រដ្ឋធានីវ៉ាស៊ីនតោន៖ រហូតមកដល់ពេលនេះ លោក ដូណាល់ ត្រាំ កំពុងតែហ៊ុមព័ទ្ធ ដោយសំណុំរឿងរាប់សិបករណី ហើយក្លាយជាអតីតប្រធានាធិបតីលើកដំបូង ប្រឈមមុខនឹងក្ដីក្ដាំងដ៏ច្រើនបំផុត នៅក្នុងប្រវត្ដិសាស្រ្ដរបស់សហរដ្ឋអាមេរិក ខណៈបច្ចុប្បន្ន គូប្រជែងបេក្ខភាពបោះឆ្នោតប្រធានាធិបតី នៅក្នុងគណបក្សសាធារណរដ្ឋរបស់គាត់ បានប្ដឹងទៅកាន់តុលាការ ទាមទារឲ្យបដិសេធនូវការឈរឈ្មោះជាថ្មីរបស់គាត់។

សារព័ត៌មាន Al Jazeera បានចេញផ្សាយ កាលពីព្រឹក ថ្ងៃអង្គារ ទី៣ ខែតុលា ថា ជាមួយនឹងសំណុំរឿងតាមផ្លូវច្បាប់ដ៏ច្រើន កំពុងតែរីករាលដាល ប្រឆាំងនឹងលោក ដូណាល់ ត្រាំ (Donald Trump) អតីតប្រធានាធិបតីសហរដ្ឋអាមេរិក នោះ ក៏មានការអំពាវនាវឥតឈប់ឈរ កើតចេញពីគូប្រជែងរបស់គាត់ រួមទាំង ការអំពាវនាវមួយចំនួន មកពីគណបក្សសាធារណរដ្ឋរបស់គាត់ ទាមទារឲ្យតុលាការ ដកសិទ្ធិរបស់គាត់ មិនអនុញ្ញាតិឲ្យឈរឈ្មោះជាប្រធានាធិបតី សម្រាប់ការបោះឆ្នោត នៅឆ្នាំ២០២៤។ ប៉ុន្តែតុលាការកំពូលរបស់សហរដ្ឋអាមេរិក បានបដិសេធករណីមួយ ត្រូវប្ដឹងឡើង ដោយលោក ចន អេនថូនី កាស្រ្ដូ (John Anthony Castro) ជាគូប្រជែងមួយរូបរបស់លោក ដូណាល់ ត្រាំ នៅក្នុងចំណោមបេក្ខជនប្រធានាធិបតីផ្សេងៗទៀត នៃគណបក្សសាធារណរដ្ឋ ដោយលើកឡើង ថា ដូណាល់ ត្រាំ គួរតែត្រូវដកសិទ្ធិចេញ ក្រោមបទប្បញ្ញត្តិ នៃធម្មនុញ្ញសហរដ្ឋអាមេរិក រារាំងដល់បុគ្គលណាមួយ ចូលរួមនៅក្នុងការបះបោរ ឬ បង្កភាពចលាចល នៅក្នុងការកាន់តំណែង។

បើទោះជាយ៉ាងណាក៏ដោយ តុលាការជាន់ទាបមួយរបស់សហរដ្ឋអាមេរិក ធ្លាប់រកឃើញ ថាលោក កាស្ត្រូ ខ្វះខាតជំហរតាមផ្លូវច្បាប់ នៅក្នុងការនាំរឿងក្ដីនេះបន្ដទៅមុខ ហើយតុលាការកំពូល បានច្រានចោលបណ្តឹងឧទ្ធរណ៍របស់គាត់ ផងដែរ។

ដោយឡែក លោក ម៉ៃខ៍ ផែស៍ (Mike Pence) អតីតអនុប្រធានាធិបតីសហរដ្ឋអាមេរិក នៅក្នុងរដ្ឋការរបស់លោកប្រធានាធិបតី ដូណាល់ ត្រាំ និង ជាបេក្ខជនឈរឈ្មោះប្រធានាធិបតីសហរដ្ឋអាមេរិក មកពីគណបក្សសាធារណរដ្ឋ ធ្លាប់លើកឡើង កាលពីពេលកន្លងទៅនេះ ថា លោក ត្រាំ ធ្លាប់សួរ អំពីជម្រើសត្រូវជ្រើសរើស រវាង គាត់ (ត្រាំ) និង រដ្ឋធម្មនុញ្ញ គួរត្រូវជ្រើសយកមួយណា។ គាត់បានឆ្លើយ ថា គាត់សុខចិត្តបោះបង់ចោលលោក ត្រាំ ហើយគាត់ដាច់ខាតត្រូវតែជ្រើសរើសយករដ្ឋធម្មនុញ្ញ។

លោកអនុប្រធានាបតីសហរដ្ឋអាមេរិក រូបនេះ បានបញ្ជាក់ ថា ភាពវឹកវរ នៅក្នុងវិមានសភា Capitol ជាចេតនា ចង់ផ្ដួលរំលំជ័យជម្នះនាឆ្នាំ២០២០របស់លោក ចូ បៃដិន (Joe Biden) ប្រធានាធិបតី ដែលកំពុងតែកាន់អំណាច នាពេលបច្ចុប្បន្ននេះ។ ដូច្នេះអ្នករំលោភបំពានលើរដ្ឋធម្មនុញ្ញ និង ជាអ្នកប្រាប់គេឲ្យរំលោភរដ្ឋធម្មនុញ្ញ មិនគួរវិលមកឈរឈ្មោះជាប្រធានាធិបតីសហរដ្ឋអាមេរិក ឬ ក្លាយជាប្រធានាធិបតីសហរដ្ឋអាមេរិក នោះឡើយ ព្រោះនៅសហរដ្ឋអាមេរិក មិនមានអ្នកណាម្នាក់ នៅលើពីលើច្បាប់នោះទេ៕

ប្រទេសជប៉ុន ៖ ក្រុមហ៊ុនជប៉ុនបានបង្ហាញមនុស្សយន្ត១គ្រឿងមានកម្ពស់រហូតដល់ជាង៤ម៉ែត្រ និងទម្ងន់៣តោនកន្លះ ។ ក្រុមហ៊ុនបានផលិតវាឡើងដោយចម្លងតាមមនុស្សយន្ត Gundam ដែលជាតួក្នុងខ្សែភាពយន្ត Animation ដ៏ល្បីល្បាញរបស់ប្រទេសជប៉ុន ។ គេអាចចូលទៅអង្គុយនៅផ្នែកខាងក្នុងមនុស្សយន្ត និងបញ្ជាវាបាន ។

មនុស្សយន្តនេះត្រូវបានផលិតឡើងដោយក្រុមហ៊ុន Tsubame Industries ដែលជាក្រុមហ៊ុនទើបចាប់ផ្តើមដំណើរការនៅទីក្រុងតូក្យូរបស់ជប៉ុន ហើយក្រុមហ៊ុនបានចំណាយពេលវេលារហូតដល់២ឆ្នាំក្នុងការផលិត ។ ក្រុមហ៊ុនបានដាក់ឈ្មោះមនុស្សយន្តថា «ARCHAX» ដែលឈ្មោះរបស់វា គឺដូចគ្នានឹងសត្វដាយណូស័រដែរ ។ រូបភាពផ្សេងៗនឹងបង្ហាញឡើងនៅក្នុងបន្ទប់អ្នកបញ្ជាមនុស្សយន្ត ដែលថតបានពីកាមេរ៉ាតភ្ជាប់ជាមួយផ្នែកខាងក្រៅ ដើម្បីឱ្យអ្នកបញ្ជាមនុស្សយន្តអាចបញ្ជាម្រាមដៃ និងដៃទាំងមូល តាមរយៈ Joystick ពីផ្នែកខាងក្នុងមនុស្សយន្ត ។

មនុស្សយន្ត ARCHAX បែងចែកការប្រើប្រាស់ជា២ផ្នែក គឺសម្រាប់ប្រើប្រាស់មុខងារជាមនុស្សយន្ត និងអាចធ្វើជាយានជំនិះបាន ដោយសារវាអាចធ្វើដំណើរបានចម្ងាយ១០គីឡូម៉ែត្រក្នុង១ម៉ោង ។

លោក រៀវ យ៉ូឈិតាក់ ប្រធានក្រុមហ៊ុន Tsubame Industries និយាយថា ៖ «គេអាចប្រើប្រាស់វានៅទីកន្លែងសង្គ្រោះ និងប្រើប្រាស់វានៅក្នុងអវកាសបាន ។ ក្រៅពីនេះ គេក៏បានយកវាទៅតាំងបង្ហាញជាសាធារណៈផងដែរ ។ យើងមានបំណងបង្ហាញមនុស្សយន្តជាច្រើនគ្រឿងទៀត ព្រោះយើងត្រូវការអភិវឌ្ឍន៍ឧបករណ៍ ដើម្បីឱ្យមនុស្សយន្ត១គ្រឿងអាចធ្វើការបានច្រើនផ្នែក» ។

ក្រុមហ៊ុនឱ្យដឹងថា មនុស្សយន្ត ARCHAX នឹងបង្ហាញខ្លួននៅក្នុងកម្មវិធី Japan Mobility Show នៅចុងខែតុលា ឆ្នាំ២០២៣នេះ ។ ក្រុមហ៊ុនបានដាក់គម្រោងលក់មនុស្សយន្តចំនួន៥គ្រឿងសម្រាប់អតិថិជនចាប់អារម្មណ៍ គឺមនុស្សយន្ត១គ្រឿងមានតម្លៃ៤០០លានយ៉េន ៕ ប្រភព ៖ TNN World

សហរដ្ឋអាមេរិក ៖ ប៉ូលិសបានបង្ហាញវីដេអូមួយចេញពីកាមេរ៉ាសុវត្ថិភាព ដែលមានបុរសម្នាក់ជ្រុលចង្កូត រួចបើកបររថយន្តបុកចូលក្នុងស្ថានីយប៉ូលិសនៅរដ្ឋ New Jersey សហរដ្ឋអាមេរិក ។ ក្រោយជនបង្កហេតុចុះពីលើរថយន្ត ប៉ូលិសក៏បានចាប់ខ្លួនគាត់ភ្លាមៗតែម្តង ដោយមិនចាំបាច់ពិបាកតាមចាប់ខ្លួន ។

នេះគឺជាវីដេអូថតដោយកាមេរ៉ាសុវត្ថិភាព ហើយត្រូវបានគេផ្សព្វផ្សាយបន្តគ្នានៅក្នុងបណ្តាញសង្គមអាមេរិក កាលពីថ្ងៃទី២៩ ខែកញ្ញា ឆ្នាំ២០២៣ ។ វីដេអូនេះបានបង្ហាញពីបុរសជនជាតិអាមេរិកម្នាក់បើកបររថយន្តប្រភេទ SUV បុកចូលក្នុងស្ថានីយប៉ូលិសនៅរដ្ឋ New Jersey សហរដ្ឋអាមេរិក រហូតបង្កឱ្យសម្ភារៈជាច្រើននៅក្នុងស្ថានីយប៉ូលិសខូចខាតយ៉ាងដំណំ ។

ចំណែកតុលាការប្រចាំតំបន់វឺលរេនខោនទី លើកឡើងថា ហេតុការណ៍នេះបានកើតឡើងកាលពីថ្ងៃទី២០ ខែកញ្ញា កន្លងមក ហើយគ្មានអ្នកណាម្នាក់រងរបួសទេ គឺមានតែប៉ូលិសម្នាក់ប៉ុណ្ណោះដែលរត់យករួចខ្លួន ។ នៅពេលជនបង្កគ្រោះថ្នាក់ចុះពីលើរថយន្ត គាត់ក៏ត្រូវបានប៉ូលិសចាប់ខ្លួនភ្លាមៗតែម្តង និងមិនចាំបាច់រង់ចាំយូរ ។ ប៉ូលិសរាយការណ៍ថា មុនពេលជនបង្កហេតុបើកបររថយន្តបុកចូលស្ថានីយប៉ូលិស គាត់បានបើករថយន្តបុកផ្ទះមួយកន្លែងផងដែរ ៕

ប្រភព ៖ TNN World

ឥណ្ឌូនេស៊ី៖ ប្រទេសឥណ្ឌូណេស៊ីបានសម្ពោធជាផ្លូវការនៅផ្លូវរថភ្លើងល្បឿនលឿនដំបូងគេនៅអាស៊ីអាគ្នេយ៍ដែលមានឈ្មោះថា WHOOSH កាលពីថ្ងៃទី២ ខែតុលា ឆ្នាំ២០២៣។

យោងតាមសារព័ត៌មាន CNN បានឱ្យដឹងថា រថភ្លើងនេះមានល្បឿនអតិបរមា ៣៥០ គីឡូម៉ែត្រក្នុងមួយម៉ោង ដែលអាចធ្វើដំណើរពីរដ្ឋធានី Jakarta ទៅកាន់រដ្ឋធានី Bandung នៃខេត្ត West Java ក្នុងរយៈពេល ៤៥ នាទីប៉ុណ្ណោះ ខណៈដែលការធ្វើដំណើរកាលពីមុនតាមរថភ្លើងធម្មតាចំណាយពេលប្រហែល ៣ ម៉ោងឯណោះ។ WHOOSH គឺជាផ្លូវរថភ្លើងល្បឿនលឿនប្រវែង ១៣៨ គីឡូម៉ែត្រ ដែលវាមានសមត្ថភាពអាចដំណើរការដោយថាមពលអគ្គីសនី និងគ្មានការបំភាយកាបូន រួមទាំងសន្សំពេលវេលា បូកជាមួយប្រតិបត្តិការដ៏ល្អប្រសើរ និងជាប្រព័ន្ធដែលអាចទុកចិត្តបាន។

ប្រធានាធិបតីឥណ្ឌូណេស៊ី Joko Widodo បានថ្លែងក្នុងពិធីសម្ពោធខ្សែរថភ្លើងល្បឿនលឿនថា “រថភ្លើងល្បឿនលឿន Jakarta- Bandung គឺជាព្រឹត្តិការណ៍ដ៏សំខាន់មួយនៅក្នុងប្រព័ន្ធដឹកជញ្ជូនសាធារណៈប្រកបដោយប្រសិទ្ធភាព ងាយស្រួលប្រើ និងរួមបញ្ចូលគ្នា។ វាគឺជានិមិត្តសញ្ញានៃភាពទំនើបកម្មរបស់យើងក្នុងវិស័យដឹកជញ្ជូនសាធារណៈ ជាមួយនឹងការតភ្ជាប់គ្មានថ្នេរនឹងមធ្យោបាយដឹកជញ្ជូនផ្សេងទៀត”។ លោកប្រធានាធិបតី Widodo ក៏បានបន្តទៀតថា រថភ្លើងដែលមានកៅអី ៦០០ នេះគឺជាការដឹកជញ្ជូនផ្លូវដែកល្បឿនលឿនដំបូងគេនៅអាស៊ីអាគ្នេយ៍។

ផ្លូវរថភ្លើងល្បឿនលឿន WHOOSH ត្រូវបានផ្តួចផ្តើមឡើងក្នុងឆ្នាំ ២០១២ នឹងរំពឹងថាបញ្ចប់នៅឆ្នាំ ២០១៩ ដោយចំណាយថវិកាតិចជាង ៥ ពាន់លានដុល្លារ។ ទោះជាយ៉ាងណាក៏ដោយ ដោយសារប្រទេសឥណ្ឌូនេស៊ីបានជួបប្រទះបញ្ហាប្រឈមជាច្រើនក្នុងអំឡុងពេលសាងសង់ និងជំងឺរាតត្បាត Covid-១៩ ដែលបណ្តាលឱ្យគម្រោងនេះ មានរយៈពេល ៤ បន្ថែមទៀត ក៏ដូចជាការចំណាយរហូតដល់ ៧.៣ ពាន់លានដុល្លារអាមេរិក៕
ប្រភព៖vnexpress

ប្រទេសឥណ្ឌា ៖ មនុស្សភាគច្រើនធ្លាប់បានឮព័ត៌មានថា ក្មេងៗលេបវត្ថុចូលក្នុងពោះរបស់ពួកគេ ព្រោះតែពួកគេមិនដឹងក្តី ហើយពេលប្រទះឃើញវត្ថុអ្វី តែងព្យាយាមដាក់ចូលមាត់ទាំងអស់ រហូតដល់ឪពុក-ម្តាយត្រូវប្រុងប្រយ័ត្នគ្រប់ពេលវេលា ។ ប៉ុន្តែបុរសម្នាក់នេះមិនមែនក្មេងទេ ហើយគេមិនដឹងថា គាត់បានលេបវត្ថុចូលក្នុងពោះឬយ៉ាងណាទេ ព្រោះក្រោយពីវះកាត់រួច គ្រូពេទ្យបានប្រទះឃើញវត្ថុចំនួន១៥០ដុំក្នុងពោះរបស់គាត់ ។

កាលពីថ្ងៃទី២៥ ខែកញ្ញា ឆ្នាំ២០២៣ បុរសឥណ្ឌាម្នាក់អាយុ៤០ឆ្នាំ បានចូលព្យាបាលជំងឺនៅមន្ទីរពេទ្យ ដោយសារគាត់ក្តៅខ្លួន ឈឺពោះ និងចង់ក្អួតចង្អោរ ហើយគាត់មានអាការៈបែបនេះជិត១ខែហើយ ។ វេជ្ជបណ្ឌិតបានណែនាំឱ្យគាត់ត្រួតពិនិត្យជំងឺ ហើយក៏ប្រទះឃើញវត្ថុលោហៈជាច្រើនក្នុងពោះរបស់គាត់ ។ ក្រោយមក គ្រូពេទ្យក៏បានបញ្ជូនគាត់ទៅវះកាត់ជាបន្ទាន់ដើម្បីជួយសង្គ្រោះជីវិត ប៉ុន្តែគាត់ក៏បានស្លា.ប់នាពេលបន្ទាប់ ។

ក្នុងអំឡុងពេលវះកាត់ គ្រូពេទ្យបានប្រមូលវត្ថុចំនួន១៥០ដុំពីក្នុងពោះបុរសនេះ ក្នុងនោះមានដូចជា ខ្សែភ្លើង, ឡេវអាវ, ម្ជុលខ្ទាស់ និងវត្ថុរឹងជាច្រើនទៀត ។ លោកស្រី Ajmer Kalra ជានាយកមន្ទីរពេទ្យលើកឡើងថា វត្ថុជាលោហៈទាំងនេះបានបណ្តាលឱ្យគាត់ឆ្លងមេរោគធ្ងន់ធ្ងរក្នុងក្រពះអាហារ ។

លោកស្រី Ajmer Kalra នាយកមន្ទីរពេទ្យបន្តថា ខ្ញុំមិនធ្លាប់ឃើញស្ថានបែបនេះពីមុនមកទេ ក្នុងការហ្វឹកហាត់ជាច្រើនឆ្នាំ ។ កន្លងមក ខ្ញុំធ្លាប់បានឃើញសរសៃសក់ ឬវត្ថុតូចៗក្នុងពោះអ្នកជំងឺ ប៉ុន្តែការមានវត្ថុផ្សេងៗគ្នា១៥០ដុំក្នុងពោះបែបនេះ វាមិនធ្លាប់កើតឡើងចំពោះអ្នកជំងឺណាម្នាក់ទេ ។

ចំណែកក្រុមគ្រួសាររបស់អ្នកជំងឺប្រាប់ថា គាត់មានជំងឺរលាកក្រពះអស់រយៈពេលជាង២ឆ្នាំហើយ ប៉ុន្តែគាត់មិនធ្លាប់និយាយរឿងនេះឱ្យគ្រួសារស្តាប់ទេ ហើយធ្វើឱ្យគ្រួសារពិបាកយល់ពីស្ថានភាពជំងឺរបស់គាត់ ។ ក្រៅពីនេះ គ្រួសារបាននាំគាត់ទៅជួបគ្រូពេទ្យក្នុងតំបន់ជាច្រើនកន្លែង ប៉ុន្តែមិនអាចរកឃើញមូលហេតុបណ្តាលឱ្យគាត់ឈឺពោះ ។

ចុងក្រោយ អ្នកជំងឺក៏ត្រូវគេបញ្ជូនទៅកាន់មន្ទីរពេទ្យជាបន្ទាន់ នៅពេលអាការៈជំងឺកាន់តែដុនដាប និងដេកមិនលក់ ។ គ្មានអ្នកណាដឹងថា អ្នកជំងឺបានលេបវត្ថុទាំងអស់ចូលក្នុងពោះដោយរបៀបណា និងដើម្បីអ្វីទេ ៕ ប្រភព ៖ 3Plus News