ប្រទេសថៃ៖ សភាពាណិជ្ជកម្មភាគខាងត្បូងប្រទេសថៃបានបង្ហាញថា ភ្ញៀវទេសចរបរទេសជាបន្តបន្ទាប់បានលុបចោលដំណើរកម្សាន្តរបស់ពួកគេមកកាន់ភាគខាងត្បូងប្រទេសថៃ បន្ទាប់ពីការបំផ្ទុះគ្រាប់បែ.កនៅក្នុងខេត្តចំនួន 3។ នេះបើតាមការចុះផ្សាយរបស់កាសែត Khaosod ថ្ងៃទី១២ មករា ឆ្នាំ២០២៦។

លោក Natthanon Pongthanyawiriya ប្រធានសភាពាណិជ្ជកម្ម នៅខេត្ត Pattani បានបង្ហាញថា ការបំផ្ទុះគ្រាប់បែ.ក និងការដុតស្ថានីយប្រេងឥន្ធនៈចំនួន 11 ទីតាំងនៅក្នុងខេត្ត Yala, Narathiwat និង Pattani បានប៉ះពាល់ដល់ទំនុកចិត្តលើពាណិជ្ជកម្ម ការវិនិយោគ និងទេសចរណ៍នៅក្នុងខេត្តព្រំដែនភាគខាងត្បូងយ៉ាងតំណម។

ឧប្បត្តិហេតុទាំងនេះបានធ្វើឲ្យខូចទំនុកចិត្តផ្នែកសន្តិសុខ ដែលនាំឱ្យភ្ញៀវទេសចរទាំងក្នុង និងក្រៅប្រទេស មានការព្រួយបារម្ភហើយលុបចោលដំណើរកម្សាន្តទៅកាន់ខេត្តទាំងបី, លុបចោលការកក់កន្លែងស្នាក់នៅ និងចូលរួមក្នុងកម្មវិធីកម្សាន្តផ្សេងៗ ចំពេលដែលខេត្ត Pattani កំពុងរៀបចំសម្រាប់ពិធីបុណ្យ Lim Ko Niao Shrine ដ៏ធំបំផុតនៅភាគខាងត្បូង ហើយរំពឹងថានឹងទាក់ទាញអ្នកទេសចរបានយ៉ាងច្រើន។ ប៉ុន្តែផ្ទុយទៅវិញ បើយោងតាមស្ថានការណ៍នាពេលបច្ចុប្បន្ននេះ វាបានបណ្តាលឱ្យខូចខាតយ៉ាងធ្ងន់ធ្ងរដល់អាជីវកម្ម វិស័យទេសចរណ៍ និងទេសចរណ៍ទាំងមូលនៅក្នុងខេត្ត។

លោក Natthanon បានទទូចថា រដ្ឋាភិបាលត្រូវតែដោះស្រាយភាពចលាចលនេះជាបន្ទាន់ ដើម្បីស្តារទំនុកចិត្តឡើងវិញនៅក្នុងវិស័យអាជីវកម្ម ពាណិជ្ជកម្ម វិនិយោគ និងទេសចរណ៍នៅក្នុងខេត្តព្រំដែនភាគខាងត្បូងទាំងបីឡើងវិញ។ លោកបានប៉ាន់ប្រមាណថា វានឹងចំណាយពេលយ៉ាងហោចណាស់ប្រាំពីរខែដើម្បីទទួលបានទំនុកចិត្តមកវិញ។

ដោយឡែក បើតាមលោកស្រី Siriporn Lauhakul, ប្រធានសភាពាណិជ្ជកម្មខេត្តណារ៉ាធីវ៉ាត ក៏បានត្អូញត្អែដែរថា ចាប់តាំងពីមានគ្រោះទឹកជំនន់នៅស្រុកហាតយ៉ៃ សេដ្ឋកិច្ចនៃខេត្តជាប់ព្រំដែនភាគខាងត្បូងទាំងបីបានរងផលប៉ះពាល់យ៉ាងខ្លាំង ដែលធ្វើឱ្យអ្នកទេសចរស្ទាក់ស្ទើរក្នុងការធ្វើដំណើរទៅកាន់តំបន់នោះ។

លោកស្រីបានកត់សម្គាល់ឃើញថា ក្រោយមកវិស័យទេសចរណ៍នៅក្នុងខេត្តទាំងបីនោះចាប់ផ្ដើមប្រសើរឡើងវិញខ្លះទៅហើយ ប៉ុន្តែឥឡូវនេះបញ្ហាថ្មីបានកើតឡើងបន្ថែមទៀត ដែលធ្វើឱ្យសេដ្ឋកិច្ចនៅក្នុងខេត្តភាគខាងត្បូងទាំងនេះកាន់តែដុនដាប និងស្ងាត់ភ្ញៀវទេសចរកាន់ខ្លាំង៕

សហរដ្ឋអាមេរិក ៖ កាលពីថ្ងៃទី១២ ខែមករា ឆ្នាំ២០២៦ ប្រធានាធិបតីអាមេរិក លោក Donald Trump បានប្រកាសយកពន្ធទំនិញប្រទេសទាំងឡាយណាដែលធ្វើពាណិជ្ជកម្មជាមួយអ៊ីរ៉ង់ ស្មើ២៥% ដើម្បីប្រឆាំងនឹងមេដឹកនាំផ្តាច់ការអ៊ីរ៉ង់ ហើយអត្រាពន្ធនឹងអនុវត្តភ្លាមៗ ។ ការប្រកាសនេះកើតឡើងបន្ទាប់ពីអាមេរិកគំ.រាមវាយប្រ.ហារអ៊ីរ៉ង់ដែលសម្លា.ប់ក្រុមបាតុករកើនឡើងរហូតដល់ជាង៥០០នាក់ លោក Trump ថ្លែងថា អាមេរិកត្រៀមខ្លួនជាស្រេចក្នុងការជួយអន្តរាគមន៍ ។

ការប្រកាសរបស់ប្រធានាធិបតីអាមេរិកជាការដាក់សម្ពាធអ៊ីរ៉ង់ ខណៈពលរដ្ឋអ៊ីរ៉ង់បានធ្វើបាតុកម្មប្រឆាំងរដ្ឋាភិបាលអស់រយៈពេលជាង២សប្តាហ៍ ដោយសារប្រាក់អ៊ីរ៉ង់ធ្លាក់ចុះយ៉ាងខ្លាំង និងស្ថានភាពសេដ្ឋកិច្ចកាន់តែអាក្រក់ ។ លោកប្រធានាធិបតី Trump បានបង្ហោះសារក្នុងបណ្តាញសង្គមថា ប្រទេសណាក៏ដោយដែលធ្វើពាណិជ្ជកម្មជាមួយអ៊ីរ៉ង់ អាមេរិកនឹងយកពន្ធ២៥% សម្រាប់គ្រប់មុខទំនិញនាំចូលអាមេរិក អត្រាពន្ធនឹងអនុវត្តភ្លាមៗ ប៉ុន្តែលោកមិនបាននិយាយលម្អិតពាក់ព័ន្ធនឹងការធ្វើពាណិជ្ជកម្មជាមួយអ៊ីរ៉ង់ទេ ។

អាមេរិកយកពន្ធក្នុងគោលដៅដាក់សម្ពាធប្រទេសមួយចំនួនដែលជាដៃគូពាណិជ្ជកម្មជាមួយអ៊ីរ៉ង់ រួមមាន ៖ ចិន អ៊ីរ៉ាក់ អេមីរ៉ាត់អារ៉ាប់រួម (UAE) តួកគី និងឥណ្ឌា ។ លោកប្រធានាធិបតី Trump ធ្លាប់ព្រមានប្រើប្រាស់កម្លាំងទ័ព បើមេដឹកនាំអ៊ីរ៉ង់នៅតែសម្លាប់ក្រុមបាតុករ ដោយអ្នកនាំពាក្យសេតវិមាន អ្នកស្រី Karoline Leavitt និយាយថា រដ្ឋាភិបាលអាមេរិកកំពុងពិចារណាបញ្ជូនកងទ័ពទៅវាយប្រហារអ៊ីរ៉ង់តាមផ្លូវអាកាស ។

ការធ្វើបាតុកម្មនៅអ៊ីរ៉ង់ចាប់ផ្តើមតាំងពីចុងខែធ្នូ ឆ្នាំ២០២៥ ដោយសារក្រុមបាតុករខឹងសម្បារប្រាក់អ៊ីរ៉ង់ធ្លាក់ចុះយ៉ាងឆាប់រហ័ស ហើយការធ្វើបាតុកម្មបានរីករាលដាលកាន់តែច្រើនកន្លែងប្រឆាំងនឹងមេដឹកនាំអ៊ីរ៉ង់ លោក Ayatollah Ali Khamenei ។ កាលពីថ្ងៃទី២៨ ខែធ្នូ អាជីវករនៅទីក្រុងតេហេរ៉ង់ បានប្រមូលគ្នាតវ៉ាប្រឆាំងមេដឹកនាំ ដោយសារប្រាក់អ៊ីរ៉ង់ធ្លាក់ចុះខ្លាំងក្នុងប្រវត្តិសាស្ត្រ បើធៀបនឹងប្រាក់ដុល្លារអាមេរិក ខណៈអតិផរណាកើនឡើងជាង៤០% ដែលធ្វើឱ្យតម្លៃទំនិញប្រើប្រាស់ប្រចាំថ្ងៃកើនឡើង ដូចជា ៖ ប្រេងសណ្តែក និងសាច់សត្វ ។

ទីភ្នាក់ងារព័ត៌មានសិទ្ធិមនុស្ស (HRANA) បានបង្ហាញចំនួនក្រុមបាតុករស្លាប់កើនឡើងដល់ជាង៥០០នាក់ និងសន្តិសុខស្លាប់ ៤៨នាក់ ខណៈប្រភពព័ត៌មានផ្សេងទៀតថា ក្រុមបាតុករស្លាប់ដោយសារការបង្ក្រាបពីរដ្ឋាភិបាលកើនឡើងខ្ពស់ជាងនេះ និងមានក្រុមបាតុកររាប់ពាន់នាក់ត្រូវចាប់ខ្លួន ។ ការផ្តាច់សេវាអ៊ីនធើរណេតតាំងពីថ្ងៃទី៨ ខែមករា ដែលធ្វើឱ្យពិបាកត្រួតពិនិត្យចំនួនមនុស្សស្លាប់ពិតប្រាកដ ហើយសារព័ត៌មានបរទេសជាច្រើនមិនអាចរាយការណ៍ព័ត៌មានចេញពីប្រទេសអ៊ីរ៉ង់បានទេ ។

លោកប្រធានាធិបតី Trump និយាយជាញឹកញាប់អាមេរិកនឹងជួយអន្តរាគមន៍ភ្លាមៗបើមានការសម្លាប់បាតុករបន្ថែម ដោយលោកបង្ហោះសារក្នុងបណ្តាញសង្គម Truth Social ថា ពលរដ្ឋអ៊ីរ៉ង់កំពុងស្វែងរកសន្តិភាព ការតវ៉ាប្រឆាំងអាចនឹងខ្លាំងក្លាជាងពេលណាៗទាំងអស់ដែលធ្លាប់កើតឡើងនៅអ៊ីរ៉ង់ ។ អាមេរិកកំពុងពិចារណាវាយប្រហារផ្លូវអាកាសលើទីតាំងនុយក្លេអ៊ែរ និងគោលដៅផ្សេងៗនៅទីក្រុងតេហេរ៉ង់ ដើម្បីដាក់សម្ពាធរដ្ឋាភិបាលលោក Khamenei ៕

ប្រទេសជប៉ុន ៖ សារព័ត៌មាន Reuters បានរាយការណ៍កាលពីថ្ងៃទី១១ ខែមករា ឆ្នាំ២០២៦ ថា លោកស្រី Sanae Takaichi នាយករដ្ឋមន្ត្រីជប៉ុនអាចនឹងសម្រេចចិត្តរំលាយសភា និងរៀបចំការបោះឆ្នោតសកលមុនពេលកំណត់ ខណៈសារព័ត៌មានជប៉ុនចុះផ្សាយពីបោះឆ្នោតនៅជប៉ុនអាចនឹងធ្វើឡើងនៅខែកុម្ភៈ ឆ្នាំ២០២៦ ។ ប៉ុន្តែលោកស្រីមិនបាននិយាយលម្អិតពីការសម្រេចចិត្តនេះទេ និងថា ផ្តោតសំខាន់លើការអនុម័តថវិកាដើម្បីឱ្យវិធានការជំរុញសេដ្ឋកិច្ចអាចជួយកាត់បន្ថយផលប៉ះពាល់ដោយសារអតិផរណាទាន់ពេលវេលា ។

លោក Hirofumi Yoshimura ប្រធានគណបក្សជប៉ុនច្នៃប្រឌិតដែលបានចូលរួមបង្កើតរដ្ឋាភិបាល និយាយមកកាន់ស្ថានីយទូរទស្សន៍ NHK កាលពីថ្ងៃទី១១ ខែមករា ថា លោកបានជួបជាមួយលោកស្រី Takaichi នាយករដ្ឋមន្ត្រីជប៉ុន កាលពីថ្ងៃទី៩ ខែមករា គឺគោលជំហរចំពោះពេលវេលារៀបចំការបោះឆ្នោតរបស់លោកស្រីបានផ្លាស់ប្តូរយ៉ាងខ្លាំង វាមិនចម្លែកទេ បើលោកស្រីបោះឆ្នោតមុនពេលកំណត់ដូចការចុះផ្សាយរបស់សារព័ត៌មាន ។

កាសែតជប៉ុនបានចុះផ្សាយដោយដកស្រង់ប្រភពពីរដ្ឋាភិបាលថា នាយករដ្ឋមន្ត្រីជប៉ុនកំពុងពិចារណាពីការរៀបចំបោះឆ្នោតជាបន្ទាន់ នៅថ្ងៃទី៨ ឬថ្ងៃទី១៥ ខែកុម្ភៈ ឆ្នាំ២០២៦ ប៉ុន្តែលោក Yoshimura ប្រធានគណបក្សជប៉ុនច្នៃប្រឌិត មិនបានពិភាក្សាពីថ្ងៃបោះឆ្នោតច្បាស់លាស់ជាមួយលោកស្រី Takaichi ទេ ។

លោកស្រី Takaichi ជានាយករដ្ឋមន្ត្រីស្រីដំបូងរបស់ជប៉ុន ដែលមានគោលនយោបាយអភិរក្សនិយមយ៉ាងខ្លាំងបានបដិសេធប្រាប់កាលបរិច្ឆេទច្បាស់លាស់ពីការរំលាយសភា ក្នុងពេលផ្តល់សម្ភាសន៍ជាមួយស្ថានីយទូរទស្សន៍ NHK ។ លោកស្រីគ្រាន់តែថ្លែងថា ពេលនេះ ផ្តោតសំខាន់លើការអនុម័តថវិកាដើម្បីឱ្យវិធានការជំរុញសេដ្ឋកិច្ចអាចជួយកាត់បន្ថយផលប៉ះពាល់ដោយសារអតិផរណាទាន់ពេលវេលា ។

ចំណែកគណបក្សប្រឆាំងបានបង្ហាញក្តីបារម្ភរបស់ខ្លួន ប្រសិនបើមានការបោះឆ្នោតនៅខែកុម្ភៈខាងមុខ នឹងធ្វើឱ្យការអនុម័តថវិកានៅចុងខែមីនា មិនអាចទៅរួច ។ លោក Tetsuo Saito ប្រធានគណបក្សប្រឆាំងថា គួរឱ្យភ្ញាក់ផ្អើលណាស់ដែលនាយករដ្ឋមន្ត្រីជប៉ុនគ្រោងរំលាយសភាពេលរដ្ឋសភាបើកកិច្ចប្រជុំនៅថ្ងៃទី២៣ ខែមករា ស្របពេលសេដ្ឋកិច្ចជប៉ុនស្ថិតក្នុងដំណាក់កាលសំខាន់ ។

តាមការលើកឡើងរបស់អ្នកវិភាគ ការបោះឆ្នោតមុនពេលកំណត់នៅប្រទេសជប៉ុនធ្វើឱ្យស្មុគស្មាញដល់ផែនការចំណាយថវិកា ចំនួន ៧៨ម៉ឺន ៣ពាន់លានដុល្លារអាមេរិក ដែលជាថវិកាដំបូងរបស់លោកស្រី Takaichi ក្នុងឋានៈជានាយករដ្ឋមន្ត្រី និងអាចបង្ខំឱ្យរដ្ឋាភិបាលជប៉ុនត្រូវចំណាយថវិកាបណ្តោះអាសន្ន បើមិនអាចអនុម័តថវិកាទាន់ពេលវេលា ។

ទន្ទឹមនឹងនេះ ភាពតានតឹងផ្នែកពាណិជ្ជកម្មរវាងជប៉ុន និងចិន នៅតែបង្កហានិភ័យដល់សេដ្ឋកិច្ចជប៉ុន បន្ទាប់ពីលោកស្រី Takaichi បាននិយាយកាលពីខែវិច្ឆិកា ឆ្នាំ២០២៥ ថា បើចិនវាយប្រហារតៃវ៉ាន់ គឺជាការគំរាមកំហែងជប៉ុន ។ ការលើកឡើងបែបនេះធ្វើឱ្យរដ្ឋាភិបាលចិនឆ្លើយតបវិញដោយការចាត់វិធានការជាច្រើន រួមទាំងរឹតបន្តឹងការនាំចេញទំនិញមួយចំនួនមកជប៉ុន ៕

សហរដ្ឋអាមេរិក៖ យន្តហោះយោធាដ៏មានឥទ្ធិពលមួយគ្រឿងដែលគេស្គាល់ថាជា Doomsday Plane ឬ «យន្តហោះនៃថ្ងៃវិនាស» ត្រូវបានគេប្រទះឃើញថ្មីៗនេះនៅអាកាសយានដ្ឋានអន្តរជាតិឡូសអាន់ជឺឡេស (LAX) បន្ទាប់ពីបាត់ខ្លួនអស់រយៈពេល ៥១ ឆ្នាំ បង្កឱ្យមានការសង្ស័យនិងក្ដីបារម្ភយ៉ាងទូលំទូលាយ ខណៈការបង្ហាញខ្លួននេះធ្វើឡើងចំពេលដែលមានភាពតានតឹងជាសកល។

យោងតាមការចេញផ្សាយរបស់ NDTV នាថ្ងៃអាទិត្យ ទី១១ ខែមករា បានបង្ហាញថា ការបង្ហាញខ្លួនរបស់យន្តហោះ Doomsday ដែលជាប្រភេទយន្តហោះ E-4B និងមានរាងបញ្ចកោណហោះនៅលើអាកាស បានទាក់ទាញចំណាប់អារម្មណ៍សាធារណៈជនយ៉ាងឆាប់រហ័ស ដោយមនុស្សជាច្រើនចោ.ទជាសំណួរអំពីគោលបំណងរបស់វា ខណៈគេខានឃើញវាចេញប្រតិបត្តិការអស់រយៈពេល ៥១ឆ្នាំមកហើយ។

តាមទិន្នន័យដែលរៀបរាប់អំពី Doomdays គឺយន្តហោះនេះ ត្រូវបានរចនាឡើងសម្រាប់ប្រើប្រាស់ក្នុងអំឡុងពេលមានអាសន្នជាតិ ជាពិសេសស្រាប់ទប់ទល់នឹងការវា.យប្រហារនុយក្លេអ៊ែរ និងធានាបាននូវនិរន្តរភាពនៃប្រតិបត្តិការរបស់រដ្ឋាភិបាល ដូចដែលឈ្មោះហៅក្រៅរបស់វាថា «យន្តហោះនៃថ្ងៃវិនាស»។

ក្រសួងការពារជាតិអាមេរិក ក្រោយមកបានធ្វើការបញ្ជាក់ថា លោក Pete Hegseth រដ្ឋមន្ត្រីក្រសួងការពារជាតិ បានប្រើប្រាស់យន្តហោះនេះដើម្បីធ្វើដំណើរទៅកាន់ឡូសអាន់ជឺឡេស ដែលជាផ្នែកមួយនៃដំណើរទស្សនកិច្ច «Arsenal of Freedom» របស់គាត់ នេះបើយោងតាមការចុះផ្សាយរបស់កាសែត New York Post។ ទោះជាយ៉ាងណាក៏ដោយ មន្ទីរបញ្ចកោណមិនបានផ្តល់ការពន្យល់ជាផ្លូវការទាក់ទងនឹងមូលហេតុដែលយន្តហោះ E-4B នេះ ត្រូវបានគេយកមកប្រើប្រាស់ជំនួសឱ្យយន្តហោះធម្មតា ដែលស្របនឹងពិធីសាររបស់រដ្ឋាភិបាលឡើយ។

សូមជម្រាបថា Doomsday Plane មានឈ្មោះជាផ្លូវការថា Boeing E-4B Nightwatch គឺជាយន្តហោះយោធា ដែលបម្រើជាមជ្ឈមណ្ឌលប្រតិបត្តិការអាកាសចរណ៍ជាតិ (NAOC) ដែលជាប៉ុស្តិ៍បញ្ជាការហោះហើរ និងត្រូវបានរចនាឡើងដើម្បីការពារប្រធានាធិបតី និងមេដឹកនាំយោធាកំពូលៗរបស់អាមេរិក និងធានាបាននូវនិរន្តរភាពនៃប្រតិបត្តិការរបស់រដ្ឋាភិបាល ក្នុងអំឡុងពេលមានអាសន្នជាតិ ដូចជាសង្គ្រាមនុយក្លេអ៊ែរជាដើម។

យន្តហោះនេះ មានប្រព័ន្ធការពារកម្រិតខ្ពស់ដែលអាចសំកាំងខ្លួននៅលើអាកាសបានរហូតដល់ ១២ ម៉ោង ដោយមិនចាំបាច់ចាក់ប្រេងឥន្ធនៈ ហើយត្រូវបានបំពាក់មុខងារចាក់ប្រេងលើអាកាស ដើម្បីពង្រីកពេលវេលាហោះហើររបស់វាបន្ថែមទៀត។ ដ្បិតថាមិនមែនជាយន្តហោះចម្បាំង ប៉ុន្តែយាននេះអាចអនុញ្ញាតឲ្យគេធ្វើប្រតិបត្តិការពិសេសៗចាំបាច់ជាច្រើន តាមរយៈមុខងារដែលត្រូវបានបែងចែកជាបន្ទប់ដាច់ដោយឡែកពីគ្នារួមមាន៖ តំបន់ធ្វើការបញ្ជាការ បន្ទប់សន្និសីទ បន្ទប់ប្រជុំ តំបន់ធ្វើការរបស់ក្រុមប្រតិបត្តិការ តំបន់ទំនាក់ទំនង និងកន្លែងសម្រាក។ វាត្រូវបានរចនាឡើងដើម្បីរក្សាការទំនាក់ទំនងសកល បើទោះបីជាមជ្ឈមណ្ឌលបញ្ជាការដែលមានមូលដ្ឋានលើដីត្រូវបានគំរាមកំហែងក៏ដោយ ប៉ុន្តែវានៅតែអាចបំពេញបេសកកម្មយ៉ាងមានប្រសិទ្ធភាព ក្នុងនាមជាមន្ទីរបញ្ចកោណចល័តនៅលើមេឃ។

ដូច្នេះការបង្ហាញខ្លួនរបស់វាជាលើកដំបូងក្រោយបាត់វត្តមានអស់ជាច្រើនទសវត្សន៍កន្លងមកនេះ បានជំរុញឲ្យមានករសង្ស័យយ៉ាងទូលំទូលាយពាក់ព័ន្ធនឹងសង្រ្គា.មលោកលើកទី៣ ខណៈដែលស្ថានភាពជាសកលនាពេលបច្ចុប្បន្ននេះ បន្តកើនឡើងកម្ដៅឥតឈប់ឈរ៕