ប្រទេសថៃ ៖ យោងតាមមជ្ឈមណ្ឌលស្ទង់មតិ NIDA Poll បង្ហាញថា បច្ចុប្បន្ននេះ មានពលរដ្ឋថៃរហូតដល់៤៤% មិនចង់បានកូនទេ ហើយមូលហេតុមួយ គឺដោយសារស្ថានភាពសង្គមបច្ចុប្បន្ន ធ្វើឱ្យពួកគេកាន់តែបារម្ភពីការមានកូន ។ ហេតុអ្វីបានជាពលរដ្ឋថៃមិនចង់បានកូន ? សារព័ត៌មានថៃឈ្មោះ TNN Online នឹងធ្វើការបកស្រាយពីបញ្ហានេះ ។

កាលពីថ្ងៃទី១ ខែតុលា ឆ្នាំ២០២៣ NIDA Poll បានបង្ហាញលទ្ធផលស្ទង់មតិមួយធ្វើឡើងចាប់ពីថ្ងៃទី២៦ ដល់ថ្ងៃទី២៨ ខែកញ្ញា ឆ្នាំ២០២៣ អំពីប្រធានបទ «ពលរដ្ឋថៃគួរតែមានកូន» ដែលបានសាកសួរការយល់ឃើញរបស់ពលរដ្ឋរស់នៅគ្រប់តំបន់ទូទាំងប្រទេសថៃ ចំនួន១.៣១០នាក់ គឺមានអាយុចាប់ពី១៨ឆ្នាំ រហូតដល់៤០ឆ្នាំ បង្ហាញថា ពលរដ្ឋថៃរហូតដល់៤៤% មិនចង់បានកូនទេ ។ មូលហេតុចម្បងដែលធ្វើឱ្យពួកគេមិនចង់បានកូន គឺមិនចង់បង្កើនការចំណាយក្នុងការចិញ្ចឹមកូន និងព្រួយបារម្ភថា កូននឹងរស់នៅដោយរបៀបណាក្នុងស្ថានភាពសង្គមបច្ចុប្បន្ន ។

មូលហេតុទាំងពីរនេះ គឺមានសមាមាត្រភាគរយស្មើគ្នាក្នុងលទ្ធផលស្ទង់មតិរបស់ NIDA Poll គឺស្មើនឹង៣៨,៣២% ។ ចំណែកអ្នកឆ្លើយតបការស្ទង់មតិ៣៧,៧២% ទៀតបញ្ជាក់ថា ពួកគេមិនចង់មានបន្ទុកចិញ្ចឹមកូនទេ ខណៈអ្នកឆ្លើយតប៣៣,២៣% ប្រាប់ថា ចង់ឱ្យជីវិតខ្លួនឯករាជ្យ ។ អ្នកឆ្លើយតប១៧,៦៦% ប្រាប់ថា ខ្លាចចិញ្ចឹមកូនមិនបានល្អ ។ ក្រៅពីនេះ នៅមានមូលហេតុជាច្រើនទៀតដែលមនុស្សភាគច្រើនជ្រើសរើសការគ្មានកូន ដូចជា ៖ ពួកគេចង់ផ្តល់ភាពសំខាន់លើការងារច្រើនជាង, សុខភាពពួកគេ ឬដៃគូមិនសូវល្អ, ខ្លាចសុខភាពឪពុកម្តាយមិនល្អ ហើយធ្វើឱ្យកូនកើតមកមានសុខភាពមិនល្អដែរ និងខ្លាចកម្មតាមទាន់ ដោយសារពួកគេធ្លាប់ធ្វើមិនល្អដាក់ឪពុកម្តាយ ។

ជាមួយគ្នានេះ អត្រាការស្លា.ប់បាននាំមុខអត្រាកំណើត ក៏ជាបញ្ហាមួយទៀតក្នុងបញ្ហាចំនួនប្រជាពលរដ្ឋថៃ ដែលរដ្ឋាភិបាលត្រូវជំរុញការដោះស្រាយ ។ ប្រទេសថៃមានអត្រាកំណើតទាបជាងអត្រាការស្លា.ប់អស់រយៈពេល២ឆ្នាំជាប់ៗគ្នា ដោយនៅឆ្នាំ២០២២ ឃើញថា អត្រាកំណើតរបស់ជនជាតិថៃស្មើត្រឹមតែ៥០២.១០៧នាក់ (ជាង៥សែននាក់) ខណៈអត្រាការស្លា.ប់ស្មើរហូតដល់៥៩៥.៩៦៥នាក់ ។

ទោះយ៉ាងណា បើទោះជាពលរដ្ឋថៃមិនចង់បានកូនក្តី ប៉ុន្តែក្នុងលទ្ធផលស្ទង់មតិបានបញ្ជាក់ថា មានពលរដ្ឋថៃស្មើ៥៣,៨៩% ចង់បានកូន ។ ក្រៅពីនេះ លទ្ធផលស្ទង់មតិបានបង្ហាញឱ្យឃើញពីវិធានការដំបូងចំនួន៥ ដែលពលរដ្ឋចង់ឱ្យរដ្ឋាភិបាលគាំទ្រ ដើម្បីជំរុញឱ្យពលរដ្ឋមានកូន ដូចជា ៖

១-រដ្ឋាភិបាលត្រូវគាំទ្រការសិក្សារបស់កុមារដោយឥតគិតថ្លៃ រហូតដល់បញ្ចប់ឆ្នាំសិក្សា សម្រាប់អ្នកមានកូន
២-រដ្ឋាភិបាលត្រូវជួយផ្តល់ប្រាក់ឧបត្ថម្ភកូន រហូតដល់ពួកគេអាយុ១៥ឆ្នាំ
៣-កាត់បន្ថយពន្ធសម្រាប់អ្នកមានកូន
៤-បន្ថែមចំនួនថ្ងៃឈប់សម្រាកសម្រាប់ឪពុកម្តាយថែទាំកូន និង
៥-ផ្តល់ប្រាក់រង្វាន់សម្រាប់កុមារកើតដំបូង ៕

ប្រភព ៖ TNN Online

រដ្ឋធានីវ៉ាស៊ីនតោន៖ ប្រធានធិបតីរុស្ស៊ី លោក វ៉្លាឌីមៀ ពូទីន ក៏ដូចជា មេដឹកនាំចិន បានចងក្រងប្រទេសចំនួន៥ រួមមាន ប្រេស៊ីល រុស្ស៊ី ឥណ្ឌា ចិន និង អាហ្វ្រិកខាងត្បូង បង្កើតជាប្លុកមួយ ហៅ «BRICS» ដើម្បីជំរុញឲ្យសេដ្ឋកិច្ច កាន់តែមានសន្ទុះខ្លាំងក្លាឡើង ហើយអ្វីដែលជាគោលបំណងដ៏សំខាន់នោះ គឺ ប្លុកថ្មី ដែលហៅខ្លួនឯង ជា លោកខាងត្បូង ចង់ធាក់ប្រាក់ដុល្លារអាមេរិក ចោល ប៉ុន្ដែឥឡូវប្រាក់ដុល្លារអាមេរិក នៅតែបន្ដឡើងថ្លៃ លើសពីលុយរបស់ប្រ៊ីកស៍។

សារព័ត៌មាន Watch Guru បានចេញផ្សាយ កាលពីថ្ងៃពុធ ទី៤ ខែតុលា ថា ប្រាក់ដុល្លារអាមេរិក កំពុងតែកើនឡើងដល់កម្រិតខ្ពស់ថ្មី បើធៀបនឹងរូបិយប័ណ្ណ BRICS ទាំងអស់ នៅក្នុងទីផ្សារប្តូរប្រាក់បរទេស។ ប្រាក់ដុល្លារ បានធ្វើឱ្យប្រាក់យន់របស់ចិន ប្រាក់រូពីឥណ្ឌា និង រូបិយប័ណ្ណរុស្សី នៅក្នុងចំណោមរូបិយប័ណ្ណផ្សេងៗទៀត ចុះថោក ហើយប្រាក់ដុល្លារកំពុងតែកើនឡើង ដល់កម្រិតខ្ពស់ ប្រចាំសប្តាហ៍ថ្មី។ ការកើនឡើង នៃប្រាក់ដុល្លារអាមេរិក ក៏កំពុងតែធ្វើឱ្យមាស ធ្លាក់ថ្លៃផងដែរ ដោយសារលោហៈដ៏មានតម្លៃមួយនេះ បានធ្លាក់ចុះទាប ប្រចាំខែ កាលពីសប្តាហ៍មុន។

ប្រាក់ដុល្លារអាមេរិក បានឡើងថ្លៃ ដល់កម្រិតខ្ពស់ នៅក្នុងរយៈពេល១០ខែ កាលពីថ្ងៃអង្គារ (ទី៣ ខែតុលា។ ម្យ៉ាងវិញទៀត មាសបានធ្លាក់ថ្លៃ មកនៅកម្រិតទាប នៅក្នុងរយៈពេលប្រាំពីរខែ បើធៀបនឹងប្រាក់ដុល្លារ បានកើនឡើង កាលពីថ្ងៃអង្គារ ទី៣ ខែតុលា ឆ្នាំ២០២៣។ មាសបានធ្លាក់ថ្លៃ ១ភាគរយ នៅថ្ងៃទី១ ខែតុលា ដោយបានធ្លាក់ចុះដល់កម្រិតទាប នៅខែមីនា ឆ្នាំ២០២៣ ។

លើសពីនេះ មូលបត្របំណុលរតនាគាររបស់សហរដ្ឋអាមេរិក បានឡើងដល់កម្រិតខ្ពស់ នៅក្នុងរយៈពេល១៦ឆ្នាំមកនេះ បើទោះជាសម្ពន្ធភាព BRICS ហ៊ានបោះលុយ១២៣ពាន់លានដុល្លារ នៅក្នុងមូលបត្របំណុលរតនាគាររបស់សហរដ្ឋអាមេរិក យ៉ាងណាក៏ដោយ។

របាយការណ៍ បញ្ជាក់ ថា ធនាគារបម្រុង នៃប្រទេសឥណ្ឌា (RBI) គ្រប់គ្រងលើធនាគារនានា គាំទ្រដោយរដ្ឋ បានបោះចោលប្រាក់ដុល្លារ នៅក្នុងទីផ្សារប្តូរប្រាក់អន្តរជាតិ។ សេដ្ឋកិច្ចរបស់សហរដ្ឋអាមេរិក កំពុងតែនូវរក្សាភាពរឹងមាំ ខណៈទិន្នន័យ CPI កាលពីខែមុន បានចេញមក គឺល្អជាងការរំពឹងទុក។ ទីផ្សារការងារ កំពុងតែបើកចំហ សម្រាប់ការងារថ្មី ដែលទទួលសម្ពាធពីសេដ្ឋកិច្ចដែលមានបន្ទុក។

ប្រាក់ដុល្លារអាមេរិក បានដំណើរការល្អលើសពីការរំពឹងទុក ថ្វីបើប្រឈមមុខនឹងការវាយលុកយ៉ាងធ្ងន់ធ្ងរពី BRICS ដែលរារាំងដល់ការចាយវាយ នៅក្នុងប្លុករបស់ខ្លួនយ៉ាងណាក្ដី។ បើទោះជាយ៉ាងណាក៏ដោយ BRICS បានបញ្ជាក់ ថា គំនិត នៃការធ្វើឱ្យប្រាក់ដុល្លារអស់ឥទ្ធិពលនេះ គឺជាគោលដៅដ៏យូរអង្វែង។ ដូច្នេះ ប្រាក់ដុល្លារអាមេរិក ត្រូវតែទប់ទល់នឹងការសាកល្បង នៅក្នុងរយៈពេលនេះ ព្រោះរូបិយប័ណ្ណផ្សេងៗទៀត មើលទៅ ចង់ផ្ដួលប្រាក់ដុល្លារ ចេញពីរូបិយប័ណ្ណបម្រុងរបស់ពិភពលោក។

បណ្ដាមេដឹកនាំប្រទេសធំៗ ចំនួន៥ នៅលើពិភពលោក រួមមាន ប្រេស៊ីល (Brazil) រុស្ស៊ី (Russia) ឥណ្ឌា (India) ចិន (China) និង អាហ្វ្រិកខាងត្បូង (South Africa) បានផ្ដួចផ្ដើមគំនិត ចងក្រងគ្នា បង្កើតជាប្លុកថ្មីមួយ ហៅ BRICS (ប៊្រីកស៍) នៅក្នុងគោលបំណង ផ្ដោតយ៉ាងខ្លាំងលើសេដ្ឋកិច្ច និង ការបន្ថោក ឬ លែងប្រើប្រាស់ប្រាក់ដុល្លារអាមេរិក ប៉ុន្ដែរហូតមកដល់ពេលនេះ រូបិយប័ណ្ណដុល្លារ នៅតែបន្ដឡើងថ្លៃ។

បើតាម Statista បានឲ្យដឹង ថា BRICS មានប្រជាជន សរុប ៣,២ពាន់លាននាក់ ឬស្មើនឹង៤៧ភាគរយ នៃចំនួនប្រជាជន នៅលើពិភពលោក។ ប៉ុន្ដែប្លុកមួយនេះ មានផលិតផលក្នុងស្រុកសរុប (GDP) មានត្រឹមតែ២៧,៦ពាន់ពាន់លានដុល្លារអាមេរិក ($27.6 trillion in 2023) នៅឆ្នាំ២០២៣ ឬ ស្មើនឹងប្រហែល៣៦ នៃ GDP សរុបរបស់ពិភពលោក ហើយមានចំនួនច្រើន GDP របស់សហរដ្ឋអាមេរិក តែបន្ដិចបន្ដួចប៉ុណ្ណោះ។

ផ្ទុយទៅវិញ ប្លុក G7 របស់លោកសេរី រួមមាន កាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និង សហរដ្ឋអាមេរិក មានប្រជាជន សរុបត្រឹមតែប្រហែល ៧៧០លាននាក់ ឬស្មើនឹងប្រហែល ត្រឹមតែ១០ភាគរយប៉ុណ្ណោះ នៃប្រជាជនសរុបរបស់ពិភពលោក។ ប៉ុន្ដែប្លុក G7 នេះ មានផលិតផលក្នុងស្រុកសរុប ៤៥,៩ពាន់ពាន់លានដុល្លារអាមេរិក (45.9 trillion U.S. dollars) ឬ ស្មើនឹងប្រហែល ៤០ភាគរយ នៃ GDP សរុបរបស់ពិភពលោក។

ក្រុមអ្នកជំនាញមួយចំនួន បានផ្ដល់ជាទស្សនៈផ្ទាល់ខ្លួន ថា ប្លុក G7 ជាប្រទេសអ្នកមានសេដ្ឋកិច្ចរីកចម្រើនបំផុត នៅលើពិភពលោក និង ប្រកាន់យកនូវគោលការណ៍ប្រជាធិបតេយ្យសេរី ហើយមានសម្ពន្ធមិត្ត សុទ្ធតែប្រទេសរីកចម្រើនខាងសេដ្ឋកិច្ច។ ផ្ទុយស្រឡះពីប្លុក BRICS គឺមានសម្ពន្ធមិត្តមួយចំនួន ជាប្រទេសមានសេដ្ឋកិច្ច នៅមិនទាន់រឹងមាំខ្លាំងនៅឡើយ ហើយសូម្បីតែ GDP របស់សហរដ្ឋអាមេរិក ត្រឹមតែមួយប្រទេស មានទំហំប្រហាក់ប្រហែលនឹង GDP របស់ BRICS ទៅហើយ។ អ៊ីចឹង ការចង់ទាត់ចោលប្រាក់ដុល្លារ ឬ ការលែងទទួលយកប្រាក់ដុល្លារ ក៏ដូចជាការយកឈ្នះលើប្រាក់ដុល្លារ ពិតជារឿងពិបាកបំផុត៕

បរទេស៖ ថ្មីៗនេះ លោក Mark Zuckerberg ដែលជានាយកប្រតិបត្តិ Meta បានប្រកាសលក់ផ្ទះមួយក្នុងចំនោមផ្ទះនៅ San Francisco របស់គាត់ក្នុងតម្លៃ ៣១ លានដុល្លារនៃកិច្ចព្រមព្រៀងក្រៅទីផ្សារ នេះបើយោងតាមអ្នកស្រី Priscilla Chan ភរិយារបស់ Mark។

យោងតាមសារព័ត៌មាន CNN ដែលបានចុះផ្សាយកាលពីថ្ងៃទី ៤ ខែតុលាថា ផ្ទះមួយរបស់ Mark នៅ San Francisco មានទំហំ ៧,៣៨៦ ហ្វីតការ៉េ ដែលត្រូវបានគេដឹងថា សាងសង់ក្នុងឆ្នាំ ១៩២៨ មានបន្ទប់គេងចំនួន ៤ និងបន្ទប់ទឹកចំនួន ៤ ហើយស្ថិតនៅសង្កាត់ Mission District និងសង្កាត់ Dolores Heights នៃទីក្រុង San Francisco សហរដ្ឋអាមេរិក។

នាយកប្រតិបត្តិ Meta វ័យ ៣៨ ឆ្នាំ និងប្រពន្ធរបស់គាត់ បានទិញផ្ទះនេះក្នុងឆ្នាំ ២០១២ ក្នុងតម្លៃត្រឹមតែ ១០ លានដុល្លារប៉ុណ្ណោះ។ នៅពេលដែលគូស្នេហ៍នេះបានទិញផ្ទះកាលពី ១១ ឆ្នាំមុន វាមានទំហំតូចជាង ១,៨០០ ហ្វីតការ៉េ បន្ទាប់មកគាត់បានពង្រីកទីធ្លារផ្ទះរបស់គាត់បន្ថែម ដោយការទិញដីនៅក្បែរនោះ។

ទោះជាយ៉ាងណានាយកប្រតិបត្តិ Meta និងភរិយារបស់គាត់កាលពីខែមីនាឆ្នាំ ២០២២ ពួកគេបានទិញដីជិត ៦០០ ហិចតាបន្ថែមទៀតនៅលើកោះហាវ៉ៃ ក្នុងតម្លៃ ៥៣ លានដុល្លារអាមេរិក នេះបើតាមការរាយការណ៍របស់ Mansion Global។ មិនតែប៉ុណ្ណោះនៅខែឧសភាឆ្នាំដដែលនោះ អ្នកទាំងពីរក៏បានទិញផ្ទះមួយទៀតដែលមានតម្លៃ ៥.៣ លានដុល្លារ។ ដូច្នេះហើយ បច្ចុប្បន្នលោក Mark Zuckerberg និងអ្នកស្រី Priscilla Chan បានកាន់កាប់ដីសរុបរបស់ពួកគេដល់ជាង ១,៣០០ ហិចតានៅលើកោះហាវ៉ៃសហរដ្ឋអាមេរិក៕

បរទេស៖ យោងតាមសហព័ន្ធបាល់ទាត់ពិភពលោក FIFA ដែលបានប្រកាសកាលពីល្ងាចថ្ងៃទី ៤ ខែតុលានេះថា ការប្រកួតបាល់ទាត់ពិភពលោកបុរសក្នុងឆ្នាំ ២០៣០ នឹងត្រូវធ្វើជាម្ចាស់ផ្ទះដោយប្រទេសចំនួន ៦ ក្នុងទ្វីបចំនួន ៣ ផ្សេងៗគ្នា ដើម្បីអបអរសាទរខួប ១០០ ឆ្នាំនៃ FIFA World Cup ។ ដូច្នេះហើយ ប្រទេសអេស្ប៉ាញ ព័រទុយហ្គាល់ និងម៉ារ៉ុក នឹងត្រូវធ្វើជាម្ចាស់ផ្ទះនៃការប្រកួតនេះ ខណៈដែលអ៊ុយរូហ្គាយ ប៉ារ៉ាហ្គាយ និងអាហ្សង់ទីន នឹងរៀបចំការប្រកួតបើកឆាករៀងៗខ្លួន ដើម្បីរំលឹកខួប ១០០ ឆ្នាំចាប់តាំងពីការប្រកួត World Cup លើកដំបូងត្រូវបានប្រារព្ធឡើង។

ប្រធាន FIFA លោក Gianni Infantino បាននិយាយថា “ទោះបីនៅក្នុងពិភពលោកកំពុងមានការបែកបាក់គ្នាក៏ដោយ ក៏ FIFA និងបាល់ទាត់កំពុងរួបរួមគ្នា” ។ លោក Gianni ក៏បានបន្តទៀតថា ការប្រកួតបើកឆាកនឹងធ្វើឡើងនៅកីឡាដ្ឋាន Estadio Centenario ក្នុងប្រទេសអ៊ុយរូហ្គាយ ដែលជាកីឡាដ្ឋានប្រកួតជាលើកដំបូងក្នុងឆ្នាំ ១៩៣០។នៅឆ្នាំ ២០៣០ យើងនឹងមានការបោះជំហានជាសកលតែមួយគត់នៃទ្វីបចំនួន ៣ គឺអាហ្រ្វិក អឺរ៉ុប និងអាមេរិកខាងត្បូង។ ប្រទេសចំនួនប្រាំមួយគឺ អាហ្សង់ទីន ម៉ារ៉ុក ប៉ារ៉ាហ្គាយ ព័រទុយហ្គាល់ អេស្ប៉ាញ រួមទាំងអ៊ុយរូហ្គាយ នឹងស្វាគមន៍ បង្រួបបង្រួមពិភពលោក ដើម្បីអបអរសាទរខួប ១០០ ឆ្នាំនៃ FIFA World Cup។

លោក Alejandro Dominguez ប្រធាន CONMBEOL បាននិយាយក្នុងសន្និសីទសារព័ត៌មានមួយថា វាជាព្រឹត្តិការណ៍ប្រវត្តិសាស្ត្រ ដើម្បីគោរពដល់ការចងចាំរបស់អ្នកដែលបានមកមុនយើង។ យើងសូមកោតសរសើរជាថ្មីម្តងទៀតនូវទំនុកចិត្តដែល FIFA និងសហការីរបស់យើងបានបង្ហាញសម្រាប់ព្រឹត្តិការណ៍ និងកាលបរិច្ឆេទជាប្រវត្តិសាស្ត្រ។

ដូច្នេះហើយ ការប្រកួតឆ្នាំ ២០៣០ នឹងក្លាយជាការប្រកួតបាល់ទាត់ពិភពលោកដំបូងគេដែលត្រូវបានធ្វើជាម្ចាស់ផ្ទះនៅទូទាំង ៣ ទ្វីប និងជាការប្រកួតដំបូងគេដែលធ្វើឡើងនៅក្នុងប្រទេសចំនួន ៦ ផ្សេងគ្នាផងដែរ៕

យោងតាមរបាយការណ៍របស់គេហទំព័រ Cable.co.uk បង្ហាញថា ប្រទេសកម្ពុជាបានជាប់ចំណាត់ថ្នាក់ទី៥ លើពិភពលោក និងជាប់ចំណាត់ថ្នាក់ទី១ នៅតំបន់អាស៊ាន គឺជាប្រទេសមានតម្លៃអ៊ីនធើណេតចល័ត (Mobile Data) 1 GB ថោកបំផុត ។ ចំណែកប្រទេសឡាវបានជាប់ចំណាត់ថ្នាក់ទី១៤ លើពិភពលោក និងជាប់ចំណាត់ថ្នាក់ទី២ នៅតំបន់អាស៊ាន គឺជាប្រទេសមានតម្លៃអ៊ីនធើណេតចល័ត (Mobile Data) 1 GB ថោកបំផុត ។

របាយការណ៍នេះ គឺជាការប្រៀបប្រៀបគម្រោងទិន្នន័យអ៊ីនធើណេតចល័តចំនួន៥.៦០៣គម្រោងនៅប្រទេសចំនួន២៣៧ ។ គេហទំព័រ Cable.co.uk បានប្រមូលផ្តុំទិន្នន័យ និងធ្វើការវិភាគដើម្បីប្រៀបធៀបតម្លៃអ៊ីនធើណេតចល័តក្នុង 1 GB នៅប្រទេសនានាលើពិភពលោក ។

ចំណែកអ៊ីស្រាអែលជាប្រទេសមានតម្លៃអ៊ីនធើណេតចល័តក្នុង 1 GB ថោកបំផុតលើពិភពលោក ដោយមានតម្លៃត្រឹមតែ០.០២ដុល្លារអាមេរិកប៉ុណ្ណោះ ។ មូលហេតុដែលធ្វើឱ្យសេវាអ៊ីនធើណេតចល័តមានតម្លៃថោកនៅអ៊ីស្រាអែល គឺដោយសារការប្រកួតប្រជែងគ្នាយ៉ាងខ្លាំងក្លារបស់ក្រុមហ៊ុនផ្តល់សេវាកម្មអ៊ីនធើណេតនៅប្រទេសអ៊ីស្រាអែល ។ ដូច្នេះ ទើបធ្វើឱ្យប្រទេសនេះផ្តល់សេវាកម្មទិន្នន័យអ៊ីនធើណេតទ្រង់ទ្រាយធំ ដែលគ្របដណ្តប់ទាំងបណ្តាញ 4G LTE និង 5G ។

ទោះយ៉ាងណា ប្រទេសឡាវបានជាប់ចំណាត់ថ្នាក់ទី១៤ លើពិភពលោក ជាមួយប្រទេសរុស្ស៊ី និងស្រីលង្កា ដោយតម្លៃអ៊ីនធើណេតជាមធ្យមស្មើប្រមាណ០.២៥ដុល្លារអាមេរិកក្នុង 1 GB ។ ចំណែកតម្លៃអ៊ីនធើណេតជាមធ្យមនៅប្រទេសកម្ពុជា ស្មើប្រមាណ០.១២ដុល្លារអាមេរិកក្នុង 1 GB ។ រីឯប្រទេសមីយ៉ាន់ម៉ា, សិង្ហបុរី និងហ្វីលីពីន មិនបានជាប់ចំណាត់ថ្នាក់កំពូលចំនួន៥០ប្រទេសទេ ។

Dan Howdle ជាអ្នកវិភាគពីអ្នកប្រើប្រាស់បណ្តាញអ៊ីនធើណេតប្រចាំ Cable.co.uk លើកឡើងថា វាជារឿងគួរឱ្យរីករាយណាស់ដែលបានឃើញតម្លៃអ៊ីនធើណេតចល័តចុះថោកនៅលើពិភពលោក ហើយប្រទេសភាគច្រើនបានស្នើសុំតម្លៃទាបជាង២ដុល្លារអាមេរិកក្នុង 1 GB ។ ហេតុនេះ វាជាភាពខុសប្លែកគ្នាយ៉ាងខ្លាំងពីអ្វីដែលគេធ្លាប់ឃើញកាលពីឆ្នាំ២០១៩ ៕ ប្រភព ៖ AEC connect

ប្រទេសថៃ ៖ កាលពីថ្ងៃទី៤ ខែតុលា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុប្រទេសថៃ បានថ្លែងក្នុងសិក្ខាសាលាមួយស្តីពី «Thailand Economic Outlook 2024 Change the Future Today» ដែលរៀបចំឡើងដោយសារព័ត៌មានថៃ ថា ការលើកកម្ពស់វិស័យទេសចរណ៍របស់ប្រទេសថៃ រដ្ឋាភិបាលកំពុងតែពិចារណាពន្យារពេលបិទក្លិបរាត្រីនានាដើម្បីជួយជំរុញវិស័យទេសចរណ៍ ។

លោក សេដ្ឋា ថាវីស៊ីន នាយករដ្ឋមន្ត្រីលើកឡើងថា បច្ចុប្បន្ន ប្រទេសថៃមានប្រៀបលើគ្រប់ផ្នែកទាំងអស់ ប៉ុន្តែយើងបានផ្សព្វផ្សាយអំពីតំបន់ទេសចរណ៍ប្រទេសថៃតិចនៅឡើយ និងការរៀបចំព្រឹត្តិការណ៍លំដាប់ពិភពលោក ។ លោកនាយករដ្ឋមន្ត្រីថ្លែងថា ៖ «ប្រសិនបើរដ្ឋាភិបាលធ្វើវិសោធនកម្មច្បាប់ ដោយអនុញ្ញាតឱ្យក្លិបរាត្រីនានាអាចបើកទទួលភ្ញៀវក្នុងរយៈពេល២៤ម៉ោង វាក៏អាចប្រឈមជាមួយបញ្ហាជាច្រើនដូចជា បញ្ហាសង្គម និងបញ្ហាសន្តិសុខ ។ ដូច្នេះ យើងត្រូវគិតឡើងវិញថា តើការបិទក្លិបរាត្រីនៅម៉ោង១ភ្លឺ តើវាគ្រប់គ្រាន់សម្រាប់ការប្រកួតប្រជែងជាមួយទីក្រុងផ្សេងៗនៅទូទាំងពិភពលោកដែរឬទេ ? ក្នុងឋានៈប្រទេសថៃចង់ក្លាយជាមជ្ឈមណ្ឌលទេសចរណ៍ប្រចាំតំបន់អាស៊ាន» ។

លោក សេដ្ឋា ថាវីស៊ីន នាយករដ្ឋមន្ត្រីថៃបន្តថា យើងត្រូវមើលថា តើការបិទក្លិបរាត្រីនៅម៉ោង១ភ្លឺ សមល្មមដែរឬទេសម្រាប់ប្រទេសថៃ ? បើមិនសមល្មមទេ យើងត្រូវតែសាកល្បងគិតជាថ្មី ហើយទទួលស្គាល់ការពិតថា តើយើងគួរតែពន្យារពេលបិទក្លិបរាត្រីដែរឬទេ ? គួបផ្សំនឹងការយកពន្ធផ្សេងៗដែលនឹងធ្វើឱ្យប្រទេសថៃល្អប្រសើរឡើង ។ ហេតុនេះ រដ្ឋាភិបាលបានចាប់ផ្តើមលើកលែងទិដ្ឋាការសម្រាប់ភ្ញៀវទេសចរចិនមុនគេ ។ លើសពីនេះ នៅមានគោលនយោបាយជាច្រើនទៀតដែលត្រូវបង្កើតឡើងមក ដើម្បីគាំទ្រឱ្យប្រទេសថៃក្លាយជាមជ្ឈមណ្ឌលទេសចរណ៍ប្រចាំតំបន់អាស៊ាន និងជាប្រទេសគោលដៅរបស់ភ្ញៀវទេសចរបរទេស ។

លោកនាយករដ្ឋមន្ត្រីបញ្ជាក់ថា រដ្ឋាភិបាលជឿជាក់ថា ប្រសិនបើប្រទេសថៃបានជំរុញគោលនយោបាយនានាឱ្យល្អនោះ គឺវានឹងមានទាំងគុណសម្បត្តិ និងគុណវិបត្តិ ហើយលោកចង់ឱ្យមានការផ្សព្វផ្សាយព័ត៌មានទាំងពីរផ្នែក ។ គ្រប់ស្ថាប័នទាំងអស់អាចជជែកគ្នាត្រង់ទៅត្រង់មក ព្រមទាំងមានការផ្តល់យោបល់ប្រកបដោយភាពច្នៃប្រឌិតផងដែរ ៕ ប្រភព ៖ Bangkok biznews