បរទេស៖ ទូរស័ព្ទ IPHONE នៅតែដំណើរការល្អដដែលបន្ទាប់ពីជ្រុះចេញពីលើយន្តហោះ Alaska Airlines នៅរយៈកម្ពស់ជិត ៤,៨០០ ម៉ែត្រត្រូវបានរកឃើញនៅលើដីក្នុងរដ្ឋ Washington សហរដ្ឋអាមេរិក។

យោងតាមគេហទំព័រអន្តរជាតិ CBS News ដែលបានចុះផ្សាយនៅថ្ងៃទី៨ ខែមករាថា ទូរស័ព្ទ iPhone ត្រូវបានគេរកឃើញនៅចិញ្ចើមផ្លូវ ដោយឧបករណ៍នេះប្រើស្រោម ដោយស្ទើរតែគ្មានការខូចខាតអ្វីទាំងអស់ពីសម្បកខាងក្រៅ ហើយអេក្រង់ក៏មិនមានសញ្ញានៃការប្រេះដែរ។ លើសពីនេះទៀត iPhone នៅតែបង្ហាញអ៊ីមែលផ្ទៀងផ្ទាត់ឥវ៉ាន់សម្រាប់យន្តហោះ Alaska Airlines ដែលនេះគឺជាសញ្ញាមួយបង្ហាញឱ្យដឹងថា iPhone អាចនឹងធ្លាក់ពីយន្តហោះ Boeing 737-9 MAX ដែលបានហោះឡើងកាលពីថ្ងៃទី ៥ ខែមករា ពីអាកាសយានដ្ឋានអន្តរជាតិ Portland រដ្ឋ Oregon ទៅកាន់រដ្ឋ California សហរដ្ឋអាមេរិក។

នៅពេលនោះយន្តហោះ Alaska Airlines បានឡើងដល់កម្ពស់ ៤,៨០០ ម៉ែត្រ ស្រាប់តែមានការផ្ទុះ ហើយស៊ុមបង្អួចមួយបានផ្ទុះចេញ បង្កើតរន្ធដែលមានទំហំប៉ុនច្រកចេញសង្គ្រោះបន្ទាន់ ដោយសម្ពាធនៅក្នុងកាប៊ីនបានធ្លាក់ចុះយ៉ាងខ្លាំង ហើយវត្ថុជាច្រើនក៏ត្រូវធ្លាក់ចុះពីយន្តហោះផងដែរ។ ទោះជាយ៉ាងណាក៏ដោយ យន្តហោះនេះបានចុះចតដោយសុវត្ថិភាព ហើយអ្នកដំណើរទាំង ១៧១ នាក់ និងសមាជិកនាវិក ៦ នាក់ក៏បានរួចផុតពីគ្រោះថ្នាក់នេះផងដែរ។

ហេតុនេះហើយ បច្ចុប្បន្នទូរស័ព្ទ iPhone នេះត្រូវបានប្រគល់ឱ្យក្រុមប្រឹក្សាសុវត្ថិភាពដឹកជញ្ជូនជាតិសហរដ្ឋអាមេរិក NTSB ដើម្បីយកទូរស័ព្ទនេះទៅឱ្យម្ចាស់ដើមវិញ។
គួរបញ្ជាក់ដែរថា នេះមិនមែនជាលើកទីមួយទេដែល iPhone ត្រូវបានគេសរសើរចំពោះភាពធន់របស់វា។ ក្នុងឆ្នាំ ២០១១ ទូរស័ព្ទ iPhone 4 ក៏ដំណើរការបានធម្មតាដែរ នៅពេលដែលម្ចាស់របស់វាទម្លាក់ពីកម្ពស់ ៣០០ ម៉ែត្រ។ ដូច្នេះទោះបីទូរស័ព្ទប្រភេទ iPhone ទាំងអស់ធ្លាក់នៅរយៈកម្ពស់ខ្ពស់ប៉ុណ្ណាក៏ដោយ ក៏វាមិនខូចខាតដែរ៕

ប្រទេសថៃ ៖ ពលរដ្ឋថៃបាននាំគ្នាសរសើរពីទឹកចិត្តរបស់នារីម្នាក់ឈ្មោះ អេន ទៅលើបុគ្គលិកធ្វើការផ្នែកប្រមូលសំរាម ខណៈនាងបានទិញរបស់របរមួយចំនួនសម្រាប់ធ្វើជាកាដូឆ្នាំថ្មីចែកដល់អ្នកប្រមូលសំរាមនៅមុខផ្ទះ ។ ការចែកកាដូនេះ នាងបានធ្វើឡើងជារៀងរាល់ឆ្នាំ ដើម្បីលើកទឹកចិត្តដល់បុគ្គលិកធ្វើការផ្នែកនេះឱ្យមានកម្លាំងធ្វើការដើម្បីផ្គត់ផ្គង់ជីវភាពគ្រួសារបន្តទៀត ។

អ្នកនាង អេន ជាម្ចាស់កាដូនិយាយថា ៖ «មនុស្សគ្រប់គ្នាភ្លេចគិតពីបុគ្គលិកធ្វើការផ្នែកប្រមូលសំរាម ឬបុគ្គលិកបោសសម្អាតឱ្យយើង គឺគ្មានអ្នកណាម្នាក់គិតដល់ពួកគាត់ទេ ។ ហេតុនេះ ខ្ញុំគិតថា ចង់ទិញរបស់របរមួយចំនួនឱ្យពួកគាត់ជារៀងរាល់ឆ្នាំ គឺនៅថ្ងៃចូលឆ្នាំថ្មី ។ ខ្ញុំបានធ្វើបែបនេះតាំងពីឆ្នាំ២០២១, ឆ្នាំ២០២២ ប៉ុន្តែនៅឆ្នាំ២០២៣ ខ្ញុំមិនបានចែកកាដូទេ ដោយសារខ្ញុំមិនស្រួលខ្លួន» ។

អ្នកនាង អេន បន្តថា ៖ «នៅឆ្នាំ២០២៤ នេះ ខ្ញុំបានចែកកាដូឱ្យបុគ្គលិកប្រមូលសំរាម ហើយខ្ញុំភ្ញាក់ផ្អើល ដោយសារពួកគាត់លើកដៃសំពះ ព្រោះតាមធម្មតា ពួកគាត់គ្រាន់តែនិយាយថា អរគុណ ។ ប៉ុន្តែពួកគាត់បានអរគុណគ្រប់ពេលដែលយកកាដូទៅ ហើយលើកនេះ ពួកគាត់លើកដៃសំពះទាំង៣នាក់តែម្តង» ។

កាលពីថ្ងៃទី៥ ខែមករា ឆ្នាំ២០២៤ អ្នកនាង អេន បានទិញរបស់របរមួយចំនួនធ្វើជាកាដូសម្រាប់បុគ្គលិកប្រមូលសំរាម ព្រមទាំងសរសេរពាក្យជូនពរឆ្នាំថ្មីផងដែរ ។ នៅពេលរថយន្តប្រមូលសំរាមបើកមកដល់មុខផ្ទះនាង បុគ្គលិកទាំងអស់ក៏ប្រញាប់លើកដៃសំពះ ហើយនិយាយថា «អរគុណ» ។

អ្នកនាង អេន និយាយថា នាងសប្បាយចិត្តណាស់ ដែលនាងបានចែករំលែកក្តីសុខដល់មនុស្សនៅជុំវិញខ្លួន ហើយនាងចង់ឱ្យរឿងរ៉ាវនេះជាកម្លាំងចិត្តឱ្យមនុស្សគ្រប់គ្នាធ្វើអំពើល្អដល់អ្នកដទៃ ។ ពេលខ្លះ គេអាចភ្លេច និងមើលរំលងបុគ្គលិកធ្វើការផ្នែកនេះ ។ អ្នកនាងប្រាប់ថា ៖ «នៅថ្ងៃណាដែលខ្ញុំទិញរបស់របរឱ្យពួកគាត់ ខ្ញុំបានសរសេរក្រដាសប្រាប់ថា របស់ទាំងនេះសម្រាប់ជូនបងៗក្នុងឆ្នាំថ្មី» ។

អ្នកនាងបន្ថែមថា សាច់ញាតិរបស់នាងបានណែនាំថា បន្ទាប់ពីធ្វើបុណ្យចែកម្ហូបអាហារតាមរោងបុណ្យរួច នាងអាចយករបស់របរមកចែកឱ្យអ្នកក្រខ្សត់ ។ ហេតុនេះ នាងក៏សម្រេចចិត្តចែករបស់របរឱ្យបុគ្គលិកប្រមូលសំរាម ព្រោះធ្វើឱ្យនាងមានអារម្មណ៍ល្អ និងមានសេចក្តីសុខ ។ រីឯរបស់របរដែលចែកឱ្យពួកគេ រួមមាន ៖ អង្ករ, អាហារក្រៀម, ផ្លែឈើ, មីកញ្ចប់ គ្រឿងទេស ឬដាក់លុយក្នុងស្រោមសំបុត្រ គឺអាស្រ័យតាមលទ្ធភាព ។

ចុងក្រោយ អ្នកនាងបញ្ជាក់ថា ការងារទាំងអស់សុទ្ធតែមានតម្លៃស្មើៗគ្នា ហើយយើងពុំគួរមើលងាយអ្នកប្រមូលសំរាមទេ ព្រោះពួកគេបានបំពេញការងារយ៉ាងល្អបំផុតសម្រាប់សង្គមជាតិ ។ ហេតុនេះ វាជាការបង្ហាញនូវទឹកចិត្តបន្តិចបន្តួច ដែលយើងអាចចែករំលែកឱ្យគ្នាទៅវិញទៅមកបាន ៕

ពោតបារាំងគឺជាបន្លែដែលគេដាំដុះនៅក្នុងអាកាសធាតុក្តៅ និងត្រូពិកដូចជានៅអាហ្វ្រិក និងអាស៊ីខាងត្បូង។ ពោតបារាំងមានពីរពណ៌គឺក្រហម និងបៃតង ដោយពូជទាំងពីរមានរសជាតិដូចគ្នាហើយពោតបារាំងពណ៌ក្រហមនឹងប្រែទៅជាពណ៌បៃតងនៅពេលចម្អិន។ ដូច្នេះតើវាមានអត្ថប្រយោជន៍អ្វីខ្លះចំពោះសុខភាព? អត្ថប្រយោជន៍របស់ពោតបារាំងរួមមាន៖

១.ជួយកាត់បន្ថយជាតិស្ករក្នុងឈាម សាកសមសម្រាប់អ្នកជំងឺទឹកនោមផ្អែម និងអ្នកដែលកំពុងគ្រប់គ្រងជាតិស្ករ និងគ្រប់គ្រងទម្ងន់។

២.កាត់បន្ថយការទល់លាមក ព្រោះវាមានផ្ទុកជាតិស្លេសដែលជួយបន្ទន់លាមក ហើយវាក៏មានជាតិសរសៃអាហារដែលល្អសម្រាប់ចលនាពោះវៀនផងដែរ។

៣.កាត់បន្ថយកូលេស្តេរ៉ុលក្នុងខ្លួន ក៏ដូចជាកាត់បន្ថយហានិភ័យនៃជំងឺ រលាកក្រពះ ឬរលាកស្រទាប់ក្រពះ និងការរលាកនៃពោះវៀន។

៤.អ្នកណាដែលមានជំងឺក្រពះ ការទទួលទានពោតបារាំង ជាមួយនឹងទឹករំអិលថ្លា និងស្អិតក៏ជួយបិទបាំងដំបៅក្រពះផងដែរ។

៥.ពោតបារាំងឆ្អិនជាមួយអំបិល អាចបំបាត់រោគសញ្ញានៃការចាល់អាស៊ីត។ ដូច្នេះជាតិ folate ខ្ពស់ ដែលជួយពង្រឹងកោសិកាឈាមក្រហម និងចាំបាច់សម្រាប់ការលូតលាស់របស់ទារកក្នុងផ្ទៃ ហើយវាក៏ល្អសម្រាប់ស្ត្រីមានផ្ទៃពោះផងដែរ។

៦.ពោតបារាំងសម្បូរវីតាមីន C និង K ដែលវីតាមីន C ល្អចំពោះប្រព័ន្ធការពាររាងកាយ និងវីតាមីន K សំខាន់ចំពោះកំណកឈាម។ លើសពីនេះវាមានជាតិកាឡូរីទាប តែមានប្រូតេអ៊ីន និងជាតិកាកសរសៃច្រើន។

៧.ជួយកាត់បន្ថយហានិភ័យជំងឺបេះដូង ដោយសារតែពោតបារាំងមានជាតិរំអិល នៅពេលដែលចូលទៅក្នុងខ្លួន វានឹងផ្សំគ្នាជាមួយជាតិកូលស្តេរ៉ុលអំឡុងពេលកំពុងរំលាយ ហើយវានឹងចេញមកក្រៅវិញដោយមិនធ្វើឱ្យរាងកាយស្រូបយកបានទេ។

៨.ជួយប្រឆាំងនឹងជំងឺមហារីក និងកាត់បន្ថយជាតិស្ករក្នុងឈាម ដោយសារប្រូតេអ៊ីនជាច្រើនក្នុងពោតបារាំង ដែលហៅថា Lectins អាចទប់ស្កាត់ការលូតលាស់កោសិកាមហារីកក្នុងរាងកាយបាន។ លើសពីនេះការធ្វើពិសោធន៍ក៏បានបង្ហាញថាញ៉ាំពោតបារាំងក៏អាចជួយកាត់បន្ថយជាតិស្ករក្នុងឈាមបានផងដែរ៕

ព្រះរាជពិធីរៀបអភិសេកដ៏កក្រើកពេញទ្វីបអាស៊ីនៅដើមឆ្នាំ២០២៤នេះ រវាងព្រះអង្គម្ចាស់រូបសង្ហារបស់ប្រទេសព្រុយណេ Abdul Mateen និងព្រះនាងម្ចាស់ស្រស់ល្អដូចគំនូរ Anisha Isa Kalebic គឺនឹងប្រារព្ធឡើងរយៈពេល១០ថ្ងៃ ចាប់ពីថ្ងៃអាទិត្យទី៧ ខែមករានេះតទៅ។

បន្ទាប់ពីពិធីភ្ជាប់ពាក្យរបស់ទ្រង់ទាំង២ កាលពីខែតុលា ព្រះអង្គម្ចាស់ Abdul Mateen និងគូរណ្តឹងរបស់ព្រះអង្គ គឺព្រះនាង Anisha Isa Kalebic បានប្រកាសពីពិធីមង្គលការដ៏ប្រណីតអស្ចារ្យ នៅដើមឆ្នាំ២០២៤នេះតែម្តង ដែលប្រព្រឹត្តិទៅចាប់ពីថ្ងៃទី ៧ ដល់ថ្ងៃទី ១៦ ខែមករា។

ព្រះអង្គម្ចាស់ Mateen ព្រះជន្ម ៣២ ព្រះវស្សា ដែលត្រូវជាបុត្រទី១០ និងបុត្រាទី៤ របស់ស្តេចស៊ុលតង់ Haji Hassanal Bolkiah នៃប្រទេសប្រ៊ុយណេ។ កិត្តិនាមរបស់ព្រះអង្គម្ចាស់ Mateen ពិតជាទទួលបាននូវការចាប់អារម្មណ៍យ៉ាងខ្លាំងទាំងក្នុងនិងក្រៅប្រទេស ព្រោះទាំងរូបសង្ហារនិងភាពអង់អាចក្លាហាន ជាទីគាប់ចិត្តរបស់នារីៗគ្រប់រូបនៅលើពិភពលោក។ ម៉្យាងវិញទៀត ព្រះអង្គម្ចាស់ គឺជារាជទាយាទទី៦ ស្នងរាជបល្ល័ង្កក្នុងខ្សែរាជវង្សព្រុយណេ នេះបើយោងតាម Independent ។ ទ្រង់ក៏ទទួលបាននូវការការបណ្តុះបណ្តាលជាអ្នកបើកបរឧទ្ធម្ភាគចក្រដែលបម្រើការជាមេទ័ពអាកាសរបស់ Royal Brunei និងជាអ្នកលេងកីឡាប៉ូឡូដ៏ឆ្នើមរហូតឈ្នះមេដៃជាច្រើនផងដែរ ។

ពិធីអធិសេករបស់ទ្រង់គឺមានរយៈពេល ១០ ថ្ងៃ គឺប្រព្រឹត្តិទៅចាប់ផ្តើមនៅថ្ងៃទី ៧ ខែមករានេះ ដែលនៅក្នុងនោះគឺរួមមានទាំងពិធីជប់លៀងចម្រុះ ការប្រគុំតន្រ្តីដៃឯកប្រចាំរាជវាំង រីឯភ្ញៀវចូលរួមវិញគឺសុទ្ធតែតារាល្បីនិងអ្នកមានមុខមាត់ធំៗទាំងអស់ជុំវិញពិភពលោក ។

យ៉ាងណាមិញ ក្រឡេកមកមើលកូនក្រមុំដ៏ស្រស់ស្អាតរបស់ទ្រង់វិញ? គឺព្រះនាងម្ចាស់ Anisha Isa Kalebic គឺនារីដ៏ស្រស់ស្អាត ល្អឯកទាំងចរិយាមាយាទ និងត្រូវបានដឹងថាព្រះនាងពូកែធ្វើម្ហូប ព្រមទាំងមានជំនួញធំ២នៅក្នុងដៃផងដែរ គឺជាអ្នកគ្រប់គ្រងម៉ាកម៉ូដសម្លៀកបំពាក់ ដែលមានឈ្មោះថា Silk Collective និងជាសហម្ចាស់ក្រុមហ៊ុនទេសចរណ៍ Authentirary ។ ព្រះនាងគឺជាចៅស្រីរបស់ទីប្រឹក្សាពិសេសនៃស្តេចស៊ុលតង់ព្រុយណេ គឺលោក Pehin Isa Ibrahim។

ទោះជាយ៉ាងណា ទំនាក់ទំនងស្នេហាអ្នកទាំងពីរមុននឹងឈានដល់ពិធីមង្គលការ ក៏ត្រូវបានគេរាយការណ៍ថា បានទាក់ទងផ្អែមល្ហែមជាមួយគ្នាជាច្រើនឆ្នាំមកហើយផងដែរ៕

បរទេស៖ កសិកររាប់ពាន់នាក់បានបើកត្រាក់ទ័របិទផ្លូវនៅកណ្តាលទីក្រុងជាច្រើនរបស់អាល្លឺម៉ង់ ដើម្បីតវ៉ាក្នុងគម្រោងដកការកាត់ពន្ធសម្រាប់វិស័យកសិកម្ម។

យោងតាមប្រភពព័ត៌មាន Theguardian ដែលបានចុះផ្សាយនៅថ្ងៃទី៨ ខែមករាថា កសិករអាឡឺម៉ង់បានបិទកណ្តាលទីក្រុង ផ្លូវហាយវេ ក្នុងរដ្ឋធានីប៊ែរឡាំង ហាំប៊ឺក ខូឡូន និងប្រេមេន ដោយមានត្រាក់ទ័រប្រហែល ២០០០ បានចុះបញ្ជីនៅកន្លែងតវ៉ានីមួយៗ ដែលការតវ៉ានេះនឹងមានរយៈពេលមួយសប្តាហ៍ ជុំវិញការគ្រោងកាត់បន្ថយការឧបត្ថម្ភធនផ្នែកកសិកម្មដែលរដ្ឋាភិបាលបានប្រកាសកាលពីសប្តាហ៍មុន។

ប្រធានសមាគមកសិករអាល្លឺម៉ង់លោក Joachim Rukwied បាននិយាយថា “យើងកំពុងអនុវត្តសិទ្ធិជាមូលដ្ឋានរបស់យើងក្នុងការជូនដំណឹងដល់សង្គមថាប្រទេសអាល្លឺម៉ង់ត្រូវការវិស័យកសិកម្មដែលមានការប្រកួតប្រជែង នេះជាមធ្យោបាយតែមួយគត់ដើម្បីធានាបាននូវប្រភពអាហារក្នុងស្រុកដែលមានគុណភាពខ្ពស់”។ ដូច្នេះហើយ ចាប់ពីល្ងាចថ្ងៃទី ៧ ខែមករា កសិករទាំងអស់បានបើកត្រាក់ទ័រ និងរថយន្តដឹកទំនិញរាប់សិបគ្រឿងបិទផ្លូវក្នុងទីក្រុងជាច្រើន ដើម្បីសម្តែងការតវ៉ាប្រឆាំងនឹងរដ្ឋាភិបាល។

ក្រុមអ្នកតវ៉ាក៏បានព្យាយាមបិទផ្លូវចូលទៅផ្លូវហាយវេនៅជាយក្រុងជាបន្តបន្ទាប់ផងដែរ ដោយប៉ូលីសអាល្លឺម៉ង់បានកត់ត្រាថា នេះគឺជាការកកស្ទះចរាចរណ៍ខ្លាំងបំផុតនៅទូទាំងប្រទេស។ ប្រឈមនឹងការតវ៉ាពីកសិករយ៉ាងខ្លាំងបែបនេះ រដ្ឋាភិបាលអាល្លឺម៉ង់ក៏សម្រេចដកផ្នែកនៃផែនការមួយចំណែកចេញ។ អាស្រ័យហេតុនេះ គោលនយោបាយកាត់បន្ថយពន្ធយានយន្តសម្រាប់វិស័យកសិកម្មនឹងរក្សាបាន ចំណែកប្រាក់ឧបត្ថម្ភប្រេងម៉ាស៊ូតនឹងត្រូវកាត់បន្ថយជាបណ្តើរៗ។

ទោះជាយ៉ាងណាក៏ដោយ តំណាងឧស្សាហកម្មកសិកម្មអាល្លឺម៉ង់បាននិយាយថា ការសម្រេចចិត្តខាងលើមិនគ្រប់គ្រាន់ទេ ហើយបានអំពាវនាវឱ្យរដ្ឋាភិបាលលុបចោលផែនការទាំងស្រុង ដែលធ្វើឡើងបន្ទាប់ពីតុលាការរបស់ប្រទេសតម្រូវឱ្យពួកគេរកវិធីសន្សំប្រាក់សម្រាប់ប្រទេសនៅឆ្នាំ ២០២៤៕