បច្ចុប្បន្ននេះ ពិភពលោកបានប្រឈមនឹងជំងឺថ្មីៗជាច្រើន រហូតដល់គ្រូពេទ្យពុំអាចព្យាបាលបាន ។ រីឯម្ហូបអាហារដែលយើងបរិភោគរាល់ថ្ងៃ មានសារៈសំខាន់ខ្លាំងណាស់សម្រាប់សុខភាព ពីព្រោះក្រៅពីវាបានផ្តល់នូវអាហារូបត្ថម្ភគ្រប់គ្រាន់ដល់រាងកាយហើយ វាក៏បានជួយកាត់បន្ថយជំងឺមួយចំនួនផងដែរ ប្រសិនបើយើងបរិភោគអាហារក្នុងបរិមាណសមស្រប ។
ជំងឺតម្រងនោមអាចបណ្តាលមកពីកត្តាជាច្រើន ដូចជា ៖ បណ្តាលមកបញ្ហាហ្សែន ហើយអ្នកមានរោគសញ្ញាលើសឈាម និងទឹកនោមផ្អែម តែងប្រឈមមុខនឹងជំងឺនេះ ។ លើសពីនេះ ការទទួលទានថ្នាំមួយចំនួន ដូចជា NSAIDs ឬការប្រើប្រាស់សារធាតុគីមីគ្រោះថ្នាក់ ក៏អាចបណ្តាលឱ្យកើតជំងឺតម្រងនោមផងដែរ ។
អាការៈជំងឺតម្រងនោមភាគច្រើនមានដូចជា ៖ ហើម, មានឈាមក្នុងទឹកនោម ឬបត់ជើងតូចតិច, ឆាប់នឿយហត់, ចំណង់អាហារតិចជាងមុន និងសម្ពាធឈាមឡើងខ្ពស់ ។ តើគួរបរិភោគបន្លែ និងផ្លែឈើអ្វីខ្លះដើម្បីឱ្យតម្រងនោមរបស់យើងរឹងមាំ?
១-បន្លែបៃតង ៖ បន្លែបៃតងមានផ្ទុកនូវសារធាតុប៉ូតាស្យូម និងកាបូអ៊ីដ្រាត ដែលបានជួយដល់តម្រងនោម ព្រមទាំងជួយដល់ដំណើរការចម្រោះនៃតម្រងនោមផងដែរ ។
២-ផ្លែក្រូចថ្លុង ៖ ផ្លែក្រូចថ្លុងមានផ្ទុកនូវសារធាតុប្រឆាំងនឹងអុកស៊ីតកម្ម ដែលបានជួយកាត់បន្ថយសម្ពាធឈាម និងជំរុញតម្រងនោមឱ្យដំណើរការបានល្អ ។
៣-សាច់ត្រី ៖ សាច់ត្រីមានអាស៊ីតខ្លាញ់អូមេហ្គា៣ ដែលមានមុខងារជួយកាត់បន្ថយហានិភ័យនៃជំងឺតម្រងនោម និងជួយកាត់បន្ថយការរលាក ។
៤-ផ្លែឪឡឹក ៖ គឺជាផ្លែឈើមានទឹកច្រើន និងជួយកាត់បន្ថយជាតិអាស៊ីតក្នុងតម្រងនោម ព្រមទាំងជួយឱ្យយើងងាយស្រួលក្នុងការបន្ទោរបង់ ។
៥-សណ្តែកសៀង ៖ វាជាប្រភពប្រូតេអ៊ីនយ៉ាងល្អ ហើយវាបានផ្តល់នូវជាតិកាល់ស្យូម, ម៉ាញ៉េស្យូម និងប៉ូតាស្យូម ។ សារធាតុទាំងអស់នេះមានមុខងារជួយឱ្យតម្រងនោមដំណើរការបានល្អ ។
៦-ផ្លែចេក ៖ នៅក្នុងផ្លែចេក មានផ្ទុកនូវសារធាតុប៉ូតាស្យូម និងកាបូអ៊ីដ្រាត ។ ហេតុនេះ ការបរិភោគផ្លែចេកជាប្រចាំ គឺសាកសមសម្រាប់អ្នកដែលត្រូវការអាហារបំប៉នតម្រងនោម ៕