ម៉ាឡេស៊ី៖ ក្មេងស្រីជនជាតិម៉ាឡេស៊ីអាយុ ៥ ឆ្នាំម្នាក់បានបាត់បង់ជីវិតបន្ទាប់ពីម្តាយរបស់នាង ទុកចោលអស់រយៈពេល ៤ ម៉ោង នៅក្នុងឡានបិទជិត ដែលចតនៅមន្ទីរពេទ្យ ក្នុងទីក្រុង Selangor ។

ស្រ្តីម្នាក់ដែលជាម្តាយរបស់កុមារីរងគ្រោះ បានធ្វើការនៅមន្ទីរពេទ្យ Shah Alam ក្នុងទីក្រុង Selangor ប្រទេសម៉ាឡេស៊ី បានបើកឡានទៅទទួលកូនរបស់នាងពីសាលាមត្តេយ្យនៅម៉ោង ២:០០ រសៀល ថ្ងៃទី ៣០ ខែមករា ដោយឱ្យកូនរបស់នាងអង្គុយកៅអីក្រោយ ហើយត្រឡប់ទៅធ្វើការវិញ។ ប៉ុន្តែពេលនោះនាងបានភ្លេចថាកូនរបស់នាងនៅគេងខាងក្រោយកៅអីរថយន្ត ទើបគាត់បិទម៉ាស៊ីន ចាក់សោររថយន្ត រួចបន្តទៅធ្វើការនៅមន្ទីរពេទ្យ។

លុះដល់ម៉ោងប្រហែល ៦ ល្ងាច ទើបប្តីរបស់នាងទូរស័ព្ទមក ទើបស្ត្រីអាយុ ៣៤ ឆ្នាំដឹងថា កូនស្រីរបស់នាងនៅក្នុងរថយន្ត ហើយក៏រត់សំដៅទៅរថយន្តបើកទ្វារឡាន ស្រាប់តែឃើញកូនស្រីបានសន្លប់ស្តូកស្តឹងនៅពេលនោះ ហើយត្រូវបានគេយកទៅសង្គ្រោះបន្ទាន់នៅមន្ទីរពេទ្យ Shah Alam តែម្តង។ ទោះជាយ៉ាងណា គ្រូពេទ្យបានបញ្ជាក់ថា ក្មេងស្រីម្នាក់នោះបានស្លាប់បាត់ទៅហើយ។

អធិការប៉ូលិសស្រុក Shah Alam លោក Mohd Iqbal Ibrahim បាននិយាយថា គ្មានរបួសណាមួយត្រូវបានរកឃើញលើក្មេងស្រីនោះទេ។ រឿងនេះកំពុងត្រូវបានស៊ើបអង្កេតក្រោមច្បាប់កុមារម៉ាឡេស៊ី។ មន្ត្រីម៉ាឡេស៊ីក៏បានដាស់តឿនឱ្យឪពុកម្តាយ ឬអាណាព្យាបាលទាំងអស់ត្រូវតែមានការប្រុងប្រយ័ត្នពេលដឹកជញ្ជូនកុមារតូចៗដើម្បីការពារឧប្បត្តិហេតុសោកនាដកម្មស្រដៀងគ្នានេះ។

គួរបញ្ជាក់ដែរថា នេះមិនមែនជាលើកទីមួយទេដែលករណីនេះបានកើតឡើង ប្រហែលបីខែមុន ឧប្បត្តិហេតុស្រដៀងគ្នានេះក៏បានកើតឡើងលើទារកអាយុ ២ ឆ្នាំម្នាក់បន្ទាប់ពីម្តាយរបស់គាត់ទុកក្នុងឡានអស់រយៈពេល ៧ ម៉ោងផងដែរ។ ជាមួយគ្នានេះដែរកាលពីខែតុលា ឆ្នាំ២០២៣ ក្មេងស្រីអាយុ ១៦ ខែនៅប្រទេសម៉ាឡេស៊ី ក៏បានស្លាប់ដោយសារតែឪពុករបស់នាងទុកនាងនៅក្នុងឡានអស់រយៈពេលជាច្រើនម៉ោង។ ក្នុងខែដដែលនោះ ទារកអាយុ ៨ ខែម្នាក់បានស្លាប់បន្ទាប់ពីត្រូវបានគេទុកចោលក្នុងរថយន្តរយៈពេល ១០ ម៉ោងក្នុងទីក្រុង Kuala Lumpur ផងដែរ៕

ប្រទេសបូលីវី ៖ អ្នកជំនាញគីមីម្នាក់រស់នៅប្រទេសបូលីវី (Bolivia គឺជាប្រទេសស្ថិតនៅអាមេរិកខាងត្បូង) បានផលិតសាប៊ូពីខ្លាញ់ដែលចម្អិនអាហាររួចនៅតាមផ្ទះបាយ នៅទីក្រុងឡាប៉ាស ។ នេះជាវិធីមួយផ្សេងទៀតក្នុងការកម្ចាត់ខ្លាញ់ប្រើប្រាស់រួច និងកាត់បន្ថយការចោលកាកសំណល់អាហារ ដោយយកកាកសំណល់ទាំងនេះមកធ្វើជាផលិតផលថ្មីសម្រាប់ប្រើប្រាស់ជាប្រយោជន៍បានច្រើនជាងមុន ។

អ្នកនាង Silveria Cutipa Pari ជាអ្នកគីមីវិទ្យា និងមានគំនិតច្នៃប្រឌិតនេះនិយាយថា នាងទទួលបានគំនិតនេះដំបូង គឺនៅពេលនាងបានសិក្សាមុខវិជ្ជាគីមី និងបង្កើតគម្រោងមួយក្នុងសាកលវិទ្យាល័យ ។ ពេលនោះ នាងបានរៀនសូត្រថា ខ្លាញ់ប្រើប្រាស់រួចហើយ គឺជាកាកសំណល់មួយប្រភេទដែលអាចបំពុលបរិស្ថានយ៉ាងខ្លាំង បើកម្ចាត់វាមិនបានត្រឹមត្រូវទេនោះ ។ ហេតុនេះ នាងក៏ចាប់ផ្តើមរកវិធីផ្លាស់ប្តូរខ្លាញ់ចម្អិនអាហាររួចហើយឱ្យក្លាយទៅជាសាប៊ូ តាំងពីឆ្នាំ២០១៤ ហើយនាងបានបង្កើតក្រុមហ៊ុនមួយឈ្មោះថា «Suma Qhana Soaps Krolla» មានន័យថា ជាសាប៊ូផលិតពីរុក្ខជាតិឱសថ តាមភាសា Aymara ។ វាជាភាសាមួយក្នុងចំណោមភាសាដែលពលរដ្ឋរស់នៅប្រទេសបូលីវី និយមប្រើប្រាស់ ។

អ្នកនាង Silveria Cutipa Pari បញ្ជាក់ថា ផលិតផលរបស់ក្រុមហ៊ុនមានដូចជា ៖ សាប៊ូម្សៅបោកគក់សម្លៀកបំពាក់, សាប៊ូលាងដៃ និងសាប៊ូងូតទឹក ។ សាប៊ូទាំងនេះជាមិត្តជាមួយបរិស្ថាន ហើយវាមិនបង្កគ្រោះថ្នាក់ដល់ប្រភពទឹកទេ បើធៀបនឹងក្រុមហ៊ុនធំៗ ឬឧស្សាហកម្មផ្សេងទៀត ដែលផលិតម្សៅសាប៊ូដោយប្រើប្រាស់នូវសារធាតុគីមី និងពណ៌ដើម្បីបង្កើនបរិមាណខ្ពស់ ។ ដូច្នេះ វានឹងបំផ្លាញប្រព័ន្ធអេកូឡូស៊ី និងប្រភពទឹកក្នុងសហគមន៍ ។

ទោះយ៉ាងណា នាងពុំបានបញ្ជាក់ពីដំណើរការផលិតសាប៊ូពីកាកសំណល់ខ្លាញ់របស់ក្រុមហ៊ុននាងទេ ប៉ុន្តែការច្នៃប្រឌិតបែបនេះមិនមែនជារឿងថ្មីទេ ព្រោះគេធ្លាប់បានឃើញការផលិតសាប៊ូពីខ្លាញ់ប្រើប្រាស់រួចយកមកផ្សំជាមួយសារធាតុ Sodium Hydroxide និងម្សៅពោត ។ រីឯការផលិតសាប៊ូអាចខុសៗគ្នាអាស្រ័យលើរូបមន្តរបស់អ្នកផលិត ប៉ុន្តែចំណុចសំខាន់ ការផលិតសាប៊ូ គួរតែធ្វើឡើងដោយអ្នកមានជំនាញ និងត្រូវប្រុងប្រយ័ត្នយ៉ាងខ្លាំង ។

អ្នកនាង Silveria Cutipa Pari យល់ឃើញថា ការផលិតសាប៊ូពីខ្លាញ់សល់ពីការចម្អិនអាហារបែបនេះ នឹងជួយដល់ប្រព័ន្ធអេកូឡូស៊ីកាន់តែខ្លាំងឡើងសម្រាប់អតិថិជន រួមទាំងសង្គមផងដែរ ។ អតិថិជនអាចប្រើប្រាស់ផលិតផលពីធម្មជាតិ និងលើកកម្ពស់ការយល់ដឹងពាក់ព័ន្ធនឹងការគ្រប់គ្រងបរិស្ថាន ៕

បរទេស៖ Apple បាននាំមុខគេលើលក្ខណៈវិនិច្ឆ័យទាំងអស់ និងជាប់ក្នុងបញ្ជីក្រុមហ៊ុនដែលទទួលបានការកោតសរសើរបំផុតនៅក្នុងពិភពលោកសម្រាប់ឆ្នាំ ២០២៣ ក្នុងរយៈ ១៧ ឆ្នាំជាប់ៗគ្នា។

ក្រុមហ៊ុន Apple បានវ៉ាដាច់ក្រុមហ៊ុនជាង ៣០០ ដើម្បីដណ្តើមតំណែងលេខមួយក្នុង បញ្ជី “ក្រុមហ៊ុនដែលកោតសរសើរបំផុតលើពិភពលោក” របស់ Fortune ដែលបានចេញផ្សាយកាលពីថ្ងៃទី១ ខែកុម្ភៈ ឆ្នាំ២០២៤។ រីឯចំណាត់ថ្នាក់ទីពីរបានទៅលើក្រុមហ៊ុនបច្ចេកវិទ្យា Microsoft និងទីបីបានទៅលើក្រុមហ៊ុន Amazon។

បញ្ជីឈ្មោះរបស់ Fortune ត្រូវបានធ្វើឡើងដោយសហការជាមួយក្រុមហ៊ុនប្រឹក្សាសកលលោក Korn Ferry ដោយធ្វើការស្ទង់មតិអ្នកជំនាញចំនួន ៣,៧២០ ដែលជានាយកប្រតិបត្តិ នាយក និងអ្នកវិភាគមូលបត្រនៅក្នុងឧស្សាហកម្មផ្សេងៗគ្នា។ អ្នកជំនាញទាំងនេះនឹងជ្រើសរើសក្រុមហ៊ុនចំនួន ១០ ពីបញ្ជីក្រុមហ៊ុនដែលជាប់ចំណាត់ថ្នាក់កំពូល ២៥ នៃការស្ទង់មតិកាលពីឆ្នាំមុន និងក្រុមហ៊ុនកំពូលទាំង ២០ នៅក្នុងឧស្សាហកម្មរបស់ពួកគេ។ ក្រៅពីនេះ ពួកគេក៏អាចបោះឆ្នោតឱ្យក្រុមហ៊ុនណាមួយដែលខ្លួនស្រឡាញ់ផងដែរ។

ដូច្នេះ Fortune បានចាត់ថ្នាក់ក្រុមហ៊ុនតាមលក្ខណៈវិនិច្ឆ័យមួយចំនួនដូចជា ការច្នៃប្រឌិត គុណភាពគ្រប់គ្រង ទំនួលខុសត្រូវសង្គម ភាពរឹងមាំផ្នែកហិរញ្ញវត្ថុ គុណភាពផលិតផល និងសេវាកម្ម រួមទាំងការប្រកួតប្រជែងជាសកល។ ដោយ Apple ជាប់ចំណាត់ថ្នាក់លេខ ១ ក្នុងលក្ខណៈវិនិច្ឆ័យបោះឆ្នោតទាំងអស់។ គួរកត់សម្គាល់ដែរថានៅក្នុងបញ្ជីថ្មីនេះ Nvidia ដែលជាក្រុមហ៊ុនផលិតកាតក្រាហ្វិក AI ដ៏ធំបំផុតនាពេលបច្ចុប្បន្ន ក៏បានចុះបញ្ជីនៅក្នុងកំពូលទាំង ១០ ជាលើកដំបូងផងដែរ។

ហេតុនេះហើយ បញ្ជីឈ្មោះក្រុមហ៊ុន Fortune ក្នុងចំណោមក្រុមហ៊ុនល្បីៗទាំង ១០ របស់ពិភពលោករួមមាន Apple, Microsoft, Amazon, Berkshire Hathaway, JP Morgan, Costco, Alphabet, American Express, Walmart និង Nvidia ៕

បរទេស៖ ក្រុមហ៊ុនបច្ចេកវិទ្យាយក្សរបស់អាមេរិក Intel បានផ្តួលក្រុមហ៊ុន Samsung Electronics របស់កូរ៉េខាងត្បូងដោយជោគជ័យ និងបានក្លាយជាក្រុមហ៊ុនផលិតបន្ទះឈីប semiconductor ដ៏ធំបំផុតរបស់ពិភពលោកនៅឆ្នាំ ២០២៣។

កាលពីថ្ងៃទី១ ខែកុម្ភៈ ឆ្នាំ២០២៤ យោងតាមរបាយការណ៍របស់ Counterpoint Research បានឱ្យដឹងថា ប្រាក់ចំណូលពីផ្នែកបន្ទះឈីបរបស់ក្រុមហ៊ុន Samsung Electronics បានថយចុះរហូតដល់ ៣៨% នៅឆ្នាំ២០២៣ ខណៈក្រុមហ៊ុន Intel ដែលជាគូប្រជែងរបស់ Samsung ក៏បានថយចុះដែរ ប៉ុន្តែការថយចុះនេះមិនធ្ងន់ធ្ងរដូចក្រុមហ៊ុន Samsung នោះទេ។

ក្រុមហ៊ុន Intel ដែលជាគូប្រជែងរបស់ Samsung មើលឃើញថាប្រាក់ចំណូលធ្លាក់ចុះ ១៥% ពី ៥៩.៨ ពាន់លានដុល្លារក្នុងឆ្នាំ ២០២២ ដល់ ៥០.៥ ពាន់លានដុល្លារក្នុងឆ្នាំ ២០២៣។ ខណៈក្រុមហ៊ុន Samsung Electronics បានធ្លាក់ចុះយ៉ាងខ្លាំងពី ៧០.២ ពាន់លានដុល្លារក្នុងឆ្នាំ ២០២២ មកត្រឹម ៤៣.៤ ពាន់លានដុល្លារក្នុងឆ្នាំ ២០២៣ ពោលគឺថយចុះរហូតដល់ ៣៨% ឯណោះ។

ហេតុផលត្រូវបានគេនិយាយថាដោយសារតែនិន្នាការធ្លាក់ចុះនៅក្នុងផ្នែកអង្គចងចាំ និងការបរាជ័យរបស់ក្រុមហ៊ុន Samsung ក្នុងការទាក់ទាញអតិថិជនសម្រាប់ដំណើរការផលិតបន្ទះឈីបកម្រិតខ្ពស់របស់ខ្លួន។ ដូច្នេះហើយ ក្រុមហ៊ុនផលិតបន្ទះឈីបរបស់អាមេរិកបានវ៉ាដាច់ Samsung ដើម្បីទទួលបានតំណែងលេខមួយនៅក្នុងទីផ្សារបន្ទះឈីបពិភពលោកក្នុងឆ្នាំ ២០២៣។

ទន្ទឹមនឹងនេះ Nvidia ក៏ជាកន្លែងភ្លឺស្វាងនៅក្នុងឧស្សាហកម្មបន្ទះឈីបពិភពលោកទាក់ទងនឹងកំណើនប្រាក់ចំណូលផងដែរ ដោយសារការរីកចំរើននៃបញ្ញាសិប្បនិម្មិត និងតម្រូវការ GPU ខ្លាំងសម្រាប់ម៉ាស៊ីនមេពពក។ នៅឆ្នាំ ២០២៣ Nvidia បានកត់ត្រាការកើនឡើង ៨៦% នៃប្រាក់ចំណូលដល់ ៣០.៣ ពាន់លានដុល្លារ ពី ១៦.៣ ពាន់លានដុល្លារក្នុងឆ្នាំ ២០២២។ ហេតុនេះហើយ ក្រុមហ៊ុនផលិតបន្ទះឈីបយក្សនេះបានលោតពីចំណាត់ថ្នាក់ទី ១០ ក្នុងឆ្នាំ ២០២២ មកចំណាត់ថ្នាក់លេខ ៣ នៅឆ្នាំ២០២៣។

គួរបញ្ជាក់ដែរថា នៅក្នុងក្រុមហ៊ុនផលិតបន្ទះឈីបពិភពលោកកំពូលទាំង ១០ ប្រាក់ចំណូលរបស់ក្រុមហ៊ុននីមួយៗនៅឆ្នាំ ២០២៣ គឺមានតាមលំដាប់ដូចជា Qualcomm រកបាន ៣២ ពាន់លានដុល្លារ, Broadcom ៣០ ពាន់លានដុល្លារ, SK Hynix ២៣,៦ ពាន់លានដុល្លារ, AMD ២២,៦ ពាន់លានដុល្លារ, Texas Instruments ១៧,៥ ពាន់លានដុល្លារ, Infineon ១៧,៥ ពាន់លានដុល្លារ និង STMicroelectronics ១៧,៣ ពាន់លានដុល្លារ៕

សហរដ្ឋអាមេរិក ៖ ពលរដ្ឋអាមេរិកបានបង្ហាញការមិនយល់ស្របនឹងប្រធានាធិបតីអាមេរិក លោក ចូ បៃឌិន លូកដៃក្នុងសង្គ្រាមរវាងប្រទេសអ៊ីស្រាអែល និងក្រុមហាម៉ាស់ ដោយសារពួកគេយល់ឃើញថា សង្គ្រាមនេះបានអូសបន្លាយពេលកាន់តែខ្លាំងឡើង ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២ ខែកុម្ភៈ ឆ្នាំ២០២៤ ។

បើតាមការស្ទង់មតិថ្មីមួយរបស់សារព័ត៌មាន AP រួមជាមួយ NORC ជាមជ្ឈមណ្ឌលកិច្ចការសាធារណៈបង្ហាញថា ពលរដ្ឋអាមេរិកពាក់កណ្តាលប្រទេសនិយាយថា ប្រតិបត្តិការយោធានៅតំបន់ហ្គាហ្សារបស់ប្រទេសអ៊ីស្រាអែល បានចំណាយពេលរហូតដល់១៥សប្តាហ៍ហើយ ហើយសង្គ្រាមនេះកាន់តែអូសបន្លាយពេលខ្លាំងឡើង ។ រីឯសមាជិកគណបក្ស Republican បានចាប់ផ្តើមមិនពេញចិត្តកាន់តែខ្លាំង ។

ការស្ទង់មតិនេះបានបង្ហាញឱ្យឃើញពីការគាំទ្រប្រទេសអ៊ីស្រាអែល និងការពេញចិត្តក្នុងការដោះស្រាយស្ថានការណ៍របស់រដ្ឋាភិបាលអាមេរិក លោក ចូ បៃឌិន បានធ្លាក់ចុះនៅទូទាំងប្រទេស ។ លទ្ធផលស្ទង់មតិបង្ហាញថា មានពលរដ្ឋអាមេរិកត្រឹមតែ៣១% ប៉ុណ្ណោះ ដែលយល់ស្របជាមួយការគ្រប់គ្រងជម្លោះរបស់រដ្ឋាភិបាលអាមេរិក ។

រីឯសមាជិកគណបក្ស Democrat បានយល់ស្របជាមួយរដ្ឋាភិបាលអាមេរិកត្រឹមតែ៤៦% ប៉ុណ្ណោះ ។ នេះបង្ហាញថា ការមិនពេញចិត្តរបស់សមាជិកគណបក្សនេះបានកើនឡើងយ៉ាងឆាប់រហ័ស បើធៀបនឹងពេលមុននេះ ដែលពួកគេបានគាំទ្រឱ្យអ៊ីស្រាអែលវាយបកវិញ ក្រោយពីក្រុមប្រដាប់អាវុធហាម៉ាស់បានបើកឆាកវាយលុកមកលើអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣ ។

អ្នកនាង Melissa Morales អាយុ៣៦ឆ្នាំ គឺជាបុគ្គលឯករាជ្យផ្នែកនយោបាយនៅទីក្រុង Runnemede រដ្ឋ New Jersey និយាយថា នាងបានមើលវីដេអូ និងព័ត៌មាននៅតំបន់ហ្គាហ្សាជារៀងរាល់ថ្ងៃ ។ នាងឃើញរូបភាពកុមារប៉ាឡេស្ទីនជាច្រើននាក់រងរបួស និងក្លាយជាក្មេងកំព្រា ឬគ្មានផ្ទះរស់នៅ ដោយសារការប្រយុទ្ធគ្នានៅតំបន់ហ្គាហ្សា ។ ដូច្នេះ វាធ្វើឱ្យនាងគិតពីកូនប្រុសអាយុ៣ឆ្នាំ របស់នាង ។

អ្នកនាង Melissa Morales បន្តថា ការវាយលុករបស់អ៊ីស្រាអែលកាន់តែអូសបន្លាយពេលខ្លាំង ហើយរដ្ឋាភិបាលរបស់លោក ចូ បៃឌិន ក៏បានគាំទ្រអ៊ីស្រាអែលដែរ ។ លោក ចូ បៃឌិន បានគាំទ្រអ៊ីស្រាអែលទាំងផ្នែកយោធា និងការទូត តាំងពីក្រុមប្រដាប់អាវុធហាម៉ាស់បានលុកអ៊ីស្រាអែល កាលពីថ្ងៃទី៧ ខែតុលា ឆ្នាំ២០២៣ ។ ចំណែកអ៊ីស្រាអែលប្រកាសថា ការវាយលុករបស់ក្រុមហាម៉ាស់បានឆក់យកជីវិតពលរដ្ឋអ៊ីស្រាអែល ចំនួន១.២០០នាក់ ។

អាមេរិកបានគាំទ្រប្រទេសអ៊ីស្រាអែលរហូតមក ហើយអាមេរិកកាន់តែឯកោបន្តិចម្តងៗពីប្រទេសផ្សេងទៀត ខណៈពលរដ្ឋប៉ាឡេស្ទីនបានស្លាប់រហូតដល់២៧.០០០នាក់ ហើយជនរងគ្រោះ២នាក់ ក្នុងចំណោម៣នាក់ គឺជាស្ត្រី និងកុមារ ។ រដ្ឋាភិបាលរបស់លោក ចូ បៃឌិន និយាយថា នឹងព្យាយាមដាក់សម្ពាធលើអ៊ីស្រាអែលឱ្យកាត់បន្ថយការសម្លាប់ជនស្លូតត្រង់ និងអនុញ្ញាតឱ្យមានការផ្តល់ជំនួយមនុស្សធម៌បន្ថែមទៀត ៕

សហរដ្ឋអាមេរិក៖ យន្តហោះធុនស្រាលមួយគ្រឿងមានបញ្ហាម៉ាស៊ីន បានធ្លាក់ចូលទៅក្នុងផ្ទះមួយ បណ្តាលឱ្យមានការឆាបឆេះយ៉ាងខ្លាំង រីករាលដាលដល់ផ្ទះក្បែរនោះ ធ្វើឱ្យអ្នកបើកយន្តហោះ និងមនុស្សនៅក្នុងផ្ទះបានបាត់ជីវិតភ្លាមៗ រួមទាំងអ្នកជិតខាងក៏រងរបួសធ្ងន់ធ្ងរផងដែរ។

ព្រឹត្តិការណ៍សោកនាដកម្មនេះបានកើតឡើងនៅម៉ោងប្រហែល ៧ យប់នាថ្ងៃទី ១ ខែកុម្ភៈ ឆ្នាំ២០២៤ នៅឯចំណតផ្ទះចល័ត Bay Waters ទីក្រុង Clearwater រដ្ឋ Florida សហរដ្ឋអាមេរិក។ លោក Scott Ehlers ប្រធាននាយកដ្ឋានពន្លត់អគ្គីភ័យក្នុងតំបន់ បាននិយាយថា នៅពេលដែលក្រុមពន្លត់អគ្គីភ័យមកដល់កន្លែងកើតហេតុ ផ្ទះចល័តចំនួនបួនបានឆេះ ហើយបំណែកយន្តហោះស្ថិតក្នុងផ្ទះមួយខ្នងទៀត បណ្តាលឱ្យអ្នកស្រុកមួយចំនួនរងរបួស និងមនុស្សជាច្រើននាក់បានស្លាប់។

លោក Elhers បានបន្ថែមថា “ខ្ញុំអាចបញ្ជាក់បានថា មានអ្នកស្លាប់ជាច្រើននាក់ ទាំងនៅលើយន្តហោះ និងនៅក្នុងផ្ទះ” ទោះជាយ៉ាងណា គាត់មិនបានប្រាប់ចំនួនជាក់លាក់នោះទេ។ ចំពោះគ្រោះថ្នាក់នេះ រដ្ឋបាលអាកាសចរណ៍សហព័ន្ធអាមេរិក (FAA) បាននិយាយថា វាគឺជាយន្តហោះ Beechcraft Bonanza V35 ដែលជាយន្តហោះធុនស្រាល ម៉ាស៊ីនតែមួយ កៅអី ៦ បានរាយការណ៍ពីបញ្ហាម៉ាស៊ីន។

FAA បាននិយាយទៀតថា ចំនួនពិតប្រាកដនៃអ្នកជិះយន្តហោះនៅក្នុងយន្តហោះមិនទាន់ដឹងនៅឡើយទេ។ វានៅតែស្ថិតក្នុងដំណាក់កាលនៃការត្រួតពិនិត្យការពិត និងស៊ើបអង្កេតករណីនេះបន្តទៀត។

គួរបញ្ជាក់ដែរថា មុននឹងជួបឧបទ្ទវហេតុនេះ អ្នកបើកយន្តហោះបានរាយការណ៍ពីភាពអាសន្នទៅកាន់អាកាសយានដ្ឋានអន្តរជាតិ St Pete-Clearwater ភ្លាមៗ មុនពេលដែលយន្តហោះបានចុះពីរ៉ាដាប្រហែល ៣ ម៉ាយភាគខាងជើងនៃផ្លូវរត់មួយ។ លោក Steven Ascari អ្នកស្រុកនៅទីនោះបាននិយាយថា គាត់មានការភ្ញាក់ផ្អើលនិងភ័យរន្ធត់យ៉ាងខ្លាំង នៅពេលដែលឃើញយន្តហោះធ្លាក់ចូលផ្ទះក្បែរនោះ ទោះយ៉ាងណា គាត់និងគ្រួសាររបស់គាត់មិនមានគ្រោះថ្នាក់នោះទេ៕

ប្រទេសឥណ្ឌា ៖ សារព័ត៌មានឥណ្ឌា The Times of India បានរាយការណ៍កាលពីថ្ងៃទី២ ខែកុម្ភៈ ឆ្នាំ២០២៤ ថា ភ្នាក់ងារសន្តិសុខប្រទេសឥណ្ឌាបានដោះលែងសត្វព្រាប១ក្បាលទៅកាន់ធម្មជាតិវិញ ក្រោយពីភ្នាក់ងារសន្តិសុខឥណ្ឌាបានចាប់វាឃុំអស់រយៈពេលជាង៨ខែ នៅមន្ទីរពេទ្យសត្វមួយកន្លែង ។ ការចាប់សត្វព្រាបនេះឃុំទុក ដោយសារគេសង្ស័យថា វាអាចជាព្រាបស៊ើបការណ៍សម្ងាត់របស់រដ្ឋាភិបាលក្រុងប៉េកាំង ។

ភ្នាក់ងារសន្តិសុខឥណ្ឌាបានចាប់ព្រាប១ក្បាលនេះនៅទីក្រុងបុមបៃ ដោយសារគេបានសង្កេតឃើញថា ជើងទាំងពីររបស់វាមានពាក់ចិញ្ចៀនធ្វើពីទង់ដែង និងអាលុយមីញ៉ូម ។ រីឯនៅខាងក្រោមស្លាបម្ខាងរបស់វា គឺមានសរសេរជាអក្សរស្រដៀងនឹងអក្សរចិនទៀតផង ។

ទោះយ៉ាងណា ក្រោយពីប្រទេសឥណ្ឌាបានចំណាយពេលស៊ើបអង្កេតសត្វព្រាបនេះអស់មួយរយៈមក ភ្នាក់ងារសន្តិសុខឥណ្ឌាបានសម្រេចចិត្តដោះលែងព្រាបនេះឱ្យមានសេរីភាពវិញ ។ ចំណែកក្រសួងការបរទេសចិនបានបដិសេធជាផ្លូវការ និងមិនបកស្រាយអ្វីទាំងអស់ពាក់ព័ន្ធនឹងរឿងនេះ ។

នេះមិនមែនជាលើកទី១ ទេ ដែលប្រទេសឥណ្ឌាបានចាប់សត្វព្រាបនាំសារបែបនេះ កាលពីឆ្នាំ២០១៦ មន្ត្រីការពារតំបន់ព្រំដែនរបស់ឥណ្ឌាចាប់បានសត្វព្រាប១ក្បាលនៅព្រំដែនជាប់ប្រទេសប៉ាគីស្ថាន ។ នៅលើជើងរបស់សត្វព្រាប១ក្បាលនោះមានចងក្រដាស១សន្លឹក ដែលសរសេរគំរាមកំហែងនាយករដ្ឋមន្ត្រីឥណ្ឌា លោក Narendra Modi ។

ក្រោយមក នៅឆ្នាំ២០២០ មន្ត្រីឥណ្ឌាបានចាប់សត្វព្រាប១ក្បាលទៀតនៅបរិវេណជាយដែនជិតប្រទេសប៉ាគីស្ថានដូចគ្នាដែរ ដែលព្រាបនោះមានពាក់ចិញ្ចៀននៅជើងរបស់វា ហើយនៅលើដងខ្លួនវាមានសារបង្ហាញពីអាសយដ្ឋាន និងលេខទូរស័ព្ទនៅប្រទេសប៉ាគីស្ថាន ៕

ប្រទេសថៃ៖ ថ្មីៗនេះទីក្រុង Lopburi របស់ប្រទេសថៃបានប្រឈមមុខនឹងហានិភ័យនៃការក្លាយជាទីក្រុងខ្មោច ដោយសារតែសត្វស្វារាប់ពាន់ក្បាលបានលុកលុយ និងបំផ្លាញហាងនានា ក៏ដូចជារារាំងអ្នកទេសចរពីការដើរទិញឥវ៉ាន់ និងបណ្តាលឱ្យប្រជាជននៅទីនោះភៀសខ្លួនចេញផងដែរ។

កាលពីថ្ងៃទី២ ខែកុម្ភៈ ឆ្នាំ២០២៤ យោងតាម Daily Mail បានឱ្យដឹងថា បច្ចុប្បន្នមជ្ឈមណ្ឌលពាណិជ្ជកម្មនៃទីក្រុងលបបុរី ភាគកណ្តាលប្រទេសថៃ កំពុងស្ថិតក្នុងគ្រោះថ្នាក់ក្លាយជាទីក្រុងខ្មោច។ អ្នកតំណាងមជ្ឈមណ្ឌលផ្សារទំនើប Pingya លោក Surachat Chanprasit បាននិយាយថា សត្វស្វាតែងតែចូលលុកលុយក្នុងហាង និងយាយីអ្នកទិញទំនិញ ដែលប៉ះពាល់ដល់អាជីវកម្ម ធ្វើឱ្យទីក្រុងនេះត្រូវបាន “គ្រប់គ្រង” ដោយសត្វស្វាប្រហែល ៣,៥០០ ក្បាល ។

សត្វស្វារាប់ពាន់ក្បាលនេះបានបង្កការភ័យខ្លាចដល់ប្រជាជននៅទីក្រុង ដោយបានបំផ្លិចបំផ្លាញអាជីវកម្មនានា ធ្វើឱ្យអ្នកទេសចរ និងអ្នកទិញទំនិញត្រូវភៀសខ្លួនចេញ។ ក្នុងនោះក្រុមហ៊ុន និងហាងជាច្រើនក៏បានបិទ និងឈប់ដំណើរការមួយរយៈ ហើយក៏បានចាកចេញពីទីក្រុងលបបុរីផងដែរ។

កាលពីពីរឆ្នាំមុន មជ្ឈមណ្ឌល Pingya ត្រូវបានដាក់លក់នៅលើទីផ្សារ ប៉ុន្តែបច្ចុប្បន្នមិនមានអ្នកទិញទេ ទោះបីជាតម្លៃបានធ្លាក់ចុះពី ១០០ លានបាត ទៅ ៧៥ លានបាតក៏ដោយ។ ក្រុមប្រឹក្សាភិបាលនៃមជ្ឈមណ្ឌលក៏បានកាត់បន្ថយការជួលដើម្បីជួយអ្នកជួលជំនះវិបត្តិ បន្ទាប់ពីមនុស្សជាច្រើនចង់បញ្ចប់កិច្ចសន្យារបស់ពួកគេ។

អ្នកតំណាងមជ្ឈមណ្ឌលរូបនេះក៏បានបន្តទៀតថា កន្លងមកមានអ្នកវិនិយោគចិនជាច្រើននាក់មានបំណងចង់មកវិនិយោគនៅទីក្រុងនេះ ប៉ុន្តែក្រោយពីដឹងថាកន្លែងនេះមិនអាចដោះស្រាយបញ្ហាសត្វស្វាបានទាំងស្រុង គម្រោងនេះក៏ត្រូវបញ្ឈប់។

លោក Pongsatorn Chaichanapanich ប្រធានក្រុមទទួលភ្ញៀវក្នុងទីក្រុងក៏បាននិយាយដែរថា អាជីវកម្មបានបោះបង់ចោលតំបន់ទល់មុខប្រាសាទ Phra Prang Sam Yot ដែលជាគោលដៅទេសចរណ៍ដ៏ពេញនិយម។ ទីក្រុងត្រូវផ្លាស់ប្តូរគោលនយោបាយ និងធ្វើវិសោធនកម្មច្បាប់ ដើម្បីអនុញ្ញាតឱ្យមនុស្សគ្រប់គ្រងសត្វស្វានៅតំបន់កណ្តាល។ លោកបាននិយាយថា វាចាំបាច់ដើម្បីស្តារសេដ្ឋកិច្ចឡើងវិញ និងទាក់ទាញភ្ញៀវទេសចរឱ្យបានច្រើន។

គួរបញ្ជាក់ដែរថា ទីក្រុង Lopburi បានក្លាយជាតំបន់ទេសចរណ៍ជុំវិញពិភពលោកជាយូរមកហើយដោយសារតែ “កេរ្តិ៍ឈ្មោះ” របស់ស្វាព្រៃ។ អ្នកទស្សនាច្រើនតែមកលេងកន្លែងនេះដើម្បីមើលសត្វស្វា និងថតរូប Selfie ជាមួយពួកគេ។ ទីក្រុងក៏រៀបចំពិធីបុណ្យស្វាប្រចាំឆ្នាំផងដែរ ដើម្បីថ្លែងអំណរគុណដល់សត្វនេះ ដែលបានជួយទីក្រុង Lopburi ទាក់ទាញភ្ញៀវទេសចរផងដែរ។

ទោះជាយ៉ាងណា អត្រាកំណើនសត្វស្វាគឺកើនឡើងខ្លាំង ដែលបណ្តាលឱ្យទីក្រុងនេះត្រូវបានបំផ្លេចបំផ្លាញ អភិបាលខេត្ត Ampol Angkhapakornkul ថ្មីៗនេះ បានចុះទៅពិនិត្យទីក្រុង ហើយបានសន្យាថានឹងធ្វើការជាមួយនាយកដ្ឋានឧទ្យានជាតិ សត្វព្រៃ និងរុក្ខជាតិ ដើម្បីដោះស្រាយបញ្ហានេះ ក៏ដូចជាចាប់ផ្តើមយុទ្ធនាការក្រៀវ ដើម្បីកាត់បន្ថយអត្រាកំណើនសត្វស្វា៕