តើជឿឬទេថា ៩៥% នៃផ្លែល្ពៅត្រូវបានគេបោះបង់ចោលក្រោយបញ្ចប់ពិធីបុណ្យ Halloween ។ កាកសំណល់ល្ពៅបានបញ្ចេញឧស្ម័នមេតាន រួចហើយបង្កើតជាឧស្ម័នផ្ទះកញ្ចក់ ដែលមានឥទ្ធិពលដល់ការឡើងកំដៅផែនដី ច្រើនជាងឧស្ម័នកាបូនឌីអុកស៊ីត រហូតដល់២០ដង ។ ជារៀងរាល់ឆ្នាំ ក្រោយបញ្ចប់ពិធីបុណ្យ Halloween ផលប៉ះពាល់បរិស្ថានបានកើតឡើងជាបន្តបន្ទាប់ និងបណ្តាលឱ្យមានផលប៉ះពាល់ដល់ពិភពលោកទៀតផង ដែលមនុស្សភាគច្រើននឹកស្មានពុំដល់ ។

យោងតាមទិន្នន័យរបស់ World Economic Forum បង្ហាញថា ៩៥% នៃផ្លែល្ពៅជាង១០លានផ្លែដែលដាំដុះនៅប្រទេសអង់គ្លេស ត្រូវបានគេយកទៅតុបតែងលម្អនៅតាមទីកន្លែងផ្សេងៗ បន្ទាប់មក គេក៏បោះវាចោលក្រោយបញ្ចប់ពិធីបុណ្យ Halloween ។ បរិមាណផ្លែល្ពៅដែលគេបោះចោលនៅប្រទេសអង់គ្លេស ស្មើនឹងទម្ងន់១៨.០០០តោន ។

ចំណែកនៅសហរដ្ឋអាមេរិក ក៏ប្រឈមនឹងបញ្ហាកាកសំណល់ផ្លែល្ពៅក្រោយបញ្ចប់ពិធីបុណ្យ Halloween ដូចគ្នាដែរ ។ អាមេរិកបានដាំផ្លែល្ពៅចំនួន៩សែនតោនក្នុង១ឆ្នាំ ហើយគេបានយកទៅបោះចោលក្នុងធុងសំរាម ជំនួសការយកវាទៅធ្វើជាម្ហូបអាហារ ឬធ្វើជីកសិកម្ម ។ ដូច្នេះ កាកសំណល់ផ្លែល្ពៅទាំងនេះមានចំណែកធ្វើឱ្យកាកសំណល់អាហារនៅលើពិភពលោក មានបរិមាណរហូតដល់១.៣០០លានតោនក្នុង១ឆ្នាំ ។

ក្រសួងថាមពលអាមេរិកលើកឡើងថា ផ្លែល្ពៅដែលគេយកទៅកប់ចោលនោះ វាបានបង្កទៅជាឧស្ម័នមេតាន រួចហើយបង្កើតជាឧស្ម័នផ្ទះកញ្ចក់ ដែលមានឥទ្ធិពលដល់ការឡើងកំដៅផែនដី ច្រើនជាងឧស្ម័នកាបូនឌីអុកស៊ីត រហូតដល់២០ដង ។ លើសពីនេះ វានឹងធ្វើឱ្យផែនដីកាន់តែឡើងកំដៅថែមទៀតនៅថ្ងៃអនាគត ។

ប៉ុន្តែនៅរដ្ឋអ៊ីលីណយរបស់អាមេរិក មានអង្គការមួយមិនស្វែងរកប្រាក់ចំណេញ ឈ្មោះថា Scarce បានបង្កើតទីតាំងទទួលយកផ្លែល្ពៅដែលគេមិនត្រូវការ ក្រោយពិធីបុណ្យ Halloween ដើម្បីយកមកធ្វើជីកសិកម្ម ។ អង្គការនេះបានប្រមូលផ្លែល្ពៅតាំងពីឆ្នាំ២០១៤ មកម៉្លេះ ដោយបង្កើតទីតាំងចំនួន៣១កន្លែងនៅទូទាំងរដ្ឋអ៊ីលីណយ ក្នុងនោះមាន ព្រះវិហារ, សាលារៀន, បណ្ណាល័យ និងសួនសាធារណៈ ។ កាលពីឆ្នាំ២០១៦ ពួកគេបានប្រមូលផ្លែល្ពៅក្រោយពិធីបុណ្យ Halloween រហូតដល់៥៦តោន ។

អ្នកស្រាវជ្រាវនិយាយថា ក្រោយបញ្ចប់ពិធីបុណ្យ Halloween ប្រទេសទាំងឡាយគួរយកផ្លែល្ពៅមកធ្វើជាប្រយោជន៍ ជាជាងការបោះវាចោលឱ្យក្លាយជាកាកសំណល់អាហារ (Food Waste) ។ ចំណែកនៅប្រទេសកម្ពុជាវិញ ផ្លែល្ពៅអាចយកធ្វើជាបង្អែម និងម្ហូបអាហារជាច្រើនមុខ ព្រោះក្រៅពីវាមានរសជាតិឆ្ងាញ់ហើយ វាក៏ផ្តល់ប្រយោជន៍ដល់សុខភាព មិនចាញ់បន្លែ និងផ្លែឈើផ្សេងទៀតទេ ៕ ប្រភព ៖ Nation

សាយ៉បំពងរបស់វៀតណាមស្ថិតក្នុងមុខម្ហូបឆ្ងាញ់បំផុតទាំង ១០ នៅលើពិភពលោក នេះបើយោងតាមគេហទំព័រ Taste Atlas ដែលបានរាយការណ៍កាលពីថ្ងៃទី ២៨ ខែតុលាកន្លងទៅ។
យោងតាមគេហទំព័រនេះបានឱ្យដឹងថា ក្នុងចំណោមមុខម្ហូបល្បីៗចំនួន ១០០ មានតែ ១០ មុខតែប៉ុណ្ណោះដែលជាប់ជាមុខម្ហូបឆ្ងាញ់បំផុតរបស់ពិភពលោក។ នេះបើយោងតាមបញ្ជីបោះឆ្នោតដែលផ្អែកលើការពិនិត្យពីអ្នកជំនាញផ្នែកធ្វើម្ហូបជិត ៣៤០,០០០ នាក់និងអ្នកទទួលទានអាហារជាមួយនឹងលក្ខណៈវិនិច្ឆ័យនៃការជ្រើសរើសមុខម្ហូបដែលមានរសជាតិប្លែក និងពេញនិយម។

ក្នុងនោះសាយ៉បំពងរបស់វៀតណាមបានស្ថិតក្នុងចំណាត់ថ្នាក់ទី ៨ ក្នុងចំណោមមុខម្ហូបកំពូលទាំង ១០ ដែលឈានដល់ ៤.៤ លើមាត្រដ្ឋាន ៥។ សាយ៉បំពងនេះ ត្រូវបានធ្វើឡើងដោយសាច់ជ្រូក រួមជាមួយនំបញ្ចុក និងបង្គារមូរក្នុងស្រទាប់ រួចចៀនយ៉ាងក្រៀមក្នុងខ្ទះប្រេង បង្កើតបានជាម្ហូបពណ៌មាស ជាមួយនឹងស្រទាប់ខាងក្រៅស្តើង ស្រួយ ស្រាល និងបំពេញដោយបន្លែក្រអូប អំពិលទុំ ផ្សិតត្រចៀកឈើជាដើម។

ដូច្នេះមុខម្ហូបឆ្ងាញ់បំផុតទាំង ១០ នៅលើពិភពលោករួមមានៈ
– Campur pilaf របស់ឥណ្ឌូណេស៊ីស្ថិតក្នុងចំណាត់ថ្នាក់ទី១
-Nigiri sushi ជប៉ុនស្ថិតក្នុងចំណាត់ថ្នាក់ទី២
-Pad Thai របស់ថៃ ស្ថិតក្នុងចំណាត់ថ្នាក់ទី ៣
-Sashimi kaisendon ជប៉ុន ស្ថិតក្នុងចំណាត់ថ្នាក់ទី ៤
-Yangzhou របស់ចិន ស្ថិតក្នុងចំណាត់ថ្នាក់ទី ៥
-Char kway teow សិង្ហបុរី ស្ថិតក្នុងចំណាត់ថ្នាក់ទី ៦
-Paella របស់អេស្ប៉ាញ ស្ថិតក្នុងចំណាត់ថ្នាក់ទី ៧
-សាយ៉បំពងវៀតណាម ស្ថិតក្នុងចំណាត់ថ្នាក់ទី ៨
-Arroz de marisco ព័រទុយហ្គាល់ ស្ថិតក្នុងចំណាត់ថ្នាក់ទី ៩
-និង Tom Kha Gai របស់ថៃស្ថិតក្នុងចំណាត់ថ្នាក់ទី ១០

គួរបញ្ជាក់ដែរថា Taste Atlas គឺជាគេហទំព័រផ្សព្វផ្សាយមុខម្ហូបឆ្ងាញ់ៗនៃគោលដៅនានាជុំវិញពិភពលោក ដោយតភ្ជាប់ជាមួយភោជនីយដ្ឋានផ្សេងៗចំនួន ៩,០០០ ណែនាំមុខម្ហូបជាង ១០,០០០ ដល់អ្នកអាន និងការពិនិត្យ រួមទាំងការស្រាវជ្រាវរាប់ពាន់ពីអ្នកជំនាញផ្នែកធ្វើម្ហូប និងមេចុងភៅ៕

ប្រទេសចិនគឺជាប្រទេសមួយដែលមានវប្បធម៌អរិយធម៌និងវប្បធម៌ដ៏ចំណាស់ និងជាប្រទេសពោរពេញទៅដោយទេសភាពស្អាតៗ និងជាសម្បត្តិដ៏អស្ចារ្យនៅលើពិភពលោក។ ដូច្នេះហើយខាងក្រោមនេះគឺជារឿងរ៉ាវក៏ដូចជាកន្លែងអច្ឆរិយទាំង៧របស់ប្រទេសចិនសម្រាប់ភ្ញៀវទេសចរណ៍ចិនគួរតែដឹង៖

១ ខ្លាឃ្មុំផេនដានៅទីក្រុង Chengdu៖ ខ្លាឃ្មុំផេនដាគឺជាសត្វថ្នាក់ជាតិម៉្យាងរបស់ប្រទេសចិន ហើយលក្ខណៈប្លែកជាងគេនៃសត្វនេះគឺវាមិនរស់នៅលាក់ខ្លួនទេ។ អាហារដ៏ពេញនិយមរបស់ខ្លាឃ្មុំផេនដាគឺ ឬស្សី ហើយពួកវាចំណាយពេលពី១០ទៅ១៦ម៉ោងនៅក្នុងការបរិភោគ។ ចំពោះកន្លែងដ៏ល្អបំផុតក្នុងការទៅមើលខ្លាឃ្មុំប្រភេទនេះគឺនៅមជ្ឃមណ្ឌលបង្កាត់ពូជខ្លាឃ្មុំផេនដានៃទីក្រុង Chengduប្រទេសចិន។

២ រូបសំណាក់ក្រុមអ្នកចម្បាំងនៃខេត្តស៊ីអាន៖ រូបសំណាក់អ្នកចម្បាំងដែលគេហៅថា Terracotta Warriors មានទីតាំងស្ថិតនៅក្នុងខេត្តស៊ីអានប្រទេសចិន។ តាមការប៉ាន់ស្មានទៅដីឥដ្ឋដែលធ្វើរូបសំណាក់នោះគឺត្រូវប្រើរយៈពេលយ៉ាងយូរ៣០ឆ្នាំដើម្បីសូនរូបនោះឡើងមក ហើយពួកគេត្រូវបានកប់ជាមួយនឹងស្តេច Qin Shi Huang អំឡុងឆ្នាំ២១០ដល់២០៩មុនគស ដោយមានជំនឿថាការធ្វើបែបនោះពួកគេនឹងតាមទៅការពារព្រះអង្គនៅពេលដែលទ្រង់ចាប់ជាតិជាថ្មី។ រូបសំណាក់នោះត្រូវបានលាក់ទុកយ៉ាងកំបាំងអស់រយៈពេលជាច្រើនសតវត្ស ទើបតែឆ្នាំ១៩៧៤គឺត្រូវបានរកឃើញដោយក្រុមកសិករប្រចាំតំបន់។ វាគឺជារឿងដែលគួរឲ្យចាប់អារម្មណ៍បំផុត ហើយអ្នកដែលបានទៅលេងនៅខេត្តស៊ីអានគឺមិនដែលរំលងទៅទស្សនារូបសំណាក់អ្នកចម្បាំងបុរាណនេះទេ។

៣ មហាកំផែងចិន៖ មហាកំផែងដែលត្រូវបានគេចាត់ទុកថាជាស្ថាបតិយ្យកម្មអច្ឆរិយៈវែងជាងគេបង្អស់ ដែលមានបណ្តាញជញ្ជាំងបន្តបណ្តាក់គ្នារហូតដល់ទៅ២០ ០០០គីឡូម៉ែត្រ។ មហាកំផែងនេះត្រូវបានស្ថាបនាឡើងនៅក្នុងរចកាលព្រះចៅអធិរាជឈីនដែលមានអាយុកាលជាង២០០០ឆ្នាំមកហើយ និងស្ថាបនាឡើងនៅក្នុងគោលបំណងការពារក៏ដូចជាបង្រួបបង្រួមអាចក្រចិននាសម័យនោះ។ ហើយអ្វីដែលគួរឲ្យភ្ញាក់ផ្អើលនោះគឺ អ្នកដែលសាងសង់មហាកំផែងនេះគឺបានយកម្សៅអង្ករដំណើបលាយជាមួយនឹងទឹកថ្នាំលាបម្យ៉ាងដើម្បីធ្វើជាស្អិតប្រៀបដូចជាស៊ីម៉ង់បច្ចុប្បន្នអ៊ីចឹង។ វាក៏ជាតំបន់ទេសចរណ៍ដ៏ពេញនិយមនៅក្នុងប្រទេសចិន ដោយបានចុះបញ្ចីនៅក្នុងអង្គការយូនីស្កូនិងជាសំណង់អច្ឆរិយៈទី៧របស់ពិភពលោកផងដែរ។

៤ ទីលានធានអានមិនជាកន្លែងបញ្ចុះសពរបស់លោកម៉ៅសេទុង៖ ទីលានធាអានមិនគឺជាទីធ្លាដ៏ធំបំផុតមួយនៅលើពិភពលោកដែលអាចទុកថាជាវិមានសម្រាប់តម្កល់វិរបុរសស្នេហាជាតិ និងជាសារមន្ទីរនៃប្រទេសចិនផងដែរ។ ទីលានធានអានមិនត្រូវបានបង្កើតឡើងដោយលោកម៉ៅសេទុងនិងសម្ពោធដាក់ឲ្យប្រើប្រាស់ជាផ្លូវការកាលពីថ្ងៃទី១ ខែតុលា ឆ្នាំ១៩៤៩ផងដែរ។

៥ ព្រះរាជវាំង Forbidden ៖ Forbidden City គឺជាវិមានរបស់ព្រះចៅអធិរាជ្យចិនក្នុងអំឡុងរាជវង្សមីងអស់រយៈពេល៥០០ឆ្នាំមកហើយ។ វាក៏បានចុះជាសម្បត្តិបេតិកភណ្ឌពិភពលោកដោយអង្គការយូនីស្កូផងដែរព្រោះវាជាបណ្តុំដោយសំណង់អគារបុរាណចិនជាច្រើនផងដែរ។ វាត្រូវបានរចនាឡើងនូវក្នុងគោលបំណងឆ្លុះបញ្ចាំងពីទស្សនវិជ្ជាក៏ដូចជាគោលការណ៍សាសនារបស់រាជវង្សមីង និងតំណាងឲ្យភាពរុងរឿងរីកចម្រើននៃអំណាចព្រះចៅអធិរាជសម័យនោះ។

៦ ទន្លេ Yangtze ជាទន្លេវែងជាងគេនៅអាស៊ី៖ ទន្លេយ៉ាងសេ ដែលជាភាសាចិនមានឈ្មោះថា Chang Jiang គឺជាទន្លេវែងជាងគេលំដាប់លេខ៣លើពិភពលោក។ ហើយអ្វីដែលពិសេសនោះគឺជិះទូកតាមដងទន្លេមើលឃើញនូវជ្រលងភ្នំ៣ដ៏អស្ចារ្យ។

៧ ទីក្រុងសៀងហៃ៖ សៀងហៃគឺជាទីក្រុងដ៏អស្ចារ្យនិងគួរឲ្យរំភើបបំផុតនៅក្នុងការធ្វើដំណើរកម្សាន្ត។ប្រជាជននៅតំបន់សៀងហៃគឺប្រើប្រាស់នៅគ្រៀមភាសាដែលអ្នកនិយាយភាសាចិនមកពីប្រទេសផ្សេងៗមិនអាចយល់ពីភាសាពួកគេបានទេ។ សម្រាប់អ្នកទេសចរណ៍អ្នកលេងនៅខេត្តនេះវិញគឺអាចមើលឃើញទីក្រុងចាស់សៀងហៃ ជាមួយនឹងសួន Yu Garden ដ៏ស្រស់ស្អាត ផ្លូវXintiandiដ៏មមាញឹក សារមន្ទីរ Shikumen Open House និងជាពិសេសគឺ Oriental Pearl Tower សំណង់ដ៏ខ្ពស់បំផុតរបស់ចិនផងដែរ៕