នាថ្ងៃទី២១ ខែវិច្ឆិកា ឆ្នាំ២០២៣ ក្រុមប្រឹក្សាអភិវឌ្ឍន៍កម្ពុជា បានអនុម័តឱ្យដំណើរការលើគម្រោងសង់វារីអគ្គិសនីចំនួន ២ នៅក្នុងខេត្តកោះកុង ក្រោមទុនវិនិយោគប្រមាណ ៤៤៧,៥លានដុល្លារអាមេរិក។

ក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុន “KHMER ELECTRICAL POWER CO., LTD” គម្រោងសាងសង់វារីអគ្គិសនីស្ទឹងឫស្សីជ្រុំកណ្តាល អានុភាព ៧០មេហ្កាវាត់ នៅស្រុកមណ្ឌលសីមា និងគម្រោងសាងសង់វារីអគ្គិសនីវាលថ្មកំបុត អានុភាព ១០០មេហ្កាវាត់ នៅស្រុកថ្មបាំង ខេត្តកោះកុង តាមរូបភាពសាងសង់, អាជីវកម្ម, និងផ្ទេរ (BOT) ក្នុងទុនវិនិយោគប្រមាណ ៤៤៧,៥លានដុល្លារអាម៉េរិក និងអាចបង្កើតការងារបានចំនួន ២៣០កន្លែង៕

នាថ្ងៃទី២១ ខែវិច្ឆិកា ឆ្នាំ២០២៣ នៅក្នុងវេទិកាពិភាក្សាស្តីពី “គោលនយោបាយរ៉ែ និងថាមពលនៅកម្ពុជា” រដ្ឋមន្រ្តីក្រសួងរ៉ែនិងថាមពល ឯកឧត្តម កែវ រតនៈ បានលើកឡើងថា៖”កម្ពុជាកំពុងសិក្សាពីលទ្ធភាពនៃការផលិតថាមពលអគ្គិសនីលក់ឱ្យប្រទេសសិង្ហបុរីនាពេលអនាគតឆាប់ៗនេះ”។
ឯកឧត្តមរដ្ឋមន្រ្តីក្រសួងរ៉ែ និង ថាមពល សង្កត់ធ្ងន់ថា៖”បើសិនជាសិង្ហបុរីមានតម្រូវការនោះកម្ពុជានឹងប្រឹងប្រែងដើម្បីផលិត ពិសេសការរកទីផ្សារលក់ចេញដែលសមស្រប”។

ការដាក់ចេញនូវមហិច្ឆតានេះ ក៏ព្រោះកម្ពុជាបានផលិតថាមពលអគ្គិសនីសម្រាប់ផ្គត់ផ្គង់ក្នុងស្រុកបានគ្រប់គ្រាន់ និងបានបន្តចែកចាយអគ្គិសនីជូនដល់ប្រជាពលរដ្ឋតាមទីជនបទបានគ្រប់គ្រាន់ផងដែរ៕

យោងតាមលិខិតក្រុមមេធាវី អន្តរជាតិ ខេ ធី អិល ចុះថ្ងៃទី២០ ខែវិច្ឆិកា ឆ្នាំ២០២៣ តំណាងដោយមេធាវី ឈុន ច័ន្ទតារា បានជូនដំណឹងទៅកាន់លោក យិន ហេង ហៅ ចំប៉ីខ្មៅ ឱ្យសូមទោសកូនក្តីរបស់ខ្លួនជាសាធារណៈឈ្មោះ «តេង ស៊ីណាត» ដែលមហាជនស្គាល់ថាអាជី និងលុបវីដេអូដែលបានបង្ហោះជាបន្ទាន់ក្នុងរយៈពេល៤៨ម៉ោង មិនដូច្នេះទេនឹងមានវិធានការតាមផ្លូវច្បាប់។

ក្នុងលិខិតនោះបានបញ្ជាក់ថាលោក យិន ហេង ហៅ ចំប៉ីខៅ្ម មានទីលំនៅបច្ចុប្បន្នស្ថិតនៅ ផ្ទះលេខ M35 សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ដែលជាម្ចាស់គណនីហ្វេសប៊ុក (Facebook page) ឈ្មោះ Yin Heng ចំប៉ីខ្មៅ សូមធ្វើការលុបនូវវីដេអូដែលបានបង្ហោះកាលពីថ្ងៃទី១៧ ខែវិច្ឆិកា ឆ្នាំ២០២៣ និងធ្វើការ សុំទោសកូនក្តីរបស់ខ្លួនឈ្មោះ តេង ស៊ីណាត ជាសាធារណៈតាមរយៈគណនីហ្វេសប៊ុក (Facebook page) របស់ លោក ឈ្មោះ Yin Heng ចំប៉ីខ្មៅ ក្នុងរយៈពេល ៤៨ម៉ោង គិតចាប់ពីទទួលបានការជូនដំណឹងនេះ ។
មូលហេតុដែលឈានដល់ចំណុចនេះ មេធាវី ឈុន ច័ន្ទតារា បានឱ្យដឹងថាកាលពីថ្ងៃទី១៧ ខែវិច្ឆិកា ឆ្នាំ២០២៣ ចំប៉ីខ្មៅ បានធ្វើការបង្ហោះនូវវីដេអូក្នុងគណនីហ្វេសប៊ុក (Facebook page) ឈ្មោះ Yin Heng ចំប៉ីខ្មៅ ដោយក្នុងការបង្ហោះនេះបានយកនូវខ្សែអាត់សម្លេងរបស់កូនក្តីលោកមកធ្វើ ការបង្ហោះបកស្រាយដោយគ្មានការអនុញ្ញាតិពីកូនក្ដីរបស់លោកឡើយ ហើយការបង្ហោះបកស្រាយរបស់ លោក យិន ហេង នេះធ្វើឱ្យមហាជនជាច្រើនមានការយល់ច្រឡំ ដែលនាំឱ្យប៉ះពាល់កិត្តិយសសេចក្តីថ្នូររបស់កូនក្តីលោកយ៉ាងធ្ងន់ធ្ងរ ព្រមទាំងធ្វើឱ្យមានការរើសអើងពីសំណាក់មហាជនជាច្រើន ហើយថែមទាំងមានការប៉ះ ពាល់ដល់ការប្រកបអាជីវម្មរបស់កូនក្ដីរបស់លោកទៀតផង។

លិខិតដដែលបានបញ្ជាក់ទៀតថាដោយឃើញដូចនេះបន្ទាប់ពី ចំប៉ីខ្មៅ បានបង្ហោះជាសាធារណៈតាមរយៈគណនីហ្វេសប៊ុករួច អាជី បានធ្វើការទំនាក់ទំនងតាមឆាតទៅតាមរយៈ (Facebook page) របស់ចំប៉ីខ្មៅដើម្បីឱ្យចេញនូវវីដេអូបកស្រាយកែតម្រូវអោយបានត្រឹមត្រូវឡើងវិញដែលទាក់ទងនឹងការបង្ហោះនោះ ហើយ ចំប៉ីខ្មៅក៏បានឆ្លើយឯកភាព ជាមួយអាជី តែបន្ទាប់ពីបានឆ្លើយឯកភាពរួច ចំប៉ីខ្មៅមិនព្រមធ្វើតាមការសន្យាឡើយ។

មេធាវី បានឱ្យ ចំប៉ីខ្មៅ ធ្វើការលុបនូវវីដេអូដែលបានបង្ហោះកាល ពីថ្ងៃទី១៧ ខែវិច្ឆិកា ឆ្នាំ២០២៣ និងធ្វើការសុំទោសកូនក្ដីរបស់ខ្លួនឈ្មោះ តេង ស៊ីណាត ជាសាធារណៈតាម រយៈគណនីហ្វេសប៊ុក (Facebook page) របស់ លោក ឈ្មោះ Yin Heng ចំប៉ីខ្មៅ ក្នុងរយៈពេល ៤៨ម៉ោង គិតចាប់ពី លោក ទទួលបានការជូនដំណឹងនេះ ជាកំហិត ។ ក្នុងករណី ចំប៉ីខ្មៅ ពុំធ្វើការលុបនូវវីដេអូដែល បានបង្ហោះ និងធ្វើការសុំទោសកូនក្តីរបស់ខ្លួនទេ នោះកូនក្តីរបស់ខ្លួននឹងស្នើសុំឱ្យមានវិធានការតាមច្បាប់៕

ខេត្តកោះកុង ជាខេត្តមួយដែលមានសក្តានុពលយ៉ាងខ្លាំងដើម្បីទាក់ទាញភ្ញៀវទេសចរឱ្យមកកាន់តំបន់ឆ្នេរ ក្រៅពីដែនកោះដែលមានភាពទាក់ទាញនោះ ខេត្តកោះកុង ក៏មានឆ្នេរខ្សាច់ជាច្រើនទៀតគួរជាទីចាប់អារម្មណ៍ ។
នៅក្នុងចំណោមកោះ ឆ្នេរទាំងអស់នោះ កោះប៉ោ ជាកោះមួយដែលមានភាពស្ងប់ស្ងាត់ ហាក់មិនសូវមានការផ្សព្វផ្សាយខ្លាំងអំពីសក្តានុពលនៅលើកោះនេះ។

កោះប៉ោ មានទីតាំងស្ថិតនៅក្នុងទឹកដី ភូមិកោះប៉ោ ឃុំបាក់ខ្លង ស្រុក មណ្ឌលសីមា មានចម្ងាយជិត២០គីឡូម៉ែត្រពីទីរួមខេត្តកោះកុង ។

កោះនេះ ជាតំបន់រមណីយដ្ឋានទេសចរណ៍ធម្មជាតិមួយដ៏ទាក់ទាញនៅទឹកដីខេត្តកោះកុង ដែលមានដើមឈើធំៗរួមទាំងទេសភាពទឹកសមុទ្រ និង ដែនកោះជាច្រើនទៀតបង្កើតបាជាផ្ផ្ទាំងទស្សនីយភាពដ៏គួរឱ្យគយគន់។

ជាពិសេសភ្ញៀវទេសចរអាចជួលទូកទេសចរណ៍ ពីបងប្អូនប្រជានេសាទ ធ្វើដំណើរពីទីកោះមួយទៅកាន់កន្លែងកោះមួយទៀត បានយ៉ាងសប្បាយរីករាយ។ លើសពីនេះទៅទៀតភ្ញៀវទេសចរណ៍ ក៏អាចបោះតង់ ដើរកម្សាន្ត លើឆ្នេរខ្សាច់ ងូតទឹកសមុទ្រ ស្ទូចត្រី ទស្សនាជីវៈចម្រុះ ជួបជុំបរិភោគ អាហារសមុទ្រ ដ៏ឈ្ងុញឆ្ងាញ់បានថែមទៀតផងដែរ។

អ្វីដែលគួរឱ្យកំណត់សម្គាល់នោះ គឺថានៅលើទឹកដីកោះប៉ោនេះភ្ញៀវទេសចរ គួរណាស់មកកម្សាន្តនៅរដូវរដូវប្រាំង ពីព្រោះថារដូវវស្សាទឹកហូរ ខ្លាំងអាចបង្កបញ្ហាប្រឈមកើតឡើងបានយ៉ាងឆាប់រហ័ស៕

កាលពីពេលថ្មីៗ មហាជនកំពុងតែផ្ទុះការចាប់អារម្មណ៍ និងមានមតិជជែងវែកញែកជាច្រើន តាមរយៈវីដេអូមួយដែលបានបង្ហោះនៅលើបណ្តាញសង្គមហ្វេសបុក។ តាមរយៈវីដេអូ គេបានឃើញថាព្រះសង្ឈខ្មែរមួយអង្គកំពុងតែស្រោចទឹកឲ្យពុទ្ធបរិស័ទ ខណៈបានយកក្អមវាយក្បាលម្នាក់មួយក្អមដើម្បីបណ្តេញគ្រោះចង្រៃ។

ជាការពិតណាស់ ការស្រោចទឹក គឺជាអបីយជំនឿខ្មែរយើង ដែលតែងតែនិយមធ្វើតៗគ្នាដើម្បីលើករាសី បណ្តេញគ្រោះចង្រៃ និងជួយឲ្យរកស៊ីមានបានជាដើម។ ពិធីក្នុងការស្រោចទឹក តែងតែមានរបៀបខុសៗគ្នាពីមួយតំបន់ទៅមួយតំបន់ ដូចជាការសូត្រមន្តហើយស្រោចទឹកតាមរបៀបទូទៅ ឬស្រោចទឹកជាមួយនឹងក្អមហើយបោកក្អមនោះទៅនឹងដី ដើម្បីបំផ្លាញគ្រោះអាក្រក់អ្វីបែបនិង។

ប៉ុន្តែជាក់ស្តែង កាលពីពេលថ្មីៗ តាមរយៈវីដេអូនៅលើបណ្តាញសង្គមបានបង្ហោះឲ្យឃើញពីសកម្មភាពរបស់ព្រះសង្ឃខ្មែរមួយអង្គ តាមការបញ្ជាក់បានឲ្យដឹងថា លោកគង់នៅវត្តជន្លង់ម្លូ ខណៈវីដេអូនោះបានបង្ហាញថាលោកកំពុងស្រោចទឹករំដោះគ្រោះឲ្យញាតិញោមតាមធម្មតា។ ក្នុងនោះផងដែរ គឺគេសង្កេតឃើញថា លោកកំពុងតែសូត្រមន្តគាថ៌ាអ្វីម៉្យាង ព្រមទាំងក្នុងដៃមានកាន់នូវធូប៣សរសៃ និងក្អមសម្រាប់ដួសទឹកមន្ត។ រំពេញនោះ ស្រាប់តែយកក្អមនៅនឹងដៃវាយក្បាលញាតិញោមមួយទំហឹងផងដែរ ដើម្បីជាកិច្ចបញ្ចប់ពិធី ក៏ដូចជាបណ្តេញគ្រោះចង្រៃឲ្យរសាត់ភ្លាមៗ។ ក្រឡេកមកមើលញាតិញោមវិញ បន្ទាប់ពីត្រូវក្បាលម្នាក់១ក្អមហើយ លាន់មាត់ថា «អូយ» គ្រប់គ្នា មិនដឹងថាក្នុងចិត្តជះថ្លាប៉ុណ្ណាទេ។ រីឯ លោកបងវិញ បន្ទាប់ពីវាយក្បាលនឹងក្អមហើយ ញញឹមបិទមាត់មិនជិតតែម្តង ទំនងជាអស់សំណើចក៏មិនដឹង។

យ៉ាងណាមិញ បន្ទាប់ពីវីដេអូនោះបានចែកចាយហើយ គេឃើញថាមានមតិជាច្រើនបានលើកឡើង អ្នកខ្លះថា «ចុម!លោកបងលេងធ្ងន់ដៃហើយ»។ អ្នកខ្លះថា «សីលដល់កំពូលហើយ» ។ អ្នកខ្លះទៀតថា «ស្រោចទឹករួចទៅអោយពេទ្យផងអ្នកអើយ»។ អ្នកខ្លះថា«ត្រូវខាងក្រោយផង ប្រយ័ត្នកើតជំងឺសរសៃប្រសាទ»។ អ្នកខ្លះទៀតថា «ពូកែប៉ុណ្ណាក៏មិនទៅក្បែរដែរ បើស្រោចទឹកធ្វើបែបហ្នឹង។ខ្ញុំឃើញលោកដែលខ្លាំងៗមិនមែនស្រោចទឹកបែបនេះទេ។ នេះហើយអ្នកដែលជឿចេះតែជឿ តែខ្ញុំវិញអត់ជឿសោះ។ ខ្ញុំមិនចូលចិត្តបែបនេះ»។

ទោះបីជាយ៉ាងណាក៏ដោយ តាមរយៈវីដេអូមួយនេះ សូមអំពាវនាយដល់បងប្អូនប្រជាពលរដ្ឋខ្មែរយើងទាំងអស់ កុំងប់ងល់នឹងអបីយជំនឿជ្រុលហួសហេតុពេក កុំឲ្យគេថាជំនឿខ្វះការពិចារណា ព្រោះវាអាចនាំមកនូវវិប្បដិសេរីនៅថ្ងៃក្រោយផងដែរ៕