នៅដើមឆ្នាំថ្មី គឺជាពេលវេលាដ៏ល្អមួយដើម្បីឱ្យយើងគ្រប់គ្នាចាប់ផ្តើមធ្វើអ្វីថ្មីៗដើម្បីដំឡើងរាសី ឬនាំមកនូវលាភសំណាងក្នុងជីវិតរបស់យើង ។ ការងារដំបូងដែលគួរធ្វើ គឺការបោសសម្អាតលំនៅឋានឱ្យបានស្អាតបាត និងទុកដាក់របស់របរទាំងឡាយឱ្យមានសណ្តាប់ធ្នាប់ ។

ចាស់ៗពីដើមជឿថា បើចង់ទទួលបានលាភសំណាងឆ្នាំថ្មី យើងគួរតែបោះចោលវត្ថុទាំង៥យ៉ាងនេះទៅក្នុងធុងសំរាម ហើយមិនចាំបាច់សោកស្តាយវាទេ ដើម្បីឱ្យយើងអាចចាប់ផ្តើមជីវិតល្អប្រសើរជាងមុន និងទទួលបានជោគជ័យថ្មីៗផងដែរ ។

ការបោះចោលសម្ភារៈចាស់ៗ វានឹងធ្វើឱ្យលំនៅឋានមួយដែលធ្លាប់ជាសំបុកកណ្តុរ ក្លាយទៅជាលំនៅឋានមានរបៀបរបៀបរយ ស្អាត និងគួរឱ្យចង់រស់នៅ ។ តើវត្ថុទាំង៥យ៉ាងនេះមានអ្វីខ្លះ?

ខាងក្រោមនេះ គឺជាវត្ថុចំនួន៥យ៉ាងដែលយើងគួរបោះចោល រួមមាន ៖
១-គ្រឿងសង្ហារិមនៅក្នុងលំនៅឋាន ដែលយើងបានប្រើប្រាស់វាយូរឆ្នាំមកហើយ ឬសម្ភារៈបាក់បែក ខូចទ្រង់ទ្រាយ
២-សម្លៀកបំពាក់ចាស់ៗដែលយើងទុកចោលយូរឆ្នាំក្នុងទូរ ហើយពុំបានស្លៀកពាក់៣-ស្បៀងជាច្រើនមុខដែលយើងបានដាក់ក្នុងផ្ទះបាយ និងទុកចោលក្នុងទូរទឹកកករាប់ខែ៤-សម្ភារៈគ្មានប្រយោជន៍ក្នុងការប្រើប្រាស់
៥-ក្រដាស ឬឯកសារគ្រប់ប្រភេទដែលមិនសំខាន់ ។

ចុងក្រោយ នៅពេលយើងបានរស់នៅក្នុងលំនៅឋាន ឬទីកន្លែងមានបរិយាកាសល្អ គឺវាមានសារៈសំខាន់ណាស់សម្រាប់ជីវិតរបស់យើង ដូចជា ៖ វាជួយផ្នែកសុខភាពផ្លូវកាយ និងចិត្ត ហើយវាធ្វើឱ្យយើងមានថាមពលល្អដើម្បីប្រឈមមុខនឹងបញ្ហាផ្សេងៗក្នុងជីវិតបាន ។ លើសពីនេះ វាក៏មានឥទ្ធិពលទៅលើការបំពេញការងារប្រចាំថ្ងៃ និងប្រាក់ចំណូលរបស់យើងទៀតផង ៕

យោងតាមការស្រាវជ្រាវដោយសាកលវិទ្យាល័យ Reading និង Royal Horticultural Society (UK) ក្នុងឆ្នាំ ២០២៣ បានរកឃើញថា រុក្ខជាតិផើងដែលដាក់នៅលើតុអាចជួយលើកកម្ពស់បុគ្គលិកការិយាល័យឱ្យមានអារម្មណ៍ល្អ និងជួយកាត់បន្ថយភាពតានតឹង ក៏ដូចជាបង្កើនការផ្តោតអារម្មណ៍លើការងារផងដែរ។ នេះបើតាមការសិក្សារបស់ប្រទេសជប៉ុនក៏បានរកឃើញដែរថាវត្តមានរបស់រុក្ខជាតិអាចបង្កើនភាពច្នៃប្រឌិតនៅកន្លែងធ្វើការ។

លោក Jenny Berger អ្នកនិពន្ធនៃការសិក្សាបាននិយាយថា ការដាំរុក្ខជាតិក្នុងការិយាល័យនឹងធ្វើឱ្យយើងមានអារម្មណ៍ល្អ រីករាយជាងមុន ដោយសារតែយើងបានផ្សារភ្ជាប់ជាមួយនឹងធម្មជាតិ ដែលរុក្ខជាតិបៃតងអាចលុបបំបាត់អារម្មណ៍មិនល្អ និងអារម្មណ៍តានតឹង ធ្វើឱ្យអារម្មណ៍របស់យើងមានភាពប្រសើរឡើងវិញក្នុងកន្លែងការងារ។ ដូច្នេះបរិយាកាសការិយាល័យជាមួយរុក្ខជាតិត្រូវបានផ្សារភ្ជាប់ជាមួយនឹងការពេញចិត្តការងារខ្ពស់ និងកាត់បន្ថយសម្ពាធឈាម ក៏ដូចជាកាត់បន្ថយការត្អូញត្អែរអំពីសុខភាពផងដែរ។

ការស្រាវជ្រាវផ្លូវចិត្តពីមុនក៏បានបង្ហាញដែរថារុក្ខជាតិបៃតងក៏អាចជំរុញអារម្មណ៍វិជ្ជមានចំពោះមនុស្សយ៉ាងងាយស្រួលផងដែរ។ រីឯអង្គការសុខភាពពិភពលោកប៉ាន់ប្រមាណថា ៥% នៃមនុស្សពេញវ័យទូទាំងពិភពលោកបានទទួលរងពីជំងឺធ្លាក់ទឹកចិត្តក្នុងការិយាល័យ។ ហេតុនេះហើយ ការដាំកូនឈើគឺជាវិធីងាយស្រួលក្នុងការភ្ជាប់ជាមួយធម្មជាតិ និងជាវិធីដ៏ល្អមួយក្នុងការជួយកាត់បន្ថយភាពតានតឹងក្នុងការិយាល័យយ៉ាងមានប្រសិទ្ធភាពផងដែរ។

ទោះជាយ៉ាងណាក៏ដោយលោក Berger បានសង្កត់ធ្ងន់ថាការបង្កើនចំនួនរុក្ខជាតិក្នុង Office មិនចាំបាច់មានច្រើនពេកទេ។ តាមពិតទៅ រុក្ខជាតិដែលត្រូវបានជ្រើសរើសដាក់ក្នុងការិយាល័យគឺមានតែមួយគ្រប់គ្រាន់ហើយសម្រាប់កាត់បន្ថយភាពតានតឹង។ កាលណាដែលរុក្ខជាតិច្រើនពេកនៅលើតុ ក៏អាចរំខាននិងបង្កើនភាពស្មុគស្មាញដល់យើងផងដែរ។

ប្រទេសចិន ៖ គេហទំព័រមួយឈ្មោះ ETtoday បានចុះផ្សាយពីស្រីស្អាតម្នាក់ដែលកំពុងល្បីល្បាញនៅប្រទេសចិន ក្រោយពីមានការលាតត្រដាងអាថ៌កំបាំងរបស់ស្រីស្អាតម្នាក់នេះថា រូបសម្បត្តិពិតប្រាកដរបស់នាងនៅក្រៅកាមេរ៉ា គឺមានលក្ខណៈខុសប្លែកគ្នាខ្លាំងពីរូបនៅក្នុងបណ្តាញសង្គម ។ អ្នកលេងបណ្តាញសង្គមចិននិយាយថា រូបភាពទាំងពីរនេះខុសគ្នាស្រឡះ ហើយមើលទៅ ដូចមនុស្សផ្សេងគ្នាអីចឹង ។

បើតាមវីដេអូបង្ហាញថា ស្រីស្អាតម្នាក់នេះកំពុងតែនិយាយនៅមុខក្បាលមេក្រូ ដែលមានផ្ទៃខាងក្រោយពណ៌បៃតង ។ ប៉ុន្តែគេសង្កេតឃើញថា សំឡេងរបស់នាងខុសប្លែកគ្នាយ៉ាងខ្លាំងពីមុខមាត់ដ៏គួរឱ្យស្រឡាញ់ ។ បន្ទាប់មក ត្រឹមតែមួយប៉ព្រិចភ្នែក វាបានធ្វើឱ្យអ្នកលេងបណ្តាញសង្គមស្រឡាំងកាំងយ៉ាងខ្លាំង នៅពេលពួកគេឃើញនាងផ្លាស់ប្តូរផ្ទៃមុខរបស់ខ្លួន និងបង្ហាញឱ្យគេឃើញនូវមុខមាត់ពិតប្រាកដ ។ ការពិត នាងមិនមែនជាស្រីស្អាតដូចគ្រប់គ្នាបានឃើញនោះទេ ប៉ុន្តែនាងជាបុរសសក់វែងម្នាក់ ។

ម្ចាស់វីដេអូនេះមានបំណងឱ្យអ្នកទស្សនាមើលឃើញនូវមុខមាត់ពិតប្រាកដរបស់ខ្លួន និងធ្វើឱ្យអ្នកទស្សនាភ្ញាក់ផ្អើលនឹងបច្ចេកវិទ្យា AI ដែលអាចផ្លាស់ប្តូរមុខមាត់របស់មនុស្សម្នាក់ទៅជាមនុស្សម្នាក់ទៀត ។

បុរសក្នុងវីដេអូបាននិយាយក្នុងវីដេអូថា ៖ «ពេលនេះ តើអ្នកគិតថា អ្នកកំពុងតែមើលស្រីស្អាតម្នាក់និយាយ មែនទេ?» ។ បន្ទាប់មក គាត់បានបង្ហាញមូវមុខមាត់ពិតថា ៖ «មិនមែនទេ នេះជាបុរសមាឌធាត់ម្នាក់មានវ័យកណ្តាល តែបុរសម្នាក់នេះសង្ហាខ្លាំងណាស់» ។

លើសពីនេះ បុរសខាងលើបញ្ជាក់យ៉ាងច្បាស់ថា ចិញ្ចើម, ភ្នែក, ច្រមុះ និងមាត់ ដែលមនុស្សគ្រប់គ្នាបានឃើញនាពេលមុននេះ វាមិនមែនជារូបភាពពិតប្រាកដនោះទេ ប៉ុន្តែវាជាការបង្កើតឡើងដោយបច្ចេកវិទ្យា AI ។

ក្រោយពីបានទស្សនាវីដេអូរបស់បុរសខាងលើ អ្នកលេងបណ្តាញសង្គមចិនលើកឡើងថា មិនគួរឱ្យជឿទេថា បច្ចេកវិទ្យា AI អាចធ្វើបែបនេះបាន ។ អ្នកខ្លះទៀតនិយាយថា បើចង់ឃើញមុខមាត់ពិតប្រាកដរបស់អ្នកណាម្នាក់ គឺត្រូវនិយាយតាម Video call ពីព្រោះបើយើងពិនិត្យមើលលើរូបភាពតែម្យ៉ាង មិនបានទេ ។ ប៉ុន្តែមិនយូរទេ ការនិយាយគ្នាតាមរយៈ Video call ក៏មិនអាចឃើញមុខមាត់ពិតបានដែរ ពីព្រោះបច្ចេកវិទ្យា AI ជឿនលឿនពេក ៕

កាលពីពេលថ្មីៗនេះ របកគំហើញខាងបុរាណវត្ថុបានបំភ្លឺទៅលើស្ថាបត្យកម្មមួយដែលបានកសាងឡើងក្នុងកំឡុងរាជវង្ស Xia និងជាខ្សែរាជវង្សដំបូងគេនៃប្រទេសចិន ហើយក៏ត្រូវបានឮការរៀបរាប់តាមរយៈរឿងព្រេងនិទានប៉ុណ្ណោះ ប៉ុន្តែឥឡូវនេះវាបានលេចជារូបរាងពិតមែន។

បើយោងទៅតាមទីភ្នាក់ងារសារព័ត៌មាន Xinhua បានរាយការណ៍ថា អ្នកបុរាណវត្ថុវិទូបានរកឃើញបំណែកជាភស្តុតាងនៃរាជវាំងចិនដែលមានអាយុកាលជាង ៤ ០០០ ឆ្នាំ។ វាំងនេះត្រូវបានគេប៉ាន់ប្រមាណថាត្រូវបានសាងសង់ឡើងក្នុងកំឡុងរាជវង្ស Xia ចន្លោះឆ្នាំ ២០៧០ ដល់ ១៦០០ មុនគ.ស។

វាំងចាស់នេះគឺជាស្តិតនៅក្នុងទីក្រុងបុរាណមួយនៃមហាកំផែងចិន ដែលមានទីតាំងនៅខេត្ត Henan ភាគកណ្តាលប្រទេសចិន។ កាលពីប៉ុន្មានឆ្នាំមុននេះ អ្នកបុរាណវត្ថុវិទូបានរកឃើញសំណល់នៃទីក្រុងបុរាណនេះ នៅលើច្រាំងខាងកើតនៃទន្លេ Zhenshui ដែលគ្របដណ្តប់លើផ្ទៃដីប្រហែល ១៧៦,០០០ ម៉ែត្រការ៉េ។

ទីក្រុងដែលមានមានមហាកំផែងដ៏រឹងមាំនេះ ត្រូវបានផ្សារភ្ជាប់ជាមួយនឹងវប្បធម៌ Longshan ដែលជាអរិយធម៌បុរាណនៃប្រទេសចិន។ វប្បធម៌ Longshan នេះក៏ត្រូវបានគ្របដណ្តប់ក្នុងខេត្ត Henan ដ៏ទំនើប និងតំបន់ជិតខាងផ្សេងទៀតនៃប្រទេសចិនក្នុងរជ្ជកាលនោះ។

រចនាសម្ព័ន្ធគ្រឹះនៃការសាងសង់ព្រះរាជវាំងនេះគឺជាបច្ចេកទេសសាងសង់ដោយប្រើដីឥដ្ឋរួមផ្សំជាមួយនឹងវត្ថុធាតុដើមផ្សេងទៀត ដូចជាដីស និងកំបោរ។ វាំងនេះមានទំហំប្រហែល ៦០គុណ ៣០ ម៉ែត្រ និងគ្របដណ្តប់លើផ្ទៃដីជាង ១ ៨០០ ម៉ែត្រការ៉េ។

ក្នុងដំណើរការជីកកកាយនេះ អ្នកបុរាណវត្ថុវិទូបានរកឃើញរន្ធដូចៗគ្នា ដែលផ្តល់នូវការយល់ដឹងដ៏មានតម្លៃចំពោះប្លង់នៃអគារបុរាណ និងអាចកំណត់អន្តសញ្ញាណគ្រឹះ និងលក្ខណៈពិសេសផ្សេងទៀតដែលប្រាប់ពីដំរុយរូបរាងរបស់ព្រះបរមរាជវាំងនេះផងដែរ៕

វៀតណាម៖ អ្នកគ្រប់គ្រងភោជនីយដ្ឋាន ៤ នាក់ត្រូវបានចាប់ខ្លួនដោយនាយកដ្ឋានប៉ូលីសព្រហ្មទណ្ឌ (PC02) នៃទីក្រុងហូជីមិញពីបទឈ្មួញកណ្តាលពេស្យាចារ បន្ទាប់ពីបុគ្គលិកស្រីជិត ២០០ នាក់រាំស្រាត និងលក់ផ្លូវភេទ ដើម្បីបម្រើអតិថិជនកូរ៉េ។

យោងតាមគេហទំព័រក្នុងស្រុករបស់ប្រទេសវៀតណាម ដែលបានចុះផ្សាយនៅថ្ងៃទី១ ខែមករាថា ភោជនីយដ្ឋានមួយកន្លែងដែលមានឈ្មោះ JOY ស្ថិតក្នុងទីក្រុង Saigon ត្រូវបានក្រុមអធិការកិច្ចចុះត្រួតពិនិត្យ និងឃាត់ខ្លួនម្ចាស់ហាង ដោយប៉ូលីសបានរកឃើញថាភោជនីយដ្ឋាននេះមានស្លាកសញ្ញាគួរឱ្យសង្ស័យជាច្រើន។កន្លែងនេះមាន ៣០ បន្ទប់ធ្វើអាជីវកម្មខារ៉ាអូខេដោយគ្មានការអនុញ្ញាត នឹងបើកទទួលអតិថិជន ក៏ដូចជាបម្រើតែភ្ញៀវកូរ៉េប៉ុណ្ណោះ ហើយតែងតែមានឆ្មាំយាមទ្វារ ៣-៥ នាក់ជារៀងរាល់ថ្ងៃ។ យោងតាមការស៊ើបអង្កេតបានឱ្យដឹងទៀតថា ថៅកែជនជាតិកូរ៉េបានបើកហាងនេះនៅក្នុងប្រទេសវៀតណាម និងបានជ្រើសរើសបុគ្គលិកស្រីវ័យក្មេងស្រស់ស្អាតជិត ២០០ នាក់ក្នុងប្រទេសនេះឱ្យរៀបចំរាំស្រាត និងលក់ផ្លូវភេទ ដើម្បីបម្រើអតិថិជនកូរ៉េ។

ទោះជាយ៉ាងណាក៏ដោយ ភោជនីយដ្ឋានវៀតណាមមួយកន្លែងនេះ បច្ចុប្បន្នត្រូវបានបិទ ហើយម្ចាស់ហាង និងអ្នកគ្រប់គ្រងក៏ត្រូវបានចាប់ខ្លួនផងដែរ ដោយក្រុមអាជ្ញាធរកំពុងធ្វើការស៊ើបអង្គេតបន្ថែមទៀត។

គួរបញ្ជាក់ដែរថា ក្នុងអំឡុងពេលនៃការវាយប្រហារ និងការបង្រ្កាបបទល្មើស ប៉ុន្មានថ្ងៃថ្មីៗនេះ ប៉ូលីសក្រុងហូជីមិញ បានចាប់ខ្លួនក្រុមក្មេងទំនើង និងចោរប្លន់ជាច្រើននាក់ ដើម្បីរក្សាសន្តិសុខ សណ្តាប់ធ្នាប់ជូនប្រជាពលរដ្ឋរបស់ខ្លួន ក្នុងឱកាសបុណ្យចូលឆ្នាំថ្មី ឆ្នាំសកល ២០២៤៕

ប្រទេសថៃ ៖ លោក Srettha Thavisin នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃលើកឡើងថា ជនជាតិថៃធ្វើដំណើរទៅប្រទេសចិន នឹងពុំចាំបាច់ស្នើសុំទិដ្ឋាការទៀតទេ គិតចាប់ពីថ្ងៃទី១ ខែមីនា ឆ្នាំ២០២៤ តទៅ ក្រោយពីប្រទេសទាំងពីរបានចរចាគ្នាជាបន្តបន្ទាប់ ។ ប្រទេសថៃចាត់ទុកថា វាជាការផ្តល់សារៈសំខាន់សម្រាប់លិខិតឆ្លងដែនរបស់ថៃ ។ នេះបើតាមការចុះផ្សាយរបស់សារព័ត៌មានថៃ នៅថ្ងៃទី២ ខែមករា ឆ្នាំ២០២៤ ។

នៅថ្ងៃទី២ ខែមករា ឆ្នាំ២០២៤ លោក Srettha Thavisin នាយករដ្ឋមន្ត្រីថៃបានលើកឡើងក្រោយកិច្ចប្រជុំគណៈរដ្ឋមន្ត្រី អំពីការលើកលែងទិដ្ឋាការសម្រាប់ជនជាតិថៃធ្វើដំណើរទៅប្រទេសចិនថា មុននេះ ប្រទេសថៃបានលើកលែងទិដ្ឋាការដល់ភ្ញៀវទេសចរចិនដែលធ្វើដំណើរមកប្រទេសថៃ រហូតដល់ថ្ងៃទី២៩ ខែកុម្ភៈ ឆ្នាំ២០២៤ ។ ហេតុនេះ រយៈពេលលើកលែងទិដ្ឋាការដល់ភ្ញៀវទេសចរចិនជិតផុតកំណត់ហើយ ។ ប៉ុន្តែរដ្ឋាភិបាលចង់លើកកម្ពស់សារៈសំខាន់នៃលិខិតឆ្លងដែនថៃ ហើយវិធីល្អបំផុត គឺត្រូវលុបចោលការស្នើសុំទិដ្ឋាការរបស់ប្រទេសទាំងពីរ ។

លោក Srettha Thavisin នាយករដ្ឋមន្ត្រីថៃថ្លែងថា ៖ «កាលពីជាង១ខែមុន ប្រទេសចិនបានលើកលែងទិដ្ឋាការដល់ភ្ញៀវទេសចរមកពីប្រទេសចំនួន៥ ដែលពុំទាន់មានប្រទេសថៃទេ ហើយពេលនោះ ខ្ញុំមិនចង់និយាយទេ ពីព្រោះយើងកំពុងតែជជែកគ្នា ។ ប៉ុន្តែពេលនេះ យើងមានដំណឹងល្អ ដោយប្រទេសចិននឹងលើកលែងទិដ្ឋាការដល់ភ្ញៀវទេសចរថៃជាអចិន្ត្រៃយ៍ គិតចាប់ពីថ្ងៃទី១ ខែមីនា ឆ្នាំ២០២៤ តទៅ ។ នេះបង្ហាញឱ្យឃើញថា ប្រទេសទាំងពីរពុំចាំបាច់មានទិដ្ឋាការដូចមុនទៀតទេ ហើយវាជាការលើកកម្ពស់សារៈសំខាន់នៃលិខិតឆ្លងដែនថៃ និងជួយសម្រួលដល់ភ្ញៀវទេសចរដែលចង់មកកម្សាន្តនៅប្រទេសទាំងពីរ» ។

លោកនាយករដ្ឋមន្ត្រីថៃបន្តថា លោកបានជូនដំណឹងទៅស្ថាប័នពាក់ព័ន្ធដើម្បីប្រកាសថា ថៃបានត្រៀមខ្លួនរួចហើយក្នុងការបើកប្រទេសទទួលភ្ញៀវទេសចរបរទេស ហើយប្រទេសថៃនឹងរួមគ្នាមើលថែភ្ញៀវទេសចរចិន និងថៃឱ្យបានល្អ ។ ហេតុនេះ វិធានការលើកលែងទិដ្ឋាការដល់ភ្ញៀវទេសចរចិនអាចជួយជំរុញដល់សេដ្ឋកិច្ចថៃមួយផ្នែក ៕

នៅពេលដែលឆ្នាំថ្មីចូលមកដល់ ប្រជាជននៃប្រទេសមួយចំនួនដូចខាងក្រោមនេះនឹងទទួលទានអាហារផ្សេងៗគ្នានៅថ្ងៃដំបូងនៃឆ្នាំថ្មី ដោយពួកគេជឿថា ការបរិភោគអាហារទាំងនេះនឹងនាំមកនូវសំណាងល្អ ក៏ដូចជាភាពរុងរឿងចូលមកក្នុងគ្រួសារ។ ដូច្នេះអាហារល្បីៗដែលគេជឿថានឹងនាំលាភ សំណាងចូលក្នុងផ្ទះនៅឆ្នាំថ្មីនោះមានដូចជា៖

១.ទំពាំងបាយជូ៖ ប្រជាជនអេស្ប៉ាញនឹងទទួលទានទំពាំងបាយជូរចំនួន ១២ ផ្លែនៅដើមឆ្នាំថ្មីនេះ ដោយជឿថានឹងសុភមង្គល មាស ប្រាក់ចូលក្នុងផ្ទះ។ ទំនៀមទម្លាប់នេះបានចាប់ផ្តើមនៅក្នុងសតវត្សទី ២០ មកម្លេះនៅពេលដែលមនុស្សជំនាន់មុនដាំទំពាំងបាយជូរហើយការប្រមូលផលគឺល្អ។ ចាប់តាំងពីពេលនោះមក ប្រពៃណីនេះបានរីករាលដាលពាសពេញប្រទេសអេស្ប៉ាញតែម្តង។

២. Tamales៖ តាម៉ាឡេសគឺជាមុខម្ហូបដ៏ល្បីមួយនៅក្នុងប្រទេសម៉ិកស៊ិក ដោយម្ហូបនេះធ្វើពីម្សៅពោតដាក់ជាមួយសាច់ ឈីស និងគ្រឿងផ្សំផ្សេងទៀត រុំដោយស្លឹកចេក ឬអង្កាម។ ការទទួលទាន tamales ជុំគ្រួសារ ឬមិត្តភក្តិ នៅថ្ងៃចូលឆ្នាំសកលនឹងទទួលបានសំណាងល្អ ក៏ដូចជាភាពរុងរឿងពេញមួឆ្នាំ។

៣.គុយទាវសូបា៖ ប្រជាជនជប៉ុនតែងនិយមទទួលទានគុយទាវសូបា ឬតូស៊ីកូស៊ីសូបា នៅថ្ងៃចូលឆ្នាំសកល ដើម្បីស្វាគមន៍ឆ្នាំថ្មី ព្រោះគេជឿថាមុខម្ហូបនេះគឺជានិមិត្តរូបនៃភាពជាប់បានយូរ និងភាពរុងរឿង។

៤.Herring៖ មុខម្ហូមនេះគឺមានច្រើននៅក្នុងប្រទេសប៉ូឡូញ និងបណ្តាប្រទេស Scandinavian មួយចំនួន ដោយសារពួកវាមានពណ៌ប្រាក់ ហើយមនុស្សជាច្រើនចូលចិត្តញ៉ាំវានៅពាក់កណ្តាលអធ្រាត្រ ដើម្បីបួងសួងសុំសេចក្តីសុខ និងបរិបូរណ៍ក្នុងឆ្នាំថ្មី។

៥.Kransekage៖ Kransekage គឺជានំខេកកម្រងផ្កាដែលត្រូវបានបង្កើតឡើងសម្រាប់ថ្ងៃចូលឆ្នាំសកល ក៏ដូចជាឱកាសពិសេសផ្សេងទៀតនៅក្នុងប្រទេសដាណឺម៉ាក និងន័រវែស។

៦.Cotechino con lenticchie៖ ប្រជាជនអ៊ីតាលីតែងតែទទួលទានមុខម្ហូបនេះនៅពេលចូលឆ្នាំសកល ដោយពួកគេជឿថានឹងនាំសំណាងល្អ បរិបូរណ៍ដោយមាសប្រាក់ជាដើម។

៧.Marzipanschwein៖ Marzipanschwein គឺជានំដ៏ពិសេសមួយប្រចាំប្រទេសអូទ្រីស និងអាឡឺម៉ង់ ដោយប្រជាជននៃប្រទេសទាំងពីរនេះជឿថា ការញ៉ាំនំ Marzipanschwein នៅដើមឆ្នាំនឹងនាំមកនូវសំណាងល្អ ក៏ដូចជាអំណោយជាច្រើនពេញមួយឆ្នាំផងដែរ។

៨.Oliebollen៖ នំចៀនមូល Oliebollen ត្រូវបានលក់នៅលើរទេះតាមដងផ្លូវរបស់ប្រទេសហូឡង់។ ពួកវាជាម្ហូបប្រពៃណីនៅថ្ងៃចូលឆ្នាំសកល និងនៅក្នុងពិព័រណ៍ ឬព្រឹត្តិការណ៍ពិសេសៗជាដើម។

៩.Hoppin’ John៖ Hoppin ‘John គឺជាម្ហូបប្រពៃណីសម្រាប់ឆ្នាំថ្មីនៅភាគខាងត្បូងសហរដ្ឋអាមេរិក ដែលមានសណ្តែកសៀង ឬសណ្ដែកស និងអង្ករ បម្រើជាមួយបន្លែបៃតង ឬនំប៉័ងពោត។ សណ្តែករាងមូលតំណាងឱ្យកាក់ បន្លែពណ៌បៃតងតំណាងឱ្យលុយដុល្លារ។ ម្ហូបនេះត្រូវបានគេនិយាយថានាំសំណាងក៏ដូចជាទ្រព្យសម្បត្តិនៅក្នុងឆ្នាំថ្មី។

១០.King cake៖ ជនជាតិក្រិច និងជនជាតិបារាំង រួមទាំង ជនជាតិប៊ុលហ្គារីតែងតែបរិភោគនំខេកនេះនៅថ្ងៃចូលឆ្នាំសកល ដោយពួកគេជឿថា នឹងនាំមកនូវលាភសំណាងក្នុងឆ្នាំថ្មីនេះ៕