តាមគេលើកឡើងរបស់សម្ដេចតេជោ ហ៊ុន សែន ដែលបានសរសេរនៅក្នុងតេឡេក្រាមរបស់សម្ដេច នៅថ្ងៃទី១៦ ខែតុលា ២០២៣ បានឱ្យដឹងថា សម្តេចចាត់ទុក iPhone15 ជាទូរស័ព្ទដែលលំបាកប្រើបំផុត ដែលសម្តេចធ្លាប់បានប្រើទូរសព្ទ iPhone ជាច្រើនម៉ូឌែលរួចមកហើយ។

នៅក្នុងសំណេរបស់សម្ដេចបានរៀបរាប់ថា “ខ្ញុំជាមនុស្សម្នាក់ដែលប្រើទូរស័ព្ទត្រកូល iPhone ក្នុងចំនួនច្រើននិងគ្រប់ជំនាន់។ ទូរស័ព្ទ iPhone នេះបានជួយការងារខ្ញុំយ៉ាងច្រើន ដែលខ្ញុំសូមអរគុណនិងកោតសរសើរ។អ្វីដែលជាការកត់សំគាល់គឺ iPhone 15 ដែលទើបចេញថ្មីជាប្រភេទទូរស័ព្ទដែលលំបាកប្រើបំផុត។ ខ្ញុំកំពុងប្រើ iPhone 15 ចំនួន៤គ្រឿងគឺពិបាកប្រើដូចគ្នា”។

សម្ដេចបានបន្ថែមទៀតថា “កំពុងត្រៀមវិលទៅ iPhone 14.13.12 វិញ។ ខ្ញុំនៅតែស្រឡាញ់និងប្រើ iPhone ដដែលតែចង់ផ្តាំទៅអ្នកដែលមិនទាន់ប្រើ iPhone15 ផ្អាកប្រើសិន កុំឱ្យរងគ្រោះដូចខ្ញុំ។ សង្ឃឹមថាក្រុមហ៊ុន និងរកវិធីសម្រួលដើម្បីប្រើបានស្រួល”៕

ការប្រើប្រាស់ពាក្យត្រសក់ និង តាសក់ ឱ្យបានត្រឹមត្រូវ នៅតែជាប្រធានបទក្តៅមួយនៅលើបណ្តាសង្គមខ្មែរ ដោយមនុស្សមួយចំនួនបានសរសេរ និងយល់ឃើញខុសពីក្នុងវចនានុក្រមរបស់ម្តេចព្រះសង្ឃរាជ ជួន ណាត។
យោងតាមវចនានុក្រមរបស់ម្តេចព្រះសង្ឃរាជ ជួន ណាត បានឱ្យដឹងថា៖

ពាក្យ “តាសក់” ជាឈ្មោះវល្លិដំណាំមានផ្លែជាអាហារ ដូចជា តាសក់ស្រូវ, តាសក់ផ្អរ ជាដើម។ ខណៈជាទូទៅ មនុស្សមួយចំនួនសរសេរថា “ត្រសក់” ដោយពួកគេយល់ឃើញថា ពាក្យ “តាសក់” គ្រាន់តែជាភាសានិយាយ ដែលបញ្ចេញសូរសៀងទូទៅថា “តាសក់”។ដោយឡែកចំពោះពាក្យ “ត្រសក់” នៅក្នុងវចនានុក្រមរបស់ម្តេចព្រះសង្ឃរាជ ជួន ណាត សំដៅលើសត្វត្រីមួយប្រភេទ ឈ្មោះ “ត្រីត្រសក់” ដែលជាប្រភេទត្រីធំ ច្រើនមានវត្តមាននៅទន្លេមេគង្គ និងបឹងទន្លេសាប៕

ព្រះករុណា ជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ជាទីគោរពសក្ការៈដ៏ខ្ពង់ខ្ពស់បំផុត បានសព្វព្រះរាជហឫទ័យ ឡាយព្រះហស្ថលេខា ប្រកាសឱ្យប្រើប្រាស់ព្រះរាជក្រឹត្យលេខ នស/រកត/១០២៣/២២៥០ ចុះថ្ងៃទី១១ ខែតុលា ឆ្នាំ២០២៣ ដែលមាន១១ជំពូក និង២៦មាត្រា ស្តីអំពីបទប្បញ្ញត្តិនៃគោលការណ៍ លក្ខខណ្ឌ បែបបទ និងនីតិវិធីក្នុងការផ្តល់គោរមងារឧកញ៉ា។

នៅក្នុងព្រះរាជក្រឹត្យនោះ ក៏បានបញ្ជាក់នូវការបញ្ចប់គោរមងារឧកញ៉ាទៅលើបុគ្គលណាម្នាក់ ដែលបានប្រព្រឹត្តិករណីណាមួយដូចខាងក្រោម៖

• គោរមវន្តសុំលាលែងពីគោរមងារឧកញ៉ាដោយស្ម័គ្រចិត្ត
• គោរមវន្តមិនបំពេញកាតព្វកិច្ចបង់វិភាគទានប្រចាំឆ្នាំរយៈពេល៣(បី)ឆ្នាំជាប់គ្នា ដោយគ្មានមូលហេតុ
• វន្តត្រូវបានផ្តន្ទាទោសពីបទឧក្រិដ្ឋឬបទមជ្ឈិមណាមួយ
• ត្រូវបានរកឃើញថាគោរមវន្តបានប្រព្រឹត្តល្មើសនឹងមាត្រា២២នៃព្រះរាជក្រឹត្យនេះ
• ត្រូវបានរកឃើញថាសំណុំឯកសារស្នើសុំគោរមងារឧកញ៉ារបស់គោរមវន្តមានការក្លែងបន្លំ

សូមបញ្ជាក់ផងដែរថាលំដាប់ថ្នាក់គោរមងារឧកញ៉ា បានចែងថាគោរមងារឧកញ៉ាមាន៣លំដាប់ថ្នាក់ រួមមាន៖

• លំដាប់ថ្នាក់ទី១ លោកអ្នកឧកញ៉ា
• លំដាប់ថ្នាក់ទី២ អ្នកឧកញ៉ា
• លំដាប់ថា្នក់ទី៣ ឧកញ៉ា

ថ្មីៗនេះ បណ្តាប្រទេសនៅក្នុងតំបន់អាស៊ាន ដូចជាឥណ្ឌូនេសុី ម៉ាឡេសុី និងសិង្ហបុរី បានចាប់ផ្តើមប្រមូលគ្នា គ្រោងដេញថ្លៃជាសហម្ចាស់ផ្ទះ World Cup ឆ្នាំ២០៣៤ ខណៈប្រធានសហព័ន្ធកីឡាបាល់ទាត់អាស៊ាន ឯកឧត្តម ខៀវ សាម៉េត ថាមានភាគរយតិចណាស់។

ទាក់ទងនឹងការដេញថ្លៃនេះខាងម៉ាឡេស៊ី បានដកខ្លួនចេញបាត់ទៅហើយ ស្របពេលដែលសិង្ហបុរី នៅមិនទាន់មានជំហរច្បាស់លាស់ ហេតុដូច្នេះនៅសល់តែឥណ្ឌូណេស៊ី និងអូស្ត្រាលី ខណ:អូស្ត្រាលី ក៏បានចេញសេចក្ដីថ្លែងការណ៍កាលពីខែមុន ចង់ធ្វើជាម្ចាស់ផ្ទះ តែមិនបានបញ្ជាក់ចូលរួមធ្វើជាមួយប្រទេសឥណ្ឌូណេស៊ីឡើយ។

ជុំវិញបញ្ហានេះ បណ្តាប្រទេសនៅក្នុងតំបន់អាស៊ានចំនួន៩ប្រទេស បានសម្តែងការគាំទ្រប្រទេសអារ៉ាប៊ីសាអូឌីត ដើម្បីធ្វើជាម្ចាស់ផ្ទះព្រឹត្តិការណ៍បាល់ទាត់ពិភពលោក FIFA World Cup 2034 ជាងការរួមគ្នាធ្វើជាសហម្ចាស់ផ្ទះ ដោយលើកឡើងហេតុផលថា បញ្ហានយោបាយ ហិរញ្ញវត្ថុ និងបច្ចេកទេស៕

ប្រភព៖ DIPLOMAT

នៅយប់ចុងក្រោយនៃថ្ងៃភ្ជុំបិណ្ឌ មានករណីឃាតកម្មមួយបានកើតឡើង ដោយបុរសជាសង្សារ បានកាន់កាំបិតចូលកាប់សម្លាប់ ស្ត្រីជាសង្សារ ដល់ផ្ទះ រត់ពេញកាប់ជណ្តើរ បណ្តាលឱ្យហូរឈាមតាមជណ្តើររហូតស្លាប់ រួចជនសង្ស័យគេចខ្លួនបាត់ស្រមោល។

ហេតុការណ៍នេះ បានកើតឡើងនៅវេលាម៉ោង ៧និង ៤២នាទីយប់ថ្ងៃទី១៥ ខែតុលា ឆ្នាំ២០២៣ នៅចំណុចផ្ទះលេខ១២៩ ផ្លូវE ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។យោងតាមម្ចាស់ផ្ទះ បានឱ្យដឹងថា ជនរងគ្រោះបានមកធ្វើការនៅផ្ទះគាត់ តាំងពីអំឡុងខែមករា ឆ្នាំ២០២៣។ លុះនៅខែមេសា ឆ្នាំ២០២៣ ជនរងគ្រោះបានឡើងទៅលេងស្រុកកំណើត ហើយនៅពេលត្រឡប់មកវិញបានប្រាប់គាត់ថា ត្រូវបានមិត្តប្រុសជាសង្សារកាប់ក្បាលរបួស៥ថ្នេរ តែបានដោះស្រាយបញ្ចប់រឿងហើយ។

ក្រោយមកទៀតនៅថ្ងៃទី១២ ខែតុលា ឆ្នាំ២០២៣ ជនរងគ្រោះក៏បានទៅលេងស្រុកកំណើត ហើយនៅវេលាម៉ោងប្រហែល៦ល្ងាច ថ្ងៃទី១៥ ខែតុលា ឆ្នាំ២០២៣ ជនរងគ្រោះបានត្រឡប់មកដល់ផ្ទះវិញ។លុះដល់វេលាម៉ោងប្រហែល៧និង៣៨នាទី បងស្រីម្ចាស់ផ្ទះ បានដើរឡើងទៅបន្ទប់ ស្រាប់តែលឺសម្លេងជនរងគ្រោះស្រែក ទើបគាត់បើកទ្វារបន្ទប់មកឃើញជនរងគ្រោះត្រូវបានបុរសម្នាក់ ពាក់មួកសុវត្ថិភាព ពាក់អាវយឺតដៃវែង ស្លៀកខោជើងខ្លី នៅក្នុងដៃមានកាន់កាំបិតបុង័តោ បានកាប់ទៅលើជនរងគ្រោះ ហើយជនរងគ្រោះបានព្យាយាមរត់ឡើងទៅលើ តែត្រូវជនសង្ស័យកាប់ជាច្រើនកាំបិត រួចក៏បានរត់គេចខ្លួនទៅបាត់ ហើយគាត់ក៏បានទៅមើលជនរងគ្រោះឃើញមានឈាមប្រឡាក់ពេញខ្លួន ទើបទូរស័ព្ទទៅប្រាប់ប្តីនិងទំនាក់ទំនងទៅរថយន្តសង្គ្រោះបន្ទាន់ ពេលរថយន្តមកដល់បានដឹកជនរងគ្រោះទៅមន្ទីរពេទ្យកាល់ម៉ែត ពេលទៅដល់មន្ទីរពេទ្យគ្រូពេទ្យពិនិត្យប្រាប់ថាស្លាប់បាត់ទៅហើយ។

ពេលនេះ សមត្ថកិច្ចកំពុងបើកការស្រាវជ្រាវតាមចាប់ជនសង្ស័យខាងលើ យកមកផ្តន្ទាទោសតាមច្បាប់៕