ប្រទេសថៃ ៖ កាលពីថ្ងៃទី១៨ ខែវិច្ឆិកា ឆ្នាំ២០២៣ សារព័ត៌មានថៃរាយការណ៍ថា វាបានធ្វើឱ្យអ្នកលេងបណ្តាញសង្គមនៅប្រទេសថៃរិះគន់គ្រប់ៗគ្នា ក្រោយពីហាងលក់នំមួយកន្លែងនៅប្រទេសថៃ (ដែលគេមិនស្គាល់ទីតាំងពិតប្រាកដ) បានធ្វើនំ Cookie ជារូបរាងព្រះពុទ្ធ ដោយដាក់ស្នូលម្នាស់នៅផ្នែកខាងក្នុង មានពណ៌ត្នោត ហើយមើលទៅ ដូចព្រះពុទ្ធបេះបិទ ។ អ្នកលេងបណ្តាញសង្គមថៃសួរថា តើវាសមរម្យដែរឬទេ ដែលហាងនេះយករូបព្រះពុទ្ធមកលេងសើចដូច្នេះ?

នំ Cookie ដាក់ស្នូលម្នាស់នៅផ្នែកខាងក្នុង និងធ្វើឱ្យមនុស្សជាច្រើននាក់ជជែកគ្នាក្នុងបណ្តាញសង្គមនោះ ដោយសារនំនេះមានរូបរាងមិនដូចនំផ្សេងទៀត ។ ហាងបានធ្វើវាឡើងមកឱ្យមានលក្ខណៈដូចគ្នានឹងរូបព្រះពុទ្ធ រហូតធ្វើឱ្យពលរដ្ឋថៃជជែកគ្នាក្នុងបណ្តាញសង្គមពីភាពមិនសមរម្យ ។ ចុងក្រោយ ពលរដ្ឋថៃបានសំណូមពរឱ្យការិយាល័យព្រះពុទ្ធសាសនា និងស្ថាប័នពាក់ព័ន្ធត្រួតពិនិត្យករណីនេះ ។

ព្រះសង្ឃព្រះនាម Phayom Kanlayano ជាព្រះចៅអធិការវត្តសួនកែវ ស្ថិតនៅឃុំបាងសែន ស្រុកបាងញ៉ៃ ខេត្តនុនថៈបុរី ប្រទេសថៃ បានបញ្ចេញមតិចំពោះរឿងនេះថា បើអ្នកមិនបានមើលងាយព្រះពុទ្ធសាសនានោះល្អហើយ ប៉ុន្តែបើធ្វើហើយ ធ្វើឱ្យពុទ្ធសាសនាធ្លាក់ចុះ វាមិនល្អទេ ។

ព្រះចៅអធិការវត្តមានសង្ឃដីកាថា ៖ «អ្នកគួរតែនឹកឃើញដល់ព្រះពុទ្ធរូបផង ទោះជាអ្វីក៏ដោយ ។ ចូរកុំធ្វើអ្វីឱ្យថោកទាបទៅបានហើយ ដូចជា ការធ្វើម្ហូបអាហារ និងនំចំណី ព្រោះនឹងធ្វើឱ្យគេរិះគន់ ។ ម្ហូបអាហារ ឬនំចំណី អ្នកអាចធ្វើជារូបភាពផ្សេងៗមានច្រើនណាស់ ហើយការធ្វើនំរូបព្រះពុទ្ធ គឺដូចគ្នានឹងព័ត៌មានមុននេះបានចុះផ្សាយអីចឹង ដែលមានអ្នកផលិតថ្នាំឆ្កួត ហើយដាក់រូបព្រះកេសព្រះពុទ្ធ» ។

ព្រះចៅអធិការវត្តណែនាំថា ហាងលក់នំគួរតែផ្លាស់ប្តូរធ្វើជារូបភាពផ្សេងវិញ វាសមរម្យជាងនេះ ។ ការធ្វើនំជារូបរាងព្រះពុទ្ធ អាចប៉ះពាល់ដល់ផ្លូវចិត្តអ្នកគោរពព្រះពុទ្ធសាសនានៅប្រទេសថៃ ហើយបើអាចចៀសវាងបាន គួរតែចៀសវាងទៅ ។

ក្រោយពីព័ត៌មាននេះបានល្បីល្បាញក្នុងបណ្តាញសង្គម ធ្វើឱ្យពលរដ្ឋថៃជាច្រើននាក់សម្តែងការមិនពេញចិត្ត ក្នុងនោះពលរដ្ឋថៃម្នាក់និយាយថា ៖ «វាមិនសមរម្យយ៉ាងខ្លាំង ហើយរូបភាពផ្សេងៗមានច្រើនណាស់ ម៉េចមិនធ្វើ» ។ ពលរដ្ឋថៃម្នាក់ទៀតថា ៖ «មិនគួរធ្វើនំ និងយករូបព្រះពុទ្ធដែលជាទីគោរពដ៏ខ្ពង់ខ្ពស់មកដាក់បែបនេះទេ» ។ ពលរដ្ឋថៃម្នាក់ទៀតថា ៖ «ការធ្វើបែបនេះ ជ្រុលហួសហេតុពេកហើយ» ។

ពលរដ្ឋថៃម្នាក់ទៀតថា ៖ «មិនគួរធ្វើសោះឡើយ បើយើងឱ្យគេធ្វើនំដោយដាក់មុខឪពុក-ម្តាយរបស់យើងវិញ ហើយឱ្យអ្នកផ្សេងបរិភោគនោះ តើយើងហ៊ានធ្វើអីចឹងទេ? ព្រះពុទ្ធប្រៀបបីដូចជាឪពុករបស់យើងដែរ មិនគួរណាធ្វើទេ» ៕ ប្រភព ៖ pptv hd

របាយការណ៍ផ្តាច់មុខដោយប្រព័ន្ធផ្សព្វផ្សាយ Munhwa Ilbo នៅថ្ងៃទី២០ ខែវិច្ឆិកាបានបង្ហាញថា BLACKPINK បានយល់ព្រមបន្តសកម្មភាពរបស់ពួកគេជាក្រុម ដោយកិច្ចសន្យាផ្តាច់មុខបុគ្គលរវាងសមាជិកម្នាក់ៗ និង YG Entertainment នៅតែមិនទាន់ដោះស្រាយនៅឡើយ។ ខណៈពេលដែលរក្សាសកម្មភាពក្រុមរបស់ពួកគេ សមាជិកគ្រោងនឹងបន្តគម្រោងនីមួយៗ ដោយមករួមគ្នាសម្រាប់តែ BLACKPINK ប៉ុណ្ណោះ។ របាយការណ៍បញ្ជាក់ទៀតថា សមាជិកពីរនាក់បានបញ្ចប់កិច្ចសន្យាជាមួយនឹង YG រួចហើយប៉ុន្តែស្ថានភាពទាក់ទងនឹងកិច្ចសន្យាបុគ្គលនៅតែមិនច្បាស់លាស់ ដោយ Lisa ទំនងជាដើរតាមផ្លូវឯករាជ្យ។

សមាជិកនៃក្រុម K-pop ដែលទទួលបានការគាំទ្រទូទាំងពិភពលោក BLACKPINK ថ្មីៗនេះបានយល់ព្រមជាមួយ YG Entertainment (YG) ដើម្បីបន្តសកម្មភាពក្រុមរបស់ពួកគេ។ ក្នុងចំណោមសមាជិកទាំងពីរនាក់បានបញ្ចប់កិច្ចសន្យាជាមួយ YG រួចហើយ ដោយបញ្ជាក់ពីការប្ដេជ្ញាចិត្តរបស់ពួកគេក្នុងការបន្តការខិតខំរបស់ BLACKPINK ។ YG បានបញ្ជាក់ពីគម្រោងធ្វើកិច្ចព្រមព្រៀងជាផ្លូវការជាមួយនឹងសមាជិកដែលនៅសេសសល់នៅពេលដែលកុងត្រារបស់ពួកគេត្រូវបានចុះហត្ថលេខា។

នៅក្នុងរបាយការណ៍ប្រចាំត្រីមាសរបស់ខ្លួនដែលបានចេញផ្សាយនៅថ្ងៃទី១៤ វិច្ឆិកា ក្រុមហ៊ុន YG បាននិយាយថា «ការចរចារសម្រាប់ការបន្តកិច្ចសន្យាផ្តាច់មុខជាមួយសិល្បករ (Blackpink) បច្ចុប្បន្នកំពុងដំណើរការ។ លទ្ធផលចុងក្រោយនឹងត្រូវបង្ហាញនៅពេលក្រោយតាមរយៈការប្រកាសដ៏សំខាន់មួយទាក់ទងនឹងបញ្ហាគ្រប់គ្រងដែលទាក់ទងនឹងការវិនិយោគ»។

ទោះជាយ៉ាងណាក៏ដោយ ស្ថានភាពនៃកិច្ចសន្យាផ្តាច់មុខរវាងសមាជិកទាំងបួន និង YG នៅតែមិនច្បាស់លាស់។ មកដល់ពេលនេះ គ្មានសមាជិកណាបន្តកុងត្រាជាមួយ YG ទេ។ Lisa ធ្លាប់បានសម្រេចចិត្តបន្តផ្លូវឯករាជ្យ ដូចដែលបានរាយការណ៍ដោយ Munhwa Ilbo កាលពីថ្ងៃទី១២ ខែកក្កដា នៅក្នុងអត្ថបទមួយដែលមានចំណងជើងថា ការបន្តកិច្ចសន្យា YG របស់ Lisa មិនច្បាស់លាស់’ហើយសមាជិកផ្សេងទៀតក៏កំពុងស្វែងរកលក្ខខណ្ឌជាមួយក្រុមហ៊ុនផ្សេងៗផងដែរ។ យ៉ាងណាក៏ដោយ សមាជិកមួយចំនួននៅតែពិចារណាលើកិច្ចសន្យាសកម្មភាពបុគ្គលជាមួយ YG។

គួរបញ្ជាក់ថា BLACKPINK បានបញ្ចប់ការប្រគំតន្ត្រីទេសចរណ៍ពិភពលោករបស់ពួកគេកាលពីខែកញ្ញា ដែលបានទាក់ទាញអ្នកចូលទស្សនាផ្ទាល់ចំនួន ១.៨លាននាក់ និងទទួលបានប្រាក់ចំណូលជិត ៣០០ ពាន់លានវ៉ុន ប្រមាណ ២៣៥ លានដុល្លារអាម៉េរិក) ។ ដូច្នេះហើយ ទោះបីជាកិច្ចសន្យាផ្តាច់មុខបុគ្គលមិនត្រូវបានបញ្ចប់ក៏ដោយ ក៏ YG និងសមាជិកម្នាក់ៗត្រូវបានគេរំពឹងខ្ពស់លើប្រាក់ចំណូលចំពោះការបញ្ចេញសកម្មភាពទោលដូចគ្នា៕

ប្រជាជនឥណ្ឌាជឿថាការអនុញ្ញាតឱ្យគោជាន់លើមនុស្សក្នុងពិធីបុណ្យភ្លើង Diwali នឹងនាំមកនូវសំណាងល្អពេញមួយឆ្នាំ។

ប្រពៃណីនេះបានកើតឡើងនៅក្នុងភូមិ Bhidavad រដ្ឋ Madhya Pradesh ដែលប្រព្រឹត្តទៅនៅថ្ងៃទី ១២ ខែវិច្ឆិកា ត្រូវបានចាត់ទុកថាប្លែក និងចម្លែកដោយមានអ្នកទេសចរជាច្រើនជុំវិញពិភពលោកចូលរួមទស្សនាផងដែរ។ នៅក្នុងពិធីបុណ្យនោះ តម្រូវឱ្យមនុស្សដេកនឹងដីរួចឱ្យគោរាប់សិបក្បាលជាន់លើមនុស្ស ដោយគេជឿថាព្រះចំនួន ៣៣០ លានរស់នៅក្នុងសត្វគោ ដូច្នេះអ្នកដែលសត្វគោនោះជាន់នឹងទទួលបានពរជ័យពីព្រះ។ មនុស្សជាច្រើនមានការព្រួយបារម្ភអំពីការខ្វះសុវត្ថិភាពនៅពេលដែលសត្វគោដើរជាន់លើមនុស្ស។ ទោះជាយ៉ាងក៏ដោយ រហូតមកទល់នឹងពេលនេះ ពុំមានអ្នកណាម្នាក់រងរបួសធ្ងន់ធ្ងរនោះទេ នេះបើយោងតាមប្រជាពលរដ្ឋមូលដ្ឋានរបស់ប្រទេសឥណ្ឌា។

មួយវិញទៀត អ្នកដែលចូលរួមក្នុងទំនៀមទំលាប់នេះ ត្រូវតែគោរពពិធីដ៏តឹងរ៉ឹង គឺការតមអាហាររយៈពេលប្រាំថ្ងៃ ហើយមួយថ្ងៃមុនពិធីបុណ្យនេះត្រូវតែស្នាក់នៅប្រាសាទភូមិពេញមួយយប់។ នៅថ្ងៃបន្ទាប់ពីពិធីបូជាព្រះហើយ ប្រជាជននឹងវាយស្គរ រួចដើរតាមផ្លូវដើម្បីបង្កើតបរិយាកាសរស់រវើកពេញភូមិ។ ក្នុងអំឡុងពេលនោះសត្វគោនៅក្នុងភូមិនឹងត្រូវបានប្រមូលផ្តុំទុកមួយកន្លែងជាការបញ្ចប់កម្មពិធីបុណ្យ។

Diwali នៅក្នុងប្រទេសឥណ្ឌា គឺជាថ្ងៃបុណ្យជាតិ ដែលត្រូវបានគេស្គាល់ថាជាពិធីបុណ្យនៃពន្លឺ ដោយសារតែមនុស្សមានទំនៀមទម្លាប់នៃការបំភ្លឺចង្កៀងប្រេងជាមួយនឹង wicks (dipa) ដើម្បីអបអរសាទរជ័យជំនះរបស់ Lord Krishna លើ Narakasura ដែលជានិមិត្តរូបនៃការយកឈ្នះអំពើអាក្រក់។ នៅរាត្រី Diwali អ្នកកាន់សាសនាហិណ្ឌូស្លៀកសំលៀកបំពាក់ដ៏ល្អបំផុតរបស់ពួកគេ និងបំភ្លឺចង្កៀងខាងក្នុង និងខាងក្រៅផ្ទះរបស់ពួកគេ។ សមាជិកគ្រួសារ និងមិត្តភក្តិជិតស្និទ្ធតែងតែប្រាស្រ័យទាក់ទងគ្នា និងផ្តល់អំណោយដល់គ្នាទៅវិញទៅមកក្នុងថ្ងៃនេះ។ នៅពេលល្ងាច ពួកគេនឹងធ្វើពិធីបួងសួងឯកជនដល់ព្រះនាង Lakshmi ដែលជានិមិត្តរូបនៃសំណាងល្អ និងភាពរុងរឿង។ ពិធីបុណ្យនេះជាធម្មតាមានរយៈពេល ៥ ថ្ងៃដោយទាក់ទាញអ្នកទស្សនារាប់លាននាក់ជារៀងរាល់ឆ្នាំ។

គួរបញ្ជាក់ដែរថា នៅឆ្នាំនេះ ប្រជាជនឥណ្ឌាបាននាំគ្នាទៅច្រាំងទន្លេ Saryu នៅយប់ថ្ងៃទី ១១ ខែវិច្ឆិកា ក្នុងរដ្ឋ Ayodhya ដើម្បីបំភ្លឺចង្កៀងប្រេងកាតជាង ២.២ លាន ដែលបានបង្កើតកំណត់ត្រាហ្គីណេសសម្រាប់ចំនួនចង្កៀងច្រើនជាងគេបំផុតក្នុងពិធីបុណ្យភ្លើងនេះ៕

ប្រទេសថៃ ៖ កាលពីថ្ងៃទី១៩ ខែវិច្ឆិកា ឆ្នាំ២០២៣ សារព័ត៌មានថៃរាយការណ៍ថា ប៉ូលិសបានចាប់ខ្លួនជនបរទេសអង្គុយសុំទាននៅមុខហាងល្បីនៅកណ្តាលទីក្រុងបាងកក ក្នុងនោះមានស្ត្រីជនជាតិចិនត្រូវបានគេកាត់ម្រាមដៃទាំងសងខាង ហើយផ្ទៃមុខរបស់នាងមានស្នាមខូចដោយសារទឹកអាស៊ីត ។ ស្ត្រីចិនរូបនេះប្រាប់ថា ពួកនាងមានគ្នាសរុប៦នាក់ គឺម្នាក់ៗទទួលបានប្រាក់ចំនួន១ម៉ឺនបាតក្នុង១ថ្ងៃ ហើយអ្នកសុំទានទាំងអស់អាចរកប្រាក់បានរហូតដល់១លាន៨សែនបាត ។

លោក Kanthat Pongpaiboonwet (ឬហៅថា កាន់ ចមផ្លាំង) ជាបុគ្គលល្បីឈ្មោះនៅប្រទេសថៃ បានសហការជាមួយមន្ត្រីអភិវឌ្ឍន៍សង្គម និងសន្តិសុខ ព្រមទាំងកងកម្លាំងប៉ូលិសចុះត្រួតពិនិត្យនៅបរិវេណមុខហាងលក់ទំនិញល្បីឈ្មោះមួយកន្លែងនៅតំបន់ប៉ិនក្លោ ក្រោយពីទទួលបានព័ត៌មានថា មានស្ត្រីចិនត្រូវបានគេកាត់ម្រាមទាំងសងខាង និងត្រូវគេយកទឹកអាស៊ីតស្រោចលើផ្ទៃមុខរហូតដល់ដំបៅ មកអង្គុយសុំទាននៅបរិវេណនេះ ។ ប៉ុន្តែនៅពេលប៉ូលិសទៅដល់ នាងហាក់ដឹងខ្លួនមុន និងបានរត់គេចទៅលាក់ខ្លួនក្នុងបន្ទប់ទឹករបស់ហាង ហើយប៉ូលិសក៏បានចូលទៅចាប់នាងចេញមក ។

តាមរយៈការត្រួតពិនិត្យក្នុងកាបូបក្រណាត់ ប៉ូលិសបានប្រទះឃើញក្រដាសប្រាក់ថៃ ហើយភាគច្រើនជាក្រដាសប្រាក់២០បាតជិតពេញកាបូប ។ ដូច្នេះ ប៉ូលិសសន្និដ្ឋានថា ប្រាក់ទាំងនេះបានមកពីការអង្គុយសុំទានពេញ១ថ្ងៃ ហើយក្នុងកាបូបមានប្រាក់មិនក្រោម១ម៉ឺនបាត ។ ប៉ុន្តែប៉ូលិសរកមិនឃើញលិខិតធ្វើដំណើររបស់ស្ត្រីសុំទានចិនទេ ។

លោក Kanthat Pongpaiboonwet លើកឡើងថា មានពលរដ្ឋថៃផ្តល់ព័ត៌មានថា មានស្ត្រីដាច់ម្រាមដៃទាំងសងខាង ហើយផ្ទៃមុខរបស់នាងមានស្នាមខូចដោយសារទឹកអាស៊ីត បានមកអង្គុយសុំទាននៅមុខហាងមួយកន្លែងក្នុងតំបន់ផាយ៉ាថៃ ។ ដូច្នេះ លោកក៏បានទៅសាកសួរ តែនាងមិនឆ្លើយតប និងមិនផ្តល់ព័ត៌មានអ្វីទាំងអស់ ទើបលោកទំនាក់ទំនងទៅកាន់ប៉ូលិសថៃឱ្យចុះមកពិនិត្យ ។

លោកបន្តថា ករណីនេះស្រដៀងគ្នានឹងករណីមុន ដែលប៉ូលិសថៃទើបចាប់ខ្លួនក្រុមអ្នកសុំទានបរទេស ។ ជនជាតិចិនមកអង្គុយសុំទាននៅប្រទេសថៃ ពួកគេមានអាយុប្រមាណជាង៤០ឆ្នាំ ហើយពួកគេនឹងស្លៀកពាក់ឯកសណ្ឋានសិស្ស ឬនិស្សិត ព្រោះចង់ឱ្យមនុស្សទូទៅដែលឆ្លងកាត់បរិវេណនេះឃើញហើយអាណិត ។ ការចុះត្រួតពិនិត្យនេះ មានស្ត្រីថៃម្នាក់អះអាងថា នាងជាអ្នកបកប្រែរបស់អ្នកសុំទានចិនទាំងអស់ ហើយនាងសុំដោះស្រាយរឿងនេះជាមួយប៉ូលិស ។ នាងសួរថា តើនាងត្រូវចំណាយប្រាក់ប៉ុន្មានឱ្យប៉ូលិស ទើបប៉ូលិសព្រមដោះលែងពួកគេ? ប៉ុន្តែប៉ូលិសមិនបានដោះលែងទេ ។

ជនជាតិចិនមកអង្គុយសុំទានមានគ្នាសរុបចំនួន៦នាក់ ហើយម្នាក់ៗអាចសុំទានបានប្រាក់ជាង១ម៉ឺន៤រយបាតក្នុង១ថ្ងៃ ។ ហេតុនេះ ប្រាក់បានមកពីការសុំទានសរុបរបស់ពួកគេ គឺជាមធ្យមស្មើនឹង១លាន៨សែនបាត ។ តើអ្នកណាជាអ្នកកាន់កាប់ប្រាក់ទាំងអស់នេះ? ប៉ូលិសសន្និដ្ឋានថា វាជាករណីជួញដូរមនុស្ស ដោយសាររាងកាយអ្នកសុំទានមានសភាពខុសធម្មតាជាច្រើនកន្លែង ។

រីឯអាជីវករលក់នំនៅមុខហាងប្រាប់ថា ខ្លួនបានលក់នំនៅទីនេះអស់ជិត១០ឆ្នាំ ។ កាលពីដើមឆ្នាំ២០២៣ មានអ្នកសុំទានស្លៀកពាក់ឯកសណ្ឋានសិស្ស ឬនិស្សិតថៃ មកអង្គុយសុំទាននៅតាមកន្លែងផ្សេងៗតាំងពីព្រឹក រហូតដល់ព្រលប់ ហើយមានអ្នកដើរកាត់អាណិតឱ្យប្រាក់ពួកគេជាប្រចាំ ។

ក្រោយមក ស្ត្រីអ្នកសុំទានចិនទទួលស្គាល់ថា នាងបានស្ម័គ្រចិត្តមកសុំទានដោយខ្លួនឯង ។ ប៉ុន្តែនៅពីក្រោយខ្នង នាងអាចត្រូវបានគេបង្ខំក៏ថាបាន ព្រោះនាងខ្លាចក្រុមគ្រួសារមានគ្រោះថ្នាក់ ទើបនាងមិនហ៊ានប្រាប់អ្វីដល់ប៉ូលិស ។ ចំណុចមួយទៀតគួរឱ្យសង្ស័យ តើជនជាតិចិនទាំងនេះដឹងដោយរបៀបណាថា ត្រូវអង្គុយសុំទាននៅកន្លែងណាដើម្បីឱ្យទទួលបានប្រាក់ច្រើន ។ វាត្រូវតែមានមនុស្សនាំមកពួកគេទៅសុំទាននៅកន្លែងណាមួយ ហើយរង់ចាំតាមដាន ។ បច្ចុប្បន្ន ប៉ូលិសបានចាប់ខ្លួនស្ត្រីអ្នកសុំទានចិនមកសាកសួរនៅប៉ុស្តិ៍ប៉ូលិស ដើម្បីចាត់ការតាមផ្លូវច្បាប់ ៕ ប្រភព ៖ pptv hd

បរទេស៖ កូរ៉េខាងជើងបានរិះគន់ផែនការរបស់អាមេរិកក្នុងការលក់មីស៊ីលទៅឱ្យប្រទេសជប៉ុន និងកូរ៉េខាងត្បូង ដោយហៅវាថាជាទង្វើដ៏គ្រោះថ្នាក់ដែលបង្កើនភាពតានតឹងនៅក្នុងតំបន់។

យោងតាមគេហទំព័រ SCMP News ដែលបានចុះផ្សាយនៅថ្ងៃទី២០ ខែវិច្ឆិកាថាថ្មីៗនេះថា កូរ៉េខាងជើងនឹងពង្រឹងវិធានការដើម្បីបង្កើតការរារាំង ក៏ដូចជាឆ្លើយតបទៅនឹង “អស្ថិរភាពក្នុងតំបន់ដែលបង្កឡើងដោយសហរដ្ឋអាមេរិក និងសម្ព័ន្ធមិត្ត”។ យោងតាមសេចក្តីថ្លែងការណ៍របស់ក្រសួងការពារជាតិកូរ៉េខាងជើងបាននិយាយថា “យើងព្រមានថាប្រាក់ចំណេញកាន់តែច្រើនរបស់សហរដ្ឋអាមេរិកពីការលក់អាវុធដោយមិនរើសអើង វានឹងត្រូវចំណាយកាន់តែច្រើនសម្រាប់វិបត្តិសន្តិសុខ” ។

សេចក្តីថ្លែងការណ៍របស់កូរ៉េខាងជើងនេះ ត្រូវបានធ្វើឡើងក្នុងបរិបទនៃផែនការរបស់ប្រទេសជប៉ុនក្នុងការទិញមីស៊ីល Tomahawk ចំនួន ៤០០ គ្រាប់ពីសហរដ្ឋអាមេរិក ដែលជាផ្នែកនៃផែនការពង្រឹងសមត្ថភាពយោធាដ៏ធំបំផុតចាប់តាំងពីសង្គ្រាមលោកលើកទីពីរ។ កាលពីថ្ងៃទី១៧ ខែវិច្ឆិកា ក្រសួងការបរទេសអាមេរិកបានយល់ព្រមលក់មីស៊ីល Tomahawk ពីរប្រភេទទៅឱ្យប្រទេសជប៉ុន ដែលមានតម្លៃសរុបប្រហែល ២.៣៥ ពាន់លានដុល្លារ។ ទោះជាយ៉ាងណាក៏ដោយ បច្ចុប្បន្នប្រទេសជប៉ុនមិនទាន់មានកាំជ្រួចមីស៊ីលវាយប្រហាររយៈចម្ងាយឆ្ងាយនៅឡើយទេ ពីសហរដ្ឋអាមេរិក។

ថ្មីៗនេះ សហរដ្ឋអាមេរិកក៏បានប្រកាសពីការយល់ព្រមលើការលក់មីស៊ីល Sidewinder និង SM-6 Block I ដែលជាអាវុធតែមួយគត់របស់ទីក្រុងវ៉ាស៊ីនតោន ដែលអាចស្ទាក់ចាប់ក្បាលគ្រាប់ដែលមានល្បឿនលឿនជាងសំឡេង ទៅកាន់កូរ៉េខាងត្បូង ។

ដូច្នេះហើយ យោងតាមសេចក្តីថ្លែងការណ៍របស់ក្រសួងការពារជាតិរបស់ប្រទេសកូរ៉េខាងជើងបានរិះគន់ “ការគំរាមកំហែងផ្នែកយោធា” ពីសហរដ្ឋអាមេរិក និងសម្ព័ន្ធមិត្តរបស់ខ្លួន ដោយនិយាយថា ពួកគេនឹងបង្ហាញ “សមត្ថភាពវាយប្រហារដ៏ខ្លាំងក្លា និងលើសលប់” ជាការឆ្លើយតប។ កូរ៉េខាងជើងក៏បានចោទអាមេរិកពីកិច្ចព្រមព្រៀងលក់សព្វាវុធដែលអាចនាំឱ្យមានការប្រណាំងសព្វាវុធថ្មី។

គួរបញ្ជាក់ដែរថា ប្រទេសកូរ៉េខាងជើងកាលពីសប្តាហ៍មុនបានប្រកាសថាខ្លួនបាន សាកល្បង ដោយជោគជ័យនូវម៉ាស៊ីនឥន្ធនៈរឹងដែលមានកម្លាំងខ្ពស់សម្រាប់មីស៊ីលផ្លោងរយៈចម្ងាយឆ្ងាយ (IRBM) ដែលទីក្រុងព្យុងយ៉ាងនិយាយថា ចាំបាច់ដើម្បីបង្កើនសមត្ថភាពវាយប្រហារជាយុទ្ធសាស្ត្ររបស់យោធាក្រុម។ IRBMs គឺជាមីស៊ីលផ្លោងដែលមានចម្ងាយពី 3,000-5,500 គីឡូម៉ែត្រ ដែលស្ថិតនៅចន្លោះកាំជ្រួចផ្លោងរយៈចម្ងាយមធ្យម និងមីស៊ីលផ្លោងអន្តរទ្វីប (ICBM)៕

ប្រទេសថៃ ៖ កាលពីថ្ងៃទី១៩ ខែវិច្ឆិកា ឆ្នាំ២០២៣ សារព័ត៌មានថៃចុះផ្សាយថា មេដឹកនាំគណបក្សភឿថៃ អ្នកនាង Paetongtarn Shinawatra ដែលជាកូនស្រីរបស់អតីតនាយករដ្ឋមន្ត្រីថៃ លោក ថាក់ស៊ីន បានប្រកាសឱ្យពិភពលោកដឹងថា «មូក្រាថាក់ ឬសាច់ជ្រូកអាំងឆ្នាំងភ្លើង» គឺជា Soft Power របស់ប្រទេសថៃ ពីព្រោះនាងគិតថា អាហារថៃមានលក្ខណៈពិសេស ។

អ្នកនាង Paetongtarn Shinawatra លើកឡើងថា ៖ «ពលរដ្ឋនៅទូទាំងពិភពលោកបានស្គាល់ពីអាហារថៃរួចហើយ ក្នុងនោះ គឺសាច់ជ្រូកអាំងឆ្នាំងភ្លើង ។ ខ្ញុំគិតថា សាច់ជ្រូកអាំងឆ្នាំងភ្លើងនឹងអាចជំរុញឱ្យក្លាយជា Soft Power របស់ប្រទេសថៃយ៉ាងពិតប្រាកដ» ។

សារព័ត៌មានថៃបន្តថា តើអាហារឆ្ងាញ់របស់ថៃ ដែលអ្នកនាង Paetongtarn Shinawatra បានលើកឡើងនេះមានប្រភពមកពីណា? គេសន្និដ្ឋានថា សាច់ជ្រូកអាំងឆ្នាំងភ្លើង មានដើមកំណើតមកពីទាហានម៉ុងហ្គោលី ។ ក្រោយពីបានជួបប្រទះនឹងសង្គ្រាមយ៉ាងខ្លាំងក្លាមក ទាហានម៉ុងហ្គោលីបានជួបនឹងឧបសគ្គក្នុងការចម្អិនម្ហូបអាហារ ដូចជា ខ្វះខាតចាន ឆ្នាំង និងចង្ក្រានសម្រាប់ចម្អិនសាច់ចៀម ។ ហេតុនេះ ពួកគេក៏បានយកមួកដែកមកអាំងសាច់ចៀមជំនួសចង្ក្រាន ។

ការចម្អិនម្ហូបអាហារបែបនេះ ក៏បានប្រើប្រាស់នៅតាមតំបន់ផ្សេងៗកាន់តែច្រើនដែលម៉ុងហ្គោលីគ្រប់គ្រង មុននឹងប្រើប្រាស់នៅហុកកៃដូ ប្រទេសជប៉ុន ។ គេសង្កេតឃើញថា បន្ទាប់ពីសាច់ចៀមសម្បូរហូរហៀរនៅលើទីផ្សារ រដ្ឋាភិបាលជប៉ុនក៏បានជំរុញឱ្យពលរដ្ឋយកសាច់ចៀមមកអាំងបរិភោគជាមួយបន្លែ ហើយគេហៅថា «សាច់អាំង ជែងគីសខាន» ។

កាលពីឆ្នាំ១៩៥៧ សាច់អាំង ជែងគីសខាន បានចាប់ផ្តើមលក់នៅប្រទេសថៃ ប៉ុន្តែបានដាក់លក់នៅតាមហាងជាមុន ហើយគេនិយមលក់ឱ្យភ្ញៀវជាឈុតៗ ។ ចំណែកនៅតំបន់ភាគឦសានប្រទេសថៃ ក៏មានសាច់អាំងលក់ដែរ គឺហៅថា «សាច់អាំងកូរ៉េ» ។ មុននឹងសាច់អាំងនេះបានអភិវឌ្ឍន៍ជាបន្តបន្ទាប់ រហូតក្លាយជាសាច់ជ្រូកអាំងឆ្នាំងភ្លើងនាពេលបច្ចុប្បន្ន គឺវាបានផ្លាស់ប្តូរទាំងរសជាតិ និងរូបរាង ព្រោះគេមិនត្រឹមតែបរិភោគសាច់អាំងតែមួយមុខទេ ប៉ុន្តែគេបានបន្ថែមទឹកស៊ុប ដើម្បីឱ្យវាមានរសជាតិឆ្ងាញ់ ។ ហេតុនេះ វប្បធម៌បរិភោគសាច់ជ្រូកឆ្នាំងភ្លើង ឬហៅថា សាច់ជ្រូកអាំងនេះ ទទួលបានការពេញនិយមយ៉ាងខ្លាំងនៅតំបន់អាស៊ី ។

អ្នកនាង រាំផេយ សុជិម៉ានីន បុគ្គលិកហាងសាច់ជ្រូកអាំងឆ្នាំងភ្លើង និយាយថា ៖ «ខ្ញុំសប្បាយចិត្តណាស់ ដែលអ្នកនាង Paetongtarn Shinawatra ជំរុញសាច់ជ្រូកអាំងឆ្នាំងភ្លើងរបស់ថៃឱ្យក្លាយជាអាហារលំដាប់ពិភពលោក ព្រោះអ្នកប្រកបមុខរបរនេះនឹងអាចរីកចម្រើនទៅថ្ងៃមុខ ។ លើសពីនេះ ជនបរទេសនឹងបានស្គាល់ពីសាច់ជ្រូកអាំងឆ្នាំងភ្លើងរបស់ថៃកាន់តែច្រើន» ។

រីឯគ្រូពេទ្យជំនាញខួរក្បាល និងប្រព័ន្ធប្រសាទបានផ្តាំផ្ញើទៅអ្នកចូលចិត្តបរិភោគសាច់ជ្រូកអាំងឆ្នាំងភ្លើងថា ត្រូវប្រុងប្រយ័ត្នចំពោះអាហារមួយនេះ ដោយសារវាប្រឈមនឹងកើតជំងឺមហារីកពោះវៀន ។ គ្រូពេទ្យបានណែនាំឱ្យបរិភោគក្នុងបរិមាណតិច គឺបរិភោគមិនលើសពី១លើកក្នុង១ខែ និងត្រូវបរិភោគវារួមជាមួយបន្លែគ្មានជាតិគីមីផងដែរ ៕ ប្រភព ៖ Thairath