ដើមឆ្នាំថ្មី តារាចម្រៀង សុវត្ថិឌី ធារីកា និង កែវ សុបញ្ញា កៅឆាយចូលរោងការមុនគេ

ក្នុងខែមករា ឆ្នាំ២០២៤ ដើមឆ្នាំថ្មីនេះតារាចម្រៀងពីររូបរួមមានកញ្ញា សុវត្ថិឌី ធារីកា តារាចម្រៀងក្នុងទ្រនំថោន និងកញ្ញា កែវ សុបញ្ញា តារាចម្រៀងក្នុងទ្រនំរស្មីហង្សមាសនឹងចូលរោងជ័យហើយ។

តារាចម្រៀង កែវ សុបញ្ញា ម្ចាស់បទ «ពេលមួយដែលគ្មានខ្ញុំ» និងជាអតីតបេក្ខភាព The Voice Cambodia រដូវកាលទី១ និងគូស្នេហ៍បានភ្ជាប់ពាក្យជាមួយគ្នាតាមប្រពៃណីកាលពីថ្ងៃ១០ ខែកក្កដា ឆ្នាំ២០២១ ។ ក្រោយពីភ្ជាប់ពាក្យអស់រយៈពេលជាង២ឆ្នាំតារាចម្រៀងរូបនេះនិងគូដណ្តឹងជាអ្នកក្រៅរង្វង់សិល្បៈត្រៀមចូលរោងការនាថ្ងៃទី១៣ ខែមករា ឆ្នាំ២០២៤ នេះដោយបានអញ្ជើញតារាល្បីៗជាច្រើនរូបចូលរួមធ្វើសាក្សីថ្ងៃមង្គលអ្នកទាំងពីរ។

ងាកមកកាន់តារាចម្រៀង សុវត្ថិឌី ធារីកា វិញអ្នកគាំទ្រមួយចំនួនធំបង្ហាញការភ្ញាក់ផ្អើលមិនតិចនោះទេបន្ទាប់ពីដឹងដំណឹងថាតារាចម្រៀងរូបនេះនឹងរៀបអាពាហ៍ពិពាហ៍ថ្ងៃទី២៦ ខែមករា ឆ្នាំ២០២៤។ ការដែលអ្នកគាំទ្របង្ហាញការភ្ញាក់ផ្អើលនេះដោយសារតែនៅលើបណ្តាញសង្គមរបស់ ធារីកា មិនដែលបញ្ចេញថាខ្លួនមានទំនាក់ទំនងជាមួយនរណាឡើយ ប៉ុន្តែស្រាប់តែជិតដល់ថ្ងៃ នាងដើរចែកធៀបការតែម្តង។ បើតាមឈ្មោះនៅក្នុងធៀបអញ្ជើញអនាគតស្វាមីរបស់ តារាចម្រៀងរូបនេះមានឈ្មោះថា សូផានិត ។

ទន្ទឹមនឹងដំណឹងតារាចម្រៀងតូចច្រឡឹង ធារីកា ចូលរោងការនេះដែរអ្នកគាំទ្រក៏សម្តែងក្តីត្រេកអរជំនួសនាង និងជូនពរឱ្យនាងជួបសុភមង្គលក្នុងជីវិតមានស្វាមីជាខ្នងបង្អែកបន្ទាប់ពីកំព្រាឪពុកម្តាយត្រូវមើលថែជីដូន និងប្អូនប្រុសអស់រយៈពេលជាង១ឆ្នាំមកនេះ។
ពិធីមង្គលជ័យនៅក្នុងខែមករានេះ តារាចម្រៀង២រូបហើយត្រៀមធ្វើជាកូនក្រមុំនិងកសាងជីវិតគ្រួសារ ខណៈនៅមានអ្នកសិល្បៈផ្សេងទៀតក៏ត្រៀមបញ្ចប់ភាពនៅលីវក្នុងឆ្នាំ២០២៤ នេះដូចគ្នា៕