បរទេស៖ កាលពីពេលថ្មីៗនេះ យោងតាមឃ្លីបវីដេអូមួយដែលបានចែកចាយពេញបណ្តាញសង្គមបានឱ្យដឹងថា មានថៅកែចិនម្នាក់បានទិញនារីជនជាតិឡាវតាមជនបទ ដោយឱ្យថ្លឹងគីឡូ និងបង់ថ្លៃត្រឹមតែ ១៥ ដុល្លារអាមេរិកប៉ុណ្ណោះ ដើម្បីធ្វើការជាមួយពួកគេ ធ្វើឱ្យអ្នកនិយមលេងអ៊ីនធឺណិតជាច្រើនបានបញ្ចេញមតិមិនសមរម្យទៅលើឃ្លីបវីដេអូនោះថាជាការជួយដូរស្ត្រីឡាវដើម្បីពេស្យាកម្ម។

នៅថ្ងៃទី១៤ ខែមករា ឆ្នាំ២០២៤ មានវីដេអូឃ្លីបមួយបានលេចចេញជុំវិញពិភពលោកតាមប្រព័ន្ធអ៊ីនធឺណិត ដែលវីដេអូនោះត្រូវបានថតដោយថៅកែចិនម្នាក់ បានប្រមូលផ្តុំនារីៗជនជាតិឡាវជាច្រើននាក់ឱ្យឈរលើជញ្ជីងដើម្បីថ្លឹងគីឡូរបស់ពួកគេ រួចបង់ប្រាក់ឱ្យនារីៗនោះត្រឹមតែ ១៥ ដុល្លារសម្រាប់ម្នាក់ ធ្វើឱ្យឃ្លីបវីដេអូនោះមានការរិះគន់យ៉ាងខ្លាំង ក្នុងចំណោមប្រជាជនឡាវ។

អ្នកនិយមលេងអ៊ីនធឺណែតជាច្រើនបានផ្តល់ព័ត៌មានបន្ថែមថា ការជួញដូរគីឡូនេះសម្រាប់ស្ត្រីឡាវបានកំពុងដំណើរការមួយរយៈមកហើយ ដោយជនជាតិចិនតែងតែមកទិញក្មេងស្រីឡាវដែលរស់នៅជនបទដើម្បីធ្វើការជាមួយពួកគេ រាប់ចាប់ពីការងារទូទៅ ការផ្សាយបន្តផ្ទាល់ VK ឬសូម្បីតែពេស្យាចារ។

លោក Thitsaeng ដែលជាបុគ្គលល្បីល្បាញម្នាក់ក្នុងប្រទេសឡាវ ក៏បានចេញមុខផ្តល់ព័ត៌មានថា លោកនៅមិនទាន់ដឹងការពិតអំពីឃ្លីបនេះ ថាតើពិតជាការលក់នារីឡាវ ឬយ៉ាងណានោះទេ ដោយសារតែបុរសចិនក្នុងឃ្លីបនេះមិននិយាយពីការជួញដូរទាល់តែសោះ។ ទោះជាយ៉ាងណាក៏ដោយ ឃ្លីបនេះត្រូវបានប្រជាជនឡាវ រិះគន់រួចមកហើយ ដោយថាសម័យនេះ ស្ត្រីឡាវហ៊ានលះបង់សេចក្តីថ្លៃថ្នូរ ជាថ្នូរនឹងប្រាក់ ១០ ២០ ដុល្លារ។

ជាមួយគ្នានេះ ប្រជាពលរដ្ឋឡាវមួយចំនួនក៏បានបញ្ចេញមតិដែរថា វីដេអូរបស់ស្រ្តីជនជាតិឡាវម្នាក់ឡើងថ្លឹងគីឡូមិនទាន់បង្ហាញការពិតនៅឡើយទេ។ ប៉ុន្តែស្ត្រីឡាវមួយក្រុមនេះបានបាត់បង់តម្លៃ និងសេចក្តីថ្លៃថ្នូរ រួមទាំងត្រូវបានមនុស្សជាច្រើននិយាយអវិជ្ជមានចំពោះនារីវ័យក្មេងក្នុងឃ្លីបនោះថាមិនសមនឹងធ្វើដូច្នេះទេ។

ទោះជាយ៉ាងនេះក្តី ចំពោះជនជាតិថៃ ដែលមកតាមដានព្រឹត្តិការណ៍ដ៏គួរឱ្យភ្ញាក់ផ្អើលនេះ មនុស្សជាច្រើនបានផ្តល់ព័ត៌មានថា ជាការជួញដូរស្ត្រីឡាវ ដើម្បីពេស្យាកម្ម បង្កើតឃ្លីបអាសអាភាស ហើយលក់វានៅលើបណ្តាញសង្គមក្នុងប្រទេសចិន ហើយផ្នែកខ្លះត្រូវបានបែកធ្លាយ និងផ្សព្វផ្សាយនៅលើ Twitter VK ផងដែរ៕

ប្រទេសថៃ ៖ កាលពីថ្ងៃទី១៤ ខែមករា ឆ្នាំ២០២៤ សារព័ត៌មានថៃចុះផ្សាយថា សមត្ថកិច្ចថៃបានចាប់ខ្លួនឈ្មួញជួញដូរមនុស្សទៅលក់នៅប្រទេសជិតខាង ។ ឈ្មួញរូបនេះបានលួងលោមស្ត្រីថៃជាច្រើននាក់ទៅធ្វើការនៅប្រទេសជិតខាង ហើយបើនារីណាមានមុខមាត់ស្អាតបាត គេនឹងបញ្ជូននាងឱ្យទទួលភ្ញៀវ ។ ស្ត្រីថៃដែលត្រូវបានគេជួញដូរទាំងនេះត្រូវតែទទួលភ្ញៀវយ៉ាងហោចណាស់ ២៥នាក់ ទើបនាងអាចត្រឡប់មកប្រទេសថៃវិញបាន ។

សមត្ថកិច្ចបានចាប់ខ្លួនជនល្មើសឈ្មោះ ម៉ៃណុកផាដូន ឌីអ៊ីន អាយុ៣៦ឆ្នាំ គឺជាឈ្មួញជួញដូរមនុស្សនៅតំបន់លាតប្រាវ ទីក្រុងបាងកក ក្រោយពីសមត្ថកិច្ចទទួលបានរបាយការណ៍ពីភ្នាក់ងារសម្ងាត់ ។ ជនល្មើស ម៉ៃណុកផាដូន គឺជាជំនួយការរបស់បុរសតៃវ៉ាន់ឈ្មោះ អាលៀង ដែលជាប្រធានក្រុម Call Center ។ សមត្ថកិច្ចបានចាប់ខ្លួនជនល្មើសនៅក្នុងខុនដូមួយកន្លែង ព្រមទាំងរឹបអូសវត្ថុតាង ដូចជា ៖ កាំភ្លើ.ងជាច្រើនដើម, ថ្នាំញៀន និងឧបករណ៍ជក់ថ្នាំញៀនមួយចំនួនទៀត ។

ស្ត្រីថៃម្នាក់បានរត់គេចពីឈ្មួញជួញដូរមនុស្ស និងប្រាប់សមត្ថកិច្ចថា ក្រុម Call Center បានលួងលោមស្ត្រីថៃដែលគ្មានការងារធ្វើឱ្យទៅធ្វើការនៅប្រទេសជិតខាង ហើយបើអ្នកណាមានមុខមាត់ស្អាតបាត គេនឹងបញ្ជូននាងឱ្យទៅដេកជាមួយទទួលភ្ញៀវ ។ ស្ត្រីរូបនេះបន្តថា ខ្លួននាងបានចាញ់បោកពួកគេ ហើយនាងបានរស់នៅប្រទេសជិតខាងអស់ជាច្រើនខែ ។

បើតាមសេចក្តីរាយការណ៍ឱ្យដឹងថា ការិយាល័យ Call Center ស្ថិតនៅក្នុងអគារចំនួន៨ជាន់ ។ រីឯជនជាតិថៃដែលជិតស្និទ្ធជាមួយបុរសតៃវ៉ាន់ឈ្មោះ អាលៀង ដែលជាប្រធានក្រុម Call Center គឺជនល្មើសឈ្មោះ ម៉ៃណុកផាដូន ។ ជនល្មើសជាអ្នកប្រចាំការនៅប្រទេសថៃ និងមានតួនាទីស្វែងរកមនុស្សទៅធ្វើការនៅប្រទេសជិតខាង ក្នុងនោះគេបានស្វែងរកអ្នកគ្មានការងារធ្វើ តាមរយៈការជជែកក្នុងហ្វេសប៊ុក និងតិកតុក ។

សេចក្តីរាយការណ៍បញ្ជាក់ថា ជនល្មើស ម៉ៃណុកផាដូន បានព្យាយាមលោងលោមស្ត្រីថៃជាច្រើនរូប ហើយចុងក្រោយនេះ គេបានលួងលោមស្ត្រីថៃចំនួន២រូបទៀត បន្ទាប់មក រូបគេក៏បង្ខំពួកនាងឱ្យប្រើប្រាស់ថ្នាំញៀន ។ នៅថ្ងៃទី១៤ ខែមករា ឆ្នាំ២០២៤ ជនល្មើសត្រៀមបញ្ជូននារី២រូបចុងក្រោយនេះទៅប្រទេសជិតខាង ប៉ុន្តែត្រូវបានសមត្ថកិច្ចចាប់ខ្លួនមុន គឺចាប់ខ្លួននៅថ្ងៃទី១៣ ខែមករា ។

ស្ត្រីជនរងគ្រោះម្នាក់បានចង្អុលទៅកាន់ជនល្មើស និងប្រាប់ថា ជននេះហើយដែលបាននាំនាងទៅធ្វើការនៅប្រទេសជិតខាង ។ ស្ត្រីជនរងគ្រោះប្រាប់ថា ៖ «ពេលដំបូង គាត់បានបបួលខ្ញុំទៅធ្វើការនៅក្រៅប្រទេស ហើយខ្ញុំបានឃើញគាត់កាន់កាំភ្លើងតាមខ្លួន ទើបខ្ញុំភ័យខ្លាចតែម្តង» ។

ចំណែកជនល្មើស ម៉ៃណុកផាដូន និយាយថា មូលហេតុដែលខ្លួនប្រកបមុខរបរនេះ ដោយសារខ្លួនធ្លាប់ឃើញសង្សារមានទំនាក់ទំនងស្នេហាជាមួយឪពុកចិញ្ចឹម ទើបខ្លួនបែកអារម្មណ៍ និងព្យាយាមចង.កសម្លាប់ខ្លួននៅលើដើមស្វាយ ។ ប៉ុន្តែមិនស្លាប់ ដោយសារមានចោរមកលួចបេះស្វាយក្នុងពេលនោះ ។ ក្រោយមក ខ្លួនក៏ប្រកបមុខរបរជាក្រុម Call Center ជាមួយបុរសតៃវ៉ាន់នៅប្រទេសកម្ពុជា អស់រយៈពេលជាង៣ឆ្នាំ ដោយខ្លួនមានតួនាទីរកមនុស្សទៅធ្វើការនៅទីក្រុងប៉ោយប៉ែត ។

ជនល្មើសបញ្ជាក់ថា បើខ្លួនអាចរកបានមនុស្សម្នាក់ទៅធ្វើការនៅក្រៅប្រទេស ខ្លួននឹងទទួលបានថ្លៃឈ្នួលពីថៅកែតៃវ៉ាន់ ចំនួន៥.០០០បាត ។ ជនល្មើសនិយាយបណ្តើរយំបណ្តើរថា ៖ «សូមទោស ដែលខ្ញុំធ្វើបែបនេះ ។ បើខ្ញុំមិនធ្វើទេ ខ្ញុំខ្លាចស្លាប់ ។ ថៅកែនិយាយថា បើខ្ញុំមិនធ្វើការងារនេះទេ គាត់នឹងចាប់បងប្អូនខ្ញុំទាំងអស់» ។

ចុងក្រោយ សមត្ថកិច្ចបានចោទប្រកាន់ជនល្មើសចំនួន៦ករណី រួមមាន ៖
១-ជួញដូរមនុស្ស
២-បង្ខំឱ្យប្រើប្រាស់កម្លាំងពលកម្ម
៣-គំរាមកំហែងអ្នកដទៃ
៤-ឃុំឃាំងអ្នកដទៃ
៥-បានរួមចំណែកជាមួយក្រុមឈ្មួញជួញដូរមនុស្សឆ្លងប្រទេស
៦-ប្រើប្រាស់ថ្នាំញៀន និងកាំភ្លើ.ង ៕

បរទេស៖ ក្រុមហ៊ុនអាកាសចរណ៍ Jetstar Australia បានរងការរិះគន់យ៉ាងខ្លាំងក្នុងរយៈពេលបីថ្ងៃចុងក្រោយនេះ បន្ទាប់ពីបង្ហោះពាក្យមិនសមរម្យតាមហ្វេសប៊ុកថា លុយវៀតណាម ដែលគេស្គាល់ថាជាលុយដុងគឺគួរឱ្យអស់សំណើច។

កាលពីថ្ងៃទី១០ ខែមករា យោងតាមគេហទំព័រអន្តរជាតិ Daily Mail បានឱ្យដឹងថា Fanpage ដែលមានអ្នកតាមដាន ៧៨០,០០០ របស់ក្រុមហ៊ុនអាកាសចរណ៍ Jetstar Australia បានបង្ហោះខ្លឹមសារមួយនៅលើហ្វេសប៊ុកថា “សុំទោស ប៉ុន្តែលុយវៀតណាម ដែលគេស្គាល់ថាជាលុយដុងគឺគួរឱ្យអស់សំណើចណាស់”។ នៅក្រោមការបង្ហោះនេះ Fanpage របស់ក្រុមហ៊ុននេះបានបន្តបញ្ចេញមតិបែបកំប្លែងទៀតថា “មួយលានដុងស្មើនឹង ៦៥ ដុល្លារអូស្ត្រាលី ដូច្នេះប្រសិនបើខ្ញុំមាន ៦៥ ដុល្លារអូស្ត្រាលី ខ្ញុំនឹងក្លាយជាមហាសេដ្ឋី”។

ទោះជាយ៉ាងណាក៏ដោយ ការបង្ហោះនេះត្រូវបានលុបចោលភ្លាមៗ នៅពេលដែលមនុស្សជាច្រើនមានការប្រតិកម្មយ៉ាងខ្លាំង ដោយពួកគេបាននិយាយថា មានតែមនុស្សល្ងីល្ងើទេដែលអាចនិយាយលេងបែបនេះបាន។ អ្នកខ្លះទៀតក៏និយាយថា ក្រុមហ៊ុនអាកាសចរណ៍ Jetstar Australia ត្រូវតែចេញលិខិតសុំទោសជាផ្លូវការដល់ប្រជាជនវៀតណាម។ ចំពោះអ្នកផ្សេងទៀតក៏និយាយដែរថា រឿងកំប្លែងនេះគ្មានវិជ្ជាជីវៈ មិនគោរពវប្បធម៌របស់គេ និងរើសអើងជាតិសាសន៍។

ដូច្នេះហើយ កាលពីថ្ងៃទី ១២ ខែមករា ក្រុមហ៊ុនអាកាសចរណ៍នេះបានធ្វើការសុំទោសជាសាធារណៈនៅលើគេហទំព័ររបស់ខ្លួន ដោយទទួលស្គាល់ថាការបង្ហោះ Facebook គឺ “មិនសមរម្យ” និង “មិនគួរត្រូវបានបង្ហោះ” នោះទេ ។ ក្រុមហ៊ុនក៏សូមអភ័យទោសដោយស្មោះចំពោះបទល្មើសដែលបង្កឡើង ហើយបានសន្យាថានឹងពិនិត្យមើលដំណើរការរបស់ខ្លួនឡើងវិញ ដើម្បីធានាថាកំហុសស្រដៀងគ្នានេះនឹងមិនកើតឡើងទៀតទេ។

គួរបញ្ជាក់ដែរថា ក្រុមហ៊ុនអាកាសចរណ៍ Jetstar Australia គឺជាក្រុមហ៊ុនបុត្រសម្ព័ន្ធគ្រប់គ្រងទាំងស្រុងរបស់ Qantas ដែលមានមូលដ្ឋាននៅទីក្រុងមែលប៊ន ប្រទេសអូស្ត្រាលី និងប្រតិបត្តិការបណ្តាញហោះហើរក្នុងស្រុក តំបន់ និងអន្តរជាតិ។ ក្រុមហ៊ុនអាកាសចរណ៍នេះដំណើរការជាចម្បងនៅព្រលានយន្តហោះ Melbourne ដោយបច្ចុប្បន្នក្រុមហ៊ុនអាកាសចរណ៍នេះមានជើងហោះហើរទៅកាន់ប្រទេសវៀតណាមពីទីក្រុងស៊ីដនី និងមែលប៊ន៕

ប្រទេសថៃ ៖ នៅដើមឆ្នាំ២០២៤នេះ ពលរដ្ឋថៃជាច្រើននាក់បានចាប់អារម្មណ៍នឹងដានជើងដ៏ធំមួយនៅលើថ្មថា តើវាជាដានជើងរបស់យក្ស ឬដានជើងអ្វីឱ្យប្រាកដ? ដានជើងដ៏ធំនេះស្ថិតនៅភូមិហួយសាយ ឃុំបានម៉ៃ ស្រុកខនបុរី ខេត្តនគររាជសីម៉ា ។ អ្នកបានឃើញដានជើង លើកឡើងថា វាស្រដៀងគ្នានឹងដានជើងរបស់មនុស្សមាឌធំ ពីព្រោះដានជើងមានប្រវែងរហូតដល់២ម៉ែត្រឯណោះ ។

មេភូមិហួយសាយ អ្នកស្រី កាន់ចាផន ឈើងកាថូក លើកឡើងថា បច្ចុប្បន្ន មនុស្សជាច្រើនចាប់អារម្មណ៍នឹងដានជើងដ៏ធំ និងចែកចាយក្នុងបណ្តាញសង្គម ។ ពួកគេសន្និដ្ឋានថា វាជាដានជើងរបស់មនុស្សមាឌធំ ។ ប៉ុន្តែអ្នកភូមិចាស់ៗរស់នៅក្នុងតំបន់បានឃើញដានជើងនេះអស់រយៈពេលរាប់សិបឆ្នាំមកហើយ ហើយមនុស្សភាគច្រើនទើបតែចាប់អារម្មណ៍ ។

អ្នកស្រីមេភូមិបន្តថា មានអ្នករស់នៅខេត្តឧទ័យថានី ២-៣នាក់បានសុបិនឃើញដានជើងព្រះពុទ្ធកើតឡើងនៅបរិវេណនេះ ហើយពួកគេក៏នាំសាច់ញាតិធ្វើដំណើរមកកាន់កន្លែងនេះដើម្បីឱ្យដឹងថា តើវាពិតជាមានដានជើងដូចការសុបិនដែរឬទេ ? នៅពេលធ្វើដំណើរមកដល់កន្លែងនេះ ស្រាប់តែពួកគេឃើញមានដានជើងដ៏ធំពិតមែន ហើយនាំគ្នាក្រាបសំពះ ដោយសារជឿថា នេះជាដានជើងរបស់ព្រះពុទ្ធ ។

អ្នកស្រីមេភូមិនិយាយថា ៖ «ក្រុមអ្នករស់នៅខេត្តឧទ័យថានី បានសុបិនឃើញដានជើង ហើយពួកគេក៏នាំគ្នាធ្វើដំណើរមកបួងសួងនៅទីនេះ ។ កាលពី៥ឆ្នាំមុន មានព្រះសង្ឃ និងអាចារ្យវត្ត ដែលបានមកស្នាក់នៅទីនេះ និងបានឃើញដានជើងនេះដែរ ប៉ុន្តែមិនបានអភិរក្សអ្វីទេ» ។

មនុស្សមួយចំនួនធំបានមកសុំពរពីដានជើងនេះ ហើយពួកគេក៏សម្រេចបំណងប្រាថ្នារៀងៗខ្លួន ដូចជា ៖ ត្រូវឆ្នោតរង្វាន់ធំ ជាដើម ។ ហេតុនេះ អ្នកមានជំនឿតែងតែមកបួងសួងជារៀងរាល់ឆ្នាំ ហើយភាគច្រើន ពួកគេមកបួងសួងនៅខែមីនា និងខែមេសា ។ អ្នកស្រុកសង្ឃឹមថា នៅថ្ងៃអនាគត តំបន់នេះនឹងក្លាយជាកន្លែងសម្រាប់សូត្រធម៌ ឬកន្លែងទេសចរណ៍ ។

ចំណែកអ្នកលេងបណ្តាញសង្គមថៃនិយាយថា ៖ «បើប្រាប់ថា គឺជាដានជើងរបស់យក្ស ខ្ញុំនឹងទៅមើលដែរ តែនេះប្រាប់ថា ជាដានជើងព្រះពុទ្ធ ។ ដូច្នេះ ទុកឱ្យមេភូមិមើលតែម្នាក់ឯងទៅ» ។ ជនជាតិថៃម្នាក់ទៀតថា ៖ «ទីនេះ អាចមានយក្សរស់នៅកាលពីសម័យបុរាណ» ។

រីឯជនជាតិថៃម្នាក់ទៀតនិយាយថា ៖ «តើព្រះពុទ្ធធ្លាប់ធ្វើដំណើរមកប្រទេសថៃមែនទេ? មិនធ្លាប់មកទេ ដោយសារព្រះពុទ្ធគង់នៅប្រទេសឥណ្ឌា» ៕

បរទេស៖ ថ្មីនេះៗ អ្នកបុរាណវិទូបានរកឃើញទីក្រុងមួយដែលបានបាត់បង់នៅក្នុងព្រៃអាម៉ាហ្សូន កាលពី ២,០០០ ឆ្នាំមុន ដែលធ្លាប់មានប្រជាជនរស់នៅយ៉ាងហោចណាស់ ១០,០០០ នាក់។

នៅថ្ងៃទី១២ ខែមករា យោងតាមទីភ្នាក់ងារសារព័ត៌មានបរទេសមួយបានរាយការណ៍ថា បុរាណវិទូ Stephen Rosten បានរកឃើញអត្ថិភាពនៃទីក្រុងបុរាណមួយ នៅតំបន់អេក្វាឌ័រ ដោយគាត់បានរកឃើញគំនរដី និងផ្លូវដែលបង្កប់ក្នុងដី ប៉ុន្តែគាត់មិនច្បាស់ថាវាជាអ្វីពិតប្រាកដនោះទេ។

ទោះជាយ៉ាងណាក៏ដោយ យោងតាមការធ្វើផែនទីចុងក្រោយដោយប្រើបច្ចេកវិទ្យាឡាស៊ែរ និងការស៊ើបអង្កេតនៅមជ្ឈមណ្ឌលជាតិសម្រាប់ការស្រាវជ្រាវវិទ្យាសាស្ត្ររបស់ប្រទេសបារាំង បានបង្ហាញថាផ្លូវលំគឺជាផ្នែកនៃបណ្តាញដ៏ក្រាស់នៃការតាំងទីលំនៅ និងផ្លូវតភ្ជាប់។ វាត្រូវបានលាក់នៅក្នុងព្រៃភ្នំ Andes ដែលមានរយៈពេលប្រហែលមួយពាន់ឆ្នាំ ដោយក្រុមអ្នកបុរាណវិទូផ្សេងទៀតបាននិយាយថា “វាជាជ្រលងភ្នំនៃទីក្រុងដែលធ្លាប់បាត់បង់”។

តំបន់នេះត្រូវបានតាំងទីលំនៅដោយប្រជាជន Upano នៅចន្លោះប្រហែល ៣០០ និង ៥០០ ដល់ ៦០០ មុនគ.ស ដែលនេះគឺជាសម័យកាលមួយដែលស្រដៀងនឹងចក្រភពរ៉ូមនៅអឺរ៉ុបដែរ។
អ្នកស្រាវជ្រាវបានរកឃើញទៀតថា អគារស្នាក់នៅ និងពិធីនានាត្រូវបានសាងសង់លើដី ៦.០០០ ដែលហ៊ុព័ទ្ធដោយវាលស្រែសិកម្មដែលមានប្រឡាយបង្ហូរទឹក ដោយផ្លូវធំបំផុតមានទទឹង ១០ ម៉ែត្រ បណ្តោយ ១០-២០ គីឡូម៉ែត្រ ។

អ្នកបុរាណវត្ថុវិទូបាននិយាយថា ការប៉ាន់ប្រមាណចំនួនប្រជាជនគឺពិបាកណាស់។ ប៉ុន្តែគេបានប៉ាន់ស្មានថា ទីតាំងនេះគឺជាផ្ទះរបស់អ្នករស់នៅយ៉ាងហោចណាស់ ១០,០០០នាក់ ហើយប្រហែលជាមានរហូតដល់ ១៥,០០០ ឬ ៣០,០០០ នៅកំពូលរបស់វា។ នេះបង្ហាញពីការកាន់កាប់ដ៏ក្រាស់ក្រែល និងសង្គមដ៏ស្មុគស្មាញមួយដែលអ្នកជំនាញបុរាណវិទ្យានៃសាកលវិទ្យាល័យ Florida លោក Michael Heckenberger បានសិក្សាកន្លងមក។

កាលពីពេលថ្មីៗនេះ ការចែកចាយរូបភាពក្នុងបណ្តាញសង្គមដែលមានប្រភពមកពីប្រទេសវៀតណាម អំពីគ្រឿងសមុទ្របង្កកខុសច្បាប់ និងគ្មានអនាម័យបំផុត ហើយបើពិសារចូលទៅនឹងប៉ះពាល់យ៉ាងធ្ងង់ធ្ងរដល់សុខភាព ក៏ដូចជាកើតមាននូវជំងឺរ៉ាំរៃផ្សេងៗ។

តាមរយៈរូបភាពដែលបានបែកធ្លាយនោះគឺបានបង្ហាញឲ្យឃើញថា ម្ចាស់ហាងបានយកបន្ទប់ទឹក ដែលជាកន្លែងគ្មានអនាម័យទាល់តែសោះមករក្សាទុកគ្រឿងសមុទ្រ និងសាច់បង្កក ជាច្រើនប្រភេទ។ មិនតែប៉ុណ្ណោះ គ្រឿងសមុទ្រទាំងនោះទៀតសោត មើលសភាពទៅគឺគេដាក់បង្កកខ្លាំង រហូតច្រឡំស្មានថាជាដុំទឹកកក១ដុំៗទៅហើយ។

ទោះជាយ៉ាងណា តាមការស្រាវជ្រាវអំពីផលប៉ះពាល់នៃការពិសារគ្រឿងសមុទ្របង្កក រឺសាច់បង្កកដែលគ្មានស្តង់ដារត្រឹមត្រូវនេះ វានឹងអាចផ្តល់នូវផលប៉ះពាល់ដល់សុខភាពមនុស្សយ៉ាងធ្ងន់ធ្ងរ ព្រោះថាការរក្សារទុកគ្រឿងសមុទ្របង្កកមិនបានត្រឹមត្រូវឬយូរពេក អាចនឹងបង្ករឲ្យមានការកើនឡើងនៃកម្រិតបាក់តេរីមិនល្អជ្រៀតចូលទៅក្នុងសាច់បង្កកនោះ។

ម៉្យាងវិញទៀត វានឹងធ្វើឲ្យបាត់បង់នូវរសជាតិនិងអាហារូបត្ថម្ភ ជំនួសដោយនាំមកវិញនូវឆ្លងនូវមេរោគផ្សេងៗទៅក្នុងរាងកាយរបស់យើង។ ជាងនេះទៅទៀត សម្រាប់អ្នកដែលមានបញ្ហាអាឡែហ្សីវិញ បើទទួលទានរបស់គ្មានគុណភាពទាំងនេះចូលទៅនឹងមានប្រតិកម្មភ្លាមៗតែម្តង។

គ្រឿងសមុទ្របង្កកគឺត្រូវលាយជាមួយសារធាតុបារតដើម្បីរក្សាទុកឲ្យបានយូរ ដូច្នេះហើយបើនៅក្នុងការបង្កកទាំងនោះមានជាតិបារតច្រើនខ្លាំងពេក ប្រាកដណាស់ថាអ្នកនឹងទទួលទានបានទំាងជាតិបារតចូលទៅក្នុងខ្លួនដែរ ដែលនេះពិតជាប៉ះពាល់យ៉ាងខ្លាំងចំពោះស្រ្តីមានផ្ទៃពោះនិងកុមារតូចៗ។

ដូច្នេះ សូមអំពាវនាវទៅកាន់បងប្អូនប្រជាពលរដ្ឋខ្មែរទាំងអស់ សូមធ្វើការប្រុងប្រយ័ត្នខ្ពស់ចំពោះចំណីអាហារ ជាពិសេសគឺសាច់និងគ្រឿងសមុទ្របង្កកនេះផ្ទាល់តែម្តង។ មុននឹងធ្វើការជាវយកមកទទួលទាន សូមពិនិត្យនិងរកប្រភពឲ្យបានច្បាស់លាស់ផងដែរ៕

ប្រទេសថៃបានឈរលើកំពូលតារាងក្នុងចំណោមភ្ញៀវអន្តរជាតិមកកាន់ព្រះរាជាណាចក្រកម្ពុជាច្រើនបំផុតដែលជិត ១,៣៤ លាននាក់កើនឡើង ១៨៩ ភាគរយក្នុងអំឡុងខែមករាដល់ខែកញ្ញាឆ្នាំ ២០២៣។ បន្ទាប់មកតាមពីក្រោយដោយភ្ញៀវទេសចរវៀតណាម ៧៣០.០៧៥ នាក់ និងចិន ៤០៥.៥១៤ នាក់បានធ្វើដំណើរមកកម្ពុជា កើនឡើង ១៥៦ ភាគរយ និង ៥៤៩ ភាគរយរៀងគ្នា។ ដូច្នេះហើយ នៅឆ្នាំ ២០២៣ នេះប្រទេសកម្ពុជាបានស្វាគមន៍ភ្ញៀវទេសចរអន្តរជាតិប្រមាណ ៤,៤ លាននាក់កើនឡើងពី ១,៩ លាននាក់បើធៀបនឹងឆ្នាំ ២០២២។

កាលពីឆ្នាំ ២០២២ ប្រទេសកម្ពុជាបានស្វាគមន៍ភ្ញៀវទេសចរអន្តរជាតិត្រឹមតែ ២.២៧ លាននាក់ប៉ុណ្ណោះដោយសារជំងឺរាតត្បាត។ ទោះជាយ៉ាណាក៏ដោយនៅឆ្នាំ ២០២៣ ភ្ញៀវទេសចរអន្តរជាតិដែលមកទស្សនាកម្ពុជាគឺមានកើនឡើងខ្លាំង នេះបើយោងតាមរបាយការណ៍ ភ្ញៀវទេសចរបរទេសចំនួន ១.៣៤ លាននាក់បានមកទស្សនាប្រទេសកម្ពុជាតាមអាកាស កើនឡើង ១៨៦ ភាគរយ និង ២.៥៨ លាននាក់តាមផ្លូវគោក និងផ្លូវទឹក កើនឡើង ២២៤ ភាគរយ។

ដូច្នេះហើយ បច្ចុប្បន្ននៅដើមខែមករា ឆ្នាំ២០២៤ នេះប្រទេសកម្ពុជាបានទទួលភ្ញៀវទេសចរណ៍ជាង ៣.២៨ លាននាក់ ដោយភាគច្រើនមកពីទេសចរណ៍ក្នុងស្រុក ដោយជនជាតិខ្មែរមានចំនួនជាង ៣ លាននាក់ និងជនបរទេសចំនួន ៥៨,៧២២ នាក់ នេះបើតាមសម្តី លោក តុប សុភ័គ អ្នកនាំពាក្យក្រសួងទេសចរណ៍ដែលបាននិយាយកាលពីពេលថ្មីៗនេះ។

ប្រទេសកម្ពុជាគឺជាគោលដៅទេសចរណ៍ដែលមានសុវត្ថិភាព ហើយភ្ញៀវទេសចរបរទេសទាំងអស់ រួមទាំងជនជាតិចិន ត្រូវបានស្វាគមន៍យ៉ាងកក់ក្តៅក្នុងការមកទស្សនាព្រះរាជាណាចក្រនេះ។ វិស័យទេសចរណ៍គឺជាប្រភពចំណូលដ៏សំខាន់មួយរបស់ប្រទេស និងផ្តល់ការងារដល់មនុស្សយ៉ាងច្រើន។ វិស័យនេះត្រូវបានចាត់ទុកថាជាសសរស្តម្ភសេដ្ឋកិច្ចដ៏សំខាន់មួយរបស់កម្ពុជា ទាំងក្នុងនិងក្រៅប្រទេស៕