បរទេស៖ ក្លឹប Barcelona របស់ប្រទេសអេស្ប៉ាញបានចាប់ផ្តើមលក់ត្បូងពេជ្រដែលផលិតចេញពីស្មៅនៃទីលានបាល់ទាត់ចាស់នៅ Camp Nou ដើម្បីបន្ធូរបន្ថយកង្វល់ផ្នែកហិរញ្ញវត្ថុ។

យោងតាមគេហទំព័រ All Football ដែលបានរាយការណ៍កាលពីថ្ងៃទី៦ ខែវិច្ឆិកាថា ក្លឹបបាល់ទាត់ Barcelona កំពុងបន្តខិតខំប្រឹងប្រែងដើម្បីរកប្រាក់ឱ្យបានច្រើនតាមដែលអាចធ្វើទៅបានជាមួយនឹងការផលិតត្បូងពេជ្រសម្រាប់លក់ជូនអ្នកគាំទ្ររបស់ខ្លួនទុកជាវត្ថុអនុស្សាវរីយ៍។

ក្នុងនោះ ពេជ្រកន្លះការ៉ាត់មានតម្លៃប្រហែល ២,៧០០ ដុល្លារ និងធំជាងនេះមានតម្លៃរហូតដល់ ១៦,០០០ ដុល្លារអាមេរិក ដែលពេជ្រនីមួយៗនឹងភ្ជាប់មកនូវវិញ្ញាបនបត្រពីវិទ្យាស្ថានត្បូងមរកតអន្តរជាតិ ដោយធានាថាត្បូងពេជ្រគឺលូតលាស់ក្នុងមន្ទីរពិសោធន៍ ក៏ដូចជារាយបញ្ជីលក្ខណៈរបស់គ្រឿងអលង្ការ និងមិនមានផលប៉ះពាល់ដល់បរិស្ថានឡើយ ដែលកន្លងមក ក្លឹបបាល់ទាត់នេះក៏មានលក់វត្ថុផ្សេងៗពីកីឡដ្ឋានរបស់ខ្លួនសម្រាប់អ្នកគាំទ្រផងដែរ។

ទោះជាយ៉ាងណាក៏ដោយ ក្លឹប Barcelona បានព្យាករណ៍ថាលទ្ធភាពទទួលបានប្រាក់ និងឥណទាន រួមទាំងប្រាក់ចំណេញសម្រាប់រដូវកាលនេះនៅមានកម្រិតទាបនៅឡើយ ដោយពួកគេបន្តព្យាយាម និងកាត់បន្ថយការចំណាយ ក៏ដូចជាការសងប្រាក់ដែលពួកគេបានបាត់បង់ក្នុងអំឡុងពេលជំងឺរាតត្បាត Covid 19។ យោងតាមក្លឹប Barcelona ក៏បានឱ្យដឹងទៀតថា គម្រោងចុងក្រោយរបស់ពួកគេគឺបំប្លែងទីលានបាល់ទាត់ចាស់ទៅជាអណ្តូងរ៉ែពេជ្រ។

គួរបញ្ជាក់ដែរថា Barcelona គឺជាក្លឹបបាល់ទាត់អាជីពដែលមានមូលដ្ឋាននៅប្រទេសអេស្ប៉ាញ ដោយជាទូទៅត្រូវបានគេហៅថា Barca។ កាលពីឆ្នាំ ២០២០ ក្លឹបនេះបានចំណាយប្រាក់យ៉ាងច្រើនដោយសារតែជំងឺរាតត្បាត Covid 19 ហេតុនេះហើយ ទើបក្លឹបនេះបានចាប់ផ្តើមផលិតត្បូងពេជ្រ និងលក់វត្ថុផ្សេងៗ ដើម្បីបន្ធូរបន្ថយកង្វល់ផ្នែកហិរញ្ញវត្ថុ៕

ប្រទេសអ៊ីស្រាអែល ៖ ការប្រកាសលទ្ធផលសាលារៀនល្អបំផុតចំនួន៥ នៅលើពិភពលោករបស់ភ្នាក់ងារអប់រំ T4 Education ដែលជាបណ្តាញគ្រូបង្រៀនលំដាប់ពិភពលោក បានបែងចែកសាលារៀនល្អបំផុតលើពិភពលោកជា៥ផ្នែក ដូចជា ៖ ការលើកកម្ពស់សាមគ្គីភាព, បរិស្ថាន, ការច្នៃប្រឌិតថ្មីៗ, សុខភាព និងការជួយទីប្រជុំជនក្នុងតំបន់ ។

សាលាចំនួន៥ នៅលើពិភពលោក ដែលទទួលបានពានរង្វាន់នៅឆ្នាំ២០២៣ គឺមកពីប្រទេសប្រេស៊ីល, កូឡ៊ុប៊ី, ឥណ្ឌា, អាហ្វ្រិក ហើយសាលា១ក្នុងចំណោមនោះ គឺជាសាលាបង្រៀន២ភាសា ដែលរួមផ្សំវប្បធម៌ជនជាតិ Jew និងអារ៉ាប់នៅយេរ៉ូសាឡឹម ប្រទេសអ៊ីស្រាអែល ។

សាលារៀននេះឈ្មោះ Max Rayne Hand in Hand បានទទួលពានរង្វាន់ជាសាលារៀនល្បីល្បាញផ្នែកឆ្លងកាត់ភាពលំបាក ខណៈសាលារៀនមានទាំងកុមារអារ៉ាប់ និងកុមារជនជាតិ Jew ។ សាលារៀននេះមានបង្រៀនភាសាហ៊ីប្រូ និងអារ៉ាប់ដល់កូនសិស្សជាង៦០០នាក់ ។

លោកស្រី Efrat Meyer នាយិកាសាលានិយាយថា ៖ «សាលារៀនបានបង្កើតឡើងនៅឆ្នាំ១៩៩៨ ហើយអាណាព្យាបាលសិស្សមិនព្រមទទួលយកការបែងចែករវាងជនជាតិអារ៉ាប់ និង Jew ក្នុងប្រព័ន្ធអប់រំរបស់ប្រទេសអ៊ីស្រាអែល ។ កូនសិស្សរបស់យើងមានគ្រូចំនួន២រូបក្នុងថ្នាក់រៀន ដែលគ្រូមានតួនាទីជួយបង្រៀនភាសាកំណើតរបស់ពួកគេ និងជួយពួកគេបានរៀនសូត្រភាសាផ្សេងផងដែរ» ។

ជាធម្មតា ប្រទេសអ៊ីស្រាអែលនឹងបែងចែកសាលារៀនសម្រាប់ជនជាតិអារ៉ាប់ និង Jew ហើយធ្វើឱ្យកុមារជនជាតិអារ៉ាប់ និង Jew មិនធ្លាប់ជួបគ្នានោះទេ ។ ហេតុនេះ វាអាចធ្វើឱ្យកើតឱកាសការរើសអើងជាតិសាសន៍ពេលពួកគេធំឡើង ។ ផ្ទុយទៅវិញ សាលារៀន Max Rayne Hand in Hand បានបង្រៀនពីវប្បធម៌ និងថ្ងៃសំខាន់ៗរបស់ជនជាតិ Jew, មូស្លីម និងគ្រីស្ទាន ។ ក្រៅពីនេះ កុមារទាំងឡាយក៏បានសិក្សាពីប្រវត្តិសាស្ត្ររបស់ជនជាតិទាំងពីរទៀតផង ។

អ្នកគ្រូ Sirin Janah និយាយថា ៖ «វាគួរឱ្យរីករាយណាស់ដែលក្មេងស្រីជនជាតិ Jew អាចនិយាយភាសាអារ៉ាប់បានស្ទាត់ជំនាញ ។ រីឯក្មេងអារ៉ាប់វិញអាចច្រៀងចម្រៀងជាភាសាហ៊ីប្រូបាន» ៕ ប្រភព ៖ TNN World

ដ្បិតថាកម្មវិធីពានរង្វាន់ «2023 MTV Europe Music Awards» ត្រូវបានលុបចោល ដោយសារតែជម្លោះអ៊ីស្រាអែល និងហាម៉ាសក៏ដោយ ប៉ុន្តែគេហទំព័រផ្លូវការរបស់ MTV EMA នៅតែបង្ហាញពីបញ្ជីឈ្មោះសិល្បករដែលទទួលបានពានរង្វាន់ដដែល។

ក្នុងការប្រកាសឈ្មោះនេះ Jungkook សមាជិក BTS បានឈ្នះរង្វាន់ធំនៃ “បទចម្រៀងល្អបំផុតប្រចាំឆ្នាំ” (Best Song of the Year )សម្រាប់បទ “Seven” ដែលមានការសហការជាមួយតារាចម្រៀង Latto ។ សមិទ្ធិផលនេះសម្គាល់ Jungkook ថាជាសិល្បករទោលអាស៊ីដំបូងគេដែលទទួលបានពានរង្វាន់ដ៏គួរឱ្យចង់បាននេះ ខណៈក្រុម BTS ក៏ធ្លាប់ឈ្នះពានរង្វាន់នេះជាមួយនឹង “Dynamite” នៅក្នុងឆ្នាំ ២០២០។

លើសពីនេះ Jungkook ក៏ត្រូវបានគ្រងពានរង្វាន់ ” Best K-pop ” ដែលកាន់តែពង្រឹងឥទ្ធិពលតន្ត្រីទូទាំងពិភពលោករបស់តារាចម្រៀងរូបនេះ ខណៈក្រុមចម្រៀងដែលកំពុងឡើងកូដ TXT ទទួលបានការទទួលស្គាល់នៅក្នុងប្រភេទ “Best Push” ដែលបង្ហាញពីវត្តមានដ៏ស្វាហាប់របស់ K-pop នៅលើឆាកតន្ត្រីសកល។

ពានរង្វាន់ ‘2023 MTV Europe Music Awards’ នឹងអវត្តមានក្នុងឆ្នាំនេះដោយសារតែសង្គ្រាម ប៉ុន្តែស្មារតីនៃការប្រារព្ធពិធី និងការទទួលស្គាល់ទេពកោសល្យតន្ត្រីសកលនៅតែមិនមានការថយចុះ ដោយអ្នកឈ្នះបានឆ្លុះបញ្ចាំងពីទិដ្ឋភាពចម្រុះ និងថាមពលនៃតន្ត្រីសហសម័យ។ អ្នកគាំទ្ររបស់ Jungkook និង TXT បាននាំទៅកាន់ប្រព័ន្ធផ្សព្វផ្សាយសង្គមដើម្បីអបអរការឈ្នះជាប្រវត្តិសាស្ត្រទាំងនេះ ដោយបង្ហាញពីការគាំទ្រដ៏រំភើបដែលនាំសិល្បករទាំងនេះទៅកាន់កម្ពស់ថ្មីនៃវិស័យK-Pop។

គួរបញ្ជាក់ថានេះជាលើកទីមួយហើយដែលកម្មវិធី MTV EMAs ត្រូវបានប្រកាសរំសាយចាប់តាំងពីបង្កើតឡើងក្នុងឆ្នាំ១៩៩៤ សូម្បីតែក្នុងអំឡុងពេលនៃជំងឺរាតត្បាតក៏ដោយកម្មវិធីនេះបានបន្តទៅតាមការគ្រោងទុក។ ក្នុងសេចក្តីថ្លែងការណ៍របស់អ្នកនាំពាក្យការប្រកាសរំសាយនេះគឺដោយសារសង្គ្រាមរបស់ប្រទេសអ៊ីស្រាអែលនិងហាម៉ាសព្រោះនេះមិនមែនជាពេលសម្រាប់ការប្រារព្ធពិធីសកលនោះទេស្របពេលជាមួយនឹងការបាត់បង់ជីវិតរាប់ពាន់នាក់ វាជាពេលវេលានៃការកាន់ទុក្ខ៕

ប្រទេសជប៉ុន ៖ ស្របពេលសង្គ្រាមបានកើតឡើងរវាងប្រទេសរុស្ស៊ី និងអ៊ុយក្រែន ព្រមទាំងសង្គ្រាមរវាងប្រទេសអ៊ីស្រាអែល និងប៉ាឡេស្ទីន បានធ្វើឱ្យទីក្រុងតូក្យូរបស់ប្រទេសជប៉ុនសម្រេចចិត្តរៀបចំការហ្វឹកហាត់ពីវិធីជម្លៀសខ្លួនភ្លាមៗសម្រាប់ពលរដ្ឋជប៉ុន ក្នុងករណីមានការវាយប្រហារដោយមីស៊ីល ។

ការហ្វឹកហាត់ពីវិធីជម្លៀសខ្លួនលើកនេះ គេបានរៀបចំឡើងក្នុងស្ថានីយរថភ្លើងក្រោមដីនៅតំបន់នេរីម៉ា ទីក្រុងតូក្យូ រួមទាំងស្ថានីយរថភ្លើងក្រោមដីនៅតំបន់តូអេ នេរីម៉ា និងឧទ្យានហេសេ ស៊ុតស៊ុជិ កាលពីថ្ងៃទី៦ ខែវិច្ឆិកា ឆ្នាំ២០២៣ ក្នុងនោះមានអ្នកចូលរួមប្រមាណ៣០នាក់ ។

ក្នុងអំឡុងពេលហ្វឹកហាត់ អ្នកស្ថិតនៅស្ថានីយរថភ្លើងក្រោមដីនឹងចាប់ផ្តើមជម្លៀសខ្លួន នៅពេលប្រព័ន្ធប្រកាសអាសន្ននៅទូទាំងប្រទេស (J-Alert) របស់រដ្ឋាភិបាលកណ្តាលផ្តល់សញ្ញាដាស់តឿនថា មានការប្រហារដោយមីស៊ីល ។ ចំណែកសមត្ថកិច្ច និងភ្នាក់ងារពាក់ព័ន្ធនឹងជាអ្នកជួយនាំផ្លូវមនុស្សម្នាចុះជណ្តើរទៅកាន់ទ្វារពិនិត្យសំបុត្ររថភ្លើងនៅជាន់ក្រោមដី ។ បន្ទាប់មក អ្នកជម្លៀសខ្លួនទាំងនេះត្រូវអង្គុយចុះ ដើម្បីការពារខ្លួនពីការបំផ្ទុះគ្រាប់បែក ។

រដ្ឋាភិបាលជប៉ុនបានរៀបចំទីកន្លែងសុវត្ថិភាពចំនួន៤.២៥៨កន្លែងសម្រាប់ទទួលជនភៀសខ្លួនបណ្តោះអាសន្ន ដើម្បីកាត់បន្ថយការខូចខាតដោយសារការវាយប្រហារតាមមីស៊ីល ។ ទីកន្លែងដែលរដ្ឋាភិបាលបានរៀបចំភាគច្រើន គឺជាកន្លែងផ្តល់សេវាកម្មងាយស្រួលសាធារណៈ និងកន្លែងនានានៅក្រោមដី ដែលគេចាត់ទុកថា វាមានសុវត្ថិភាព ។

បុរសជប៉ុនម្នាក់មានអាយុ៦០ឆ្នាំ បានមកចូលរួមហ្វឹកហាត់ពីវិធីជម្លៀសខ្លួននិយាយថា វាជាការហ្វឹកហាត់លើកដំបូងរបស់គាត់ ដើម្បីទប់ទល់នឹងស្ថានការណ៍អាសន្ន ដោយសារការវាយប្រហារដោយមីស៊ីល ។ គាត់បានរៀនសូត្ររួចហើយអំពីវិធីយករួចខ្លួន នៅពេលជួបហេតុការណ៍អាក្រក់ ។

ចំណែកអាជ្ញាធរប្រចាំទីក្រុងតូក្យូបញ្ជាក់ថា អាជ្ញាធរមានគម្រោងរៀបចំការហ្វឹកហាត់បន្ថែមទៀតដើម្បីផ្តល់ដំណឹងឱ្យពលរដ្ឋដឹងថា ពួកគេគួរធ្វើដូចម្តេច បើជួបនឹងហេតុការណ៍បន្ទាន់កើតឡើងជាក់ស្តែង ៕ ប្រភព ៖ nation

បរទេស៖ លោក Zelensky បានអញ្ជើញលោក Trump ទៅកាន់ប្រទេសអ៊ុយក្រែន ដើម្បីបង្ហាញថា ជម្លោះបច្ចុប្បន្នមិនអាចដោះស្រាយបានក្នុងរយៈពេល ២៤ ម៉ោងឡើយ។

យោងតាមប្រភពព័ត៌មាន CNN ដែលបានចុះផ្សាយនៅថ្ងៃទី៦ ខែវិច្ឆិកាថា ប្រធានាធិបតី Volodymyr Zelensky បានធ្វើការអញ្ជើញអតីតប្រធានាធិបតីអាមេរិកលោក Donald Trump ទៅកាន់ប្រទេសអ៊ុយក្រែន ដើម្បីដោះស្រាយនិងបញ្ចប់ជម្លោះក្នុងរយៈពេល ២៤ ម៉ោង។ លោក Zelensky បាននិយាយថា “ប្រសិនបើអតីតប្រធានាធិបតីអាមេរិកលោក Donald Trump អាចមកអ៊ុយក្រែនបាន គាត់នឹងត្រូវការពេលត្រឹមតែ ២៤ នាទីប៉ុណ្ណោះ ដើម្បីពន្យល់ដល់លោក Trump ថាគាត់មិនអាចដោះស្រាយជម្លោះនេះបានទេ”។

គួររំលឹកដែរថា កាលពីខែកញ្ញាកន្លងទៅលោក Trump បាននិយាយថា ប្រសិនបើលោកជាប់ឆ្នោតនៅឆ្នាំ ២០២៤ លោកនឹងដោះស្រាយជម្លោះនៅអ៊ុយក្រែនក្នុងរយៈពេលត្រឹមតែ ២៤ ម៉ោងប៉ុណ្ណោះ។ លោក Trump ក៏បានបន្តទៀតថា “គាត់នឹងនាំលោក Putin ជាមួយលោក Zelensky ចូលទៅក្នុងបន្ទប់មួយដើម្បីធ្វើការតទល់នឹងគ្នា បន្ទាប់មកយើងនឹងឈានដល់កិច្ចព្រមព្រៀងមួយ” ។

ទោះជាយ៉ាងណាក៏ដោយ លោក Trump មិនទាន់បានឆ្លើយតបនឹងការអញ្ជើញរបស់ប្រធានាធិបតីអ៊ុយក្រែនទេ។ ដោយអតីតប្រធានាធិបតីអាមេរិករូបនេះ បាននិយាយម្តងហើយម្តងទៀតថា លោកអាចបញ្ចប់ជម្លោះរុស្ស៊ី-អ៊ុយក្រែនបានយ៉ាងឆាប់រហ័ស ហើយជឿជាក់ថា រុស្ស៊ីនឹងមិនបើកយុទ្ធនាការនៅអ៊ុយក្រែនទេ ប្រសិនបើលោកនៅតែកាន់តំណែង៕

ប្រទេសអង់គ្លេស ៖ កាលពីថ្ងៃទី៦ ខែវិច្ឆិកា ឆ្នាំ២០២៣ Accenture គឺជាក្រុមហ៊ុនស្រាវជ្រាវ និងផ្តល់សេវាព័ត៌មាន បានបង្ហាញលទ្ធផលស្ទង់មតិចុងក្រោយថា ពលរដ្ឋអង់គ្លេសវ័យកណ្តាលចំនួន២នាក់ក្នុងចំណោម៣នាក់ បានដាក់ផែនការកាត់បន្ថយការចំណាយក្នុងអំឡុងពេលបុណ្យគ្រិស្តម៉ាស ឆ្នាំ២០២៣ ។ នេះឆ្លុះបញ្ចាំងឱ្យឃើញថា ពួកគេមានទស្សនៈអវិជ្ជមានចំពោះការចំណាយប្រចាំថ្ងៃ ច្រើនជាងការស្ទង់មតិជាច្រើនលើកនាពេលកន្លងមក ។

លទ្ធផលស្ទង់មតិបង្ហាញថា បច្ចុប្បន្ន ពលរដ្ឋអង់គ្លេសកំពុងស្វែងរកវិធីកាត់បន្ថយការចំណាយប្រាក់ រួមទាំងកាត់បន្ថយការទិញវត្ថុអនុស្សាវីរយ៍, កាត់បន្ថយការបរិភោគអាហារនៅក្រៅផ្ទះ និងកាត់បន្ថយការទិញអាហារ និងភេសជ្ជៈមកបរិភោគនៅផ្ទះ ដោយសារពួកគេបារម្ភពីជីវភាពប្រចាំថ្ងៃ ។ លទ្ធផលស្ទង់មតិបង្ហាញទៀតថា ពលរដ្ឋអង់គ្លេសមានវ័យកណ្តាលស្មើជាងពាក់កណ្តាល គ្មានគម្រោងទទួលប្រយោជន៍ពីការបញ្ចុះតម្លៃក្នុងការទិញទំនិញផ្សេងៗនៅថ្ងៃ Black Friday, Cyber Monday ឬ Boxing Day នោះទេ ។

យោងតាមទិន្នន័យផ្លូវការដែលបានផ្សព្វផ្សាយនាពេលថ្មីៗនេះបញ្ជាក់ថា ចំនួនការលក់រាយនៅប្រទេសអង់គ្លេស បានធ្លាក់ចុះខ្លាំងជាងការរំពឹងទុកនៅខែកញ្ញា ឆ្នាំ២០២៣ ទៅទៀត ។ ការធ្លាក់ចុះនេះបណ្តាលមកពីអាកាសធាតុក្តៅខុសធម្មតា ដែលបណ្តាលឱ្យការលក់សម្លៀកបំពាក់នៅរដូវស្លឹកឈើជ្រុះធ្លាក់ចុះ ។

បើទោះជាគ្រួសារនីមួយៗនៅអង់គ្លេសត្រូវប្រឈមនឹងបញ្ហាជីវភាពរស់នៅក្នុងរយៈពេល២ឆ្នាំក្តី ប៉ុន្តែជាទូទៅ តម្រូវការទិញទំនិញពីអតិថិជននៅតែកើនឡើងនៅឆ្នាំ២០២៣ ។ Next ជាក្រុមហ៊ុនលក់សម្លៀកបំពាក់រាយរបស់អង់គ្លេសលើកឡើងថា អាកាសធាតុនៅរដូវស្លឹកឈើជ្រុះមានសភាពធម្មតាវិញហើយ តាំងពីពាក់កណ្តាលខែតុលា ឆ្នាំ២០២៣ ។ ដូច្នេះ វាធ្វើឱ្យការលក់ទំនិញកើនឡើងវិញ ហើយក្រុមហ៊ុនគិតថា ការលក់នៅត្រីមាសទី៤ ឆ្នាំ២០២៣ ដែលជាអំឡុងពេលបុណ្យគ្រិស្តម៉ាសនឹងកើនឡើង២% បើធៀបពីមួយឆ្នាំទៅមួយឆ្នាំ ។

ចំណែក Tesco ជាក្រុមហ៊ុនលក់ទំនិញរាយដ៏ធំមួយនៅប្រទេសអង់គ្លេស និង Sainsbury ជាក្រុមហ៊ុនលក់ទំនិញរាយ និងជាគូប្រជែងគ្នានោះ ពួកគេមានទស្សនៈវិជ្ជមានពាក់ព័ន្ធនឹងការលក់ទំនិញក្នុងអំឡុងពេលបុណ្យគ្រិស្តម៉ាស ៕ ប្រភព ៖ Bangkok biznews