ប្រទេសថៃ ៖ ការិយាល័យព្រះពុទ្ធសាសនាប្រទេសថៃបានទំនាក់ទំនងទៅកាន់សមត្ថកិច្ចបង្ក្រាបបទល្មើសតាមអ៊ីនធើរណេត ដើម្បីត្រួតពិនិត្យទំព័រហ្វេសប៊ុកមួយ ដែលបានប្រើប្រាស់បច្ចេកវិទ្យា AI បង្កើតរូបភាពព្រះសង្ឃថៃប្រណាំងម៉ូតូ និងលេងហ្គីតា ។ ក្រោយពីទំព័រហ្វេសប៊ុកនេះបង្ហោះរូបភាពព្រះសង្ឃរួចមក ធ្វើឱ្យអ្នកគោរពព្រះពុទ្ធសាសនានៅថៃ និងស្ថាប័នពាក់ព័ន្ធរិះគន់ថា វាជាទង្វើមិនសមរម្យយ៉ាងខ្លាំង និងធ្វើឱ្យខូចមុខមាត់ដល់សាសនានៅប្រទេសថៃ ។

កាលពីថ្ងៃទី៧ ខែវិច្ឆិកា ឆ្នាំ២០២៣ លោក Suphat Muangmacha នាយកការិយាល័យក្រុមប្រឹក្សាពុទ្ធសាសនា និងជាអ្នកនាំពាក្យការិយាល័យព្រះពុទ្ធសាសនាជាតិលើកឡើងថា ការិយាល័យព្រះពុទ្ធសាសនាបានដាក់លិខិត១ច្បាប់ទៅកាន់សមត្ថកិច្ចបង្ក្រាបបទល្មើសតាមអ៊ីនធើរណេតរួចហើយ ។ ការដាក់លិខិតនេះ ដើម្បីត្រួតពិនិត្យករណីខាងលើ ក្រោយពីយើងពិនិត្យឃើញថា មានទំព័រហ្វេសប៊ុកមួយបានបង្ហោះរូបភាពមិនសមរម្យពាក់ព័ន្ធនឹងព្រះពុទ្ធសាសនា ដែលរូបភាពទាំងនេះបង្កើតឡើងដោយបច្ចេកវិទ្យា AI ។

លោក Suphat Muangmacha នាយកការិយាល័យក្រុមប្រឹក្សាពុទ្ធសាសនាបន្តថា វាជារូបភាពមិនសមរម្យទាល់តែសោះ ហើយវាអាចបណ្តាលឱ្យប៉ះពាល់ដល់កិត្តិយសព្រះសង្ឃថៃទៀតផង ។ ពុទ្ធសាសនិកជនជាច្រើននាក់នៅប្រទេសថៃបានសម្តែងការមិនពេញចិត្តពាក់ព័ន្ធនឹងការបង្ហោះរូបភាពទាំងនេះ ។

លោកបន្តទៀតថា ការិយាល័យព្រះពុទ្ធសាសនាបានសុំឱ្យភ្នាក់ងារជំនាញជួយត្រួតពិនិត្យករណីនេះ ដើម្បីលុបរូបភាពមិនសមរម្យចេញ ។ លើសពីនេះ ការិយាល័យព្រះពុទ្ធសាសនា ក៏បានស្វែងរកប្រភពអ្នកបង្កើតរូបភាពព្រះសង្ឃ AI ប្រណាំងម៉ូតូផងដែរ បន្ទាប់មក យើងនឹងប្តឹងទៅសមត្ថកិច្ចបង្ក្រាបបទល្មើសតាមអ៊ីនធើរណេតឱ្យចាត់វិធានការតាមផ្លូវច្បាប់បន្តទៀត ។

លោកបន្ថែមថា បច្ចុប្បន្ន យើងឃើញថា មានអ្នកប្រើប្រាស់បច្ចេកវិទ្យា AI បង្កើតរូបភាពដែលធ្វើឱ្យខូចកេរ្តិ៍ឈ្មោះដល់ព្រះសង្ឃកាន់តែច្រើន និងធ្វើឱ្យមានការយល់ខុសសម្រាប់អ្នកបានឃើញរូបភាពទាំងនេះ ។ ដូច្នេះ វាជាទង្វើមិនសមរម្យយ៉ាងខ្លាំង ខណៈពួកគេបានចែកចាយរូបភាពព្រះសង្ឃនៅក្នុងបណ្តាញសង្គម ៕ ប្រភព ៖ nation

បរទេស៖ ប្រទេសចិន ដែលជាទីផ្សារដ៏ធំបំផុតរបស់វៀតណាម បានបញ្ឈប់ការនាំចូលបង្កងកប្បាសពីប្រទេសវៀតណាម រហូតមកដល់ពេលនេះមិនទាន់បានប្រកាសពីមូលហេតុច្បាស់លាស់នៅឡើយទេ។
យោងតាមប្រភពព័ត៌មាន Vnexpress ដែលចុះផ្សាយនៅថ្ងៃទី៨ ខែវិច្ឆិកាថ្មីៗនេះថា ប្រទេសចិនបានបញ្ឈប់ការនាំចូលបង្កងកប្បាសតាំងពីខែតុលារហូតមកដល់ពេលនេះ ដោយមិនប្រាប់ពីមូលហេតុ។

លោក ង្វៀន អាន ប្រធានគណៈកម្មាធិការប្រជាជនឃុំ ខេមប៊ិញ បាននិយាយថា ចាប់តាំងពីពាក់កណ្តាលឆ្នាំ រហូតមកដល់ពេលនេះ វៀតណាមបានត្រឹមតែនាំចេញបង្កងខៀវទៅប្រទេសចិនប៉ុណ្ណោះ ចំណែកបង្កងកប្បាសវិញ បរិមាណលក់នៅមានកម្រិតណាស់ ព្រោះប្រទេសគេឈប់ទិញហើយ។

ទោះជាយ៉ាងណាក៏ដោយ ដើម្បីផ្ទៀងផ្ទាត់ និងដោះស្រាយបញ្ហានេះភ្លាមៗ ក្រសួងបានផ្ញើឯកសារមួយទៅកាន់ស្ថានទូត និងការិយាល័យពាណិជ្ជកម្មវៀតណាមប្រចាំប្រទេសចិន និងអគ្គនាយកដ្ឋានគយចិន ដោយស្ថានទូត និងការិយាល័យពាណិជ្ជកម្មវៀតណាម ប្រចាំប្រទេសចិន រួមទាំងអគ្គនាយកដ្ឋានគយនៃប្រទេសនេះ បានទទួលសំណើពីភាគីវៀតណាមហើយ ប៉ុន្តែមិនទាន់រៀបចំដំណើរការតាមសំណើរបស់ក្រសួងនៅឡើយទេ។

ខណៈដែលកំពុងរង់ចាំការឆ្លើយតបពីប្រទេសចិន នាយកដ្ឋានជលផលវៀតណាមបានស្នើឱ្យពង្រឹងការគ្រប់គ្រងគុណភាពពូជបង្កង និងការការពារ ក៏ដូចជាព្យាបាលជំងឺផ្សេងៗ រួមជាមួយសេចក្តីណែនាំស្តីពីការចុះបញ្ជីនៃការរៀបចំទ្រុងសមស្រប និងតាមផែនការ។ ជាមួយគ្នានេះ ប្រជាពលរដ្ឋអាចណែនាំឱ្យជ្រើសរើសប្រភេទកសិកម្មសមស្រប រួមទាំងកាត់បន្ថយការចិញ្ចឹមបង្កងកប្បាស បង្កើនការចិញ្ចឹមបង្កងខៀវ និងការប្រមូលផលតាមពេលវេលាសមស្រប៕

ជារឿងរាល់ឆ្នាំគឺទស្សនាវដ្តីForbesតែងតែមានការចងក្រងនិងវាយតម្លៃទៅលើបុគ្គលដែលមានជាងគេបំផុតលើពិភពលោក ដោយផ្អែកទៅលើការប៉ាន់ស្មានទ្រព្យសម្បត្តិរបស់ពួកគេ។ ជាមួយគ្នានេះដែរ បញ្ជីនៃបុគ្គលដែលមានទ្រព្យសម្បត្តិច្រើនជាងគេលើពិភពលោកនេះគឺតែងតែមានការផ្លាស់ប្តូរឥតឈប់ឈរ ដោយទ្រព្យសម្បត្តិរបស់ពួកគេអាចនឹងមានការប្រែប្រួលអាស្រ័យទៅលើកត្តាផ្សេងៗ។ គិតត្រឹមថ្ងៃទី៧ ខែវិច្ឆិកា ឆ្នាំ២០២៣នេះគឺជាចំណាត់ថ្នាក់ចុងក្រោយគេបំផុតនៃកំពូលមហាសេដ្ឋីទាំង៥លើពិភពលោក ព្រមទាំងព័ត៌មានលម្អិតដែលគួរឲ្យកត់សម្គាល់មួយចំនួនអំពីពួកគេរួមមាន៖

១ លោក Elon Musk ៖ លោក Elon Musk សញ្ជាតិអាមេរិក ស្ថិតនៅក្នុងវ័យ៥១ឆ្នាំ បច្ចុប្បន្នគឺជាមហាសេដ្ឋីមានជាងគេបំផុតលំដាប់លេខទី១លើពិភពលោក ដែលមានទឹកប្រាក់សរុបចំនួន ២៥៣.២ ពាន់លានដុល្លារសហរដ្ឋអាមេរិក។ លោកគឺជាសហស្ថាបនិករបស់ក្រុមហ៊ុន Tesla (ក្រុមហ៊ុនផលិតរថយន្តអគ្គីសនី) ក្រុមហ៊ុន SpaceX (ក្រុមហ៊ុនផលិតគ្រាប់រ៉ូកែត) និងក្រុមហ៊ុន Boring ( ការចាប់ផ្តើមដំណើរការផ្លូវរូងក្រោមដី)។ មួយផ្នែកធំនៃទ្រព្យសម្បត្តិរបស់គាត់គឺបានតាមរយៈក្រុមហ៊ុន Tesla របស់គាត់។

២ Bernard Arnault ៖ Bernard Arnault ជនជាតិបារាំង មានវ័យ៧៤ឆ្នាំ ជាមហាសេដ្ឋីទី២លើពិភពលោកដែលមានទឹកប្រាក់សរុប ១៧៣ពាន់លានដុល្លារ។ គាត់គឺជានាយកប្រតិបត្តិរបស់ក្រុមហ៊ុនដ៏ប្រណិតបំផុតលំដាប់ពិភពលោក គឺក្រុមហ៊ុន Moet Hennessy Louis Vuitton (LVMH) ដែលជាក្រុមហ៊ុនផលិតផលគ្រឿងសម្អាងនិងសម្លៀកបំពាក់ទាន់សម័យប្រមាណជាង៧០ប្រភេទផ្សេងៗគ្នា។ គាត់មានកូន៥នាក់ ហើយកូនរបស់គាត់ម្នាក់ៗសុទ្ធតែមានចំណែកាន់ភាគហ៊ុនផ្សេងៗរបស់អាណាចក្រ LVMH នេះផងដែរ។ ម្យ៉ាងវិញទៀត កាលខែមករាឆ្នាំ២០២៣កន្លងទៅថ្មីនេះ គាត់ក៏បានតែងតាំងកូនស្រីរបស់គាត់ម្នាក់ឲ្យគ្រប់គ្រងម៉ាកយីហោដ៏ល្បីលំដាប់ទី២ គឺ Dior ផងដែរ។

៣ Jeff Bezos ៖ Jeff Bezos ជនជាតិអាមេរិក មានអាយុ៥៩ឆ្នាំ បច្ចុប្បន្នគាត់គឺជាមហាសេដ្ឋីលំដាប់រងទី៣លើពិភពលោកព្រមជាមួយនឹងទ្រព្យសម្បត្តិសរុបចំនួន ១៥១ ពាន់លានដុល្លារ។ គាត់ត្រូវបានសម្រេចចិត្តបោះបង់តំណែងរបស់គាត់ក្នុងនាមជានាយកប្រតិបត្តិរបស់ក្រុមហ៊ុនយក្ស Amazon ប៉ុន្តែនៅតែរក្សាតំណែងគាត់ជាប្រធានដដែល។ គាត់ក៏ជាម្ចាស់ក្រុមហ៊ុនអាវកាសឈ្មោះ The Washington Post និងក្រុមហ៊ុន Blue Origin ដែលបានរចនាគ្រាប់រ៉ូកែតនិងបានដាក់បង្ហោះទៅកាន់លំហរកាលពីខែកក្កដា ឆ្នាំ២០២១កន្លងទៅផងដែរ។

៤ Larry Ellison ៖ ជនជាតិអាមេរិក អាយុ ៧៨ឆ្នាំ កាន់តំណែងទី៤នៅក្នុងបញ្ជីមហាសេដ្ឋីពិភពលោកនាពេលបច្ចុប្បន្នដែលមានប្រាក់សរុប ១៣៧ពាន់លានដុល្លារ។ គាត់កាន់កាប់ ៣៥% នៃក្រុមហ៊ុន Software យក្ស Oracle និងជាប្រធានផ្នែកបច្ចេកវិទ្យា និងសហស្ថានិកនៃក្រុមហ៊ុន។ គាត់ក៏បានទិញភាគហ៊ុនរបស់ក្រុមហ៊ុនតេសឡាចំនួន៣លានហ៊ុននិងចូលជាសមាជិកក្រុមប្រឹក្សាភិបាលរបស់ក្រុមហ៊ុនកាលពីឆ្នាំ២០១៨ផងដែរ។

៥ Bill Gates ៖ ជាជនជាតិអាមេរិក អាយុ៦៧ឆ្នាំ ជាមហាសេដ្ឋីទី៥ក្នុងបញ្ជីដែលមានទឹកប្រាក់ ១១៥.៤ពាន់លានដុល្លារ។ គាត់ត្រូវបានគេស្គាល់ថាជាម្ចាស់ក្រុមហ៊ុនម្នាក់ជាមួយនឹងលោក Paul Allen ដែលបានបង្កើតក្រុមហ៊ុន Microsoft តាំងពីឆ្នាំ១៩៧៥ ។ ទ្រព្យសម្បត្តិមួយភាគធំរបស់គាត់គឺបានមកពីក្រុមហ៊ុន Microsoft និងការវិនិយោគទៅលើថាមពល Zero Carbon។ បច្ចុប្បន្ន លោកក៏ជាម្ចាស់ដីស្រែធំជាងគេម្នាក់ដែរក្នុងសហរដ្ឋអាមេរិក ហើយក៏បានវិនិយោគនៅក្នុងក្រុមហ៊ុនធំៗជាច្រើនដូចជា Canadian National Railway និង Auto Nation ជាដើម៕

ប្រទេសឥណ្ឌា ៖ អាជ្ញាធរប្រចាំក្រុងញូវដែលី ប្រទេសឥណ្ឌាបានកំណត់ការប្រើប្រាស់រថយន្តចំនួន១សប្តាហ៍ ដើម្បីកាត់បន្ថយការបំពុលបរិស្ថានក្នុងទីក្រុងនេះ ក្រោយពីគុណភាពអាកាសធាតុស្ថិតក្នុងកម្រិតគ្រោះថ្នាក់អស់រយៈពេល៣ថ្ងៃជាប់ៗគ្នា ។ ហេតុនេះ អាជ្ញាធរបានបង្កើនពេលវេលាបិទសាលារៀនបឋមសិក្សា រហូតដល់ថ្ងៃទី១០ ខែវិច្ឆិកា ឆ្នាំ២០២៣ ។

ការកំណត់រយៈពេលប្រើប្រាស់រថយន្តនៅទីក្រុងញូវដែលី នឹងអនុវត្តចាប់ពីថ្ងៃទី១៣ ដល់ថ្ងៃទី២០ ខែវិច្ឆិកា ឆ្នាំ២០២៣ ។ អាជ្ញាធរប្រចាំទីក្រុងនេះនឹងអនុញ្ញាតឱ្យរថយន្តដែលមានស្លាកលេខគូ និងស្លាកលេខសេស ធ្វើការបើកបរនៅតាមដងផ្លូវឆ្លាស់ថ្ងៃគ្នាដើម្បីគ្រប់គ្រងការបំពុលបរិយាកាស ក្រោយពីគុណភាពអាកាសធាតុស្ថិតក្នុងកម្រិតគ្រោះថ្នាក់ បើទោះជាប្រទេសឥណ្ឌាបានព្យាយាមកាត់បន្ថយផលប៉ះពាល់ក្តី ។

ជារៀងរាល់ឆ្នាំ ទីក្រុងញូវដែលី បានជាប់ចំណាត់ថ្នាក់ជាទីក្រុងមានការបំពុលបរិយាកាសច្រើនបំផុតនៅលើពិភពលោក មុននឹងឈានដល់រដូវរងា ដែលពុំសូវមានខ្យល់បក់ ហើយអាកាសធាតុក៏ត្រជាក់ ។ ដូច្នេះ វាបានជួយកាត់បន្ថយកម្រិតជាតិពុលមកពីប្រភពជាច្រើន ។

ចំណែករដ្ឋមន្ត្រីក្រសួងបរិស្ថានឥណ្ឌា លោក Gopal Rai បានដាស់តឿនថា ខ្យល់ពុលនៅលើបរិយាកាសក្នុងទីក្រុងនឹងកើនឡើងថែមទៀត ក្រោយពីពិធីបុណ្យ Diwali នៅថ្ងៃទី១២ ខែវិច្ឆិកា ។ ដូច្នេះ ពិធីបុណ្យនេះនឹងមានការបាញ់កាំជ្រួច បើទោះជាមានបម្រាមក្តី ៕

ប្រភព ៖ pptv hd

ប្រទេសចិន ៖ កប៉ាល់ «Adora Magic City» គឺជាកប៉ាល់ទេសចរណ៍ទំហំធំដំបូងគេរបស់ប្រទេសចិន ត្រូវបានក្រុមហ៊ុនប្រគល់ទៅឱ្យអតិថិជននៅទីក្រុងសៀងហៃ ។ ដូច្នេះ ធ្វើឱ្យចិនក្លាយជាប្រទេសតែមួយគត់នៅលើពិភពលោក ដែលមានសមត្ថភាពផលិតកប៉ាល់ជាច្រើនប្រភេទ ដូចជា កប៉ាល់ផ្ទុកយន្តហោះ, កប៉ាល់ផ្ទុកឧស្ម័ន LNG ទំហំធំ និងកប៉ាល់ទេសចរណ៍ទំហំធំ ។

កប៉ាល់ទេសចរណ៍នេះផលិតឡើងដោយក្រុមហ៊ុន China State Shipbuilding Corporation (CSSC) និងក្រុមហ៊ុន Shanghai Waigaoqiao Shipbuilding ។ វាមានប្រវែងជាង៣២៣ម៉ែត្រ និងមានទម្ងន់ប្រមាណ១៣៥.៥០០តោន ហើយវាអាចទទួលអ្នកដំណើររហូតដល់៥.២៤៦នាក់ ។ នៅក្នុងកប៉ាល់នេះ មានបន្ទប់សម្រាកសរុបចំនួន២.១២៥បន្ទប់ ហើយការផ្តល់សេវាកម្មនឹងចាប់ផ្តើមនៅថ្ងៃទី១ ខែមករា ឆ្នាំ២០២៤ ។

ការផលិតកប៉ាល់ «Adora Magic City» គឺជាជំហានដ៏សំខាន់ក្នុងការអភិវឌ្ឍវិស័យផលិតកម្មទំនើបរបស់ប្រទេសចិន ហើយចិននៅតែគ្រប់គ្រងចំណែកទីផ្សារលំដាប់ទី១ នៅលើពិភពលោក ផ្នែកទីផ្សារផលិតកប៉ាល់អស់រយៈពេល១៣ឆ្នាំជាប់ៗគ្នា ។ ក្រុមហ៊ុន Shanghai Waigaoqiao Shipbuilding បានបង្ហាញពីភាពជោគជ័យក្នុងការផលិតកប៉ាល់ ហើយក្រុមហ៊ុនបានប្រគល់កប៉ាល់ផ្សេងៗសរុបចំនួន៥៥៣គ្រឿង ។

Chen Gang ជាប្រធានអ្នករចនាគម្រោងកប៉ាល់ទេសចរណ៍ទំហំធំរបស់ក្រុមហ៊ុន Shanghai Waigaoqiao Shipbuilding លើកឡើងថា ក្រុមហ៊ុនបានចំណាយពេលអស់៥ឆ្នាំ សម្រាប់ការផលិតកប៉ាល់ទេសចរណ៍ ។ ក្រុមហ៊ុនត្រូវសម្របខ្លួនទៅនឹងការផ្លាស់ប្តូរ ដោយការអភិវឌ្ឍគុណភាពការផលិតជាបន្តបន្ទាប់ រហូតអាចផលិតកប៉ាល់ទេសចរណ៍នេះឱ្យទំនើបលំដាប់ពិភពលោក ។ បច្ចុប្បន្ន ក្រុមហ៊ុនបានចាប់ផ្តើមផលិតកប៉ាល់ទេសចរណ៍ទី២ ហើយនេះបង្ហាញថា ឧស្សាហកម្មផលិតកប៉ាល់ទេសចរណ៍របស់ចិនកំពុងរីកចម្រើន ។

Zheng Yiming ជាប្រធានផ្នែកស្ថិតិ និងព័ត៌មានប្រចាំសមាគមឧស្សាហកម្មផលិតប៉ាល់ចិនលើកឡើងថា ភាពជោគជ័យនៃការផលិតកប៉ាល់ទេសចរណ៍របស់ចិនបង្ហាញថា ចិនអាចផលិតកប៉ាល់ទំនើបគ្រប់ប្រភេទ ។ លើសពីនេះ វាធ្វើឱ្យឧស្សាហកម្មការផលិតកប៉ាល់កើនឡើងជាបន្តបន្ទាប់ ៕ ប្រភព ៖ China face