ប្រទេសថៃ ៖ កងទ័ពភូមិភាគទី២ថៃ បានហាមពលរដ្ឋជាថ្មីកាលពីថ្ងៃទី៤ ខែមករា ឆ្នាំ២០២៦ ឱ្យឈប់ផ្សព្វផ្សាយ ឬចែកចាយរូបភាព និងវីដេអូពីសកម្មភាពកងទ័ពថៃប្ល.ន់ដណ្តើមទ្រព្យសម្បត្តិលរដ្ឋកម្ពុជា នៅទីតាំងមួយចំនួនរបស់កម្ពុជាដែលកងទ័ពថៃកំពុងកាន់កាប់ដោយខុសច្បាប់ ។ កងទ័ពថៃបញ្ជាក់ថា ការបង្ហោះរូបភាព ឬវីដេអូពីសកម្មភាពដណ្តើមទ្រព្យសម្បត្តិពលរដ្ឋកម្ពុជា និងពាក្យសម្តីចំអកឡកឡឺយមួយចំនួនក្នុងបណ្តាញសង្គម គឺកម្ពុជាអាចប្រមូលធ្វើជាភស្តុតាងតវ៉ាតាមផ្លូវច្បាប់ ។

ក្រោយកម្ពុជា-ថៃអនុវត្តបទឈប់បាញ់ នៅតាមបណ្តាញសង្គមថៃបានចែកចាយរូបភាពកងទ័ពថៃប្លន់របស់របរមានតម្លៃរបស់ពលរដ្ឋកម្ពុជា និងដណ្តើមទ្រព្យសម្បត្តិជាច្រើនទៀត ដូចជា ៖ ម៉ូតូ រ៉ឺម៉ក និងសម្ភារៈប្រើប្រាស់ទូទៅ ហើយពលរដ្ឋថៃបានចូលរួមអបអរជាមួយកងទ័ពរបស់ខ្លួនដែលបានប្លន់ទ្រព្យសម្បត្តិពលរដ្ឋកម្ពុជាទៀតផង ។ ការចែកចាយរូបភាពទាំងនេះបានល្បីល្បាញដល់ពិភពលោក និងធ្វើឱ្យពិភពលោកកាន់តែឃើញច្បាស់ពីថៃឈ្លានពានទឹកដីកម្ពុជាយ៉ាងកំរោល និងប្រមូលទ្រព្យសម្បត្តិពលរដ្ឋកម្ពុជាដោយឥតខ្មាស់អៀន ។

កាលពីថ្ងៃទី៤ ខែមករា កងទ័ពភូមិភាគទី២ថៃ បានហាមពលរដ្ឋចែកចាយរូបភាព វីដេអូ និងខ្លឹមសារពាក់ព័ន្ធនឹងកងទ័ពថៃធ្វើសកម្មភាពប្លន់ទ្រព្យសម្បត្តិពលរដ្ឋកម្ពុជា ពីព្រោះកម្ពុជាអាចប្រមូលធ្វើជាភស្តុតាងតវ៉ាតាមផ្លូវច្បាប់ ។ ក្រៅពីនេះ កងទ័ពថៃក៏បានប្រាប់ឱ្យអ្នកលេងបណ្តាញសង្គមប្រុងប្រយ័ត្នក្នុងការចែកចាយរូបភាព និងវីដេអូការប្លន់របស់កងទ័ពថៃ ។

កងទ័ពភូមិភាគ២ បញ្ជាក់ថា ការមិនចែកចាយរូបភាព និងវីដេអូសកម្មភាពឈ្លានពាន, ការមិននិយាយចំអក និងមិនបង្កើនការស្អប់ខ្ពើម គឺជាផ្នែកមួយជួយឱ្យកងទ័ពថៃអាចកាន់កាប់ទឹកដីកម្ពុជានៅតាមព្រំដែនក្រោមរូបភាពការពារអធិបតេយ្យ ។ បច្ចុប្បន្ន ស្ថានការណ៍ឈានដល់ការចរចា និងអនុវត្តតាមច្បាប់អន្តរជាតិ ដូច្នេះ ពលរដ្ឋគ្រប់រូបត្រូវបង្កើនការប្រុងប្រយ័ត្ន ជាពិសេស ហាមផ្សព្វផ្សាយ និងចែកចាយរូបភាព-វីដេអូសកម្មភាពកងទ័ពថៃ រួមមាន ៖ ការដណ្តើមទ្រព្យសម្បត្តិពលរដ្ឋកម្ពុជា មានទាំងម៉ូតូ ប្រាក់ និងរបស់មានតម្លៃ ។

ក្រៅពីនេះ ហាមផ្សព្វផ្សាយខ្លឹមសារចំអកធ្វើឱ្យប៉ះពាល់ដល់កងទ័ព និងពលរដ្ឋកម្ពុជា ពីព្រោះខ្លឹមសារទាំងនេះអាចត្រូវកម្ពុជាប្រមូលធ្វើជាភស្តុតាងប្តឹងទៅអន្តរជាតិ ហើយអន្តរជាតិនឹងដឹងថា ថៃធ្វើខុសគោលការណ៍មនុស្សធម៌ និងរំលោភច្បាប់អន្តរជាតិ ។ វានឹងធ្វើឱ្យពលរដ្ឋប្រទេសទាំងពីរស្អប់ខ្ពើមគ្នាដោយសារការផ្លែផ្កាក្នុងបណ្តាញសង្គម ពីព្រោះអ្វីដែលបណ្តាញសង្គមថៃផ្សព្វផ្សាយ និងការទាក់ទងទាំងអស់អាចត្រូវកម្ពុជាប្រើប្រាស់សម្រាប់តវ៉ានៅថ្ងៃខាងមុខ ។ ថៃមានប្រៀប លុះត្រាតែពលរដ្ឋរក្សាភាពស្ងាត់ស្ងៀម មិនចែកចាយរូបភាពឈ្លានពាន ត្រូវគិតពីសុវត្ថិភាព និងផលប៉ះពាល់ជាចម្បង ។

គួរបញ្ជាក់ថា កងទ័ពថៃបានបើកការវាយប្រ.ហារឈ្លានពានអធិបតេយ្យកម្ពុជាជាថ្មីកាលពីថ្ងៃទី៧ ខែធ្នូ ដោយប្រើប្រាស់សព្វាវុ.ធធុនធ្ងន់គ្រប់ប្រភេទ និងយន្តហោះចម្បាំង F-16 ទម្លាក់គ្រាប់បែកលើទីតាំងស៊ីវិល និងហេដ្ឋារចនាសម្ព័ន្ធរបស់កម្ពុជាជាច្រើនកន្លែង រួមមាន វត្តអារ៉ាម ប្រាសាទបុរាណ សាលារៀន មន្ទីរពេទ្យ និងទីប្រជុំជន បណ្តាលឱ្យពលរដ្ឋកម្ពុជាបាត់បង់ជីវិត និងរងរបួសជាច្រើននាក់ ។ នាវេលាម៉ោង១២និង០០នាទីថ្ងៃត្រង់ ថ្ងៃទី២៧ ខែធ្នូ ឆ្នាំ២០២៥ កម្ពុជា និងថៃ បានព្រមព្រៀងអនុវត្តបទឈប់បា.ញ់ បន្ទាប់ពីបញ្ចប់កិច្ចប្រជុំក្រុមលេខាធិការគណៈកម្មាធិការព្រំដែនទូទៅកម្ពុជា-ថៃ (GBC) និងកិច្ចប្រជុំពិសេសលើកទី៣ គណៈកម្មាធិការព្រំដែនទូទៅកម្ពុជា-ថៃ (GBC) ។

ពេលប្រតិបត្តិការទ្រង់ទ្រាយធំចាប់ពីថ្ងៃទី៧ ដល់ថ្ងៃទី២៧ ខែធ្នូ ឆ្នាំ២០២៥ កងទ័ពថៃបានបើកប្រតិបត្តិការវាយលុកដែលគិតទុកជាមុន និងជាប្រព័ន្ធ លើទីតាំងជាច្រើនតាមបណ្តោយព្រំដែនដែលមានការទទួលស្គាល់ជាអន្តរជាតិ ដោយវាយសំរុកចូលទន្ទ្រាន កាន់កាប់ និងឈរជើង គ្រប់គ្រងលើតំបន់នានាដែលស្ថិតនៅខេត្តចំនួន៤ ក្នុងទឹកដីកម្ពុជា រួមមាន ៖ បន្ទាយមានជ័យ ពោធិ៍សាត់ ព្រះវិហារ និងឧត្តរមានជ័យ ។

កម្ពុជាសង្ឃឹមថា សហគមន៍អន្តរជាតិនឹងជួយជំរុញប្រទេសថៃឱ្យដោះស្រាយជម្លោះព្រំដែនស្របតាមច្បាប់អន្តរជាតិ និងកាតព្វកិច្ចរបស់ខ្លួន ក្រោមសន្ធិសញ្ញា និងកិច្ចព្រមព្រៀងដែលមានស្រាប់ ។ ជាមួយគ្នានេះ រាជរដ្ឋាភិបាលកម្ពុជាបានបញ្ជាក់ជាថ្មីនូវការប្តេជ្ញាចិត្តយ៉ាងខ្ជាប់ខ្ជួន ឥតងាករេ ចំពោះការស្វែងរកដំណោះស្រាយដោយសន្តិវិធីស្របតាមច្បាប់អន្តរជាតិ ដោយប្តេជ្ញាចិត្តប្រកាន់ជំហរជាគោលការណ៍ថា ខ្សែព្រំដែនមិនត្រូវបានផ្លាស់ប្តូរតាមរយៈការប្រើប្រាស់កម្លាំងឡើយ ៕

តារាចម្រៀង ទេព បូព្រឹក្ស បានសម្តែងការខកចិត្តសោកស្តាយដែលកម្មវិធីរបស់នាងត្រៀមរៀបចំនាពេលខាងមុខបង្ហាញពីវប្បធម៌ខ្មែរក្រោមចំណងជើងថា «ខ្លឹមនៃព្រះនគរ» ហាក់ពុំសូវទទួលបានការគាំទ្រច្រើនដូចជាកម្មវិធីប្រគំតន្រ្តីរបស់នាងនាពេលកន្លងមក។ ឃើញការទិញសំបុត្រពុំសូវផុសផុលតារាចម្រៀង ពេជ្រ សូលីកា បានជួយទិញសំបុត្ររបស់ ទេព បូព្រឹក្ស ដែលជាមិត្តសម្លាញ់ចំនួន២០០០ដុល្លារ។

កាលពីយប់ថ្ងៃទី៤ ខែមករា ឆ្នាំ២០២៦ តារាចម្រៀង ទេព បូព្រឹក្ស បានបង្ហោះសំណេរមួយថា «TBP FAN PARTYលក់សំបុត្រ៣ថ្ងៃបាន១៥០០សំបុត្រតែកម្មវិធីវប្បធម៌ដែលខ្ញុំធ្វើថ្ងៃ១១នេះសំបុត្រ២ថ្ងៃលក់បានតែ៣០០»។ ក្នុងការបង្ហោះនេះតារាចម្រៀងរូបនេះបានបញ្ជាក់ថាការដែលនាងរៀបចំកម្មវិធីនេះឡើងគឺដោយសារតែភាពឈឺចាប់ដែលប្រាសាទខ្មែរបែកបាក់ ដែលបេះដូងនាងឈឺជាប់គ្មានថ្ងៃភ្លេច។

ទេព បូព្រឹក្ស បានសរសេរបញ្ជាក់ទៀតថាខ្មែរបានរងភាពអយុត្តិធម៌ដែលចោរសៀមធ្វើបាបយើង ហើយជនជាតិនេះស្រលាញ់ណាស់នៅវប្បធម៌ដ៏ផូផង់របស់ខ្មែរហើយនាងពិតជាខ្លាចចោរវាលួចទៀតណាស់។ ជាមួយគ្នានេះ ទេព បូព្រឹក្ស បានបញ្ជាក់ថាកម្មវិធីនាងទាំងមូលទទួលបាន sponsor រួចមកហើយ ប៉ុន្តែការលក់សំបុត្រដោយសារតែចង់បានថវិកាខ្លះយកជូនវីរកងទ័ពខណៈនាងក៏បន្ថែមថវិការបស់ខ្លួន៥០០០ដុល្លារ។

ម្ចាស់បទ «ទេវរាជ» ថាដល់ពេលហើយដែលប្រជាពលរដ្ឋរួមគ្នាផ្សព្វផ្សាយនៅវប្បធម៌ខ្មែរទាំងអស់គ្នាមិនអាចភ្លេចត្រចៀកបានទេ ចោរកៀនៗហ្នឹងចាំតែលួច ហើយនាងម្នាក់ឯងមិនអាចទៅរួចទេទាល់តែយើងរួមគ្នាជួយផ្សព្វផ្សាយ។

បន្ទាប់ពីបង្ហោះសំណេរចំនួនការទិញសំបុត្របង្ហាញពីវប្បធម៌ខ្មែរខុសគ្នាដាច់ពីការប្រគំតន្រ្តីសម័យបែបនេះតារាចម្រៀង ពេជ្រ សូលីកា ដែលជាមិត្តសម្លាញ់តារាចម្រៀង ទេព បូព្រឹក្ស ពុំនៅស្ងៀមនោះទេដោយនាងបានជួយទិញសំបុត្រទស្សនីយភាព «ខ្លឹមនៃព្រះនគរ» ចំនួន២០០០ដុល្លារ។ សំបុត្រដែល ទេព បូព្រឹក្ស បានដាក់លក់សម្រាប់កម្មវិធីនាថ្ងៃទី១១ ខែមករា ឆ្នាំ២០២៦ មានចំនួន៣ប្រភេទ គឺតម្លៃ ៥ដុល្លារ ១៥ដុល្លារ និង ៥០ដុល្លារ៕

បើទោះជាសង្រ្គា.មត្រូវបានបញ្ចប់ទៅហើយក្ដី ប៉ុន្តែគិតត្រឹមថ្ងៃទី៤ ខែមករា ឆ្នាំ២០២៦ នៅមានប្រជាពលរដ្ឋភៀសសឹកកម្ពុជាប្រមាណជាង ១០០០ គ្រួសារទៀត ត្រូវបានជាប់គាំងមិនអាចវិលត្រឡប់ទៅកាន់លំនៅឋានរបស់ខ្លួនវិញបាន ដោយសារយោធាថៃបានដាក់ពង្រាយទូរកុងតឺន័រ និងលួសបន្លា ដើម្បីធ្វើការខណ្ឌសីមានិងបិទផ្លូវមិនឱ្យមានការចេញ-ចូលដោយឯកតោភាគី។

យោងតាមអាជ្ញាធរដែនដី បានឱ្យដឹងថា មានប្រជាពលរដ្ឋភៀសសឹក ប្រមាណជាង ១ ០០០គ្រួសារ នៅភូមិព្រៃចាន់ និងភូមិជោគជ័យ នៃស្រុកអូរជ្រៅ ខេត្តបន្ទាយមានជ័យ កំពុងស្នាក់នៅមណ្ឌលសុវត្ថិភាព ដោយមិនអាចទៅកាន់លំនៅឋានវិញបាន មូលហេតុគឺដោយសារទាហានថៃដាក់ទូរកុងតឺន័រ និងលួសបន្លា បិទផ្លូវមិនឱ្យចូលភូមិ និងផ្នែកខ្លះនៃភូមិទាំងពីររងការខូចខាតស្ទើរទាំងស្រុង ពីការទម្លាក់គ្រាប់បែក និងការបាញ់ផ្លោងកាលពីពេលកន្លងទៅ។

មិនត្រឹមតែបានឈ្លានពានទឹកដី និងកាន់កាប់ផ្ទះសម្បែងរបស់ប្រជាពលរដ្ឋខ្មែរនៅខេត្តឧត្តរមានជ័យ តាមតចិត្តប៉ុណ្ណោះទេ នៅខេត្តពោធិ៍សាត់ឯណោះវិញ កម្លាំងយោធាថៃបានចូលកាត់សោ គាស់ផ្ទះប្រជាពលរដ្ឋ ក្នុងភូមិសង្គមថ្មី រួចប្រមូលសម្ភារមានតម្លៃពីផ្ទះចំនួន៨ខ្នង ម៉ូតូ៤គ្រឿង និងរ៉ឺម៉កដឹកសំរាមរបស់ភូមិ២គ្រឿង យកទៅជិះនិងថតបង្ហោះពីសកម្មភាពឈ្លានពានរបស់ខ្លួនយ៉ាងអាណាធិបតេយ្យនៅលើបណ្ដាញសង្គម។

គួរជម្រាបថា ការកាន់កាប់ទឹកដីកម្ពុជាដោយកងទ័ពថៃក្រោយបទឈប់បាញ់ ហើយបន្ទាប់មកវាយ កម្ទេចផ្ទះសម្បែងរបស់ប្រជាជន និងហេដ្ឋារចនាសម្ព័ន្ធស៊ីវិលឯទៀតរបស់កម្ពុជា ដោយបន្តបិទសិទ្ធិ របស់ជនស៊ីវិលភៀសសឹកកម្ពុជាជាច្រើន មិនឱ្យវិលត្រឡប់ទៅលំនៅដ្ឋានរបស់គេវិញបាននៅពេលនេះ គឺជាការរំលោ.ភយ៉ាងជាក់ច្បាស់ចំពោះគោលការណ៍ជាមូលដ្ឋាននៃច្បាប់អន្តរជាតិ ក៏ដូចជាច្បាប់មនុស្សធម៌ និងច្បាប់សិទ្ធិមនុស្សអន្តរជាតិ ។

អាស្រ័យហេតុនេះ កម្ពុជាសង្ឃឹមថា សហគមន៍អន្តរជាតិនឹងជួយជំរុញប្រទេសថៃឱ្យដោះស្រាយជម្លោះព្រំដែនស្របតាមច្បាប់អន្តរជាតិ និងកាតព្វកិច្ចរបស់ខ្លួន ក្រោមសន្ធិសញ្ញានិងកិច្ចព្រមព្រៀងដែលមានស្រាប់។ ជាមួយគ្នានេះដែរ រាជរដ្ឋាភិបាលកម្ពុជាក៏បានបញ្ជាក់ជាថ្មីនូវការប្តេជ្ញាចិត្តយ៉ាងខ្ជាប់ខ្ជួន ដោយឥតងាករេ ចំពោះការស្វែងរកដំណោះស្រាយដោយសន្តិវិធីស្របតាមច្បាប់អន្តរជាតិ ដោយប្តេជ្ញាចិត្តជា ដាច់ខាតចំពោះការប្រកាន់ជំហរជាគោលការណ៍ថា ខ្សែព្រំដែនមិនត្រូវបានផ្លាស់ប្តូរតាមរយៈការប្រើប្រាស់កម្លាំងនោះឡើយ៕

យោងតាមប្រសាសន៍របស់ ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន៖ ការផ្សាយ ឬចែករំលែកព័ត៌មាន ឬរូបភាពសា.កស.ពក្នុងសមរភូមិ ជាការអនុវត្តផ្ទុយពីសេចក្តីណែនាំរបស់ក្រសួងព័ត៌មានស្តីពីការផ្សព្វផ្សាយនិងចែករំលែកព័ត៌មានលើបណ្តាញសង្គមដោយទំនួលខុសត្រូវ ហើយជាទង្វើប៉ះពាល់ដល់កិត្តិយស សេចក្តីថ្លៃថ្នូរ និងមិនលើកគុណតម្លៃដល់កងទ័ព មិនគោរពដល់ក្រុមគ្រួសារនៃយុទ្ធជនពលីជីវិត និងការបូជាសម្រាប់បុព្វហេតុការពារជាតិ។

ទន្ទឹមនេះការផ្សាយ ឬចែករំលែករូបភាពស.ពដោយគ្មានការបិទបាំង ឬព្រិលលើរូបភាព ជាទង្វើប្រាសចាកក្រមសីលធម៌ រំលោ.ភសិទ្ធិឯកជនភាព និងសេចក្តីថ្លៃថ្នូររបស់មនុស្ស និងប៉ះពាល់ខ្លាំងដល់អារម្មណ៍សាធារណៈ។ ក្នុងនោះដែរ មួយចំនួនតូច ក៏មានការចែករំលែកតៗគ្នានូវរូបភាពស្រដៀងគ្នាដែលមានប្រភពពីគណនីក្លែងក្លាយក្រៅប្រទេស ដែលគេធ្វើឡើងក្នុងគោលបំណងអាក្រក់ផ្នែកចិត្តសាស្ត្រ បង្កឱ្យមានកំហឹងឡើង ប៉ះពាល់ដល់ការគ្រប់គ្រងស្ថានការណ៍បច្ចុប្បន្ន និងតទៅមុខ។

ជាងនេះទៀត ការផ្សាយ ឬចែកចាយរូបភាពដូចបានរៀបរាប់ អាចប្រឈមការទទួលខុសត្រូវចំពោះមុខច្បាប់ ប្រសិនបើត្រូវបានរកឃើញថាធ្វើឡើងក្នុងចេតនាទុច្ចរិត ឬធ្វើឱ្យប៉ះពាល់ដល់សន្តិសុខជាតិ សណ្តាប់ធ្នាប់សាធារណៈ និងការរក្សាស្ថិរភាពនយោបាយ។

ទន្ទឹមនេះដែរ ក្រសួងព័ត៌មានបានសង្កេតឃើញមានការផ្សាយរបស់សារព័ត៌មានមួយចំនួន ជុំវិញស្ថានភាពកងទ័ព និងភូមិសាស្ត្រនៅសមរភូមិជួរមុខ ដោយពុំបានគិតដល់ផលវិបាកចំពោះសន្តិសុខជាតិ និងក្តីអន្តរាយដែលអាចបង្កឡើងជាយថាហេតុ ប៉ះពាល់ដល់កិច្ចខិតខំរបស់រាជរដ្ឋាភិបាលក្នុងការធានាប្រសិទ្ធភាពសម្រាប់ការវិលត្រលប់ទៅរកប្រក្រតីភាពឡើងវិញ និងដំណោះស្រាយសន្តិភាពយូរអង្វែងតាមបណ្តោយព្រំដែន។ ទាំងនេះជាទង្វើបំពានការអនុវត្តសេចក្តីណែនាំរបស់ក្រសួងព័ត៌មាន និងសេចក្តីអំពាវនាវទាំងឡាយរបស់ក្រសួង ស្ថាប័នសមត្ថកិច្ច ពាក់ព័ន្ធនឹងការរាយការណ៍ និងផ្សព្វផ្សាយព័ត៌មាន ដោយក្រមសីលធម៌ និងការទទួលខុសត្រូវ។ មិនតែប៉ុណ្ណោះការអនុវត្តផ្ទុយសេចក្តីណែនាំ និងការអំពាវនាវរបស់រាជរដ្ឋាភិបាល ក៏ជះផលអវិជ្ជមានដល់កិច្ចខិតខំនានាក្នុងក្របខណ្ឌការទូត ផ្លូវច្បាប់ និងដំណើរការនៃយន្តការបច្ចេកទេសខណ្ឌសីមាទៀតផង ជាពិសេសបង្កការប៉ះពាល់ដល់ការរក្សាការកសាងទំនុកចិត្តសម្រាប់សន្តិភាពយូរអង្វែងតាមបណ្តោយព្រំដែន។

ជាថ្មីម្តងទៀត ឯកឧត្តម ទេព អស្នារិទ្ធ អំពាវនាវឱ្យបញ្ឈប់បន្ទាន់រាល់ការផ្សាយ ឬចែករំលែករូបភាពដែលប៉ះពាល់ដល់កងទ័ព និងសូមអំពាវនាវដល់អ្នកសារព័ត៌មាន អ្នកធ្វើសកម្មភាពក្នុងវិស័យព័ត៌មាននិងសោតទស្សន៍ទាំងអស់ ឱ្យចូលរួមសកម្មក្នុងការអនុវត្តតាមសេចក្តីណែនាំរបស់ក្រសួងព័ត៌មាន និងការអំពាវនាវពាក់ព័ន្ធរបស់ក្រសួង ស្ថាប័ន ដើម្បីរួមចំណែកលើកកម្ពស់សន្តិភាពជានិរន្តរ៍តាមបន្ទាត់ព្រំដែន ព្រមទាំងចូលរួមរក្សាស្ថិរភាព សណ្តាប់ធ្នាប់ និងការអភិវឌ្ឍសង្គមជាតិទាំងមូល៕