កាលពីព្រឹកថ្ងៃទី ២៥ ខែធ្នូ ឆ្នា២០២៣ កន្លងទៅនេះ គ្រូបង្វឹកអាជីវកម្មនៃក្រុមហ៊ុន Action COACH លោក អ៊ីវ គីមសួរ បាននាំយកនូវថវិកាសប្បុរសធម៌ចំនួន ២៦ ០០០ ដុល្លារអាមេរិក ដែលជាថវិកាប្រមូលបានតាមរយៈគម្រោងព្រឹត្តិការណ៍មួយមានឈ្មោះថា “តោះ! ដើរឡើងភ្នំបូកគោ ដើម្បីសុខភាពកុមារ”។ គម្រោងព្រឹត្តិការណ៍នេះ ត្រូវបានផ្តួចផ្តើម និងដឹកនាំបង្កើតឡើងដោយស្ម័គ្រចិត្ត លោក អ៊ីវ គីមសួរ សហការជាមួយនឹងម្ចាស់ក្រុមហ៊ុនអាជីវកម្មចំនួន ៣ ផ្សេងទៀតរួមមានដូចជា ក្រុមហ៊ុន Khmer Ads Zone ក្រុមហ៊ុន Tomnerb Tech និង ក្រុមហ៊ុនDM Cambodia ក្នុងអំឡុងចុងឆ្នាំ ២០២០ ក្នុងគោលបំណង ផ្សព្វផ្សាយរៃអង្គាសថវិកាឧបត្ថម្ភដល់ មន្ទីរពេទ្យកុមារអង្គរ និងចូលរួមលើកស្ទួយដល់សកម្មភាពកីឡា ព្រមទាំងផ្សព្វផ្សាយនូវតំបន់ទេសចរណ៍នៃភាគនិរតីនៃប្រទេសកម្ពុជា ។
ដោយចៃដន្យ គម្រោងព្រឹត្តិការណ៍នេះលើកដំបូង មិនអាចប្រព្រឹត្តិទៅបាន ដោយសារតែបញ្ហានៃការរីករាលដាលនៃជំងឺកូវីត១៩ ហើយបន្តអាក់ខាននៅក្នុងឆ្នាំ២០២១ រហូតឆ្នាំ ២០២២ កន្លងទៅនេះ ទើបគណៈកម្មការរៀបចំព្រឹត្តិការណ៍មួយនេះ សម្រេចដាក់ផែនការ និងរៀបចំឲ្យចេញជារូបរាងឡើងបាន។ ដោយឡែកនៅក្នុងឆ្នាំ២០២៣នេះ គណៈកម្មការរៀបចំព្រឹត្តិការណ៍នេះ ក៏បានគ្រោងនឹងបង្កើតព្រឹត្តិការណ៍ ដើរឡើងភ្នំបូកគោជាថ្មីទៀត ប៉ុន្តែឧបសគ្គនៅតែបន្តកើតមាន គឺផលលំបាកក្នុងការស្វែងរកក្រុមហ៊ុន និងសប្បុរសជនឧបត្ថម្ភដល់កម្មវិធីដែល គណៈកម្មការរៀបចំព្រឹត្តិការណ៍នេះ ជឿថាបញ្ហាលំបាកនេះ គឺបណ្តាលមកពីវិបត្តិសេដ្ឋកិច្ចនៅក្នុងប្រទេសកម្ពុជានៅតែបន្ត ជាមួយនឹងកត្តាផ្សេងៗមួយចំនួនទៀត ទើបក្រុមហ៊ុន និងសប្បុរសជនជាច្រើន មានការលំបាក និងយឺតយ៉ាវក្នុងការសម្រេចចផ្តល់ថវិកាឧបត្ថម្ភមកកាន់សកម្មភាពសប្បុរសធម៌។
សូមបញ្ជាក់ផងដែរថា ថ្វីត្បិតតែព្រឹត្តិការណ៍មួយនេះ មានការលំបាកក្នុងការកើតឡើងមែន តែរាល់ថវិកាដែលទទួលបានពីការឧបត្ថម្ភរបស់ក្រុមហ៊ុន ក៏ដូចជាសប្បុរសជន មិនត្រូវបានដកយកវិញដែរ។ ក្រោមការយោគយល់ ទឹកចិត្តស្រលាញ់ ក្តីមេត្តាករុណាចំពោះកុមារកម្ពុជា ដែលកំពុងសម្រាកព្យាបាលនៅក្នុងមន្ទីរពេទ្យកុមារអង្គរ ទាំងសប្បុរសជន ក្រុមហ៊ុនឧបត្ថម្ភ និងគណៈកម្មការរៀបចំព្រឹត្តិការណ៍ទាំងអស់សម្រេចចិត្តព្រមគ្នា បង្វែរថវិកាទាំងអស់នោះ បរិច្ចាគជូនដល់មន្ទីរពេទ្យកុមារអង្គរ ដើម្បីជាចំណែកក្នុងការចូលរួមអភិវឌ្ឍន៍ និងធ្វើឲ្យមានភាពប្រសើរឡើងនូវសុខុមាលភាពកុមារកម្ពុជា។
មកដល់ឆ្នាំ ២០២៣នេះ ថវិកាដែលទទួលបានពីការរៀបចំព្រឹត្តិការណ៍ ដើរឡើងភ្នំបូកគោ ដើម្បីសុខភាពកុមារ បានទទួលសម្រាប់ជួយដល់មន្ទីរពេទ្យកុមារអង្គរទទួលបានចំនួន ៦៧,៩៧៥ ដុល្លារអាមេរិក ដែលលើកទី ១ ឆ្នាំ២០២០ បានចំនួន ១៣,២០០ ដុល្លារអាមេរិក លើកទី២ ឆ្នាំ២០២២ បានចំនួន ២៨,៧៧៥ ដុល្លារអាមេរិក និងលើកទី៣ ឆ្នាំ២០២៣ បានចំនួន ២៦,០០០ ដុល្លារអាមេរិក ដែលក្នុងនោះមានក្រុមហ៊ុនជាច្រើនបានចូលរួមឧបត្ថម្ភ ដូចជា ក្រុមហ៊ុន ឃាង ហួត អ៊ិនធើណេសិនណាល ក្រុមហ៊ុនថ្នាំពណ៌ជាតិខាំផែន ក្រុមហ៊ុន ថប់ស្តារ និងក្រុមហ៊ុនជាច្រើនទៀត។
គណៈកម្មការរៀបចំព្រឹត្តិការណ៍ ដើរឡើងភ្នំបូកគោ ដើម្បីសុខភាពកុមារ និងក្រុមការងារមន្ទីរពេទ្យកុមារអង្គរ សូមថ្លែងអំណរគុណយ៉ាងជ្រាលជ្រៅចំពោះសប្បុរសជនទាំងអស់ រួមទាំងអជ្ញាធរគ្រប់ជាន់ថ្នាក់ ក្នុងខេត្តកំពត ដែលបានចូលរួមជួយ និងគាំទ្រព្រឹត្តិការណ៍នេះ តាំងពីគម្រោងព្រឹត្តិការណ៍លើកទី ១ រហូតដល់លើកទី ៣នេះ និងអំពាវនាវឲ្យបន្តចូលរួមតទៅទៀត នៅក្នុងសកម្មភាពសប្បុរសធម៌នេះ ដើម្បីជួយសង្រ្គោះជីវិត និងលើកកម្ពស់សុខុមាលភាពកុមារដែលជាទំពាំងស្នងឫស្សី និង ជាសសរទ្រូងប្រទេសជាតិនាពេលអនាគត ព្រមទាំងរួមចំណែកលើកស្ទួយវិស័យទេសចរណ៍ក្នុងខេត្តកំពតផងដែរ។
ទំនាក់ទំនងកម្មវិធី និងសារព័ត៌មាន៖
លោក៖ អ៊ីវ គឹមសួរ
T: 015 718 888, E: kimsouriv@gmail.com
