ការសិក្សាពិតជាគ្មានដែនកំណត់! អ្នកប្រើប្រាស់បណ្តាញសង្គមបានបង្ហាញអារម្មណ៍ភ្ញាក់ផ្អើលមិនតិចនោះទេ បន្ទាប់ពីមានការផ្សព្វផ្សាយថាដូនចាស់វ័យ៨២ឆ្នាំម្នាក់ឈ្មោះថា Kim Jeong-ja បានដើរចូលទៅក្នុងវិទ្យាល័យ Seoul Girls’ High School ក្នុងទីក្រុង Mapo ភាគខាងលិចទីក្រុងសេអ៊ូលកាលពីថ្ងៃទី១៦ វិច្ឆិកា ដើម្បីធ្វើតេស្តសមត្ថភាពសិក្សានៅមហាវិទ្យាល័យ។ លោកយាយ Kim ជាបេក្ខជនចំណាស់បំផុតដែលបានប្រឡងចូលសាកលវិទ្យាល័យនៅឆ្នាំនេះក្នុងប្រទេសកូរ៉េ។

ដូនចាស់ Kim Jeong-ja កើតនៅឆ្នាំ១៩៤១ ក្នុងប្រទេសជប៉ុនដោយបានផ្លាស់ទៅ Masan ភាគខាងត្បូង Gyeongsang បន្ទាប់ពីប្រទេសកូរ៉េត្រូវបានរំដោះចេញពីការគ្រប់គ្រងអាណានិគមរបស់ជប៉ុន។ ទោះយ៉ាងណាក៏ដោយ សង្គ្រាមកូរ៉េបានផ្ទុះឡើងនៅឆ្នាំ ១៩៥០ ធ្វើឱ្យលោកយាយមិនទទួលបានការអប់រំនោះទេទោះបីក្រោយបញ្ចប់សង្គ្រាមក៏ដោយ ព្រោះតែជាកូនច្បងក្នុងចំណោមកូន៨នាក់ស្ថិតក្នុងគ្រួសារក្រីក្រ។

យ៉ាងណាមិញ លោកយាយ Kim បានចាប់ផ្តើមរៀនសាជាថ្មីបន្ទាប់ពីកូនរបស់លោកយាយធំពេញវ័យ។ លោកយាយបានចាប់ផ្តើមចូលរៀននៅវិទ្យាល័យ Ilsung Women’s High School ក្នុងទីក្រុង Mapo កាលពីប្រាំឆ្នាំមុន ហើយមិនបានខកខានលើការសិក្សានោះទេ។

ដំបូងឡើយលោកយាយមិនអាចសរសេរឈ្មោះខ្លួនឯងជាភាសាកូរ៉េបាន លុះក្រោយមកលោកយាយអាចសរសេរកំណាព្យ ហើយពេលនេះក៏បានសិក្សាភាសាអង់គ្លេសដើម្បីទំនាក់ទំនងជាមួយចៅរបស់លោកដែលរស់នៅសហរដ្ឋអាម៉េរិក។ ការដែលលោកយាយ Kim សម្រេចចិត្តប្រលងចូលមហាវិទ្យាល័យព្រោះតែកត្តាមួយនេះដូចគ្នាដោយសង្ឃឹមថានឹងរៀនភាសាអង់គ្លេសនៅមហាវិទ្យាល័យ ដើម្បីអាចទំនាក់ទំនងជាមួយចៅនៅក្រៅប្រទេសបាន។

នៅពេលបង្ហាញមុខក្នុងកម្មវិធីទូរទស្សន៍កាលពី ៤ ឆ្នាំមុនលោកយាយ Kim បាននិយាយថាលោកយាយយំនៅឯព្រលានយន្តហោះនៅពេលដែលកូនស្រីរបស់ខ្លួនកំពុងចាកចេញទៅសហរដ្ឋអាម៉េរិក។ លោកយាយមិនឃើញច្រកចេញដំណើរទេព្រោះតែមិនចេះអក្សរ។

ការប្រឡងចូលសាកលវិទ្យាល័យនៅកូរ៉េត្រូវបានគេចាត់ទុកថាជាការប្រឡងដ៏លំបាកបំផុតមួយ។ ប្រទេសទាំងមូលបានកែសម្រួលប្រតិបត្តិការដើម្បីកំណត់អាទិភាពបេក្ខជន៖ ចរាចរណ៍ជុំវិញកន្លែងប្រឡងត្រូវបានតម្រូវឱ្យដាក់កម្រិតសំឡេងរំខាន អាជីវកម្មក្នុងតំបន់ និងផ្សារហ៊ុនបានបើកយឺតជាងធម្មតា ហើយជើងហោះហើរជាច្រើនត្រូវបានពន្យារពេល។ប៉ូលិសទទួលខុសត្រូវក្នុងការជួយបេក្ខជនដែលមកយឺត ខណៈក្នុងរយៈពេល ៨ម៉ោង បេក្ខជននឹងឆ្លងកាត់ការធ្វើតេស្តជាច្រើនដូចជា ភាសាកូរ៉េ គណិតវិទ្យា ភាសាអង់គ្លេស ប្រវត្តិកូរ៉េ ភាសាបរទេសទីពីរ ឬអក្សរចិន៕

បរទេស៖ ស្ត្រីជនជាតិនីហ្សេរីយ៉ាម្នាក់ឈ្មោះ Helen Williams បានចំណាយពេល ១១ ថ្ងៃ ដើម្បីបង្កើតសក់ពាក់ប្រវែង ៣៥១ ម៉ែត្រដែលត្រូវបានទទួលស្គាល់ដោយ Guinness World Records ថាជាសក់ពាក់វែងជាងគេបំផុតលើពិភពលោក។

យោងតាមប្រភពព័ត៌មាន BBC ដែលបានចុះផ្សាយកាលពីថ្ងៃទី១៦ ខែវិច្ឆិកាថា Helen Williams គឺជាជាងធ្វើសក់ពាក់នៅទីក្រុង Lagos ប្រទេសនីហ្សេ។ នាងបានចំណាយពេល ១១ ថ្ងៃ និងប្រាក់ចំនួន ២,៥០០ ដុល្លារអាមេរិក ក្នុងការស្វែងរកសម្ភារៈសម្រាប់ធ្វើម៉ូតសក់យក្សនេះ ដោយនាងបានប្រើស្ព្រាយបាញ់សក់ ១២ កំប៉ុង, កាវសក់ ៣៥ បំពង់, និងឈុតសក់ ៦.២៥០។

Helen Williams បាននិយាយថា ការធ្វើម៉ូតសក់យក្សនេះគឺមិនមែនជារឿងងាយស្រួលនោះទេ។ Williams ក៏បានបន្តទៀតថា ក្រៅពីការលំបាកក្នុងការស្វែងរកគ្រឿងផ្សំ នាងក៏ធ្លាប់ចង់បោះបង់ម្តងម្កាលផងដែលព្រោះនាងហត់ខ្លាំងណាស់ ប៉ុន្តែអរគុណចំពោះការលើកទឹកចិត្តពីមិត្តភ័ក្តិ និងក្រុមគ្រួសាររបស់នាង ទើបនាងបានតស៊ូក្នុងការបញ្ចប់ការងាររបស់នាងដោយជោគជ័យ។ដូច្នេះ បញ្ហាប្រឈមមួយទៀតដែល Helen Williams ជួបប្រទះនោះគឺការស្វែងរកកន្លែងវែងគ្រប់គ្រាន់ដើម្បីដាក់សក់ត្រង់សម្រាប់ការវាស់វែងត្រឹមត្រូវ។ ប៉ុន្តែមិនមានទីតាំងសមរម្យនោះឡើយ សូម្បីតែពហុកីឡាដ្ឋាន ដែលជាហេតុបង្ខំឱ្យនាងបានដាក់សក់ពាក់នោះនៅជាប់ផ្លូវ Lagos-Abeokuta ដែលជាផ្លូវវែងបំផុតតភ្ជាប់ទីក្រុង Lagos និង Abeokuta ។

ការទទួលបានងារជាម្ចាស់សក់ពាក់វែងជាងគេលើពិភពលោកដែលទទួលស្គាល់ដោយ Guinness World Records បានធ្វើឱ្យ Helen Williams និងគ្រួសារ មិត្តភក្តិរបស់នាងសប្បាយចិត្តយ៉ាងខ្លាំង។ Helen Williams បាននិយាយថា “នាងមិនដែលរំពឹងថានឹងបានបង្ហាញខ្លួននៅលើសៀវភៅ Guinness Book of Records នោះទេ ហេតុនេះហើយ សមិទ្ធិផលនេះគឺជារឿងដ៏អស្ចារ្យបំផុតដែលមិនធ្លាប់មានចំពោះនាង។
គួរបញ្ជាក់ដែរថា បច្ចុប្បន្នសក់ពាក់ដែរវែងជាងគេនោះ ត្រូវបានរក្សាទុកនៅក្នុងការិយាល័យរបស់ Helen Williams តែម្តង ដូច្នេះមនុស្សគ្រប់គ្នាអាចចូលមកមើលបានដោយសេរី៕

សហរដ្ឋអាមេរិក ៖ កាលពីថ្ងៃទី១៧ ខែវិច្ឆិកា ឆ្នាំ២០២៣ សារព័ត៌មានបរទេសរាយការណ៍ថា ប្រធានាធិបតីចិន លោក ស៊ី ជិនពីង បានចាប់ដៃជាមួយនាយករដ្ឋមន្ត្រីជប៉ុន លោក Fumio Kishida នៅក្រៅកិច្ចប្រជុំ APEC ក្នុងទីក្រុងសាន់ហ្វ្រែនស៊ីស្កូ រដ្ឋកាលីហ្វ័រញ៉ា សហរដ្ឋអាមេរិក ។ ក្នុងអំឡុងពេលនោះ នាយករដ្ឋមន្ត្រីជប៉ុនបានអំពាវនាវឱ្យចិនលុបចោលវិធានការហាមឃាត់នាំចូលអាហារសមុទ្រពីជប៉ុន និងពិភាក្សាអំពីអ្នកប្រកបអាជីវកម្មជប៉ុនត្រូវបានចាប់ខ្លួននៅចិន ព្រមទាំងបញ្ហាជម្លោះនៅកោះសេនកាកុ ។

នាយករដ្ឋមន្ត្រីជប៉ុន លោក Fumio Kishida បានថ្លែងថា ៖ «ជុំវិញបញ្ហាការបង្ហូរទឹកចេញពីរោងចក្រថាមពលនុយក្លេអ៊ែរចូលក្នុងមហាសមុទ្រនោះ ខ្ញុំសង្ឃឹមថា ប្រទេសចិននឹងស្ងប់ស្ងាត់ ពេលចិនបានគិតដល់ភស្តុតាងផ្នែកវិទ្យាសាស្ត្រ ។ ជប៉ុនសូមអំពាវនាវឱ្យចិនលុបចោលវិធានការហាមនាំចូលអាហារសមុទ្រពីជប៉ុន ។ ចំពោះស្ថានការណ៍សមុទ្រចិនខាងកើត រួមទាំងកោះសេនកាកុ ខ្ញុំសូមបង្ហាញការបារម្ភម្តងទៀត ហើយជប៉ុនស្នើឱ្យចិនយកឧបករណ៍បណ្តែតទឹកចេញពីបរិវេណដែនទឹកតំបន់សេដ្ឋកិច្ចជប៉ុន (EEZ)» ។

ចំណែកប្រធានាធិបតីចិន លោក ស៊ី ជិនពីង បានថ្លែងទៅកាន់នាយករដ្ឋមន្ត្រីជប៉ុន លោក Fumio Kishida ថា ប្រទេសដែលមានទំហំសេដ្ឋកិច្ចធំបំផុតចំនួន២ របស់តំបន់អាស៊ី ត្រូវបង្កើនទំនាក់ទំនងផ្នែកយុទ្ធសាស្ត្រ និងទទួលយកនូវភាពខុសប្លែកគ្នា ។ លោក ស៊ី ជិនពីង ថ្លែងថា ៖ «ការរស់នៅរួមគ្នាដោយសន្តិវិធី, មិត្តភាពដ៏យូរអង្វែង, ផលប្រយោជន៍រួមគ្នាពីកិច្ចសហការ និងការអភិវឌ្ឍរួមគ្នា គឺជាវិធីដ៏ត្រឹមត្រូវដើម្បីឈានទៅរកផលប្រយោជន៍របស់ពលរដ្ឋចិន និងជប៉ុន» ។

មុននេះ ប្រទេសចិនបានចេញវិធានការហាមឃាត់ការនាំចូលអាហារសមុទ្រពីជប៉ុន ក្រោយពីជប៉ុនបង្ហូរទឹកលាយឡំសារធាតុគីមីចេញពីរោងចក្រថាមពលនុយក្លេអ៊ែរចូលក្នុងសមុទ្រប៉ាស៊ីហ្វិក ។ កាលពីឆ្នាំ២០០៨ ជប៉ុន និងចិនធ្លាប់បានចេញសេចក្តីថ្លែងការណ៍រួមគ្នា ដើម្បីឈានទៅរកសម្ព័ន្ធភាពដែលទទួលបានប្រយោជន៍រួមគ្នា និងការផ្លាស់ប្តូរក្នុងផ្នែកផ្សេងៗ ដូចជា សន្តិសុខ ។ ប៉ុន្តែកាលពីឆ្នាំ២០២២ សម្ព័ន្ធភាពរវាងជប៉ុន និងចិន ត្រូវប្រឈមនឹងឧបសគ្គដោយសារបញ្ហាជម្លោះទឹកដី, ភាពតានតឹងផ្នែកពាណិជ្ជកម្ម រួមទាំងបញ្ហាតៃវ៉ាន់ ៕ ប្រភព ៖ TNN World

សារព័ត៌មានថៃផ្សាយថា កាលពីព្រឹកថ្ងៃទី១៧ ខែវិច្ឆិកា ឆ្នាំ២០២៣ មានហេតុការណ៍គ្រោះរញ្ជួយដីកម្រិត៥.៧ នៅប្រទេសមីយ៉ាន់ម៉ា ។ ចំណុចកណ្តាលនៃគ្រោះរញ្ជួយដីនេះបានកើតឡើងនៅរដ្ឋឆាន ដែលស្ថិតនៅជិតបរិវេណព្រំដែនប្រទេសមីយ៉ាន់ម៉ាជាប់ជាមួយប្រទេសចិន, ឡាវ និងថៃ ហើយវាមានចម្ងាយពីទីក្រុងឈៀងទុង ប្រមាណ៧៦គីឡូម៉ែត្រ ។

គ្រោះរញ្ជួយដីលើកនេះបានបង្កើតកម្លាំងរំញ័រឆ្ងាយរហូតដល់ប្រទេសវៀតណាម និងតំបន់ភាគខាងជើងប្រទេសថៃ ជាពិសេស នៅខេត្តឈៀងម៉ៃ និងខេត្តឈៀងរ៉ាយ ។ គេបានឃើញអគារសិក្សាជាច្រើនរង្គឺ រហូតដល់កូនសិស្សត្រូវប្រញាប់រត់ចេញពីអគារ ឬលូនចូលក្រោមតុ ដោយសារពេលកើតហេតុ គឺជាពេលដែលកូនសិស្សកំពុងរៀនក្នុងថ្នាក់ ។

សារព័ត៌មានវៀតណាមរាយការណ៍ថា ពលរដ្ឋដែលរស់នៅជាន់លើរបស់អាផាតមិនខ្ពស់ៗជាច្រើនកន្លែងនៅទីក្រុងហាណូយប្រាប់ថា ពួកគេមានអារម្មណ៍វិលមុខ ហើយបានឃើញអំពូលភ្លើងនៅលើជញ្ជាំងមានបញ្ហា២នាទី ខណៈវត្ថុផ្សេងៗបានផ្លាស់ទី ។ រីឯស្ថាប័នធរណីវិទ្យារបស់វៀតណាមរាយការណ៍ថា ពួកគេនឹងបន្តតាមដានស្ថានការណ៍គ្រោះរញ្ជួយដីនៅប្រទេសមីយ៉ាន់ម៉ា ។

ហេតុការណ៍គ្រោះរញ្ជួយដីនេះ ជំហានដំបូង នៅមិនទាន់មានសេចក្តីរាយការណ៍លម្អិតអំពីការខូចខាត និងអ្នករ.ងរបួ.សទេ ។ ប៉ុន្តែគេរំពឹងថា គ្រោះរញ្ជួយដីកម្រិតមធ្យមនេះ នឹងមិនបង្កផលប៉ះពាល់ធ្ងន់ធ្ងរឡើយ ដោយវាគ្រាន់តែធ្វើឱ្យវត្ថុផ្សេងៗធ្លាក់ចុះមកក្រោម និងកញ្ចក់បង្អួចបែកប៉ុណ្ណោះ ។

គេចាត់ទុកថា មីយ៉ាន់ម៉ាជាប្រទេសមួយដែលបានកើតរញ្ជួយដីច្រើនបំផុតនៅលើពិភពលោក ហើយរដ្ឋឆាន គឺជាកន្លែងកើតរញ្ជួយដីញឹកញាប់ជាងគេ ។ កាលពីខែមិថុនា ឆ្នាំ២០២៣ ប្រទេសមីយ៉ាន់ម៉ាបានកើតគ្រោះរញ្ជួយដីខ្នាតតូចមួយនៅទីក្រុងឈៀងទុង ៕ ប្រភព ៖ TNN World

ការដាក់ពាក្យសម្ងាត់ (Password) សម្រាប់គណនីផ្ទាល់ខ្លួននៅក្នុងបណ្តាញសង្គមឱ្យងាយស្រួលចាំសម្រាប់មនុស្សគ្រប់គ្នា គឺជារឿងល្អ ព្រោះពួកគេនឹងអាចចងចាំវាបានច្បាស់ ។ ប៉ុន្តែវាក៏មានគុណវិបត្តិខ្លាំងផងដែរ បន្ទាប់ពីក្រុមហ៊ុន Nordpass ជាក្រុមហ៊ុនផ្តល់សេវាកម្មគាំទ្រអ្នកប្រើប្រាស់អនឡាញ ដើម្បីបង្កើតពាក្យសម្ងាត់ផ្ទាល់ខ្លួនឱ្យមានសុវត្ថិភាព បានបង្ហាញរបាយការណ៍មួយបញ្ជាក់អំពី «ការកំណត់ពាក្យសម្ងាត់» ។

របាយការណ៍នេះលើកឡើងថា ពាក្យសម្ងាត់ដ៏ពេញនិយម ដែលមនុស្សទូទៅបានប្រើប្រាស់ច្រើនបំផុតជារៀងរាល់ឆ្នាំ គឺពួកគេកំណត់ឡើងឱ្យងាយស្រួលចាំ ហើយពាក្យសម្ងាត់ទាំងនេះមិនបានឆ្លងកាត់ការគិតអ្វីច្រើនទេ ។ ហេតុនេះ ធ្វើឱ្យគណនីក្នុងបណ្តាញសង្គមភាគច្រើនប្រឈមនឹងគេលួចចូលយ៉ាងងាយស្រួល ។

ពាក្យសម្ងាត់ដែលមនុស្សទូទៅប្រើប្រាស់ច្រើនបំផុត គឺលេខ «123456» ហើយមានគណនីដែលប្រើប្រាស់ពាក្យសម្ងាត់ទាំងនេះ រហូតដល់៤លាន៥សែនគណនី ។ ក្រុមហ៊ុន Nordpass បញ្ជាក់ថា ពាក្យសម្ងាត់បែបនេះអាចធ្វើឱ្យអ្នកប្រើប្រាស់ងាយស្រួលចាំ និងមិនងាយភ្លេច ។ ប៉ុន្តែបើគណនីពួកគេស្ថិតក្នុងគោលដៅចារកម្មទិន្នន័យ គឺគណនីទាំងនេះនឹងត្រូវគេលួចចូលបានក្នុងរយៈពេលត្រឹមតែ១វិនាទីប៉ុណ្ណោះ ។

បន្ទាប់មក មនុស្សភាគច្រើនចូលចិត្តដាក់ពាក្យសម្ងាត់ថា «Admin» ដែលពាក្យសម្ងាត់នេះ មានអ្នកប្រើប្រាស់រហូតដល់ជាង៤លានគណនី ។ រីឯពាក្យសម្ងាត់ជាតួលេខ ក៏មានការពេញនិយមពីមនុស្សទូទៅដែរ ដូចជា ៖ «1234» ឬ «12345678» ឬ «123456789» ។ ដូច្នេះ ពាក្យសម្ងាត់ទាំងនេះ គេចំណាយពេលត្រឹមតែ១វិនាទីប៉ុណ្ណោះ គឺអាចចូលក្នុងគណនីរបស់អ្នកណាម្នាក់យ៉ាងងាយស្រួល ។

ក្រៅពីការដាក់ពាក្យសម្ងាត់ជាតួលេខ ពាក្យសម្ងាត់ជាពាក្យពេចន៍ផ្សេងៗ ដូចជា «password», «P@ssw0rd» និង «qwertyuiop» ក៏ត្រូវបានគេលួចចូលក្នុងរយៈពេលមិនដល់១វិនាទីដូចគ្នា ។ ចំណែកពាក្យសម្ងាត់ដែលគេចំណាយពេលវេលាចូលគណនីយូរបន្តិច គឺពាក្យសម្ងាត់ «UNKOWN» គឺគេបានចំណាយពេលរហូតដល់១៧វិនាទី ។

ក្រុមហ៊ុន Nordpass បញ្ជាក់ថា បើចង់ឱ្យគណនីផ្ទាល់ខ្លួនមានសុវត្ថិភាព និងពិបាកឱ្យគេលួចយកទិន្នន័យនោះ គួរតែជាពាក្យសម្ងាត់ដែលប្រើប្រាស់តួអក្សរ និងតួលេខ២០តួ ក្នុងនោះមានទាំងអក្សរតូច និងអក្សរធំលាយឡំគ្នា ។ ក្រុមហ៊ុនបញ្ជាក់ទៀតថា យើងពុំគួរប្រើប្រាស់ថ្ងៃខែឆ្នាំកំណើតរបស់យើងមកធ្វើជាពាក្យសម្ងាត់ទេ ៕ ប្រភព ៖ Mono News