សារព័ត៌មានបរទេសបានផ្សព្វផ្សាយពីទីក្រុងជាច្រើនលើពិភពលោក ត្រៀមរៀបចំកម្មវិធីឆ្លងឆ្នាំចាស់ចូលឆ្នាំថ្មី ឆ្នាំ២០២៦ នៅពាក់កណ្តាលអធ្រាត្រ ថ្ងៃទី៣១ ខែធ្នូ ឆ្នាំ២០២៥ ជាមួយវិធានការពង្រឹងសន្តិសុខ ដើម្បីការពារហេតុការណ៍អាក្រ.ក់ដែលអាចកើតឡើងក្នុងពេលរៀបចំកម្មវិធី ។ ទន្ទឹមនឹងនេះ ក៏មានទីក្រុងមួយចំនួនទៀតលុបចោលកម្មវិធីឆ្លងឆ្នាំ ដើម្បីការពារហេតុការណ៍មិនល្អកើតមានឡើង និងទប់ស្កាត់ឥរិយាបថមិនសមរម្យរបស់អ្នកចូលរួម ។

ទីក្រុងញូវយ៉ក សហរដ្ឋអាមេរិក គឺជាទីកន្លែងរៀបចំកម្មវិធីឆ្លងឆ្នាំចាស់ដ៏ល្បីល្បាញបំផុតនៅលើពិភពលោក ដែលកម្មវិធីសំខាន់របស់ទីក្រុងនេះ គឺការរាប់ថយក្រោយនៅតំបន់ Times Square រួមទាំងការបង្ហោះបាឡុងយក្សចុះពីលើសសរអគារ Times Square ។ នៅឆ្នាំ២០២៥ នឹងមានការបង្ហោះបាឡុងយក្ស ចំនួន២លើក គឺលើកទី១ នៅពាក់កណ្តាលអធ្រាត្រ ថ្ងៃទី៣១ ខែធ្នូ ឆ្នាំ២០២៥ និងលើកទី២ នាវេលាម៉ោង០០និង០៤នាទី ថ្ងៃទី១ ខែមករា ឆ្នាំ២០២៦ ហើយបាឡុយយក្សនឹងប្រែជាពណ៌ទង់ជាតិអាមេរិក ដើម្បីបង្ហាញពីការប្រារព្ធខួប២៥០ឆ្នាំ នៃការបង្កើតសហរដ្ឋអាមេរិក ។

អាមេរិករំពឹងថា នឹងមានមនុស្សចូលរួមកម្មវិធីឆ្លងឆ្នាំនៅតំបន់ Times Square នៅយប់ថ្ងៃចុងឆ្នាំនេះរាប់លាននាក់ ។ សមត្ថកិច្ចទីក្រុងញូវយ៉កបានរៀបចំវិធានការសុវត្ថិភាពរួចរាល់ គឺបង្កើនចំនួនសមត្ថកិច្ចយាមកាមរាប់ពាន់នាក់ច្រើនជាងឆ្នាំ២០២៤ ដើម្បីត្រួតពិនិត្យហេតុការណ៍គួរឱ្យសង្ស័យ ព្រមទាំងត្រៀមកងកម្លាំងសង្គ្រោះបន្ទាន់, ភ្នាក់ងារកម្ចាត់គ្រាប់បែក, ភ្នាក់ងារឧទ្ធម្ភាគចក្រ និងដ្រូន ។ ការបង្កើនវិធានការសន្តិសុខដោយសារបារម្ភពីទីក្រុងញូវយ៉កអាចក្លាយជាគោលដៅការវាយប្រហារពេលឆ្លងឆ្នាំ ជាពិសេស ទប់ស្កាត់ជនល្មើសជិះរថយន្តបំបុកហ្វូងមនុស្ស ។

ចំណែកទីក្រុងស៊ីដនី ប្រទេសអូស្ត្រាលី នឹងមានកម្មវិធីបាញ់កាំជ្រួចនៅលើស្ពាន Sydney Harbour និងតំបន់ផ្សេងៗ ។ រដ្ឋាភិបាលអូស្ត្រាលីរំពឹងថា នឹងមានភ្ញៀវទេសចរជាតិ-អន្តរជាតិមកចូលរួមទស្សនាកាំជ្រួចនៅទីក្រុងស៊ីដនី រហូតដល់១លាន ១សែននាក់ ។ តាំងពីព្រឹកថ្ងៃទី៣១ ខែធ្នូ ភ្ញៀវទេសចរជាច្រើនបានឈរតម្រង់ជួររង់ចាំកក់កន្លែងចូលរួមកម្មវិធីឆ្លងឆ្នាំ និងកក់កន្លែងកម្សាន្តផ្សេង ។

សមត្ថកិច្ចជាច្រើននឹងត្រូវដាក់ពង្រាយជុំវិញទីក្រុងស៊ីដនី និងមានសមត្ថកិច្ចចំនួន៣,០០០នាក់ ត្រូវបញ្ជូនទៅយាមកាមនៅកន្លែងឆ្លងឆ្នាំ ដើម្បីផ្តល់សុវត្ថិភាពដល់អ្នកចូលរួម ។ ការពង្រឹងសន្តិសុខ បន្ទាប់ពីអូស្ត្រាលីទើបតែកើតហេតុការណ៍បាញ់ប្រហារនៅឆ្នេរសមុទ្រ Bondi កាលពីថ្ងៃទី១៤ ខែធ្នូ បណ្តាលឱ្យមនុស្សស្លាប់១៥នាក់ ហើយអូស្ត្រាលីនឹងធ្វើពិធីកាន់ទុក្ខហេតុការណ៍ដ៏សោកសៅនេះ ដោយឱ្យមនុស្សម្នាឈរស្ងៀម ១នាទី ។

រីឯទីក្រុងជាច្រើនទៀតបានលុបចោលកម្មវិធីឆ្លងឆ្នាំ ដូចជា ៖ ទីក្រុងប៉ារីស ប្រទេសបារាំង បានលុបចោលការប្រគំតន្ត្រីឆ្នាំថ្មីនៅតាមផ្លូវ Champs Elysées ដោយសារបារម្ភពីហេតុការណ៍គ្រោះថ្នាក់មិនអាចដឹងមុន ។ ម្យ៉ាងទៀត ផ្លូវនេះមិនស័ក្តិសមសម្រាប់ការរៀបចំកម្មវិធីដែលមានមនុស្សណែនណាន់តាន់តាប់ទេ ប៉ុន្តែនៅតែមានការបាញ់កាំជ្រួចនៅវិមានជ័យជម្នះរបស់បារាំង ។

ដោយឡែក ទីក្រុងតូក្យូ ប្រទេសជប៉ុន បានលុបចោលកម្មវិធីឆ្លងឆ្នាំនៅតំបន់ឈិប៊ូយ៉ា ដើម្បីទប់ស្កាត់ឥរិយាបថមិនសមរម្យរបស់អ្នកចូលរួម ដូចជា ៖ ការផឹកស្រាតាមផ្លូវ និងការពារមិនឱ្យកើតហេតុការណ៍មនុស្សចង្អៀតខ្លាំង ៕

តារាចម្រៀងតៃវ៉ាន់ Jolin Tsai បានបង្កើតការចាប់អារម្មណ៍យ៉ាងខ្លាំង នៅពេលដែលនាងច្រៀងលើរូបសំណាកសត្វពស់យក្សមួយកាលពីថ្ងៃទី៣០ ខែធ្នូ។ តារាចម្រៀងវ័យ៤៥ ឆ្នាំ រូបនេះកំពុងរៀបចំដំណើរទេសចរណ៍ « Pleasure» របស់ខ្លួនដែលជើងទីមួយបាននឹងកំពុងធ្វើឡើងនៅទីក្រុងតៃប៉ិ ជាមួយនឹងការប្រគំតន្ត្រីចំនួនបីចាប់ពីថ្ងៃទី ៣០ ខែធ្នូ ដល់ថ្ងៃទី ១ ខែមករា ឆ្នាំ ២០២៦។

យោងតាម Next Apple បានឱ្យដឹងថា Jolin Tsai បានវិនិយោគប្រាក់ចំនួន ៩០០លានដុល្លារតៃវ៉ាន់ក្នុងដំណើរទេសចរណ៍នេះ។ តារាចម្រៀងរូបនេះក៏បានបង្កើតរូបចម្លាក់ផ្សេងទៀតដូចជា រូបក្របី រូបជ្រូក និងរូបមេអំបៅផងដែរ។ ក្នុងចំណោមរូបចម្លាក់ទាំងនោះ រូបចម្លាក់ពស់យក្សដែលមានប្រវែង ៣០ ម៉ែត្របានបង្កើតឥទ្ធិពលមើលឃើញខ្លាំងបំផុត។

បន្ទាប់ពីកម្មវិធីរបស់ខ្លួន Jolin Tsai បានថ្លែងអំណរគុណដល់អ្នកសហការរបស់នាងដែលបានជួយនាងប្រែក្លាយចក្ខុវិស័យរបស់នាងទៅជាការពិត។ ការប្រគំតន្ត្រីលើកដំបូងបានទាក់ទាញអ្នកចូលរួមចំនួន ៤០.០០០ នាក់ ហើយក្នុងរយៈពេលបីយប់ មនុស្សសរុបចំនួន ១២០.០០០ នាក់បានទស្សនាការសម្តែងផ្ទាល់របស់ Jolin Tsai នៅឯពហុកីឡដ្ឋានក្នុងទីក្រុងតៃប៉ិ។

Jolin Tsai គឺជាតារាចម្រៀងដែលទទួលបានជោគជ័យបំផុតនៅតៃវ៉ាន់ ដោយស្ថិតក្នុងចំណោមតារាចម្រៀងដែលរកចំណូលបានខ្ពស់បំផុតនៅតៃវ៉ាន់អស់រយៈពេលជាច្រើនឆ្នាំ។ ក្រៅពីសំឡេងច្រៀងដ៏ល្អឥតខ្ចោះរបស់នាង នាងក៏មានជំនាញរាំដ៏គួរឱ្យចាប់អារម្មណ៍ផងដែរ ជាពិសេសការរាំតាមបង្គោល។ នាងមានមូលដ្ឋានអ្នកគាំទ្រយ៉ាងច្រើន ដោយមានអ្នកតាមដានជាង ៤២ លាននាក់នៅលើ Weibo ។

ពីមុន Jolin ធ្លាប់មានទំនាក់ទំនងស្នេហាជាមួយ តារាចម្រៀង Jay Chou ប៉ុន្តែពួកគេបានបែកបាក់គ្នានៅឆ្នាំ ២០០៥។ Jolin Tsai ក៏មានទំនាក់ទំនងជាមួយតារាម៉ូដែល Kam Wing ផងដែរ។ ចាប់តាំងពីបែកបាក់ជាមួយមិត្តប្រុសរបស់ខ្លួននៅឆ្នាំ ២០១៦ មក Jolin Tsai មិនបានបង្ហាញជាសាធារណៈនូវទំនាក់ទំនងស្នេហាថ្មីណាមួយឡើយ៕

ប្រទេសចិន ៖ រដ្ឋាភិបាលចិនបានកំណត់ឱ្យអនុវត្តច្បាប់ថ្មីគ្រប់គ្រងបច្ចេកវិទ្យា AI ដើម្បីការពារកុ.មារ និងយុវជនពីគ្រោះថ្នា.ក់ដោយសារការណែនាំមិនត្រឹមត្រូវរបស់បច្ចេកវិទ្យា ដែលច្បាប់ថ្មីតឹងរ៉ឺងជាងមុនសម្រាប់ការពារអ្នកប្រើប្រាស់មិនឱ្យជឿតាមការណែនាំរបស់ Chatbot ឈានទៅធ្វើបា.បខ្លួនឯង ឬប្រព្រឹត្តអំពើហិង្សា ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី៣០ ខែធ្នូ ឆ្នាំ២០២៥ ។

ក្រៅពីនេះ ច្បាប់ថ្មីកំណត់ឱ្យក្រុមហ៊ុនបច្ចេកវិទ្យានានាត្រួតពិនិត្យឱ្យប្រាកដចិត្តថា បច្ចេកវិទ្យា AI របស់ខ្លួនមិនណែនាំឱ្យអ្នកប្រើប្រាស់លេងល្បែង ។ ការអនុវត្តច្បាប់ថ្មី គឺក្រោយពីមានការបង្ហាញ Chatbot ជាច្រើនទាំងនៅចិន និងទូទាំងពិភពលោក ព្រមទាំងអនុវត្តជាមួយផលិតផល និងសេវាកម្មបច្ចេកវិទ្យា AI ទាំងអស់នៅចិន ។ នេះជាការគ្រប់គ្រងបច្ចេកវិទ្យា AI ដែលកំពុងរីកចម្រើនយ៉ាងឆាប់រហ័ស និងត្រូវបានត្រួតពិនិត្យយ៉ាងតឹងរ៉ឹងដើម្បីសុវត្ថិភាពអ្នកប្រើប្រាស់ ។

នាយកដ្ឋានគ្រប់គ្រងអ៊ីនធើរណេតចិន (CAC) បានផ្សព្វផ្សាយសេចក្តីព្រាងច្បាប់ថ្មីកាលពីចុងសប្តាហ៍ទី៤ ខែធ្នូ ដោយរួមបញ្ចូលទាំងវិធានការការពារកុមារ ព្រមទាំងកំណត់ឱ្យក្រុមហ៊ុនបច្ចេកវិទ្យាបង្កើតមុខងារ (Function) ផ្ទាល់ខ្លួន, កំណត់រយៈពេលប្រើប្រាស់ និងត្រូវទទួលការយល់ព្រមពីអាណាព្យាបាលជាមុន ទើបកុមារ និងយុវជនមានសិទ្ធិប្រើប្រាស់ ។ ក្រុមហ៊ុនបច្ចេកវិទ្យាត្រូវមានបុគ្គលិកជាមនុស្សគ្រប់គ្រងការសន្ទនារវាងបច្ចេកវិទ្យា និងអ្នកប្រើប្រាស់ បើការសន្ទនាពាក់ព័ន្ធនឹងការធ្វើអត្តឃាត ឬណែនាំឱ្យអ្នកប្រើប្រាស់ធ្វើបាបខ្លួន គឺបុគ្គលិកត្រូវជូនដំណឹងទៅអាណាព្យាបាលជាបន្ទាន់ ។

ក្រុមហ៊ុនបច្ចេកវិទ្យាក៏ត្រូវត្រួតពិនិត្យថា បច្ចេកវិទ្យារបស់ខ្លួនមិនបង្ហាញខ្លឹមសារគ្រោះថ្នាក់ដល់សន្តិសុខជាតិ, ខ្លឹមសារប៉ះពាល់កិត្តិយស និងផលប្រយោជន៍ជាតិ ឬមិនបំផ្លាញសាមគ្គីភាព ។ ប៉ុន្តែនាយកដ្ឋានគ្រប់គ្រងអ៊ីនធើរណេតគាំទ្រការប្រើប្រាស់បច្ចេកវិទ្យាក្នុងផ្នែកផ្សេងៗ រួមមាន ៖ ផ្សព្វផ្សាយវប្បធម៌ក្នុងស្រុក និងបច្ចេកវិទ្យាថែទាំផ្លូវចិត្តមនុស្សចាស់ លុះត្រាតែបច្ចេកវិទ្យានេះមានសុវត្ថិភាព និងគួរឱ្យទុកចិត្ត ។

គួរបញ្ជាក់ថា រយៈពេលជាច្រើនឆ្នាំនេះ ប្រទេសនានាចាប់ផ្តើមត្រួតពិនិត្យយ៉ាងតឹងរ៉ឹងពីផលប៉ះពាល់របស់បច្ចេកវិទ្យា AI ចំពោះអ្នកប្រើប្រាស់ ពីព្រោះការសន្ទនាជាមួយមនុស្សពាក់ព័ន្ធនឹងការធ្វើបាបខ្លួនឯង គឺពិបាកដោះស្រាយបំផុតសម្រាប់ក្រុមហ៊ុនបច្ចេកវិទ្យា ។

កាលពីខែសីហា ឆ្នាំ២០២៥ គ្រួសារមួយនៅរដ្ឋកាលីហ្វ័រញ៉ា សហរដ្ឋអាមេរិក បានប្តឹងក្រុមហ៊ុន OpenAI ដែលបង្កើតកម្មវិធី ChatGPT បន្ទាប់ពីកូនប្រុសអាយុ១៦ឆ្នាំបាត់បង់ជីវិត ។ គ្រួសារនេះចោទប្រកាន់ថា ChatGPT ណែនាំឱ្យកូនប្រុសធ្វើអត្តឃាតខ្លួនឯង ហើយនេះជាការប្តឹងផ្តល់លើកដំបូងដែលចោទប្រកាន់ AI ពាក់ព័ន្ធនឹងការធ្វើឱ្យអ្នកដទៃស្លាប់ ៕