សហអាមេរិក៖ ក្រុមហ៊ុន Meta បានចាប់ផ្តើមគិតលុយចំនួន ១៣ ដុល្លារអាមេរិកក្នុងមួយខែសម្រាប់បណ្តាញសង្គម Facebook និង Instagram នៅក្នុងទីផ្សារអឺរ៉ុបប្រសិនបើអ្នកប្រើប្រាស់មិនចង់ឃើញការផ្សាយពាណិជ្ជកម្ម។

យោងតាមគេហទំព័រ Meta ដែលបានចុះផ្សាយកាលពីថ្ងៃទី ៣០ ខែតុលាកន្លងទៅថា ក្រុមហ៊ុននឹងចាប់ផ្តើមអនុវត្តគិតលុយតែក្នុងទីផ្សារអឺរ៉ុបប៉ុណ្ណោះ សម្រាប់អ្នកដែលមិនចង់ឃើញការផ្សាយពាណិជ្ជកម្មនៅក្នុងបណ្ដាញសង្គម Facebook និង Instagram ។ ដូច្នេះ អ្នកប្រើប្រាស់នៅក្នុងតំបន់នេះអាចបង់ប្រាក់ចំនួន ១៣ ដុល្លារក្នុងមួយខែ នៅលើកម្មវិធី iOS និង Android ចាប់ពីខែវិច្ឆិកានេះតទៅ ដើម្បីជៀសវាងការមើលឃើញការផ្សាយពាណិជ្ជកម្ម។

សម្រាប់អ្នកដែលមានគណនីច្រើន Meta បាននិយាយថាការជាវនឹងគាំទ្ររាល់គណនីទាំងអស់ដែលភ្ជាប់ជាមួយអ្នកប្រើប្រាស់នៅក្នុងមជ្ឈមណ្ឌលគណនី។ ទោះយ៉ាងណាក៏ដោយនៅខែមីនាឆ្នាំក្រោយក្រុមហ៊ុននឹងប្រមូលប្រាក់បន្ថែមចំនួន ៦-៨ ដុល្លារអាមេរិកសម្រាប់គណនីថ្មីនីមួយៗ។
ការផ្លាស់ប្តូរនេះគឺជាលើកទីមួយហើយដែល Meta បានគិតថ្លៃ សេវាអ្នកប្រើប្រាស់ Facebook និង Instagram ដោយ Meta បាននិយាយថាការធ្វើបែបនេះគឺដើម្បីបំពេញតាមបទប្បញ្ញត្តិអឺរ៉ុបស្តីពីការការពារទិន្នន័យ។
គួររំលឹកដែរថា កាលពីពេលថ្មីៗកន្លងទៅនេះ Meta ត្រូវបានចោទប្រកាន់ដោយអាជ្ញាធរការពារទិន្នន័យអៀរឡង់ពីបទបំពានច្បាប់ការពារទិន្នន័យទូទៅ (GDPR) និងពិន័យជាប្រាក់ចំនួន ៤១២ លានដុល្លារអាមេរិក។ ដូច្នេះ ក្រុមហ៊ុនរបស់ Mark Zuckerberg នឹងត្រូវបានបង្ខំឱ្យអនុវត្តតាម ដោយអនុញ្ញាតឱ្យអ្នកប្រើប្រាស់សម្រេចចិត្តយ៉ាងសកម្មថាតើត្រូវអនុញ្ញាតឱ្យវេទិការបស់ពួកគេមានការផ្សាយពាណិជ្ជកម្ម ឬក៏គ្មាន។

ប្រសិនបើអ្នកប្រើប្រាស់សម្រេចចិត្តឱ្យវេទិការបស់ពួកគេមានការផ្សាយពាណិជ្ជកម្មធម្មតានោះ Meta មិនគិតលុយអ្វីទេ មានន័យថាអ្នកអាចប្រើបណ្ដាញសង្គមដោយឥតគិតថ្លៃ ប៉ុន្តែប្រសិនបើអ្នកប្រើប្រាស់សម្រេចចិត្តឱ្យវេទិការបស់ពួកគេមិនមានការផ្សាយពាណិជ្ជកម្មនៅក្នុងបណ្តាញ នោះក្រុមហ៊ុន Meta នឹងគិតលុយចំនួន ១៣ ដុល្លារអាមេរិកក្នុងមួយខែ។
ទោះជាយ៉ាងណាក៏ដោយ Meta មិនបាននិយាយថាតើគោលនយោបាយនេះនឹងត្រូវបានពង្រីកទៅទីផ្សារផ្សេងទៀតឬអត់ទេ ដោយក្រុមហ៊ុននៅតែគាំទ្រការផ្សាយពាណិជ្ជកម្មឥតគិតថ្លៃរបស់ខ្លួន៕

ប្រទេសថៃ ៖ កាលពីថ្ងៃទី៣១ ខែតុលា ឆ្នាំ២០២៣ លោក Charoen Laothamathat នាយកសមាគមនាំចេញស្រូវថៃ បានលើកឡើងអំពីការនាំចេញស្រូវក្នុងរយៈពេល៩ខែនៃឆ្នាំ២០២៣ (គឺចាប់ពីខេមករា រហូតដល់ខែកញ្ញា) ស្មើនឹងបរិមាណ៦.០៨២.១៣៦តោន កើនឡើង១២,៣% ។ រីឯនៅខែកញ្ញា ឆ្នាំ២០២៣ បរិមាណការនាំចេញស្រូវទៅក្រៅប្រទេស ស្មើនឹង៨០៧.៧៧៦តោន ។

ការនាំចេញអង្ករលេខ១ និងអង្ករ៣កំណាត់បានកើនឡើងលើសខែសីហា ឆ្នាំ២០២៣ ដោយសារប្រទេសនាំចូលស្រូវបង្កើនការនាំចូល ដើម្បីបំពេញស្តុកស្រូវក្នុងប្រទេសដែលធ្លាក់ចុះ និងត្រៀមទុកសម្រាប់ពិធីបុណ្យនៅចុងឆ្នាំ២០២៣ ។ លើសពីនេះ ការផ្គត់ផ្គង់អង្ករនៅលើទីផ្សារពិភពលោកមានកំណត់ ដោយសារវិធានការនាំចេញអង្កររបស់ប្រទេសឥណ្ឌា ដែលគេគិតថា នឹងប៉ះពាល់រហូតដល់ដើមឆ្នាំ២០២៤ ទើបធ្វើឱ្យប្រទេសទិញស្រូវងាកមកទិញស្រូវរបស់ថៃច្រើនឡើង ។

លោក Charoen Laothamathat នាយកសមាគមនាំចេញស្រូវថៃលើកឡើងថា ការនាំចេញអង្ករលេខ១ នៅខែកញ្ញា ឆ្នាំ២០២៣ ស្មើនឹងបរិមាណ២៣៦.១២០តោន កើនឡើង១៩០,៥% បើធៀបនឹងខែសីហា ឆ្នាំ២០២៣ ។ ចំណែកទីផ្សារសំខាន់ៗរួមមាន ប្រទេសអាហ្វ្រិកខាងត្បូង, បេនីន, និងយេម៉ែន ប៉ុន្តែការនាំចេញអង្ករស ស្មើនឹងបរិមាណ៣៤៩.៧០៩តោន ធ្លាក់ចុះ៧,៥% ហើយទីផ្សារសំខាន់ៗរួមមាន ប្រទេសឥណ្ឌូណេស៊ី, ម៉ាឡេស៊ី, អ៊ីរ៉ាក់, អង់ហ្គោឡា, ជប៉ុន, ហ្ស៊ីមបាវ៉េ, អាហ្វ្រិកខាងត្បូង, បេនីន និងម៉ូសំប៊ិក ។

ចំណែកការនាំចេញអង្ករក្រអូបផ្កាម្លិះ ស្មើនឹងបរិមាណ១០៧.៦៧៨តោន ធ្លាក់ចុះ០,៤% ហើយទីផ្សារសំខាន់ៗរួមមាន សហរដ្ឋអាមេរិក, កាណាដា, ហុងកុង, សិង្ហបុរី និងចិន ។

នាយកសមាគមនាំចេញស្រូវថៃរំពឹងថា នៅខែតុលា ឆ្នាំ២០២៣ ការនាំចេញស្រូវរបស់ថៃនឹងស្មើចំនួន៨សែនតោន ដោយសារមានស្រូវជាច្រើនដែលក្រុមហ៊ុននាំចេញពុំទាន់បាននាំចេញអស់ ស្របគ្នានឹងប្រទេសនាំចូលស្រូវចម្បងក្នុងតំបន់អាស៊ាន ដូចជា ឥណ្ឌូណេស៊ី, ម៉ាឡេស៊ី រួមទាំងទីផ្សារប្រចាំតំបន់ដូចជា អាហ្វ្រិក, មជ្ឈិមបូព៌ា និងអាមេរិក បានបង្កើនការនាំចូលស្រូវ-អង្ករជាបន្តបន្ទាប់ ក្នុងនោះមាន អង្ករស, អង្ករលេខ១ និងអង្ករក្រអូប ដើម្បីប្រមូលទុកធ្វើស្បៀងសម្រាប់ចុងឆ្នាំ២០២៣ ។

ចំណែកប្រទេសដែលបាននាំចេញស្រូវច្រើនជាងគេនៅលើពិភពលោក រួមមាន ៖ ឥណ្ឌា, វៀតណាម, ថៃ, ប៉ាគីស្ថាន និងសហរដ្ឋអាមេរិក ។ រីឯថៃមិនអាចស្ថិតក្នុងចំណាត់ថ្នាក់លេខ២ ជាប្រទេសនាំចេញស្រូវទៅកាន់ទីផ្សារពិភពលោកទេ ពីព្រោះវៀតណាមកំពុងបង្កើនការនាំចេញស្រូវ ៕ ប្រភព ៖ Thai PBS

វៀតណាម៖ ប្រទេសវៀតណាមត្រូវបានគេនិយាយថាកំពុងពិភាក្សាជាមួយក្រុមហ៊ុនផលិតបន្ទះឈីប semiconductors ក្នុងគោលបំណងបើករោងចក្រដំបូងរបស់ខ្លួនក្នុងវិស័យនេះ។

យោងតាមគេហទំព័រ VOA News ដែលបានចុះផ្សាយនៅថ្ងៃទី ១ ខែវិច្ឆិកាថា វៀតណាមកំពុងអនុវត្តយុទ្ធសាស្ត្រទាក់ទាញការវិនិយោគបន្ថែមលើឧបករណ៍អេឡិចត្រូនិក ក៏ដូចជាកំពុងចរចាជាមួយនឹងក្រុមហ៊ុនផលិតបន្ទះឈីបរបស់អាមេរិកមួយចំនួនក្នុងប៉ុន្មានសប្តាហ៍ថ្មីៗនេះ។

ដូច្នេះ ការចរចានៅដំណាក់កាលដំបូងនេះផ្តោតលើបញ្ហាដូចជា ការលើកទឹកចិត្ត ការឧបត្ថម្ភធន ហេដ្ឋារចនាសម្ព័ន្ធ និងកម្លាំងពលកម្ម។ ប្រភពដដែលបានបន្តទៀតថា ការសាងសង់រោងចក្រដំបូងគេនៅប្រទេសវៀតណាមទំនងជានឹងបម្រើដល់ការផលិតបន្ទះសៀគ្វីដែលមិនទំនើបពេក ដូចជាបន្ទះសៀគ្វីដែលប្រើក្នុងរថយន្ត ឬទូរគមនាគមន៍ជាដើម។ ទោះជាយ៉ាងណាក៏ដោយ មន្ត្រីឧស្សាហកម្មអាមេរិកបានព្រមានអំពីការចំណាយខ្ពស់នៃការផលិតបន្ទះឈីបទាំងនេះ។

យោងតាមរដ្ឋមន្ត្រីក្រសួងផែនការ និងវិនិយោគ លោក Nguyen Chi Dung បានមានប្រសាសន៍ថា វៀតណាមមានគុណសម្បត្តិជាច្រើនក្នុងការអភិវឌ្ឍន៍ប្រព័ន្ធអេកូឡូស៊ី semiconductor ដូចជាបច្ចេកទេសសម្បូរបែប កម្លាំងពលកម្ម អង្គភាពបណ្តុះបណ្តាល និងអាជីវកម្មជាច្រើនដែលមានឆន្ទៈសហការក្នុងការអភិវឌ្ឍឧស្សាហកម្ម រួមទាំងឧទ្យានបច្ចេកវិទ្យាខ្ពស់ចំនួនបីដែលមានលក្ខខណ្ឌហេដ្ឋារចនាសម្ព័ន្ធពេញលេញ ដើម្បីស្វាគមន៍អ្នកវិនិយោគក្នុងឧស្សាហកម្មអេឡិចត្រូនិក។ លោករដ្ឋមន្ត្រីបាននិយាយថា “គម្រោងវិនិយោគនៅក្នុងឧស្សាហកម្ម semiconductor ក្នុងវិស័យបច្ចេកវិទ្យាខ្ពស់ត្រូវបានផ្តល់ការលើកទឹកចិត្តខ្ពស់បំផុតនៅក្នុងក្របខ័ណ្ឌនៃច្បាប់វៀតណាម” ។

គួរបញ្ជាក់ដែរថា ប្រទេសវៀតណាមគ្រោងនឹងសាងសង់រោងចក្រផលិតបន្ទះឈីបដំបូងរបស់ខ្លួនក្នុងឆ្នាំ ២០៣០។ ដូច្នេះបច្ចុប្បន្ន វៀតណាមកំពុងធ្វើការលើផែនការ ក៏ដូចជាកំពុងពិភាក្សាក្នុងការនាំយកបន្ទះឈីប semiconductor ដើម្បីបង្កើតរោងចក្រដំបូងរបស់ខ្លួននាពេលខាងមុខ៕

ប្រទេសថៃ៖ ថៃគឺជាប្រទេសអភិវឌ្ឍន៍នៅជាប់ព្រំប្រទល់ប្រទេសយើង ហើយក៏ជាគោលដៅទេសចរណ៍មួយដែលមានអ្នកទេសចរ មកពីជុំវិញពិភពលោកចង់មកកំសាន្តផងដែរ។

ជាមួយនឹងទស្សនីយភាពដ៏សម្បូរបែបនិងស្រស់បំព្រង មានកន្លែងដើរលេងជាច្រើននៅក្បែរៗគ្នា ហើយភ្ញៀវទេសចរអាចរីករាយនិងការធ្វើដំណើរតាមសេវាសាធារណៈ រឺក៏ជឹះកំសាន្តតាមមធ្យោបាយឯកជន តាក់ស៊ី ជាមួយនិងតំលៃសេវាសមរម្យបំផុត។

ទីក្រុងបាងកកគឺជាទីក្រុងដ៏ស៊ីវិល័យជឿនលឿនមួយ ដូច្នេះហើយប្រសិនបើលោកអ្នកមានដំណើរកំសាន្តទៅប្រទេសថៃ ក្រុងបាងកក កុំភ្លេចទៅលេងកំសាន្តនៅកន្លែងដែលពេញនិយមបំផុតទាំង៧ទីតាំង ដែលទទួលការពេញនិយមពីស្រទាប់យុវវ័យតែងតែនាំគ្នាមកដើរកម្សាន្ត៖

១ China Town ៖ China Town ជាទីតាំងដ៏ធំមួយក្នុងចំណោម China Townទាំងអស់នៅលើពិភពលោកស្ថិតនៅចំកណ្តាលទីក្រុងបាំងកកប្រទេសថៃ។ China Town នៅទីនោះបានបង្កើតឡើងជាង២០០ឆ្នាំមកហើយនិងបានក្លាយទៅជាសហគមចិនមួយដ៏សំខាន់នាទីក្រុងបាំងកក មានទំាងកន្លែងគោរពបូជាបែបចិន កន្លែងទិញឥវ៉ាន់ ជម្រើសម្ហូបអាហារ និងផ្សារាត្រី។ម៉្យាងវិញទៀត នៅតាមផ្លួវគឺមានសភាពអ៊ូអរនិងបានដាក់លក់នូវម្ហូបចិនរាប់រយមុខក៏ដូចជាគ្រឿងអនុស្សាវរីយ គ្រឿងអល្លង្ការ សម្ភារៈបែបបចិនយ៉ាងសម្បូរបែបផងដែរ។២ BTS Skytrain ៖ គឺជាស្ថាននីយរថភ្លើងលើអាកាស ដែលជាមធ្យោបាយធ្វើដំណើរដ៏មានប្រសិទ្ធភាពបំផុតនៅក្នុងការកាត់បន្ថយភាពកកស្ទះនៅក្នុងទីក្រុងបាំងកក ហើយអាចធ្វើដំណើរបានជុំវិញទីក្រុងបាំងកកតែម្តង ដែលមានស្ថាននីយជាង៦០ឆ្លងកាត់៣ខ្សែរ។ សម្រាប់ការជិះរថភ្លើងគឺតម្រូវឲ្យមានការទិញសំបុត្រសម្រាប់ជិះក្នុងមួយជើងៗ សំបុត្រសម្រាប់ជិះក្នុងមួយថ្ងៃ និងជាវកាតក្នុងលក្ខខណ្ឌផ្សេងៗជាដើម។៣ Iconsiam ៖ ទិសដៅទេសចរណ៍ដ៏សំខាន់នៅក្រុងបាំងកកគឺ Iconsiam គឺជាផ្សារទំនើបដែលត្រូវបានបង្កើតឡើងតាំងពីឆ្នាំ២០១៨ ជាមួយនឹងហាងជាង៧០០០ប្រភេទផ្សេងៗគ្នា។ អ្វីដែលគួរឲ្យចាប់អារម្មណ៍នោះគឺនៅជាន់ផ្ទាល់ដីគឺបានសាងសង់តាមរចនាប័ទ្មស្ថាបតិយកម្មប្រពៃណីថៃ គឺគេឲ្យឈ្មោះថាផ្សារបណ្តែតទឹកបែបបុរាណនៅក្នុងផ្សារទំនើបដ៏ស៊ីវិល័យបំផុតរួមជាមួយនឹងអាហាររាប់រយមុខ និងដាក់បង្ហាញនូវទស្សនីយភាពចម្រុះនិងភាពប្លែកៗគ្នាពី៧៥ខេត្តនាប្រទេសថៃផងដែរ។៤ Siam Paragon ៖ ស្យាមផារ៉ាហ្គនគឺជាផ្សារទំនើបប្រជុំដោយម៉ាកយីហោ ប្រេនល្បីៗនៅជុំវិញពិភពលោកមិនថាខោអាវ កាបូប ស្បែកជើង សម្ភារទំនើបផ្សេងៗ ព្រមទាំងមានកន្លែងតាំងពិពណ៌ឡានទំនើបៗផងដែរ។មិនត្រឹមតែប៉ុណ្ណោះក៏មានអាហារជាច្រើនប្រភេទាំងអាហារថៃនិងអាហារអន្តជាតិជាច្រើនផងដែរ។ ស្យាមផារ៉ាហ្គនមានរោងកុនខ្នាតយក្សដូចជា Bangkok Ocean World ដែលពេញនិយមបំផុតសម្រាប់មនុស្សវ័យជំទុងក៏ដូចជាកុមារផងដែរ។ វានឹងកាន់តែបង្កនូវភាពងាយស្រួលប្រសិនបើអ្នកធ្វើដំណើរតាមរយៈ BTS Skytrain ។៥ Centralworld ៖ ផ្សារទំនើបដ៏ធំក្នុងទីក្រុងបាំងកកដែលមានហាងជាង៥០០កន្លែងកម្ពស់៧ជាន់នៅក្នុងផ្សារតែមួយផងដែរ។ Centralworld មានរួមបញ្ចូលជាមួយនឹងសណ្ឋាគារលំដាប់ផ្កាយ៥ រោងកុងអេក្រង់១៥D ទីសក្ការបូជាបែបហិនឌូ កន្លែងជិះស្គីទឹកកជាដើម ដែលវាបង្កនូវលក្ខណៈងាយស្រួលនៅក្នុងការដើរលេងជាលក្ខណៈគ្រួសារ។ សម្រាប់អ្នកដែលនិយមចូលចិត្តដើរ Shopping វិញផ្សារនេះទំនើបគឺប្រជុំទៅដោយម៉ាកយីហោល្បីៗទាំងក្នុងស្រុកនិងក្រៅស្រុក។ ម្យ៉ាងវិញទៀត កុំភ្លេចភ្លក្សជាមួយនឹងមុខម្ហូនរាប់រយមុខនៅជាន់អាហារ មានទាំងភោជនីយដ្ឋាន ហាងកាហ្វេ និងបង្អែមផ្សេងៗជាដើម។ ម្យ៉ាងវិញទៀត អ្នកទេសចរណ៍ក៏អាចមានឪកាសទទួលបាននូវការបញ្ចុះតម្លៃពិសេសៗផងដែរតាមរយៈបង្ហាញនូវ Passport។៦ ព្រះបរមរាជវាំងថៃ៖ ព្រះបរមរាជវាំងថៃត្រូវបានបង្កើតតាំងពីឆ្នាំ១៧៨២ ដើម្បីធ្វើជាព្រះរាជដំណាក់របស់ស្តេចថៃដ៏អស្ចារ្យ និងជាទីសក្ការៈរបស់ព្រះសម្មាសម្ពុទ្ធផងដែរ។ ព្រះបរមរាជរាំងថៃនេះគឺជាកន្លែងតម្កល់នូវវត្ថុបុរាណជាច្រើន រួមជាមួយនឹងតួប្រាសាទអមទៅដោយមាសនិងពេជ្រយ៉ាងមានតម្លៃ។ លើសពីនេះក៏មានការសម្តែងនូវល្ខោនពាក់ស្បែកមុខរបស់ថៃនៅសាលមហោស្រពព្រះមហាក្សត្រផងដែរ។

៧ វត្តអារុន ៖ វត្តអារុនជាកន្លែងទេសចរណ៍ដ៏ពេញនិយមគឺជាវត្តសាងសង់ឡើងតាមបែបព្រះពុទ្ធសាសនា សាងសង់ឡើងនៅក្នុងសតវត្សទី១៧ ដែលជាប់ច្រាំងខាងលិចនៃទន្លេចៅព្រះយ៉ា ដែលមយ្យោបាយនៅក្នុងការធ្វើដំណើរគឺអាចជិះទូកតាក់ស៊ីតាមដងទន្លេចៅព្រះយ៉ា។ ប្រាសាទដ៏ស្រស់ស្អាតជាពិសេសគឺនៅពេលថ្ងៃលិច គឺមើលឃើញពន្លឺពណ៌មាសយ៉ាងស្រស់ស្អាតដែលចាំងមកលើប្រាសាទផងដែរ៕

ប្រទេសថៃ ៖ នៅថ្ងៃទី៣១ ខែតុលា ឆ្នាំ២០២៣ លោក Chai Watcharong អ្នកនាំពាក្យទីស្តីការនាយករដ្ឋមន្ត្រីថៃលើកឡើងថា គណៈរដ្ឋមន្ត្រីមានមតិអនុម័តឱ្យប្រទេសឥណ្ឌា និងតៃវ៉ាន់ ស្ថិតក្នុងបញ្ជីឈ្មោះប្រទេសដែលក្រសួងមហាផ្ទៃថៃបានប្រកាសកំណត់ឱ្យអ្នកកាន់លិខិតឆ្លងដែន ឬឯកសារប្រើជំនួសលិខិតឆ្លងដែន អាចធ្វើដំណើរមកប្រទេសថៃជាបណ្តោះអាសន្ន ដើម្បីទេសចរណ៍ក្នុងលក្ខណៈពិសេស និងអនុញ្ញាតឱ្យពួកគេស្នាក់នៅប្រទេសថៃ មិនលើសពីរយៈពេល៣០ថ្ងៃ ។

ប្រទេសថៃនឹងចាប់អនុវត្តការលើកលែងទិដ្ឋាការដល់ប្រទេសទាំងពីរនេះ គិតចាប់ពីថ្ងៃទី១០ ខែវិច្ឆិកា ឆ្នាំ២០២៣ រហូតដល់ថ្ងៃទី១០ ខែឧសភា ឆ្នាំ២០២៤ (ស្មើនឹងរយៈពេល៦ខែ) ពីព្រោះវាជារដូវកាលទេសចរណ៍សម្រាប់ពលរដ្ឋឥណ្ឌា និងតៃវ៉ាន់ ។ លើសពីនេះ វាក៏ជាប្រយោជន៍សម្រាប់សេដ្ឋកិច្ចជាតិ និងកិច្ចការបរទេសជារួម ។

ក្រៅពីនេះ ក៏មានការចាត់តាំងឱ្យភ្នាក់ងារពាក់ព័ន្ធ ដូចជា ការិយាល័យប៉ូលិសអន្តោប្រវេសន៍ និងក្រសួងមហាផ្ទៃ ធ្វើការកែលម្អ និងកែតម្រូវការប្រកាស ឬបទប្បញ្ញត្តិពាក់ព័ន្ធបន្ថែមទៀត ។ ភ្នាក់ងារសន្តិសុខត្រូវតែត្រួតពិនិត្យ តាមដាន និងវាយតម្លៃផលប៉ះពាល់ពីសេចក្តីប្រកាសរបស់ក្រសួងមហាផ្ទៃ ក្រោយគ្រប់រយៈពេល៦ខែ ។

យោងតាមការពិនិត្យទិន្នន័យភ្ញៀវទេសចរមកពីប្រទេសឥណ្ឌា និងតៃវ៉ាន់ ឃើញថា ចាប់តាំងពីខែមករា រហូតដល់ខែកញ្ញា ឆ្នាំ២០២៣ មានភ្ញៀវទេសចរឥណ្ឌាធ្វើដំណើរមកកាន់ប្រទេសថៃ ចំនួន១.១៦២.២៥១នាក់ ។ ហេតុនេះ ប្រទេសថៃរំពឹងថា នៅចុងឆ្នាំ២០២៣នេះ ភ្ញៀវទេសចរឥណ្ឌានឹងធ្វើដំណើរមកថៃ ប្រមាណជាង១លាននាក់ ។

ភ្ញៀវទេសចរឥណ្ឌាបានចំណាយប្រាក់ប្រមាណ៤១.០០០បាតសម្រាប់ការមកកម្សាន្តនៅថៃ ចំនួន១លើក ខណៈភ្ញៀវទេសចរតៃវ៉ាន់បានចំណាយប្រាក់ប្រមាណ៤៣.០០០បាតសម្រាប់ការមកកម្សាន្តនៅថៃ ចំនួន១លើក ។ ហេតុនេះ ប្រទេសថៃរំពឹងថា នៅឆ្នាំ២០២៣ នឹងមានចំនួនភ្ញៀវទេសចរធ្វើដំណើរចូលថៃ ប្រមាណ៧សែននាក់ ។

គួរបញ្ជាក់ថា កាលពីថ្ងៃទី២៥ ខែកញ្ញា ឆ្នាំ២០២៣ ប្រទេសថៃបានចាប់ផ្តើមអនុវត្តគោលនយោបាយលើកលែងទិដ្ឋាការសម្រាប់ភ្ញៀវទេសចរចិន និងកាហ្សាក់ស្ថាន គឺគិតចាប់ពីថ្ងៃទី២៥ ខែកញ្ញា ឆ្នាំ២០២៣ រហូតដល់ថ្ងៃទី២៩ ខែកុម្ភៈ ឆ្នាំ២០២៤ សរុបមានរយៈពេល៥ខែ ៕ ប្រភព ៖ Thai PBS