អ្នកមួយចំនួនជ្រាបមកហើយថាតារាកំប្លែងនាយ ពាក់មី មេក្រុមផ្ការីកគ្រប់រដូវ បានបង្ហោះសារនៅលើបណ្តាញសង្គមផ្តាំទៅតារាសម្តែង ហេង នរៈកក្កដា អតីតកីឡាកររួមក្រុមធ្វើអ្វីធ្វើទៅកុំឱ្យតែឌឺដងខ្លួន បានធ្វើឱ្យអ្នកលេងបណ្តាញសង្គមបញ្ចេញមតិយ៉ាងច្រើនដោយបានលើកឡើងថាលេងកីឡាដើម្បីសុខភាព និងសប្បុរសធម៌សោះបែរជាឌឺដងគ្នាដូចរឿងភាគរួមទាំងមតិជាច្រើនទៀត។

កាលពីពេលថ្មីៗមកនេះតារាសម្តែង ហេង នរៈកក្កដា បានបង្ហោះប្រយោគមួយថា «ខ្ញុំតែងតែផ្តល់នៅលទ្ធផលដែលខ្ញុំជោគជ័យ ជូនចំពោះមនុស្សមួយចំនួនតូចដែលមើលស្រាលនៅសមត្ថភាពខ្ញុំ ចេះឯងឱ្យក្រែងចេះគេ»។ ប្រយោគនេះបានធ្វើឱ្យតារាកំប្លែងល្បីឈ្មោះប្រចាំប្រទេសលោកចែម ចាន់រ៉ា ហៅនាយ ពាក់មី តបតទៅ ហេង នរៈកក្កដា ទាំងកណ្តាលយប់ ឈានចូលថ្ងៃទី១១ ខែមករាថា «( កក្កដា ! សង្ឃឹមថាសំណេរនេះ ប្អូនមិនសំដៅលើបងចុះ ) បងចាំមិនភ្លេចទេ ប្អូនលេងក្រុមយើងសុខៗ ប្អូនទៅជួបបង ហេង ឡុង ដើម្បីបង្កើតក្រុមថ្មី ហើយយកកីឡាករក្រុមយើងទៅគ្មានប្រាប់បងមួយម៉ាត់ដែលជាបងជាអ្នកបង្កើត ផ្ការីកគ្រប់រដូវ ។ យើងបានធ្វើរឿងល្អៗជាមួយគ្នាជាច្រើន មានការគាំទ្រពីបងប្អូនប្រជាពលរដ្ឋខ្មែរ បងខឹងណាស់ តែអរគុណបងហេងឡុង ដែលគាត់អាណិតបង គាត់ក៏រំសាយក្រុមនោះវិញ ហើយប្អូនក៏ទៅបង្កើតក្រមថ្មីរាល់ថ្ងៃនេះ តែប្អូនធ្វើអីធ្វើទៅសុំកុំឌឺដងបង បងសុំតែសុខទេ ជូនពរប្អូននិងក្រុមថ្មីបានជោគជ័យ»។

ការផ្លោងពាក្យសម្តីនេះដែរបានធ្វើឱ្យអ្នកលេងបណ្តាញសង្គមបានបញ្ចេញមតិយ៉ាងច្រើនដោយអ្នកលេងបណ្តាញសង្គមបានចូលទៅបញ្ចេញមតិនៅលើផេក KBN NEWS ថា «យូរៗទៅលេងឈ្លោះ ឌឺដង ផ្លែផ្កា ប្រកាន់យកដាក់ខ្លួនតែគ្នាឯងមើលតែខ្លួនឯងម្នាក់ៗ អស្ចារ្យធ្វើមើលកីឡាករអាជីព គួរតែស្ងាត់ៗទៅគេលេងក្រុមណាលេងទៅសិទ្ធិគេថាអ្វីៗថាទៅ ក្រែងលេងសើចឌឺដងបានតើហីបើគិតតែខឹងមិនមានប្រភពហេតុផលច្បាស់លាស់ កុំចេះខឹងអី។មួយវិញទៀតបើប្រកាន់ច្រើនចឹងគួរតែឈប់លេងបាល់ រំសាយក្រុម ឈប់លេងបាល់ អស់ទៅ។ យូរៗទៅកីឡាករក្រុមបាល់ជម្រើសជាតិ លេងមានអ្នកចាប់អារម្មណ៍ លេងមានអ្នកគាំទ្រដោយអ្នកគាំទ្រអាល័យវ៉ល់ៗជាមួយក្រុមបែបនេះវិញហើយ។យល់ថាបង្កើតប្រកួតបាល់ដើម្បីសប្បុរសធម៌ តែកុំបង្កើតរឿងវ៉ល់ឥតប្រយោជន៍ពេក»។

អ្នកលេងបណ្តាញសង្គមផ្សេងទៀតបានបញ្ចេញមតិថា «ឱ!ខ្មែរអើយគ្រាន់តែក្រុមបាល់ទាត់លេងដើម្បីមនុស្សធម៌និងសុខភាពសោះក៏បានឈ្លោះគ្នាដែរ,មេរោគជា ហេង ឡុង ក្រុមគេកំពុងមានបែរទៅយកសមាជិកគេទៅបង្កើតក្រុម១ទៀត,ធ្លាប់ថាឱ្យគេមែន, លេងកីឡាដើម្បីសុខភាព និង សប្បុរសធម៌ សោះ ឌឺដងគ្នាដូចរឿងភាគបើដើរចេញហើយនៅឌឺដងធ្វើអី ចរិកតួឯកណាស់ខ្មែរ ដូចគ្នាសោះអារឿងអត់ប្រយោជន៍ចង់ចាញ់ឈ្នះគ្នាណាស់»។

គួរបញ្ជាក់ផងដែរថាការប្រកួតរបស់ក្រុមផ្ការីកគ្រប់រដូវដែលមាននាយ ពាក់មី ដឹកនាំ បាននាំយកថវិកាជូនមូលនិធិគន្ធបុប្ផាកម្ពុជាចំនួន៣ដងហើយដោយទឹកប្រាក់ចុងក្រោយមានចំនួន ៧ ៧៧៧ ដុល្លារ៕

ថ្មីៗនេះមានការចាប់អារម្មណ៍យ៉ាងខ្លាំងទៅលើវិស័យបវរកញ្ញាបន្ទាប់ពីកម្មវិធីប្រកួត Miss Grand Cambodia សម្រាប់ថ្នាក់រាជធានីខេត្ត បានដំណើរការជាបណ្តើរៗ។ ទោះយ៉ាងណាលំដាប់រងទី២ Miss Grand Cambodia 2023 អ៊ិន លក្ខិណា ចេញមកបង្ហោះសារទៅផេកអ្នកគាំទ្របវរកញ្ញាក្រោយពីយកឈ្មោះនាងទៅធ្វើជាប្រធានបទក្នុងការLiveដោយបណ្តុះបង្អាប់រូបសម្រស់និងភាសារបស់នាង។ ជាមួយគ្នានេះ អ៊ិន លក្ខិណា ក៏បញ្ជាក់ថាបើបន្តយករូបខ្លួននិងឈ្មោះនាងទៅធ្វើរបៀបនេះទៀតនឹងធ្វើតាមផ្លូវច្បាប់។

នៅយប់ថ្ងៃទី១១ ខែមករា កញ្ញា អ៊ិន លក្ខិណា បានចេញមកបង្ហោះសារថា «សួស្ដីបងសូមបងមានសីលធម៌ផងបង ហេតុអ្វីយកឈ្មោះខ្ញុំនិយាយក្នុង LIVE ហេតុអ្វីយកខ្ញុំជាប្រធានបទរបស់ផេកបង ? មុខមាត់ខ្ញុំមិនសូវបាន ភាសាខ្ញុំមិនបានតែខ្ញុំហ៊ានចូលប្រកួតចុះបងវិញហ៊ានអត់ សូមកុំយកឈ្មោះខ្ញុំទៅនិយាយក្នុង live ឬក៏ផុសរូបខ្ញុំបន្ដទៀត បើនៅតែបែបនេះទៀតខ្ញុំនឹងធ្វើតាមផ្លូវច្បាប់»។ ការដែលស្រីស្អាតរូបនេះចេញមកបង្ហោះទាំងយប់អាធ្រាត្រនេះបន្ទាប់ពីមានផេកបវរកញ្ញាមួយបាននិយាយពី លក្ខិណា ឱ្យពង្រឹងភាសាបរទេសរបស់នាងស្របពេលការប្រកួត Miss Grand Cambodia 2024 លំដាប់រងទី២រូបនេះចង់ចូលប្រកួតម្តងទៀត។

ងាកទៅកាន់ផេកបវរកញ្ញាមួយមានឈ្មោះថា « Beauty Pageant Reviewer»វិញក៏បានបង្ហោះសារនៅលើបណ្តាញសង្គមដែរថា «ពេលមកប្រកួតឆាតមកអង្វរបងជួយផុសប្អូនផង ជួយ ផុសប្រម៉ូតប្អូនផងឡើងរលួ.យ នែ! ដល់លូវម៉េចភ្លេចពាក្យសុំគេជួយចឹង? គេនិយាយការពិតម៉េចទទួលយកអត់បាន? ខ្ញុំជាផេក បវរកញ្ញាគឺនិយាយអីដែលពិត វិភាគរឿងជាក់ស្តែង គ្រាន់តែ ថាឱ្យពង្រឹងអង់គ្លេសបន្ថែមចាំមកវិញ ហើយទទួលយកអត់បាន?ខ្ញុំអត់មានចង់ផុសរូបយើងទេ តែអ្នកឯងទេមកសុំខ្ញុំ! ចង់ ឃើញភស្តុតាងអ្នកឯងមកសុំខ្ញុំឱ្យផុសអ្នកឯងអត់?»។ ទោះយ៉ាងណាខ្លឹមសារការបង្ហោះរបស់ផេកអ្នកគាំទ្របវរកញ្ញាខាងលើនេះបានលុបចេញវិញព្រមទាំងរូបភាពដែលធ្លាប់បង្ហោះពី អ៊ិន លក្ខិណា ក៏ម្ចាស់ផេកបានលុបផងដែរ។

គួរបញ្ជាក់ផងដែរថា អ៊ិន លក្ខិណា គឺជាបវរកញ្ញាមួយរូបធ្លាប់ចូលរួមប្រកួតកម្មវិធីជាច្រើនដូចជា Miss Cambodia 2019 Miss World Cambodia 2019 និងកម្មវិធី Miss Grand Cambodia 2021 និង Miss Grand Cambodia 2023 ដោយ លក្ខិណា ពុំទាន់ទទួលបានតំណែងឯកឡើង ខណៈ លក្ខិណា ធ្លាប់ចេញទៅប្រកួតនៅលើឆាកអន្តរជាតិក្នុងតំណែងជា Miss Supranational Cambodia 2022៕

ក្រោយពីបង្ហោះប្រយោគមួយឃ្លានៅលើបណ្តាញសង្គមរបស់ ព្រះកាយច័ន្ទ បានធ្វើឱ្យពិភពបវរកញ្ញាមានការជជែកវែកញែកយ៉ាងខ្លាំងដោយអ្នកខ្លះក៏លើកឡើងថាបេក្ខភាពរូបនេះមានភាពអំនួតទាំងមិនទាន់ជាប់ជ័យលាភីនៅឡើយ ខណៈ ព្រះកាយច័ន្ទ ក៏បានឆ្លើយតបវិញផាំងៗជាមួយហេតុផលសមរម្យ។

នៅរសៀលថ្ងៃទី១១ មករា បេក្ខភាព Miss Grand PHNOM PENH ខណ្ឌទួលគោក ព្រះកាយច័ន្ទ បានថា «នាងខ្ញុំដាក់ពាក្យប្រកួត Miss Grand Cambodia ចឹងបើនាងខ្ញុំមិនបានជាប់ទៅប្រកួតនៅ Miss Grand International ទេ នាងខ្ញុំសុំមិនទៅប្រកួតក្នុងកម្មវិធីផ្សេងនោះទេ។ អរគុណដែលបងប្អូនគាំទ្រខ្ញុំនឹងមិនធ្វើឱ្យបងប្អូនអស់សង្ឃឹមឡើយ ខ្ញុំនឹងព្យាយាមបន្ថែមដើម្បីកម្ពុជា »។ ប្រយោគនេះបានធ្វើឱ្យឡើងកម្តៅខ្លាំងនៅលើបណ្តាញសង្គមរហូតយប់ឡើង ព្រះកាយច័ន្ទ បាន Live បញ្ជាក់បន្ថែមទៅលើពាក្យសម្តីរបស់ខ្លួនដែលបានបង្ហោះក្រោមពីរងនូវពាក្យសម្តីថា «អំនួត»។

ព្រះកាយច័ន្ទ បាននិយាយថាប្រហែលជាអ្នករិះគន់មិនបានយល់ពីប្រយោគរបស់ខ្លួនឬធ្វើជាមិនយល់ដោយនាងបានប្រើពាក្យថា «សុំមិនទៅប្រកួតកម្មវិធីផ្សេង» មិនមែនដាច់អហង្ការនោះទេ។ តារាស្រីរូបនេះថា ខ្លួនមកប្រកួតកម្មវិធី Miss Grand ដឹងហើយថានាងមានគោលបំណងអ្វី ហើយកម្មវិធីនេះគេត្រូវការអ្វី។ បេក្ខភាពរូបនេះថា នាងមិនបានអួតខ្លួនឯងមានគ្រប់លក្ខខណ្ឌដែលកម្មវិធីត្រូវការនោះទេ ប៉ុន្តែនៅក្នុងនោះខ្លួននាងមានអ្វីដែលកម្មវិធីត្រូវការហើយក្រៅពីកម្មវិធី Miss Grand នាងគ្មានអ្វីដែលខាងកម្មវិធីផ្សេងត្រូវការនោះទេ បើយើងដាក់បវរកញ្ញាចំគោលដៅយើងនឹងទទួលបានលទ្ធផលល្អច្រើន។

ព្រះកាយច័ន្ទ បាននិយាយបន្តទៀតដោយលើកឧទាហរណ៍ថា Miss Grand គេត្រូវការ Grand Voice ខណៈដែលនាងមានស្រាប់ នេះហើយជាការដាក់បវរកញ្ញាឱ្យចំគោលដៅ ហើយនាងចេះច្រៀងហើយទៅប្រលង Miss Universe គឺគេមិនយកខ្លួនទេដូច្នេះហើយទើបនាងបានសំណូមពរបើសិនជានាងមិនបានជាប់ Miss Grand Cambodia ដើម្បីឡើងឆាក Miss Grand International ទេនាងសុំមិនទៅចូលរួមកម្មវិធីណាទាំងអស់ បើទៅហើយធ្លាក់ដដែលទៅធ្វើអ្វី។

តួឯកស្រីរូបនេះ បាននិយាយទៀតថា បើសិនជានាងមិនទៅប្រកួតកម្មវិធីផ្សេងហើយទុកឱកាសឱ្យអ្នកផ្សេងដែលមានចំណុចខាងកម្មវិធីត្រូវការទៅប្រលងវិញវានឹងលើកមុខមាត់កម្ពុជាយើងហើយនាំមកុដមកកាន់មាតុភូមិ។ ជាមួយគ្នានេះដែរ ព្រះកាយច័ន្ទ ក៏បានដាក់ចំៗថាកុំអាងតែគ្នា ជាតារា ជាបវរកញ្ញាជាន់លុះក្ស័យ ជាន់អ្នកណាបានតែបើជាន់ព្រះកាយច័ន្ទមិនបានទេ៕