បរទេស៖ Apple ទើបតែទទួលបានប៉ាតង់ថ្មីសម្រាប់ចិញ្ចៀនឆ្លាតវៃដែលមានមុខងារច្រើន ជំនួសឱ្យការវាស់ស្ទង់សុខភាព ហើយអាចធ្វើអន្តរកម្មជាមួយឧបករណ៍អេឡិចត្រូនិកផ្សេងៗ ក៏ដូចជាអាចដំណើរការលើផ្នែករាងកាយទាំងអស់… ក្រៅពីម្រាមដៃ។

យោងតាមគេហទំព័រ Yahoo News ដែលបានរាយការណ៍កាលពីថ្ងៃទី២៩ ខែវិច្ឆិកាថា Apple មានកម្មសិទ្ធិប៉ាតង់ជាច្រើនទាក់ទងទៅនឹងចិញ្ចៀនឆ្លាតវៃ ដែលបង្ហាញថាបច្ចុប្បន្នក្រុមហ៊ុនកំពុងផ្តោតលើឧបករណ៍នេះយ៉ាងខ្លាំង។ ជាពិសេស ប៉ាតង់ចុងក្រោយបំផុតដែលចេញដោយការិយាល័យប៉ាតង់ និងពាណិជ្ជសញ្ញារបស់សហរដ្ឋអាមេរិក បានបង្ហាញថា ផលិតផលនាពេលអនាគតរបស់ Apple ទាំងអស់មិនកំណត់ចំពោះរូបរាងចិញ្ចៀនតែមួយមុខនោះទេ មានន័យថាផលិតផលឆ្លាតវ័យរបស់ Apple ក្រៅពីផលិតចិញ្ចៀនក៏អាចផលិតជា ខ្សែដៃ ខ្សែក ឬខ្សែជើងជាដើម…។

ទោះជាយ៉ាងណាក៏ដោយ នៅពេលពិពណ៌នាអំពីផលិតផល Apple ភាគច្រើនប្រើរូបភាពនៃចិញ្ចៀន។ យោងតាមក្រុមហ៊ុន បានឱ្យដឹងថា ចិញ្ចៀនឆ្លាតវៃមានភាពងាយស្រួលសម្រាប់អ្នកប្រើប្រាស់ ជាងឧបករណ៍ដទៃ ដោយសារចិញ្ចៀនអាចពាក់បានពេញមួយថ្ងៃ ហើយតែងតែទាក់ទងដោយផ្ទាល់ជាមួយឧបករណ៍ផ្សេងទៀតដូចជាស្មាតហ្វូនបានយ៉ាងរហ័ស និងងាយស្រួល។ ដូច្នេះ Smart Ring របស់ Apple មានសមត្ថភាពគ្រប់គ្រងឧបករណ៍បច្ចេកវិទ្យាជាច្រើនដូចជា អាចជំនួសប័ណ្ណចូលប្រើអគារនៅពេលរួមបញ្ចូលអត្តសញ្ញាណ និងព័ត៌មានផ្ទាល់ខ្លួន អាចបង់ប្រាក់ ឬស្កេន NFC និងស្គាល់ប្រតិបត្តិការគ្រប់គ្រងកាយវិការកាន់តែត្រឹមត្រូវ។

ប៉ុន្តែចំពោះចំនុចខ្សោយរបស់ Smart Ring វិញគឺថាវាមិនមានអេក្រង់បង្ហាញ ខណៈពេលដែលសមត្ថភាពក្នុងការធ្វើអន្តរកម្មជាមួយឧបករណ៍ផ្សេងទៀតអាចនាំឱ្យមានហានិភ័យនៃសុវត្ថិភាពទិន្នន័យឯកជនមិនល្អ។ បន្ថែមពីលើអន្តរកម្ម Apple Ring ក៏អាចវាស់សុខភាពតាមរយៈឧបករណ៍ចាប់សញ្ញារួមបញ្ចូលគ្នាផងដែរ។ ទោះយ៉ាងណាក៏ដោយ អ្នកប្រើប្រាស់អាចមើលតែប៉ារ៉ាម៉ែត្រនេះនៅលើ iPhone ឬ iPad ប៉ុណ្ណោះ។ ក្រុមហ៊ុន Apple តែងតែសង្កត់ធ្ងន់លើបញ្ហាសុវត្ថិភាពទិន្នន័យ ប៉ុន្តែជាមួយនឹង smart rings ក្រុមហ៊ុនបានបញ្ជាក់យ៉ាងច្បាស់ថា ការការពារឯកជនភាពរបស់អ្នកប្រើប្រាស់ឧបករណ៍នឹងអាស្រ័យលើបទប្បញ្ញត្តិ ក៏ដូចជាគោលនយោបាយនៅក្នុងតំបន់នៃការប្រើប្រាស់។

គួរបញ្ជាក់ដែរថា ប៉ាតង់ថ្មីរបស់ក្រុមហ៊ុន Apple ត្រូវបានប្រគល់ជូនអ្នកបង្កើតចំនួនបួននាក់ រួមទាំង Travis J McQueen ដែលជាអ្នកជំនាញដ៏ល្បីល្បាញលើឧបករណ៍ភ្ជាប់ជញ្ជាំង ដើម្បីត្រួតពិនិត្យឧបករណ៍ផ្សេងទៀត៕

ប្រទេសថៃ ៖ កាលពីថ្ងៃទី៣០ ខែវិច្ឆិកា ឆ្នាំ២០២៣ សារព័ត៌មានថៃបានចុះផ្សាយពីដើមចេក១គុម្ព ប៉ុន្តែដើមចេកនីមួយៗបានចេញផ្លែជាច្រើនស្ទង និងធ្វើឱ្យមនុស្សភាគច្រើនចាប់អារម្មណ៍យ៉ាងខ្លាំង ។ មនុស្សមួយចំនួនប្រាប់ថា ពួកគេមិនធ្លាប់ឃើញដើមចេកណាចេញស្ទងច្រើនបែបនេះទេ ខណៈអ្នកខ្លះទៀតបានមកអុជធូបសុំលាបសំណាង និងសុំឱ្យសម្រេចបំណងប្រាថ្នាផ្សេងៗ ។

បើតាមព្រះចៅអធិការវត្តធម្មវ៉ារី មានសង្ឃដីកាថា ដើមចេកដែលចេញស្ទងច្រើន និងល្បីល្បាញនេះ បានដុះនៅតាមផ្លូវក្នុងឃុំខៅណយ ស្រុកប្រានបុរី ខេត្តប្រាជួប សិរ៉ីខាន់ ប្រទេសថៃ ។ វាបានដុះនៅក្រៅរបងផ្ទះមួយកន្លែង ប៉ុន្តែអ្វីដែលចម្លែកនោះ គឺដើមចេក១គុម្ព មានដើមចេកចំនួន៣ដើមបានចេញស្ទងច្រើន ក្នុងនោះដើម១ ចេញ២ស្ទង, ដើម១ទៀត ចេញ៣ស្ទង ហើយដើមនៅជិតគ្នានេះ ចេញរហូតដល់៥ស្ទង ។

តាមរយៈការត្រួតពិនិត្យឃើញថា ដើមចេកទាំងនេះបានដុះនៅក្រៅរបងផ្ទះរបស់អ្នកភូមិម្នាក់ ហើយវាជាប្រភេទចេកណាមវ៉ា ។ ប៉ុន្តែអ្វីដែលធ្វើឱ្យមនុស្សគ្រប់គ្នាបែកភ្នែកធំៗនោះ ដោយសារមានដើមចេកជាច្រើនដើមបានចេញស្ទងច្រើនជាងដើមចេកទូទៅ ។ តាមធម្មតា ដើមចេក១ដើមអាចចេញផ្លែតែ១ស្ទងប៉ុណ្ណោះ ប៉ុន្តែដើមចេកទាំងនេះបែរជាប្រជែងគ្នាចេញស្ទង ដើមខ្លះ២ស្ទង, ៣ស្ទង និង៥ស្ទង ។ អ្នកមកមើលដើមចេក និយាយដូចៗគ្នាថា វាពិតជាប្លែកខ្លាំងណាស់ ព្រោះពួកគេមិនធ្លាប់បានឃើញបែបនេះមុនមកទេ ។

ចំណែកអ្នករស់នៅក្បែរនេះប្រាប់ថា ខ្លួនបានឃើញចេក១គុម្ពនេះយូរមកហើយ ប៉ុន្តែមិនដឹងថា តើម្ចាស់ផ្ទះ ឬអ្នកផ្សេងទៀតបានយកវាមកដាំនៅក្រៅរបងផ្ទះ ឬយ៉ាងណា ។ នៅពេលចេញផ្លែ ស្រាប់តែធ្វើឱ្យខ្លួនចម្លែកចិត្តជាខ្លាំង ដោយសារវាចេញស្ទងច្រើនពេក ហើយវាចាប់ផ្តើមទុំបណ្តើរៗហើយ ។ រីឯមនុស្សខ្លះទៀតបានមកអុជធូបសូមឱ្យមានសំណាងល្អ ឬសុំលេខឆ្នោតយកទៅផ្សងសំណាង ជាដើម ៕

កូរ៉េខាងត្បូង៖ កសិករកូរ៉េខាងត្បូងជាង ២០០ នាក់បានប្រមូលផ្តុំគ្នានៅជិតការិយាល័យប្រធានាធិបតីដើម្បីតវ៉ាប្រឆាំងនឹងច្បាប់ហាមឃាត់ការទទួលទានសាច់ឆ្កែ។
យោងតាមប្រភពព័ត៌មាន Yahoo News ដែលបានចុះផ្សាយកាលពីថ្ងៃទី៣០ ខែវិច្ឆិកាថា កសិកររាប់រយនាក់នៅក្នុងប្រទេសកូរ៉េខាងត្បូងបានធ្វើការតវ៉ាប្រឆាំងនឹងអាជ្ញាធរ អំពីការអនុម័តច្បាប់ហាមឃាត់ការទទួលទានសត្វឆ្កែ ដោយពួកគេបានប្រកាសថា អ្នកនយោបាយគ្មានសិទ្ធិបិទឧស្សាហកម្ម ឬសម្រេចចិត្តអ្វីដែលអ្នកដទៃអាចបរិភោគបានឡើយ។

លោក Ju Yeong-bong តំណាងកសិករដែលបង្កាត់ពូជ និងចិញ្ចឹមឆ្កែសម្រាប់សាច់ក្នុងប្រទេសកូរ៉េ បាននិយាយថា យើងមិនយល់ស្របនឹងទស្សនៈដែលថាការបរិភោគសាច់ឆ្កែគឺព្រៃផ្សៃនោះទេ ព្រោះប្រទេសទាំងអស់ដែលមានទំនៀមទម្លាប់ចិញ្ចឹមសត្វក្នុងពេលតែមួយបានបរិភោគសាច់ឆ្កែ ហើយសព្វថ្ងៃនេះប្រទេសជាច្រើននៅតែបរិភោគសាច់ឆ្កែ ”ដូច្នេះច្បាប់ហាមឃាត់ការបរិភោគសត្វឆ្កែ ប្រៀបដូចជាបិទសិទ្ធិឧស្សាហកម្មរបស់កសិករអញ្ចឹង”។

ក្នុងថ្ងៃដដែលនោះ កសិករជាង ២០០ នាក់បានប៉ះទង្គិចជាមួយប៉ូលីសដែលកម្លាំងមានទំហំធំជាង។ ប៉ូលីសបានបង្កើតរបាំងផ្លូវដើម្បីរារាំងពួកគេមិនឱ្យចូលទៅជិតការិយាល័យប្រធានាធិបតី ដោយកសិកររាប់សិបនាក់បានបើកទ្វាឡានភីកអាប់របស់ប៉ូលីសដែលដឹកសត្វឆ្កែជាច្រើនក្បាលនោះ ដើម្បីធ្វើការដោះលែងក្នុងតំបន់នេះ។ ទោះបីជាយ៉ាងណា ប៉ូលីសបានចុះត្រួតពិនិត្យ និងរារាំងកសិករមិនឱ្យធ្វើដូច្នេះទេ។

គួររំលឹកដែរថា គណបក្សកាន់អំណាចរបស់ប្រធានាធិបតី Yoon Suk-yeol កាលពីដើមខែវិច្ឆិកាបានណែនាំសេចក្តីព្រាងច្បាប់ហាមឃាត់ការចិញ្ចឹម និងលក់សត្វឆ្កែសម្រាប់សាច់ ក៏ដូចជាបង្ខំឱ្យកសិករបិទភោជនីយដ្ឋានលក់សាច់ឆ្កែរយៈពេលបីឆ្នាំ។ ដូច្នេះ កសិករដែលបង្កាត់ពូជសត្វឆ្កែសម្រាប់សាច់នៅក្នុងប្រទេសកូរ៉េ នឹងបាត់បង់ជីវភាព ហើយក៏ត្រូវបានអាជ្ញាធរមិនអើពើក្នុងការពិភាក្សាលើសេចក្តីព្រាងច្បាប់ហាមឃាត់សាច់ឆ្កែផងដែរ។

គួរបញ្ជាក់ដែរថា អ្នកបង្កាត់ពូជសត្វឆ្កែនៅក្នុងប្រទេសកូរ៉េបច្ចុប្បន្នមានការខឹងសម្បារយ៉ាងខ្លាំងចំពោះច្បាប់ហាមប្រាមសាច់ឆ្កែក្នុងប្រទេស និងបានគំរាមដោះលែងសត្វឆ្កែចំនួនពីរលានក្បាលនៅជិតភ្នាក់ងាររដ្ឋាភិបាលក្នុងទីក្រុងសេអ៊ូល ដើម្បីប្រឆាំងនឹងផែនការហាមឃាត់សាច់ឆ្កែចាប់ពីឆ្នាំ ២០២៧៕

ប្រទេសស៊ុយអែត ៖ ប្រទេសស៊ុយអែតត្រៀមដាក់ឱ្យដំណើរការនាវាអគ្គិសនីអាចហោះបានជាលើកដំបូងនៅលើពិភពលោក ដោយនាវានេះនឹងប្រើប្រាស់សម្រាប់ការដឹកជញ្ជូនសាធារណៈនៅទីក្រុង Stockholm នៅឆ្នាំ២០២៤ ។ បើតាមអ្នកផលិតនាវាអគ្គិសនីឱ្យដឹងថា អ្នកដំណើរអាចកាត់បន្ថយពេលវេលាការធ្វើដំណើរពី៥៥នាទី មកនៅត្រឹមតែ២៥នាទីប៉ុណ្ណោះ ។

នាវាអគ្គិសនីមានឈ្មោះថា Candela P-12 បានទទួលការរចនាម៉ូដ និងផលិតឡើងដោយក្រុមហ៊ុនបច្ចេកវិទ្យានៅប្រទេសស៊ុយអែត ឈ្មោះ Candela Technology AB ។ នាវានេះមានប្រវែងសរុប១២ម៉ែត្រ និងអាចដំណើរការបានដោយសារថាមពលថ្មទំហំ២៥២គីឡូវ៉ាត់ម៉ោង និងអាចផ្ទុកអ្នកដំណើរបានរហូតដល់៣០នាក់ ។

ក្រុមហ៊ុនផលិតនាវាលើកឡើងថា នាវានេះនឹងអាចហោះនៅលើផ្ទៃទឹកក្នុងល្បឿនពី៤៦គីឡូម៉ែត្រ ទៅ៥៦គីឡូម៉ែត្រក្នុង១ម៉ោង ។ រីឯការសាកថ្មនាវា១លើក អាចធ្វើដំណើរបានប្រមាណ៩២គីឡូម៉ែត្រ ។

Gustav Hasselskog ជានាយកគ្រប់គ្រងក្រុមហ៊ុននិយាយថា នាវាអាចហោះបានដោយសារបច្ចេកវិទ្យាមួយហៅថា Hydrofoils ។ បច្ចេកវិទ្យានេះអាចធ្វើឱ្យនាវាហោះនៅលើផ្ទៃទឹក និងជួយឱ្យនាវាអាចធ្វើដំណើរបានលឿន ។ លើសពីនេះ នាវាអគ្គិសនី Candela P-12 ប្រើប្រាស់ថាមពលតិចជាងនាវាទូទៅ ។

ក្រុមហ៊ុនផលិតនាវាបញ្ជាក់ថា នាវានេះបានបំពាក់ម៉ាស៊ីនចំនួន២គ្រឿង និងគ្រប់គ្រងដោយប្រព័ន្ធកុំព្យូទ័រ ដែលអាចទប់ស្កាត់ចលនានាវាបានរហូតដល់១០០លើកក្នុង១វិនាទី ។ ដូច្នេះ វាអាចជួយកាត់បន្ថយអាការៈពុលនាវារបស់អ្នកដំណើរបាន ។ នាវាអគ្គិសនីនឹងដំណើរការចាប់ពីឆ្នាំ២០២៤ តទៅ ហើយវានឹងធ្វើដំណើរពីជាយក្រុង Ekerer ទៅកាន់ទីក្រុង Stockholm ។ ជាធម្មតា គេបានចំណាយពេលធ្វើដំណើរចំនួន៥៥នាទី ប៉ុន្តែបើធ្វើដំណើរតាមនាវាអគ្គិសនី នឹងចំណាយពេលត្រឹមតែ២៥នាទីប៉ុណ្ណោះ ។

Gustav Hasselskog នាយកគ្រប់គ្រងក្រុមហ៊ុនប្រាប់ថា ៖ «បច្ចុប្បន្ន មានការកកស្ទះចរាចរណ៍នៅតាមបណ្តាទីក្រុងជាច្រើន ខណៈការធ្វើដំណើរតាមផ្លូវទឹក គឺជាវិធីធ្វើដំណើរតាំងពីសម័យបុរាណមកម៉្លេះ ប៉ុន្តែការធ្វើដំណើរតាមផ្លូវទឹកមានចំនួនតិចតួចនៅឡើយ ។ នាវា Candela P-12 នឹងជួយឱ្យអ្នកដំណើរទាំងអស់អាចធ្វើដំណើរពីទីក្រុងមួយទៅកាន់ទីក្រុងមួយទៀតយ៉ាងឆាប់រហ័ស» ៕

នៅថ្ងៃទី៣០ ខែវិច្ឆិកា តារាសម្តែង Kathryn Bernardo បានបង្ហោះនៅលើ Instagram ថាជីវិតគូរយៈពេល១១ឆ្នាំជាមួយមិត្តប្រុស Daniel Padilla ដែលជាស្នេហាដំបូងរបស់នាងត្រូវបញ្ចប់ ដោយអ្នកទាំងពីរបានបែកគ្នាមួយរយៈហើយទីបំផុតពួកគេមិនអាចវិលទៅរកសភាពដើមបាន។ ការបែកគ្នានេះដែរតារាសម្តែងល្បីឈ្មោះរូបនេះសង្ឃឹមថាអ្នកគាំទ្រទទួលយកការបែកបាក់របស់ពួកគេខណៈអ្នកគាំទ្រ រួមទាំងអ្នកសិល្បៈហ្វីលីពីនច្រើនរូបសុទ្ធតែបង្ហាញការសោកស្តាយចំពោះចំណងស្នេហ៍នេះដែលឈានដល់ថ្ងៃប្រេះឆា។

តាមខ្លឹមសារដែល Kathryn បង្ហោះមានអត្ថន័យថា « Daniel អ្នកបានផ្តល់ឱ្យខ្ញុំ ១១ ឆ្នាំដ៏ស្រស់ស្អាត។ សេចក្តីស្រឡាញ់របស់ខ្ញុំនឹងតែងតែត្រូវបានគេស្រឡាញ់។ ខ្ញុំនឹងដឹងគុណជានិច្ច» ។ ចំណែកឯ Daniel បានឆ្លើយតបនៅលើ Instagram ផ្ទាល់ខ្លួនរបស់លោកជាមួយនឹងរូបថតរបស់អ្នកទាំងពីរដោយបានអរគុណដល់ Kathryn ដែលបានចំណាយពេលវេលាស្រលាញ់គ្នាជាមួយលោកដោយរំលឹកថា ទោះលំបាកយ៉ាងណាក៏ពួកគេទាំងពីរគួរតែព្យាយាមទន្ទឹងរង់ចាំថ្ងៃអនាគតជានិច្ច។

ការប្រកាសបែកគ្នានេះដែរ មិត្តក្នុងចង្កោមសិល្បៈ និងអ្នកគាំទ្រទាំងក្នុងនិងក្រៅជាច្រើនមានការសោកស្តាយចំពោះរឿងស្នេហារបស់តារាសម្តែងទាំងពីររូបនេះ មិនគួរឈានដល់ចំណុចនេះព្រោះស្នេហារបស់ពួកគេតែងតែទទួលបានការកោតសរសើរពីមជ្ឈដ្ឋានជុំវិញខ្លួន។

តារាសម្តែង Kathryn Bernardo មានអាយុ២៧ ឆ្នាំត្រូវបានទស្សនិកជនស្គាល់តាមរយៈតួនាទីជាច្រើនក្នុងខ្សែភាពយន្តជាច្រើនហើយអ្នកគាំទ្រកម្ពុជាភាគច្រើនស្គាល់នាងតាមរយៈរឿង វាសនានាង ម៉ារ៉ា និង ក្លារ៉ា ។ តារាស្រីរូបនេះត្រូវបានគេចាត់ទុកថាជាសិល្បការិនីមួយរូបក្នុងវិស័យកម្សាន្តហ្វីលីពីនដែលមានអ្នកគាំទ្រច្រើនទាំងក្នុងនិងក្រៅប្រទេស។
Daniel Padilla មានអាយុ២៨ ឆ្នាំគឺជាតារាសម្តែង ម៉ូដែល និងជាតារាចម្រៀងហើយលោកគឺជាស្នេហាដំបូងរបស់ Kathryn ដោយអ្នកទាំងពីរបានស្រលាញ់គ្នាពេលធ្វើការជាមួយគ្នាក្នុងរឿងភាគទូរទស្សន៍ Growing Up ឆ្នាំ២០១១-២០១២ និងបានបន្តសហការគ្នាសម្តែងក្នុងរឿងជាច្រើនទៀត។ ក្នុងឆ្នាំ២០១៦ អ្នកទាំងពីរបានទទួលពានរង្វាន់ Blue Star ក្នុងប្រភេទតារាបរទេសដែលមានប្រជាប្រិយបំផុតផ្នែកតារាសម្តែង៕

ប្រទេសថៃ ៖ កាលពីថ្ងៃទី២៥ ខែវិច្ឆិកា ឆ្នាំ២០២៣ អាជ្ញាធរប្រចាំក្រុងប៉ាតាយ៉ា ខេត្តឈុនបុរី ប្រទេសថៃ បានប្រមូលកម្លាំងចុះត្រួតពិនិត្យក្រុមអ្នកប្រកបអាជីវកម្មនៅតាមឆ្នេរសមុទ្រមួយចំនួន និងនៅតំបន់ក្បែរគ្នា ក្នុងគោលបំណងរៀបចំសណ្តាប់ធ្នាប់ឡើងវិញ និងកំណត់មិនឱ្យពួកគេយកប្រាក់ថ្លៃសេវាកម្មពីភ្ញៀវទេសចរក្នុងតម្លៃខ្ពស់ពេក ។

ការចុះត្រួតពិនិត្យនេះ បន្ទាប់ពីអាជ្ញាធរបានទទួលពាក្យបណ្តឹងពីភ្ញៀវទេសចរថា មានក្រុមអ្នកប្រកបអាជីវកម្មមួយចំនួនបានតម្រៀបកៅអីអង្គុយលើសពីចំនួនដែលអាជ្ញាធរក្រុងប៉ាតាយ៉ាកំណត់ ហើយធ្វើឱ្យភ្ញៀវទេសចរមិនអាចប្រើប្រាស់ទីកន្លែងសាធារណៈបានទេ ។ លើសពីនេះ នៅថ្ងៃបុណ្យទានផ្សេងៗ អ្នកប្រកបអាជីវកម្មបានយកថ្លៃសេវាខ្ពស់ជាងថ្ងៃធម្មតាទៀតផង ។តាមរយៈការចុះត្រួតពិនិត្យនៅតាមតំបន់ឆ្នេរសមុទ្រឃើញថា អ្នកប្រកបអាជីវកម្មខ្លះបានយកកៅអីមកដាក់ជាជួរនៅតាមឆ្នេរខ្សាច់ និងមានចំនួនលើសពីការកំណត់របស់អាជ្ញាធរ ។ រីឯភ្ញៀវទេសចរដែលមកកម្សាន្តនៅឆ្នេរនេះ ពួកគេចង់យកក្រណាត់ ឬកន្ទេលមកក្រាលអង្គុយលេង គឺពិបាករកកន្លែងទំនេរណាស់ ។ ហេតុនេះ ភ្ញៀវទេសចរបានប្តឹង និងសំណូមពរឱ្យអាជ្ញាធរដាស់តឿនក្រុមអ្នកលក់ដូរទាំងនេះឱ្យគោរពតាមការព្រមព្រៀងគ្នាជាមួយអាជ្ញាធរ ។

អាជ្ញាធរលើកឡើងថា ក្រុងប៉ាតាយ៉ាបានបន្ថែមម៉ោងផ្តល់សេវាកម្ម ឬបន្ថែមម៉ោងលក់ដូរដល់ពួកគេរួចហើយ ។ ដូច្នេះ ពួកគេត្រូវតែផ្តល់ភាពងាយស្រួលដល់ភ្ញៀវទេសចរផងដែរ ។ អាជ្ញាធរបន្តថា អ្នកប្រកបអាជីវកម្មខ្លះបានយកថ្លៃសេវាពីអតិថិជនលើសពីចំនួនដែលក្រុងប៉ាតាយ៉ាកំណត់ ដូចជា តម្លៃជួលកៅអីអង្គុយស្មើនឹង៥០បាត ប៉ុន្តែពួកគេបានដំឡើងថ្លៃរហូតដល់១០០បាត ។

ចំណែកអ្នកប្រកបអាជីវកម្មផ្សេងទៀត បើអតិថិជនបង់ប្រាក់ថ្លៃកៅអីត្រឹមតែ៥០បាត ពួកគេនឹងកាត់បន្ថយពេលវេលាឱ្យខ្លីជាងមុន ហើយបើអតិថិជនចង់អង្គុយនៅលើកៅអីបន្ត ត្រូវតែបង់ប្រាក់ឱ្យពួកគេបន្ថែម ។ ហេតុនេះ វាជាទង្វើមួយខុសពីគោលការណ៍កំណត់របស់ក្រុងប៉ាតាយ៉ា ។

ចុងក្រោយ អាជ្ញាធរថៃបញ្ជាក់ថា ប្រសិនបើភ្ញៀវទេសចរប្រទះឃើញការយកថ្លៃសេវាកម្មខ្ពស់បែបនេះ អាចថតរូបភាពទុកធ្វើជាភស្តុតាងដើម្បីប្តឹងមកកាន់អាជ្ញាធរក្រុងប៉ាតាយ៉ា ហើយអាជ្ញាធរនឹងបញ្ជាឱ្យបិទការរកស៊ីរយៈពេល១៥ថ្ងៃ ៕

វៀតណាម៖ អ្នកទេសចរជាច្រើនមានការមិនពេញចិត្តនឹងអនាម័យបរិស្ថាននៅឈូងសមុទ្រ Ha Long របស់ប្រទេសវៀតណាម ដោយនិយាយថាកន្លែងនេះមានមនុស្សច្រើនពេក ដែលធ្វើឱ្យមានសំរាមកកកុញនៅលើទឹក។

យោងតាមប្រភពព័ត៌មាន Vnexpress ដែលបានចុះផ្សាយកាលពីថ្ងៃទី៣០ ខែវិច្ឆិកាថា ឈូងសមុទ្រ Ha Long គឺមានទេសភាពដ៏គួរឱ្យចាប់អារម្មណ៍ ប៉ុន្តែអ្វីដែលគួរឱ្យព្រួយបារម្ភបំផុតនោះគឺថង់នីឡុង និងដបប្លាស្ទិករាប់មិនអស់អណ្តែតជុំវិញទឹក។ អ្នកទេសចរជាច្រើនបាននិយាយថា ទេសភាព និងប្រជាជនវៀតណាមទាំងអស់គឺអស្ចារ្យណាស់ ប៉ុន្តែការយល់ដឹងរបស់ពួកគេអំពីការការពារបរិស្ថានគឺអន់ណាស់។ អ្នកទេសចរក៏បាននិយាយទៀតថា ពួកគេពិតជាសោកស្ដាយណាស់ នៅពេលដែលពួកគេឃើញទិដ្ឋភាពនៃសំរាមនៅឈូងសមុទ្រ Ha Long របស់ប្រទេសវៀតណាមប្រែទៅជាបែបនេះ។

លោក Hoang Phuc ម្ចាស់កប៉ាល់នៅឈូងសមុទ្រ Ha Long បាននិយាយថា សំរាមទាំងអស់នេះភាគច្រើនគឺចេញពីមាត់ទន្លេ Cua Van និង Bai Tu Long ត្រូវបានរុញចូលទៅក្នុងឈូងសមុទ្រ។ វត្ថុអណ្តែតចេញពីមហាសមុទ្រប៉ាស៊ីហ្វិកក៏រសាត់ចូលតំបន់ស្នូលនៃឈូងសមុទ្រ Ha Long ដូច្នេះការដកសំរាមមិនអាចធានាបាន ១០០% នោះទេ។ លើសពីនេះ សំរាមពីតំបន់លំនៅដ្ឋានដែលត្រូវបោះចោលក្នុងសមុទ្រ ឬត្រូវខ្យល់បោកបក់ក៏ជាផ្នែកមួយនៃមូលហេតុដែរ។ លោក Hoang Phuc បានបន្តទៀតថា យើងតែងតែសម្អាតសំរាម ក៏ដូចជាកៀរគរបុគ្គលិកទៅប្រមូលសំរាមនៅកន្លែងទស្សនាកម្សាន្ត និងកន្លែងហែលទឹករបស់អ្នកទេសចរ ប៉ុន្តែវានៅតែមាន។ ម្ចាស់កប៉ាល់រូបនេះបានបន្ថែមថា យើងគួរតែច្នៃប្រឌិតបច្ចេកវិទ្យាប្រមូលសំរាម ជំនួសឱ្យវិធីសាស្ត្រដោយដៃបច្ចុប្បន្ន។

ហេតុនេះហើយ យោងតាមមន្ត្រីនៃគណៈគ្រប់គ្រងឈូងសមុទ្រ Ha Long បានឱ្យដឹងថា ការប្រមូលសំរាមនៅឈូងសមុទ្រ Ha Long បច្ចុប្បន្នត្រូវបានរៀបចំជាពីរតំបន់ រួមមានតំបន់ឆ្នេរដែលគ្រប់គ្រងដោយទីក្រុង Ha Long និងតំបន់ខាងក្រៅ។ ដូច្នេះបញ្ហាសំរាមកកកុញនៅឈូងសមុទ្រ Ha Long ត្រូវបានកាត់បន្ថយខ្លះហើយ ដោយសំរាមនៅក្នុងឆ្នេរសមុទ្រហាឡុងបច្ចុប្បន្ន “មិនស្ថិតក្នុងកម្រិតនៃការផ្ទុកសំរាមលើសទម្ងន់ដូចមុនទេ”។គួរបញ្ជាក់ដែរថា គិតត្រឹមថ្ងៃទី ២០ ខែវិច្ឆិកា ចំនួនភ្ញៀវទៅទស្សនាឈូងសមុទ្រ Ha Long ត្រូវបានប៉ាន់ប្រមាណថាមានចំនួន ២.៣ លាននាក់ ដោយពេញមួយឆ្នាំត្រូវបានគេប៉ាន់ប្រមាណថានឹងឈានដល់ ២.៥ លានដង បើប្រៀបនឹងឆ្នាំ ២០១៥ (ប្រមាណ ២.៦ លានទស្សនា) និងឆ្ងាយជាងឆ្នាំ ២០១៩ (ជិត ៤.៥ លានអ្នកទស្សនា) ៕