ប្រទេសរុស្ស៊ី ៖ វាបានក្លាយជាករណីដំបូងនៅក្នុងប្រព័ន្ធយុត្តិធម៌របស់ប្រទេសរុស្ស៊ី ក្រោយពីចៅក្រមបានបញ្ជាឱ្យបន្ធូរបន្ថយទោសជនជាប់ចោទម្នាក់ អាយុ៤៨ឆ្នាំ ពីការជាប់ពន្ធនាគាររយៈពេល៥ឆ្នាំ មកសល់ត្រឹមតែការព្យួរទោសប៉ុណ្ណោះ ។ ប៉ុន្តែពលរដ្ឋរុស្ស៊ីជាច្រើននាក់ឆ្ងល់ថា ដោយសារហេតុផលឆ្មា១ក្បាលសោះ ហេតុអ្វីបានជាតុលាការកាត់ក្តីបែបនេះ?

កន្លងមក ប៉ូលិសរុស្ស៊ីបានចាប់ខ្លួនបុរសម្នាក់ពីបទកាន់កាប់អាវុ.ធខុសច្បាប់, បង្កភាពវឹកវរ និងវាយតប់រាងកាយអ្នកដទៃ នៅពេលបុរសនេះស្រវឹងស្រា ។ ប៉ុន្តែតុលាការរុស្ស៊ីក៏បានកាត់ក្តីឱ្យបុរសនេះរួចពីពន្ធនាគារ ដោយសារគាត់មានឆ្មា១ក្បាលនៅក្នុងបន្ទុក ហើយគាត់ត្រូវទៅមើលថែទាំវា ។

ក្រោយពីត្រូវបានចាប់ខ្លួន ជនជាប់ចោទបានយល់ព្រមសារភាពកំហុសទាំងអស់ និងបានសហការយ៉ាងល្អជាមួយអាជ្ញាធរ មុនពេលតុលាការកាត់ក្តីថា គាត់បានប្រព្រឹត្តខុស ហើយចុងក្រោយ គាត់ទទួលបានការបន្ធូរបន្ថយទោសទាំងអស់ ។ ការសម្រេចក្តីរបស់តុលាការលើកនេះ បានធ្វើឱ្យពលរដ្ឋរុស្ស៊ីជាច្រើននាក់ងឿងឆ្ងល់យ៉ាងខ្លាំង ហើយពួកគេលើកឡើងថា ករណីនេះ មិនធ្លាប់កើតឡើងទេនៅប្រទេសរុស្ស៊ី ។

ជាធម្មតា មានករណីតិចតួចប៉ុណ្ណោះដែលតុលាការបានកាត់ក្តីឱ្យជនណាម្នាក់រត់ពីទោសបែបនេះ ដូចជា ជនជាប់ចោទមានកូន ឬមានសមាជិកគ្រួសារនៅក្នុងបន្ទុក និងមិនអាចចិញ្ចឹមខ្លួនឯងបាន ហើយជនជាប់ចោទត្រូវមើលថែទាំពួកគេ ។ ប៉ុន្តែករណីតុលាការអនុញ្ញាតឱ្យជនជាប់ចោទត្រឡប់ទៅមើលថែទាំសត្វចិញ្ចឹមរបស់ខ្លួន គឺមិនធ្លាប់កើតឡើងពីមុនមកទេ ៕ ប្រភព ៖ Mono News

ប្រទេសថៃ ៖ កាលពីថ្ងៃទី២១ ខែវិច្ឆិកា ឆ្នាំ២០២៣ លោក Pipat Ratchakitprakarn រដ្ឋមន្ត្រីក្រសួងការងារប្រទេសថៃលើកឡើងថា លោកបានកំណត់គោលការណ៍ផ្សព្វផ្សាយ និងពង្រីកទីផ្សារការងាររបស់ថៃនៅក្រៅប្រទេស ឱ្យស្មើនឹង១សែននាក់នៅឆ្នាំ២០២៤ ។ បច្ចុប្បន្ននេះ នាយកដ្ឋានការងារថៃបានត្រៀមផែនការបញ្ជូនពលករថៃទៅធ្វើការនៅក្រៅប្រទេសរួចរាល់ហើយ ។

លោក Pipat Ratchakitprakarn រដ្ឋមន្ត្រីក្រសួងការងារថៃបន្តថា គោលការណ៍នេះនឹងផ្តោតទៅលើការលើកកម្ពស់ និងការរក្សាការងារក្នុងទីផ្សារ រួមទាំងការពង្រីកទីផ្សារការងារនៅក្រៅប្រទេសផងដែរ ជាពិសេស យើងនឹងផ្តោតលើប្រទេសណាមានតម្រូវការជួលពលករបរទេសក្នុងមុខតំណែងខ្វះខាត ឬប្រទេសណាមានបំណងជួលពលករបរទេសបន្ថែមទៀត ។

*នៅឆ្នាំ២០២៤ នាយកដ្ឋានការងារ និងក្រសួងការងារថៃបានកំណត់គោលដៅបញ្ជូនពលករថៃទៅធ្វើការនៅតាមតំបន់ផ្សេងៗ ដូចជា ៖
-តំបន់អាស៊ី ស្មើនឹង៧២.០០០នាក់
-តំបន់អឺរ៉ុប ស្មើនឹង១៤.០០០នាក់
-តំបន់មជ្ឈិមបូព៌ា ស្មើនឹង១០.៥០០នាក់
-អាមេរិកខាងជើង ស្មើនឹង១.៨០០នាក់
-អាហ្វ្រិក ស្មើនឹង១.១០០នាក់
-អាមេរិកខាងត្បូង, អូស្ត្រាលី និងអូសេអានី ស្មើនឹង៦០០នាក់

*សម្រាប់គោលដៅលំដាប់ទី១ ប្រទេសថៃនឹងបញ្ជូនពលករទៅធ្វើការនៅប្រទេសដូចខាងក្រោមនេះ ៖
-តៃវ៉ាន់ ស្មើនឹង២០.៣០០នាក់
-អ៊ីស្រាអែល ស្មើនឹង៧.៧០០នាក់
-កូរ៉េខាងត្បូង ស្មើនឹង៧.៥០០នាក់
-ជប៉ុន និងស៊ុយអែត ស្មើនឹង៦.០០០នាក់ និង
-ម៉ាឡេស៊ី ស្មើនឹង៤.០០០នាក់

លោក Pipat Ratchakitprakarn រដ្ឋមន្ត្រីក្រសួងការងារថៃថ្លែងថា ៖ «រដ្ឋាភិបាលថៃបានផ្តល់ភាពសំខាន់ដល់វិស័យការងារ ដែលវាជាវិស័យដ៏សំខាន់មួយដើម្បីជំរុញសេដ្ឋកិច្ចជាតិ ។ ចំពោះពលករថៃដែលទៅធ្វើការនៅក្រៅប្រទេស ក្រៅពីពួកគេបានផ្ញើប្រាក់មកឱ្យក្រុមគ្រួសារនៅប្រទេសថៃហើយ ពួកគេក៏បាននាំមកនូវចំណេះដឹង និងបច្ចេកវិទ្យាដែលទទួលបានពីកន្លែងការងារនៅក្រៅប្រទេស យកមកអភិវឌ្ឍន៍ប្រទេសថៃផងដែរ» ៕ ប្រភព ៖ beartai BRIEF

ប្រទេសថៃ ៖ អស់រយៈពេលជាច្រើនឆ្នាំកន្លងមកនេះ កសិករជាច្រើនគ្រួសាររស់នៅឃុំម៉ាយឃេត ស្រុកមឿង ខេត្តប្រាជីនបុរី ប្រទេសថៃ បានប្រកបមុខរបរដាំដំណាំស្អំដើម្បីចិញ្ចឹមគ្រួសារ ។ កសិករនិយាយថា ស្អំ គឺជាដំណាំងាយស្រួលដាំដុះ ដោយចំណាយពេលត្រឹមតែ៣ខែប៉ុណ្ណោះ ពួកគេអាចប្រមូលផលលក់បានពេញ១ឆ្នាំ ក្នុងនោះស្អំ១ដុំ មានទម្ងន់២ខាំ លក់ក្នុងតម្លៃ១៦បាត ។

កសិកររស់នៅក្នុងឃុំម៉ាយឃេត ស្រុកមឿង បានភ្ញាក់តាំងពីម៉ោង៥ព្រឹក ជិះម៉ូតូទៅចម្ការស្អំដើម្បីកាត់ត្រួយស្អំលក់ ។ នៅម៉ោងប្រមាណ៨ព្រឹក ពួកគេក៏បញ្ឈប់ការកាត់ត្រួយស្អំ បន្ទាប់មក ពួកគេនាំគ្នាដឹកជញ្ជូនត្រួយស្អំយកទៅផ្ទះ និងចងជាដុំៗ ក្នុងនោះស្អំ១ដុំ មានទម្ងន់២ខាំ ។ ក្រោយពីបានចងត្រួយស្អំជាដុំៗហើយ ពួកគេក៏យកវាទៅត្រាំទឹក ដើម្បីឱ្យត្រួយស្អំនៅស្រស់ និងមានរសជាតិឆ្ងាញ់ មុនពេលអាជីវករមកទទួលទិញដល់កន្លែង និងយកទៅលក់បន្តនៅផ្សារ ។

អ្នកនាង វ៉ារុនី ចមខាវ៉ាន់ អាយុ៣៧ឆ្នាំ និយាយថា គ្រួសារនាងបានដាំស្អំលក់តាំងពីជំនាន់ម្តាយនាងមកម៉្លេះ ។ កាលពីដើមឡើយ នាងប្រកបមុខរបរធ្វើស្រែ ប៉ុន្តែបច្ចុប្បន្ន នាងបានបែងចែកដីស្រែខ្លះមកដាំស្អំវិញ ដោយសារការធ្វើស្រែមិនអាចផ្គត់ផ្គង់ជីវភាពគ្រួសារបានគ្រប់គ្រាន់ទេ ។ ដូច្នេះ គ្រួសារនាងក៏ងាកមកប្រកបមុខរបរដាំស្អំជាចម្បង ព្រោះអាចចិញ្ចឹមគ្រួសារបានស្រួល ។

ចំពោះការដាំដុះ អ្នកនាង វ៉ារុនី ប្រាប់ថា ស្អំ គឺជាដំណាំងាយស្រួលដាំដុះ និងគ្មានដង្កូវយាយីទេ ។ ជំហានដំបូង ត្រូវត្រៀមដីសម្រាប់ដាំ និងជីករណ្តៅឱ្យល្មមនឹងមែកស្អំ បន្ទាប់មក ត្រូវយកមែកស្អំដែលបានត្រៀមទុកមកដាំក្នុងដី ។ រីឯការដាំដុះ ត្រូវដាំវាជាជួរ ហើយ១ជួរៗមានគម្លាតគ្នាប្រមាណ១,២០ម៉ែត្រ ។ យើងត្រូវស្រោចទឹកវារៀងរាល់៣ថ្ងៃម្តង ។

អ្នកនាងបន្តថា នៅពេលស្អំដាំបានរយៈពេល៣ខែឃើញថា មែករបស់វាចាប់ផ្តើមធំលូតលាស់ជាដើមស្អំ ហើយយើងអាចកាត់ត្រួយវាលក់បាន ។ ក្រោយពីបានកាត់ត្រួយវារយៈពេល៣ថ្ងៃ វានឹងបែកមែកថ្មីទៀត ហើយយើងអាចកាត់ត្រួយវាលក់បន្តទៀត ។ យើងធ្វើបែបនេះជារឿយៗ រហូតដល់ដើមស្អំចាស់មានកម្ពស់ប្រមាណ១ម៉ែត្រ ទើបយើងផ្សំាមែករបស់វា ។ ដូច្នេះ ត្រូវចំណាយពេលប្រមាណ១ខែ ទើបមែកដែលយើងផ្សាំនោះដុះឫស ។

អ្នកនាងបន្ថែមថា កសិករនឹងកាត់ត្រួយស្អំជារៀងរាល់ថ្ងៃ រួចហើយយកវាមកថ្លឹង និងចងវាជាដុំៗទុកលក់តាមការកុម្ម៉ង់ទិញ ។ ក្នុង១ថ្ងៃ នាងអាចបេះស្អំបានប្រមាណ១៥០ដុំ និងលក់ក្នុងតម្លៃ១៦បាតសម្រាប់ស្អំ១ដុំ ហើយតម្លៃរបស់វានឹងឡើងចុះតាមរដូវកាល ។ ក្រៅពីការលក់ត្រួយស្អំហើយ ចម្ការរបស់នាងក៏មានផ្សាំមែកស្អំលក់ផងដែរ ៕ ប្រភព ៖ Thairath

ជាការពិតណាស់ សម្រាប់អ្នកស្រលាញ់ការផ្សងព្រេងប្រាកដជាមានបានកត់សម្គាល់នូវកោះដ៏ស្រស់ស្អាតបំផុតនៅលើពិភពលោក ដែលពួកគេចង់ទៅទស្សនានៅថ្ងៃណាមួយមិនខាន។ ប៉ុន្តែនៅពីក្រោយទេសភាពដ៏ស្រស់ស្អាត និងបរិស្ថានដ៏ស្ងប់ស្ងាត់ទាំងនោះ ក៏មាននូវគ្រោះថ្នាក់ជាច្រើនអាចបង្កប់នៅជាមួយ ខណៈជាកន្លែងដែលសត្វពស់សាហាវៗរស់នៅ ឧស្ម័នពុលនៅលើអាកាស ជំងឺឆ្លងរាតត្បាត ការហាយប្រហារដោយក្រពើដ៏ព្រៃផ្សៃ និងភាពរន្ធត់ព្រឺព្រួចផ្សេងៗនៃធម្មជាតិ ដែលនាំឲ្យអ្នកប្រាកដជាមិនចង់ត្រូវបានទឹកនាំទៅច្រាំង ឬជាប់គាំងនៅលើកោះដ៏គ្រោះថ្នាក់ទាំងនេះទេ។ ដូច្នេះហើយខាងក្រោមនេះ គឺជាកោះលស់ព្រលឹងទាំង៨លើសកលលោក ទោះឲ្យ១លានដុល្លារក៏មិនព្រមទៅដែរ៖

១ កោះពស់ នៃប្រទេសប្រេស៊ីល៖ កោះ Ilha fa Queimada គឺគេស្គាល់ថាជាកោះពស់ ព្រោះនៅទីនោះមានប្រមូលផ្តុំពស់ពិសរាប់ម៉ឺនប្រភេទនៅទីនោះ។ ម៉្យាងវិញទៀត អ្នកត្រូវបានពស់ដែលនៅលើកោះនោះចឹក អាចស្លាប់ភ្លាមៗនៅក្នុងរយៈពេលត្រឹមតែ១ម៉ោង និងអាចធ្វើឲ្យសាច់មនុស្សរលាយភ្លាមៗនៅក្នុងរយៈពេលដ៏ខ្លី។ ដោយសារតែកោះមួយនេះ វាគ្រោះថ្នាក់ខ្លាំងដូច្នេះហើយបានជា វាត្រូវបានគេបិទចោលមិនឲ្យសាធារណៈជនចូលទៅលេងជាដាច់ខាត។

២ កោះខ្មោច Poveglia ៖ ស្ថិតនៅភាគខាងជើងនៃប្រទេសអ៊ីតាលី វាត្រូវបានគេស្គាល់ថាជា កោះខ្មោចលងសាហាវជាងគេបំផុតលើសកលលោក។ ដោយមានរឿងដំណាលថា កាលពីដើមឡើយ គេបានយកកោះនេះធ្វើជាកន្លែងដាច់ដោយឡែកសម្រាប់ផ្ទុកអ្នកជំងឺដែលមានជំងឺប៉េស្តជ្រូក ខណៈមនុស្សជាច្រើននាក់បានស្លាប់នៅទីនោះ។ ម៉្យាងវិញ កោះនេះក៏ធ្លាប់ធ្វើជាមន្ទីរពេទ្យសម្រាប់ដាក់អ្នកជំងឺផ្លូវចិត្តផងដែរ ហើយក៏មានរឿងអាក្រក់ៗកើតទៅលើគ្រូពេទ្យនៅទីនោះផងដែរ។ បន្ទាប់មកទៀតក៏មានបិទមន្ទីរពេទ្យនេះចោល រហូតធ្វើឲ្យកោះនេះទំនេររហូតមកដល់បច្ចុប្បន្ននេះ។

៣ កោះ Andaman នៃប្រទេសឥណ្ឌា៖ គឺជាកោះជនជាតិដើមភាគតិចរបស់ឥណ្ឌា ដែលមិនព្រមបើកទទួលយកនរណាម្នាក់ដែលរស់កន្លែងផ្សេង ក្រៅពីក្រុមខ្លួនសោះឡើយក្នុងរយៈពេល ៦០ ០០០ឆ្នាំចុងក្រោយមកនេះ។ កាលពីឆ្នាំ២០០៦ ក៏ធ្លាប់អ្នកនេសាទ២នាក់វង្វេងទៅដល់ទីនោះផងដែរ ប៉ុន្តែមិនអាចយកជីវិតត្រឡប់មកវិញបានទេ ព្រោះជនជាតិភាគតិចនៅទីនោះការពារភូមិរបស់គេណាស់ និងមិនឲ្យនរណាចូលបានទេ ព្រមទាំងអនុវត្តច្បាប់ព្រៃរបស់ពួកគេ ។ ទីបំផុតបុរសនេសាទក៏ត្រូវបានសម្លាប់ដោយលំពែង និងធ្នូរបស់ក្រុមជនជាតិនោះផងដែរ។

៤ កោះ Ramree ប្រទេសមីយ៉ាន់ម៉ា៖ កោះនេះជាជម្រករបស់សត្វក្រពា ឬហៅថាក្រពើទឹកប្រៃ ដែលមានចំនួនច្រើនជាងគេបំផុតលើសកលលោក។ យោងទៅតាមកំណត់ត្រាហ្គឺណេសបានកត់ត្រាពីមហន្តរាយដ៏ធំពីសត្វក្រពើលើកោះនេះបានឲ្យដឹងថា ក្នុងប្រវត្តិសាស្រ្តបន្ទាប់ពីសង្គ្រាមលោកលើកទី២ត្រូវបានបញ្ចប់ មានទាហានជប៉ុនរាប់រយនាក់បានរស់រានមានជីវិតបន្ទាប់ពីសមរភូមិ តែជាអកុសលក៏បានឡើងមកលើកោះនេះ ត្រូវបានក្រពើស៊ីស្លាប់យ៉ាងអណោចអធមទាំងអស់គ្មានសល់។

៥ កោះ Marshall ៖ ជាកោះស្ថិតនៅក្នុងមហាសមុទ្រប៉ាស៊ីហ្វិក ក៏ដូចជាបានចុះបញ្ជីបេតិកភណ្ឌពិភពលោករួចរាល់ហើយដែរ។ ប៉ុន្តែនៅចន្លោះឆ្នាំ១៩៤៦ ដល់១៩៥៨ គឺបានមានការសាកល្បងបាញ់បង្ហោះនុយក្លេអ៊ែរកម្រិតធ្ងន់របស់សហរដ្ឋអាមេរិករហូតដល់២៣ដង។ ឥទ្ធិពលរបស់នុយក្លេអ៊ែរបានបំផ្លាញបរិស្ថាននៅកោះនោះយ៉ាងធ្ងន់ធ្ងរបំផុត ខណៈវាបានបំភាយវិទ្យុសកម្ម ធ្វើឲ្យប្រជាពលនៅតំបន់នោះឆ្លងជំងឺរាតត្បាតពេញផ្ទៃកោះ។ មិនត្រឹមតែប៉ុណ្ណោះ វាក៏ប៉ះពាល់ដល់ដំណាំកសិកម្ម និងសត្វពាហនៈគ្រប់ប្រភេទ ងាប់យ៉ាងរណូករនាលគ្មានសល់។ លើសពីនេះទៅទៀត កោះនេះក៏ជាជម្រករបស់ត្រីឆ្លាតដ៏គ្រោះថ្នាក់ផងដែរ។

៦ កោះ Saba នៃប្រទេសហូឡង់៖ កោះដ៏តូចមួយនេះត្រូវបានគេស្គាល់ថា ជាកោះរបស់«ម្ចាស់ក្សត្រីគ្មានការរើសអើង»។ អ្នកដែលបានទៅទស្សនានៅទីនោះ ប្រាកដជាបានឃើញភាពស្រស់ស្អាតនៃប្រព័ន្ធអេកូឡូស៊ីចម្រុះ ក៏ដូចជាការមុចទឹក និងឡើងភ្នំជាដើម។ ប៉ុន្តែយ៉ាងណាមិញ កោះនេះគឺជាកោះគ្រោះថ្នាក់បំផុត និងកើតមានខ្យល់ព្យុះសង្ឃរាជាញឹកញយ ជាងកោះណាៗទាំងអស់លើសកលលោក។

៧ កោះ Miyaka Jima ប្រទេសជប៉ុន៖ ជាកោះដែលសម្បូរទៅដោយបន្ទុះភ្នំភ្លើងលើសកលលោក។ សម្រស់ធម្មជាតិនេះតែងតែត្រូវបានគំរាមកំហែងពីកំអែរភ្នំភ្លើងដ៏ក្តៅគគុក។ ម៉្យាងវិញទៀត ការដែលផ្ទុះភ្នំភ្លើងជាប់ៗគ្នាច្រើនដងពេក បានបង្កើតឲ្យមានចំហាយស្ពាន់ធ័រពុលនៅលើកោះ ដែលបណ្តាលឲ្យខ្យល់នៅកោះនោះពុលតាមដែរ។ ដូច្នេះ ប្រសិនបើអ្នកទៅលេងនៅកោះនោះ អ្នកត្រូវធ្វើការពាក់របាំងឧស្ម័នគ្រប់ពេលវេលាដើម្បីការពារ។

៨ កោះ Reunion ៖ ស្ថិតនៅមហាសមុទ្រឥណ្ឌាភាគខាងកើត ជាកន្លែងនៃធម្មជាតិចម្រុះដ៏ស្រស់ស្អាតអស្ចារ្យ។ កោះនេះជាជម្រកសត្វស្លាបគ្រប់ប្រភេទ ព្រមទាំងសត្វសមុទ្រយ៉ាងសម្បូរបែប។ ទោះជាយ៉ាងណាក៏ដោយ ក៏ត្រូវបានគេស្គាល់ថាជាកោះដែលគ្រោះថ្នាក់ព្រោះវាជាជម្រកត្រីបាឡែន ត្រីឆ្លាមយក្សគ្រប់ប្រភេទ។ នៅចន្លោះឆ្នាំ២០១០និង២០១៧ ដោយសារមានការវាយប្រហាររបស់ត្រីឆ្លាមមកលើច្រាំងបានសម្លាប់អ្នកទេសចរណ៍អស់ចំនួន៩នាក់ផងដែរ៕