រ៉ូបូតរូបរាងមនុស្សជំនាន់ថ្មី! ចេះយល់ចិត្តនិងមានអារម្មណ៍ ស័ក្តិសមបំផុតសម្រាប់មនុស្សឯកា

ខកចិត្តរាប់អានប៉ះតែមនុស្ស Fake អាចទិញមួយគ្រឿងនេះទុកនៅផ្ទះបាន! រ៉ូបូតនេះមិនមែនត្រឹមតែមានរូបរាងដូចជាមនុស្សប៉ុណ្ណោះទេ ប៉ុន្តែត្រូវបានរចនាឡើងជាពិសេសសម្រាប់ការរស់នៅជាមួយមនុស្សបំពាក់ខួរក្បាលដើរដោយបញ្ញាសិប្បនិមិត្ត (AI) ចេះសន្ទនានិងយល់ចិត្ត ហើយអាចរកទិញបាននៅក្នុងតម្លៃក្រោម 20 ម៉ឺនដុល្លារ។

យោងតាមរបាយការណ៍ដែលបានដាក់បង្ហាញនៅលើប្រព័ន្ធផ្សព្វផ្សាយ ក្រុមហ៊ុនបច្ចេកវិទ្យា DroidUp របស់ចិន បានចាប់ផ្តើមអាជីវកម្មមនុស្សយន្តរបស់ពួកគេនៅទីក្រុងសៀងហៃ ជាមួយនឹងមនុស្សយន្តជីវសាស្រ្តជំនាន់ថ្មីដែលមានឈ្មោះថា «Moya»។ ជាមួយនឹងទឹកមុខដូចជាមនុស្ស រាងកាយស្រឡូន ចលនារស់រវើក និងសមត្ថភាពក្នុងការសន្ទនាបែបធម្មជាតិ ដែលដំណើរការដោយ AI មនុស្សយន្តនេះតំណាងឲ្យជំហានដ៏សំខាន់មួយឆ្ពោះទៅមុខក្នុងការរចនាមនុស្សយន្ត។

រ៉ូបូតនេះមានកម្ពស់ 1.65ម៉ែត្រ មានទម្ងន់ 70ផោន ឬប្រហែលជាង 30គីឡូក្រាម។ លក្ខណៈពិសេសរបស់វា គឺអ្នកអាចកែតម្រូវរូបរាងខាងក្រៅរបស់វាដូចជាការប្ដូរភេទទៅជាប្រុស ឬស្រីក៏បាន លេងស្ទាយម៉ូតសក់ និងសម្លៀកបំពាក់តាមចិត្តចង់បានគ្រប់យ៉ាង។

អ្វិដែលកាន់តែធ្វើឲ្យរ៉ូបូតនេះមានលក្ខណៈដូចជាមនុស្សខ្លាំង គឺដោយសារស្បែករបស់វាត្រូវបានផលិតឡើងពីស៊ីលីកូនកម្រិតខ្ពស់ ដែលធ្វើវាមានសភាពទន់ និងមានកម្ដៅផងដែរ។ វិស្វករបាននិយាយថា Moya ត្រូវបានរចនាឡើងដើម្បីធ្វើត្រាប់តាមកាយវិការរបស់មនុស្ស អាចមិចភ្នែកភ្លឹបភ្លែត ចេះញញឹម ងក់ក្បាល និងមានប្រព័ន្ធ AI ដ៏ទំនើបដែលអនុញ្ញាតឲ្យវាចងចាំនូវរាល់ការសន្ទនា ចេះយល់អារម្មណ៍ និងលើកដាក់សម្លេងរបស់វាអាស្រ័យលើស្ថានភាព។

ជាមួយនឹងការធ្វើបទបង្ហាញជាសាធារណកាលពីថ្មីៗនេះ ក្រុមហ៊ុន DroidUp បានបញ្ជាក់ថា រ៉ូបូតនេះត្រូវបានគេរំពឹងថានឹងចេញលក់ជាផ្លូវការនៅចុងឆ្នាំ 2026 ជាមួយតម្លៃប្រហែល 173,000 ដុល្លារ។ DroidUp បានអះអាងថា ការដាក់លក់រ៉ូបូតនេះ មានគោលបំណងផ្ដល់ការលើកទឹកចិត្តដល់មនុស្សឯកា និងមនុស្សវ័យចំណាស់ ដែលត្រូវការនរណាម្នាក់នៅក្បែរកំដរពួកគេ។

ទោះជាយ៉ាងណាក៏ដោយ អ្នកជំនាញបានព្រមានថា ខណៈពេលដែលមនុស្សយន្តបែបនេះអាចកាត់បន្ថយភាពឯកោបានពិតមែន ប៉ុន្តែវាមិនអាចយកមកជំនួសទំនាក់ទំនងរវាងមនុស្សពិតប្រាកដនោះទេ។ ជាមួយគ្នានេះ វាក៏ទទួលបានមតិចម្រុះផងដែរនៅលើប្រព័ន្ធអិនធើណេត ដោយមនុស្សមួយចំនួនចោទជាសំនួរថា តើនាគតនៃការរាប់អានគ្នានឹងទៅជាយ៉ាងណា បើបច្ចេកវិទ្យាកាន់តែរីកចម្រើនខ្លាំងឡើងៗបែបនេះ?