មានការចាប់អារម្មណ៍យ៉ាងខ្លាំងពីអ្នកលេងបណ្តាញសង្គមក្រោមពី សេង សុខឃីម បានបង្ហោះវីដេអូជាមួយនឹងនាយ ចឺម ដែលជាអតីតគូស្នេហ៍ធ្វើឱ្យមានការងឿងឆ្ងល់ថា អ្នកទាំងពីរវិលមកទាក់ទងគ្នាវិញឬយ៉ាងណា។ ស្របពេលមហាជនមានមន្ទិលសង្ស័យស្រាប់តែតារាកំប្លែង ស្រី អ៊ិត ចេញមកអះអាងថានោះគ្រាន់តែជារូបភាពចាស់ៗដែលយកមកបង្ហោះថ្មីប៉ុណ្ណោះ ហើយទង្វើនេះអ្នកនាងមិនពេញចិត្តនោះទេ។

នៅលើបណ្តាញសង្គមរបស់អ្នកនាង អ៊ិត ដែលត្រូវជាម្តាយមីងរបស់តារាចម្រៀង នាយ ចឺម នារសៀលថ្ងៃទី២០ ខែវិច្ឆិកា ថា «ថ្ងៃនេះខ្ញុំសុំនិយាយបន្ដតិច ហើយក៏សុំទោសទុកមុន ខ្ញុំឆ្ងល់រឿងអ្នកបង្ហោះរូបភាពទាំងនេះ ហេតុអីចូលចិត្តយករូបភាព ឬ វីដេអូអតីតកាល យកមកផុសធ្វើឱ្យបងប្អូនយល់ច្រឡំ ចឹងបងប្អូនមួយចំនួនគាត់មិនដឹង ច្បាស់ជាគាត់មកដៀលជេរក្មួយខ្ញុំទៀត និយាយរួមទៅខ្ញុំមិនចូលចិត្តចឹងទេ សូមអរគុណ ( សូមបញ្ជាក់រូបចាស់ តែអ្នកផុសថ្មីៗៗ )។ ការស្រាយមន្ទិលរបស់តារាកំប្លែងខាងលើរូបនេះ នាយ ចឺម ក៏បានចែករំលែកខ្លឹមសារនេះនៅលើបណ្តាញសង្គមរបស់ខ្លួនដែរ។

តាមរយៈរូបភាព វីដេអូការសិទ្ធស្នាលរបស់នាយ ចឺម និងអតីតគូស្នេហ៍ សេង សុខឃីម នេះកើតឡើងម្តងទៀតនេះគឺមានគណនី Seng Sokhim ជាអ្នកបង្ហោះផ្ទាល់តែម្តង។

គួរបញ្ជាក់ថា សេង សុខឃីម បានប្រកាសបែកស្នេហ៍ជាមួយ នាយ ចឺម កាលពីថ្ងៃទី២ ខែកញ្ញា ឆ្នាំ២០២២បន្ទាប់ពីទាក់ទងគ្នាបានប្រមាណជាង១ឆ្នាំ។ ការបែកគ្នារបស់អ្នកទាំងពីរ សេង សុខឃីម ធ្លាប់បានអះអាងថាមានអ្នកទី៣ជ្រែតជ្រែកក្តីស្នេហ៍ពួកគេ បន្តមកអ្នកមេម៉ាយរូបនេះបានប្រកាសយ៉ាងច្បាស់ៗថាមិនវិលទៅរកនាយចឺម ជាគូស្នេហ៍ចាស់វិញឡើយ។ ចាប់តាំងពីប្រកាសបែកគ្នាមក នាយ ចឺម ពុំទាន់ទម្លាយថាខ្លួនមានម្ចាស់បេះដូងថ្មីនៅឡើយទេ ខណៈ សេង សុខឃីម កៀកកើយជាមួយបុរសម្នាក់ដែលទំនងជាគូស្នេហ៍ថ្មីរបស់នាង។

ទោះយ៉ាងណា ចាប់តាំងពីបែកគ្នាជាមួយ សេង សុខឃីម មកសន្ទុះប្រជាប្រិយភាពនាយចឺម ហាក់ធ្លាក់ចុះមិនដូចពេលពួកគេទាក់ទងគ្នាព្រោះការបែកគ្នាជាមួយស្រីស្អាតជាគូស្នេហ៍ទី៤ នេះ នាយ ចឺម រងមតិរិះគន់យ៉ាងខ្លាំងរហូតលោកចេញមុខ Live តបទៅអ្នករិះគន់វិញយ៉ាងចាស់ដៃ៕

តារាចម្រៀង និងជា Influencer ហុង ស្រីពេជ្រ ហៅ Mina បានជួប ឧបទ្ទវហេតុធ្លាក់ពីឆាកប្រគំតន្រ្តីមួយនៅតាមបណ្តាខេត្តធ្វើឱ្យអ្នកគាំទ្រមានភាពភ្ញាក់ផ្អើលយ៉ាងខ្លាំងចង់ដឹងសុខទុក្ខពីតារាចម្រៀងរូបនេះ ខណៈឆាកប្រគំតន្រ្តីមានសភាពខ្ពស់ខ្លាំង។

ការប្រគំតន្រ្តីលើទឹកដីខេត្តស្វាយរៀងកាលពីពេលថ្មីៗនេះ តារាចម្រៀង Mina បានចូលរួមបកស្រាយបទចម្រៀងជូនបងប្អូនស្តាប់កម្សាន្តអមជាមួយចង្វាក់រាំយ៉ាងត្រជាក់ភ្នែកញុំាងឱ្យកម្មវិធីកាន់តែសប្បាយរីករាយ។ មុនសម្តែងបន្តទៀត Mina បានសំណះសំណាលជាមួយទស្សនិកជនចង់ដឹងសុខទុក្ខអ្នកចូលរួមយ៉ាងណាដែរព្រោះតែមានមនុស្សម្នាមកចូលរួមទស្សនាច្រើនកុះករ។

ជារឿងនឹកស្មានមិនដល់ គ្រានោះ Mina បានជួបឧបទ្ទវហេតុធ្លាក់ពីឆាកប្រគំតន្រ្តីធ្វើឱ្យមានការភ្ញាក់ផ្អើលយ៉ាងខ្លាំងនិងការព្រួយបារម្ភពីសុខភាពរបស់នាងយ៉ាងខ្លាំងព្រោះការធ្លាក់ពីលើឆាកនេះមិនមែនជាឆាកទាបនោះទេពោលឆាកមានកម្ពស់ជាង១ម៉ែត្រឯណោះ។ លើសពីនេះក្រោយពីធ្លាក់ពីលើឆាកហើយ Mina នៅបំពេញភារកិច្ចខ្លួនឡើងទៅសម្តែងវិញដដែលជាមួយបរិយាកាសរីករាយដើម្បីកុំឱ្យអ្នកគាំទ្រព្រួយបារម្ភបន្តភាពសប្បាយជាមួយបទចម្រៀង២បទទៀត។

ធ្លាក់ពីលើឆាកហើយនៅតែសម្តែងជូនមហាជនទស្សនាទោះបីជាខ្លួនកំពុងឈឺនេះMina ទទួលបានការសរសើរយ៉ាងខ្លាំងក្នុងការបំពេញតួនាទីរបស់ខ្លួនបានយ៉ាងល្អ ខណៈមហាជនក៏ព្រួយបារម្ភសុខភាពនាងដូចគ្នាប្រាកដជាជាំដៃជាំជើងមិនខាន។

ការភ្លាត់ស្នៀតធ្លាក់ពីលើឆាកនេះដែរ Mina ក៏បានបង្ហោះសំណេរនៅលើគណនីបណ្តាញសង្គមសូមទោសអ្នកគាំទ្រដែលធ្វើមិនបានល្អ ហើយនាងក៏បង្ហើបពីរឿងធ្លោយមាត់និយាយមិនល្អនាំឱ្យអ្នកមួយចំនួនលើកឡើងពីអបិយជំនឿផងដែរ៕

ព្រះនាងនរោត្តម ជេនណា និង ឌៀប សុហ្វៀរ៉ា លំដាប់រងទី២ Little Miss Junior Idol 2023 ធ្វើឱ្យអ្នកលេងបណ្តាញសង្គមចាប់អារម្មណ៍យ៉ាងខ្លាំងបន្ទាប់ពីអ្នកទាំងពីរគ្រងឈុតបុរាណដ៏ស្រស់ស្អាតដោយឈុតនេះមានជាប់ទាក់ទងនៅក្នុងសង្គមខ្មែរពីព្រេងនិទានសត្វនាគ។

តាមការបញ្ជាក់នៅលើបណ្តាញសង្គមរបស់ព្រះនាងតូច ជេនណា បានរៀបរាប់ថា «នៅក្នុងសង្គមខ្មែរមានព្រេងនិទានដែលទាក់ទងនិងសត្វនាគជាច្រើន បណ្តាលឱ្យប្រជាជនក្នុងតំបន់មួយនេះមានជំនឿថា សត្វនាគរស់នៅក្នុងទន្លេមេគង្គ ឬ នៅឋានភូជង្គនាគ។ តាមការនិទាន ស្តេចនាគ មានខ្លួនធំ មានស្រកា ដូចត្រីនិងមានច្រើនពណ៌ភ្លឺអាស្រ័យទៅលើបារមី ហើយថែមទាំងអាចនិម្មិតកាយជាមនុស្សឬទេវតាមានរូបរាងស្រស់ស្អាត និងត្រូវបានគេចាត់ទុកថាជាទេវតានៅជាន់ទី១ និង នៅក្នុងចតុមហារាជការដែលផ្តល់នូវភាពត្រជាក់ត្រជុំក្សេមក្សាន្ត»។

ព្រះនាងបន្តទៀតថា «រឿងរ៉ាវនាគនេះផងដែរគឺមានការពាក់ព័ន្ធនិងប្រវត្តិសាស្ត្រ ខ្មែរយើងតាំងពីដើមរៀងមកទាំងក្នុងជីវភាពប្រចាំថ្ងៃ រឿងព្រេងបែបប្រវត្តិសាស្រ្តនៃការកកើតទឹកដីខ្មែរ និងសំណង់ស្ថាបត្យកម្ម បទភ្លេង របាំ និងអត្តចរិកជាជនជាតិខ្មែរដែលមានភាពថ្លៃថ្នូររឹងមាំមិនទន់ជ្រាយតែមិនចុះចាញ់ និងមានចិត្តល្អ»។

ព្រះនាងតូច ជេនណា ជាសិល្បការិនីវ័យក្មេងដែលមានសន្ទុះគាំទ្រយ៉ាងច្រើនពីមហាជន ដោយសារទ្រង់មានទេពកោល្យច្រើនក្នុងវិស័យសិល្បៈមិនថាទម្រង់បុរាណឬសម័យ ច្រៀងឬការសម្តែងឡើយ ទ្រង់អាចធ្វើបានទាំងអស់ និងចេះភាសាបរទេសច្រើនភាសាព្រមទាំងមានសម្រស់ស្រស់ស្អាតខ្លាំង។

ចំណែកឯ ឌៀប សុហ្វៀរ៉ា បានប្រកួតឈ្នះជ័យលាភីឯកក្នុងកម្មវិធី Miss Preteen International Cambodia 2022 និងបានតំណាងកម្ពុជាប្រកួតនៅលើឆាកអន្តរជាតិនៅប្រទេសថៃក្នុងកម្មវិធី Little Miss Junior Idol 2023 ដោយបានជាប់ជ័យលាភីលំដាប់រងទី២៕