កុំទុករបស់របរប្រើប្រាស់ក្នុងផ្ទះនៅក្បែរបង្អួច បើមិនចង់ឱ្យឆាប់ខូចគុណភាព និងបែកបាក់

មនុស្សភាគច្រើនមានទម្លាប់ទុករបស់របរប្រើប្រាស់ក្នុងផ្ទះ ឬតម្រៀបគ្រឿងសង្ហារិមនៅក្បែរបង្អួច ពីព្រោះមានពន្លឺគ្រប់គ្រាន់ ធ្វើឱ្យបរិវេណផ្ទះធំទូលាយ ស្រឡះល្អ និងគួរឱ្យចង់រស់នៅ ប៉ុន្តែតើជ្រាបទេថា កំដៅថ្ងៃ និងសំណើមដែលចូលតាមបង្អួច អាចធ្វើឱ្យរបស់របរប្រើប្រាស់ក្នុងផ្ទះឆាប់ខូចគុណភាព និងបែកបាក់ ។ តើមានរបស់របរអ្វីខ្លះដែលពុំគួរទុកក្បែរបង្អួច និងគួរប្រុងប្រយ័ត្នដូចម្តេច?

១-សម្ភារៈអគ្គិសនី ៖ ការទុកទូរទស្សន៍ កុំព្យូទ័រ ឧបករណ៍បំពងសំឡេង កង្ហារ និងសម្ភារៈអគ្គិសនីមានទំហំតូចនៅក្បែរបង្អួច អាចធ្វើឱ្យសម្ភារៈទាំងនេះទទួលកំដៅថ្ងៃដោយផ្ទាល់ ហើយផ្នែកខាងក្នុងរបស់វាកាន់តែក្តៅខ្លាំង ។ ផលប៉ះពាល់ គឺឆាប់ខូចគុណភាព ថែមទាំងប្រឈមនឹងការឆេះ ជាពិសេស ពេលភ្លៀងធ្លាក់ ឬមានទឹកភ្លៀងសាចតាមបង្អួចចូលមក ។

២-គ្រឿងសង្ហារិមឈើ ៖ តុ ទូរ ឬធ្នើឈើនៅជិតបង្អួច ពេលវាទទួលកំដៅថ្ងៃខ្លាំងរយៈពេលយូរនឹងធ្វើឱ្យសាច់ឈើស្ងួត បែកបាក់ ខូចទ្រង់ទ្រាយ ឬស្លេកពណ៌ឈើលឿនជាងធម្មតា ។ ក្រៅពីនេះ សំណើមចូលតាមបង្អួចនឹងធ្វើឱ្យគ្រឿងសង្ហារិមដុះផ្សិត និងទាក់ទាញសត្វល្អិត ។

៣-សម្ភារៈផ្លាស្ទិក ៖ ប្រសិនបើទុកធុងជ័រ កៅអីផ្លាស្ទិក ឬដបទឹកនៅក្បែរបង្អួចទទួលកំដៅថ្ងៃខ្លាំង គឺកំដៅនឹងធ្វើឱ្យផ្កាស្ទិកមានសភាពផុយស្រួយ ឆាប់បែកបាក់ ស្លេកពណ៌ និងបញ្ចេញសារធាតុគីមី ។៤-គ្រឿងសម្អាង និងផលិតផលថែរក្សាស្បែក ៖ ហាមទុកឡេលាបស្បែក ទឹកអប់ និងគ្រឿងសម្អាងផ្សេងៗនៅក្បែរបង្អួច ពីព្រោះកំដៅថ្ងៃនឹងធ្វើឱ្យសារធាតុក្នុងគ្រឿងសម្អាងខូចគុណភាព, ផ្លាស់ប្តូរក្លិន និងពណ៌ និងរលាកស្បែកពេលប្រើប្រាស់ ។

៥-សៀវភៅ ឯកសារ និងរូបថត ៖ ក្រដាសសៀវភៅ និងទឹកថ្នាំងាយស្រូបពន្លឺព្រះអាទិត្យខ្លាំងណាស់ ហើយការដាក់សៀវភៅ ឬឯកសារនៅក្បែរបង្អួច នឹងធ្វើឱ្យក្រដាសក្លាយជាពណ៌លឿងស្លេក ស្រួយ ។ បើមានសំណើមខ្លាំង វានឹងដុះផ្សិត និងមានក្លិនមិនល្អ ។

៦-របស់របរតុបតែងផ្ទះដែលមានកាវ ឬជ័រ ៖ ស៊ុមរូបភាព នាឡិកា ឬរបស់របរតុបតែងផ្ទះមួយចំនួន បើទុកវាក្បែរបង្អូច គឺកំដៅថ្ងៃនឹងធ្វើឱ្យឆាប់ខូចគុណភាព របកថ្នាំលាបខាងក្រៅ ខណៈកាវ ឬជ័ររលាយស្អិតជាប់ដៃ ។

៧-ទៀនក្រអូប ៖ វានឹងរលាយខូចរូបរាងពេលត្រូវកំដៅថ្ងៃ និងបាត់ក្លិនក្រអូប បន្ទាប់ពីវារលាយអស់នឹងប្រឡាក់កម្រាលឥដ្ឋ ឬគ្រឿងសង្ហារិមនៅក្បែរនោះ ។

• ៨-អាហារក្រៀម និងគ្រឿងផ្សំ ៖ ការដាក់អង្ករ ម្សៅ ស្ករ ប្រេងសណ្តែក និងគ្រឿងផ្សំអាហារផ្សេងៗនៅក្បែរបង្អួចដែលក្តៅខ្លាំងបណ្តាលឱ្យមានក្លិនស្អុយ ដុះផ្សិត មានស្រមោច និងសត្វល្អិត ថែមទាំងខូចគុណភាពអាហារ ។

សរុបមក ទោះជាបង្អួចជាកន្លែងសមស្របសម្រាប់ដាក់របស់របរផ្សេងៗ ប៉ុន្តែមិនមែនរបស់របរទាំងអស់សុទ្ធតែធន់នឹងកំដៅថ្ងៃ និងសំណើមនោះទេ ។ ការដាក់របស់របរនៅកន្លែងត្រឹមត្រូវ គឺជាការរក្សារយៈពេលផុតកំណត់ កាត់បន្ថយការខូចខាត និងផ្ទះមានសុវត្ថិភាពយូរអង្វែង ៕