នៅក្នុងទូរស័ព្ទដៃរបស់អ្នក តើមានបណ្តាញសង្គមទាំងនេះដែរឬទេ ? បើតាមការចាត់ចំណាត់ថ្នាក់របស់ pCloud បង្ហាញថា មានបណ្តាញសង្គមចំនួន៥ ដែលអាចប្រមូលទិន្នន័យផ្ទាល់ខ្លួនបានច្រើនបំផុតពីអ្នកប្រើប្រាស់ ។ តើបណ្តាញសង្គមទាំងនេះឈ្មោះអ្វីខ្លះ ?

១-Instagram ៖
Instagram អាចប្រមូលទិន្នន័យផ្ទាល់ខ្លួនរបស់អ្នកប្រើប្រាស់បានច្រើនរហូតដល់៨៦% បន្ទាប់មក ក៏ធ្វើការផ្សព្វផ្សាយពាណិជ្ជកម្មជាញឹកញាប់ជាមួយអ្នកប្រើប្រាស់ ។ ពាណិជ្ជកម្មទាំងនេះ គឺជារឿងរ៉ាវដែលអ្នកប្រើប្រាស់បានគិត បាននិយាយ ឬកំពុងតែស្វែងរកក្នុងកម្មវិធីផ្សេងៗ ។

២-Facebook ៖
Facebook អាចប្រមូលទិន្នន័យផ្ទាល់ខ្លួនរបស់អ្នកប្រើប្រាស់បានច្រើនរហូតដល់៨៣% ។ អ្នកប្រើប្រាស់មិនចាំបាច់ចម្លែកចិត្តទេ ព្រោះពេលខ្លះ យើងកំពុងតែគិតពីអ្វី ឬនិយាយអ្វី គឺកម្មវិធីនេះអាចផ្សព្វផ្សាយពាណិជ្ជកម្មឱ្យយើងឃើញជានិច្ច ។

៣-TikTok ៖
TikTok គឺជាកម្មវិធីបង្ហាញវីដេអូខ្លីៗ ហើយវាតែងប្រមូលទិន្នន័យផ្សេងៗពាក់ព័ន្ធនឹងការផ្សាយពាណិជ្ជកម្ម ។ ប៉ុន្តែកម្មវិធីនេះមិនបានបញ្ជូនទិន្នន័យផ្ទាល់ខ្លួនអ្នកប្រើប្រាស់ទៅឱ្យប្រទេសចិនទេ ។ បណ្តាញសង្គមមួយនេះអាចប្រមូលទិន្នន័យផ្ទាល់ខ្លួនអ្នកប្រើប្រាស់រហូតដល់៨២% ។

៤-YouTube ៖
សម្រាប់ YouTube មនុស្សភាគច្រើនគិតថា ពួកគេគ្រាន់តែទស្សនាវីដេអូក្នុង YouTube ជាការកម្សាន្តប៉ុណ្ណោះ និងគ្មានបញ្ហាអ្វីទេ ។ ប៉ុន្តែតើដឹងឬទេថា ពេលខ្លះ បណ្តាញសង្គមមួយនេះបានប្រមូលទិន្នន័យពីអ្នកប្រើប្រាស់ទុក ។ បណ្តាញសង្គមមួយនេះអាចប្រមូលទិន្នន័យផ្ទាល់ខ្លួនអ្នកប្រើប្រាស់រហូតដល់៧៩% ។

៥-WhatsApp ៖
WhatsApp គឺជាបណ្តាញសង្គមសម្រាប់ក្រុមសន្ទនាគ្នា ហើយបណ្តាញសង្គមមួយនេះអាចប្រមូលទិន្នន័យផ្ទាល់ខ្លួនអ្នកប្រើប្រាស់បានស្រាប់ទៅហើយ ។ ការចាត់ចំណាត់ថ្នាក់របស់ pCloud បង្ហាញថា WhatsApp អាចប្រមូលទិន្នន័យផ្ទាល់ខ្លួនអ្នកប្រើប្រាស់រហូតដល់៧៨% ។

សរុបមក បណ្តាញសង្គមទាំងនេះអាចចូលទៅកាន់ទិន្នន័យផ្ទាល់ខ្លួនរបស់អ្នកប្រើប្រាស់ដូចជា ឈ្មោះ, អាសយដ្ឋាន, លេខទូរស័ព្ទ, តួនាទីការងារ, ព័ត៌មានដែលអ្នកប្រើប្រាស់ចូលទស្សនា, ព័ត៌មានការប្រើប្រាស់បណ្តាញសង្គម ។ល។ បណ្តាញសង្គមទាំងនេះបានប្រមូលយកទិន្នន័យអ្នកប្រើប្រាស់តាមរយៈការបំពេញ Profile ឬប្រវត្តិរូបផ្ទាល់ខ្លួន ៕ ប្រភព ៖ chiangmai news

ប្រទេសម៉ាឡេស៊ី ៖ នាយកដ្ឋានបរិស្ថានម៉ាឡេស៊ីបានរាយការណ៍ កាលពីថ្ងៃទី២ ខែតុលា ឆ្នាំ២០២៣ ថា គុណភាពអាកាសធាតុរបស់ម៉ាឡេស៊ីកាន់តែអាក្រក់ ជាពិសេស នៅតំបន់ភាគខាងលិចចំនួន១១ មានសន្ទស្សន៍បំពុលខ្យល់ (API) ក្នុងកម្រិតធ្វើឱ្យប៉ះពាល់ដល់សុខភាពពលរដ្ឋ ។ គេរាយការណ៍ថា នៅថ្ងៃទី៣ ខែតុលា អាកាសធាតុនៅតំបន់ចំនួន៣ បានធ្វើឱ្យប៉ះពាល់ដល់សុខភាពពលរដ្ឋជាខ្លាំង ។

នាយកដ្ឋានបរិស្ថានម៉ាឡេស៊ីឱ្យដឹងថា វិធានការភ្លៀងសិប្បនិម្មិត និងវិធានការណ៍ផ្សេងទៀតនឹងអនុវត្តនៅពេលសន្ទស្សន៍បំពុលខ្យល់ (API) កើនឡើងខ្ពស់រហូតដល់១៥០ លើសពី២៤ម៉ោង ។ ក្រៅពីនេះ សាលារៀននានាត្រូវតែផ្អាកសកម្មភាពទាំងអស់នៅកណ្តាលថ្ងៃក្តៅ នៅពេលកម្រិត API កើនឡើងដល់១០០ ហើយសាលារៀននានាត្រូវបិទទ្វារនៅពេលកម្រិត API កើនឡើងដល់២០០ ។

មន្ត្រីម៉ាឡេស៊ីបន្ទោសថា ភ្លើងឆេះព្រៃនៅប្រទេសឥណ្ឌូណេស៊ី កាលពីចុងខែកញ្ញា ឆ្នាំ២០២៣ បានបណ្តាលឱ្យមានផ្សែងអ័ព្ទគ្របដណ្តប់មកលើប្រទេសម៉ាឡេស៊ី ។ មន្ត្រីម៉ាឡេស៊ីបន្តថា គេបានត្រួតពិនិត្យឃើញតំបន់ក្តៅខ្លាំង រួមទាំងភ្លើងឆេះព្រៃនៅកោះសូម៉ាត្រា និងកោះបូណេអូ ផងដែរ ។

ចំណែកប្រទេសឥណ្ឌូណេស៊ីបដិសេធថា មិនបានប្រទះឃើញផ្សែងអ័ព្ទពីឥណ្ឌូណេស៊ីរសាត់តាមព្រំដែនទៅកាន់ម៉ាឡេស៊ីទេ ។ ប្រទេសឥណ្ឌូណេស៊ីនៅតែព្យាយាមពន្លត់ភ្លើងឆេះព្រៃនៅកោះស៊ូម៉ាត្រា និងតំបន់ខ្លះនៅកោះបូណេអូ ដែលបណ្តាលឱ្យមានផ្សែងអ័ព្ទគ្របដណ្តប់លើទីក្រុងជាច្រើនរបស់ឥណ្ឌូណេស៊ី ។

នៅឆ្នាំ២០២៣ រដូវប្រាំងនៅប្រទេសឥណ្ឌូណេស៊ីបានបណ្តាលឱ្យអាកាសធាតុក្តៅខ្លាំងបំផុត គិតចាប់តាំងពីឆ្នាំ២០១៩ ដោយសារឥទ្ធិពលបាតុភូតអេលនីណូ និងភ្លើងឆេះព្រៃបានបំផ្លាញផ្ទៃដីក្នុងតំបន់ជាង២៦៧.៩០០ហិកតា ។ ចំនួននេះ គឺលើសចំនួនភ្លើងឆេះព្រៃពេញមួយឆ្នាំនៅឆ្នាំ២០២២ ដែលស្មើត្រឹមតែ២០៤.៨៩៤ហិកតាប៉ុណ្ណោះ ៕ ប្រភព ៖ nation

បរទេស៖ យោងតាមរដ្ឋមន្ត្រីការពារជាតិ Sergey Shoigu របស់រុស្សីដែលបាននិយាយកាលពីថ្ងៃទី ៣ ខែតុលាថា មនុស្សជាង ៣៣៥,០០០ នាក់ បានចុះហត្ថលេខាលើកិច្ចសន្យាដើម្បីចូលរួមក្នុងជួរកងកម្លាំងប្រដាប់អាវុធ និងកងកម្លាំងស្ម័គ្រចិត្តរុស្ស៊ី ដូច្នេះក្នុងខែកញ្ញា ចំនួននេះមានជាង ៥០,០០០ នាក់។

លោក Shoigu បានសរសើរទឹកចិត្តស្នេហាជាតិរបស់ប្រជាជន ហើយបាននិយាយថា ប្រទេសរុស្ស៊ី “មិនមានផែនការសម្រាប់ការចល័តបន្ថែមទៀតទេ”។ លោក Shoigu បានបន្តទៀតថា កងកម្លាំងប្រដាប់អាវុធរុស្ស៊ីបច្ចុប្បន្នមានកងទ័ពគ្រប់គ្រាន់ដែលត្រូវការដើម្បីអនុវត្តប្រតិបត្តិការយោធាពិសេស”។

កន្លងមក ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃទី ១២ ខែកញ្ញាថា “មនុស្ស ១.០០០-១.៥០០ នាក់ បានមកចុះកិច្ចសន្យាជាមួយកងកម្លាំងប្រដាប់អាវុធរុស្ស៊ីជារៀងរាល់ថ្ងៃ”។ លោកពូទីនបានបន្ថែមថា “ទាហានរុស្ស៊ីដឹងយ៉ាងច្បាស់នូវអ្វីដែលកំពុងរង់ចាំពួកគេនៅជួរមុខ ប៉ុន្តែពួកគេនៅតែស្ម័គ្រចិត្តចូលរួមការពារមាតុភូមិរបស់ពួកគេ”។យោងតាមមន្ត្រីរុស្ស៊ីកាលពីឆ្នាំមុនបានប្រកាសពីផែនការបង្កើនទំហំកងកម្លាំងប្រដាប់អាវុធលើសពី ៣០% ដល់ ១.៥ លាននាក់ ជាមួយនឹងការផ្សាយពាណិជ្ជកម្មតាមទូរទស្សន៍ និងការបង្ហោះពេញទីក្រុងរុស្ស៊ី ដោយអំពាវនាវឱ្យពលករបរទេសជាច្រើនចូលរួមជាទាហានជាប់កិច្ចសន្យា។

បច្ចុប្បន្ន ពលរដ្ឋរុស្ស៊ីជាបុរសទាំងអស់ដែលមានអាយុពី ១៨-២៧ ឆ្នាំនឹងត្រូវបម្រើយោធាជាកាតព្វកិច្ចរយៈពេល ១២ ខែ ដោយរុស្ស៊ីក៏បានហាមឃាត់ការចល័តទ័ពទៅបំពេញបេសកកម្មប្រយុទ្ធនៅក្រៅទឹកដីរបស់ខ្លួនផងដែរ៕
ប្រភព៖vnexpress

ប្រទេសថៃ ៖ កាលពីថ្ងៃទី៣ ខែតុលា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ ព្រមទាំងលោក Chonnan Srikaew រដ្ឋមន្ត្រីក្រសួងសុខាភិបាល បានចូលសួរសុខទុក្ខអ្នករងរបួសដោយសារហេតុការណ៍បា.ញ់ប្រហា.រនៅស្យ៉ាម ប៉ារ៉ាហ្គន (SIAM PARAGON) អស់រយៈពេលជាង៤០នាទី ។ បន្ទាប់មក លោក សេដ្ឋា ថាវីស៊ីន នាយករដ្ឋមន្ត្រី បានផ្តល់បទសម្ភាសន៍ទៅកាន់ក្រុមអ្នកសារព័ត៌មានថា លោកបានទូរស័ព្ទជជែកជាមួយស្ថានទូតចិនរួចហើយ ដើម្បីរាយការណ៍ពីស្ថានការណ៍ទាំងអស់ ។

លោក សេដ្ឋា ថាវីស៊ីន នាយករដ្ឋមន្ត្រីថៃ បន្តទៀតថា ស្ថានទូតចិនបានអរគុណចំពោះការយកចិត្តទុកដាក់របស់រដ្ឋាភិបាលថៃ ព្រមទាំងព្រះមហាក្សត្រថៃទាំង២ព្រះអង្គផងដែរ ។ ហេតុនេះ ស្ថានទូតចិនក៏បានអរគុណផងដែរចំពោះរដ្ឋាភិបាលថៃ ដែលបានចាត់ការគ្រប់យ៉ាងភ្លាមៗ ហើយភ្ញៀវទេសចរដែលរងរបួសដោយសារហេតុការណ៍នៅស្យ៉ាម ប៉ារ៉ាហ្គន មានសុវត្ថិភាពហើយ ។

នៅពេលអ្នកសារព័ត៌មានសួរថា ហេតុការណ៍បា.ញ់ប្រហា.រដែលបានកើតឡើងនៅស្យ៉ាម ប៉ារ៉ាហ្គន តើនឹងប៉ះពាល់ដល់វិស័យទេសចរណ៍របស់ប្រទេសថៃដែរឬទេ ? លោកនាយករដ្ឋមន្ត្រីថ្លែងថា ៖ «វាជាហេតុការណ៍មិនគួរកើតឡើងទេ ចំណែកការផ្តល់ទំនុកចិត្តដល់ភ្ញៀវទេសចរបរទេសចាប់ពីពេលនេះ គឺប្រទេសថៃនឹងប្រឹងប្រែងធ្វើជាបន្តបន្ទាប់ ព្រោះយើងផ្តល់ភាពសំខាន់ដល់វិស័យទេសចរណ៍ខ្លាំងបំផុត» ។

ក្រៅពីនេះ លោក សេដ្ឋា ថាវីស៊ីន នាយករដ្ឋមន្ត្រីថៃ ក៏បានថ្លែងដែរថា មន្ត្រីម៉ាឡេស៊ីបានតភ្ជាប់បណ្តាញទូរស័ព្ទដើម្បីសួរនាំពីស្ថានការណ៍នេះ ដោយសារមានសមាជិករាជវង្សម៉ាឡេស៊ីបានធ្វើដំណើរមកប្រទេសថៃ ។ ដូច្នេះ លោកនាយករដ្ឋមន្ត្រីថៃ ក៏បានបញ្ជាក់ថា ស្ថានការណ៍បានធូរស្រាលហើយ និងមានសុវត្ថិភាពជាធម្មតា ៕ ប្រភព ៖ The Reporters

អាមេរិក៖ លោកយាយ DOROTHY HOFFNER ដែលជនជាតិអាមេរិកម្នាក់ មានអាយុ ១០៤ ឆ្នាំបានបញ្ចប់ការលោតឆ័ត្រយោងពីរដងជាមួយគ្រូរបស់គាត់នៅកម្ពស់ ៤,១០០ ម៉ែត្រ។ លោកយាយ Hoffner បានលោតពីជើងមេឃជាលើកដំបូងនៅឯកន្លែង Skydive Chicago ទីក្រុង Ottawa រដ្ឋ Illinois កាលពីថ្ងៃទី ១ ខែតុលា។ នៅពេលនោះ Hoffner បានជំរុញឱ្យមគ្គុទ្ទេសក៍ទេសចរណ៍អាជីពម្នាក់ឱ្យទៅជាមួយគាត់។

នៅពេលដែលទ្វារខាងក្រោយនៃយន្តហោះ Skyvan បើក គាត់ហាក់ដូចជាស្ងប់ស្ងាត់ និងមានទំនុកចិត្តលើខ្លួនឯង ដោយលោតចេញពីយន្តហោះ ហើយធ្លាក់ដោយសេរីក្នុងទីតាំងមានស្ថេរភាព ក្បាលពោះបែរមុខទៅដី ដែលធ្វើឱ្យមិត្តភក្តិរបស់គាត់បានអបអរនៅខាងក្រោម។ ការលោតមានរយៈពេល ៧ នាទី នៅពេលដែលគាត់ និងគ្រូរបស់គាត់ចុះមកលើស្មៅយ៉ាងទន់ភ្លន់ ដោយកាន់ស៊ុមជំនួយរបស់គាត់ ហើយជួយគាត់ក្រោកឈរឡើងដើម្បីឆ្លើយនឹងអ្នកសារព័ត៌មាន។ លោកយាយ Hoffner បាននិយាយថា “អាយុគ្រាន់តែជាតួរលេខប៉ុណ្ណោះ វាអស្ចារ្យណាស់សម្រាប់ខ្ញុំ ហើយវាក៏ជាលើកដំបូងរបស់ខ្ញុំដែរ។

ទោះជាយ៉ាងណាក៏ដោយលោកយាយ Hoffner មិនមែនជាបុគ្គលទីមួយដែលលោតឆ័ត្រយោងនោះទេ។ នៅក្នុងខែឧសភា ឆ្នាំ ២០២២ លោកយាយ Rut Larsson អាយុ ១០៣ ឆ្នាំ បានធ្វើការលោតពីរដងដោយជោគជ័យនៅទីក្រុង Motala ប្រទេសស៊ុយអែត ហើយក៏ទទួលបាននូវកំណត់ត្រាពិភពលោកហ្គីណេសសម្រាប់មនុស្សចាស់បំផុតដែលមិនធ្លាប់មានផងដែរ។ ប៉ុន្តែបច្ចុប្បន្នកំណត់ត្រាពិភពលោកថ្មីមួយនេះ បានទៅលើលោកយាយ Hoffner ដែលមានអាយុ ១០៤ ឆ្នាំឈានចូល ១០៥ ឆ្នាំក្នុងខែធ្នូ។

Hoffner បានរស់នៅក្នុងទីក្រុង Chicago សហរដ្ឋអាមេរិក អស់ជាច្រើនទសវត្សរ៍មកហើយ គាត់មិនដែលរៀបការ និងមានកូនដូចគេទេ គាត់ចូលចិត្តជីវិតរស់នៅម្នាក់ឯង ហើយកាលពីគាត់នៅក្មេងគាត់ គាត់គឺជាបុគ្គលិកក្រុមហ៊ុនទូរគមនាគមន៍ Illinois Bell៕
ប្រភព៖vnexpress

បរទេស៖ យោងតាមការចុះផ្សាយរបស់ Interesting Engineering កាលពីថ្ងៃទី ២ ខែតុលា បានឱ្យដឹងថា ទីភ្នាក់ងារស្រាវជ្រាវ និងនវានុវត្តន៍របស់ចក្រភពអង់គ្លេស (UKRI) បានផ្តល់ថវិកាចំនួន ១០៣ លានដុល្លារដល់ Central Laser Facility (CLF) នៃក្រុមប្រឹក្សាវិទ្យាសាស្ត្រ និងបច្ចេកវិទ្យា ដើម្បីសាងសង់ម៉ាស៊ីនឡាស៊ែរដ៏មានឥទ្ធិពលបំផុតរបស់ពិភពលោក ដែលគម្រោងនេះមានឈ្មោះថា Vulcan ២០-២០។

Vulcan ២០-២០ មានសមត្ថភាពផលិតកាំរស្មីឡាស៊ែរបឋមដែលផ្តល់ថាមពល ២០ ប៉េតាវ៉ាត់ (PW) និង ៨ ធ្នឹមថាមពលខ្ពស់បំផុតសរុប ២០ គីឡូស៊ូល (KJ) ដែលធ្វើឱ្យវាភ្លឺជាងមួយពាន់លានដងនៃកាំរស្មីភ្លឺបំផុតរបស់ពន្លឺព្រះអាទិត្យនៅក្នុងវាលខ្សាច់សាហារ៉ា។ ដោយអនុញ្ញាតឱ្យមានការពិសោធន៍ថ្មីៗនៅក្នុងផ្នែកសំខាន់ៗដូចជា ការស្រាវជ្រាវថាមពលកកើតឡើងវិញ នឹងត្រូវបានប្រើសម្រាប់គោលបំណងជាច្រើន ហើយភាគច្រើនប្រើជារូបវិទ្យាប្លាស្មា។ រូបវិទ្យាប្លាស្មា ត្រូវបានផលិតនៅពេលដែលរូបធាតុជួបប្រទះនឹងលក្ខខណ្ឌធ្ងន់ធ្ងរ ដូចជាសីតុណ្ហភាពខ្ពស់ ឬសម្ពាធ។

សាស្រ្តាចារ្យ John Collier នាយកនៃ CLF បាននិយាយថា “ពេលវេលាបានមកដល់ហើយសម្រាប់ឡាស៊ែរថ្មី Vulcan ដើម្បីធ្វើកំណែទម្រង់ដ៏សំខាន់បន្ទាប់របស់វា នឹងត្រៀមខ្លួនជាស្រេចដើម្បីបម្រើអ្នកវិទ្យាសាស្ត្រជំនាន់ថ្មី ដោយធានាថាចក្រភពអង់គ្លេសនឹងរក្សាតួនាទីឈានមុខគេក្នុងវិស័យនេះ”។
ដូច្នេះ គម្រោងសាងសង់ម៉ាស៊ីនឡាស៊ែរ Vulcan ២០-២០ នឹងមានរយៈពេល ៦ ឆ្នាំ។ ឡាស៊ែរថ្មីនឹងជួយអ្នកស្រាវជ្រាវឱ្យយល់កាន់តែច្បាស់អំពីវិស័យវិទ្យាសាស្ត្រជាច្រើន រួមទាំងបាតុភូតតារាសាស្ត្រដូចជា supernovae និងពន្លឺព្រះអាទិត្យ ក៏ដូចជាសក្តានុពលថាមពលស្អាតនៃប្រតិកម្មលាយឡំដោយឡាស៊ែរ៕
ប្រភព៖vnexpress

ប្រទេសថៃ ៖ កាលពីថ្ងៃទី៣ ខែតុលា ឆ្នាំ២០២៣ មានហេតុការណ៍បា.ញ់ប្រហា.រមួយនៅ ស្យ៉ាម ប៉ារ៉ាហ្គន (SIAM PARAGON) ស្ថិតនៅទីក្រុងបាងកក ប្រទេសថៃ ដែលក្មេងប្រុសបង្កហេតុទើបតែមានអាយុ១៤ឆ្នាំប៉ុណ្ណោះ ហើយហេតុការណ៍នេះបណ្តាលឱ្យមានអ្នករងរបួសចំនួន៦នាក់ និងស្លាប់២នាក់ ។ ក្រោយមក សមត្ថកិច្ចអាចចាប់ខ្លួនក្មេងប្រុសបង្កហេតុបាន និងបញ្ជូនទៅសាកសួរនៅស្ថានីយប៉ូលិសប៉ាក់ថុមវ៉ាន់ ។

នៅថ្ងៃដដែល កម្លាំងសមត្ថកិច្ចបានចុះទៅត្រួតពិនិត្យក្នុងលំនៅឋានរបស់ជនបង្កហេតុ ដែលស្ថិតនៅតំបន់បាងឃែ ទីក្រុងបាងកក ។ បន្ទាប់មក សមត្ថកិច្ចបានចូលត្រួតពិនិត្យក្នុងបន្ទប់ដេករបស់ជនបង្កហេតុ ហើយប្រទះឃើញគ្រា.ប់កាំភ្លើ.ងជាច្រើនគ្រាប់ និងផ្ទាំងក្រដាស់សម្រាប់បា.ញ់១ផ្ទាំងផងដែរ ។ ដូច្នេះ សមត្ថកិច្ចក៏បានប្រមូលឧបករណ៍សម្រាប់ទុកធ្វើជាភស្តុតាង ។

តាមការសាកសួរអាណាព្យាបាលរបស់ជនបង្កហេតុឱ្យដឹងថា ពួកគាត់មិនដឹងថា កូនប្រុសយកគ្រាប់កាំភ្លើ.ង និងផ្ទាំងស៊ីបមកពីកន្លែងណាទេ ព្រោះតាមធម្មតា កូនប្រុសរស់នៅក្នុងផ្ទះមួយកន្លែងទៀតនៅតំបន់សាថន ។ ចំណែកជនបង្កហេតុឆ្លើយថា ខ្លួនមានបញ្ហាស្តាប់មិនសូវច្បាស់ល្អ ហើយខ្លួនតែងភ័យខ្លាចមានមនុស្សមកធ្វើបាបគ្រប់ពេលវេលា ។ ចំណែកកាំភ្លើ.ង និងគ្រាប់ដែលខ្លួនយកទៅបាញ់ប្រហា.រនៅហាងទំនើបនោះ គឺខ្លួនទិញតាមអនឡាញក្នុងតម្លៃជាង១ម៉ឺនបាត ។

ទោះយ៉ាងណា តាមការបញ្ជាក់ពីឪពុកម្តាយឱ្យដឹងថា កូនប្រុសញៀននឹងការលេងហ្គេមយ៉ាងខ្លាំង ប៉ុន្តែពុំធ្លាប់មានប្រវត្តិព្យាបាលជំងឺផ្លូវចិត្តទេ ។ ក្រៅពីនេះ មានសេចក្តីរាយការណ៍ថា នៅក្នុងទូរស័ព្ទដៃរបស់ជនបង្កហេតុមានវីដេអូហ្វឹកហាត់ពីរបៀបដាក់គ្រាប់កាំភ្លើ.ងទៀតផង ។ មុនពេល ជនបង្កហេតុចូលមកបា.ញ់ប្រហា.រក្នុងហាង គឺជនបង្កហេតុបានផ្ញើរូបភាពពីរបៀបដាក់គ្រាប់កាំភ្លើ.ងទៅឱ្យមិត្តភក្តិក្នុងអនឡាញ ។

គួរបញ្ជាក់ថា កាលពីវេលាម៉ោង៤និង១៥នាទីល្ងាចថ្ងៃទី៣ ខែតុលា ឆ្នាំ២០២៣ មានហេតុការណ៍ឆោឡោបានកើតឡើងនៅ SIAM PARAGON ដោយសារមានសំឡេងគ្រាប់កាំភ្លើងពី៤គ្រាប់ ទៅ៥គ្រាប់ ហើយធ្វើឱ្យពលរដ្ឋថៃ និងភ្ញៀវទេសចរបរទេសដែលកំពុងដើរទិញអីវ៉ាន់ក្នុងផ្សារនាំគ្នារត់យករួចខ្លួន ។ អាជ្ញាធរប្រចាំតំបន់បានប្រកាសឱ្យមនុស្សទាំងអស់ប្រយ័ត្នខ្លួន ព្រោះជនបង្កហេតុកាន់កាវុ.ធ ។

តាមកាមេរ៉ាសុវត្ថិភាពបង្ហាញថា ក្មេងប្រុសបង្កហេតុបានពាក់ស្រោមដៃ និងពាក់ស្បែកជើងកីឡាពណ៌ខ្មៅ ហើយបានដើរកាន់កាំភ្លើងនៅ SIAM PARAGON នៅបរិវេណជាន់ទី៣ ។ ក្នុងហេតុការណ៍នេះបណ្តាលឱ្យមានអ្នករងរបួសចំនួន៦នាក់ គឺមានទាំងជនជាតិថៃ និងជនបរទេសត្រូវបានបញ្ជូនទៅកាន់មន្ទីរពេទ្យ និងមានអ្នកស្លាប់ចំនួន២នាក់ គឺជនជាតិចិនស្លា.ប់នៅកន្លែងកើតហេតុ និងស្ត្រីមីយ៉ាន់ម៉ាបានស្លា.ប់នៅមន្ទីរពេទ្យ ៕   ប្រភព ៖ mgronline