កញ្ញា ព្រះកាយច័ន្ទ តារាស្រីត្រៀមចូលរួមប្រកួត Miss Grand Cambodia 2024 ខាងមុខនេះបានបង្ហាញការគាំទ្រពេញទំហឹងចំពោះកញ្ញា ពេជ្រ វត្តីសារ៉ាឌ្ឍី ដែលបានលើកឡើងថាគួរគាំទ្រតារាខ្មែរច្រើនជាងបរទេសស្របពេលមួយរយៈចុងក្រោយនេះមានការគាំទ្រហៅតារាបរទេសចូលរួមកម្មវិធីច្រើន។ ក្នុងនោះ ពេជ្រ វត្តីសារ៉ាវឌ្ឍី លើកឡើងទៀតថាតម្លៃខ្លួនតារាក្នុងស្រុកមានការតវ៉ាច្រើន ខណៈហ៊ានឱ្យតម្លៃខ្លួនច្រើនទៅតារាបរទេសវិញ។
នៅថ្ងៃទី១៩ ធ្នូ ព្រះកាយច័ន្ទ បានបង្ហោះវីដេអូខ្លីរបស់ ពេជ្រ វត្តីសារ៉ាវឌ្ឍី សិស្សប្អូនជំនាន់ក្រោយក្នុងអាជីពសិល្បៈ និងជាសិស្សច្បងខាងវិស័យបវរកញ្ញា ដែលបាននិយាយលើកស្ទួយតារាក្នុងស្រុកឱ្យមានគាំទ្រច្រើនជាងតារាបរទេស។ តារាស្រីរូបនេះបានសរសេរថា «បងសូមគ្រាំទ្រការបញ្ចេញយោបល់របស់ប្អូនស្រី ខ្មែរឱ្យតម្លៃខ្មែរទើបខ្មែរថ្លៃទៅបាន»។
នៅក្នុងវីដេអូនោះដែរ ពេជ្រ វត្តីសារ៉ាវឌ្ឍី បានលើកឡើងថាក្នុងប្រទេសយើងពុំសូវមានកម្មវិធីដូចជាប្រទេសថៃទេ កម្មវិធីនៅថៃមានជាប់គ្នាជានិច្ចពេលនាងនៅធ្វើការហើយទទួលបានចំណូលច្រើនទៀត។ ដោយឡែកការងាររបស់ខ្លួនរាល់ដងនៅក្នុងប្រទេសមានតែប្រម៉ូតផលិតផលមិនសូវបានចូលរួមកម្មវិធីទេ។ បវរកញ្ញារូបនេះបាននិយាយទៀតថា ការពិតមានកម្មវិធីអញ្ជើញទៅចូលរួមច្រើនប៉ុន្តែតម្លៃមិនត្រូវគ្នាច្រើន ដោយសារនៅក្នុងប្រទេសយើងតម្លៃតួនៅមានកម្រិត។
Miss Grand Cambodia 2022 រូបនេះបានបន្ថែមថា ប្រទេសយើងពេលនេះចាប់ផ្តើមទៅតារាស្រុកគេច្រើន ហើយតារាខ្មែរមានការតវ៉ាតម្លៃខ្លួនច្រើន តែជាមួយតារាស្រុកគេ គេល្បីគិតថាសមតម្លៃ។ យ៉ាងណា ពេជ្រ វត្តីសារ៉ាវឌ្ឍី ថាខ្មែរគួរតែគាំទ្រខ្មែរ ហើយជឿថាហ្វេនខ្មែរនៅតែគាំទ្រខ្មែរខ្លួនឯងដែរ ជាក់ស្តែងដូចជាហ្វេនៗរបស់ខ្លួនចឹងហ៊ានធ្វើបានគ្រប់យ៉ាងទាំងអស់។
លំដាប់រងទី៥លើឆាកអន្តរជាតិ រូបនេះបន្តទៀតថា នាងមិនបានហាមឃាត់មិនឱ្យគាំទ្រតារាស្រុកគេនោះទេ ហើយនាងក៏គាំទ្រតារាក្រៅស្រុក និងក្នុងស្រុកដូចគ្នាពេលនាងមិនទាន់ក្លាយខ្លួនជាតារាហើយព័ត៌មានតារាខ្មែរនាងដឹងទាំងអស់។
គួរបញ្ជាក់ថា ព្រះកាយច័ន្ទ គឺជាសិល្បការិនីមានប្រជាប្រិយមួយរូបក្នុងប្រទេសនិងគ្រូបង្វឹកម្នាក់ទាំងទម្រង់សិល្បៈបុរាណនិងសម័យ ខណៈពេលនេះនាងត្រៀមចូលរួមប្រកួតប្រជែងវិស័យបវរកញ្ញាវិញម្តងបន្ទាប់ពីមានសន្ទុះជំរុញគាំទ្រច្រើនពីហ្វេនៗឱ្យនាងចូលរួមប្រកួតដណ្តើមមកុដ៕
