បរទេស៖ ត្រីរាប់លានក្បាលត្រូវបានគេរកឃើញនៅឆ្នេរមួយក្នុងប្រទេសហ្វីលីពីន ដែលធ្វើឱ្យអ្នកស្រុកមួយចំនួនមានការព្រួយបារម្ភថា ការស្លាប់យ៉ាងអាថ៌កំបាំងរបស់ត្រីអាចជាសញ្ញានៃគ្រោះមហន្តរាយធម្មជាតិដែលនឹងកើតឡើង។

យោងតាមគេហទំព័រអន្តរជាតិមួយដែលបានចុះផ្សាយនៅថ្ងៃទី៨ ខែមករាថា ឧបទ្ទវហេតុនេះបានកើតឡើងក្នុងខេត្ត Sarangani នៅលើកោះ Mindanao ភាគខាងត្បូងប្រទេសហ្វីលីពីន ដោយអ្នកស្រុកជាច្រើនបានប្រទះឃើញត្រីរាប់លានក្បាលស្លាប់យ៉ាងអាថ៌កំបាំងអណ្តែតនៅលើឆ្នេរតែម្តង។

នេះបើតាមលោក Allan Gomez Dionaldo អាយុ ២៨ ឆ្នាំដែលជាអ្នកស្រុកនៅទីនោះបានប្រាប់អ្នកសារព័ត៌មានថា ពេលកើតហេតុ អ្នកភូមិជាច្រើនមានការភ្ញាក់ផ្អើលយ៉ាងខ្លាំង និងរំភើបចិត្តព្រោះទម្ងន់ត្រីដែលលិចចូលច្រាំងមានទម្ងន់រាប់តោន ហើយវាត្រូវបានគេជឿថាត្រីទាំងនេះអាចជាអំណោយឆ្នាំថ្មីពីព្រះ។

ទោះជាយ៉ាងណាក៏ដោយ អ្នកខ្លះទៀតក៏មានការព្រួយបារម្ភថាវាអាចជាសញ្ញា ឬជាប្រផ្នូលអាក្រក់នៃគ្រោះធម្មជាតិ ព្រោះហេតុការណ៍នេះស្រដៀងគ្នាទៅនឹងប្រទេសជប៉ុនដែរ ដោយកាលពីខែធ្នូ ឆ្នាំ២០២៣ ត្រីសាឌីនរាប់ម៉ឺនក្បាលត្រូវបានគេប្រទះឃើញស្លាប់ដោយមិនដឹងមូលហេតុនៅកោះហុកកៃដូ ភាគខាងជើងនៃប្រទេសជប៉ុន។

មួយខែក្រោយមក ការរញ្ជួយដីកម្រិត ៧.៦ រិចទ័របានកើតឡើង ដែលស្ថិតនៅកណ្តាលខេត្ត Ishikawa នៅលើឧបទ្វីបណូតូ កណ្តាលប្រទេសជប៉ុន រហូតមកដល់ពេលនេះមិនមានការពន្យល់ច្បាស់លាស់នោះទេ។ ដូច្នេះហើយ តើការងាប់ត្រីដ៏ធំនៅកោះហុកកៃដូ ជាមួយនឹងការរញ្ជួយដីនៅកណ្តាលប្រទេសជប៉ុន តើវាអាចមានទំនាក់ទំនងដែរឬអត់?

ប្រទេសចិន ៖ នៅដើមខែមករា ឆ្នាំ២០២៤ សារព័ត៌មាន CNN បានចុះផ្សាយពីអាជីពប្លែកមួយដែលគេបានប្រកាសរើសបុគ្គលិកនៅប្រទេសចិន រហូតដល់ល្បីល្បាញក្នុងបណ្តាញសង្គម ។ អាជីពប្លែកនេះមិនត្រូវការគុណសម្បត្តិអ្វីច្រើនទេ គ្រាន់តែធ្វើជាតួអង្គក្នុងរឿងបុរាណចិន តួស្វាស៊ុនអ៊ូខុង «រឿងលោកគ្រូថាំងចេងទៅចម្លងធម៌» ។ លក្ខខណ្ឌជ្រើសរើស គឺតួស្វាស៊ុនអ៊ូខុង ត្រូវតែចូលចិត្តហូបចេក និងអាចហូបចេកមិនកំណត់ពេញ១ថ្ងៃ ។

សារព័ត៌មានចិនផ្សាយថា កន្លែងកម្សាន្តនៅភ្នំហានីវ ស្ថិតនៅភាគខាងជើងប្រទេសចិន បានប្រកាសជ្រើសរើសបុគ្គលិកជាតួស្វាស៊ុនអ៊ូខុង ។ បុគ្គលិកត្រូវតែងខ្លួនជាស៊ុនអ៊ូខុង បន្ទាប់មក ត្រូវក្រាបក្នុងរូង ឬក្នុងល្អាងក្រោមភ្នំ ហើយតម្រូវឱ្យពួកគេហូបអាហារដែលភ្ញៀវទេសចរបញ្ចុក ជាពិសេស ក្មេងៗ ។ ក្រុមហ៊ុននឹងផ្តល់ប្រាក់ខែឱ្យចំនួន៨៤២ដុល្លារអាមេរិកក្នុង១ខែ ។

ចំណែកបេក្ខជនមកដាក់ពាក្យចូលធ្វើការមិនចាំបាច់ជាមនុស្សមានថាមពលពិសេស ឬអាចជិះពពកហោះហើរនៅលើមេឃទេ ដោយពួកគេគ្រាន់តែស្លៀកពាក់ឈុតស៊ុនអ៊ូខុង ក្នុងរឿងបុរាណចិន «រឿងលោកគ្រូថាំងចេងទៅចម្លងធម៌» ។ គុណសម្បត្តិសំខាន់ដែលអាចធ្វើការងារនេះបាន គឺពួកគេចូលចិត្តហូបចេក ឬអាចហូបចេកបានច្រើនមិនកំណត់ ។

រីឯចំណីអាហារដែលភ្ញៀវទេសចរយកមកបញ្ចុកស្វាស៊ុនអ៊ូខុង មានច្រើនមុខ ដូចជា ៖ ផ្លែប៉ោម, មី និងផ្លែចេក ។ បុគ្គលិកដែលស្លៀកពាក់ឈុតស៊ុនអ៊ូខុង ត្រូវតែហូបចេកដែលភ្ញៀវទេសចរបញ្ចុក និងមិនអាចប្រកែកបានទេ ។

នាយកគ្រប់គ្រងកន្លែងកម្សាន្តនៅភ្នំហានីវ និយាយថា បេក្ខជនមកដាក់ពាក្យធ្វើការងារនេះ មិនចាំបាច់មានបទពិសោធន៍អ្វីច្រើនទេ ដោយក្រុមហ៊ុនចង់បានអ្នកចាប់អារម្មណ៍តួអង្គស៊ុនអ៊ូខុង និងពូកែសម្តែងឱ្យដូចស្វាពិតៗ ។ បេក្ខជនត្រូវតែជាមនុស្សរីករាយ ឬមានប្រជាប្រិយភាព ដើម្បីធ្វើឱ្យភ្ញៀវទេសចរចូលចិត្ត ។

នាយកគ្រប់គ្រងរូបនេះបន្តថា បច្ចុប្បន្ន កន្លែងកម្សាន្តនៅភ្នំហានីវ មានបុគ្គលិកធ្វើការជាតួស៊ុនអ៊ូខុង ចំនួន២នាក់ ប៉ុន្តែខាងយើងត្រូវការតួស៊ុនអ៊ូខុង ម្នាក់ទៀត ។ រីឯអ្នកចាប់អារម្មណ៍ចង់ធ្វើការងារនេះ ប៉ុន្តែបារម្ភថា ខ្លាចហូបអាហារច្រើនពេកនោះ ពួកគេពុំចាំបាច់ហូបអាហារដែលភ្ញៀវទេសចរបញ្ចុកទាំងអស់ទេ ។ ពួកគេអាចយកអាហារ ឬផ្លែចេកទាំងនេះមកឱ្យមិត្តរួមការងារក៏បាន ក្រោយពេលចប់ម៉ោងធ្វើការ ។

នាយកគ្រប់គ្រងបញ្ជាក់ថា បុគ្គលិកធ្វើការជាស្វាស៊ុនអ៊ូខុង មិនបាច់បារម្ភពីអាកាសធាតុត្រជាក់នៅក្នុងរូងភ្នំ ឬល្អាងទេ ពីព្រោះខាងក្រុមហ៊ុនបានបំពាក់ម៉ាស៊ីនកម្តៅនៅក្នុងល្អាងរួចអស់ហើយ ។ យើងធានាថា អាកាសធាតុនៅបាតល្អាងនឹងមានភាពកក់ក្តៅ ៕

កាលពីពេលថ្មីៗនេះ ប្រធានាធិបតីចិន លោកស៊ី ជីនពីង គឺបានប្រកាសអំពីការធ្លាក់ចុះយ៉ាងដុនដាបនៃសេដ្ឋកិច្ចប្រទេសចិន ដោយសង្កត់ធ្ងន់ទៅលើ សារជីវកម្មនិងក្រុមហ៊ុនអចលនទ្រព្យមួយចំនួនកំពុងជួបការលំបាក សង្វាក់ផលិតកម្មធ្លាក់ចុះ ខណៈប្រជាពលរដ្ឋពិបាកស្វែងរកការងារធ្វើ ដែលបណ្តាលឲ្យអត្រាឥតការងារធ្វើបានកើនឡើងខ្ពស់។

នេះជាលើកទីមួយហើយដែលលោក ស៊ី ជីនពីង បានលើកឡើងអំពីបញ្ហាប្រឈមផ្នែកសេដ្ឋកិច្ចនយោបាយ បន្ទាប់ពីគាត់ឡើងកាន់តំណែងកាលពីឆ្នាំ ២០១៣ មក។ ភាពច្របូកច្របល់ក្នុងឆ្នាំថ្មីជាមួយនឹងបញ្ហាប្រឈមសេដ្ឋកិច្ចគឺបានធ្វើឲ្យប្រទេសចិនកំពុងឈានចូលដំណាក់កាលសំខាន់មួយ នៅពេលដែលអ្នកបង្កើតគោលនយោបាយព្យាយាមរក្សាស្ថិរភាពវិបត្តិនៅក្នុងទីផ្សារអចលនទ្រព្យ និងរារាំងសេដ្ឋកិច្ចធំទីពីររបស់ពិភពលោកពីធ្លាក់ចូលទៅក្នុងវិបតិ្តអតិផរណា។

វិស័យផលិតកម្មដ៏ធំរបស់ប្រទេសនេះបានចុះខ្សោយស្ទើរតែពេញមួយឆ្នាំ២០២៣ បើទោះបីជាមានការកើនឡើងសេដ្ឋកិច្ចក្នុងរយៈពេលខ្លីនៃត្រីមាសទីមួយ ឆ្នាំ២០២២ក្តី។ យោងតាមការិយាល័យស្ថិតិជាតិ (NBS) បានចេញផ្សាយការស្ទង់មតិប្រចាំខែរបស់ខ្លួន ដែលបង្ហាញថាសកម្មភាពរោងចក្រប្រទេសចិនគឺបានធ្លាក់ចុះក្នុងអំឡុងខែធ្នូ ឆ្នាំ២០២៣ ថាដល់កម្រិតទាបបំផុតក្នុងរយៈពេលប្រាំមួយខែចុងក្រោយនេះ។

សេដ្ឋកិច្ចរបស់ប្រទេសចិនត្រូវបានញាំញីដោយបញ្ហាជាច្រើននៅឆ្នាំ២០២៣នេះ រួមទាំងការធ្លាក់ចុះនៃអចលនទ្រព្យដែលបានអូសបន្លាយមករយៈពេលយូរ អត្រាអត់ការងារធ្វើរបស់យុវជនកើនឡើងខ្ពស់ និងច្របូកច្របល់ផ្នែកហិរញ្ញវត្ថុកើនឡើងជាលំដាប់នៅក្នុងប្រទេស។ ម៉្យាងវិញទៀត សញ្ញានៃភាពទន់ខ្សោយនៅក្នុងសេដ្ឋកិច្ចចិនក៏កំពុងតែបន្ត ដោយកាលពីពេលថ្មីៗនេះ ការបង្រ្កាបលើឧស្សាហកម្មហ្គេមក្នុងប្រទេសចិន គឺបានធ្វើឲ្យមានការដួលរលំនិងខាតបង់ចំនួន ៨០ពាន់លានដុល្លារ ខណៈដែលវិនិយោគិនបរទេសបានធ្វើការទិញភាគហ៊ុនចិនប្រចាំឆ្នាំតិចតួចបំផុតមិនធ្លាប់មាន។

ដោយទទួលស្គាល់ពីបញ្ហាដែលកំពុងប្រឈមមុខចំពោះការដែលសហគ្រាសមួយចំនួនត្រូវរងនូវផលលំបាកនិងបាត់បង់ទំនុកចិត្ត ខណៈប្រជាពលរដ្ឋខ្លួនក៏កំពុងតែប្រឈមមុខនឹងភាពឥតការងារធ្វើ ទើប លោកស៊ី ជីនពីង ក៏បានប្រកាសដោយមុតមាំថា «យើងត្រូវតែបង្រួបបង្រួមគ្នា ដើម្បីពង្រឹងសន្ទុះនៃការងើបឡើងវិញនៃសេដ្ឋកិច្ចជាតិ»។

ទោះជាយ៉ាងណា ប្រទេសចិន គឺកំពុងព្យាយាមស្តារឡើងវិញនូវកំណើនសេដ្ឋកិច្ច និងបង្កើនការងារជូនដល់ប្រជាពលរដ្ឋខ្លួនវិញ តាមរយៈការកែសម្រួលគោលនយោបាយសារពើពន្ធ និងរូបិយវត្ថុនៅឆ្នាំ ២០២៤នេះ ។

គួរបញ្ជាក់ផងដែរថា បញ្ហាមួយទៀតរបស់ប្រទេសចិនគឺទាក់ទងជាមួយនឹងកោះតៃវ៉ាន់ ដែលបានផ្តាច់ខ្លួនចេញពីប្រទេសចិន ប៉ុន្តែចិននៅតែចាត់ទុកថាវាជារបស់ខ្លួន និងព្យាយាមបង្រួបបង្រួមឲ្យទាល់តែបាន ហើយអាចនឹងប្រើកម្លាំងទៅលើកោះនេះតែម្តងប្រសិនបើមានភាពចាំបាច់។ កោះតៃវ៉ាន់ក៏ជាសម្ព័ន្ធមិត្តរបស់សហរដ្ឋអាមេរិកផងដែរ ហើយដំណើរការនៃការបោះឆ្នោតលទ្ធិប្រជាធិបតេយ្យរបស់ប្រទេសនេះនឹងប្រព្រឹត្តិទៅនៅក្នុងខែមករា ឆ្នាំ២០២៤នេះខាងមុខនេះ។ ទោះជាយ៉ាងណា ប្រទេសចិនមិនពេញចិត្តនឹងដំណើរការបោះឆ្នោតសេរីនេះទេ ដូច្នេះមានតែរងចាំមើលថា នាពេលឆាប់ៗនេះអាចនឹងមានការរង្គោះរង្គើរផ្នែកភូមិសាស្រ្តនយោបាយនេះឬយ៉ាងណា?

ប្រទេសអង់គ្លេស ៖ យានជំនិះ Z-Triton 2.0 គឺជាយានជំនិះអគ្គិសនីមានកង់ចំនួន៣ ដែលអ្នកប្រើប្រាស់អាចធាក់វាដោយជើង ឬមិនបាច់ធាក់ក៏បាន ។ គេអាចជិះវានៅលើដីគោក ឬលើទឹក ហើយគេក៏អាចសម្រាកនៅលើយានជំនិះនេះបានដូចសម្រាកក្នុងតង់ដែរ ។ លើសពីនេះ យានជំនិះថ្មីថែមទាំងមានកន្លែងឱ្យដាំកូនរុក្ខជាតិទៀតផង ។ វាជាជម្រើសមួយរបស់អ្នកមានប្រាក់ច្រើន និងអ្នកស្រឡាញ់ធម្មជាតិ ។

យានជំនិះថ្មីអាចបម្លាស់ទីបានដោយសារម៉ូទ័រអេឡិចត្រូនិកមានកម្លាំង១.៥០០វ៉ាត់ ហើយវាអាចធ្វើដំណើរនៅលើផ្លូវគោក ក្នុងល្បឿន២៥គីឡូម៉ែត្រក្នុង១ម៉ោង ។ រីឯការធ្វើដំណើរតាមផ្លូវទឹកវិញ វាអាចធ្វើដំណើរបាន៥គីឡូម៉ែត្រក្នុង១ម៉ោង ។ អ្នកផលិតបានបំពាក់នូវបន្ទះថាមពលពន្លឺព្រះអាទិត្យសម្រាប់ឱ្យអ្នកប្រើប្រាស់សាកថ្មយានជំនិះ ។

ការសាកថ្ម១លើក គេនឹងអាចធ្វើដំណើរបានចម្ងាយ៥០គីឡូម៉ែត្រសម្រាប់ផ្លូវគោក និងចម្ងាយជាង១២គីឡូម៉ែត្រសម្រាប់ផ្លូវទឹក ។ យានជំនិះនេះមានកន្លែងបញ្ជាចំនួន៣ គឺ ៖ បញ្ជាឱ្យវាបើកបរលើដីគោក, បញ្ជាកង់មុខ និងបញ្ជាឱ្យវាបើកបរលើទឹក ។ វាមានកន្លែងត្រៀមចម្អិនម្ហូបអាហារ, មានតុបត់ និងមានកន្លែងសម្រាកសម្រាប់មនុស្ស២នាក់ ។

ការផលិតយានជំនិះអគ្គិសនីនេះឡើង គឺជាគំនិតរបស់លោក Aigars Lauzis ក្រោយពីលោកបានសាកល្បងធាក់កង់ចេញពីទីក្រុងឡុងដ៍ ប្រទេសអង់គ្លេស ទៅកាន់ទីក្រុងតូក្យូ ប្រទេសជប៉ុន ។ ក្នុងពេលធ្វើដំណើរឆ្លងប្រទេស លោកមានអារម្មណ៍ថា ចង់ដោះស្រាយបញ្ហាក្នុងការធ្វើដំណើរផ្លូវឆ្ងាយ ដោយលោកចង់ឱ្យអ្នកដំណើរអាចសម្រាកក្នុងយានជំនិះពេលនឿយហត់ ហើយពួកគេអាចយកសត្វចិញ្ចឹមតាមខ្លួនផងដែរ ។

ហេតុនេះ លោក Aigars Lauzis ក៏បានសម្រេចចិត្តផលិតយានជំនិះ Z-Triton 2.0 លក់ឱ្យអតិថិជន ក្នុងតម្លៃ១៤.៥០០អឺរ៉ូ ។ បច្ចុប្បន្ន យានជំនិះមានតួនាទីច្រើនយ៉ាង ត្រូវបានគេដាក់លក់តែនៅតំបន់អឺរ៉ុប និងអាមេរិកខាងជើងប៉ុណ្ណោះ ហើយគេពុំទាន់មានគម្រោងលក់នៅតំបន់អាស៊ីទេ ៕

បរទេស៖ អ្នកជំនាញមានសុទិដ្ឋិនិយមថា ឆ្នាំនេះប្រទេសចិននឹងងើបឡើងវិញយ៉ាងពេញលេញ ដោយត្រលប់ទៅជាទីផ្សារទេសចរណ៍លំដាប់លេខមួយរបស់ពិភពលោកដូចកាលពីឆ្នាំ ២០១៩។

យោងតាមទិន្នន័យចុងក្រោយបំផុតពីអង្គការទេសចរណ៍ពិភពលោក (UNWTO) កាលពីថ្ងៃទី៧ ខែមករា បានបង្ហាញថា ប្រទេសចិននឹងមានការងើបឡើងវិញយ៉ាងពេញលេញនៅឆ្នាំនេះ ដោយភ្ញៀវទេសចរចិនដែលធ្វើដំណើរអន្តរជាតិងើបឡើងប្រហែល ៥៥% នៃកម្រិតមុនការរាតត្បាតក្នុងត្រីមាសទី ៣ ឆ្នាំ ២០២៣។ រីឯចំនួនអ្នកទេសចរដែលធ្វើដំណើរក្នុងប្រទេសចិនមានលើសពី ១១% បើធៀបនឹងរយៈពេលដូចគ្នាក្នុងឆ្នាំ ២០១៩ ចំណែកចំនួនសំបុត្រយន្តហោះអន្តរជាតិវិញគឺស្មើនឹង ៥៧% ។

លោក Oliver Sedlinger អ្នកប្រឹក្សាទេសចរណ៍អន្តរជាតិនៅទីក្រុងប៉េកាំងបានព្យាករណ៍ថាប្រទេសចិនមានទស្សនវិស័យវិជ្ជមាននៅឆ្នាំ ២០២៤ ក៏ដូចជាសារៈសំខាន់នៃការបង្កើតការតភ្ជាប់ឡើងវិញ និងការធ្វើបច្ចុប្បន្នភាពនិន្នាការទីផ្សារ។ លោក Sedlinger បានវាយតម្លៃថាទីផ្សារចិននឹងមានសក្តានុពលខ្លាំង សម្រាប់ទីផ្សារប្រភពទេសចរណ៍ក្រៅប្រទេសដ៏ធំបំផុតរបស់ពិភពលោក។

លោក Wolfgang Arlt នាយកវិទ្យាស្ថានស្រាវជ្រាវទេសចរណ៍អន្តរជាតិចិនរំពឹងថាការ ប្រទេសចិនក្នុងឆ្នាំនេះនឹងវ៉ាដាច់សហរដ្ឋអាមេរិក អាល្លឺម៉ង់ ក្នុងការត្រលប់មកដឹកនាំពិភពលោកវិញដោយចំនួនអ្នកទេសចរអាចមានកម្រិតខ្ពស់ដូចកាលពីឆ្នាំ ២០១៩ ខណៈដែលកាលពីឆ្នាំ ២០២៣ ប្រទេសទាំងបីនេះមានការប្រកួតប្រជែងស្មើគ្នាក្នុងទីផ្សារទេសចរពិភពលោក។

ទោះជាយ៉ាងណាក៏ដោយ យោងតាមបណ្ឌិតសភាទេសចរណ៍ចិន និង UNWTO ក្នុងឆ្នាំ ២០១៩ ភ្ញៀវទេសចរចិនបានធ្វើដំណើរទៅក្រៅប្រទេសចំនួន ១៥៥ លាននាក់ ដោយចំណាយប្រាក់ ២៥៥ ពាន់លានដុល្លារនៅបរទេស ពោលគឺកើនឡើងទ្វេដងនៃភ្ញៀវទេសចរអាមេរិក និង ៣ ដងនៃជនជាតិអាល្លឺម៉ង់។ របាយការណ៍ថ្មីៗរបស់ក្រុមប្រឹក្សាទេសចរណ៍ និងទេសចរណ៍ពិភពលោកក៏បានបង្ហាញដែរថា ភ្ញៀវទេសចរចិនដីគោកបានវ៉ាដាច់ទីផ្សារផ្សេងទៀតក្នុងការចំណាយទិញទំនិញជាមួយនឹងការធ្វើដំណើរជាមធ្យម ១,៣៥០ ដុល្លារក្នុងមនុស្សម្នាក់ ដែលរួមចំណែកយ៉ាងសំខាន់សម្រាប់ទីផ្សារទេសចរណ៍ពិភពលោក។

លោក David Goodger នាយកប្រតិបត្តិនៃអឺរ៉ុប និងមជ្ឈិមបូព៌ានៅផ្នែកសេដ្ឋកិច្ចទេសចរណ៍បាននិយាយថា បច្ចុប្បន្នទេសចរណ៍ចិននឹងចាត់វិធានការបន្ថែមទៀតឆ្ពោះទៅរកការងើបឡើងវិញនៅឆ្នាំ ២០១៤ ដោយយើងព្យាករណ៍ថាការចំណាយទេសចរណ៍អន្តរជាតិនឹងលើសពីឆ្នាំ ២០១៩ នៅឆ្នាំនេះ ហើយភ្ញៀវចិនក៏នឹងទៅទស្សនាគោលដៅកាន់តែច្រើន និងចូលរួមក្នុងសកម្មភាពជាច្រើនទៀតផងដែរ៕