ប្រទេសថៃ ៖ កាលពីថ្ងៃទី១៦ ខែតុលា ឆ្នាំ២០២៣ លោក ស៊ុថិន ក្លាងស៊ែង (Suthin Klangsaeng) រដ្ឋមន្ត្រីក្រសួងការពារជាតិប្រទេសថៃបានលើកឡើងថា ភារកិច្ចបញ្ជូនពលករថៃត្រឡប់មកប្រទេសកំណើតលើកនេះអាចដំណើរការបានល្អ ។ ចំណែកការទៅទទួលពលករថៃពីប្រទេសអ៊ីស្រាអែលនៅតែជួបឧបសគ្គ គឺការប្រយុ.ទ្ធគ្នា ព្រោះលោកបានទទួលរបាយការណ៍ពីឯកអគ្គរាជទូតថៃនៅអ៊ីស្រាអែលថា នៅតែមានការវា.យប្រហា.រដោយគ្រាប់រ៉ុក្កែតជាបន្តបន្ទាប់ ។ ហេតុនេះ ពលករថៃពិបាកធ្វើដំណើរចេញពីតំបន់គ្រោះថ្នាក់មកកាន់អាកាសយានដ្ឋាន ខណៈអាជ្ញាធរត្រូវបំពេញការងារយ៉ាងម៉ឺងម៉ាត់ ព្រោះគោលដៅ គឺគ្រប់គ្នាត្រូវមានសុវត្ថិភាព ។

លោក ស៊ុថិន ក្លាងស៊ែង រដ្ឋមន្ត្រីក្រសួងការពារជាតិបញ្ជាក់ថា ផែនការរបស់កងទ័ពអាកាសដែលត្រូវទៅទទួលពលករថៃនៅប្រទេសអ៊ីស្រាអែល គឺបានរៀបចំជើងហោះហើរសរុបចំនួន៥ ហើយនឹងធ្វើដំណើរម្តងទៀតនៅថ្ងៃទី១៨ ខែតុលា នេះ ។ យន្តហោះនឹងអាចទទួលយកពលករថៃត្រឡប់មកប្រទេសវិញប្រមាណ៨០០នាក់នៅចុងខែតុលា ហើយថៃសង្ឃឹមថា នឹងអាចបញ្ជូនពលកររបស់ខ្លួនត្រឡប់មកប្រទេសវិញ ប្រមាណ៦.០០០នាក់តាមផែនការបច្ចុប្បន្ន ។

បច្ចុប្បន្ន អាជ្ញាធរថៃបានរៀបចំផែនការ និងព្យាយាមស្វែងរកវិធីផ្សេងៗដើម្បីជួយជនជាតិថៃនៅប្រទេសអ៊ីស្រាអែល ហើយគេជឿថា ជនជាតិថៃដែលនឹងធ្វើដំណើរត្រឡប់មកប្រទេសវិញនឹងមានចំនួនច្រើនជាងនេះ ខណៈមានជនជាតិថៃសុំចុះឈ្មោះត្រឡប់មកប្រទេសវិញ ស្មើជាង៧.០០០នាក់ ។

ចំណែកពលករថៃភាគច្រើនដែលទើបត្រឡប់ពីប្រទេសអ៊ីស្រាអែល បានរៀបរាប់ពីអារម្មណ៍ដូចៗគ្នាថា ពួកគេមិនចង់ត្រឡប់ទៅធ្វើការនៅទីនោះទៀតទេ ហើយពួកគេត្រូវចំណាយពេលវេលាធ្វើចិត្តឱ្យស្ងប់ជាមុនសិន ។ ពលករថៃម្នាក់និយាយថា ខ្លួនបានព្យាយាមរត់យករួចខ្លួនក្នុងសមរភូមិយ៉ាងលំបាក ហើយពួកហាម៉ាស់បានសម្រុកចូលមកបា.ញ់ខ្លួន និងមិត្តភក្តិផ្សេងទៀតចំនួន២ដងក្នុង១ថ្ងៃ ។

តាមការប្រជុំរបស់គណៈរដ្ឋមន្ត្រីថៃបានពិភាក្សាគ្នាពីការជួយសង្គ្រោះពលករនៅអ៊ីស្រាអែល ដោយក្រសួងការងារបញ្ជាក់ថា ប្រទេសថៃមានវិធានការមួយចំនួនជួយពលករ ដូចជា ៖
-ករណីត្រឡប់មកប្រទេសថៃដោយសារសង្គ្រាម ពលករនឹងទទួលបានប្រាក់ចំនួន១ម៉ឺន៥ពាន់បាតក្នុងម្នាក់
-ករណីគ្រូពេទ្យបញ្ជាក់ថា ជាជនពិការ ពលករនឹងទទួលបានប្រាក់ចំនួន៣ម៉ឺនបាតក្នុងម្នាក់
-ករណីស្លា.ប់បា.ត់ប.ង់ជីវិតនៅក្រៅប្រទេស គ្រួសារស.ពនឹងទទួលបានប្រាក់ចំនួន៤ម៉ឺនបាត
-ប្រាក់សម្រាប់ចំណាយធ្វើបុណ្យស.ពនៅក្រៅប្រទេស នឹងទទួលបានប្រាក់មិនលើសពី៤ម៉ឺនបាត ។

ចំណែកលោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ ក៏បានបញ្ជាឱ្យរដ្ឋាភិបាលទទួលខុសត្រូវលើការចំណាយថ្លៃទិញសំបុត្រយន្តហោះផងដែរ សម្រាប់ពលករដែលបានទិញសំបុត្រយន្តហោះត្រឡប់មកថៃដោយខ្លួនឯង គិតចាប់ពីថ្ងៃទី៧ ខែតុលា ឆ្នាំ២០២៣ គឺរដ្ឋាភិបាលនឹងសងប្រាក់ទៅពួកគេវិញ ៕ ប្រភព ៖ Mono News

មួយឆ្នាំបានកន្លងផុតទៅហើយចាប់តាំងពីសោកនាដកម្មនៅសង្កាត់ Itaewon ដែលបានឆក់យកជីវិតរបស់យុវជនចំនួន ១៥៩ នាក់ក្នុងអំឡុងពេលមួយយប់ដែលជាការប្រារព្ធពិធីបុណ្យ Halloween ។

ជាមួយនឹងរដូវកាលបុណ្យ Halloween ម្តងទៀតនៅឆ្នាំនេះកំពុងមានប្រធានបទជជែកវែកញែកយ៉ាងក្តៅគគុកនៅលើអ៊ីនធឺណិតនាពេលថ្មីៗនេះ។ តាមការបង្ហោះនៅលើប្រព័ន្ធអនឡាញបានជំរុញឱ្យមានការពិភាក្សាថាគួរទៅទីនោះ ឬមិនទៅបន្ទាប់ពីមានហេតុការណ៍កើតឡើងកាលពីឆ្នាំមុន។

នៅលើការជជែកនោះអ្នកប្រើប្រាស់អ៊ីនធឺណិតមួយចំនួនបានលើកឡើងពីការព្រួយបារម្ភនិងមិនចង់ទៅពិធីបុណ្យ Halloween នៅឆ្នាំនេះ អ្នកផ្សេងទៀតមានអារម្មណ៍ថាមិនមានការបង្កគ្រោះថ្នាក់នោះទេ។

អ្នកដែលចូលចិត្តទៅលេង Itaewon អះអាងថា បំណងរបស់ពួកគេនៅពីក្រោយដំណើរទេសចរណ៍នេះគឺដើម្បីរំលឹកដល់សោកនាដកម្ម Itaewon និងជនរងគ្រោះដែលបានបាត់បង់ជីវិតក្នុងយប់ដ៏រន្ធត់នោះ។ លើសពីនេះ ពួកគេសង្កត់ធ្ងន់លើសារៈសំខាន់នៃការប្រុងប្រយ័ត្ន និងយកចិត្តទុកដាក់ចំពោះសុវត្ថិភាពរបស់មនុស្សគ្រប់គ្នា ជាជាងការរីករាយក្នុងពិធីបុណ្យ។

គួរបញ្ជាក់ថាកាលពីឆ្នាំមុន នៅយប់ថ្ងៃទី២៩ ខែតុលា នៅទីក្រុងសេអ៊ូល មនុស្សជាង ១០០,០០០ នាក់បានប្រមូលផ្តុំគ្នានៅក្នុងសង្កាត់ Itaewon ដើម្បីប្រារព្ធពិធីបុណ្យ Halloween ។ ដោយសារតែមានការសង្ស័យថាមានការកើនឡើងនៃហ្វូងមនុស្ស មនុស្សជាងមួយរយនាក់ត្រូវបានគេរាយការណ៍ថាបានទទួលរងនូវការគាំងបេះដូង។

យ៉ាងណាមិញ យោងតាមសារព័ត៌មាន The Korea Herald បានឱ្យដឹងថាឆ្នាំនេះ រដ្ឋាភិបាលទីក្រុងសេអ៊ូល បានរៀបចំវិធានការសុវត្ថិភាពផ្សេងៗ ដើម្បីការពារឧប្បត្តិហេតុស្រដៀងគ្នានេះ រួមទាំងប្រព័ន្ធត្រួតពិនិត្យការកកកុញ ដែលប្រើកាមេរ៉ាឃ្លាំមើល ដើម្បីវាស់ស្ទង់ចំនួនមនុស្សក្នុងតំបន់ដោយស្វ័យប្រវត្តិ និងវិភាគដង់ស៊ីតេហ្វូងមនុស្ស៕

ប្រទេសវៀតណាម ៖ អាជ្ញាធរផ្លូវថ្នល់វៀតណាមបានស្នើទៅកាន់ក្រសួងគមនាគមន៍ឱ្យលើកកម្ពស់ និងកែលម្អផ្លូវជាតិ ដែលតភ្ជាប់រវាងប្រទេសវៀតណាមជាមួយតំបន់ភាគខាងជើងប្រទេសឡាវ និងចិន ដើម្បីឆ្លើយតបនឹងការអភិវឌ្ឍសេដ្ឋកិច្ច និងសង្គមនាពេលបច្ចុប្បន្ន ។ លើសពីនេះ វាជាការពង្រឹងការតភ្ជាប់តាមច្រករបៀងសេដ្ឋកិច្ចខាងកើត និងខាងលិច ដើម្បីលើកកម្ពស់ការធ្វើពាណិជ្ជកម្មជាមួយប្រទេសទាំងពីរផងដែរ ។

ផ្លូវជាតិចំនួន៣ខ្សែនឹងទទួលបានការកែលម្អឱ្យមានគន្លងចរាចរណ៍ចំនួន២, មានភាពធំទូលាយជាងមុន និងមានស្តង់ដារបច្ចេកទេស ដូចជា ៖ ផ្លូវជាតិលេខ២៧៩ នៅត្រង់បរិវេណព្រំដែន Dien Bien-Tay Trang ក្នុងខេត្ត Dien Bien ។ ផ្លូវជាតិលេខ៤H និងផ្លូវជាតិលេខ២១៧ ដែលមានប្រវែង៥២គីឡូម៉ែត្រពីផ្លូវជាតិលេខ១ រហូតដល់ផ្លូវល្បឿនលឿនហូជីមិញ នៅខេត្ត Thanh Hoa ។

នៅពេលការកែលម្អផ្លូវជាតិលេខ២១៧ បញ្ចប់ជាស្ថាពរ វានឹងផ្តល់ជាប្រយោជន៍សម្រាប់បង្កើនកម្រិតការធ្វើពាណិជ្ជកម្មរវាងប្រទេសវៀតណាម និងឡាវ តាមរយៈច្រកព្រំដែន Na Meo ក៏ដូចជាតភ្ជាប់ជាមួយប្រព័ន្ធដឹកជញ្ជូននៅតំបន់ភាគខាងជើង និងខាងត្បូង ព្រមទាំងកំពង់ផែក្នុងតំបន់ទៀតផង ។

ការវិនិយោគគម្រោងនេះ នឹងអាចបំពេញតម្រូវការសម្រាប់ការដឹកជញ្ជូនកើនឡើង, កាត់បន្ថយចម្ងាយផ្លូវរវាងច្រកព្រំដែន និងកំពង់ផែ ព្រមទាំងជួយកាត់បន្ថយពេលវេលាក្នុងការបើកបររថយន្ត ។ ហេតុនេះ វាអាចជួយកាត់បន្ថយការចំណាយក្នុងការដឹកជញ្ជូន, កាត់បន្ថយការបំពុលបរិស្ថាន ក៏ដូចជាគ្រោះថ្នាក់ចរាចរណ៍ទៀតផង ។ គម្រោងលើកកម្ពស់ និងកែលម្អផ្លូវជាតិនេះ នឹងអនុវត្តរយៈពេល៥ឆ្នាំ គឺចាប់ពីឆ្នាំ២០២៥ រហូតដល់ឆ្នាំ២០២៩ ៕ ប្រភព ៖ AEC connect

ប្រទេសថៃ៖ ជនជាតិថៃចំនួន ២៤៤ នាក់បានចាកចេញពីប្រទេសអ៊ីស្រាអែលដោយសុវត្ថិភាព ខណៈដែលពួកគេបានឡើងយន្តហោះជួលតាមក្រុមហ៊ុនអាកាសចរណ៍បរទេស ដើម្បីត្រឡប់ទៅប្រទេសថៃវិញ។
នៅថ្ងៃទី១៦ ខែតុលា ក្រុមពលករ និងនិស្សិតថៃចំនួន ២៤៤ នាក់ដែលមកពីប្រទេសអ៊ីស្រាអែលបានមកដល់អាកាសយានដ្ឋានសុវណ្ណភូមិដោយសុវត្ថិភាព។ បន្ទាប់ពីធ្វើដំណើរតាមជើងហោះហើរពិសេសរបស់ក្រុមហ៊ុនអាកាសចរណ៍ El Al Israel Airlines ដែលបានចាកចេញពីអាកាសយានដ្ឋាន Ben-Gurion នៅម៉ោង ៦:២០ នាទីព្រឹកនៅលើជើងហោះហើរនេះ។

ក្នុងនោះមាននិស្សិតមកពីសាកលវិទ្យាល័យ Narathiwat Rajanagarindra ចំនួន ៣០នាក់ និងនិស្សិត ៣នាក់ទៀតមកពីសាកលវិទ្យាល័យ Sakon Nakhon Rajabhat បានធ្វើដំណើរទៅសិក្សានៅវិទ្យាស្ថាន AICAT នៅតំបន់វាលខ្សាច់ Arava ប៉ុន្តែនិស្សិតនៅសល់ ៨២ នាក់ទៀតមិនបានទាន់បានវិលត្រឡប់មកវិញទេ។
យោងតាមក្រសួងការបរទេស ថ្មីៗនេះបានឱ្យដឹងថា ក្រសួងនឹងមានជើងហោះហើរពីអ៊ីស្រាអែល ត្រឡប់ទៅប្រទេសថៃវិញ ក្នុងអំឡុងថ្ងៃទី ១៧ និង ១៨ ខែតុលា ដោយទទួលអ្នកដំណើរចំនួន ២៥០ នាក់នៅថ្ងៃទី១៧ ខណៈនៅថ្ងៃទី ១៨ ខែតុលា ជើងហោះហើរ TG8951 នឹងស្វាគមន៍អ្នកដំណើរចំនួន ២៨០ នាក់បន្ថែមទៀត។

គួរបញ្ជាក់ដែរថា ក្រុមពលករ និងនិស្សិតថៃដែលរស់នៅក្នុងប្រទេសអ៊ីស្រាអែលមានចំនួនសរុបទាំងអស់ ៣០,០០០ នាក់ ខណៈដែលជនជាតិថៃចំនួន ៧,៤៤៦ នាក់បានធ្វើការបំពេញបែបបទត្រឡប់មកស្រុកកំណើតវិញ៕

ប្រទេសថៃ ៖ លោក ឆ័យ វ៉ាត់ឆារ៉ុង (Chai Watcharong) អ្នកនាំពាក្យទីស្តីការនាយករដ្ឋមន្ត្រីលើកឡើងថា ខាងអាកាសយានដ្ឋានប្រទេសថៃឱ្យដឹងថា មុនពេលកើតហេតុការណ៍បា.ញ់ប្រហា.រនៅ Siam Paragon មានភ្ញៀវទេសចរចិនបានកក់សំបុត្រធ្វើដំណើរមកកាន់ប្រទេសថៃ ចំនួន៦៥ម៉ឺននាក់ ។ ប៉ុន្តែនៅក្រោយហេតុការណ៍បា.ញ់ប្រហា.រនេះ ភ្ញៀវទេសចរបានកក់សំបុត្រធ្វើដំណើរ និងបន្ទប់ស្នាក់នៅក្នុងប្រទេសថៃ ចំនួន៥៩ម៉ឺននាក់ ។

តួលេខចំនួនភ្ញៀវទេសចរចិនមកកម្សាន្តនៅប្រទេសថៃបានធ្លាក់ចុះត្រឹមតែ៩,២% បើធៀបនឹងពេលធម្មតា គឺខុសគ្នាត្រឹមតែ១៥% ប៉ុណ្ណោះ ។ នេះឆ្លុះបញ្ចាំងឱ្យឃើញថា ភ្ញៀវទេសចរចិននៅតែមានទំនុកចិត្តធ្វើដំណើរមកកម្សាន្តនៅប្រទេសថៃដូចមុន ។

លោក ឆ័យ វ៉ាត់ឆារ៉ុង អ្នកនាំពាក្យទីស្តីការនាយករដ្ឋមន្ត្រីបន្តថា លោក សេដ្ឋា ថាវីស៊ីន នាយករដ្ឋមន្ត្រីថៃ និងរដ្ឋមន្ត្រីក្រសួងហិរញ្ញវត្ថុ បានថ្លែងអំណរគុណដល់ទំនុកចិត្តរបស់ភ្ញៀវទេសចរចិនចំពោះប្រទេសថៃ ។ លើសពីនេះ លោកនាយករដ្ឋមន្ត្រី ក៏បានសង្កត់ធ្ងន់លើការងាររបស់នាយកដ្ឋានពាក់ព័ន្ធទាំងអស់ ដែលបានអនុវត្តតាមវិធានការបង្កើនការថែទាំសុវត្ថិភាពភ្ញៀវទេសចរជាតិ និងភ្ញៀវទេសចរអន្តរជាតិគ្រប់រូប ។

ទោះយ៉ាងណា អ្នកនាង ថាផានី គៀតផៃប៊ូន (Thapanee Kiattipaiboon) មន្ត្រីអាជ្ញាធរទេសចរណ៍ថៃលើកឡើងនាពេលកន្លងមកថា នៅចុងឆ្នាំ២០២៣ វិស័យទេសចរណ៍ប្រទេសថៃប្រឈមនឹងផលប៉ះពាល់ចំនួន២ គឺ ៖ ហេតុការណ៍បា.ញ់ប្រហា.រនៅ Siam Paragon និងសង្គ្រា.មកាន់តែធ្ងន់ធ្ងរនៅប្រទេសក្នុងតំបន់មជ្ឈិមបូព៌ា ។ ហេតុការណ៍បា.ញ់ប្រហា.រដែលបង្កឡើងដោយក្មេងប្រុសអាយុ១៤ឆ្នាំ នឹងប៉ះពាល់ដល់វិស័យទេសចរណ៍ថៃរយៈពេលខ្លីទៅលើភ្ញៀវទេសចរចិន ជាពិសេស ក្រុមភ្ញៀវទេសចរធ្វើដំណើរមកប្រទេសថៃដោយខ្លួនឯង ។ អ្នកនាងបន្តថា ហេតុការណ៍នៅ Siam Paragon ធ្វើឱ្យគ្រប់គ្នាភ័យតក់ស្លុ.ត និងបារម្ភពីផលប៉ះពាល់ដែលកើតឡើង ដោយសារតួលេខការកក់សំបុត្រធ្វើដំណើរពីប្រទេសចិនមកថៃធ្លាក់ចុះ ៕ ប្រភព ៖ beartai BRIEF

ថ្មីនេះៗទូរស័ព្ទ iPhone 15 កំពុងប្រឈមជាមួយបញ្ហាកើតឡើងបន្តបន្ទាប់ នឹងកំហុសជាច្រើនដូចជា ឡើងកំដៅខ្លាំង ការបញ្ចូលថ្មបញ្ច្រាស់សម្រាប់ឆ្នាំងសាកបម្រុង និងមិនអាចបម្រុងទុកទិន្នន័យបាន ខណៈដែល iPhone 15 ទើបតែចេញមិនដល់មួយខែផង។
កាលពីថ្ងៃទី ២២ ខែកញ្ញាកន្លងទៅ ក្រុមហ៊ុន Apple បានចាប់ផ្តើមលក់ iPhone 15 ចំនួន ៤ ម៉ូដែល ជាមួយនឹងការផ្លាស់ប្តូរដូចជា រន្ធភ្ជាប់ USB-C សម្ភារៈទីតានីញ៉ូមនៅលើកំណែ Pro និងប្តូររបៀបសំឡេងទៅប៊ូតុងសកម្មភាព។ ទោះជាយ៉ាងណាក៏ដោយ បន្ទាប់ពី ៣ សប្តាហ៍ អ្នកប្រើប្រាស់បានរាយការណ៍អំពីកំហុសជាច្រើននៅលើផលិតផលនេះ ក៏ដូចជាត្រូវបានទទួលស្គាល់ និងជួសជុលដោយ Apple ផងដែរ។ ដូច្នេះហើយ កំហុសធំៗចំនួន ៧ ដែលកំពុងកើតឡើងនៅលើ iPhone 15 មានដូចជា៖

១.កំហុសម៉ាស៊ីនកំដៅ៖ កំហុសឡើងកំដៅខ្លាំងបានលេចឡើងនៅលើកំណែទាំងបួន ជាពិសេសនៅក្នុងស៊េរី Pro ហើយក៏ក្លាយជាប្រធានបទដែលត្រូវបានពិភាក្សាពេញវេទិកាបច្ចេកវិទ្យា។ កាលពីថ្ងៃទី ៣០ ខែកញ្ញា ក្រុមហ៊ុន Apple បានបញ្ជាក់ និងចង្អុលបង្ហាញមូលហេតុមួយចំនួននៃការឡើងកំដៅខ្លាំង ក៏ដូចជាកំហុសនៅក្នុងប្រព័ន្ធប្រតិបត្តិការ iOS 17 ដោយប្រតិបត្តិការផ្ទៃខាងក្រោយនៅពេលបម្រុងទុកទិន្នន័យពីឧបករណ៍ចាស់ បានបណ្តាលឱ្យ iPhone 15 បង្កើនល្បឿនប្រតិបត្តិការ និងការអាប់ដេតពីកម្មវិធីភាគីទីបីមួយចំនួនដែលផ្ទុកលើសទម្ងន់ប្រព័ន្ធ។

២.កំហុសម៉ាស៊ីន៖ នៅពេល iPhone 15 ត្រូវបានដាក់លក់ជាផ្លូវការ អ្នកប្រើប្រាស់ចាប់ផ្តើមត្អូញត្អែរអំពីស្មាតហ្វូនស៊េរីថ្មីរបស់ក្រុមហ៊ុន Apple ដែលមានបញ្ហាភ្លាមៗនៅពេលដែលវាត្រូវបានបើក។ ដោយអ្នកជំនាញ បាននិយាយថា កញ្ចប់ដំបូងនៃទូរស័ព្ទ iPhone 15 ដែលត្រូវបានដឹកជញ្ជូនមានកំហុសក្នុងដំណើរការ ប៉ុន្តែនៅតែត្រូវបានលក់ ដែលផលិតផលនេះមានស្នាមប្រេះចំនួនបីនៅផ្នែកខាងក្រោយ នឹងមើលទៅហាក់ដូចជារងការវាយប្រហារយ៉ាងខ្លាំង។

៣.កំហុសក្នុងការបម្រុងទិន្នន័យ៖ អ្នកប្រើប្រាស់ជាច្រើននៃកំណែ iPhone 15 ដែលមានកម្មវិធី iOS 17 ឬ 17.0.1 ដែលបានដំឡើងមិនអាចផ្ទេរទិន្នន័យពី iPhone ចាស់ទៅទូរស័ព្ទថ្មីបានទេ ព្រោះ Apple ត្រូវបញ្ចេញកំណែ 17.0.2 ឆាប់ៗនេះ ដើម្បីជួសជុលកំហុសទិន្នន័យសម្រាប់ iPhone 15 series ដែលទើបលក់ថ្មី ដោយគិតត្រឹមថ្ងៃទី ២៦ ខែកញ្ញា iOS 17.0.2 នឹងត្រូវបានពង្រីក ទៅគ្រប់ឧបករណ៍ដែលគាំទ្រ iOS 17 ដែលនៅសេសសល់។

៤.កំហុសនៃការតភ្ជាប់ Wi-Fi៖ បន្ទាប់ពី Apple បានបញ្ចេញ iOS 17.0.3 អ្នកប្រើប្រាស់មួយចំនួននៅលើវេទិកាដូចជា Reddit ឬគេហទំព័រសហគមន៍ Apple បានត្អូញត្អែរថា iPhone 15 របស់ពួកគេមានល្បឿន Wi-Fi យឺតខ្លាំងណាស់ ខណៈដែលឧបករណ៍ឆ្លាតវៃផ្សេងទៀតនៅក្នុងផ្ទះមិនមានបញ្ហានោះទេ។

៥.កំហុសបិទដោយស្វ័យប្រវត្តិ៖ យោងតាម MacRumors អ្នកប្រើប្រាស់មិនអាចកំណត់ម៉ោងរោទិ៍បានទេ ដូច្នេះហើយមនុស្សជាច្រើនមានអារម្មណ៍មិនស្រួលព្រោះមុខងាររោទិ៍អាចត្រូវបានបិទដោយស្វ័យប្រវត្តិ។

៦.កំហុសអេក្រក់ព្រិលៗ៖ អ្នកប្រើប្រាស់ iPhone 15 Pro និង 15 Pro Max មួយចំនួនបានរាយការណ៍ថា ទូរស័ព្ទរបស់ពួកគេជួបប្រទះបញ្ហារលាកភ្លើង ដែលជាលក្ខខណ្ឌអេក្រង់បន្សល់ទុកពេលបង្ហាញរូបភាពបន្តក្នុងរយៈពេលយូរ។

៧.កំហុសក្នុងការសាកថ្មបញ្ច្រាស៖ ច្រក USB-C ជំនួសឱ្យ Lightning គឺជាការផ្លាស់ប្តូរដ៏ធំមួយនៅលើ iPhone 15។ ទោះជាយ៉ាងណាក៏ដោយ យោងតាម Zdnet វាហាក់បីដូចជាការផ្លាស់ប្តូររបស់ Apple មិនរលូនដូចការរំពឹងទុកនោះទេ។ មនុស្សមួយចំនួនបានរកឃើញថានៅពេលប្រើឆ្នាំងសាក Anker ដើម្បីបញ្ចូលថ្មឡើងវិញ iPhone 15 Pro បានសាកថ្មបញ្ច្រាស។ ក្រុមហ៊ុនផលិត Anker បានបញ្ជាក់ថា មធ្យោបាយតែមួយគត់ដើម្បីសាក iPhone គឺត្រូវប្រើរន្ធ USB-A ដោយ Apple ត្រូវបានគេរំពឹងថានឹងជួសជុលកំហុសទាំងអស់នេះក្នុងពេលឆាប់ៗជាមួយនឹងការអាប់ដេត iOS 17 ថ្មី៕