បវរកញ្ញា អ៊ិន លក្ខិណា និង អ៊ិន ម៉ូលីកា ជាបងស្រីបានធ្វើឱ្យមហាជនមានការចាប់អារម្មណ៍យ៉ាងខ្លាំងនៅពេលបងប្អូនអ្នកទាំងពីរបានតែងខ្លួនជា«អប្សរាមាស អប្សរាប្រាក់» ចូលរួមកម្មវិធីរបស់ ជី ដេវីត និង ទេព បូព្រឹក្ស។ តាមការបញ្ជាក់របស់អ្នកទាំងពីរការតុបតែងខ្លួនបែបនេះគឺមិនងាយស្រួលឡើង ខណៈវាមានអត្ថន័យបង្កប់ពីក្រោយថែមទៀត។

អ៊ិន លក្ខិណា Miss Cosmo Cambodia 2024 ថាការតែងខ្លួនរបស់នាងដ្បិតតែលំបាកប៉ុន្តែក្នុងនាមជាកូនខ្មែរនាងត្រូវតែថែរក្សានិងធ្វើឱ្យបាន។ លក្ខិណា ថែមទាំងសំណូមពរឱ្យសាធារណជនថែរក្សាការពារវប្បធម៌ខ្មែរទាំងអស់គ្នា។ ចំណែកបងស្រីរបស់ លក្ខិណា គឺកញ្ញា អ៊ិន ម៉ូលីកា វិញបានតែងខ្លួនជាអប្សរាប្រាក់ ខណៈបងប្អូនអ្នកទាំងពីរគឺបានសម្រេចចិត្តភ្លាមៗទៅចូលរួមកម្មវិធី «ខ្លឹមព្រះនគរ» ដោយជិះស៊ីក្លូ។

តាមការបរិយាយរបស់ អ៊ិន ម៉ូលីកា «ធីតាឯកសង្រ្កាន្ត»ឆ្នាំ២០២៣ បានឱ្យដឹងថាពួកគេតុបតែងខ្លួនតាំងពីម៉ោង១២ថ្ងៃត្រង់ ទោះបីជាមានការស្អិតខ្លួនក្តីប៉ុន្តែនោះមិនជាបញ្ហាចោទនោះទេ។ ចំពោះអត្ថន័យនៃឈុត «អប្សរាមាស អប្សរាប្រាក់» ម៉ូលីកា បានពន្យល់ថា នៅប្រាសាទអង្គរវត្តពេលពន្លឺព្រះអាទិត្យរះឡើងគឺចាំងពណ៌មាស ហើយនៅពេលថ្ងៃឡើយគឺចេញជាពណ៌ប្រាក់វិញ។

វីដេអូដែល អ៊ិន លក្ខិណា និងបងស្រី តែងខ្លួនជា «អប្សរាមាស អប្សរាប្រាក់» នេះបានទាក់ទាញចំណាប់អារម្មណ៍យ៉ាងខ្លាំងរហូតមកទល់នឹងរសៀលថ្ងៃទី១៣ មករា នេះមានការទស្សនាលើសពី៥.៤លានដងនៅលើបណ្តាញសង្គមហ្វេកប៊ុករបស់ លក្ខិណា។ មិនត្រឹមតែប៉ុណ្ណោះរូបភាពអ្នកទាំងពីរបានលេចឡើងនៅលើផេកគាំទ្របវរកញ្ញានៅក្រៅប្រទេសផងដែរ៕

ព្រឹត្តិការណ៍ «ខ្លឹមព្រះនគរ» ដែលរៀបចំឡើងដោយតារាចម្រៀង ជី ដេវីត និងទេព បូព្រឹក្ស ពិតជានាំមកនូវផ្ទាំងទស្សីយភាពដែលមិនអាចបំភ្លេចបានក្នុងបេះដូងកូនខ្មែរ។ ការរៀបចំបង្ហាញពីវប្បធម៌ខ្មែរនេះ ពេជ្រ សូលីកា ហ៊ានអះអាងថានោះជាក្តីស្រលាញ់ពិតប្រាកដរបស់ទេព បូព្រឹក្ស។ ចំណែកឯអ្នកលក់អនឡាញ យូរ៉ា វិញហ៊ានធានាថាប្តីប្រពន្ធមួយគូនេះពិតជាមនុស្សល្អពិតៗ។

តារាចម្រៀង ពេជ្រ សូលីកា បានបង្ហាញពីអារម្មណ៍របស់ខ្លួនមានមោទនភាពចំពោះតារាចម្រៀង ទេព បូព្រឹក្ស ដែលជាមិត្តសម្លាញ់ម៉ឺនឆ្នាំក្នុងការធ្វើរឿងដ៏អស្ចារ្យសម្រាប់វប្បធម៌ ខ្មែរ។ នាងបានសរសេរនៅលើបណ្តាញសង្គមបង្ហាញទៅកាន់សាធារណជនថា «ឯងធ្វើវាបានល្អបំផុតហើយ គ្នាសប្បាយចិត្តពេលឃើញឯងមានក្ដីសុខជាមួយអ្វីដែលឯងចង់ធ្វើចេញពីបេះដូងឯង។ មិនថាក្នុងកាលៈទេសៈណាមិត្តម្នាក់នេះ តែងតែគាំទ្រត្រេកអរហើយគោរពតាមការសម្រេចចិត្តរបស់ឯងជានិច្ច ។ព្រោះគ្នាពិតជាបានទទួលនូវអារម្មណ៍ ចេញពីបេះដូងដែលស្នេហាវប្បធម៌ជាតិពិតមិនក្លែងបន្លំមួយវិនាទីណារបស់ឯងពិតៗឯងធ្វើចេញពីចិត្តនឹងបេះដូងទើបឯងទទួលបានក្ដីស្រលាញ់ដ៏កក់ក្ដៅមួយនេះ I’m so proud of you»។

ចំណងមិត្តភាពរបស់តារាចម្រៀង ពេជ្រ សូលីកា និង ទេព បូព្រឹក្ស មានភាពរឹងមាំនិងគាំទ្រគ្នាទៅវិញទៅមកបែបនេះបានធ្វើឱ្យអ្នកគាំទ្រជាច្រើនសប្បាយចិត្តយ៉ាងខ្លាំង។

ងាកមកកាន់អ្នកលក់អនឡាញ យូរ៉ា វិញ ដ្បិតថាមិនបានចូលរួមកម្មវិធី «ខ្លឹមព្រះនគរ»ដោយផ្ទាល់ប៉ុន្តែបានបង្ហាញពីភាពចិត្តល្អរបស់ប្តីប្រពន្ធមួយគូនេះ។ អ្នកនាង យូរ៉ា បានបង្ហោះរូប ជី ដេវីត និង ទេព បូព្រឹក្ស អមមកជាមួយនឹងពាក្យពេចន៍ថា «មនុស្សល្អពិតខ្ញុំហ៊ានចេញមុខនិយាយថាបេះដូងគាត់ល្អណាស់ខ្ញុំនៅឧត្តរមានជ័យមែនពិត តែការបារម្ភ រុញជាប្រាក់ឱបត្ថម្ភស្បៀងកងទ័ព សង្គ្រាមពីរដងមកនេះ ចែព្រឹក្ស បងវីត គិតគូរហូតដល់ខ្ញុំរអៀសខ្លួន មិនចាំបាច់ស្នើសុំ តែគាត់សួររាល់បញ្ហាព្រំដែនតាមរយៈខ្ញុំរហូត បងៗកងទ័ពម៉ារយះធំមកនេះខាងប្រាសាទតាមាន់ តាក្របីដែលបានទទួលស្បៀងអាហារហូប មិនភ្លេចទឹកចិត្តបរិសុទ្ធរបស់បងទាំងពីរទេ»។

ឃើញមានការសរសើរមកកាន់ខ្លួនបែបនេះតារាចម្រៀង ជី ដេវីត ក៏បានចូលទៅអរគុណអ្នកនាង យូរ៉ា ផងដែរជាពិសេសថែមទាំងបានហៅគ្នាថាជាអ្នកដន្លងទៀត៕

បន្ទាប់ពីរៀបចំស្បៀងដែលទទួលបានពីកម្មវិធីប្រគំតន្រ្តីនៅប្រទេសបារាំងនិងមូលធិនិផ្សេងទៀតសមាគមសិល្បករខ្មែរបានដឹកនាំសិល្បករ សិល្បការិនីជាច្រើនរូបទៅចែកអំណោយនៅជំរំភៀសសឹកមួយកន្លែងនៅឯខេត្តសៀមរាប។

វណ្ណដា វណ្ណថាន រ៉េត ស៊ូហ្សាណា នរិទ្ធ យូហៃ ស៊ីន យូប៊ីន JB ខាត់ វៃហាង តារាកំប្លែងនាយក្រឹម នាយចាយចៀន ពិធីការិនីដ៏ល្បីល្បាញ យុគ ចិន្តា និងសិល្បករផ្សេងទៀតបានបង្ហាញវត្តមាននិងសេចក្តីស្រលាញ់ចំពោះក្មេងៗនៅជំរំភៀសសឹកនោះ។ សិល្បករ សិល្បការិនី បានផ្តល់បរិយាកាសរីករាយកាន់បន្ថយភាពតានតឹងជាមួយនឹងការបកស្រាយចម្រៀង និងការផាត់ពណ៌គំនូរផងដែរ។ សកម្មភាពរបស់តារាល្បីៗទាំងនេះគឺស្ថិតក្រោមការរៀបចំរបស់សមាគមសិល្បករខ្មែរតាមរយៈមូលនិធិ « Rise For Khmer»។

វីដេអូមួយដែលចែករំលែកនៅលើបណ្តាញសង្គមទិកតុកគេបានឃើញតារាចម្រៀងរ៉េប វណ្ណដា នៅជិតនឹងកុមារីម្នាក់ដែលកំពុងផាត់ពណ៌គំនូរដែលទឹកមុខតារាប្រុសរូបនេះពោរពេញដោយក្តីស្រលាញ់និងភាពកក់ក្តៅ។ ចំណែកឯវីដេអូផ្សេងទៀតបានបង្ហាញឱ្យឃើញសិល្បករ សិល្បការិនី បង្ហាញបរិយាកាសរីករាយតាមរយៈសកម្មភាពផ្សេងៗផងដែរ។

ការចូលរួមរបស់ វណ្ណដា និងតារាល្បីជាច្រើនទៀតកាលពីថ្ងៃទី១២ ខែមករា ឆ្នាំ២០២៥នេះគឺបាននាំយកសម្ភារប្រើប្រាស់ និងស្បៀងអាហារ ទៅចែកជូនបងប្អូនជនភៀសសឹក ក្រុមគ្រួសារកងទ័ព និងវីរកងទ័ព ចំនួន១៨០០គ្រួសារ ស្ថិតនៅក្នុងទីតាំងភូមិសាស្ត្រ ខេត្តសៀមរាប៕

លោក ហួរ ឡាវី និង វី ឌីណែត ជាកូនស្រីបានចេញរួមគ្នាលើកដំបូងបកស្រាយទៅកាន់ទស្សនិកជនដែលបានបញ្ចេញមតិផ្សេងៗយល់ច្រឡំលើលោក ហួរ ឡាវី បកស្រាយបទចម្រៀងអ្នកដទៃតែតាំងខ្លួនធ្វើជាម្ចាស់បទ ជាក់ស្តែងដូចជាបទ «ឱ្យបងសុំស្រលាញ់ផង» ជាដើម។

នៅល្ងាចថ្ងៃទី១០ ខែមករា តារាចម្រៀង វី ឌីណែត បានចេញវីដេអូបកស្រាយជាមួយនឹងលោកឪពុករយៈពេល៥នាទីដោយភ្ជាប់មកជាមួយនឹងចំណងជើងថា «នាងខ្ញុំនិងប៉ាសូមមកសម្រាយចម្ងល់បងប្អូនទាំងអស់គ្នា និងសូឱ្យបងប្អូនទាំងអស់គ្នាឈប់យល់ច្រឡំទាក់ទងនឹងបទចម្រៀង «ឱ្យបងសុំស្រលាញ់ផង» ។ វី ឌីណែត បានរៀបរាប់ថាកាលពីប៉ុន្មានថ្ងៃមុនឪពុករបស់នាងបានឡើងកម្មវិធីមួយហើយមានអ្នកខម្មិនដាក់ឪពុករបស់នាងថាយកបទចម្រៀងគេមកច្រៀងហើយសរសេរដាក់ថាជាបទខ្លួនឯង និពន្ធដោយខ្លួនឯង។

តារាចម្រៀង វី ឌីណែត បានបញ្ជាក់ថាឪពុករបស់ខ្លួនមិនដែលយកបទរបស់គេមកច្រៀងហើយអះអាងថាជាបទខ្លួនឯងនោះទេហើយកាលពីជំនាន់មុនខាងផលិតកម្មបានយកបទចម្រៀងមកឱ្យឪពុករបស់ខ្លួនច្រៀងដូច្នេះគាត់មិនដឹងថាបទនោះជារបស់នរណាដែរគ្រាន់តែដាក់ថា ច្រៀងឡើងវិញដោយលោក ហួរ ឡាវី។ ជាមួយគ្នានេះដែរលោក ហួរ ឡាវី ក៏បានរៀបរាប់ប្រាប់ពីបទចម្រៀងរបស់លោកផ្ទាល់ហើយក្នុងនោះក៏មានការរួមចំណែកពីលោកក្នុងការសរសេរដូចជាបទ «អាណែតមាសបង» «អាល័យក្លិនអូន» «សែនអាល័យ« «ថ្ងៃណាបំភ្លេចអូនបាន» និងបទចម្រៀងមួយចំនួនទៀតហើយលោកក៏មិនដែលយកបទគេមកដាក់ថាជាបទរបស់ខ្លួនឯងនោះទេ។

បទចម្រៀងដែលទស្សនិកជនមានការយល់ច្រឡំខ្លាំងជាងគេគឺបទ «ឱ្យបងសុំស្រលាញ់ផង» «ពីរម៉ាត់យ៉ាងខ្លី» ជាបទរបស់លោក ហួរ ឡាវី ប៉ុន្តែបទទាំងនេះមិនមែនជាបទរបស់លោកនោះ ហើយម្ចាស់បទចម្រៀង «ឱ្យបងសុំស្រលាញ់ផង» គឺលោក វ័រ សារុន។

ការចេញមកបញ្ជាក់នេះ វី ឌីណែត ថាគឺមិនចង់ឱ្យទស្សនិកជនមានការយល់ច្រឡំតទៅទៀតជាពិសេសគឺបទ «ឱ្យបងសុំស្រលាញ់ផង» ដែលឪពុករបស់នាងគឺគ្រាន់តែជាការ Cover តែប៉ុណ្ណោះពុំមែនជាម្ចាស់ដើមនោះទេ៕