កាលពីពេលថ្មីៗនេះ សារព័ត៌មានប្រទេសថៃបានរាយការណ៍ថា ប៉ូលីសថៃគឺបានរកឃើញភស្តុតាងនិងចោទប្រកាន់ប្តីប្រពន្ធ១គូរ រស់នៅក្នុងខេត្ត Nonthaburi ប្រទេសថៃ ពីបទលាក់បាំងសាក.សពរបស់ក្មេងប្រុសទើបចេះដើរតេះតះ នៅក្នុងទូទឹកកក។

កាលពីថ្ងៃទី៧ ខែមករានេះ កាសែត Bangkok Post បានចុះផ្សាយថា មានប្តីប្រពន្ធជនជាតិថៃ១គូរ ដែលប្តីមានឈ្មោះថា Harnnarong Praiphanom និង ប្រពន្ធ Marisa Thong-iam ដោយអ្នកទាំង២មិនបានរាយការណ៍អំពីការស្លា.ប់របស់កុមារទៅកាន់ប៉ូលីសនោះទេ។

តាមការចុះផ្សាយក៏បានឲ្យដឹងទៀតថា ប្តីប្រពន្ធមួយគូនេះមិនមែនជាឪពុកម្តាយបង្កើតរបស់កុមារ២ខួបនេះទេ ដោយពួកគេបានយកក្មេងនោះមកចិញ្ចឹមព្រោះថាឪពុកម្តាយបង្កើតរបស់ក្មេងត្រូវជាមិត្តភក្តិខ្លួន ហើយថែមជាអ្នកញៀនថ្នាំទៀតផង ទើបពួកគាត់សម្រេចចិត្តយកមកចិញ្ចឹមជំនួស។

ប្ដីប្រពន្ធមួយគូរនេះបាននិយាយថា ក្មេងប្រុសស្លា.ប់ដោយសារតែស្លាក់បាយដំណើប ធ្វើឲ្យស្អិតស្ទះបំពង់ខ្យល់។ ការអះអាងនេះក៏ត្រូវបានស្របជាមួយនឹងការបញ្ជាក់ដោយលទ្ធផលធ្វើកោសល្យវិច័យកាលពីថ្ងៃទី ៧ ខែមករាផងដែរ។

ទោះជាយ៉ាងណាក៏ដោយ ម្តាយមីងម្នាក់ទៀតរបស់ក្មេងប្រុសបាននិយាយថា នាងមិនជឿថាក្មួយខ្លួនស្លា.ប់ព្រោះតែស្លាក់បាយដំណើបនោះទេ ដោយហេតុថាបានប្រទះឃើញមានស្នាមជាំជាច្រើននៅលើដៃ និងជើងរបស់ក្មេងប្រុស។

Marisa ដែលត្រូវជាម្តាយចិញ្ចឹមនោះបានរៀបរាប់ថា កាលពីថ្ងៃទី២ មករា នាងនិងកូនបានដេកនៅក្បែរគ្នា ខណៈពេលនោះនាងបានឃើញថា ដៃនិងមាត់របស់កូនពោរពេញដោយបាយដំណើបទៅហើយ។

បន្ទាប់ពីក្មេងប្រុសនោះបានបាត់បង់ជី.វិតហើយ ប្តីប្រពន្ធមួយគូនេះបានសម្រេចចិត្តដាក់កូននៅក្នុងថង់មួយ ដោយសារតែពួកគេខ្លាចមិនហ៊ានសារភាពទៅកាន់ប៉ូលីស។ ជាចុងក្រោយក៏បានយកសាកសពក្មេងប្រុសទៅដាក់ក្នុងទូរទឹកកកបែបនេះតែម្តងទៅ៕

បរទេស៖ ប្រធានាធិបតីបារាំងលោក Macron បានតែងតាំងរដ្ឋមន្ត្រីអប់រំ Gabriel Attal ជានាយករដ្ឋមន្ត្រីថ្មីរបស់ប្រទេស ដោយគាត់បានក្លាយជានាយករដ្ឋមន្ត្រីក្មេងបំផុតក្នុងប្រវត្តិសាស្ត្របារាំងនៅអាយុ ៣៤ ឆ្នាំ។
នៅថ្ងៃទី៩ ខែមករា ទីភ្នាក់ងារសារព័ត៌មាន BBC បានរាយការណ៍ថា លោក Gabriel Attal ត្រូវបានតែងតាំងជានាយករដ្ឋមន្ត្រីថ្មីរបស់ប្រទេសបារាំង ជំនួសឱ្យលោកស្រី Elisabeth Bourne ដែលជានាយករដ្ឋមន្ត្រីបារាំងកាលពីមុនបានលាលែងពីតំណែង។

លោក Gabriel Attal កាលពីមុនគឺជារដ្ឋមន្ត្រីក្រសួងអប់រំ ត្រូវបានមនុស្សជុំវិញពិភពលោកចាប់អារម្មណ៍គាត់ ដោយសារគាត់មានអាយុត្រឹមតែ ៣៤ ឆ្នាំ ដោយគេចាត់ទុកថាគាត់ជានាយករដ្ឋមន្ត្រីក្មេងបំផុតក្នុងប្រវត្តិសាស្ត្របារាំង ហើយក៏ជានាយករដ្ឋមន្ត្រីបារាំងដំបូងគេដែលហ៊ានចេញមុខប្រាប់មហាជនថាគាត់ជាមនុស្សស្រលាញ់ភេទដូចគ្នាដោយបើកចំហផងដែរ។

ក្នុងពេលកាន់តំណែងនេះលោក Attal គឺមានប្រជាប្រិយភាពខ្លាំងក្នុងចំណោមប្រជាជន រួមទាំងអ្នកប្រឆាំងផងដែរ។ ទោះជាយ៉ាងណាក៏ដោយ លោក Attal នឹងមានកិច្ចការដ៏លំបាកមួយនៅចំពោះមុខគាត់ ដូចជាការដឹកនាំរដ្ឋាភិបាលបារាំងក្នុងការបោះឆ្នោតក្រុមប្រឹក្សាអឺរ៉ុបក្នុងខែមិថុនា។

គួរបញ្ជាក់ដែរថា មុនពេលគាត់ឡើងធ្វើជានាយករដ្ឋមន្ត្រី ក៏ត្រូវបានពលរដ្ឋមួយចំនួនរិះគន់ផងដែរ ដោយសារកាលពីមុនគាត់គឺជារដ្ឋមន្ត្រីក្រសួងអប់រំ បានចេញបទប្បញ្ញត្តិហាមឃាត់សិស្សមិនឱ្យស្លៀកសម្លៀកបំពាក់អាបាយ៉ា ចូលក្នុងសាលារៀន ដែលជាសំលៀកបំពាក់ដែលស្ត្រីមូស្លីមតែងតែពាក់។ បន្ទាប់ពីការហាមឃាត់នេះ មានភាពចម្រូងចម្រាសខ្លាំង ភាពលេចធ្លោក្នុងឆាកនយោបាយរបស់លោក Attal ក៏កាន់តែមានប្រជាប្រិយភាពផងដែរ៕

យើងធ្លាប់បានឮថា ឪពុក-ម្តាយមួយចំនួនតែងតែនិយាយកុហកកូនៗរបស់ពួកគេថា បើធ្វើខ្លួនមិនបានល្អទេ នឹងឱ្យប៉ូលិសចាប់, បើជាក្មេងឌឺ អាបនឹងស៊ីថ្លើម, បើមិនឈប់យំទេ ប្រយ័ត្នសត្វតុកកែស៊ីថ្លើម និងពាក្យកុហកជាច្រើនទៀត ។ ការនិយាយពាក្យទាំងនេះរបស់ឪពុក-ម្តាយ គឺចង់ឱ្យកូនៗរបស់ពួកគេនៅស្ងាត់ស្ងៀម ឬមិនធ្វើអ្វីមួយដែលឪពុក-ម្តាយហាមឃាត់ ។ ប៉ុន្តែពាក្យទាំងនេះបានធ្វើឱ្យក្មេងក្លាយជាមនុស្សចូលចិត្តកុហកនៅពេលពួកគេធំពេញវ័យ ។

ក្រុមអ្នកស្រាវជ្រាវផ្នែកវិទ្យាសាស្ត្រសង្គម និងចិត្តវិទ្យា មកពីសាកលវិទ្យាល័យបច្ចេកវិទ្យាណានយ៉ាង បានបោះពុម្ភផ្សាយការស្រាវជ្រាវមួយក្នុងទស្សនាវដ្តី ដែលទទួលបានជំនួយថវិកាពីក្រសួងអប់រំប្រទេសសិង្ហបុរី ហើយការស្រាវជ្រាវនេះមានចំណងជើងថា «Journal of Experimental Child Psychology» ។

ការស្រាវជ្រាវនេះលើកឡើងថា បើឪពុក-ម្តាយ ឬអាណាព្យាបាលនិយាយស្តីកុហកកូនច្រើនប៉ុនណា វានឹងកាន់តែធ្វើឱ្យកូនពួកគេចូលចិត្តនិយាយកុហកច្រើនដែរពេលពួកគេធំឡើង ។ លើសពីនេះ ពួកគេអាចក្លាយជាមនុស្សពិបាកសម្របខ្លួនក្នុងសង្គមរស់នៅទៀតផង ។

ក្រុមអ្នកស្រាវជ្រាវកត់សម្គាល់ថា ពាក្យសម្តីកុហករបស់ឪពុក-ម្តាយបានបង្ហាញពីការប្រើអំណាចទៅលើកូន ដូចជា ៖ បើមិនធ្វើខ្លួនឱ្យល្អទេ នឹងចាប់បោះក្នុងទឹកសមុទ្រឱ្យត្រីស៊ី ។ ការនិយាយបែបនេះ ធ្វើឱ្យកូនពិបាកកែប្រែចិត្តគំនិត និងពិបាកចូលរួមក្នុងសង្គម នៅពេលពួកគេក្លាយជាមនុស្សធំ ។ ហេតុនេះ ការនិយាយឱ្យកូនខ្លាច បានផ្តល់នូវផលប៉ះពាល់ខ្លាំងដល់កូន និងខ្លាំងជាងពាក្យសម្តីដែលឪពុក-ម្តាយនិយាយបិទបាំងការពិតថា «មិនបានយកប្រាក់មកទេ» នៅពេលកូនពួកគេយំចង់ទិញរបស់លេងក្នុងហាង ។

ជំនួយការសាស្ត្រាចារ្យឈ្មោះ Setoh Pepe និងជាប្រធានក្រុមស្រាវជ្រាវរបស់សាកលវិទ្យាល័យបច្ចេកវិទ្យាណានយ៉ាង លើកឡើងថា ៖ «ការចិញ្ចឹមកូនដោយពាក្យកុហក វាជាការងាយស្រួល ព្រោះឪពុក-ម្តាយមិនចាំបាច់ចំណាយពេលពន្យល់ការពិតដ៏ស្មុគស្មាញឱ្យកូនស្តាប់ទេ ។ ផ្ទុយទៅវិញ ឪពុក-ម្តាយគួរតែបង្រៀនកូនឱ្យក្លាយជាមនុស្សស្មោះត្រង់ និងមិនត្រូវធ្វើជាគំរូអាក្រក់ឱ្យកូនយកតម្រាប់តាម» ៕

ភ្នំដ៏ស្រស់ស្អាតមួយនៅឯប្រទេសចិន ឥឡូវនេះគឺបានសាងសង់ជណ្តើរយន្តឡើងភ្នំដែលមានប្រវែងរាប់រយគីឡូមែត្ររួចរាល់ហើយ ដែលភ្ញៀវទេសចរណ៍ទាំងអស់អាចជិះជណ្តើរយន្តនេះឡើងដល់ខាងលើកំពូលភ្នំ ប្រកបដោយភាពងាយស្រួលនិងចំណេញពេលវេលាបំផុត។

ភ្នំ Tanyu ក្នុងតំបន់ Chun’an នៃខេត្ត Zhejiang ជាភ្នំដ៏ស្រស់ស្អាតមួយក្នុងចំណោមភ្នំស្រស់ស្អាតទាំងអស់របស់ប្រទេសចិន។ ភ្នំនេះគឺមានកម្ពស់ត្រឹមតែ ៣៥០ ម៉ែត្រប៉ុណ្ណោះ ប៉ុន្តែដោយសារដោយសារតែកាលៈទេសៈផ្លូវមិនល្អ ក៏ដូចជាអ្នកឡើងភ្នំត្រូវធ្វើដំណើរវែងឆ្ងាយដើម្បីឡើងដល់កំពូលភ្នំនេះ ទើបធ្វើឲ្យមានការលេចចេញនូវគ្រោងការសាងសង់ជណ្តើរយន្តទំនើបដើម្បីឡើងភ្នំតែម្តង។

ជណ្តើរយន្តនេះបានផ្តល់នូវលក្ខណៈងាយស្រួល ជាពិសេសក្មេងៗនិងមនុស្សចាស់ អាចឡើងដល់លើកំពូលភ្នំដ៏ស្រស់ស្អាតបានដូចគ្នាដោយពុំចាំបាច់ហត់ឡើយ។ អ្នកឡើងភ្នំទាំងអស់ចំណាយពេលត្រឹមតែប្រមាណ១០នាទីតែប៉ុណ្ណោះ នឹងបានទៅដល់លើកំពូលភ្នំហើយប្រកបដោយសុវត្ថិភាពខ្ពស់។

ថ្វីបើការជិះជណ្តើរយន្តឡើងភ្នំធ្វើគឺជាមធ្យោបាយដ៏ងាយស្រួលក៏ពិតមែន ប៉ុន្តែក៏មានមនុស្សមួយចំនួនដែលយល់ឃើញថាការធ្វើបែបនេះនឹងមិនទទួលបានបទពិសោធន៍ពិតៗពីការឡើងភ្នំតាមរបៀបធម្មតានោះទេ។ វានឹងធ្វើឲ្យបាត់បង់នូវតម្លៃទាំងនោះ ហើយមនុស្សម្នាគឺនឹងកាន់តែខ្ជិលទៅៗ។

ទោះជាយ៉ាងណា វីដេអូដែលបានដាក់បង្ហោះឲ្យបានឃើញជណ្តើរយន្តកម្ពស់ ៣៥០ ម៉ែត្រនៅភ្នំ Tanyu ប្រទេសចិនថ្មីៗនេះបានទទួលនូវការចាប់អារម្មណ៍យ៉ាងខ្លាំង។ នេះក៏មិនមែនជាភ្នំតំបូងគេដែលមានជណ្តើរយន្តទំនើបសម្រាប់ឡើងនោះទេ ព្រោះថាតំបន់ទេសចរណ៍ Shenxianju នៅ Taizhou ក៏មានជណ្តើរយន្តប្រវែង ១០៤ ម៉ែត្រដែលត្រូវបានគេស្គាល់ថាជា South Sky Ladder ដែលត្រូវបានដំឡើងកាលពី ៣ ឆ្នាំមុនផងដែរ៕

បរទេស៖ ក្មេងប្រុសជនជាតិចិនអាយុ ៩ ឆ្នាំម្នាក់មានគ្រួសក្នុងតម្រងនោមចំនួន ៥៦ ដុំ ដោយគ្រូពេទ្យបាននិយាយថា មូលហេតុដែលបណ្តាលឱ្យមានគ្រួសក្នុងតម្រង់នោមបែបនេះ គឺមកពីទម្លាប់នៃការញ៉ាំជាតិកាល់ស្យូមច្រើនពេក។

នៅថ្ងៃទី៩ ខែមករា យោងតាមប្រភពព័ត៌មានបរទេសមួយបានរាយការណ៍ថា ករណីកុមារដែលមានគ្រួសក្នុងតម្រងនោមចំនួន ៥៦ ដុំគឺបណ្តាលមកពីទម្លាប់នៃការទទួលទានអាហារមិនសមរម្យនិងមានជាតិកាល់ស្យូមលើសកំណត់។ ទាក់ទងនឹងអាហារ ការទទួលទានវីតាមីនច្រើនមិនប្រាកដថាល្អសម្រាប់សុខភាពឡើយ ម្យ៉ាងវិញទៀតបើយើងទទួលទានលើសកម្រិត វានឹងជះឥទ្ធិពលអាក្រក់ដល់រាងកាយធ្វើឱ្យយើងត្រូវចំណាយប្រាក់ដ៏ច្រើនក្នុងការព្យាបាល។

នេះបើយោងតាមសមាគមវេជ្ជសាស្ត្រស្ត្រីនៅប្រទេសចិន បានចេញផ្សាយរូបភាពនៃការវះកាត់គ្រួសក្នុងតម្រងនោមពីអ្នកជំងឺម្នាក់អាយុ ៩ ឆ្នាំនៅមន្ទីរពេទ្យក្នុងទីក្រុង Tianjin បានឱ្យដឹងថា កុមារនោះគឺមានការឈឺចាប់ខ្លាំងនៅតំបន់ក្រលៀន។ ហើយគ្រូពេទ្យបានរកឃើញថា មានដុំថ្មតូចៗជាច្រើននៅក្នុងក្រលៀន នៅក្នុងឆ្អឹងអាងត្រគាក ដោយហេតុផលនេះ គ្រូពេទ្យបានធ្វើការវះកាត់ និងរកឃើញថាកុមារនោះមានគ្រួសក្នុងតម្រងនោមចំនួន ៥៦ ដុំ។

ដំណឹងនេះធ្វើឱ្យម្តាយរបស់កុមារនោះមានការតក់ស្លុតយ៉ាងខ្លាំង ទោះជាយ៉ាងណាក៏ដោយ បច្ចុប្បន្នកុមារវ័យ ៩ ឆ្នាំនោះបានធូរស្បើយពីការវះកាត់ហើយ ប៉ុន្តែមិនទាន់ចេញពីមន្ទីពេទ្យទេ ដោយត្រូវព្យាបាលរយៈពេល ២ បន្ថែមទៀត។ ទោះជាយ៉ាងណា បន្ទាប់ពីធូរស្បើយ គ្រូពេទ្យបានប្រាប់ម្តាយរបស់ក្មេងប្រុសនោះឱ្យកាត់បន្ថយអាហារដែលមិនមានសុខភាពល្អដូចជា មាន់បំពង ដំឡូងបំពង ហតដក ក៏ដូចជាភេសជ្ជៈផ្សេងៗ និងអាហារដែលមានជាតិកាល់ស្យូមចូលទៅក្នុងរបបអាហាររបស់កូន រួមទាំងណែនាំកុមារផឹកទឹកឱ្យបានច្រើន គេងឱ្យបានគ្រប់គ្រាន់ និងហាត់ប្រាណឱ្យបានទៀងទាត់៕

ប្រទេសចិន ៖ បច្ចុប្បន្ន អ្នកស្រាវជ្រាវនៅប្រទេសចិនបានបង្កើតពូជពោតថ្មីមួយប្រភេទ ដែលផ្តល់លក្ខណៈងាយស្រួលដល់កសិករក្នុងការដាំដុះ ។ អ្នកស្រាវជ្រាវលើកឡើងថា ពូជពោតថ្មីនេះងាយស្រួលដាំដុះ, ពុំត្រូវការស្រោចទឹកច្រើន, ប្រឆាំងនឹងសត្វល្អិតបំផ្លាញ ហើយវាផ្តល់នូវទិន្នផលច្រើន បើធៀបនឹងពោតធម្មតា ។

នៅអគារស្រាវជ្រាវពីគ្រាប់ពូជដំណាំមួយកន្លែងស្ថិតនៅខេត្ត Shaanxi ប្រទេសចិន គេបានឃើញអ្នកជំនាញផ្នែកការដាំដុះគ្រាប់ពូជដំណាំបាននាំគ្នាស្រាវជ្រាវ និងបង្កើតពូជពោតប្រភេទថ្មី ។ ពូជពោតថ្មីនេះអាចផ្តល់នូវទិន្នផលខ្ពស់ ព្រមទាំងធន់នឹងជំងឺផ្សេងៗផងដែរ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៣១ ខែធ្នូ ឆ្នាំ២០២៣ ។

អ្នកស្រាវជ្រាវបញ្ជាក់ថា គេអាចដាំដុះពោតប្រភេទថ្មីនេះនៅលើផ្ទៃដីធំទូលាយ ដូចជា ៖ នៅតំបន់ឦសាន, តំបន់ខាងជើងប្រទេសចិន និងតំបន់ខ្វះខាតទឹកស្រោច ។ កសិករអាចដាំពោតប្រភេទថ្មីនេះ ព្រមទាំងដាក់ជីតាមធម្មតា ពីព្រោះវាមានឫសធំចាក់ទៅក្នុងដី ។ ហេតុនេះ វាជួយឱ្យកសិករអាចសន្សំសំចៃទឹកក្នុងការស្រោចស្រព ប៉ុន្តែកសិករទទួលបានផលច្រើនជាងពោតធម្មតា ។

ចាប់តាំងពីឆ្នាំ២០២១ រហូតមកដល់បច្ចុប្បន្ន (ឆ្នាំ២០២៤) អ្នកជំនាញផ្នែកកសិកម្មចិនបានព្យាយាមស្រាវជ្រាវ និងអភិវឌ្ឍន៍ឧស្សាហកម្មគ្រាប់ពូជដំណាំផ្សេងៗជាបន្តបន្ទាប់ ។ ពួកគេទទួលបានជោគជ័យលើការស្រាវជ្រាវពាក់ព័ន្ធនឹងបច្ចេកទេសកសិកម្មជាច្រើនប្រភេទ ដូចជា ៖ ការអភិរក្សធនធានគ្រាប់ពូជរុក្ខជាតិ, ការច្នៃប្រឌិតផ្នែកបច្ចេកវិទ្យា និងការបង្កើតទីតាំងដាំដុះគ្រាប់ពូជដំណាំលំដាប់ប្រទេស ៕