៉ោម បើទោះជាញ៉ោមរៀបចំពិធីអ្វីក៏ដោយ ញ៉ោមអាចលេងកម្មវិធីផ្សេងទៀតមានច្រើនណាស់ ប៉ុន្តែហេតុអ្វីញ៉ោមត្រូវមកលេងតាមព្រះពុទ្ធរូបទៅវិញ ? ហើយការតែងខ្លួននេះ មិនមែនជាការសម្តែងកុនទេ ប៉ុន្តែវាជាការចូលរួមក្នុងកម្មវិធីផ្សេង ខណៈគ្មានអ្នកភូមិណារិះគន់សោះ» ។

ការតែងខ្លួនតាមព្រះពុទ្ធនេះ គេមិនដឹងថា តើស្ត្រីខាងលើបានតែងខ្លួនបែបនេះទៅចូលរួមក្នុងកម្មវិធីអ្វីទេ ។ ទោះយ៉ាងណា សង្គមថៃមិនអាចទទួលយកនូវទង្វើមិនសមរម្យរបស់នាងឡើយ ។ ចំណែកពលរដ្ឋថៃបានបញ្ចេញមតិក្នុងបណ្តាញសង្គមថា ៖ «ទោះជានាងមិនគោរពសាសនាព្រះពុទ្ធ ក៏នាងពុំគួរធ្វើបែបនេះដែរ» ។ ជនជាតិថៃម្នាក់ទៀតថា ៖ «នាងខ្វះការអប់រំពីក្រុមគ្រួសារតាំងពីតូច ឬមិនបានទទួលការរៀនសូត្រនៅសាលា» ។ ជនជាតិថៃម្នាក់ទៀតថា ៖ «គ្មានអ្វីទេ ដោយសារនាងចង់ល្បី និងចង់ឱ្យគេចាប់អារម្មណ៍ប៉ុណ្ណោះ» ។ ជនជាតិថៃម្នាក់ទៀតថា ៖ «តើនេះឬជាជនជាតិថៃ ? សូមគ្រូពេទ្យជួយនាំនាងទៅពិនិត្យខួរក្បាលជាបន្ទាន់» ។

ការប្រព្រឹត្តទង្វើមិនសមរម្យនេះចាត់ទុកថា ល្មើសនឹងច្បាប់ព្រហ្មទណ្ឌប្រទេសថៃ មាត្រា២០៨ ដែលបានចែងថា បុគ្គលណាម្នាក់តែងខ្លួន ឬប្រើប្រាស់គ្រឿងសម្គាល់ដើម្បីបង្ហាញថា ខ្លួនជាព្រះសង្ឃក្នុងសាសនាណាមួយ បុគ្គលនោះនឹងត្រូវមានទោសជាប់ពន្ធនាគារមិនលើសពី១ឆ្នាំ ឬពិន័យជាប្រាក់មិនលើស២ម៉ឺនបាត ឬទាំងជាប់ពន្ធនាគារ និងពិន័យ ៕

ប្រភព ៖ Mono News