ប្រទេសវៀតណាម ៖ លោក Bui Thi Ngoc Hieu ជាអនុប្រធានមន្ទីរទេសចរណ៍ប្រចាំទីក្រុងហូជីមិញ ប្រទេសវៀតណាម បានលើកឡើងថា ទីក្រុងហូជីមិញកំពុងតែវិវឌ្ឍន៍ខ្លួនក្លាយជាគោលដៅទេសចរណ៍វេជ្ជសាស្ត្រនៅលើពិភពលោក ។ ទីក្រុងនេះមានមន្ទីរពេទ្យចំនួន១៣១កន្លែង, មានអ្នកជំនាញវេជ្ជសាស្ត្រជាន់ខ្ពស់, បច្ចេកវិទ្យាទំនើប និងថ្លៃព្យាបាលសមរម្យ ។

ហេតុនេះ វាធ្វើឱ្យទីក្រុងហូជីមិញមានសក្តានុពលយ៉ាងខ្លាំងក្លា និងអាចក្លាយជាមជ្ឈមណ្ឌលទេសចរណ៍វេជ្ជសាស្ត្រលំដាប់ពិភពលោកសម្រាប់ជនបរទេស ដែលធ្វើដំណើរមកកាន់ទីក្រុងនេះដើម្បីទេសចរណ៍ និងទទួលយកការព្យាបាលសុខភាព ។ ការកំណត់គោលដៅក្លាយជាមជ្ឈមណ្ឌលទេសចរណ៍វេជ្ជសាស្ត្ររបស់ទីក្រុងហូជីមិញ ដោយសារតែមើលឃើញពីភាពជោគជ័យរបស់ប្រទេសថៃ ។

នៅតាមមន្ទីរពេទ្យនានាក្នុងទីក្រុងនេះបានទទួលព្យាបាលនូវជំងឺជាច្រើនមុខ ដូចជា ការវះកាត់បេះដូង, ការប្តូរសរីរាង្គ, ការវះកាត់កែសម្ឆស្ស រហូតដល់ការព្យាបាលអ្នកពិបាកមានកូន ជាដើម ។ បច្ចុប្បន្ន ស្ថាប័នផ្សេងៗផ្នែកសុខភាព និងទេសចរណ៍នៅទីក្រុងហូជីមិញ បានសហការគ្នាផ្តល់កញ្ចប់ទេសចរណ៍វេជ្ជសាស្ត្រចំនួន៣០ប្រភេទ ដើម្បីទាក់ទាញភ្ញៀវទេសចរជាតិ និងអន្តរជាតិ ព្រមទាំងបង្កើនជំនាញដល់មគ្គុទ្ទេសក៍ទេសចរផ្នែកទេសចរណ៍វេជ្ជសាស្ត្រ ដែលអាចនិយាយបាន៦ភាសា ។

លើសពីនេះ វៀតណាមនឹងខិតខំប្រឹងប្រែងជំរុញ និងផ្សព្វផ្សាយពីទេសចរណ៍វេជ្ជសាស្ត្រទៅកាន់ភ្ញៀវទេសចរបរទេស ជាពិសេស ភ្ញៀវទេសចរមកពីប្រទេសកម្ពុជា ។ ប្រទេសកម្ពុជាបានក្លាយជាទីផ្សារទេសចរណ៍វេជ្ជសាស្ត្រដ៏សំខាន់របស់វៀតណាម ហើយកម្ពុជាស្ថិតក្នុងចំណោមប្រទេសចម្បងចំនួន១០ ក្នុងឆមាសទី១ ឆ្នាំ២០២៣ ។ ចំនួនភ្ញៀវទេសចរខ្មែរបានធ្វើដំណើរមកកាន់ប្រទេសវៀតណាម កើនឡើងជាង៣៣០% បើធៀបនឹងរយៈពេលដូចគ្នាកាលពីឆ្នាំ២០១៩ (ដែលជាអំឡុងពេលមុនជំងឺកូវីដ-១៩ ឆ្លងរាតត្បាត) ។

ជាក់ស្តែង មន្ទីរពេទ្យ City International Hospital នៅតំបន់ Binh Tan បានព្យាបាលជំងឺជនបរទេសរហូតដល់ជាង៣ម៉ឺននាក់ក្នុង១ឆ្នាំ ហើយក្នុងចំណោមអ្នកជំងឺទាំងអស់ មានជនជាតិខ្មែររហូតដល់៩០% ។

បើគិតចាប់ពីខែមករា រហូតដល់ខែតុលា ឆ្នាំ២០២៣ ទីក្រុងហូជីមិញទទួលបានភ្ញៀវទេសចរបរទេសរហូតដល់ជាង៤លាន១សែននាក់ ស្មើជាង៨០% នៃគោលដៅប្រចាំឆ្នាំ ។ ដូច្នេះ វៀតណាមរំពឹងថា នឹងទទួលបានភ្ញៀវទេសចរបរទេសតាមគោលដៅ ចំនួន៥លាននាក់នៅចុងឆ្នាំ២០២៣ ។ រីឯនៅឆ្នាំ២០២៤ នាយកដ្ឋានទេសចរណ៍ទីក្រុងហូជីមិញបានកំណត់គោលដៅទទួលភ្ញៀវទេសចរបរទេសឱ្យបានចំនួន៦លាននាក់ ៕

បច្ចុប្បន្នរថយន្តអគ្គិសនីកំពុងឈានមុខគេនៅលើទីផ្សារអន្តរជាតិដោយសារគុណភាព ក៏ដូចជារូបរាង រួមជាមួយតម្លៃ និងរចនាសម្ព័ន្ធរបស់វា។ ដូច្នេះហើយតើអ្នកដឹងទេថា ម៉ូដែលរថយន្តអគ្គិសនីប្រភេទណាខ្លះ ដែលមានតម្លៃថ្លៃជាងគេ ក៏ដូចជាពេញនិយមបំផុតនៅលើពិភពលោកក្នុងឆ្នាំ ២០២៣ នេះ?

១.Aspark Owl៖ Aspark Owl គឺម៉ូដែលរថយន្តអគ្គិសនីតែមួយគត់ពីប្រទេសជប៉ុនក្នុងបញ្ជី នឹងត្រូវបានណែនាំនៅចុងឆ្នាំ ២០១៩ ។ Owl មានកម្លាំង 1,980 សេះ និងអាចបង្កើនល្បឿនពី 0 ទៅ 100 គីឡូម៉ែត្រក្នុងមួយម៉ោង ក្នុងរយៈពេល 1.69 វិនាទី ដែលជាចំនួនចាត់ទុកថាលឿនបំផុតនៅលើពិភពលោក។ រថយន្តអគ្គិសនីនេះផលិតបានតែ 50 គ្រឿងប៉ុណ្ណោះក្នុងមួយឆ្នាំ ដែលក្នុងនោះ 10 គ្រឿងគឺសម្រាប់ទីផ្សារអាមេរិកខាងជើង ដោយវាមានតម្លៃ 3.56 លានដុល្លារអាមេរិកក្នុងមួយគ្រឿង។

២.Lotus Evija៖ ចំពោះម៉ូដែលរថយន្តអគ្គិសនីរបស់ក្រុមហ៊ុនអង់គ្លេសនេះវិញ ត្រូវបានគេវាយតម្លៃខ្ពស់ចំពោះការរចនាដ៏គួរឱ្យចាប់អារម្មណ៍របស់វា ជាពិសេសផ្នែកខាងក្រោយ។ រថយន្តអគ្គិសនី Lotus Evija មានទម្ងន់ជាង 1,678 គីឡូក្រាម ជាមួយនឹងកម្លាំង 1,972 សេះ និងបង្កើនល្បឿនពី 0-100 គីឡូម៉ែត្រក្នុងមួយម៉ោង ក្នុងរយៈពេលតិចជាង 3 វិនាទី ដែលល្បឿនអតិបរមាកំណត់ត្រឹមតែ 350 គីឡូម៉ែត្រក្នុងមួយម៉ោង។ រថយន្តនេះមានតែ 130 គ្រឿងប៉ុណ្ណោះក្នុងមួយឆ្នាំ ជាមួយនឹងតម្លៃ 2.5 លានដុល្លារអាមេរិកក្នុងមួយគ្រឿង។

៣.Pininfarina Battista៖ Battista គឺជារថយន្តអគ្គិសនីដែលផលិតឡើងដោយក្រុមហ៊ុនអ៊ីតាលី ជាមួយនឹងកម្លាំង 1,877 សេះ និងឈានដល់ 1.79 វិនាទីសម្រាប់ការបង្កើនល្បឿន 0-100 គីឡូម៉ែត្រក្នុងមួយម៉ោង។ ដូច្នេះហើយ បច្ចុប្បន្ន Battista មានតម្លៃ 2.2 លានដុល្លារអាមេរិកក្នុងមួយគ្រឿង។

៤. Rimac Nevera៖ រថយន្តអគ្គិសនី Nevera មានកម្លាំង 1,877 សេះ ជាមួយនឹងកំណែ Time Attack ។ រថយន្តនេះបានបំបែកកំណត់ត្រាចំនួន 23 សម្រាប់ល្បឿន និងការបង្កើនល្បឿន ដែលឈានដល់ 0-100 គីឡូម៉ែត្រក្នុងមួយម៉ោង ក្នុងរយៈពេល 1.74 វិនាទី និងឈានដល់ល្បឿនអតិបរមា 402 គីឡូម៉ែត្រក្នុងមួយម៉ោង។ ដូច្នេះហើយ Rimac Nevera ផលិតបានតែ 150 គ្រឿងប៉ុណ្ណោះនៅទូទាំងពិភពលោក ជាមួយនឹងតម្លៃ 2.2 លានដុល្លារអាមេរិកក្នុងមួយគ្រឿង។

៥.Hispano Suiza Carmen Boulogne៖ ជាមួយនឹងតម្លៃ 1.8 លានដុល្លារអាមេរិក រថយន្តអគ្គិសនី Hispano Suiza Carmen Boulogne មានប្រភពមកពីប្រទេសអេស្ប៉ាញ ដែលកំណែស្តង់ដារត្រូវបានដាក់ឱ្យដំណើរការនៅឯការតាំងពិពណ៌ទីក្រុងហ្សឺណែវក្នុងឆ្នាំ 2019។ នៅក្នុងកំណែរថយន្តអគ្គិសនី Boulogne គឺមានសមត្ថភាព 1,100 សេះ ជាមួយនឹងម៉ូទ័រអេឡិចត្រិចចំនួន 4 នឹងជាម៉ូដែលរថយន្តអគ្គិសនីដែលមានការរចនាមិនធម្មតាបំផុតនៅក្នុងបញ្ជី៕

ប្រទេសថៃ ៖ សារព័ត៌មានថៃចុះផ្សាយថា មានពលករខ្មែរម្នាក់បានមកកាន់ស្ថានីយប៉ូលិសថៃដើម្បីឱ្យប៉ូលិសចាប់ខ្លួន ក្រោយពីរូបគេបានចូលមកធ្វើការជាកម្មករសំណង់នៅប្រទេសថៃដោយខុសច្បាប់ ប៉ុន្តែថៅកែថៃមិនព្រមបើកប្រាក់ឈ្នួលឱ្យ ។ ពលករខ្មែរនិយាយថា រូបគេគ្មានប្រាក់ទិញបាយហូបទេ ក៏សម្រេចចិត្តហៅរថយន្តជិះជាហូរហែរហូតដល់ស្ថានីយប៉ូលិស ខ្លួនក៏ចុះពីរថយន្ត និងអង្វរឱ្យប៉ូលិសបញ្ជូនរូបគេត្រឡប់ទៅប្រទេសកម្ពុជាវិញ ។

កាលពីថ្ងៃទី៣ ខែធ្នូ ឆ្នាំ២០២៣ បុរសពលករខ្មែរម្នាក់ អាយុ៣២ឆ្នាំ បានចូលមកកាន់ស្ថានីយប៉ូលិសនៅខេត្តនុនថាក់បុរី ប្រទេសថៃ ហើយក៏បានអង្វរឱ្យប៉ូលិសថៃចាប់ខ្លួនគេបញ្ជូនត្រឡប់ទៅប្រទេសកម្ពុជាវិញ ។ ពលករខ្មែរម្នាក់នេះមានអាការៈហត់នឿយយ៉ាងខ្លាំង ហើយថែមទាំងបានសុំបាយប៉ូលិសហូបទៀតផង ដោយសាររូបគេអត់បាយទឹកអស់ជាច្រើនថ្ងៃ និងគ្មានប្រាក់ជាប់ខ្លួនទិញបាយហូបទេ ។ នៅពេលឃើញសភាពបែបនេះ ប៉ូលិសថៃអាណិតអាសូរ និងបានទិញបាយឱ្យពលករខ្មែរហូបដើម្បីបំពេញភាពស្រេកឃ្លាន ។

បុរសជាពលករខ្មែររៀបរាប់ថា ខ្លួនបានរត់មកធ្វើការនៅប្រទេសថៃតាមច្រកធម្មជាតិនៅខេត្តនុនថាក់បុរី ដើម្បីធ្វើជាកម្មករសំណង់នៅស្រុកបាងភ្លី ខេត្តសមុទ្រប្រាកាន ប៉ុន្តែក្រោយពីរូបគេធ្វើការបានរយៈពេល២ខែ ប៉ុន្តែថៅកែថៃមិនព្រមបើកប្រាក់ឈ្នួលឱ្យសូម្បីតែ១បាត ។ ដូច្នេះ ខ្លួនគ្មានប្រាក់ទិញបាយហូប ទើបសម្រេចចិត្តឈប់ធ្វើការជាកម្មករសំណង់ និងសុំរថយន្តគេជិះនៅតាមផ្លូវជាបន្តបន្ទាប់ ។

បុរសរូបនេះបន្តថា ខ្លួនបានសុំរថយន្តគេជិះរហូតដល់ស្ថានីយប៉ូលិស Rattanathibet Police Station ស្រាប់តែហេវបាយខ្លាំងទ្រាំលែងបាន ក៏សម្រេចចិត្តចុះពីរថយន្ត និងដើរចូលស្ថានីយប៉ូលិសតែម្តង ដើម្បីឱ្យប៉ូលិសចាប់ខ្លួនគេបញ្ជូនទៅប្រទេសកម្ពុជាវិញ និងសុំបាយហូបផងដែរ ។

ក្រោយពីសមត្ថកិច្ចថៃបានទិញបាយឱ្យពលករខ្មែរបរិភោគឆ្អែតហើយ សមត្ថកិច្ចថៃក៏បានចាប់ខ្លួនរូបគេ និងចោទប្រកាន់ពីបទជនបរទេសចូលមកធ្វើការនៅប្រទេសថៃដោយខុសច្បាប់ ។ បន្ទាប់មក សមត្ថកិច្ចបានបញ្ជូនរូបគេទៅកាន់ការិយាល័យប៉ូលិសស៊ើបអង្កេតប្រចាំខេត្តនុនថាក់បុរី ដើម្បីចាត់វិធានការតាមច្បាប់ និងត្រៀមបញ្ជូនត្រឡប់ទៅប្រទេសកម្ពុជាវិញ ៕

បរទេស៖ សហរដ្ឋអាមេរិកគ្រោងនឹងបាញ់សម្លាប់សត្វក្តាន់ចំនួន ២,០០០ ក្បាលដើម្បីសង្គ្រោះកោះកាលីហ្វ័រញ៉ា ដែលត្រូវបានបំផ្លិចបំផ្លាញដោយសត្វក្តាន់។

យោងតាមប្រភពព័ត៌មាន New York Time ដែលបានចុះផ្សាយកាលពីថ្ងៃទី៣ ខែធ្នូថា កោះ Santa Catalina ភាគខាងត្បូងនៃរដ្ឋកាលីហ្វ័រញ៉ាគឺជាទីជម្រកនៃរុក្ខជាតិ និងជីវចម្រុះជាច្រើន ក៏ដូចជាសត្វជាង ៦០ ប្រភេទដែលស្ថិតនៅក្នុងកោះនេះ។ ទោះជាយ៉ាងណា បច្ចុប្បន្នកោះនេះកំពុងរងផលប៉ះពាល់យ៉ាងខ្លាំងដោយការបំផ្លិចបំផ្លាញនៃរុក្ខជាតិដើមឈើដោយសារសត្វក្តាន់។ ហេតុនេះហើយ លោក Lauren Dennhardt ដែលជាអ្នកអភិរក្សធម្មជាតិឈានមុខគេរបស់កោះ Santa Catalina បាននិយាយថា មធ្យោបាយតែមួយគត់ដើម្បីជួយសង្គ្រោះកោះនេះសម្រាប់មនុស្សជំនាន់ក្រោយគឺការសម្លាប់សត្វក្តាន់ទាំងអស់។

លោក Dennhardt បានឱ្យដឹងទៀតថា បច្ចុប្បន្ននេះសត្វក្តាន់ចំនួន ២,០០០ ក្បាលកំពុងបំផ្លាញរុក្ខជាតិដើមនៅទីនេះ បណ្តាលឱ្យមានសំណឹកដី លុបបំបាត់ការផ្គត់ផ្គង់អាហារសម្រាប់សត្វជាច្រើនផ្សេងទៀត និងបង្កើតលក្ខខណ្ឌសម្រាប់បន្លែដែលងាយឆេះរាលដាល។ ដូច្នេះរុក្ខជាតិដែលសត្វក្តាន់ទាំងនោះបានបំផ្លាញសុទ្ធតែជារុក្ខជាតិដែលអាចបង្កើតលក្ខខណ្ឌរួមចំណែកដល់គ្រោះមហន្តរាយភ្លើងឆេះព្រៃនាពេលថ្មីៗនេះ។ អស់រយៈពេល ១០០ឆ្នាំហើយ កោះ Santa Catalina បានក្លាយជាកន្លែងទេសចរណ៍ដ៏ពេញនិយមបំផុតមួយរបស់ពិភពលោក ដោយសាររុក្ខជាតិព្រៃឈើសម្បូរបែបនិងមានសត្វច្រើនប្រភេទ។

អង្គការអភិរក្សបានសម្រេចចិត្តថាការសម្លាប់សត្វក្តាន់ដោយកាំភ្លើងពីឧទ្ធម្ភាគចក្រក្នុងរយៈពេលប្រាំពីរសប្តាហ៍នៅរដូវក្តៅនាឆ្នាំក្រោយគឺជាដំណោះស្រាយដ៏ល្អបំផុត ដើម្បីការពារការបំផ្លិចបំផ្លាញព្រៃឈើដោយសារសត្វក្តាន់។ ទោះបីជាវិធានការនេះហាក់ដូចជាធ្ងន់ធ្ងរក៏ដោយ ការព្យាករណ៍បែបនេះគឺជារឿងធម្មតានៅក្នុងវិស័យអភិរក្ស ហើយក៏ត្រូវបានអនុវត្តនៅលើកោះ Channel Islands ផ្សេងទៀតផងដែរ។

គួរបញ្ជាក់ដែរថា កន្លងមកអង្គការអភិរក្សក៏ធ្លាប់បានសម្លាប់សត្វពពែប្រហែល ៨ ពាន់ក្បាល និងជ្រូក ១២,០០០ ក្បាល ដោយសារពួកវាបានបំផ្លាញដើមឈើ និងបង្កឱ្យមានការបាក់ដី។ ពួកគេធ្លាប់បានព្យាយាមគ្រប់គ្រងសត្វក្តាន់តាមរយៈកម្មវិធីម៉ាញ់ដែលមានដែនកំណត់ ២០០ ក្តាន់ក្នុងមួយឆ្នាំ ប៉ុន្តែវាគ្មានប្រសិទ្ធភាពទេ។ សត្វក្តាន់ Mule ចំនួន ២,០០០ ក្បាលនេះមិនមានសត្រូវធម្មជាតិនៅលើកោះទេ ដូច្នេះពួកវាអាចលូតលាស់ដោយមិនអាចគ្រប់គ្រងបាន ហេតុនេះហើយអង្គការអភិរក្សក៏សម្រេចចិត្តសម្លាប់ពួកវាតែម្តងនៅឆ្នាំក្រោយ៕

ប្រទេសម៉ាឡេស៊ី ៖ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) បានថ្លែងកាលពីចុងខែវិច្ឆិកា ឆ្នាំ២០២៣ ថា ម៉ាឡេស៊ីបានអនុញ្ញាតឱ្យពលរដ្ឋចិន និងឥណ្ឌាអាចធ្វើដំណើរមកកាន់ម៉ាឡេស៊ីរយៈពេល៣០ថ្ងៃ ដោយពុំចាំបាច់ស្នើសុំទិដ្ឋាការ គិតចាប់ពីថ្ងៃទី១ ខែធ្នូ ឆ្នាំ២០២៣ តទៅ ។ ការលើកលែងទិដ្ឋាការនេះ គឺជាការព្យាយាមមួយដើម្បីជំរុញវិស័យទេសចរណ៍ និងសេដ្ឋកិច្ច ។

លោកនាយករដ្ឋមន្ត្រីម៉ាឡេស៊ីបានថ្លែងបែបនេះ កាលពីថ្ងៃទី២៦ ខែវិច្ឆិកា ឆ្នាំ២០២៣ ក្នុងអំឡុងពេលកិច្ចប្រជុំមហាសន្និបាតគណបក្សយុត្តិធម៌ប្រជាជន (Parti Keadilan Rakyat) ដើម្បីអបអរសាទរឆ្នាំដំបូង ដែលរដ្ឋាភិបាលរបស់លោកបានគ្រប់គ្រងអំណាច ។

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ថ្លែងថា ៖ «ដើម្បីអបអរសាទរខួបលើកទី៥០ឆ្នាំ នៃទំនាក់ទំនងការទូតជាមួយប្រទេសចិន គិតចាប់ពីថ្ងៃទី១ ខែធ្នូ ឆ្នាំ២០២៣ តទៅ យើងនឹងអនុញ្ញាតឱ្យជនជាតិចិនទទួលបានការលើកលែងទិដ្ឋាការរយៈពេល៣០ថ្ងៃ ។ រីឯអ្នកដំណើរមកពីប្រទេសឥណ្ឌានឹងទទួលបានសិទ្ធិដូចគ្នានេះដែរ» ។

ការប្រកាសលើកលែងទិដ្ឋាការដល់ភ្ញៀវទេសចរចិន ក្រោយពីប្រទេសចិនបានប្រកាសកាលពីថ្ងៃទី២៤ ខែវិច្ឆិកា ឆ្នាំ២០២៣ ថា នឹងអនុញ្ញាតឱ្យជនជាតិម៉ាឡេស៊ី និងពលរដ្ឋមកពីប្រទេសចំនួន៥ នៅតំបន់អឺរ៉ុបចូលមកប្រទេសចិន ដោយពុំចាំបាច់ស្នើសុំទិដ្ឋាការ ។ ការលើកលែងទិដ្ឋាការរបស់ចិននឹងអនុវត្តចាប់ពីថ្ងៃទី១ ខែធ្នូ ឆ្នាំ២០២៣ រហូតដល់ថ្ងៃទី៣០ ខែវិច្ឆិកា ឆ្នាំ២០២៤ ហើយចិននឹងអនុញ្ញាតឱ្យអ្នកដំណើរមកពីប្រទេសទាំងនេះអាចស្នាក់នៅចិនរយៈពេល១៥ថ្ងៃ ដូចជា អ្នកមកប្រទេសចិនដើម្បីទេសចរណ៍, ប្រកបអាជីវកម្ម និងមកជាលក្ខណៈគ្រួសារ ។

ចំណែកចំនួនភ្ញៀវទេសចរបរទេសដែលបានធ្វើដំណើរមកប្រទេសម៉ាឡេស៊ីច្រើនបំផុត រួមមាន ៖ ភ្ញៀវទេសចរសិង្ហបុរី និងឥណ្ឌូណេស៊ី ខណៈប្រទេសក្រៅពីតំបន់អាស៊ាន គឺភ្ញៀវទេសចរចិនបានធ្វើដំណើរមកកាន់ម៉ាឡេស៊ីច្រើនបំផុត ។

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ថ្លែងបន្តថា ៖ «ភ្ញៀវទេសចរចិនមានសក្តានុពលខ្លាំងសម្រាប់ម៉ាឡេស៊ី ។ យើងនឹងកែលម្អឱ្យកាន់តែល្អប្រសើរនូវផ្លូវគមនាគមន៍ផ្សេងៗ និងបង្កលក្ខណៈងាយស្រួលនៅអាកាសយានដ្ឋានផងដែរ» ។

កាលពីខែកញ្ញា ឆ្នាំ២០២៣ លោក ទៀង ឃិងឈិង រដ្ឋមន្ត្រីក្រសួងទេសចរណ៍ សិល្បៈ និងវប្បធម៌ម៉ាឡេស៊ី ថ្លែងថា ម៉ាឡេស៊ីគ្រោងលើកលែងទិដ្ឋាការដល់ភ្ញៀវទេសចរចិន ដើម្បីទាក់ទាញ និងបង្កើនចំនួនភ្ញៀវទេសចរចិនមកកាន់ម៉ាឡេស៊ី ។ ដូចគ្នានេះ ម៉ាឡេស៊ីនឹងលើកលែងទិដ្ឋាការដល់ភ្ញៀវទេសចរឥណ្ឌាផងដែរ ៕

ទំព័រហ្វេសប៊ុកថៃលើកឡើងថា ប្រទេសថៃទទួលបានភ្ញៀវទេសចរបរទេសរហូតដល់ជាង២៣លាននាក់ គិតត្រឹមខែវិច្ឆិកា ឆ្នាំ២០២៣នេះ តើខ្មែរយល់ឃើញយ៉ាងណាដែរ? ទំព័រហ្វេសប៊ុកថៃឈ្មោះ Top news លើកឡើងថា ក្នុងរយៈពេលមិនដល់១ឆ្នាំផង ភ្ញៀវទេសចរបរទេសបានធ្វើដំណើរមកកម្សាន្តនៅប្រទេសថៃ មានរហូតដល់ជាង២៣លាននាក់ឯណោះ ហើយថៃទទួលបានប្រាក់ចំណូលពីវិស័យទេសចរណ៍មានចំនួន៩៨១.៦៩០លានបាត ។

ក្រសួងទេសចរណ៍ និងកីឡាប្រទេសថៃ បានបង្ហាញពីស្ថានការណ៍ទេសចរណ៍ចុងក្រោយថា ចាប់ពីថ្ងៃទី១ ខែមករា រហូតដល់ថ្ងៃទី១២ ខែវិច្ឆិកា ឆ្នាំ២០២៣ គឺមានភ្ញៀវទេសចរបរទេសបានធ្វើដំណើរមកប្រទេសថៃ សរុបស្មើនឹង២៣.២៤១.៣៣៨នាក់ (ឬស្មើជាង២៣លាននាក់) ។ លើសពីនេះ ថៃទទួលបានប្រាក់ចំណូលចូលប្រទេស ពីការចាយវាយរបស់ភ្ញៀវទេសចរបរទេស ចំនួន៩៨១.៦៩០លានបាត ។ ដូច្នេះ តួលេខនេះស្របនឹងគោលដៅរបស់ថៃ ដែលបានកំណត់ទុក ។

ភ្ញៀវទេសចរបរទេសដែលមកកម្សាន្តនៅប្រទេសថៃមានចំនួនខ្ពស់បំផុត រួមមាន ៖
១-ម៉ាឡេស៊ី ស្មើនឹង ៣.៨២៤.៤៤៥នាក់
២-ចិន ស្មើនឹង ២.៩០២.៤៦២នាក់
៣-កូរ៉េខាងត្បូង ស្មើនឹង ១.៣៧៥.៩៥៨នាក់
៤-ឥណ្ឌា ស្មើនឹង ១.៣៥៤.៧១២នាក់
៥-រុស្ស៊ី ស្មើនឹង ១.១៧០.២០៣នាក់

នៅឆ្នាំ២០២៣នេះ ថៃបានក្លាយជាប្រទេសដែលទទួលបានភ្ញៀវទេសចរពីក្រៅប្រទេសច្រើនបំផុតនៅតំបន់អាស៊ីអាគ្នេយ៍ គឺថៃទទួលបានភ្ញៀវទេសចរបរទេសស្មើជាង២៣លាននាក់ ក្នុងរយៈពេលមិនដល់១ឆ្នាំ ។ ចំណែកវៀតណាមទទួលបានភ្ញៀវទេសចរបរទេសស្មើជិត១០លាននាក់ ហើយតួលេខនេះស្រដៀងគ្នានឹងប្រទេសសិង្ហបុរីដែរ ។

ចំណែកប្រទេសផ្សេងៗ រួមមាន ៖
-ម៉ាឡេស៊ី ទទួលបានភ្ញៀវទេសចរបរទេស ស្មើនឹង១៣លាននាក់
-ឥណ្ឌូណេស៊ី ទទួលបានភ្ញៀវទេសចរបរទេស ស្មើនឹង៨លាន៥សែននាក់
-ហ្វីលីពីន ទទួលបានភ្ញៀវទេសចរបរទេស ជិតស្មើ៣លាន៩សែននាក់ និង
-កម្ពុជា ទទួលបានភ្ញៀវទេសចរបរទេស ស្មើជាង២លាន៥សែននាក់

ទំព័រហ្វេសប៊ុកថៃបានលើកឡើងជាថ្មីថា សារព័ត៌មានកម្ពុជាក៏បានចុះផ្សាយពីព័ត៌មានភ្ញៀវទេសចរ និងមានពលរដ្ឋខ្មែរជាច្រើននាក់ចូលមកបញ្ចេញយោបល់ថា យើងគួរតែមើលគំរូប្រទេសថៃ ហើយយើងត្រូវធ្វើដូចម្តេចដើម្បីទទួលបានភ្ញៀវទេសចរបរទេសឱ្យច្រើនដូចថៃ ។ លើសពីនេះ កម្ពុជាគួរតែបង្កើនតំបន់ទេសចរណ៍ឱ្យច្រើនកន្លែង និងត្រូវបោះចោលសំរាមក្នុងធុងឱ្យបានត្រឹមត្រូវ ហើយកម្ពុជាត្រូវចាត់វិធានការលើអ្នកលក់ដូរមួយចំនួនដែលចូលចិត្តកេងចំណេញលើភ្ញៀវទេសចរ ។ បើធ្វើបែបនេះបាន កម្ពុជានឹងមានភ្ញៀវទេសចរច្រើនដូចថៃដែរ ។

ពលរដ្ឋខ្មែរម្នាក់និយាយថា ៖ «គេមានវិធីយ៉ាងច្រើនដើម្បីទាក់ទាញភ្ញៀវទេសចរមកកម្សាន្តនៅប្រទេសគេ ចុះយើងវិញ ពេលណា ធ្វើដូចថៃដែរទៅ?» ។ ពលរដ្ឋខ្មែរម្នាក់ទៀតថា ៖ «វាមិនពិសេសអ្វីទេ ថៃមានប្រៀបលើខ្មែរមិនបានទេ ។ យើងមានប្រាសាទអង្គរវត្ត ហើយថៃមានថ្ងៃនេះបាន ដោយសារថៃគ្មានសង្គ្រាម ។ បើថៃមានសង្គ្រាមដូចខ្មែរវិញ ក៏មិនរីកចម្រើនដូចសព្វថ្ងៃនេះដែរ» ។

ចំណែកជនជាតិថៃនិយាយថា ៖ «តើសង្គ្រាមទើបបញ្ចប់កាលពីម្សិលមិញមែនទេ? សង្គ្រាមបញ្ចប់យូរណាស់ហើយ ។ ថៃបានជួបបញ្ហាជាច្រើន និងធ្ងន់ធ្ងរ តែថៃអាចអភិវឌ្ឍន៍បាន ។ វាស្ថិតនៅលើការសិក្សា និងសមត្ថភាព ហើយកុំអាងសង្គ្រាម » ។ ជនជាតិថៃម្នាក់ទៀតថា ៖ «ប្រទេសជប៉ុន និងកូរ៉េខាងត្បូង ក៏មានសង្គ្រាមដែរ ប៉ុន្តែគេអាចអភិវឌ្ឍន៍បាន កុំយកសង្គ្រាមធ្វើលេស ។ ប្រទេសអ្នកមិនព្រមអភិវឌ្ឍន៍ខ្លួនឯង រវល់តែចម្លងពីថៃ» ។

ពលរដ្ឋខ្មែរម្នាក់ទៀតថា ៖ «កម្ពុជាទទួលបានភ្ញៀវទេសចរច្រើន តែពួកគេមកតែ១សប្តាហ៍ប៉ុណ្ណោះ ហើយក៏នាំគ្នាទៅលេងនៅថៃ និងវៀតណាមបន្ត ថែមទាំងដើរលេងនៅទីនោះយូរជាងយើងទៀត ព្រោះសប្បាយជាង ហើយសេវាកម្មក៏ល្អជាងកម្ពុជា» ។ ពលរដ្ឋខ្មែរម្នាក់ទៀតថា ៖ «ក្រសួងទេសចរណ៍កុំភ្លេចមើលខុសត្រូវពួកអាជ្ញាធរគ្រប់រូបផង កុំឱ្យពួកគេមានទម្លាក់អាក្រក់ ដូចជា សុំលុយធីបពីភ្ញៀវ ។ វាដល់ពេលផ្លាស់ប្តូរទម្លាប់នេះចេញហើយ ព្រោះភ្ញៀវទេសចរមិនចូលចិត្តទម្លាប់អាក្រក់ទេ» ។ ពលរដ្ឋខ្មែរម្នាក់ទៀតថា ៖ «ថៃមានសេវាកម្មច្រើនណាស់ ជាពិសេស ទេសចរណ៍ផ្លូ.វភេ.ទ ។ វាជាផ្នែកមួយដែលភ្ញៀវទេសចរអឺរ៉ុបចូលចិត្ត ។ ដូច្នេះ ប្រទេសជាច្រើននៅលើពិភពលោក បានហោះហើរត្រង់មកកាន់ថៃ ព្រោះតែរឿងនេះ» ។

ពលរដ្ឋខ្មែរម្នាក់ទៀតថា ៖ «ខ្ញុំសង្ឃឹមថា ថ្ងៃអនាគត យើងនឹងសាងសង់អាកាសយានដ្ឋានថ្មីទៀត ដើម្បីទទួលភ្ញៀវទេសចរបរទេសឱ្យកាន់តែច្រើន ហើយយើងគួរបង្កើតតំបន់ទេសចរណ៍ឱ្យបានច្រើនដូចថៃ ។ លើសពីនេះ គួរលើកកម្ពស់ផ្នែកសេវាកម្ម និងត្រួតពិនិត្យអ្នកប្រកបអាជីវកម្មក្នុងតំបន់ទេសចរណ៍ឱ្យពួកគេមានស្តង់ដារ និងមានអនាម័យ ចៀសវាង កោរភ្ញៀវលើសតម្លៃជាក់ស្តែង ។ ចំណុចទាំងនេះនឹងជួយទាក់ទាញភ្ញៀវទេសចរឱ្យត្រឡប់មកម្តងទៀត ហើយណែនាំមិត្តភក្តិពួកគេមកលេងប្រទេសយើង» ។

ពលរដ្ឋខ្មែរម្នាក់ទៀតថា ៖ «បើពលរដ្ឋខ្មែរ៩៩% មានការងារធ្វើ វានឹងធ្វើឱ្យសេដ្ឋកិច្ចជាតិរឹងមាំដោយខ្លួនឯង ហើយពុំចាំបាច់ចាប់អារម្មណ៍លើទេសចរណ៍ក្រៅប្រទេសទេ ព្រោះទោះយ៉ាងណា ក៏យើងមិនអាចឈ្នះថៃទេ» ។ ពលរដ្ឋខ្មែរម្នាក់ទៀតថា ៖ «ភ្ញៀវទេសចរមកលេងខ្មែរតិចជាងគេណាស់ មិនបាច់ប្រៀបធៀបទេ ។ ខេត្តសៀមរាបក៏ស្ងាត់ដែរ ហើយយើងមានចោរលួចទ្រព្យសម្បត្តិជនបរទេស, ទំនិញឡើងថ្លៃគ្រប់មុខ និងលក់របស់របរកោរភ្ញៀវ ទើបភ្ញៀវទេសចរបរទេសមិនចង់មកលេង» ៕

បរទេស៖ កញ្ញា Billie Eilish អាយុ ២១ឆ្នាំ ដែលជាតារាចម្រៀងប៉ុបដ៏ល្បីរបស់អាមេរិក បានបញ្ជាក់នៅក្នុងកម្មវិធីមួយថានាងស្រឡាញ់មនុស្សស្រីដូចគ្នា។

យោងតាមគេហទំព័រ Aussiedlerbote ដែលបានចុះផ្សាយនៅថ្ងៃទី៣ ខែធ្នូថា តារាចម្រៀងប៉ុប Billie Eilish បាននិយាយនៅក្នុងព្រឹត្តិការណ៍មួយដែលរៀបចំដោយទស្សនាវដ្តី “Variety” ក្នុងទីក្រុង Los Angeles ថា “នាងមិនច្បាស់ទេថា នាងស្រឡាញ់មនុស្សស្រីឬក៏មនុស្សប្រុស” ប៉ុន្តែក្នុងជីវិតរបស់នាងគឺមានទំនាក់ទំនងយ៉ាងស៊ីជម្រៅជាមួយមនុស្សស្រីដូចគ្នា រួមទាំងមិត្តភក្តិ និងក្រុមគ្រួសារផងដែរ។ Billie Eilish ក៏បានបន្ថែមទៀតថា “នាងស្រឡាញ់មនុស្សស្រីខ្លាំងណាស់ ហើយថែមទាំងឃើញពួកគេមានរាងកាយដ៏គួរឱ្យទាក់ទាញទៀតផង”។

កន្លងទៅម្ចាស់ចម្រៀង Bad Guy រូបនេះក៏ធ្លាប់មានទំនាក់ទំនងស្នេហាជាមួយតារាចម្រៀងរ៉េប Brandon Adams ក្នុងឆ្នាំ ២០២១ និងតារាចម្រៀងប្រុស Jesse Rutherford ក្នុងឆ្នាំ ២០២២ ផងដែរ។
គួរបញ្ជាក់ដែរថា Billie Eilish បច្ចុប្បន្ននាងមានអាយុ ២១ឆ្នាំ គឺជាសិល្បករ Gen Z ដែលមានទេពកោសល្យនិងល្បីល្បាញបំផុត។ នាងបានឈ្នះពានរង្វាន់ Grammy ចំនួនប្រាំជាមួយនឹងអាល់ប៊ុមដំបូងរបស់នាង When We All Fall Asleep, Where Do We Go? ក្នុងឆ្នាំ ២០១៩។ នៅឆ្នាំ ២០២២ នាងបានបន្តនាំយកពានមាសពីរមកផ្ទះវិញនៅក្នុងប្រភេទកំណត់ត្រាប្រចាំឆ្នាំ (Everything I want) និងបទចម្រៀងឆ្នើមសម្រាប់ប្រព័ន្ធផ្សព្វផ្សាយសោតទស្សន៍ (No time to die)។

ជាមួយនឹងសមិទ្ធិផលខាងលើតារាចម្រៀងប៉ុបរបស់អាមេរិក Billie Eilish ក៏បានបង្កើតកំណត់ត្រាដោយក្លាយជាសិល្បករក្មេងជាងគេដែលឈ្នះពានរង្វាន់ Big Four ទាំងបួននៅអាយុ ១៨ ឆ្នាំផងដែរ។ លើសពីនេះ តារាចម្រៀងរូបនេះក៏បានទទួលការតែងតាំង Grammy ចំនួនប្រាំមួយសម្រាប់ឆ្នាំ ២០២៤ ទៀតផង៕